መቐለ/ሓምለ /10/2016 (ኢዜኣ) ኣብ ክልል ትግራይ ኣብ ዝርከባ ከተማታት ከጋጥም ዝኽእል ሓደጋ ውሕጅ ቀዲምካ ንምክልኻል 40 ኪሎ ሜትሮ ስራሕቲ መትረብ ውሕጅን ተፋሰስን ከምዝተዛዘሙ ቢሮ ልምዓት ከተማን ኮንስትራክሽንን ግዝያዊ ምምሕዳር እቲ ክልል ኣፍሊጡ። ምክትል ሓላፊ እቲ ቢሮ ኣይተ ሃይላይ ትንስኡ ንኢዜኣ ከምዝበልዎ፤ መብዛሕቲአን ከተማታት እቲ ክልል ንሓደጋ ውሕጅ ተቓላዕቲ ስለዝኾና ኣብ ኣዋርሕ ክረምቲ ከጋጥም ዝኽእል ሓደጋ ውሕጅ ንምክልኻል እናተሰርሐ እዩ። ኣብዚ ሕዚ እዋን ምስ ዝምልከቶም ኣካላት ብምትሕብባር ሓባራዊ ትልሚ ብምድላውን ስግኣታት ሓደጋ ውሕጅ ብመፅናዕቲ ብምፍላይን ህንፀት 40 ኪሎ ሜትሮ መትረብ ውሕጅን ተፋሰስን ከምዝተሳለጠ እውን ተዛሪቦም። እዚ ህንፀት ዝተኻየደለን ከተማታት እውን መቐለ፣ማይጨው፣ዓዲ ግራት፣ኣኽሱምን ሽረ እንዳስላሰን ከምዝኾና ገሊፆም።

  ጅማሮ “መኣዲ ንሃገር” ቀዳማይ ሚኒስትር ኣብይ ኣሕመድ (ዶ/ር) ከም ሃላላ ኬላ፣ ጨበራ ጩርጩራ፣ ወንጪን ጎርጎራን ዝበሉ መባፅሕታት ቱሪዝም ብምልማዕን ኣብ ከባቢኦም ንዝርከቡ ፍሉያት ተፈጥሮኣዊ ሃፍትታት ኣጉሊሆም ክረኣዩ ኣብ ምግባር መዳይ ዝለዓለ ኣበርክቶ ኣመዝጊቦም። እዞም ፃዕርታት ንዘላቕነትን ንሓለዋ ከባቢን ቐዳምነት ብምሃብ ንቱሪዝም ንምዕባይ፣ ስራሕ ንምፍጣርን ብርኪ መነባብሮ ኣብ ዙርይኡ ዝርከቡ ክፋላት ማሕበረሰብ ንምዕባይን ዝዓለሙ እዮም። ቱሪዝም ብብርኪ ዓለም ለኸ ዝለዓለ ኣታዊ ሸርፊ ወፃኢ ክርከብ ብምግባርን ብሚሊዮን ዝቑፀሩ ስራሕቲ ብምድጋፍ ኣብ ኢኮኖሚ ዓለም ውሽጢ ወሳኒ ተራ ይፃወት። ንሓፈሻዊ ሃገራዊ ፍርያት (GDP) ኣብ ዝገብሮ ቐጥታዊ ኣበርክቶ 'ውን ፅቡቕ ኢኮኖሚያዊ ፅዕንቶ ጎሊሁ ይረኣይ። ኣብ ሃገርና ኢትዮጵያ 'ውን ቱሪዝም መንግስቲ ንዘጀመሮ ፕሮግራም ሃገር በቆል መመሓየሺ ኢኮኖሚ እምነ ኩርናዕ እንትኸውን ካብቶም ሓሙሽተ ቑልፊ ዓምድታት እቲ ሓደ 'ዩ። ከም “መኣዲ ንሃገር” ዝበሉ ስራሕቲ ዘፈር ቱሪዝም ንምምዕባል፣ ብዙሓት ዑደተኛታት ንምስሓብ፣ ኢኮ ዕብየት ንምንቕቓሕ፣ ዕድላት ስራሕ ንምፍጣር፣ መባፅሕታት ንምልማዕን ንምምሕያሽን ተዓሊሙ ኣብ ስራሕ እናወዓሉ ይርከቡ። ምረቓ ኢኮ ሪዞርት ጎርጎራ ቀዳማይ ሚኒስትር ኣብይ ኣሕመድ (ዶ/ር) ኣርባዕተ ዓለም ለኸ ደረጅኦም ዝሓለዉ መባፅሕታት ኣብ ትሕቲ ጅማሮ "መኣዲ ንሃገር" ንምልማዕ ንዘርአይዎ ቖራፅነት ተወሳኺ መረጋገፂ እንትኸውን ኣብ 2012 ዓ.ም ቓል ብዝኣተዉዎ መሰረት ሃኒፆም ምርካቦም የመላኽት። ኣብዚ ሕዚ ድማ ራእዮም ተስፋሕፊሑ እናተሰርሑ ዝርከቡ ሸውዓተ ተወሰኸቲ መባፅሕታት ንምልማዕ ዝተለመ “መኣዲ ንወለዶ” ዝተብሃለ ሓዱሽ ፕሮጀክት 'ውን ኣጀሚሮም።

