ኣዲስ ኣበባ/ጥሪ 4/2018 (ኢዜኣ) ምክትል ኣቦ መንበርን ወታደራዊ ዋና ኣዛዝን ህዝባዊ ትካል ኣምሓራ ፋኖ ኮሎኔል ፈንታው ሙሀባ ምስ ሰራዊቶም ኣማራፂ ሰላም ተቐቢሎም። ኮሎኔል ፈንታው ሙሀባ ህዝባዊ ትካል ኣምሓራ ፋኖ ምስ መንግሥቲ ክልል ኣምሓራ ከምኡ እውን ሕብረት ኣፍሪካን ኢጋድን ዝገበሮ ስምምዕ ሰላም ስዒቡ ምስ ሰራዊቶም እቲ ስምምዕ ሰላም ምቕባሎም ኣሚኮ ፀብፂቡ። ኣብ መንጎ ብሄራዊ ክልላዊ መንግሥቲ ክልል ኣምሓራን ህዝባዊ ትካል ኣምሓራ ፋኖን 25 ሕዳር 2018 ዓ/ም ስምምዕ ዘላቂ ሰላም ምፍራሙ ዝዝከር እዩ።

ኣዲስ ኣበባ/ጥሪ 4/2018(ኢዜኣ) ሓባራዊ ተረኽ ንሓባራዊ ህንፀት ሃገረ መንግስትን ስግግር ወለዶን ርኡይ እጃም ከምዘለዎ ፕሮፌሰር ባህሩ ዘውዴ ገሊፆም። ኣብ ኢትዮጵያ ሓባራዊ ተረኻት ንምህናፅ ዝዓለመ ሃገራዊ ኮንፈረንስ ኣብ ከተማ ጅማ ይካየድ ኣሎ። ኣብቲ ኮንፈረንስ፤ ኣብ ቤት ምኽሪ ወከልቲ ህዝቢ ዋና ተፀዋዒ መንግሥቲ ሚኒስትር ተስፋዬ በልጅጌ (ዶ/ር)፣ሚኒስትር መስኖን ከባብታት ቆላን ኣብርሃም በላይ (ዶ/ር)፣ኣፈ ጉባኤ ጨፌ ኦሮሚያ ሰዓዳ ኣብዱረህማን፣ሓላፊ ቤት ፅሕፈት ፓርቲ ብልፅግና ጨንፈር ክልል ኦሮሚያ ከፍያለው ተፈራ፣ካልኦት ኣመራርሓ ፌዴራልን ክልላትን ከምኡ እውን ፃውዒት ዝተገበረሎም ኣጋይሽ ተረኺቦም። ፍሉጥ ሙሁር ታሪኽ ፕሮፌሰር ባህሩ ዘውዴ ኣብቲ ኮንፈረንስ፤ “ህንፀት ሓባራዊ ተረኽን ፈተናታቱን”ብዝብል ርእሲ መበገሲ ፀሑፍ ኣቕሪቦም። ኣብ ፅሑፎም እውን፤ ኢትዮጵያውያን ካብ ኣብ ኣፈላላይን ከፋፋሊ ተረኽን ኣብ ሓባራዊ ተረኽ ትኹረት ብምግባር ንህንፀት ፅኑዕ ሃገረ መንግሥቲ ብምትሕብባር ክሰርሑ ይግባእ አሎም። ከፋፋልን ኣግላልን ተረኽ ንህንፀት ሃገረ መንግሥቲ ፈተንቲ ከምዝኾኑ ብምግላፅ፤ ሓድነትን ሕብረትን ዜጋታት ዘጠናኽር ሓባራዊ ተረኽ ምፍጣር ከምዘድሊ እውን ሓቢሮም። ሙሁራን ታሪኽ ንህንፀት ሃገረ መንግሥትን ምቅርራብ ህዝብታትን ንክውዕል ናይ ምግባር ዓብይ ሓላፍነት ከምዘለዎም ተዛሪቦም። ከይዲ ህንፀት ሓባራዊ ተረኽ ብዝሓሸ ልዕልና ሓሳብ ብምምራሕ ዝሓሸትን ዘተኣሳስር ተረኽ ዝዓሰላን ኢትዮጵያ ናብ ወለዶ ምትሕልላፍ ከምዝግባእ ኣረዲኦም። ህንፀት ሓባራዊ ተረኽ ንህንፀት ጠንካራ ሃገረ መንግስትን ስግግር ዝሓሸ ወለዶን ርኡይ እጃም ከምዝህልዎ እውን ኣብራህሪሆም።

ኣዲስ ኣበባ/ጥሪ 4/2018 (ኢዜኣ) ኣብ ዝሓለፉ 6 ኣዋርሕ ሰላምን ድሕንነትን ህዝብን ሃገር ኣብ ምሕላው ከምኡ እውን ገበን ኣብ ምክልኻል ውፅኢታዊ ስራሕቲ ከምዝተሳለጡ ኣዛዚ ፖሊስ ፌዴራል ኢትዮጵያ ኮሚሽነር ጀነራል ደመላሽ ገብረሚካኤል ገሊፆም። ፖሊስ ፌዴራል ኢትዮጵያ ግምገማ ኣፈፃፅማ ትልሚ 6 ኣዋርሕ በጀት ዓመት 2018 ዓ/ም የካይድ ኣሎ። ኣዛዚ ፖሊስ ፌዴራል ኢትዮጵያ ኮሚሽነር ጀነራል ደመላሽ ገብረሚካኤል ኣብዚ እዋን፤ ፖሊስ ኣብ ዝሓለፉ 6 ኣዋርሕ ውፅኢታዊ ስራሕቲ ከምዘሳለጠ ተዛሪቦም። ስለዝኾነ ድማ ምስ ካልኦት ኣካላት ፀጥታ ፌዴራልን ክልላትን ብምትሕብባር ሰላምን ድሕንነትን ህዝብን ሃገርን ብኩለ መዳያዊ መልክዑ ምርግጋፅ ተኻኢሉ እዩ ኢሎም። ኣብ ምክልኻል ገበን፣ምርመራ ገበን፣ልምዓት ሓይሊ ሰብ፣ዓቕሚ ሎጂስቲክስን ኣጠቓቕማ ቴክኖሎጅን ውፅኢታዊ ስራሕቲ ከምዝተሳለጡ ሓቢሮም። ምንቅስቓስ ጉጅለታት ግብረ ራዕዲ ኣብ ምቁፅፃርን ልዕልነት ሕጊ ኣብ ምኽባርን እውን ዕዉታት ስራሕቲ ከምዝተሳለጡ ኣረዲኦም። ፖሊስ ኣብ ዝሓለፉ 6 ኣዋርሕ ልዕሊ 14 ቢልዮን ብር ዝግመቱ ናውቲ ኮንትሮባንድ ኣብ ትሕቲ ቁፅፅር ከምዘውዓለ ብምግላፅ፤ ዘይሕጋዊ ዝውውር ሰባትን መዐወኒ እፅታትን ብዝተዋደደ መልክዑ ንምቁፅፃር ውፅኢታዊ ስጉምትታት ከምዝተወሰዱ ኣብራህሪሆም። ኣገልግሎት ፖሊስ ብቴክኖሎጂ ዝማዕበለ ናይ ምግባር ስራሕ ከምዝተጠናኸረ ብምሕባር፤ ኣብ ቀረባ መዓልትታት ኣብ ኢትዮጵያ ፈላማይ ስማርት ፖሊስ ጣብያ ናብ ስራሕ ከምዝኣትው ተዛሪቦም።

