Bitootessa 18/2018(ENA) – Waltajjiin falmii boordiin filannoo biyyaalessaa Itiyoophiyaa qopheesse filannoon walii galaa torbaffaa dhufu caalaatti hammataa fi hirmaachisaa akka ta’u gochuuf kan yaadame falmii filannoo paartilee siyaasaa kan jalqabaati. Walitti qabduun boordii filannoo biyyaalessaa Itiyoophiyaa Meelaatwarqi Hayiluu wayita kana, boordichi baatiiwwan darban muraasa waltajjii falmii kana qopheessaa turuusaa ibsaniiru. Kaka’umsi kun paartileen siyaasaa yaada imaammataa qaban ummataaf kan itti ibsan carraa uumuun paartileen ejjennoosaanii beeksifachuuf akka gargaaruu fi ummanni filatus hubannoo caalaa akka argatu haala mijataa akka uumu eeraniiru. Akka walitti qabduun boordii kun jedhanitti, boordichi paartilee filannoo walii galaa torbaffaarratti dorgoman deeggaruuf leenjii dabalatee paartileen falmii yaalii akka gaggeessan carraa uumeera. Waltajjichi Paartilee siyaasaa, bakka bu’oota hawaasa Siviilii fi barattoota dhaabbilee barnootaa walitti fiduun dirreen siyaasaa akka bal’atu gumaacha gaarii akka taasisu ibsaniiru. Waltajjiin falmii kun qama filannoon Walii galaa biyyaalessaa caalaatti hammataa fi hirmaachisaa karaa ta’een akka gaggeeffamu tattaaffii taasisaa jiruu ta’uu walitti qabduun boordii kun ibsaniiru.

Bitootessa 18/2018 (ENA): Adeemsi Marii Ajandaa walitti qabuu naannoo Tigraay Bitooteessa 23 hanga 25, 2018 Finfinneetti akka gaggeeffamu Komishiniin Marii Biyyaalessaa Itiyoophiyaa beeksise. Adeemsa marii naannoo Tigraayitti gaggeeffamuuf jiru ilaalchisee komishiniin marii biyyaalessaa Itiyoophiyaa har’a miidiyaaleef ibsa kenneera. Adeemsichi hirmaachisaa fi hunda kan hammatee akka ta’uuf hojiin Komishinichi hanga ammaatti hojjechaa ture milkaa’aa ta’uu Komishinarri Olaanaan Komishinichaa Piroofeesar Masfin Ara’ayaan ibsaniiru. Hojiin kun aanaa irraa eegalee haala ummata hirmaachisuun hojjetamaa akka tures ibsaniiru. Lammiileen Naannoo Tigraay keessatti argaman adeemsa marii kanarratti hirmaachuuf mirga guutuu kan qaban ta’uu fi bu’a qabeessummaa adeemsichaaf gumaacha gaarii gumaachuu isaanii ibsaniiru. Komishinarri Olaanaan kun ibsa kennaniin Komishinichi adeemsa marii naannoo Tigraay keessatti eegaluu fi haala mijataa uumuuf tattaaffii bal’aa taasisaa turuu yaadachisaniiru. Bulchiinsa yeroo naannichaa, paartilee siyaasaa naannicha keessatti socho’anii fi qooda fudhattoota biroo magaalaa Maqalee fi Finfinnee waliin mariin yeroo 22 ol adeemsifamuu isaa hubachiisaniiru. Haa ta’u malee, tattaaffiin kun adeemsi naannicha keessatti gaggeeffamuuf haala mijataa waan hin uumneef, adeemsi ajandaa walitti qabuu fi filannoo bakka bu’ummaa Finfinneetti akka gaggeeffamu murtaa’eera. Adeemsi marii ajandaa walitti qabuu naannichatti Bitootessa 23 hanga 25, 2018 Finfinneetti akka gaggeeffamu beeksisaniiru. Adeemsa Bitootessa 23 irraa eegalee gaggeeffamu kana irratti qooda fudhattoonni sadarkaa sadarkaan jiran hundi dammaqinaan akka hirmaatan waamicha dhiyeessaniiru.