  ጋምቤላ/ሓምለ /9/2016 (ኢዜኣ) ኣብ ክልል ጋምቤላ ኣብ ኣዋርሕ ክረምቲ እዚ ዓመት ልዕሊ 130 ሽሕ መናእሰይ ኣብ ኣገልግሎት ሰናይ ፍቓድ ከምዝተዋፈሩ ቢሮ ጉዳይ ደቂ ኣንስትዮን ማሕበራውን እቲ ክልል ኣፍሊጡ። መድረኽ ጎስጓስ ኣገልግሎት ሰናይ ፍቓድ ክረምቲ እዚ ዓመት ኣብ ከተማ ጋምቤላ ተሳሊጡ። ሓላፊት ቢሮ ጉዳይ ደቂ ኣንስትዮን ማሕበራውን እቲ ክልል ወይዘሮ ክርምስ ሌሮ ንኢዜኣ ከምዝገለፅኦ፤ ኣብ ኣዋርሕ ክረምቲ እዚ ዓመት ልዕሊ 130 ሽሕ መናእሰይ ኣብ ዝተፈላለዩ ኣገልግሎት ሰናይ ፍቓድ ንምስታፍ ትልሚ ተታሒዙ ናብ ተግባር ተኣትዩ እዩ። እቲ ዝተኻየደ መድረኽ እውን ኣገልግሎት ሰናይ ፍቓድ ክረምቲ ብዝበለፀ ንምንቕቓሕ ዝዓለመ ምዃኑ ገሊፀን። ዋና ፀሓፊ ማሕበር መናእሰይ ክልል ጋምቤላ መንእሰይ ሰለሞን ኣሰፋ ብግድኡ፤ ኣብ እዋን ኣዋርሕ ክረምቲ ብዝሳለጡ ስራሕቲ ኣገልግሎት ሰናይ ፍቓድ ተሳትፎ መናእሰይ ንምዕባይ ብትኹረት እናተሰርሐ ይርከብ ኢሉ። ስለዝኾነ እውን ኣብ ኩሎም ከባብታት እቲ ክልል እቲ መንእሰይ ብምንቕቓሕ ብርክት ዝበሉ ስራሕቲ ኣገልግሎት ሰናይ ፍቓድ ንምስላጥ ፃዕሪ ከምዝተጀመረ ገሊፁ። ኣብቲ መድረኽ፤ ላዕለዎት ሓለፍቲ ስራሕ፣ዓበይቲ ዓዲ፣መራሕቲ ሃይማኖትን መናእሰይን ተሳቲፎም።

  ኣዲስ ኣበባ/ሓምለ /9/2016 (ኢዜኣ) መንግስቲ ንዘበናዊ ቆፎ ንህቢ እታዎታት እናቕረበ፤ መናእሰይ እናፍረዩ፤ ሓረስቶት እውን ብተመጣጣኒ ዋጋ ብምዕዳግ ንክጥቀሙ ምችው ሰንሰለት ዕዳጋ ከምዝተፈጠረ ተገሊፁ። ኣብ ክልል ኦሮሚያ ዞባ ኢሉኣባቦራ ልዕሊ 250 ሽሕ ዘበናዊ ቆፎታት ብዓመት ብማእኸላይ ልዕሊ 12 ሽሕ ቶን መዓር እናፍረዩ ምዃኖም ተሓቢሩ። መናእሰይ ብማሕበር ተወዲቦም ብዝቐርበሎም እታዎት ንምርባሕ ንህብን ፍርያት መዓርን ዘበናዊ ቆፈታት እናፍረዩ ሓረስቶት እውን ብዝተመጣጠነ ዋጋ እናዓደጉ ንክጥቀሙ ምችው ምትእስሳር ዕዳጋ ተፈጢሩ እዩ። ኣብዚ ዕውት ምትእስሳር ዕዳጋን ልምዓትን ካብ ዝተዋፈሩ መናእሰይ፤ ብምትሕግጋዝን ምትሕስሳብን ብሓጎስ እናሰራሕናን እናተረባሕናን ኢና ኢሎም። መንግስቲ ጣውላን ተዛመድቲ ናውቲ ዘበናዊ ቆፎን የቕርብ፤ መናእሰይ እቲ ቆፎ ይሰርሑ፤ኣርባሕነቲ ንህቢ ሓረስቶት ድማ ብዝተመጣጠነ ዋጋ ዓዲጎም መዓር ብምፍራይ ተረባሕቲ ከምዝኾኑ ገሊፆም። በዚ ልምዓት ሂወት ብርክት ዝበሉ መናእሰይ እናተቐየረን ሃገር እውን ብትሩፋት ሌማት እናተረብሐት ምዃናን ሓቢሮም። ኣብ ዞባ ኢሉኣባቦራ ኣብ ምርባሕ ንህቢ ካብ ዝተዋፈሩ ሓረስቶት ታደገ ተካልኝን መሃመድ ኑር ኡስማንን ብግደኦም፤ ፅሬት ዘለዎ ዘበናዊ ቆፎ ብዝተመጣጠነ ዋጋ እናቐረበሎም ከምዝኾነ ገሊፆም። ዋና ኣመሓዳሪ ዞባ ኢሉኣባቦራ ኣይተ እንዳልካቸው ተፈሪ፤ መናእሰይ ኣብ ዝተፈላለዩ ዘፈራት ስራሕ ብምውፋርዕድል ስራሕ ከምዝተፈጠረሎም ተዛሪቦም። ስለዝኾነ እውን ኣብ ፍርያት ዘበናዊ ቆፎ ንህቢ ዝተዋፈሩ 26 ማሕበራት ናብ ስራሕ ብምእታው ንኣርባሕቲ ንህቢ ቆፎ እናቕረቡ ከምዝኾኑ ኣረዲኦም።