ኣዲስ ኣበባ/ጥሪ 4/2018 (ኢዜኣ) መንግሥቲ መደመር ኢትዮጵያውያን ዘተኣሳስር ገዛኢ ተረኽ ንምህናፅ ብፍሉይ ትኹረት እናሰርሐ ከምዝኾነ ኣብ ቤት ምኽሪ ወከልቲ ህዝቢ ዋና ተፀዋዒ መንግሥቲ ሚኒስትር ተስፋዬ በልጅጌ (ዶ/ር) ገሊፆም። ኣብ ኢትዮጵያ ሓባራዊ ተረኻት ንምህናፅ ዝዓለመ ሃገራዊ ኮንፈረንስ ኣብ ከተማ ጅማ ይካየድ ኣሎ። ኣብ ቤት ምኽሪ ወከልቲ ህዝቢ ዋና ተፀዋዒ መንግሥቲ ሚኒስትር ተስፋዬ በልጅጌ (ዶ/ር) “ሃገራዊ መንነት፣ሓባራዊ ተዘክሮታትን ተቐባልነት ሃገረ መንግስትን፣ተሞኩሮን እዋናዊ ዝተተለሙ ኣንፈታትን ኢትዮጵያ”ብዝብል ርእሲ መንግሥቲ መደመር ሃገራዊ ብልፅግና ንምርግጋፅ ዝሓዞም ቁልፊ ኣንፈታት ዘመላኽት ፅሑፍ ኣብቲ መድረኽ ኣቕሪቦም። ኣብ ፅሑፎም እውን፤ ኢትዮጵያ ጥንታዊት፣መቦቆል ስልጣነ፣ልምምድ ስነ መንግስቲ ዘለዋ፣ፈላመይቲ ኣባል ሊግ ኦፍ ኔሽንን መስራቲት ሕብረት ኣፍሪካን ከምዝኾነት ኣረዲኦም። ኣብ 1888 ዓ/ም ዝተረኸበ ዓወት ዓድዋ እውን ዋላ ኳ መርኣያ ነፃነት ዝተጎናፀፈት፣ብቋንቋ፣ባህልን መንነትን ዝተዓደለት ንክትኸውን እንተኽኣላ ፀገም ተቐባልነት ሃገረ መንግሥቲ ካሊእ ፈታኒ ምስላ ኮይኑ ፀኒሑ እዩ ኢሎም። ሓባራዊ መንነትን ተዘክሮን ኢትዮጵያውያን ብመስተጋብር ንግዲ፣ሃይማኖት፣ፍልሰትን ተፈጥሮኣዊ ሓደጋን ዝተፈጠረ ከምዝኾነ እውን ተዛሪቦም። ከይዲ ህንፀት ሃገረ መንግስቲ ኢትዮጵያ ገና ዘይተዛዘመ ብምዃኑ ዝተረጋግዐን ተቐባልነት ዘለዎን ሃገረ መንግሥቲ ምህናፅ ናይ ኩሉ ተሳትፎ ከምዝሓትት ኣረዲኦም። መንግሥቲ መደመር ኣብ ኢትዮጵያ ንነዊሕ እዋን ዝፀንሑ ፀገማት ብዘላቕነት ንምፍታሕ ብግልፂ ኣንፈት ብምሕንፃፅ ብፍሉይ ትኹረት እናሰርሐ ከምዝርከብ ሓቢሮም። ስለዝኾነ ድማ ብሄራዊ ምርድዳእን ዕርቅን፣ብሄራዊ ገዛኢ ተረኽን ዕዳጋ ሓሳብን፣ሓሳባዊ ፖለቲካን ዲሞክራሲያዊ ምርድዳእን፣ልኣላዊነት ኢኮኖምን ብልፅግና ሃገርን ንምርግጋፅ ውፅኢታዊ ስራሕቲ እናተሳለጡ ከምዝርከቡ ኣብራህሪሆም። ኣብቲ ኮንፈረንስ፤ ኣብ ቤት ምኽሪ ወከልቲ ህዝቢ ዋና ተፀዋዒ መንግሥቲ ሚኒስትር ተስፋዬ በልጅጌ (ዶ/ር)፣ሚኒስትር መስኖን ከባብታት ቆላን ኣብርሃም በላይ (ዶ/ር)፣ኣፈ ጉባኤ ጨፌ ኦሮሚያ ሰዓዳ ኣብዱረህማን፣ሓላፊ ቤት ፅሕፈት ፓርቲ ብልፅግና ጨንፈር ክልል ኦሮሚያ ከፍያለው ተፈራ፣ካልኦት ኣመራርሓ ፌዴራልን ክልላትን ከምኡ እውን ፃውዒት ዝተገበረሎም ኣጋይሽ ተረኺቦም።

ኣዲስ ኣበባ/ጥሪ 4/2018 (ኢዜኣ) ሓባራዊ ተረኽ ምህናፅ ንህንፀት ሃገረ መንግሥትን ሕብረ ብሄራዊ ሓድነትን ወሳኒ ከምዝኾነ ሚኒስትር ሰላም መሓመድ እድሪስ ገሊፆም። ኣብ ኢትዮጵያ ሓባራዊ ተረኻት ንምህናፅ ዝዓለመ ሃገራዊ ኮንፈረንስ ኣብ ከተማ ጅማ ይካየድ ኣሎ። ሚኒስትር ሰላም መሓመድ እድሪስ ኣብዚ እዋን ከምዝበልዎ፤ ሓባራዊ ተረኽ ዘለዉ ፀገማት ዘተዓርቕን ኣብ ውሽጢ ብዝሃነት ዘለዉ ፀጋታት ሓድነት ዘጠናኽርን እዩ። ሓባራዊ ተረኽ ምህናፅ ንህንፀት ሃገረ መንግሥትን ሕብረ ብሄራዊ ሓድነትን ወሳኒ ከምዝኾነ ብምሕባር፤ ከፋፈልቲ ተረኻትን ኣተሓሳስባታትን ምውጋድ ይግባእ ኢሎም። ኢትዮጵያ ብሕብረ ብሄራዊ ሓድነት ናብ ልዕልና ጉዕዞ ከምዝጀመረት ብምግላፅ፤ እዚ ወለዶ ብሓባራዊ ተረኽ ምቕራፅ ከምዝግባእ እውን ተዛሪቦም። ነዚ ድማ ኩሎም መዳርግቲ ኣካላት ዘተኣሳስር ተረኽ ንምህናፅ ተዋዲዶም ክሰርሑ ከምዘለዎም ኣረዲኦም። ብሄራዊ ምርድዳእ ንምጥንኻር ሕዚ እቲ ትኽክለኛ እዋን ሕዚ እዩ ዝበሉ እቶም ሚኒስትር፤ ከይዲ እቲ ሃገራዊ ምኽክር ብኣግባቡ ብምጥቃምን ሓሳብካ ብዝሰልጠነ መንገዲ ብምቕራብን ንውፅኢታውነቱ ምርብራብ ከምዝግባእ ሓቢሮም። ኣብቲ ኮንፈረንስ፤ ኣብ ቤት ምኽሪ ወከልቲ ህዝቢ ዋና ተፀዋዒ መንግሥቲ ሚኒስትር ተስፋዬ በልጅጌ (ዶ/ር)፣ሚኒስትር መስኖን ከባብታት ቆላን ኣብርሃም በላይ (ዶ/ር)፣ኣፈ ጉባኤ ጨፌ ኦሮሚያ ሰዓዳ ኣብዱረህማን፣ሓላፊ ቤት ፅሕፈት ፓርቲ ብልፅግና ጨንፈር ክልል ኦሮሚያ ከፍያለው ተፈራ፣ካልኦት ኣመራርሓ ፌዴራልን ክልላትን ከምኡ እውን ፃውዒት ዝተገበረሎም ኣጋይሽ ተረኺቦም።

