ኣዲስ ኣበባ/ለካቲት 12/2018 (ኢዜኣ) ኣተሓሳስባ ፓን-ኣፍሪካኒዝም ኢትዮጵያ ዞባዊ ማሕበራውን ኢኮኖሚያውን ምትእስሳስ እናጠናኸረ ከምዝኾነ ሚኒስትር ጉዳያት ካቢኔ ደቡብ ሱዳን ማርቲን ኤሊያ ሎሙሮ ገሊፆም። መበል 39 ጉባኤ መራሕቲ ሕብረት ኣፍሪካ “ምርግጋፅ ዘላቒ ቀረብን ድሕንነቱ ዝተሓለወ ስርዓት ሓለዋ ፅሬትን ማይ፤ ንዕዉትነት ሽቶታት ኣጀንዳ 2063”ኣብ ትሕቲ ዝብል መሪሕ ሓሳብ ኣብ ኣዲስ ኣበባ ከምዝተኻየደ ዝዝከር እዩ። ጎና ጎኒ እቲ ጉባኤ ቀዳማይ ሚኒስትር ዐቢይ ኣሕመድ(ዶ/ር)ን ፕሬዚዳንት ደቡብ ሱዳን ሳልቫ ኪር ማያርዲትን ኣብ ክልቲኣውን ዞባውን ጉዳያት ዘትዮም እዮም። ሚኒስትር ጉዳያት ካቢኔ ደቡብ ሱዳን ማርቲን ኤሊያ ሎሙሮ ንኢዜኣ ከምዝበልዎ፤ ኢትዮጵያን ደቡብ ሱዳንን ኣብ ማሕበራውን ኢኮኖሚያውን ዓውድታት ምትሕብባር ጠንካራ ርክብ ዘለወን ሃገራት እየን። ዘተ ቀዳማይ ሚኒስትር ዐቢይ ኣሕመድ(ዶ/ር)ን ፕሬዚዳንት ደቡብ ሱዳን ሳልቫ ኪር ማያርዲትን እውን ኣድማስ ምትሕብባር እተን ሃገራት ኣብ ምዕባይ ልዑል ትርጉም ዝወሃቦ ጉዳይ እዩ ኢሎም። ብፍላይ ድማ ኢትዮጵያ ንድሕንነት ደቡብ ሱዳን እትገብሮ ልዑል ኣስተዋፅኦ ምሕዝነት እተን ሃገራት ኣብ ጠንካራ መሰረት ብምህናፅ ኩለ መዳያዊ ዓቕምታት ምትሕብባር እናጠናኸረ ከምዝኾነ ገሊፆም። ኢትዮጵያ ንሰላምን ድሕንነትን ጎረቤት ሃገራት ከምኡ እውን ምትእስሳር መሰረተ ልምዓት ዘለዋ ቆራፅነት ሓባራዊ ዕቤት ንምርግጋፅ ወሳኒ ብፅሒት ከምዘለዎ ተዛሪቦም። ቀዳማይ ሚኒስትር ዐቢይ ኣሕመድ (ዶ/ር) ዲፕሎማሲያዊ ምሕዝነት እተን ሃገራት ካብ ምጥንኻር ብዝዘለለ ንዘላቒ ሰላምን ድሕንነትን ደቡብ ሱዳን ዝለዓለ ደገፍ እናገበሩ ከምዝርከቡ ኣረዲኦም። ኣተሓሳስባ ፓን-ኣፍሪካኒዝም ኢትዮጵያ ዞባዊ ምትእስሳር እናጠናኸረ ከምዝኾነ ብምሕባር፤ ኣተሓሳስባ ፓን ኣፍሪካኒዝም መተኣሳሰሪ ገመድ ሓድነት ኣፍሪካውያን እዩ ኢሎም።

ኣዲስ ኣበባ/የካቲት/ 11/2018 (ኢዜኣ) ፓርቲ ዲሞክራሲያዊ ስምረት ትግራይ መረፃ 2018 ዓ/ም ሰላማውን ዲሞክራሲያውን ኮይኑ ንክሳለጥ ኣድላይ ምድላው እናገበረ ከምዝኾነ ኣባል ቤት ምኽሪ እቲ ፓርቲ ሽሻይ ኣማረ(ዶ/ር) ገሊፆም። ኣባል ቤት ምኽሪ ውድብ ስምረት ሽሻይ ኣማረ(ዶ/ር) ምስ ኢዜኣ ኣብ ዝነበሮም ቃለ መሕትት ኣብ ጉዳይ መረፃ ብዝምልከት ኣብ ዝሃብዎ ርኢቶ፤ ፓርቲ ስምረት ኣብ ሓፈሻዊ መረፃ 2018 ዓ/ም ሰላማውን ዲሞክራሲያውን ውድድር ንምግባር ምድላው እናገበረ ከምዝኾነ ሓቢሮም። መረፃ ሕገ መንግሥታዊ መሰል ህዝብታት ከምዝኾነ ብምሕባር፤ ኣብ ትግራይ ዘሎ ኩነታት ድልውነት መረፃ ብዝምልከት እውን፤ ኣብ ትግራይ ዘለዉ ኩሎም ፀገማት ብመረፃ ሕጋዊ መንግሥቲ ብምምስራት ጥራሕ እዮም ዝፍትሑ ኢሎም። ኣብ ትግራይ ዘሎ ዘይሕጋውን ዓሌታውን ጉጅለ ምስ ዝተፈላለዩ ደጋውን ውሽጣውን ፀረ ሰላም ሓይልታት ብምሕባር እቲ መረፃ ንምትዕንቓፍ ምንቅስቓስ እናገበረ ከምዝርከብ ብምግላፅ፤ ኣብቲ ክልል መረፃ ንምክያድ ዘኽእል ምችው ኩነታት ንምፍጣር ግዝያዊ ምምሕዳር እቲ ክልልን መንግሥቲ ፌዴራልን ሕገ ምንግሥታዊ ሓላፍነቶም ንክዋፅኡ ሓቲቶም። መረፃ ኣብ ትግራይ ካብቲ ሃገራዊ መረፃ ዝፍለየሉን ዝድሕረሉን ዝኾነ ዓይነት ምኽንያት ክፍጠር ከምዘይብሉ እውን ተዛሪቦም። ህዝቢ ትግራይ ከም ዕድል ኮይኑ ብዘይተመረፀ መንግሥቲ ንነዊሕ ዓመታት እናተመሓደረ ከምዝፀንሐ ብምዝኽኻር፤ ስለዝኾነ ድማ ካብ ዝኾነ ከባቢ ኢትዮጵያ ብዝበለፀ እቲ መረፃ ንህዝቢ ትግራይ ከምዘድልዮን ህዝቢ ትግራይ እውን ከምዝደልዮን ኣረዲኦም። በቲ ዓሌታውን ዘይሕጋውን ጉጅለ ዝረጋገፅ ረብሓ ከምዘየለ ዝገለፁ ሽሻይ ኣማረ(ዶ/ር)፤ ኩሎም ፀገማት ትግራይ ዝፍትሑ ብሰላማዊ መንገድን ዝተመረፀ መንግሥቲ እንትህሉን ጥራሕ እዩ ኢሎም። ኣብ ውሽጢ ትግራይ ይኹን ካብ ትግራይ ወፃኢ ዘሎ ኩሉ ትግራዋይ ኣብ ትግራይ መረፃ ንምክያድን ሕጋዊ ዝተመረፀ መንግሥቲ ንምምስራትን ኣብ ዝግበር ፃዕሪ ጠንካራ ቃልሲ ንክገብር እውን ፃውዒት ኣቕሪቦም። እቲ መረፃ ሰላማውን ዲሞክራሲያውን ኮይኑ ንክካየድ እውን ኩሎም ዜጋታት እታ ሃገርን ውድባት ፖለቲካን እጃሞም ክዋፅኡ ይግባእ ኢሎም።