  አዲስ አበባ/ሓምለ/9/2016/ኢዜአ/ ኣብ ክልል ሶማሌ ዞባ ቀራሄ ወረዳ ቦደሌይ ማሕበር ሕርሻ ኣልሃራማይን 200 ሄክታር መሬት ብዝተፈላለዩ ዝራእቲ የልምዕ አሎ። ኣመራርሓታት ወረዳ ቦደሌይ ኣብቲ ወረዳ ብማሕበር ኣልሃራማይን እናለምዐ ኣብ ዝርከብ ሕርሻ ዑደት ገይሮም። ሓለፍቲ ማሕበር ሕርሻ ኣልሃራማይን ምምሕዳር እቲ ወረዳ ዘርእን ዝተፈላለዩ መድሓኒታትን ድጋፍ ብምግባር ኣብ ዘካይድዎም ስራሕቲ ልምዓት ሕርሻ ሓገዝ እናተገበረሎም ምዃኑ ገሊፆም። ኣመራርሓታት ወረዳ ቦደሌይ ብወገኖም ኣብቲ ወረዳ ፍርያትን መፍረያይነትን ሕርሻ ብምዕባይ ብዝራእቲ ምግቢ ዓርስኻ ንምኽኣል መንግስቲ እቲ ክልል ንዘቐመጦ ትልሚ ተግባራዊ እናተገበረ ምዃኑ ምዝራቦም መራኸቢ ሓፋሽ እቲ ክልል ፀብፂቡ።

  ኣዲስ ኣበባ/ሓምለ/ 9/2016 (ኢዜኣ) ኢንሰቲትዩት ትራንስፎርሜሽን ግብርና ዓውዲ ግብርና ዘማዕብሉ ክልተ ስርዓት ኣሰራርሓታት ዲጂታል ዕላዊ ገይሩ። እቶም ዕላዊ ዝተገበሩ ግብርና ዘማዕብሉ ስርዓት ኣሰራርሓታት ዲጂታል፤ 'ኣውቶሜሽን ኢንፑት ቮቸር' ን ('ኢ_ቮቸር 2.0') ን ዝተብሃሉ እዮም። ኣብቲ መርሃ ግብሪ፤ ምክትል ዋና ዳይሬክተር እቲ ኢንሰቲትዩት ፍሬው ተገኝ(ዶ/ር) ሓዊሱ ካልኦት ኣመራርሓ እቲ ትካልን ዝምልከቶም ኣካላትን ተረኺቦም። እቶም ዕላዊ ዝተገበሩ ስርዓት ኣሰራርሓታት ዲጂታል፤ ዝሓሸ ፍርያት ከምኡ እውን ዝሓሸ ዝርገሐ እታዎታት ግብርና ንክህሉ ካብ ምግባር ብተወሳኺ እዋኑ ዝሓለወን ትኽክለኛ ሓበሬታን ስርዓት ምትእስሳር ዕዳጋ ከምዝቐርበሎም እውን ተገሊፁ። ምክትል ዋና ዳይሬክተር እቲ ኢንሰቲትዩት ፍሬው ተገኝ(ዶ/ር)፤ ካብ ልኡኽቶታት እቲ ኢንስቲትዩት እቲ ሓደ ኣብ ዓውዲ ግብርና ዘለው ማሕለኻታት ብምፍላይ መፍትሒ ምቕማጥ ከምዝኾነ ገሊፆም። ስለዝኾነ እውን ኣብዚ ተለዋዋጢ ዝኾነ ዓለም ፈተናታት እቲ ዓውዲ ብምፍላይ መፍሕታት እናምፀአ ከምዝርከብ ብምሕባር፤ እዞም ሎሚ መዓልቲ ዕላዊ ዝተገበሩ ስርዓት ኣሰራርሓታት እውን ኣካል እዚ ምዃኖም ተዛሪቦም።