ሰመራ/ጥሪ 2/2018(ኢዜኣ) ብልፅግና ኢትዮጵያ ንምርግጋፅ ኣብ ኩሎም ዓውድታት ዝተጀመሩ ስራሕቲ ልምዓት ጭቡጥ ውፅኢት እናተረኸበሎም ከምዝኾነ ሓላፊ ዘፈር ኣወዳድባ ፓርቲ ብልፅግና ፍቃዱ ተሰማ ገሊፆም። “ጠንካራ ኣወዳድባ ንጠንካራ ፓርቲ”ኣብ ትሕቲ ዝብል መሪሕ ሓሳብ ኣብ ግምገማ ኣፈፃፅማ 6 ኣዋርሕ 2018ን ቀፃሊ ኣንፈትን ዘፈር ኣወዳድባ ዋና ቤት ፅሕፈት ፓርቲ ብልፅግና ዝጠመተ መድረኽ ኣብ ከተማ ሰመራ ይካየድ ኣሎ። እቲ መድረኽ ዘጀመሩ ሓላፊ ዘፈር ኣወዳድባ ፓርቲ ብልፅግና ፍቃዱ ተሰማ ከምዝበልዎ፤ እቲ ፓርቲ ብልፅግና ኢትዮጵያ ዘረጋግፁ ስራሕቲ ልምዓት እናሳለጠ እዩ ዝርከብ። ኣብቶም ዝሳለጡ ዘለዉ ስራሕቲ ልምዓት እውን ብልፅግና ዘይተርፍ ምዃኑ እናተረጋገፀ ከምዝመፀ ብምሕባር፤ ካብዚኣቶም እቲ ሓደ ድማ ዓብይ ግድብ ሕዳሰ እዩ ኢሎም። ፍርቂ ዓመት እዚ በጀት ዓመት እውን ሃገር ናብ ብራኸ ዘሰጋገሩ ካልኦት ዓበይቲ ፕሮጀክትታት ዝተፈፀሙሉን ዕላዊ ዝተገበርሉን ከምዝኾነ ኣረዲኦም። ብሓፈሻ ብልፅግና ኢትዮጵያ ንምርግጋፅ ኣብ ኩሎም ዓውድታት ዝተጀመሩ ስራሕቲ ልምዓት ጭቡጥ ውፅኢት እናተረኸበሎም ከምዝኾነ ተዛሪቦም። ሓላፊ ቤት ፅሕፈት ፓርቲ ብልፅግና ጨንፈር ክልል ዓፋር መሐመድ ሁሴን ብግደኦም፤ እቲ ፓርቲ ኣብ ዝሓለፉ ዓመታት ንኹሉ ማዕረ ተሳታፍን ተረባሕን ከምዝገበረ ገሊፆም። ኣብቲ ክልል እውን ቅድሚ ሕዚ ዘይተለመዱ ሰፋሕቲ ስራሕቲ ልምዓት ግብርና እናተሳለጡ ከምዝኾኑ ብምግላፅ፤ ኣብ ከተማ ሰመራ ዝተሳለጠ ልምዓት ኮሪደር እታ ከተማ ንነበርታ ንፅህትን ምችውትን ምግባር ኣኽኢልዋ እዩ ኢሎም። ኣብቲ ክልል ብፍላይ ድማ ካብ ተመፅዋታይነት ናብ መፍረያይነት ኣብ ዝግበር ጉዕዞ ተስፋ ዝህቡ ስራሕቲ እናተሳለጡ እዮም ዝበሉ ድማ ሓላፊ ዘፈር ኣወዳድባ ቤት ፅሕፈት ፓርቲ ብልፅግና ጨንፈር ክልል ዓፋር ወልኦ ኣይትሌ እዮም።  

ኣዲስ ኣበባ/ታሕሳስ 30/2018(ኢዜኣ) ኢትዮጵያ ምስ ቻይና ዘሎ ምትሕብባር ኢኮኖሚ ብዝበለፀ ንምጥንኻር ቆራፅ እያ ክብሉ ሚኒስትር ጉዳይ ወፃኢ ጌዲዮን ጢሞቲዎስ(ዶ/ር) ገሊፆም። ሚኒስትር ጉዳይ ወፃኢ ጌዲዮን ጢሞቲዎስ(ዶ/ር) ምስ ሚኒስትር ጉዳይ ወፃኢ ቻይና ዋንግ ዪ ዘትዮም። ኣብ ዘተኦም እውን፤ ኢትዮጵያ ምስ ቻይና ዘለዋ ጠንካራን ብኩነታት ዘይለዋወጥን ስትራቴጂካዊ ምሕዝነት ኣልዒሎም ዘትዮም። ሚኒስትር ጌዲዮን ጢሞቲዎስ(ዶ/ር)፤ ርክብ ክልቲአን ሃገራት ናይ ነዊሕ እዋን ምሕዝነት፣ ምትሕብባርን ኣብ ሓባራዊ ምክብባር መሰረት ዝገበረን ከምዝኾነ ገሊፆም። ቻይና ንልምዓት ኢትዮጵያ ትገብሮ ዘላ ደገፍ ብምንኣድ፤ ኣብ መንጎ ክልቲአን ሃገራት ዘሎ ምትሕብባር ኢኮኖሚ ብዝበለፀ ንምጥንኻር ዘለዋ ቆራፅነት ኣረጋጊፆም። ቻይና ንዘቕረበቶ ኢንሼቲቭ ሰላምን ልምዓትን ቀርኒ ኣፍሪካ ትኹረት ብምሃብ ኣብቲ ዞባ ዘለዉ ፀገማት ድሕንነት፣ ልምዓትን ምምሕዳርን ንምፍታሕ ዘለዎ ረብሓ ምግላፆም ሓበሬታ ሚኒስቴር ጉዳይ ወፃኢ የመላኽት። ሚኒስትር ጉዳይ ወፃኢ ቻይና ዋንግ ዪ ብግደኦም፤ ናብ ኣፍሪካ ዝገበርዎ ዑደት ኣብ ከም ኣቆፃፅራ ኣውሮፓ 2026 ናብ ወፃኢ ዝገበርዎ ፈላማይ ጉዕዞኦም ከምዝኾነ ብምግላፅ፤ ኢትዮጵያ ፈላመይቲ መባፅሒቶም ከምዝኾነት ተዛሪቦም። እዚ ድማ ቻይና ምስ ኣፍሪካ ዘለዋ ዘላቒ ምሕዝነትን ኢትዮጵያ ድማ ቀንዲ ስትራቴጂካዊ መሓዛ ምዃናን ከምዘርኢ ኣረዲኦም። ቻይና ምስ ኢትዮጵያ ዘለዋ ኩሉ ዓይነት ምሕዝነት ኣብ ዝተፈላለዩ ዓውድታት ምትሕብባር ብዝበለፀ ንምጥንኻር ዘለዋ ቆራፅነት እውን እቶም ሚኒስትር ኣረጋጊፆም። ክልቲኦም ሚኒስትራት ኣብ ክልቲኣዊ፣ ዞባውን ኩለ መዳያውን መድረኻት ርክብ ስትራቴጂካዊ ምውዳድ ንምጥንኻር ተስማዕሚዖም።