Bitootessa 18/2018 (ENA): Itiyoophiyaa fi Faransaay walta’iinsa biyyoota lamaanii damee nageenya eegsisuu irratti qaban gara walta’iinsa tarsiimootti guddisuuf har’a waliigaltee biyyoota lamaanii mallatteessaniiru. Waliigaltee kana Ministirri Raayyaa Ittisa Biyyaa Injiinar Aayishaa Mahaammadii fi Itiyoophiyaatti Ambaasaaddara Faransaay Aleeksiis Laameech mallatteessaniiru. Waliigaltichi miseensonni Raayyaa Ittisaa Itiyoophiyaa ergama nagaa eegsisuutti bobbaafaman qophii hojii isaanii guddisuu fi dandeettii idil-addunyaa isaanii daran cimsuuf kan kaayyeffate ta’uu ibsameera. Waliigaltee kanaan ragaaleen leenjii Inistiitiyuutii Leenjii Deeggarsa Nagaa Idil-addunyaa (IPSTI) fi Mana Barumsaa Leenjii Mul’ataa (CTS) irraa kennaman sadarkaa idil-addunyaatti beekamtii kan argatan yoo ta’u, hojiin qorannoo sadarkaa idil-addunyaatti kan gaggeeffamu ta’a. Waliigaltichi ragaaleen leenjii Wiirtuun Nageenya Eegumsa Itiyoophiyaa kennan Dhaabbata Mootummoota Gamtoomanii fi Gamtaa Afriikaa biratti beekamtii olaanaa akka qabaatanis kan kaayyeffate ta’uu ibsameera. Milkaa’ina kanaaf mootummaan Faransaay deeggarsa teeknikaa fi meeshaa barbaachisaa ta’e kan kennu yoo ta’u, dandeettii nageenya eegsistoota dirree waraanaa keessatti balaa fanjii dhoo’au irraa of eeguu guddisuuf xiyyeeffannoon addaa ni kennama. Waliigalteen kun dippilomaasii waraanaa cimaa biyyoota lamaan gidduu jiru irratti kan hundaa’edha. Itiyoophiyaan ergama nageenya eegsisuu idil-addunyaa keessatti adda duree ta’uun hirmaachuu ishee fi loltoota nageenya eegsistoota addunyaa adda duree ta’an biratti argamuun ishee itti fufuun tumsa kana cimsuuf sababa ta’uun kaafamaniiru. Waliigalteen kun gumaacha Itiyoophiyaan nagaa fi tasgabbii addunyaaf qabdu caalaatti bu’a qabeessa akka taasisu himama. Kana malees, michummaa biyyoota lamaanii yeroo dheeraaf ture sadarkaa haaraatti akka ceesisu ibsameera jedha odeeffannoon ENA’n Miidiyaa Onlaayinii Raayyaa Ittisaa irraa ” irraa argate. #Ena Afaan Oromoo#TOI#Ena

Bitootessa 18/2018 (ENA) – Magaalummaan fi babal’inni magaalaa ammayyaa bu’ura cimaarratti ijaaramaa jiru dhalootaaf jireenya fooyya’aa akkasumas badhaadhina biyyaaf bu’uura ta’uu isaa Tajaajilli Komunikeeshinii Mootummaa hubachiise. Tajaajilichi odeeffannoo karaa miidiyaa hawaasaa isaa qoodateen; hojii guddaan misooma magaalaa fi kooridarii biyyattiin hojjechaa jirtu, bifa biyyattii jijjiiruu bira darbee sadarkaa jireenya lammiilee fooyyessuuf tarkaanfii seena qabeessadha jedheera. Odeeffannoon tajaajilli komunikeeshinii mootummaa qoode guutummaansaa kunoo- Magaalummaa fi babal’inni magaalaa ammayyaa bu’ura cimaa irratti ijaaramaa jiru, dhalootaaf jireenya gaarii fi badhaadhina biyyaaf bu’uura dha Hojiin misooma magaalaa fi kooridarii bal’aan Itoophiyaan gaggeessaa jirtu, bifa biyyattii jijjiiruu bira darbee, jireenya lammiilee fooyyessuuf tarkaanfii seena qabeessa fudhatame dha. Magaalonni bifa hiyyummaa yeroo dheeraaf ittiin beekamaa turan gama jijjiiruutiinii fi jiraattotaaf mijataa fi hawwataa ta’anii akka gurmaa’an mootummaa bajata guddaa ramaduu fi humna namaa qindeessuun hojjechuun danda’ameera. Keessumaa hojiileen bu’uuraalee misoomaa diriirsuu, haaromsaa magaalaa, naannolee miidhagsuu, hojiileen suphaa bakkeewwan seenaa fi hambaalee Fnfinnee fi magaalota guguddoo birootti hojjetaman akkasumas hojiin misooma kooridarii hojjetamaa jiran ni eeramu. Hojii bu’uuraalee misoomaa kanaan, hawaasni bishaan dhugaatii qulqulluu, daandii fooyya’aa, tajaajila fayyaa sadarkaa gaarii qabu, barnoota qulqulluu fi humna ibsaa akka argatu taasifameera. Gama biraatiin kallattii Ministirrri Muummee doktar Abiy Ahmed kaa’aniin waggoota jijjiiramaa saddet darban keessatti hojiiwwan misoomaa hedduun kan raawwataman yoo ta’u isaan keessaa hojii magaalaa miidhagsuu isa ijoo dha. Xiyyeeffannoon Hojii misooma kooridarii fi haaromsaa magaalaaf kenname magaalota Itiyoophiyaa gurguddoo qofa osoo hin taane magaalota 78 keessatti hojiirra ooleera. Misoomni kooridarii kun jireenya magaalotaa duubatti hafaa jijjiiruun jireenya ammayyaa uumuurra darbee eeggumsa naannoo, jijjiirama yaadaa, fi naannoo jireenyaa mijataa uumuun gumaacha guddaa qaba. Kunis jireenya gaarii lammiilee abdii itti horuun alatti madda boonsaa ta’ee jira. Akkasumas lammiileen biyyoota biraa dinqisiifannaa guddaa itti agarsiisaniiru. Haaromsaa fi suphaan dhaabbilee seenaa, duudhaa isaanii eeguun dhalootaaf dabarsuu fi miidhagina magaalaa dabaluun turistoota hawachuu danda’eera. Kanaanis turistoonni hedduun yeroo dheeraaf Itiyoophiyaa keessa akka turan gochuun galiin guddaa akka argamu taasisuun danda’ameera. Bu’aa badhaadhinaa kana itti fufsiisuuf hojii dabalataa ciminaan hojjechuun barbaachisaa dha. Itiyoophiyaan Afriikaaf fakkeenya badhaadhinaa ta’uu fi mul’atashee milkeessuuf, hirmaannaan lammiilee murteessaa waan ta’eef, tumsa cimaa itti fufsiisuun barbaachisaa dha. Walumaagalatti, imalli badhaadhina magaalummaa Itiyoophiyaan eegalte dhaloota dhufu xiyyeeffannoo keessa galchuun kan raawwatame yoo ta’u, mootummaa teeknooloojii dijitaalaa fi sirna hojii ammayyaa walitti qindeessuun, magaalonni keenya bakka turizimii fi invastimantii ta’uurra darbanii wiirrtuu carraa hojii mijataa fi madda boonsaa akka ta’an gochuuf tattaaffii walirraa hin cinne akka taasisu ni mirkaneessa.