ኣዲስ ኣበባ/ለካቲት 10 /2018(ኢዜኣ) ቱርክዬ ምስ ኢትዮጵያ ዘለዋ ናይ ነዊሕ እዋን ምሕዝነት ብዝበለፀ ንምጥንኻር ቆራፅ ከምዝኾነት ፕሬዚዳንት ሪፐብሊክ ቱርክዬ ረጀብ ጠይፕ ኤርዶዋን ገሊፆም። ቀዳማይ ሚኒስትር ዐቢይ ኣሕመድ (ዶ/ር) ምስ ፕሬዚዳንት ሪፐብሊክ ቱርክዬ ረጀብ ጠይፕ ኤርዶዋን ድሕሪ ምዝታዮም ብሓባር ጋዜጣዊ መግለፂ ሂቦም። ፕሬዚዳንት ሪፐብሊክ ቱርክዬ ረጀብ ጠይፕ ኤርዶዋን ኣብዚ እዋን፤ ቱርክዬን ኢትዮጵያን ክፍለ ዘበናት ዘቑፀረ ዲፕሎማሲያዊ ርክብ ከምዘለወን ተዛሪቦም። ቱርክዬ ምስ ኢትዮጵያ ንዘለዋ ናይ ነዊሕ እዋን ምትሕብባር ልዑል ዋጋ ከምትህቦን ምሕዝነታ ምጥንኻር ከምትደልን እውን ሓቢሮም። ቱርክዬ እቲ ኣብ ኢኮኖሚ፣ንግዲ፣መሰረተ ልምዓት፣ ባህሊ፣ትምህርትን ካልኦት ዓውድታትን ዘሎ ክልቲኣዊ ምትእስሳር ንምጥንኻር ቆራፅ እያ ኢሎም። ቱርክዬ ምስ ኢትዮጵያ ኣብ ማዕረ ምሕዝነትን ሓባራዊ ምርድዳእን መሰረት ዝገበረ ርክብ ከምተጠናኽር እውን ኣረዲኦም። ብተወሳኺ እውን ፕሬዚዳንት ሪፐብሊክ ቱርኪዬ ቀዳማይ ሚኒስትር ዐቢይ ኣሕመድ (ዶ/ር) ስልጣን ካብ ዝሕዙ ግዜ ጀሚሩ ኣብ ፖለቲካዊ፣ ማሕበራውን ኢኮኖሚያውን ትራንስፎርሜሽን ንዘሳለጥዎ ስራሕ ንኢዶም። ዓለም ገፁ ናብ ቀርኒ ኣፍሪካ ኣብ ዘዘረሉ እዚ እዋን ንነዊሕ እዋን ፀኒዑ ዝፀንሐ መዋቕርን ኣብነታዊ ምምሕዳርን ሃገረ መንግሥቲ ኢትዮጵያ ብዝበለፀ ኣድላይ እናኾነ ከምዝመፀ ኣብራህሪሆም። ኣብ ቀርኒ ኣፍሪካ ዘለዉ ፀገማት ብዘይ ዝኾነ ደጋዊ ኢድ ኣታውነት ብሃገራት እቲ ዞባ ጥራሕ ክፍታሕ ከምዝግባእን እቲ ዞባ መድረኽ መነሓንሒ ጂኦ ፖለቲካ ክኸውን ከምዘይብሉን ገሊፆም። ቀርኒ ኣፍሪካ ዕድላት ኢኮኖሚ ዘለውዎ ዞባ ከምዝኾነ እውን ሓቢሮም። እቲ ናይ ሎሚ መዓልቲ ዑደት እውን ኣወንታዊ ውፅኢታት ሒዙ ከምዝመፅእን ንሰላምን ምርግጋዕን እቲ ዞባ ኣስተዋኦ ከምዘበርክትን ሙሉእ እምነት ኣለኒ ኢሎም። ቀዳማይ ሚኒስትር ዐቢይ ኣሕመድ (ዶ/ር) ንዝገበሩሎም ኣቀባብላ እውን ምስጋና ኣቕሪቦም።