  አዲስ አበባ/ሓምለ/8/2016/ኢዜአ/ ቀዳማይ ሚኒስትር ኣብይ ኣሕመድ (ዶ/ር) ኽልተ ዘመናዎት ግልጋሎት ትራንስፖርት ማይ ዝህባ መርከባት ኣብ ቀረባ ጎርጎራ ክበፅሓ 'የን ክብሉ ተዛሪቦም። እቶም ቀዳማይ ሚኒስትር ኣብ ስነ-ስርዓት ምረቓ ኢኮ ሪዞርት ጎርጎራ ከምዝተዛረብዎ፤ ሰብ ካብ ዘለዎ ሃገር ኣብ ባህርዳር ዝዓርፍ እንተኾይኑ ግልጋሎት ትራንስፖርት ማይ ተጠቂሙ ጎርጎራ ምብፃሕ ንክኽእል ክልተ ዘመናዎት መርከባት ኣብ ቀረባ ተጎዓዒዘን ጎርጎራ ክበፅሓ እየን ኢሎም። ንኽልተ ዘመናዎት ጀልባታት ተጎዓዒዘን ጅቡቲ ወደብ ምብፅሐን ዝፍለጥ 'ዩ።ኣብ መንጎ ጎርጎራን ባህርዳርን ግልጋሎት ትራንስፖርት ማይ ናይ ምቅልጣፍ ተግባር ከካይዳ 'የን። ንመናእሰይ 'ውን ዕድል ስራሕ ክፈጥራ 'የን፤ ንቱሪስትታት ምቹው ግልጋሎት ትራንስፖርት ኾይኖም ከምዘገልግሉ 'ውን ተዛሪቦም። ጣና ነሽ ፪ ዝተብሃለት ዘመናዊት ትራንስፖርት ጀልባ ህዝብን እታ ኻልአይቲ ድማ ማእኸለይቲ ቕልጡፍቲ ቓናይት ጀልባ ንትራንስፖርት ማይ ውሽጢ ሃገር ኾይነን ንኸገልግላ ዝተገዝኣ ኽልተ ዘመናዊ ጀልባታት ኣብ ወደብ ጅቡቲ ምብፅሐን ዝዝከር 'ዩ። ጣናነሽ ዘመናዊት ሰብ መጎዓዓዚትን መዘናግዒትን መርከብ እንትትኸውን 38 ሜትር ንውሓት ከምዘለዋን ብሓደ ግዜ ብዙሓት ሰባት ናይ ምፅዓን ዓቕሚ ከምዘለዋ መረዳእታ ትራንስፖርት ባሕርን ሎጂስቲክስን ኢትዮጵያን የረድእ።

  ኣዲስ ኣበባ/ ሓምለ/6/ 2016 /ኢዜአ/እዋናዊ ከይዲ ፍሪያት ፓርክ ኢንዱስትሪ ሃዋሳ ዘተባብዕ ከምዝኾነ ዋና ኣፈፃሚ ስራሕ ኮርፖሬሽን ልምዓት ፓርክታት ኢንዱስትሪ ኢትዮጵያ ፍሰሃ ይታገሱ (ዶ/ር) ገሊፆም። እቶም ዋና ኣፈፃሚ ስራሕ፥ ጄፒ ቴክስታይልን ሲልቨርስፕሪንግን ዝተብሃሉ ክልተ ዓለም ለኸ ኩባኒያታት ከይዲ ፍሪያቶም ተዓዚቦም። ድሕሪ እቲ ዑደት ምስ ሓለፍቲ እተን ኩባኒያታት ከምዝተዛተዩ ተገሊፁ። ብተወሳኺ ገምጋም ኣፈፃፅማ ስራሕ 11 ኣዋርሕ እቲ ፓርክ ኢንዱስትሪን መርሃ ግብሪ ተኸላ ፈልስን ከምዝተሳለጠ ኣብቲ ኮርፖሬሽን ዝረኸብናዮ ሓበሬታ የረድእ።