ኣዲስ ኣበባ/ታሕሳስ 30/2018(ኢዜኣ) ኣቦ መንበር ኮሚሽን ሕብረት ኣፍሪካ ማሕሙድ ዓሊ ዩሱፍ ምስ ሚኒስትር ጉዳይ ወፃኢ ቻይና ዋንግ ዪ ዘትዮም። እቲ ዘተ እናዓበየ ዝመፀ ምትሕብባር ቻይና-ኣፍሪካ ንምጥንኻር ዝዓለመ እዩ። ቻይና ሓቃዊት መሓዛ ኣፍሪካ ከምዝኾነት ዝገለፁ ሚኒስትር ጉዳይ ወፃኢ ቻይና፤ ኣብ ሓባራዊ ተረባሕነት ዝጠመተ ፖሊሲ ጠንካራ ምሕዝነት ንክፍጠር ከምዘኽኣለ ሓቢሮም። ርክብ ቻይናን ኣፍሪካን ኣብ ዝተፈላለዩ ማዕቐፋት ምትሕብባር እናዓበየ ምምፅኡ እውን ተዛሪቦም። ድሕሪ እቲ ዘተ ኣብ ዘውፅእዎ መግለፂ፤ ክልቲኦም ወገናት መሰልን ረብሓን ሃገራት ደቡባዊ ዞባ ዓለም (Global South) ንምኽባር፣ ክብሪ ልኣላዊነት ንምሕላውን ዓለም ለኸ ጎንፅታት ብሰላማዊ መንገዲ ንምፍታሕን ብሓባር ንምስራሕ ምስምዕምዖም ኣፍሊጦም። ኣብቲ ዘተ፤ ትልሚ ልምዓት 5 ዓመት ቻይና ምስ ትግበራ ካልኣይ 10 ዓመት ኣጀንዳ 2063 ሕብረት ኣፍሪካ ብምጥዕዓም ዘበናዊነት ንምምፃእ ኣብ ዝከኣለሎም መንገድታት ከምዝተዘተየ ኣረዲኦም። ብመሰረት እዚ ስምምዓት ኣህጉራዊ ነፃ ዞባ ንግዲ ኣፍሪካ (AfCFTA) ሓዊሱ ቻይና ዘቕረበቶም ዓለም ለኸ ተበግሶታት ድሕንነትን ልምዓትን ብሓባር ንምድጋፍ ኣብ ስምምዕ ከምዝተበፅሐ ገሊፆም። ብተወሳኺ እውን እቶም ዝተፈረሙ ስምምዓት ምትሕብባር ተግባራዊ ኣብ ምግባርን ልውውጥ ንግዲ ኣብ ምዕባይን ዘለዎም ቆራፅነት ኣብቲ ሓባራዊ መግለፂኦም ኣረጋጊፆም።

ኣዲስ ኣበባ/ ታሕሳስ/30/ 2018 (ኢዜኣ) ኮሚሽን ሃገራዊ ዘተ ኢትዮጵያ ኣብ ክልል ትግራይ ከይዲ ምኽክር ብእዋኑ ንኽካየድ ኣብቲ ክልል ዝርከቡ መዳርግቲ ኣካላት ብምትሕብባር ክሰርሑ ይግባእ ኢሉ። ኣቐባሊ ቃል እቲ ኮሚሽን ጥበቡ ታደሰ ከምዝበሉዎ፤ ኣብ ከይዲ ሃገራዊ ዘተ ክልል ትግራይ ብምክታት ትርጉም ዘለዎ ተሳትፎ ክህሉ ንምግባር ዝውገኑ ፃዕሪታት ተጠናኺሮም ቀፂሎም። ነዚ ድማ ኣብ ቀረባ እዋን ጉጅለ ልኡኽ እቲ ኮሚሽን ናብ መቐለ ተጓዒዙ ምስ ዝምልከቶም ላዕለዎት ኣመራርሓ ግዚያዊ ምምሕዳር እቲ ክልልን መዳርግቲ ኣካላትን ብምዝታይ ኣብቲ ክልል ከይዲ ዘተ ንምጅማር ዘኽእል ልዝብ ምግባሩ ኣዘኻኺሮም። እቲ ግዚያዊ ምምሕዳር ምስቲ ኮሚሽን ተዋዲዶም ንኽሰርሑ ምስ ዝተመደቡ ሰባት መካተቲን ኣሳታፍነት ንምርግጋፅን ዘኽእሉ ሜላታት ምፅናዕን ምኽረ ሓሳባት ምትእኽኻብን እናተገበረ ከምዝርከብ እውን ተዛሪቦም። እቶም ምኽረ ሓሳባት ናብቲ ኮሚሽን ቀሪቦም ብምፅዳቕ ናብ ተግባራዊ ምንቅስቓስ ንምእታው ፃዕሪ እናተገበረ ከምዝኾነ ብምግላፅ፤ እቲ ከይዲ ዘተ ውፅኢታዊ ክገብሩ ኣብ ዝኽእሉ ሜላታት ምስ ዝምልከቶም ኣካላት ምርድዳእ ከምዝሓትት ኣልዒሎም። ኣብ ኣድላይነት እቲ ምኽክር ሕብረተሰብ ዘለዎ ድሌት ዝገለፀሉ ኩነታት ከምዘሎ ብምሕባር፤ ሕዚ እውን ዝተወሰኑ ማሕለኻታት ከምዘለዉ ኣመልኪቶም። ኣብዚ ሕዚ እዋን ተሳተፍቲ ንምፍላይን ናብ ኣጀንዳ ምትእኽኻብ ንምእታውን ኣብ ቁልፊ ጉዳያት ኣብ ምርድዳእ ንምብፃሕን ምስ ዝምልከቶም ኣካላት ብምትሕብባር ናብ ባይታ ንምውራድ እናተሰርሐ ከምዝኾነ ገሊፆም። ኣብ መጀመርታ መዓልቲታት ወርሒ ጥሪ ኣብቲ ክልል ምፍላይ ተሳተፍቲን ከይዲ ምትእኽኻብ ኣጀንዳን ንምውጋን ትልሚ ከምዝተትሓዘ ብምሕባር፤ እቲ ትልሚ ንምትግባር ኣብቲ ክልል ዝርከቡ መዳርግቲ ኣካላት እጃሞም ክዋፅኡ ይግባእ ኢሎም ክብል ፋና ዲጂታል ፀብፂቡ ።