ኣዲስ ኣበባ/ለካቲት 10/2018 (ኢዜኣ) ኢትዮጵያን ቱርክዬን ኣብ ወሳኒ ጉዳያት ብሓባር ንምስራሕ ከምዝተስማዕምዓ ቀዳማይ ሚኒስትር ዐቢይ ኣሕመድ(ዶ/ር) ገሊፆም። ቀዳማይ ሚኒስትር ዐቢይ ኣሕመድ(ዶ/ር)ን ፕሬዚዳንት ሪፐብሊክ ቱርክዬ ረጀብ ጣይፕ ኤርዶጋን ኣብ 9ይ ሰነድ ስምምዕ ኮሚሽን ሓባራዊ ኢኮኖሚ ቱርክ-ኢትዮጵያ ከምኡ እውን ኣብ ዓውዲ ኢነርጂ ብምትሕብባር ንምስራሕ ዘኽእል ሰነድ መረዳድኢ ተፈራሪሞም። ​​​​​​ ቀዳማይ ሚኒስትር ዐቢይ ኣሕመድ (ዶ/ር) ምስ ፕሬዚዳንት ሪፐብሊክ ቱርክዬ ረጅብ ጠይብ ኤርዶዋን ዘትዮም። ድሕሪ ዘትኦም እውን ሓባራዊ መግለፂ ሂቦም። ቀዳማይ ሚኒስትር ዐቢይ ኣሕመድ(ዶ/ር) ኣብዚ እዋን ምስ ፕሬዚዳንት ሪፐብሊክ ቱርክዬ ውፅኢታዊ ዘተ ምግባሮም ተዛሪቦም። ኣብ መንጎ ክልቲአን ሃገራት ዘሎ ታሪኻውን ዲፕሎማሲያውን ርክብ ብዝበለፀ ንምጥንኻር ዘኽእሉ ስምምዓት ከምዝተስማዕምዑ እውን ሓቢሮም። ኣብ መንጎ ክልቲአን ሃገራት ልውውጥ ንግዲ ልዕሊ 1 ቢልዮን ዶላር ንክኸውን ብሓባር ንምስራሕ ከምዝተስማዕምዑ ብምግላፅ፤ ዓውድታት ቢዝነስ እውን ንክስፋሕፍሑ ኣብ ስምምዕ ከምዝተበፅሐ ኣብራህሪሆም። ብተወሳኺ እውን ኩባንያታት ቱርክዬ ኣብ ኢትዮጵያ ዘለዎም ተሳትፎ ኢንቨስትመንት ንከዕብዩ ከምዝተሓተተ ብምሕባር፤ ካብ ዕዳጋ ውሽጢ ሃገር ብተወሳኺ ናብ ሃገራት ኣፍሪካ ንግዲ ወፃኢ ምግባር ኣብ ዝኽእልሉ ጉዳያት ከምዝተስማዕምዑ ኣረዲኦም። ቱርክዬ ኣብ መንጎ ኣውሮፓን ኣፍሪካን ዘሎ እጃም ኢኮኖሚ ብምጥቃም ንዞባዊ ዕቤት ንክትሰርሕ እውን ኣብ ስምምዕ ከምዝተበፅሐ ወሲኾም ኣፍሊጦም። ኢትዮጵያ እስርቲ መልክኣ ምድሪ ኮይና ከምዝፀንሐት ዝገለፁ እቶም ቀዳማይ ሚኒስትር፤ እዚ ጉዳይ ብሰላማዊ መንገዲ ንምፍታሕ መንግሥቲ ቱርክዬ ዲፕሎማሲያዊ ኣስተዋፅኦ ንከበርክት ፃውዒት ኣቕሪቦም። ኣብ ዓውዲ ፀጥታ ክልቲአን ሃገራት ኣብ ቃልሲ ፀረ ግብረ ራዕዲ ብሓባር ንምስራሕ ቃሎም ከምዘሐደሱ እውን ኣብሪሆም። ብተወሳኺ እውን ኢትዮጵያ ንተዳልዎ ዓለም ለኸ ጉባኤ ለውጢ ከባብያዊ ኣየር (COP-32) ልውውጥ ልምዲ ንምግባር ተተስማዕሚዖም።

ኣዲስ ኣበባ/ለካቲት 10/2018 (ኢዜኣ) ቀዳማይ ሚኒስትር ዐቢይ ኣሕመድ(ዶ/ር)ን ፕሬዚዳንት ሪፐብሊክ ቱርክዬ ረጀብ ጣይፕ ኤርዶጋን ኣብ 9ይ ሰነድ ስምምዕ ኮሚሽን ሓባራዊ ኢኮኖሚ ቱርክ-ኢትዮጵያ ከምኡ እውን ኣብ ዓውዲ ኢነርጂ ብምትሕብባር ንምስራሕ ዘኽእል ሰነድ መረዳድኢ ከም ዝተፈራረሙ ቤት ፅሕፈት ቀዳማይ ሚኒስትር ኣፍሊጡ። እዞም ስምምዓት ኣብ መንጎ ቱርክዬን ኢትዮጵያን እናተጠናኸረ ንዝመፀ ምሕዝነት ብዝበለፀ ዘጠናኽሩ ከምዝኾኑ ብምግላፅ፤ ክልቲአን ሃገራት ኣብ ሓባራዊ ተረባሕነት መሰረት ኣብ ዝገበሩ ዓውድታት ዘለወን ርክብ ስራሕ ንምዕባይ ቆራፃት ከምዝኾኑ ዘመላኽት እዩ ኢሉ እቲ ቤት ፅሕፈት።

ኣዲስ ኣበባ/ለካቲት 10/2018(ኢዜኣ) ቀዳማይ ሚኒስትር ዐቢይ ኣሕመድ(ዶ/ር) ምስ ፕሬዚዳንት ሪፐብሊክ ቱርክዬ ረጀብ ጠይፕ ኤርዶጋን ዘትዮም። እቶም ቀዳማይ ሚኒስትር ኣብ ማሕበራዊ ምትእስሳር ገፆም ኣብ ዘመሓላለፍዎ መልእኽቲ፤ ምስ ፕሬዚዳንት ሪፐብሊክ ቱርክዬ ረጀብ ጠይፕ ኤርዶጋን ስፍሕ ዝበለ ዘተ ገይርና ኢሎም። ዘተና ኣብ መንጎ ኢትዮጵያን ቱርክዬን ዘሎ ዘላቒ ምሕዝነትን ጠንካራ ምትሕብባርን ብዝበለፀ ዘጠናኸረ እዩ ክብሉ እውን ሓቢሮም። ኣብ ስትራቴጂካዊ ዓውድታት ምትሕብባር ልውውጥ ሓሳብ ከምዝገበሩ ብምግላፅ፤ ረብሓ ክልቲአን ሃገራት ዘኽብሩ ምሕዝነታት ንምዕባይ ዘለዎም ሓባራዊ ቆራፅነት ዳግማይ ከምዘረጋገፁ ገሊፆም። እቲ ዘላቒ ርክብና ክልቲአን ሃገራት ንዘተኣሳስር ምሕዝነት ብዝበለፀ ከምዘጠናኽሮ ሙሉእ እምነት ኣለኒ ክብሉ እውን መልእኽቲ ኣመሓላሊፎም።

