ኣዲስ ኣበባ፤መጋቢት 15/2018(ኢዜኣ)፦ኣብ ኣዲስ ኣበባ ኣገልግሎት ሓደ ማእኸል'ኣዲስ መሶብ' ክሳብ መወዳእታ ሚያዚያ 2018 ዓ.ም ኣብ ኩሎም ክፍለ ከተማታት ተበፃሒ ከም ዝኸውን ከንቲባ ምምሕዳር እቲ ከተማ ኣዳነች ኣቤቤ ገሊፀን፡፡ ከንቲባ ኣዳነች ኣበቤ ኣገልግሎት ሓደ ማእኸል'ኣዲስ መሶብ' ጨንፈር ልደታ መሪቐን ስራሕ ኣጀሚረን፡፡ ከንቲባ ኣዳነች ኣቤቤ ኣብዚ እዋን ከም ዝበልኦ፤ ቅልጡፍ ኣወሃህባ ግልጋሎት ኣብ ሞንጎ ዜጋታትን መንግስትን ዘሎ ምትእምማን የጠናኽር እዩ፡፡ ስለዝኾነ መንግስቲ ነቲ ዓውዲ ከዘምንን ዝበለፀ ተበፃሒ ክገብርን ዝተፈላለዩ ስልትታት ብምንዳፍ ብዙሕ ፃዕርታት እናገበረ ይርከብ ኢለን፡፡ ኣገልግሎት ሓደ ማእኸል'ኣዲስ መሶብ' ድማ ሰካብዞም ፃዕርታትን ተበግሶታትን ሓደ እዩ ኢለን፡፡ በዚ ድማ ብዙሓት ብልሹዋት ኣሰራርሓን ኣድላዪ ዘይኮኑ ምልልሳት ዓማዊልን ብምትራፍ ሱር በቆስ ለውጢ ክመፅእ ከምዘኽኣለ ኣመላኺተን፡፡ ኣገልግሎት እናሃቡ ዝርከቡ ኣገልግሎት ሓደ ማእኸላት'ኣዲስ መሶብ' ብኽነት ገንዘብን ግዘን ዜጋታት ትርጉም ብዘለዎ መልክዑ ከምዘትረፉ ተዛሪበን፡፡ ቅድሚ ሐዚ ብዝተሃነፁ ኣገልግሎት ሓደ ማእኸላት'ኣዲስ መሶብ' ንልዕሊ 120 ሽሕ ዜጋታት ምብፃሕ ከምዝተኽኣለ ኣመላኺተን፡፡ እቶም ዓማዊል ብዝሃብዎ ርእይቶ መሰረት ዕግበት ዓማዊል 98 ሚኢታዊ ከምዝበፅሐ እውን ተረጋጊፁ እዩ ኢለን፡፡ ኣብዚ ወርሒ ጥራሕ ተወሰኽቲ ሰለስተ ኣገልግሎት ሓደ ማእኸል'ኣዲስ መሶብ' ንምህናፅ ተሓሲቡ ናብ ተግባር ከምዝተኣተወ ዘመላኸታ እተን ከንቲባ፤ ክሳብ መወዳእታ ወርሒ ሚያዚያ ኣብ ኩሎም ክፍለ ከተማታት ኣዲስ ኣበባ ኣገልግሎት ሓደ ማእኸል'ኣዲስ መሶብ' ተበፃሒ ከምዝኸውን ገሊፀን፡፡ ብመዓርግ ምክትል ከንቲባ ሓላፊ ፐብሊክ ሰርቪስን ልምዓት ሓይሊ ሰብን ኣዲስ ኣበባ ጀማሉ ጀምበር (ዶ/ር) ብወገኖም፤ ኣገልግሎት ሓደ ማእኸል'ኣዲስ መሶብ' ኣገልግሎታት መንግስቲ ናብ ሓደ ኣሰባሲቡ እዩ ኢሎም፡፡ በ18 ትካላትን ብ107 ኣገልግሎታትን ስራሕ ዝጀመረ ኣገልግሎት ሓደ ማእኸል'ኣዲስ መሶብ' ሐዚ ቁፅሪ ትካላት ናብ 22 ቁፅሪ ኣገልግሎታት ድማ ናብ 140 ክዓቢ ከምዝተገበረ ገሊፆም፡፡