Bitootessa 17/2018 (ENA): Filannoo waliigalaa 7ffaa irratti dargaggoonni dammaqinaan akka hirmaatan hojiin hojjetamaa jiraachuu Manni Maree Dargaggoota Naannoo Somaalee beeksise. Pireezidaantiin Mana Marichaa Mahaammad Ahimad Nuur adeemsa dimokiraatawaa filannoof hirmaannaan dargaggootaa murteessaa ta’uu eeruun, kanaafis manni marichaa hojii dadammaksuu gaggeessaa akka jiru ENAtti himeera. Dargaggoonni biyyaa kan bakka bu’an ta’uu isaanii hubatanii sochii waliigalaa biyyattii keessatti dammaqinaan hirmaachuu akka qaban hubachiisaniiru. Filannoo irratti hirmaannaa isaanii cinaatti tajaajila tola ooltummaa isaanii itti fufuun akka isaan irraa eegamus akeekeera.

Bitootessa 17/2018 (ENA): Biiroon komunikeeshinii naannoo Oromiyaa odeeffannoo sirrii fi si’ataa ta’e ummata biraan ga’uuf dameen miidiyaa fi komunikeeshinii naannichaa waliin hojjechaa jiraachuu beeksise. Waltajjiin Miidiyaa fi komunikeeshinii naannichaa gamaaggama karoora ji’oota sagalii fi sagantaa ifoomsa marsareetii (weebsaayitii) qindoome biiroon qopheesse gaggeessaa jira. Hogganaan biiroo kominikeeshinii naannichaa obbo Hayiluu Addugnaa, wayita sana akka jedhanitti, biiroon odeeffannoo naannichaa bulchuu fi suuraa gaarii ijaaruuf ciminaan hojjechaa jiraachuu ibsaniiru. Biirichi mootummaa fi ummata gidduutti wal amantaa uumuu fi hojiiwwan miidiyaa fi hariiroo hawaasaa qindeessuuf hojjechaa jiraachuu ibsaniiru. Keessattuu waggoota darban keessatti waltajjiin waloo seektaroonni miidiyaa fi komunikeeshinii waliin hojjetan hundeessuun ijaarsa seeneffama waloo cimsuu fi odeeffannoo sobaa ittisuuf gargaarsa guddaa ta’uu ibsaniiru. Marsareetiin odeeffannoo walitti qabuu fi qindeessu, har’a ifoome, bulchiinsa odeeffannoo ammayyaa, sirna odeeffannoo dhugaa irratti ijaaramee fi qaqqabummaa amanamaa dhugoomsuuf kan gargaaru ta’uu ibsaniiru. Biiroon kun qormaata tajaajila odeeffannoo bara teeknooloojiitti uumamuu malu ittisuuf wiirtuu bulchiinsa odeeffannoo ijaaraa akka jiru hubachiisaniiru. Marsareetiin kuni caasaa komunikeeshinii sadarkaa sadarkaan jiru irraa odeeffannoo walitti qabuu qofa osoo hin taane, hariiroo miidiyaa, dhaabbilee mootummaa fi ummata gidduu jiru sadarkaa ol’aanaatti kan ceesisu ta’uu ibsaniiru. Kunis qaama galma Dijitaalaa Itiyoophiyaa bara 2030 kan ta’ee fi biiroon tajaajila isaa gama hundaan dijiitaalaa taasisuuf hojii eegale cimsee odeeffannoo qulqullinaa fi walsimaa ta’e fayyadamaa bira akka ga’u taasisuudha jedhaniiru.   Hirmaattonni waltajjichaa gama isaaniitiin, Waltajjiin Miidiyaa fi Komunikeeshinii damee kana keessatti walhubannaa fi qindoomina uumeera jedhan. Marsareetii eegalame kun bu’aalee naannichatti galmaa’aa jiru dhaqqabamaa taasisuun hirmaannaa hawaasummaa, diinagdee fi siyaasaa ummataa guddisuuf kan gargaaru ta’uu himaniiru. Waltajjicharratti qooda fudhattoota sirna bulchiinsa odeeffannoo dijitaalaa Biiroo Kominikeeshinii Mootummaa Naannoo Oromiyaatiin eegalame milkeessuuf gumaachan galateeffateeffataniiru.