ኣዲስ ኣበባ/ለካቲት 10/2018 (ኢዜኣ) ቀዳማይ ሚኒስትር ዐቢይ ኣሕመድ(ዶ/ር) ንፕሬዚዳንት ሪፐብሊክ ተርክዬ ረጀብ ጣይፕ ኤርዶዋን ተቐቢሎሞም። እቶም ቀዳማይ ሚኒስትር ኣብ ማሕበራዊ ምትእስሳር ገፆም ኣብ ዘመሓላለፍዎ መልእኽቲ፤ ‎ክቡር ፕሬዚዳንት ሪፐብሊክ ቱርክዬ ረጀብ ጣይፕ ኤርዶዋን ናብ ምድረ ቀዳሞት ኢትዮጵያ እንኳዕ ብደሓን ክብል ይፎቱ ኢሎም። ዕላዊ ልውውጥ ዑደት ስራሕና ኣብ መንጎ ተረክዬን ኢትዮጵያንዘሎ ዕሙቕ ጥንካረ ምሕዝነት ዘንፀባርቕ እዩ ክብሉ እውን ሓቢሮም። ካብ ‎ኣንካራ ክሳብ ኣዲስ ኣበባ፤ ኣብ መንጎ ክልቲአን ጥንታዊ ሃገራት ዘሎ ምትሕብባር ብዝበለፀ ዘጠናኽሩን ዘላቒ ምትእስሳር ዘረጋግፁን ውፅኢታዊ ዘተታት ንክህልዉና ይምነ ክብሉ ሰናይ ትምኒቶም ገሊፆም።

ኣዲስ ኣበባ/ለካቲት/10/ 2018 (ኢዜኣ) ኢትዮጵያ ኣብ መበል 39 ጉባኤ መራሕቲ ሕብረት ኣፍሪካን መበል 2ይ ጉባኤ ጣልያን ኣፍሪካን ሃገራዊ ረብሓታታ ዝሓለወ ዲፕሎማስያዊ ዓወት ረኺባ እያ ክብል ሚኒስቴር ጉዳይ ወፃኢ ገሊፁ ፡፡ ሚኒስትር ዴኤታ ጉዳይ ወፃኢ ኣምባሳደር ብርሃኑ ፀጋዬ ኣብ ዝሓለፉ መዓልታት ኣብ ከተማ ኣዲስ ኣበባ ዝተሳለጡ ክልተ ዓበይቲ ጉባኤታት ብዝምልከት መግለፂ ሂቦም። እቶም ሚኒስትር ዲኤታ ኣብ መግለፂኦም ከምዝበልዎ፤ እቲ ጉባኤ ብዓወት ምዝዛሙ ኢትዮጵያ ዓለም ለኸ ጉባኤታት ንምእንጋድ ዓቕማ ከምዘዕበየት ዘመላኽት እዩ። ኢትዮጵያ ነቶም ክልተ ጉባኤታት ብዝለዓለ ፅሬት ከምዘተኣናገደቶም ብምሕባር፤ ንኣጋይሻ ብኽብሪ ተቐቢላ ብኽብሪ ሰንያ እያ ኢሎም። ኣብ መበል 39 ጉባኤ መራሕቲ እቲ ሕብረት 41 መራሕትን 48 ሚኒስተራት ጉዳያት ወፃእን ሃገራት ሓዊሱ ልዕሊ 20 ሽሕ ኣጋይሽን ምስታፎም ኣረዲኦም፡፡ ኢትዮጵያ ኣብ ክልቲኡ ጉባኤታት ኣርባዕተ ቀንዲ ዓወታት ከምዘመዝገበት ዝገለፁ እቶም ኣምባሳደር፤ ኣጋይሻ ብምቕባልን ብምስናይን ባህላ ዘስፋሕፈሐትሉ ፍፃመ ከምዝኾነ ገሊፆም። ጎና ጎኒ እቶም ጉባኤታት ዕዉታት ኩለ መዳያዊ መድረኻት ብምክያድ ሃገራዊ ረብሓታት ኢትዮጵያ ዝሕሉ ዲፕሎማስያዊ ዓወት ከምዝተረኸበ ሓቢሮም። እቶም ሚኒስትር ዲኤታ፤ እቲ ጉባኤ ደረጅኡ ብዝሓለወ መልክዑ ንክዕወት እጃሞም ንዝተዋፅኡ ከምኡ እውን ንነበርቲ ከተማ ኣዲስ ኣበባ ምስጋና ኣቕሪቦም። ተሳተፍቲ እቲ ጉባኤ ብኽብሪ ነናብ ሃገሮም ከም ዝተመለሱን ምፍናው ከምተገበረሎምን ኣብ መገለፂኦም ፀሪሖም ።

ኣዲስ ኣበባ/ለካቲት 10/2018 (ኢዜኣ) ኣብ ሓፈሻዊ መረፃ 2018 ዓ/ም ዲሞክራሲያውን ሰላማውን ውድድር ንምግባር ዘኽእል ኩለ መድያዊ ምድላው ከምዝገበሩ ላዕለዎት ኣመራርሓ ውድባት ባይቶና ዓባይ ትግራይን ሹም ተንቤን ፓርትን ገሊፆም። እቶም ላዕለዎት ኣመራርሓ ምስ ኢዜኣ ኣብ ዝነበሮም ፃንሒት፤ መረፃ ንህዝቢ ትግራይ ቅድሚ ኩሎም ነገራት ኣዝዩ ኣድላይን ወሳንን እዩ ኢሎም። ላዕለዋይ ጠማቲ ፓርቲ ሹም ተምቤን ኣይተ ገብረሚካኤል ተስፋይ ከምዝበልዎ፤ ህዝቢ ትግራይ ዲሞክራሲያዊ መሰላቱ ተሓዲጉ ብሽም ግዝያዊ ምምሕዳር እናተመሓደረ ክነብር የብሉን። ኣብዚ ሕዚ እዋን ህዝቢ ትግራይ ኣብ ኢትዮጵያ ኣብ ዘለዉ ክልቲኦም ኣብያተ ምኽሪ ውክልና ከምዘይብሉ ብምግላፅ፤ ነዚ ንምስትኽኻል ድማ ከም ውድብ ሹም ተንቤን መረፃ ኣብ እዋኑ ክግበር ከምዘለዎ ተረዲእና ዲሞክራሲያውን ሰላማውን ውድድር ንምግባር ዘኽእል ኩለ መዳያዊ ምድላው ገይርና ኢና ክብሉ ተዛሪቦም። ብሕታዊ መፍትሒ ፀገም ትግራይ መረፃ ገይርካ ዝተመረፀ መንግሥቲ ምምስራት ከም ዝኾነ ብምእማን ንዕዉትነት እቲ ሃገራዊ መረፃ ውድባዊ እጃሞም እናተዋፅኡ ከምዝኾኑ እውን ሓቢሮም። መረፃ ንህዝቢ ትግራይ ቅድሚ ኩሎም ነገራት ኣዝዩ ኣድላይን ወሳንን ከምዝኾነ እውን ኣረዲኦም። መረፃ ካብ ኲናት ንምትራፍ እውን ኣዝዩ ጠቓሚ እዩ ኢሎም። ኣቦ መንበር ውድብ ባይቶና ዓባይ ትግራይ ኣይተ ክብሮም በርሀ ብግደኦም፤ ህዝቢ ካብ ዘለዎ ዝተሓላለኸ ፀገም ንምውፃእ መረፃ ኣብ እዋኑ ተኻይዱ ናብ ልምዓት ምእታው ይግባእ። ህዝቢ ትግራይ መራሕቱ ዝመርፀሉ ስርዓት ክፍጠር ከምዘለዎ እውን ሓቢሮም። ካብ ናይ ኲናት ፖለቲካ ናብ ናይ ፓርቲ ፖለቲካ ክንኣቱ ኣለና ዝበሉ እቶም ኣቦ መንበር፤ እዚ እንተገይርና ህዝቢ እውን ጠብመንጃ ዘይኮነስ ሓሳብ ሒዙ ክመፅእ እዩ ኢሎም። ውዕሎናን ዘረባናን እውን ክልወጥ ኣለዎ ዝበሉ ኣይተ ክብሮም በርሀ፤ ብረት ፀላኢ ንዝበልካዮ ጥራሕ ዘይኮነስ ንባዕልኻ እውን እዩ ዝቐትል ክብሉ ተዛሪቦም። ከም ውድብ ኣብ ትግራይ ይኹን ኣብ ኣዲስ ኣበባ ዲሞክራሲያውን ሰላማውን ውድድር ምግባር ዘኽእል ኩለ መድያዊ ከምዝገበሩ እውን ኣብሪሆም። መንግሥቲ ይኹን ብሄራዊ ቦርድ መረፃ እውን ስርሖም ይስርሑ ንሕና እውን ክንገብሮ ዝግበኣና ኩለ መዳያዊ ምድላው እናገበርና ኢና ክብሉ ኣረዲኦም።