ኣዲስ ኣበባ/ታሕሳስ 30/2018 (ኢዜኣ) ኢትዮጵያን ቻይናን ኣብ ዝተፈላለዩ ጉዳያት ርክበን ብዝበለፀ ኣጠናኺረን ምቕፃል ኣብ ዝኽእላሉ ኩነታት ምዝታየን ቀዳማይ ሚኒስትር ዐቢይ ኣህመድ(ዶ/ር) ገሊፆም። እቶም ቀዳማይ ሚኒስትር ኣብ ማሕበራዊ ምትእስሳር ገፆም ኣብ ዘመሓላለፍዎ መልእኽቲ፤ ሎሚ መዓልቲ ንሚኒስትር ጉዳይ ወፃኢ ቻይና ዋንግ ይ ተቐቢለ ብፅንዓት ኣብ ዝጎዓዝ ርክብ ህዝብን መንግስትን ኢትዮጵያን ቻይናን ዘቲና ኢሎም። ኢትዮጵያን ቻይናን ን10ታት ዓመታት ዝዘለቐ ጠንካራ ርክብ ከምዘለወን እውን ሓቢሮም። እዚ ርክብ ኣብ ቀረባ እዋን ናብ ብኩነታት ዘይለዋወጥ ስትራቴጂክ ምትሕብባር ከምዝዓበየ ኣፍሊጦም። ኣብ ዝተፈላለዩ ርእሰ ጉዳያት ምትሕብባር ልምዓት ንምስላጥ ዘለና ፅኑዕ ቅዋም ኣብ ምቕፃል ዘቲና ኢሎም። ኣብ ኢኮኖሚ፣ንግዲ፣መሰረተ ልምዓት፣ ቀረብ ሓይልን ትራንስፖርትን ከምኡ እውን ኣብ ሓደሽቲ ዝፍጠሩ ዘለዉ ከም ኢ-ኮሜርስ፣ዲጂታል ኢኮኖሚ፣ሰብ ስራሕ ብልሕን ሓምለዋይ ልምዓት ሓይልን ዘለና ምትሕብባር ንምጥንኻር ዘቲና ክብሉ እውን ገሊፆም።

ኣዲስ ኣበባ/ታሕሳስ 30/2018 (ኢዜኣ) ቀዳማይ ሚኒስትር ዐቢይ ኣሕመድ(ዶ/ር) ንክልተ መዓልቲ ዕላዊ ዑደት ንምግባር ናብ ኢትዮጵያ ንዝመፁ ሚኒስትር ጉዳይ ወፃኢ ቻይና ዋንግ ይ ኣብ ብሔራዊ ቤተ መንግሥቲ ሎሚ ተቐቢሎም። ቤት ፅሕፈት ቀዳማይ ሚኒስር ከም ዝገለፆ፤ ሚኒስትር ጉዳይ ወፃኢ ቻይና ዋንግ ይ ንዕላዊ ዑደት ስራሕ ሎሚ መዓልቲ ኣዲስ ኣበባ ኣትዮም። ቀዳማይ ሚኒስትር ዐቢይ ኣሕመድ(ዶ/ር) ከምዝበልዎ፤ ንሚኒስትር ጉዳይ ወፃኢ ቻይና ዋንግ ይ ኣብ ብሔራዊ ቤተ መንግሥቲ ምቕባሎም ሓቢሮም። እቲ ዝካየድ ዑደት ኣብ ሓበራዊ ድልየት ዝተመስረተ ክልትኣዊ ርክብን ዞባዊ ጉዳያትን ዝጠመተ ዘተ ከምዘካትት ትፅቢት ይግበር ።

ኣዲስ ኣበባ/ታሕሳስ 30/2018(ኢዜኣ) መበል 51 ስሩዕ ኣኼባ ኮሚቴ ቀወምቲ ተወከልቲ ሕብረት ኣፍሪካ(PRC) ካብ 4 ክሳብ 22 ጥሪ 2018 ዓ/ም ኣብ ዋና መቐመጢ እቲ ሕብረት ዝኾነት ከተማ ኣዲስ ኣበባ ክካየድ እዩ። እቲ ኣኼባ፤ “ምርግጋፅ ዘላቒ ቀረብ ማይን ድሕንነቱ ዝተሓለወ ስርዓት ኣተሓላልዋ ፅሬትን ንዕዉትነት ሽቶታት ኣጀንዳ 2063” ኣብ ትሕቲ ዝብል መሪሕ ሓሳብ ሕብረት ኣፍሪካ ብዘዳለዎ መሪሕ ሓሳብ 2026 ዝካየድ እዩ። መሪሕ ሓሳብ እዚ ዓመት ኣብ ድሕንነትን ኣተሓላልዋ ፅሬትን ማይ ኣፍሪካ ትኹረት ዝገበረ እዩ። ኣብቲ ኣኼባ፤ ኣመራርሓ ትካላት እቲ ሕብረት፣ኣምባሳደራትን ዲፕሎማትን ሃገራት ኣባል እቲ ሕብረት ከምዝሳተፉ ኢዜኣ ካብቲ ሕብረት ዝረኸቦ ሓበሬታ የመላኽት። እቲ ኣኼባ፤ ካብ 4 ክሳብ 5 የካቲት 2018 ዓ/ም ኣብ ዝካየድ መበል 48 ኣኼባ ቤት ምኽሪ ፈፃሚ ስራሕ ሕብረት ኣፍሪካ ከምኡ እውን ካብ 7 ክሳብ 8 የካቲት 2018 ዓ/ም ኣብ ዝካየድ መበል 39 ጉባኤ መራሕቲ እቲ ሕብረት ዝቐርቡ ረቂቕ ኣጀንዳታት ከምዝዝቲ ትፅቢት ይግበር።