  ኣዲስ ኣበባ/ሓምለ /6/2016 (ኢዜኣ) ኣብ ዝተዛዘመ በጀት ዓመት 2016 ዓ/ም ብሪሚታንስ ልዕሊ 6 ቢልዮን ብር ገንዘብ ናብ ውሽጢ ሃገር ከምዝተልኣኸ ኣገልግሎት ዲያስፖራ ኢትዮጵያ ገሊፁ። ምክትል ዋና ዳይሬክተር ኣገልግሎት ዲያስፖራ ኢትዮጵያ በላይነህ ኣጥናው ንኢዜኣ ከምዝበልዎ፤ ኣብ ዝሓለፉ 5 ዓመታት ብሪሚታንስ ዝለኣኽ ገንዘብ ወሲኹ እዩ። ነዚ ስዒቡ እውን ኣብዚ ዝተዛዘመ በጀት ዓመት 2016 ዓ/ም ብሪሚታንስ ልዕሊ 6 ቢልዮን ብር ገንዘብ ናብ ውሽጢ ሃገር ከምዝተልኣኸ ገሊፆም። ብኻሊእ መዳይ ድማ 273 ኣባላት ዳያስፖራ ኣብ ዝተፈላለዩ ዓውድታት ኢንቨስትመንት ንክሳተፉ ጭቡጣት ስራሕቲ ከምዝተሳለጡ ሓቢሮም። ካብዚኣቶም እውን 50 ኣባላት ዲያስፖራ ናብ ስራሕ ንክኣትዉ ብምግባር ን 3ሽሕ ዜጋታት ዕድል ስራሕ ከምዝተፈጠረ ተዛሪቦም። ብተወሳኺ እውን እቲ ዲያስፖራ ንዓብይ ግድብ ሕዳሰ ሓዊሱ ንካልኦት ዓበይቲ ሃገራዊ ፕሮጀክትታት ልዑል ደገፍ እናገበረ እዩ ኢሎም። ኣብ ቀፃሊ እውን ኣባላት ዲያስፖራ ኣብታ ሃገር ኣብ ዝተፈላለዩ ዓውድታት ዝገብርዎ ኩለ መዳያዊ ተሳትፎ ተጠናኺሩ ንክቕፅል ከምዝስራሕ ኣረዲኦም።

  አብ ፀባብ መረባይ ናብራይ አጠጢዐ-ባዓል ፀጋ 70 ዕድመ ሼህ መሀመድ ነባራይ አብ ዞባ ጂማ ወረዳ ኦሞ ናዳ

  ሰቖጣ/ሓምለ /5/2016 (ኢዜኣ) ኣብ ምምሕዳር ብሄረሰብ ዋግኽምራ ከተማ ሰቖጣ ብ134 ሚልዮን ብር በጀት 17 ፕሮጀክትታት ተሃኒፆም ንህዝባዊ ኣገልግሎት ክፉት ኮይኖም። ተቀዳሚ ምክትል ከንቲባ ምምሕዳር ከተማ ሰቖጣ ኣይተ መላሽ ወርቃለማው እቶም ፕሮጀክትታት ሎሚ መዓልቲ ኣብ ዝተመረቕሉ እዋን ከምዝበልዎ፤ ሕቶታት ልምዓት እቲ ሕብረተሰብ ንምምላስ ኣብዚ ዝተዛዘመ በጀት ዓመት ፃዕሪ ክግበር ፀኒሑ እዩ። ስለዝኾነ እውን ብ134 ሚልዮን ብር በጀት 17 ፕሮጀክትታት ተሃኒፆም ንህዝባዊ ኣገልግሎት ክፉት ከምዝተገበሩ ገሊፆም። 3 ድልድላት መሻገርቲ ተሽከርከርቲ፣ሽንቲ ቤታት፣መንደቕ መከላኸሊ ውሕጅን ሼዳት መስርሕን መሸጥን ካብቶም ፕሮጅክትታት ምዃኖም ሓቢሮም። እቲ ሕብረተሰብ ብዘሳተፈ መልክዑ ፕሮጀክትታት ኣብ ሓፂር እዋን ናይ ምዝዛም ልምዲ እናተመሓሸ ከምዝመፀ እውን ተዛሪቦም።

  አዲስ አበባ/ሓምለ/5/2016/ኢዜአ/ ኣብ ከተማ ኣዲስ ኣበባ ብልምዓት ግብርና ከተማ ልዕሊ 150 ሽሕ ቶን ፍርያት ምርካብ ከምዝተኽኣለ ኮሚሽን ሓረስቶትን ልምዓት ግብርና ከተማን ምምሕዳር ከተማ ኣዲስ ኣበባ ኣፍሊጡ። ዳይሬክተር ጉዳያት ኮሙዩኒኬሽን እቲ ኮሚሽን ኣይተ ወንደሰን ኣካሌ ከምዝገለፅዎ፤ ኣብታ ከተማ ግብርና ከተማ ብሰፊሑ እናተሰርሐ ይርከብ። ኣብ 11 ኣዋርሕ በጀት ዓመት 2016 ዓ.ም 130 ሽሕን 826 ቶን ፍርያት ንምርካብ ተተሊሙ 153 ሽሕን 358 ቶን ፍርያት እንሰሳትን እፅዋትን ምርካብ ተኻኢሉ። እዚ ፍርያት ልምዓት ግብርና ከተማ ስሩዕን ሌማት ትሩፋትን ዘካተተ እንትኸውን፤ 110 ሽሕን 152 ቶን ዝኸውን ካብ ፍርያት እንሰሳት ከምኡ 'ውን 43 ሽሕን 206 ቶን ካብ ፍርያት እፅዋት ዝተረኸበ ምዃኑ ኣብሪሆም። ልዕሊ 690 ሽሕ ክፍልታት ማሕበረሰብ እናተሳተፉ ከምዝኾኑ 'ውን ተገሊፁ።