Bitootessa 17/2018 (ENA) - Jiraattonni magaalaa Jimmaa filannoo walii galaa 7ffaarratti hirmaachuuf kaardii fudhachaa jiraachuu dubbatan. Filannoo walii galaa 7ffaa Caamsaa 24 bara 2018 gaggeeffamuuf Guraandhala 28 bara 2018 irraa eegalee galmeen filattootaa gaggeeffamaa jira. Jiraattonni magaalaa Jimmaa kaardii filannoo fudhachaa osoo jiranii ENAn dubbise akka jedhanitti filannicharratti dammaqinaan hirmaachuun ijaarsa sirna demokiraasii biyyasaaniif qoodasaanii bahachaa akka jiran kaasaniiru. Kanneen keessaa obbo Geetaachoo Wadajoo, filannoo walii galaa 7ffaa irratti hirmaachuuf kaardii filannoo fudhataniiru. Kana malees paartileen siyaasaa imaammatasaanii miidiyaan dhiheessaa jiran hordofaa akka jiran dubbataniiru. Kanneen biroos kaardii filannoo yeroon fudhachuun mirga demokiraasii isaaniitti fayyadamuun paartii siyasaa imaammata guddina biyyaaf ta’u qabu akka filatan gorsaniiru. Jiraataan magaalichaa dargaggoo Zarihun Jihaad kaardii fudhachuun paartii imaammata gudduina biyyaaf qabu filachuuf bu’ura waan ta’eef kaardii fudhachuusaa ibseera. Kaardii fudhateen paartii fayyadama dargaggootaa mirkaneessuu fi guddina biyyaa itti fufsiisu filachuuf qophaa’uusaa dubbateera. Jiraattuun magaalaa Jimmaa adde Alamtsahaayi Tsaadiquu, filannoo walii galaa 7ffaa irratti hirmaahuuf kaardii filannoo fudhachuusaanii dubbatanii, paartii fayyadama dubartootaaf ni hojjeta jedhan filachuuf karoorfachuusaanii dubbataniiru.

Bitootessa 16/2018(ENA) - Raayyaa Ittisaatti Izziin Bahaa ergama heera mootummaa kennameef gahumsaa fi gootummaa olaanaan bahachaa akka jiru ajajaan olaanaa Izzichaa Letenaal Jeneraal Mahaammad Tasammaamirkaneessan. Letenaal Jeneraal Mahaammad Tasammaa hoggantoota komaandoo Izzii, Koorii, kutaa waraanaa Istaafiif kallattii bobbii wayitaawaa kennaniiru. Raayyaan haala balaawwan biyyattii mudatan qolachuun dandeessisurra akka jiruu fi qaamoleen hooggansaa qindaa’anii qoodasaanii bahaa akka jiran Jeneraalichi ibsaniiru. Izziin Bahaas ergama biyyaalessaa fi dhaabbatummaa cichoomee bahachaa jira jedhaniiru. Hojii seera kabachiisuu naannoo Amaaraatti gaggeeffamaa jiraniin kaayyoon humnoota ergama alagaa raawwachiisaa jiranii akka fashalu godhamuu eeraniiru. Fuulduraa humnoota nageenyaa fi ummataa waliin caalaatti qindaa’uun riijinichatti nagaa amansiisaa buusuuf akka hojjetamu mirkaneessaniiru.