መቐለ/መጋቢት 15/2018(ኢዜኣ) ስልጠና ኮደርስ ምውሳድና ተወሳኺ ፍልጠትን ክእለትን ካብ ምርካብ ብተወሳኺ ኣብቲ ዓውዲ ብቑዓት ተወዳደርቲ ክንኸውን ኣኽኢሉና እዩ ክብሉ ኣብ ከተማ መቐለ ስልጠና ኮደርስ ዝወሰዱ መናእሰይ ተዛሪቦም። ብተበግሶ ቀዳማይ ሚኒስትር ዐቢይ ኣሕመድ(ዶ/ር) ዝተመቻቸወ ስልጠና ኮደርስ 5 ሚልዮን ኢትዮጵያውያን ብፍላይ ድማ መናእሰይ ተጠቀምቲ እቲ ዕድል ኮይኖም ዓለም ለኸ ተወዳዳሪነቶም ዘዕቢ ከም ዝኾነ ዝፍለጥ እዩ። ስለዝኾነ ድማ ኣብ ክልል ትግራይ ከተማ መቐለ እቲ ስልጠና ዝወሰዱ መናእሰይ፤ ስልጠና ኮደርስ ብምውሳድና ተወሳኺ ፍልጠትን ክእለትን ካብ ምርካብ ብተወሳኺ ኣብቲ ዓውዲ ተወዳደርቲ ክንኸውን ኣኽኢሉና እዩ ኢሎም። ካብቶም ርኢቶ ዝሃቡ መናእሰይ መንእሰይ ኣኸዛ ወልደጊወርጊስ፤ ስልጠና ኮደርስ ብምውሳድ ኣብቲ ዓውዲ ዝሓሸ ፍልጠትን ክእለትን ዝረኸበትሉ ከም ዝኾነ ንኢዜኣ ሓቢራ። እቲ ስልጠና ብብርኪ ዓለም ብቑዕ ተወዳዳሪ ብምዃን ካብ ንባዕላ ብተወሳኺ ኣብ ዓውዲ ዲጂታል ኣገልግሎት ፅሬትን ቅልጣፈን ዘለዎ ኣገልግሎት ንምሃብ ወሳኒ እዩ ኢላ። መናእሰይ ሰሎሞን ገብረመድህንን ፀዘጋዝኣብ ገብረእግዛብሄርን ብግደኦም፤ ስልጠና ኮደርስ ብፍላይ ድማ ንመናእሰይ ፍሉይ ዕድል ሒዙ ዝመፀ ከም ዝኾነ ገሊፆም። እቲ ስልጠና ብምውሳዶም ኣብቲ ዓውዲ ብቑዓት ተወዳደርትን ተጠቀምቲ ዕድል ስራሕን ዝገብር ምዃኑ ብተግባር ከምዝረኣይዎ ብምግላፅ፤ ካልኦት እውን ግዜ ከየባኸኑ ተጠቀምቲ እቲ ዕድል ንክኾኑ ሓቢሮም።

ኣዲስ ኣበባ/መጋቢት 15/2018(ኢዜኣ) ኣገልግሎት ሓደ ማእኸል'ኣዲስ መሶብ' ምንግልታዕ ተገልገልቲ ብምትራፍ ውፅኢታውነት ሰናይ ምምሕዳር እናረጋገፀ ከም ዝኾነ ከንቲባ ኣዳነች ኣቤቤ ገሊፀን። ከንቲባ ኣዳነች ኣቤቤ 3ይ ዲጂታል ኣገልግሎት ሓደ ማእኸል 'ኣዲስ መሶብ' ጨንፈር ልደታ መሪቐን ስራሕ ኣጀሚረን። እተን ከንቲባ ኣብዚ እዋን ከምዝበልኦ፤ ፅሬትን ውፅኢታውነትን ኣገልግሎት መንግሥቲ ዘረጋግፅ ምችው ምህዳር እናተፈጠረ እዩ። ስለዝኾነ ድማ ተበፃሕነት ኣገልግሎት ሓደ ማእኸል መሶብ ምንግልታዕ ዜጋታት ብምትራፍ ዕግበት ተገልገለቲ እናመሓየሸ ከም ዝርከብ ሓቢረን። ኣብ ኣገልግሎት ሓደ ማእኸል መሶብ ዝወሃቡ ኣገልግሎታት ፅሬትን ውፅኢታውነትን ብምርግጋፅ ብልሹው ኣሰራርሓ ሙሉእ ብሙሉእ ምፍታሕ ከም ዘኽኣለ ተዛሪበን። ኣብ ቀፃሊ እውን ምምሕዳር ከተማ ኣዲስ ኣበባ ኣገልግሎታት ቅልጡፍን ስሉጥን ብምግባር ዕግበት ተገልገልቲ ንምምሕያሽ ዝገብሮ ስራሕ ተጠናኺሩ ከም ዝቕፅል ኣረጋጊፀን።