  ኣዲስ ኣበባ/ ሓምለ/5/ 2016 /ኢዜአ/ኣብ 2016 ዓ.ም ብህፁፅ ስራሕቲ ምክልኻል ግዕዚይና ልዕሊ ብር 2 ነጥቢ 8 ቢሊየን ምድሓን ከምዝተኽኣለ ኮሚሽን ስነ ምግባርን ፀረ ግዕዚይናን ፌዴራል ኣፍሊጡ። ዋና ኣፈፃሚ ስራሕ ህፁፅ ስራሕቲ ምክልኻል ግዕዚይና ገዛኸኝ ጋሻው፥ ኣብ 2016 ዓ.ም ዝተፈፀሙ ዓበይቲ ጉዳያት ዝጠመተ ጋዜጣዊ መግለፂ ሂቦም። ኣብ መግለፂኦም፥ ኣብቲ ባጀት ዓመት ልዕሊ 175 ሺሕ ኣመራርሓን ሰራሕተኛታትን ሃፍቶም ምምዝጋቦም ኣዘኻኺሮም። ኣብ ክልልትን ምምሕዳራት ከተማን 1 ሺሕን 87 ህፁፅ ስራሕቲ ምክልኻል ግዕዚይና ከምዝተኻየደ አውን ተዛሪቦም። ብመሰረት እዚ ብህፁፅ ስራሕቲ ምክልኻል ግዕዚይና ብር 2 ነጥቢ 8 ቢሊየን ምድሓን ከምዝተኽኣለ ገሊፆም ።

  ሃረር/ሓምለ /5/2016 (ኢዜኣ) ኣብ ከተማ ሃረር እናተሳለጠ ዝርከብ ልምዓት ኮሪደር ምስሊ እታ ከተማ እናቐየረ ምዃኑ ዋና መካየዲ ስራሕ እታ ከተማ ኣይተ ኤልያስ ዮኒስ ኣፍሊጦም። ዋና መካየዲ ስራሕ ከተማ ሃረር ኣይተ ኤልያስ ዮኒስ ከምዝበልዎ፤ እታ ከተማ ናይ ምምልኻዕ ስራሕ ኣብ 2015 ዓ/ም ዓለም ለኸ ሓድጊ ጀጎል ብምክንኻን እዩ ተጀሚሩ። ብፍላይ ድማ እቲ ሓድጊ ዝርከበሉ ውሽጣ ውሽጢ መንገድታት ናይ ምምልኻዕን ካልኦት ስራሕትን ከምዝተሳለጡ ብምሕባር፤ እዚ ዝተገበረ ብትካላትን ካልኦት ዝምለከቶም ኣካላትን ከምዝኾነ ሓቢሮም። ኣብዚ ሕዚ እዋን ኣብታ ከተማ ዝሳለጡ ዘለው ስራሕቲ ልምዓት ኮሪደር እታ ከተማ ፅብቕቲ፣ንነበርታን ጎብነይታን ምችውትን ተስማዕማዒትን ንክትኸውን ከምዝገበራ ተዛሪቦም።

  አዲስ አበባ/ሓምለ/5/2016/ኢዜአ/ ክልል ህዝብታት ደቡብ ምዕራብ ኢትዮጵያ ኣብቲ ዝተዛዘመ በጀትን ዓመት 54 ሽሕን 795 ሜትሪክ ቶን ዝተሓፀበን ዘይተሓፀበን ቡን ናብ ማእኸላይ ዕዳጋ ከምዘቕረበ ኣፍሊጡ። እቲ ሓፈሻዊ ቐረብ ምስ ተመሳሳሊ እዋን ዝሓለፈ ዓመትና እንትነፃፀር 28 ሚኢታዊ ወሰኽ ኣርእዩ። እናተመሓየሸ ዝመፅአ ክንክን ሕርሻ ቡን፣ ኣብቲ ክልል ስራሕቲ ማእኸል ምጥዓም ቡንን ሰርቲፊኬሽንን ምጅማሩ፣ ቁፅፅር ንግዲ ኮንትሮባንድ ምጥንኻሩን ኣብ ኸይዲ ዕድጊት የጋጥሙ ዝነበሩ መሕንቖታት ምፍታሕ ስለዝተኽኣለን ንዕብየት እቲ ፍርያት ኣበርክቶ ምግባሩ ኣብሪሆም። ኣብ በጀት ዓመት 2017 ዓ.ም ብፅርየቱን ዝሓለወ ቡን ናብ ዕዳጋ ንምቕራብ ብዝሓሸ ዓቕምን ምልዕዓልን ምስራሕ ትፅቢት ከምዝግበር ርእሰ ምምሕዳር እቲ ክልል ነጋሽ ዋጌሾ (ዶ/ር ኢ/ር) ኣብ ማሕበራዊ ምትእስሳር ገፆም ኣብ ዘስፈርዎ መልእኽቲ ኣፍሊጦም። እቲ ሓፈሻዊ ቐረብ ምስ ተመሳሳሊ እዋን ዝሓለፈ ዓመትና እንትነፃፀር 28 ሚኢታዊ ወሰኽ ኣርእዩ።