ኣዲስ ኣበባ/ለካቲት 8/2018 (ኢዜኣ) ፀገም ትግራይ ምስ መንግሥቲ ፌዴራል ኮይንካ ብሰላም እምበር ምስ ፀላኢ ህዝቢ ትግራይ ዝኾነ ሻዕብያ ኮይንካ ብኵናት ኣይፍታሕን ክብሉ ነበር ኢታማዦር ሹም ሓይልታት ሰራዊት ምክልኻል ፌዴሪኢ ሌተናል ጀነራል ፃድቃን ገብረ ትንሳኤ ገሊፆም። “ሰላም ንህዝብና፣ለውጢ ንመፃኢ ተስፋና”ኣብ ትሕቲ ዝብል መሪሕ ሓሳብ መድረኽ ምኽክር ደለይቲ ለውጢ ትግራይ ኣብ ከተማ ኣዲስ ኣበባ ተኻይዱ። ዋና መተሓባበሪ እቲ ምንቅስቓስ ነበር ኢታማዦር ሹም ሰራዊት ምክልኻል ፌዴሪኢ ሌ/ጀነራል ፃድቃን ገብረ ትንሳኤ ኣብዚ እዋን ካብ ተሳተፍቲ እቲ መድረኽ ንዝተልዓሉ ሕቶታት ኣብ ዝሃብዎ መብራህርሂ፤ መላእ ህዝቢ ትግራይ ደላይ ሰላምን እምቢ ንኵናት ዝበለን እዩ ኢሎም። ከም ህዝቢ ክንድሕን እንተኾይንና ኵናት ብምፅያፍ ንሰላም ክንሰርሕ ኣለና ዝበሉ ሌ/ጀነራል ፃድቃን፤ ህዝቢ ትግራይ ሰላም ካብ ምድላይ ብተወሳኺ በቢ ከባቢኡ ተወዲቡ ኣንፃር ኵናት ክቃለስ ከምዘለዎ ሓቢሮም። ኣብ ትግራይ ዘሎ ዘይሕጋዊ ጉጅለ ምስ ሻዕብያን ካልኦት ፀረ ሰላም ሓይልታትን ኮይኑ ንስምምዕ ሰላም ፕሪቶሪያ ብምፍራስ ኵናት ንምጅማር ምድላዉ ወዲኡ ከምዝርከብ ገሊፆም። ፀገም ትግራይ ምስ መንግሥቲ ፌዴራል ኮይንካ ብሰላም እምበር ምስ ፀላኢ ህዝቢ ትግራይን ኢትዮጵያን ዝኾነ ሻዕብያ ኮይንካ ብኵናት ኣይፍታሕን ክብሉ እውን ተዛሪቦም። እዚ ጉጅለ ህዝቢ ብሓይሊ ስንቂ ንከዋፅእን መናእሰይ እናገፈፈ ናብ ኵናት ንምእታውን እናሰርሐ እዩ ዝርከብ ኢሎም። መንግሥቲ ፌዴራል ስምምዕ ሰላም ፕሪቶሪያ ከኽብር ይኹን ፀገም ትግራይ ክፈትሕ ሓላፍነቱ ከምዝኾነ ብምሕባር፤ ኣብ ትግራይ ዘሎ ፀገም ንምፍታሕ ከም ምንቅስቓስ ምስ መንግሥቲ ፌዴራል ብምትሕብባር እናሰራሕና ኢና ንርከብ ኢሎም። ስለዝኾነ ድማ ኣብዚ ሕዚ እዋን ምስ ፌዴራል መንግሥቲ ኣብ ዝሓሸ ብርኪ ምትእምማንን ርክብን ከምዝበፅሑ ብምግላፅ፤ ኣብ ቀፃሊ እውን ብዝበለፀ ተዋዲድና ክንሰርሕ ኢና ክብሉ መልእኽቲ ኣመሓላሊፎም። ኣብቲ ምንቅስቓስ ደለይቲ ለውጢ ትግራይ ዘዳለዎ መድረኽ፤ ተደራደርቲ ስምምዕ ሰላም ፕሪቶሪያ ዝኾኑ ነበር ኢታማዦር ሹም ሓይልታት ሰራዊት ፌዴሪኢ ሌ/ጀነራል ፃድቃን ገ/ትንሳኤን ኣሰፋ ኣብርሃን ሓዊሱ መራሕቲ ዝተፈላለዩ ውድባት ፖለቲካ ትግራይ፣ ዝተፈላለዩ ክፋላት ሕብረተሰብን ፍሉጣት ፖለቲከኛታትን ተሳቲፎም።