ባህር ዳር/ታሕሳስ 30/2018(ኢዜኣ) ንዕዉትነት እቲ ሃገራዊ ምኽክር ትፅቢት ዝግበረሎም ኣስተዋፅኦ ኣጠናኺሮም ከምዝቕፅልሉ ኣብ ክልል ኣምሓራ ዝርከቡ ሲቪክ ማሕባራት ገሊፆም። ኣብ ክልል ኣምሓራ ካብ ዝርከቡን ኣብቲ ጉዳይ ኣመልኪቶም ንኢዜኣ ርኢቶ ካብ ዝሃቡን ሲቪክ ማሕበራት ፕሬዚዳንት ፌዴሬሽን ማሕበራት ጉዱኣት ኣካል እቲ ክልል ፍሬሰላም ዘገዬ ከምዝበልዎ፤ ኣብ ሃገርና ኣፈላላያት ፖለቲካ ብዘተ ብምትዕራቕ ንረብሓ ህዝቢ ኣብ ምስራሕ ፀገማት ኣለዉ። ንዘይምርድዳእ ምኽንያት ዝኾኑ ሓሳባት ዝፈጠርዎ ፀገም ብዘተ ፈቲሑ ኣብ መንጎ ህዝብታት ሓድነትን ምርድዳእን ንምጥንኻር ዝተጀመረ ሃገራዊ ምኽክር ዓብይ ዕድል እዩ ኢሎም። ‎ኮሚሽን ሃገራዊ ምኽክር ኢትዮጵያ እዚ ሽቶ ንምዕዋት ኣብ ዝጀመሮ ፃዕሪ ብንቕሓት ብምስታፍ ንምኽክር ዝኸውን ኣጀንድኦም ከምዘቕረቡ እውን ሓቢሮም። ኣብ መድረኽ ምፍላይን ምእካብን ኣጀንዳ ጉዱኣት ኣካል ብንቕሓት ብምስታፍ ኣለዉኒ ዝብልዎም ፀገማት ከም ኣጀንዳ ንክተሓዙ ከምዝተገበረ ኣረዲኦም። ፀገማት ብዘተ ብምፍታሕ ጠንካራ ሃገረ መንግሥቲ ንምህናፅ ኣብ ዝግበር ፃዕሪ እውን እጃሞም እናተዋፅኡ ከምዝኾኑ ተዛሪቦም። ፕሬዚዳንት ማሕበር መናእሰይ ክልል ኣምሓራ መንእሰይ ጋሻው ኣዘነ ብግድኡ፤ ኣብ ከይዲ ህንፀት ሃገር ዝረኣዩ ኣፈላላያትን ዘይምርድዳኣትን ብዘተ ምፍታሕ ንህንፀት ጠንካራ ሃገር ኣድላይ እዩ ኢሉ። ኣብ ከይዲ ምትእኽኻብ ኣጀንዳ እቲ ክልል ካብ ኩሎም ከባብታት እቲ ክልል ዝተውፃእፅኡ መናእሰይ ብምስታፍ ኣጀንድኦም ነቲ ኮሚሽን ከምዘእተዉ ሓቢሮም። ‎ሃገራዊ ምኽክር ሰላማ ዝተሓለወትን ዝማዕበለትን ሃገር ንምህናፅ ዓብይ ዕድል ዘለዎ ስለዝኾነ መናእሰይ እቲ ምኽክር ብዓወት ንክዛዘም ኣብ ጎኒ እቲ ኮሚሽን ኮይኖም እናሰርሑ ከምዝኾኑ እውን ገሊፆም።

ኣዲስ ኣበባ/ታሕሳስ 28/2018 (ኢዜኣ) ቤት ምኽሪ ወከልቲ ህዝቢ ሎሚ ኣብ ዘካየዶ ስሩዕ ኣኼባ ሹመት 34 ሕፁያት ዳያኑ ላዕዋይ ቤት ፍርዲ ፌዴራል ኣፅዲቑ። እቲ ቤት ምኽሪ መበል 8ይ ስሩዕ ኣኼብኡ ሎሚ መዓልቲ ኣካይዱ። ኣብቲ ኣኼባ፤ ረቂቕ ኣዋጅ ሹመት 34 ሕፁያት ዳያኑ ላዕዋይ ቤት ፍርዲ ፌዴራል መርሚሩ ብሙሉእ ድምፂ ኣፅዲቑ።

ኣዲስ ኣበባ/ታሕሳስ 28/2018 (ኢዜኣ) ቤት ምኽሪ ወከልቲ ህዝቢ ንሹመት ዋና ዳይሬክተር በዓል መዚ መራኸብቲ ሓፋሽ ኢትዮጵያ ወይዘሮ ሃይማኖት ዘለቀ ኣፅዲቑ። እቲ ቤት ምኽሪ መበል 8ይ ስሩዕ ኣኼብኡ ሎሚ ኣካይዱ። እቲ ቤት ምኽሪ ኣብ ዘካየዶ ስሩዕ ኣኼባ ንወይዘሮ ሃይማኖት ዘለቀ ዋና ዳይሬክተር በዓል መዚ መራኸብቲ ሓፋሽ ኢትዮጵያ ኮይነን ንክመርሓ ዝቐረበ ረቂቕ መርሚሩ ብሙሉእ ድምፂ ኣፅዲቁ። ወይዘሮ ሃይማኖት ዘለቀ ኣብ ናይ ኢትዮጵያ ዜና ኣገልግሎት ካብ ሪፖርተር ክሳብ ኣርታኢ ከምኡ እውን ኣብ ብሮድካስቲንግ ኮርፖሬሽን ኢትዮጵያ(ኢቢሲ) ብሞይአን ኣገልጊለን እየን። ብተወሳኺ እውን ኣብ ቤት ፅሕፈት መካየዲ ስራሕ ምምሕዳር ከተማ ኣዲስ ኣበባ ብመዓርግ ምክትል ሓላፊ ቢሮ ሓላፊት ዘፈር ኮሙኒኬሽን ኮይነን ከምዘገልገላ ተገሊፁ። ኣብ ነበር ቤት ፅሕፈት ጉዳያት ኮሙኒኬሽን መንግሥቲ ከምዝሰርሓ ተሓቢሩ።