  ኣዲስ ኣበባ/ሓምለ 4/2016 (ኢዜኣ) ዝርገሐ መንገዲ ገጠር ንምስፍሕፋሕ ናይ 407 ሚልዮን ዶላር ፕሮጀክት ዕላዊ ከምዝተገበረ ሚኒስቴር ከተማን መሰረተ ልምዓትን ኣፍሊጡ። ሚኒስትር ከተማን መሰረተ ልምዓትን ጫልቱ ሳኒ ኣፈፃፅማ ቀፃሊ ፕሮጀክትታት ኣመልኪተን ንመራኸብቲ ሓፋሽ ኣብ ዝሃብኦ መግለፂ፤ መንግስቲ መፅናዕቲ መሰረት ብምግባር ተበፃሕነት ድሌት መሰረተ ልምዓት ዜጋታት ንምስፍሕፋሕ ብትኹረት እናሰርሐ እዩ ኢለን። ካብ 2017 ዓ/ም ጀሚሩ ንዝቕፅሉ 5 ዓመታት ተግባራዊ ዝኸውን ናይ 407 ሚልዮን ዶላር ፕሮጀክት ህንፀት መንገዲ ገጠር እውን ዕላዊ ገይረን። እቲ 300 ሚልዮን ዶላር ካብ ባንኪ ዓለም ብደገፍ ዝተረኸበ እንትኸውን፤ እቲ 107 ሚልዮን ዶላር ድማ ካብ መንግስትታት ክልል ዝተውፃእፀአ ምዃኑ ተዛሪበን። እቲ ነቲ ፕሮጀክት ዝተመደበ ገንዘብ ብመሰረት ቤት ምኽሪ ፌዴሬሽን ንክልላትን ምምሕዳር ከተማታትን ገንዘብ ዘከፋፍለሉ ስልሒት ፍትሓዊ ብዝኾነ መንገዲ ከምዝከፋፈል ገሊፀን። እቲ ፕሮጀክት ድሬዳዋ ሓዊሱ ኣብ ኩሎም ክልላት ኣብ ዝርከቡ 126 ወረዳታት መንገድታት ገጠር ምስ ዋና ዋና መንገድታት ብምርኻብ ዜጋታት ተጠቀምቲ መሰረተ ልምዓት ከምዝገብር ኣረዲአን። ብተወሳኺ እውን ብምኽንያት ኣቀማምጣ መልክአ ምድሪ ዝተነፀሉ ክፋላት ማሕበረሰብ ምስቲ ካሊእ ማሕበረሰብ ንምርኻብ ከምዘኽእል ሓቢረን።

  ኣዲስ ኣበባ/ሓምለ /4/2016 (ኢዜኣ) ፕሮጀክት ልምዓት መስኖ ጨልጨል ኣብ ክልል ኦሮሚያ ዞባ ምብራቕ ባሌ ኣብ ማእኸል ወረዳታት ራይቱን ጊኒርን ብ5 ነጥቢ 5 ቢልዮን ብር ህንፀቱ እናተሳለጠ ከምዝርከብ ተገሊፁ። ህንፀት እቲ ፕሮጀክት እንትዛዘም 4 ሽሕን 145 ሄክታር መሬት ብመስኖ ብምልማዕ ልዕሊ 9 ሽሕ ሓረስቶት ተጠቀምቲ ከምዝገብር ተገሊፁ። እቲ ፕሮጀክት ኣብ ወርሒ ታሕሳስ 2012 ዓ/ም ዝተጀመረ እንትኸውን ኣብ መወዳእታ በጀት ዓመት 2018 ዓ/ም ንምዝዛም ተተሊሙ እናተሰርሐ ከምዝኾነ ካብ ሚኒስቴር መስኖን ከባብታት ቆላን ዝተረኸበ ሓበሬታ የመላኽት።