ኣዲስ ኣበባ/ለካቲት 8/2018 (ኢዜኣ) ኣብ ከተማ ኣዲስ ኣበባ ክካየድ ዝቐነየ መበል 39 ጉባኤ መራሕቲ ሕብረት ኣፍሪካ ተዛዚሙ። እቲ ጉባኤ፤ “ምርግጋፅ ዘላቒ ቀረብን ድሕንነቱ ዝተሓለወ ሰርዓት ሓለዋ ፅሬትን፤ ንዕዉትነት ሽቶታት ኣጀንዳ 2063” ኣብ ትሕቲ ዝብል መሪሕ ሓሳብ እዩ እናተኻየደ ፀኒሑ። እቶም መራሕቲ መበል 48 ስሩዕ ኣኼባ ቤት ምኽፍሪ ፈጻሚ ስራሕ ኣብ ዝዘተየሎም ኣጀንዳታት ዘትዮም። ድሕንነትን ሓለዋ ፅሬትን ማይ፣ትግበራ ኣጀንዳ 2063ን ኣህጉራዊ ምትእስሳርን፣ማሕበራውን ኢኮኖሚያውን ልምዓት፣ልምዓት ሓይሊ ሰብ፣ትካላውን ፋይናንሳውን ሪፎርማት፣ዞባዊ ምሕዝነትን ኣፍሪካ ኣብ መድረኽ ዓለም ዘለዋ እጃምን ካብቶም ዝተዘተየሎም ኣጀንዳታት እዮም። እቲ ንክልተ መዓልትታት ክካየድ ዝፀንሐ ጉባኤ ዝተፈላለዩ ውሳነታት ብምሕላፍ ተዛዚሙ።

ኣዲስ ኣበባ/ለካቲት 8/2018 (ኢዜኣ) ቀዳማይ ሚኒስትር ዐቢይ ኣሕመድ (ዶ/ር) ምስ ፕሬዚዳንት ኬንያ ዊልያም ሩቶ ዘትዮም። እቶም ቀዳማይ ሚኒስትር ኣብ ማሕበራዊ ምትእስሳር ገፆም ኣብ ዘመሓላለፍዎ መልእኽቲ፤ ሎሚ መዓልቲ ምስ ፕሬዚዳንት ኬንያ ዊልያም ሩቶ ኣብ ኣህጉራውን ሓባራዊ ድሌታትናን ውፅኢታዊ ዘተ ገይርና ኢሎም።

ኣዲስ ኣበባ/ለካቲት 8/2018 (ኢዜኣ) ቀዳማይ ሚኒስትር ዐቢይ ኣሕመድ (ዶ/ር) ምስ ፕሬዚዳንት ደቡብ ኣፍሪካ ሲሪል ራማፎሳ ዘትዮም። እቶም ቀዳማይ ሚኒስትር ኣብ ማሕበራዊ ምትእስሳር ገፆም ኣብ ዘመሓላለፍዎ መልእኽቲ፤ ጎና ጎኒ ካልኣይ መዓልቲ ጉባኤ መራሕቲ ሕብረት ኣፍሪካ ምስ ፕሬዚዳንት ደቡብ ኣፍሪካ ሲሪል ራማፎሳ ክልቲኣዊ ርክብና ምጥንኻር ኣብ ዘኽእሉ ጉዳያት ዘቲና ኢሎም።

ኣዲስ ኣበባ/ለካቲት 8/2018 (ኢዜኣ) ‎ቀዳማይ ሚኒስትር ዐቢይ ኣሕመድ(ዶ/ር) ምስ ፕሬዚዳንት ጋና ጆን ማሃማ ዘትዮም። እቶም ቀዳማይ ሚኒስትር ኣብ ማሕበራዊ ምትእስሳር ገፆም ኣብ ዘመሓላለፍዎ መልእኽቲ፤ ሎሚ መዓልቲ ጎና ጎኒ ጉባኤ መራሕቲ ሕብረት ኣፍሪካ ምስ ፕሬዚዳንት ጋና ጆን ማሃማ ክልቲኣዊ ርክብ ምጥንኻር ኣብ ዘኽእሉ ጉዳያት ምዝታዮም ገሊፆም።

ኣዲስ ኣበባ/ለካቲት 8/2018 (ኢዜኣ) ‎ቀዳማይ ሚኒስትር ዐቢይ ኣሕመድ(ዶ/ር) ምስ ምክትል ፕሬዚዳንት ኮትዲቯር ቲዬሞኮ ሜይሊየት ኮኔ ዘትዮም። እቶም ቀዳማይ ሚኒስትር ኣብ ማሕበራዊ ምትእስሳር ገፆም ኣብ ዘመሓላለፍዎ መልእኽቲ፤ ሎሚ መዓልቲ ንምክትል ፕሬዚዳንት ኮትዲቯር ቲዬሞኮ ሜይሊየት ኮኔ ረኺበ ኣብ ጉዳያት ኣህጉራውን ሓባራዊ ድሌትን ዘቲና ኢሎም።