ኣዲስ ኣበባ/ታሕሳስ 28/2018(ኢዜኣ) ሃገራዊ ምኽክር፣ህንፀት ባህሊ ዲሞክራስን ትካላትን ንኹሉ እትምችው ሃገር ንምህናፅ ወሰንቲ ከምዝኾኑ ቀዳማይ ሚኒስትር ዐቢይ ኣሕመድ(ዶ/ር) ገሊፆም። እቶም ቀዳማይ ሚኒስትር መበል 75 ዓመት በዓል ምስረታ ዩኒቨርሲቲ ኣዲስ ኣበባ ብዝምልከት ኣብ ዝተዳለወ መድረኽ ዘተ ፅሑፍ ኣቕሪቦም። እቲ ፅሑፍ ድሕሪ ምቕራቦም እውን ካብ ሙሁራን ንዝቐረቡሎም ሕቶታት ምላሽን መብራህርህን ሂቦም። ኣብ መብራህሪህኦም እውን፤ ፀገማት ኢትዮጵያ ብምፍታሕ ብዝተደመረ ዓቕሚ ሃገር ንምምዕባል ሙሁራን ሓሳብ ካብ ምፍልፋልን ፀገም ፈታሕቲ መፅናዕቲ ካብ ምግባርን ጀሚሩ ብተግባር ለውጢ ዘምፅእ ስራሕ ከሳልጡ ከምዝግባእ ተዛሪቦም። ኣፈላላያት ፖለቲካ ከመይ እዩ ምፍታሕ ዝከኣል ብዝብል ንዝተልዓለሎም ሕቶ ኣብ ዝሃብዎ ምላሽ ከምዝበልዎ፤ ኣብ ኢትዮጵያ ዘለዉ ፖለቲካዊ ኣፈላላያት ምፍታሕ ጉዳይ ቆራፅነትን ቅዋምን ክኸውን ኣለዎ። በቢ ከባቢኡ ዘለዉ ጫፍ ዝወፁ ኣተሓሳስባታት ንኢትዮጵያ ንቕድሚት ከምዘይስዱ ብምሕባር፤ ኢትዮጵያ ናይ ኩላትና እያ ብዝብል ኣተሓሳስባ ኣሚንና እንተሰሪሕና ናብ ዝሓሸ ምዕራፍ ክንሳገር ኢና ኢሎም። ንታሪኽ ብሚዛን፣ንሎሚ ብትግሃት፣ንፅባሕ ድማ ብተስፋ ኢና ንምልከቶ ዝበሉ እቶም ቀዳማይ ሚኒስትር፤ ንኹሉ ሕብረተሰብ ማዕረ ዕድል ምሃብ ከምዝግባእ ኣረዲኦም። ጠንካራ ሃገራዊ ሓድነት ምፍጣር ዝከኣል ሓባራዊ ተረኽ ብምህናፅ ከምዝኾነ ብምግላፅ፤ መንግሥቲ ነቲ ጉዳይ ትኹረት ሂቡ እናሰርሐ ከምዝኾነ እውን ሓቢሮም።

ኣዲስ ኣበባ/ታሕሳስ 27/2018(ኢዜኣ) መንግሥቲ ንህንፀት ዘላቒ ሰላምን ባህሊ ፀገማት ብዘተ ምፍታሕ ንክዓብን ብትኹረት እናሰርሐ ከምዝርከብ ሚኒስትር ሰላም መሐመድ እድሪስ ገሊፆም። እቶም ሚኒስትር ምስ ኢዜኣ ኣብ ዝነበሮም ፃንሒት፤ መንግሥቲ ካብ ፅባሕ ለውጢ ጀሚሩ ኣብ ውሽጢ ሃገርን እቲ ዞባን ውፅኢታዊ ስራሕቲ ህንፀት ዘላቒ ሰላም እናሳለጠ እዩ ዝርከብ ኢሎም። ጠንካራ ሃገር ዝህነፅ ብሓድነትን ምኽክርን ህዝብታት ከምዝኾነ መንግሥቲ ፅኑዕ ቅዋም ከምዘለዎ እውን ሓቢሮም። ኣብ ኢትዮጵያ ንነዊሕ ዓመታት ሱር ሰዲዶም ዝፀንሑ ፀገማት ብዘላቕነት ንምፍታሕን ኣብ ወሳኒ ሃገራዊ ጉዳያት ብሄራዊ ምርድዳእ ንምፍጣርን ኮሚሽን ሃገራዊ ምኽክር ተጣይሹ ናብ ስራሕ ምእታዉ መርኣያ እዚ ቆራፅነት እዩ ክብሉ ተዛሪቦም። ብተወሳኺ እውን ፖለቲካዊ ድሌቶም ብሓይሊ ንምዕዋት ንዝሙኩሩ ኣካላት ካብ ስሕተቶም ተመሊሶም ናብ ሰላማዊ መንገዲ ንክመፁ መንግሥቲ ፃውዒት ሰላም እናቕረበ ከምዝኾነ እውን ኣረዲኦም። ስለዝኾነ ድማ ኣብ ዝተፈላለዩ ክልላት ብርክት ዝበሉ ነበር ዕጡቓት ፃውዒት ሰላም መንግሥቲ ተቐቢሎም ናብ ሰላማዊ ሂወት እናተመሱ ከምዝርከቡ ገሊፆም። ኣብ መንጎ ህዝብታት ምቅርራብ ንክህሉ፣ሓባራዊ ተረኽ ንክህነፅን ሃገር ቦቆል መፍትሒ ፀገም ስርዓታት ንክምዕብሉን ብትኹረት እናተሰርሐ እዩ ኢሎም። ሃገራዊ ጉዕዞ ዕቤትን ብልፅግናን ንምዕዋት ሰላም ወሳኒ ከምዝኾነ ብምግላፅ፤ ንህንፀት ዘላቒ ሰላምን ልምዓትን መንግሥቲ ብትኹረት ምስርሑ ኣጠናኺሩ ከምዝቕፅለሉ ኣረጋጊፆም።

ኣዲስ ኣበባ/ታሕሳስ 26/2018(ኢዜኣ) ኢትዮጵያ ኣብ 2023 ዓ.ም ኣፍሪካዊት መርኣያ ብልፅግና ምግባር ዘኽእሉ ስራሕቲ እናተሳለጡ ከምዝኾኑ ቀዳማይ ሚኒስትር ዐቢይ ኣሕመድ(ዶ/ር) ገሊፆም። ቀዳማይ ሚኒስትር ዐቢይ ኣሕመድ(ዶ/ር) ዩኒቨርሲቲ ኣዲስ ኣበባ መበል 75 ዓመት በዓል ምስረትኡ ብዝምልከት ኣብ ዝተዳለወ መድረኽ ዘተ ፅሑፍ ኣቕሪቦም። ኣብ ዘቕረብዎ ፅሑፍ እውን፤ ከም መንግሥቲ ኣብ 2023 ዓ/ም ኢትዮጵያ ኣፍሪካዊት መርኣያ ብልፅግና ክትኸውን ኣለዋ ዝብል ራኢ ሰኒቕና ኢና፤ እዚ ድማ ሙሉእ ብሙሉእ ክነዐውቶ ኢና ኢሎም። ኣብ 2040 ዓ/ም ድማ ኣብ ዓለም መርኣያ ዝኾነት ሃገር ክትኸውን እያ ክብሉ ሓቢሮም። ንዕዉትነት እዚ ራኢ ሰብኣዊ ልዕልና፣ልኣላዊነት ኢኮኖሚ ምርግጋፅን ኣፍሪካዊት ሓያል ምዃንን ዝብሉ ሰለስተ ትልምታት ከምዘለዉ ተዛሪቦም። ዝተሳገረን ዝተኣሳሰረን ሙሁራዊ እጃም ንምብርካት እውን ንቑሕ ተሳትፎ ምግባር፣ካብ ባዕልኻ ዝተሳገረ ዕላማ ምሓዝ ከምኡ እውን ብሞያ ምግልጋልን ድልድል ምዃንን ኣድላይ ከምዝኾኑ ኣረዲኦም። ካብቲ ነባር ሓፁር ሓሳብ ንውፃእ፣ሓደሽቲ ሓሳብ ንምፍጣር ንፀዓር፣ሓሳብ ዶብ ስለዘይብሉ ካብ ከባብን ዓሌትን ወፂእና ዝማዕበለት ኢትዮጵያ ብሓባር ንስራሕ ክብሉ እውን መልእኽቲ ኣመሓላሊፎም።