  ኣዲስ ኣበባ/ሓምለ/4/ 2016 /ኢዜአ/ኢትዮጵያ ኣብ 2030 ዓ.ም.ፈ መርኣያ ምዕባለ ኣፍሪካ ንምዃን ንእትገብሮ ጉዕዞ መሰረተ ልምዓት መገዲ ወሳኒ ከምዝኾነ ሚኒስትር ከተማን መሰረተ ልምዓትን ጫልቱ ሳኒ ተዛሪበን። ካልኣይ ምዕራፍ ፕሮግራም ልምዓት ምትእስሳር መገዲታት ገፀር ዕላዊ ኣብ ዝገበራሉ እዋን እተን ሚኒስትር ከምዝበልኦ፥ መገዲታት ገፀር ምስ ኣውራ መገዲ ምትእስሳር ፍሪያት ንምስሳን ልዑል ብፅሒት ኣለዎ። እቲ ፕሮግራም ኣብ ገፀር ዝነብሩ ክፋላት ማሕበረሰብ ተረባሕቲ ንክኾኑ ልዑል ጠመተ ዝተገበረሉ ብምዃኑ ኣስታት 407 ሚሊየን ዶላር ባጀት ዝተመደበሉ ምዃኑ ሓቢረን። 300 ሚሊየን ዶላር ካብ ባንኪ ዓለም 107 ሚሊየን ዶላር ድማ ካብ ክልላት ዝተረኸበ ኢዩ ኢለነ።

  ኣዲስ ኣበባ/ ሓምለ/4/ 2016 /ኢዜአ/ኣብ ኣብ ዞባታት ወለጋ ብምኽንያት ፀገም ፀጥታ ኣብ ልዕሊ መሰረተ ልምዓታት ኤሌክትሪክ ብዝበፅሐ ዕንወትን ጉድኣትን ዳርጋ ሰለስተ ዓመት ካብ ግልጋሎት ኤሌክትሪክ ወፃኢ ኾይኖም ኣብ ዝፀንሑ 16 ተወሰኽቲ ከባቢታት ብዝተሰርሐ ስራሕቲ ዳግማይ ፅገና ናብ ግልጋሎት ተመሊሶም። ናብቲ ግልጋሎት ንምምላስ ጉድኣትን ዕንወትን ንዝበፅሖም ልዕሊ 77 ኪሎሜትር መስመራት ኤሌክትሪክ ዳግማይ ምፅጋንን 15 ትራንስፎርመራት ናይ ምትካእን ስራሕ ከምዝተሰርሐ መረዳእታ ግልጋሎት ኤሌክትሪክ ኢትዮጵያ ይሕብር። ካብዚ ብተወሳኺ ኣብ 2016 ዓ.ም 426 ሺሕን 290 ሓደሽቲ ዓማዊል ተረባሕቲ ኤሌክትሪክ ከምዝኾኑ ኣገልግሎት ኤሌክትሪክ ኢትዮጵያ ኣፍሊጡ። ካብ መንጎ እቶም ተረባሕቲ 95 ሚኢታዊ ዝኾኑ ኣገልግሎት ድህረ ክፍሊት ተረባሕቲ ከምዝኾኑ ገሊፁ። ዝተረፉ ድማ ዓማዊል ቅድመ ክፍሊት ከምዝኾኑ ሓቢሮም። ፀገም ፀጥታ፣ ምድንጓይ ሲስተም፣ ሕፅረት ቀረብ እታዎት፣ ከፍሊት ግምት ዋጋን መመሓየሺ ዋጋን ንምኽፋል ቁሩብ ዘይምዃን እቲ ኣፈፃፅማ ሙሉእ ንሙሉእ ንከይዕወት ዝገበሩ ብድሆታት ኢዮም ኢሉ።

ኣዲስ ኣበባ/ሓምለ/4/ 2016 /ኢዜአ/ካብ ሓምለ 3 ምሽት ሰዓት 1፡00 ሰዓት ጀሚሩ ኣብ መሸጢ ዋጋ ነዳዲ መጠነኛ ምስትኽኻል ከምዝተገበረ ተገሊፁ። ብመሰረት እዚ፥ ቤንዚን …………………………… ብር 82.60 ብሊትሮ ፃዕዳ ናፍጣ……………………… ብር 83.74 ብሊትሮ ኬሮሲን ……………………………. ብር 83.74 ብሊትሮ ነዳዲ ኣውሮፕላን ………………… ብር 70.83 ብሊትሮ ቀሊል ፀሊም ናፍጣ………………… ብር 65.48 ብሊትሮ ከቢድ ፀሊም ናፍጣ…………………. ብር 64.22 ብሊትሮ ከምዝኾነ ሚኒስቴር ንግዲን ዞባዊ ዝምድናን ኣብ ዝለኣኾ መግለፂ ሓቢሩ።