ኣዲስ ኣበባ/ለካቲት 8/2018 (ኢዜኣ) ንብልፅግናን ምርግጋዕን ኣፍሪካ ኣብ ዓውዲ ማይ ብቆራፅነት ኢንቨስት ምግባር ከምዝግባእ ኣብ ሕብረት ኣፍሪካ ኮሚሽነር ኮሚሽን ግብርና፣ልምዓት ገጠር፣ብሉ ኢኮኖምን ዘላቒ ከባብን ሞሰስ ቪላካቲ ገሊፆም። መበል 39 መበል ጉባኤ መራሕቲ ሕብረት ኣፍሪካ “ምርግጋፅ ዘላቒ ቀረብን ድሕንነቱ ዝተሓለወ ሰርዓት ሓለዋ ፅሬትን፤ ንዕዉትነት ሽቶታት ኣጀንዳ 2063” ኣብ ትሕቲ ዝብል መሪሕ ሓሳብ እናተኻየደ እዩ ዝርከብ። ኮሚሽነር ሞሰስ ቪላካቲ ኣብዚ እዋን ከምዝበልዎ፤ ማይን ሓለዋ ፅሬትን ንልምዓት ኣፍሪካን ስግግር ኢኮኖምን መሰረታዊ ጉዳያት እዮም። ኣፍሪካ ኣብቲ ዓውዲ በቢ ዓመቱ ሕፅረት ገንዘብ ብቢልዮን ዝቑፀር ዶላር ከምዘለዋ ብምግላፅ፤ እዚ ድማ ዘላቒ ሽቶታት ልምዓት ንምዕዋትን ለውጢ ከባብያዊ ኣየር ንምፅዋርን ዕንቅፋት ከምዝኾነ ሓቢሮም። ነቲ ጉዳይ ትኹረት ብምሃብ መሪሕ ሓሳብ ጉባኤ መራሕቲ ሕብረት ኣፍሪካ እዚ ዓመት “ምርግጋፅ ዘላቒ ቀረብን ድሕንነቱ ዝተሓለወ ሰርዓት ሓለዋ ፅሬትን፤ ንዕዉትነት ሽቶታት ኣጀንዳ 2063” ተባሂሉ ምምራፁ ነዚ እዩ ኢሎም። ኣብቲ ጉባኤ ንኢንቨስትመንት ድሉዋት ዝኾኑ ፕሮጀክትታት ከምዝቐረቡ ብምሕባር፤ እዚኣቶም ድማ ኣብ ዓመት ብርክት ዝበለ ቢልዮን ዶላር ዝበፅሕ ቃል ኪዳን ኢንቨስትመንት ከምዝተረኸበሎም ኣረዲኦም። ሃገራት ለውጢ ከባብያዊ ኣየር ዝፃወሩ ፕሮግራማት ማይ ንከዳልዋ ዝሕግዙ መምርሕታትን ከይዲ እቲ ኢንቨስትመንት ንምክትታል ዘኽእል መመዝገቢ ውፅኢትን ዕላዊ ከምዝተገበረ ተዛሪቦም። ንብልፅግናን ምርግጋዕን ኣፍሪካ ኣብ ዓውዲ ማይ ብቆራፅነት ኢንቨስት ምግባር ከምዝግባእ እውን ገሊፆም።

ኣዲስ ኣበባ/ለካቲት 8/2018 (ኢዜኣ) ‎ቀዳማይ ሚኒስትር ዐቢይ ኣሕመድ(ዶ/ር) ምስ ፕሬዚዳንት ደቡብ ሱዳን ሳልቫ ኬር ማያርዲት ዘትዮም። እቶም ቀዳማይ ሚኒስትር ኣብ ማሕበራዊ ምትእስሳር ገፆም ኣብ ዘመሓላለፍዎ መልእኽቲ፤ ካልኣይ መዓልቱ ኣብ ዝሓዘ ጉባኤ መራሕቲ ሕብረት ኣፍሪካ ኣብ ዝተፋለለዩ ወሰንቲ ኣጀንዳታት ዘተና እናገበርና ጎና ጎኒ ድማ ምስ ፕሬዚዳንት ደቡብ ሱዳን ሳልቫ ኬር ማያርዲት ተራኺብና ኣብ ዞባዊ ሰላምን ፀጥታን ዘቲና ኢሎም።

ኣዲስ ኣበባ/ለካቲት 8/2018 (ኢዜኣ) ኣብ ኣፍሪካ ቀረብ ማይን ዘላቒ ስርዓት ፅሬትን ኣብ ምርግጋፅ ትኹረት ምግባር ከምዝግባእ ፕሬዚዳንት ናሚቢያ ኔቱምቦ ናንዲ ንዳይቷ(ዶ/ር) ገሊፀን። መበል 39 ጉባኤ መራሕቲ ሕብረት ኣፍሪካ ኣብ ዋና መቐመጢ እቲ ሕብረት ዝኾነት ከተማ ኣዲስ ኣበባ “ምርግጋፅ ዘላቒ ቀረብ ማይን ድሕንነቱ ዝተሓለወ ስርዓት ኣተሓላልዋ ፅሬትን፤ ንዕዉትነት ሽቶታት ኣጀንዳ 2063” ኣብ ትሕቲ ዝብል መሪሕ ሓሳብ እናተኻየደ እዩ ዝርከብ። ብምትሕብባር ኮሚሽን ሕብረት ኣፍሪካን ደቡብ ኣፍሪካን ዝተዳለወ መድረኽ ዘተ ኢንቨስትመንት ማይ ይካየድ ኣሎ። ፕሬዚዳንት ናሚቢያ ኔቱምቦ ናንዲ ንዳይቷ(ዶ/ር) ኣብዚ እዋን ከምዝበልኦ፤ ለውጢ ከባብያዊ ኣየር ዝፃወር ቀረብ ማይን ዘላቒ ኣተሓላልዋ ፅሬትን ኣብ ኣፍሪካ ጋህዲ ንምግባር ብትኹረት ምስራሕ ይግባእ። ፕሮግራም ኢንቨስትመንት ልምዓት ማይ ኣፍሪካን ኣብ ትሕቲ ኣጀንዳ ልምዓት ማይ ውሕመ ዘሎ ትልሚ ኢንቨስትመንትን ውፅኢታዊ ብዝኾነ መንገዲ ተግባራዊ ምግባር ይግባእ ኢለን። ነዚ ድማ ፖለቲካዊ ቆራፅነትን ኣብቲ ኢንቨስትመንት ዘሎ ክፍተት ንምምላእ ሃፍቲ ምትእኽኻብን ወሳኒ ከምዝኾነ ሓቢረን። ንኹሉ ዜጋ ቀረብ ሽቶ ምርግጋፅ ዘላቒ ልምዓት ማይን ዘላቒ ስርዓት ሓለዋ ፅሬትን ንምዕዋት ከምኡ እውን ንክብሪ ማሕበረሰብና፣ጥዕናን ድሕንነትን ህዝቢ ወሳኒ ዝኾኑ ኣገልግሎታት ፅሬት ንምምሕያሽ ምትጋህ ከምዝግባእ ተዛሪበን። ናሚቢያ ዝተዋደደ ትልሚ፣ተሳትፎ ማሕበረሰብን ሃገራዊ ሽቶታት 2030 መሰረት ዝገበረ “ብሄራዊ ፖሊሲ ቀረብን ፅሬትን ማይ” ከምዘፅደቐት ኣረዲአን።