ኣዲስ ኣበባ/ታሕሳስ 25/2018 (ኢዜኣ) ፀገም ክልል ትግራይ ብምኽክር ከምዝፍታሕ ከምዝኣምኑ ውድባት ፖለቲካ ክልል ትግራይ ገሊፆም። ኮሚሽን ሃገራዊ ምኽክር ኢትዮጵያ ኣብ ክልል ትግራይ ምስ ዝርከቡ ውድባት ፖለቲካ ከምዝዘተየ ኣፍሊጡ። ኣብቲ ዘተ፤ ኣመራርሓ ውድባት ባይቶና፣ወለዶ ትግራይ፣ትንሳኤ 70 እንደርታ፣ትግራይ ዲሞክራሲያዊ ፓርቲ(ትዴፓ)፣ቃንጪ ሓቂ፣ዓረና ትግራይን ራያ ራዩማን ምስታፎም እውን ሓቢሩ። እቲ ዘተ ዝኸፈቱ ዋና ኮሚሽነር እቲ ኮሚሽን መስፍን ኣርኣያ(ፕሮፌሰር) እቲ ኮሚሽን ኣብ ዝሓለፉ እዋናት ዘሳለጦም ስራሕቲ ነቶም ተሳተፍቲ ኣብራህሪሆም። ብዘይ ተሳትፎ ክልል ትግራይ እቲ ምኽክር ምዝዛም ስለዘይሕሰብ ክልል ትግራይ ኣብቲ ከይዲ ምኽክር ንምስታፍ በቲ ኮሚሽን ዝተፈላለዩ ስራሕቲ እናተሳለጡ ከምዝኾኑ ሓቢሮም። ስለዝኾነ ድማ ኣብቲ ክልልን ኣብ መላእ እታ ሃገርን ዝሳተፉ ውድባት ፖለቲካ ክልል ትግራይ እዚ ከይዲ ንክዕወት ኣብ ጎኒ እቲ ኮሚሽን ኮይኖም ደገፍ ንክገብሩ ሓቲቶም። ኣብቲ ዘተ ዝተሳተፉ ላዕለዎት ኣመራርሓ እቶም ውድባት ፖለቲካ ብግደኦም፤ እቲ ኮሚሽን ኣብ ክልል ትግራይ ምኽክር ንክግበር ንዝገብሮ ዘሎ ምንቅስቓስ ንኢዶም። ፀገም ክልል ትግራይ ብዘተ ከምዝፍታሕ ከምዝኣምኑ ብምግላፅ፤ ነዚ ድማ እቲ ሃገራዊ ምኽክር ብሕታዊ ኣማራፂ ከምዝኾነ ኣረዲኦም። ክልል ትግራይ ኣካል እቲ ምኽክር ክትኸውን ከምዘለዋ ብምሕባር፤ እቲ ኮሚሽን ዝጀመሮ ምንቅስቓስ ኣጠናኺሩ ብምቕፃል እቲ ምኽክር ኣብቲ ክልል ክጅምሮ ከምዘለዎ ምግላፆም እውን እቲ ኮሚሽን ገሊፁ።

መቐለ/ታሕሳስ 25/2018 (ኢዜኣ) ብከይዲ ሃገራዊ ምኽክር ፀገማት ብዘላቕነት ንምፍታሕ ኣብ ዝግበር ፃዕሪ እጃምና ንምውፃእ ድሉዋት ኢና ክብላ ኣብ ዝተፈላለያ ከተማታት ትግራይ ዝነብራ ደቂ ኣንስትዮ ገሊፀን። ኢዜኣ ዘዘራረበን ኣብ ዝተፈላለዩ ከተማታት ክልል ትግራይ ዝነብራ ደቂ ኣንስትዮ፤ ብምኽክር ፀገማት ምፍታሕ መርኣያ ስልጣነን ብስለትን ከምዝኾነ ተዛሪበን። ስለዝኾነ ድማ ኮሚሽን ሃገራዊ ምኽክር ተጣይሹ ኣብ ኢትዮጵያ ሓቛፍን ኣሳታፍን ከይድታት ምኽክር ንኽካየዱ እናገበረ ከምዝኾነ ብምሕባር፤ ህዝቢ ክልል ትግራይ እውን ከምቶም ካልኦት ህዝብታት ክልላት ዝዝትየሉ ዕድል ከምዘደልዮ ሓቢረን። ነባሪት ከተማ መቐለ ዝኾና ሲስተር ኪዳን ሃፍቱ፤ ብዝፍጠሩ ፀገማት ቀዲሞም ዝጉድኡ ድቂ ኣንስትዮን ህፃናትን ከምዝኾኑ ብምግላፅ ንህንፀት ሰላም ግንባር ቀደም ተሳታፊ ምዃንና ግድን እዩ ኢለን። ስለዝኾነ ድማ ኣብ ኢትዮጵያ ዝፀንሑ ፀገማት ብምኽክር ብምፍታሕ ዘላቒ ሰላምን ምርግጋዕን ንምምፃእ ዝግበር ፃዕሪ ዓብይ ተስፋ ከምዘለዎ ብምሕባር፤ ብኣግባቡ ከይተጠቐምናሉ እቲ ዕድል ከምልጠና ኣይግባእን ክብላ ኣረዲአን። ኣብዚ ታሪኻዊ ከይዲ ምኽክር ንቑሕ ተሳትፎ ብምግባር ኣካል መፍትሒ ዘላቒ ሰላም ኮይንካ ምስራሕ ከምዝግባእ እውን ተዛሪበን። ብከይዲ ሃገራዊ ምኽክር ፀገማት ንምፍታሕ ኣብ ዝግበር ፃዕሪ ብፍላይ ድማ ደቂ ኣንስትዮ እጃምና ንምውፃእ ድሉዋት ክንኸውን ኣለና ክብላ ኣፅንኦት ሂበን። ኣብቲ ክልል ዞባ ደቡባዊ ምብራቕ ነባሪት ወረዳ ወጀራት ዒስራ ዓዲ ወይዘሮ ታደሉ ገብረሄት ብግደአን፤ እቲ ከይዲ ምኽክር ንኩላትና ብሩህ ተስፋ ዝሓዘ ስለዝኾነ ንተግባራዊነቱ እጃምና ንምውፃእ ድሉዋት ኢና ኢለን። ካልእይቲ ወሃቢት ርኢቶ መንእሰይ ዮርዳኖስ ገብረሃዋርያ፤ ንፀገማት መፍትሒ ክኸውን ዝኽእል ካብ ምኽክር ዝበለፀ ኣማራፂ ከምዘየለን ኣብዚ ታሪኻዊ ዕድል ብንቕሓት ንምስታፍን ተዳሊውና ኢና ኢላ።