ኣዲስ ኣበባ/ለካቲት 8/2018 (ኢዜኣ) እንግሊዝ ምስ ሃገራት ኣፍሪካ ዘለዋ ምትሕብባርን ሓባራዊ ተረባሕነትን ምጥንኻር ዘኽእል ሓዱሽ ስልቲ ተግባራዊ ከምዝገበረት ኣምባሳደር እንግሊዝ ኣብ ኢትዮጵያ ዳረን ዌልች ገሊፆም። ኣምባሳደር እንግሊዝ ኣብ ኢትዮጵያ ዳረን ዌልች ንሚድያ ፐልስ ኦፍ ኣፍሪካ(POA) ከምዝበልዎ፤ እንግሊዝ ምስ ሃገራት ኣፍሪካ ሓባራዊ ተረባሕነት መሰረት ዝገበረ ዕሙቕ ምሕዝነት ምህናፅ ትደሊ እያ። ጠንካራ ኣፍሪካ ምህላው ንልህቀት ኣህጉር ኣፍሪካ ጥራሕ ዘይኮነስ ምስ ኢንግሊዝ ንዝህልዋ ቀፃልነት ዘለዎ ዘላቒ ርክብን ሓባራዊ ተረባሕነትን ወሳኒ እዩ ኢሎም። እንግሊዝ ምስ ኣህጉር ኣፍሪካ ዘለዋ ሓባራዊ ተረባሕነትን ምትሕብባርን ክጠናኸር ከምትደሊ እውን ተዛሪቦም። ኣብ መበል 39 ጉባኤ መራሕቲ ሕብረት ኣፍሪካ ንምስታፍ ካብ ዝተፈላለዩ ክፋላት ዓለም ዝመፁ ተሳተፍቲ ሽቶኦም ምስ ሕብረት ኣፍሪካ ዕሙቕ በዓል በዙሕ ወገን ምትሕብባር ንምፍጣር እዩ ኢሎም። እንግሊዝ ንኣጀንዳ 2063 ሕብረት ኣፍሪካ ንምድጋፍ ምስ ሃገራት ኣፍሪካ ብቐረባ እናሰርሐት ከምዝኾነት ብምግላፅ፤ ናይ ነዊሕ እዋን ስትራቴጂካዊ ማዕቐፍ እታ ኣህጉር ሓቛፊ ዕቤትን ዘላቒ ልምዓትን ከምዝኾነ ተዛሪቦም። ምስ ኣፍሪካ ተግባራዊ ዝገበርናዮ ስልቲ ምትሕብባር ኣብ ዓለም ለኸ ጉዳያት እናዓበየ ንዝመፀ እጃም ኣፍሪካ ኣፍልጦ ዝህብን ንኣፍሪካ ተኮር ኢንሼቲቫት ደገፍ ዝገብርን እዩ ክብሉ እውን ኣረዲኦም።

ኣዲስ ኣበባ/ለካቲት 8/2018 (ኢዜኣ) መንግሥቲ ፌዴራል ተመዛበልቲ ኣብ ምምላስ ካብ መጀመርታ ጀሚሩ ተቓውሞ ነይርዎ ኣይፈልጥን ክብሉ ነበር ኢታማዦር ሹም ሰራዊት ምክልኻል ፌዴሪኢ ሌ/ጀነራል ፃድቃን ገብረ ትንሳኤ ገሊፆም። “ሰላም ንህዝብና፣ለውጢ ንመፃኢ ተስፋና”ኣብ ትሕቲ ዝብል መሪሕ ሓሳብ መድረኽ ምኽክር ደለይቲ ለውጢ ትግራይ ኣብ ከተማ ኣዲስ ኣበባ ተኻይዱ። ኣብቲ ምንቅስቓስ ደለይቲ ለውጢ ትግራይ ዘዳለዎ መድረኽ፤ ተደራደርቲ ስምምዕ ሰላም ፕሪቶሪያ ዝኾኑ ነበር ኢታማዦር ሹም ሓይልታት ሰራዊት ፌዴሪኢ ሌ/ጀነራል ፃድቃን ገ/ትንሳኤን ኣሰፋ ኣብርሃን ሓዊሱ መራሕቲ ዝተፈላለዩ ውድባት ፖለቲካ ትግራይ፣ ዝተፈላለዩ ክፋላት ሕብረተሰብን ፍሉጣት ፖለቲከኛታትን ተሳቲፎም። ዋና መተሓባበሪ እቲ ምንቅስቓስ ነበር ኢታማዦር ሹም ሰራዊት ምክልኻል ፌዴሪኢን ሌ/ጀነራል ፃድቃን ገብረ ትንሳኤ ኣብዚ እዋን ካብ ተሳተፍቲ እቲ መድረኽ ንዝተልዓሉ ሕቶታት ኣብ ዝሃብዎ መብራህርሂ፤ ተመዛበልቲ ንምምላስ ኣብ ዝግበር ፃዕሪ እቲ ዘይሕጋዊ ጉጅለ ዕጥቀይን ምምሕዳረይን ሒዘ ተዘይኣተኹ ብዝብል ምኽንያት ክሳብ ሕዚ ክሳኻዕ ኣይከኣለን ኢሎም። ምስ ፌዴራል መንግሥቲ ዋላ ኳ ጉዳይ ፖለቲካን ፀጥታን ኣብ ከይዲ ብዝርርብ ንክፍታሕን ሰብኣዊ መሰል እቶም ተመዛበልቲ ቀዳምነት ንክወሃቦ ተስማዕሚዖም ከምዝነበሩ ብምዝኽኻር፤ እቲ ኣብ ትግራይ ዘሎ ዘይሕጋዊ ጉጅለ ግና ዕንቅፋት ከምዝኾነ ሓቢሮም። ኣብዚ መዳይ መንግሥቲ ፌዴራል ተመዛበልቲ ኣብ ምምላስ ካብ መጀመርታ ጀሚሩ ተቓውሞ ከምዘይነበሮ ኣረዲኦም። ዝኾነ ኣብ ወልቃይት ይኹን ካሊእ ክፋል ትግራይ ዘሎ ህዝቢ ኣመሓዳሪኡ ባዕሉ ክመርፅ ከምዘለዎ እውን ሓቢሮም። ኣብ ቀረባ እዋን እውን እቶም ተመዛበልቲ ንምምላስን ምስቲ ናይቲ ካበቢ ምምሕዳር ዝርርብ ንምግባርን ናብ ሑመራ ልኡኽ ፌዴራል መንግሥቲ ከይዱ ከምዝነበረ ብምዝኽኻር፤ እቲ ናይ ትግራይ ግዝያዊ ምምሕዳር ግና ብመግለፂ ንሕና ዘይንፈልጦ ምምላስ ተመዛበልቲ ኣይንቕበሎን ከምዝበለ ኣዘኻኪሮም። ኣብ ትግራይ ዘሎ ግዝያዊ ምምሕዳር ተመዛበልቲ ንምምላስ ኣብ ዝግበር ምንቅስቓስ ክሳተፍን ክተሓባበርን ከምዘይደልን ዝግበረሉ ፃውዒት እውን ከምዘይቕበሎን እውን ኣብሪሆም።