ኣዲስ ኣበባ/መጋቢት 15/2018(ኢዜኣ) ፀብፃባት መራኸብቲ ሓፋሽ ህብረ ብሄራዊ ሓድነት ዘጠናኽሩን ብሄራዊ ረብሓ ኢትዮጵያን ዘኽብሩ ኣብ ጨቡጥ ሓበሬታት ዝተመሰርቱን ክኾኑ ከምዘለዎም ሙሁራትን ናይቲ ዓውድን ሰብ ሞያታት ገሊፆም፡፡ ሙሁር ፖለቲካል ሳይነስን ዓለም ለኸ ርክብን ፕሮፌሰር ብሩክ ሃይሉ ምስ ኢዜኣ ኣብ ዝገበርዎ ጻንሒት፤ መራኸብቲ ሓፋሽ ኣብ ከይዲ ህንፀት ሃገር ዘይትካእ ግደ ኣለዎም ኢሎም፡፡ መራኸብቲ ሓፋሽ ሃገር ናይ ምህናፅ ዓቕሚ ከምዘለዎም ብምግላፅ፤ ናይ ሚዲያ ኣጠቓቕማና ዝሰኸነን ጥንቃቐ ዝተመልኦን ክኸውን ኣለዎ ኢሎም፡፡ ትካላት ብሓላፍነት ተዘይተመሪሖም ዘስዕቡዎ ጉዱኣት ልዑል ከምዝኾነ ብምሕባር፤ ሰብ ሙያታትን ትካላትን ርክብ ህዝብታትን፣ሕውነትን ሓድነትን ኣብ ዘጠናኽሩ ትሕዝቶታት ከተኩሩ ከምዘለዎም ኣገንዚቦም፡፡ ህልውና ኢትዮጵያን ብሄራዊ ረብሓን ቀዳሚ ኣጀንዳኦም ክኸውን ከምዝግባእ ብምግላጽ፤ ትሕዝቶታት ኣብ ጭቡጥ መረዳእታ ዝተመስረቱ ክኾኑ ከምዘለዎም ተዛሪቦም፡፡ ድሕሪ ለውጢ ኣብ ኢትዮጵያ ቁፅሪ መራኸብቲ ሓፋሽ ምብዛሖምን ምቹው ኩነታት ስራሕ ምፍጣሩን ዝገለፁ ፕሮፌሰር ብሩክ፤ ንመራኸብቲ ሓፋሽ ዝተኸፈቱ ዕድላት ሙያዊ ስነ ምግባር ብዝተላበሰ ፀብፃብ ብምስራሕ ክጠናኸር ይግባእ ኢሎም፡፡ ዋና ፈፃሚ ስራሕ ኣሃዱ ሬድዮ ጋዜጠኛ ጥበቡ በለጠ ብወገኑ፤ መራኸብቲ ሓፋሽ ንብልፅግና ሃገር፣ንማሕበረሰባዊ ልምዓትን ህንፀት ሰላምን ግንባር ቀደም ተሰለፍቲ ክኾኑ ከም ዘለዎም ገሊጾም፡፡ ልዕሊ ሃገር ምንም የለን ዝበሉ ጋዜጠኛ ጥበቡ፤ መራኸብቲ ሓፋሽ ኣብ ኢዲቶሪያል ፖሊሲኦም ንብሄራዊ ረብሓ ቅድሚያ ክህቡ ከምዘለዎም ተዛሪቦም፡። ኢትዮጵያ ኣብ ዝምጥና ልዕልናን ልምዓትን ንምብጻሕ እቲ ኸይዲ ኣብ ምስላጥ መራኸብቲ ሓፋሽ ግደኦም ክዋፀኡ ኣለዎም ኢሎም፡፡

ኣዲስ ኣበባ/መጋቢት 12/2018 (ኢዜኣ) መራኸብቲ ሓፋሽ ብሄራዊ ረብሓ ኢትዮጵያ ኣብ ምኽባርን ኣብ ህንፀት ዘተኣኻኽብ ተረኽን ዘበርክትዎ ልዑል ኣስተዋፅኦ ኣጠናኺሮም ክቕፅልሉ ከም ዝግባእ ዳይሬክተር ጀኔራል ኣገልግሎት ብሄራዊ ሓበሬታን ድሕንነትን ከምኡ እውን ኣካቢ ቦር መራኸብቲ ሓፋሽ ኢትዮጵያ ኣምባሳደር ሬድዋን ሑሴን ገሊፆም። ማእኸል ልህቀት በዓል መዚ መራኸብቲ ሓፋሽ ኢትዮጵያ ፈላማይ ዙር ሰልጠንቲ ዘፈር ፍሉይ ትኹረት ጋዜጠኝነት የመርቕ ኣሎ። ኣምባሳደር ሬድዋን ሑሴን ኣብዚ እዋን ከም ዝበልዎ፤ መራኸብቲ ሓፋሽ ኣብ ህንፀት ሃገር ቁልፊ መሳርሕታት እዮም። ስለዝኾነ ድማ ብሄራዊ ረብሓ ኢትዮጵያ ብምኽባር ንህንፀት ዘተኣኻኽብ ተረኽ ዘበርክትዎ ኣስተዋፅኦ ኣጠናኺሮም ክቕፅልሉ ይግባእ ኢሎም። ስልጠና ዘፈር ፍሉይ ትኹረት ጋዜጠኝነት ማእኸል ልህቀት በዓል መዚ መራኸብቲ ሓፋሽ ኢትዮጵያ ፍልጠትን ክእለትን ሰብ ሞያ ኣብ ምዕባይ ልዑል ፋይዳ ከምዝህልዎ ኣረዲኦም። ብሄራዊ ረብሓ ኢትዮጵያን ሓድነት ህዝብን ማእኸል ትኹረት መራኸብቲ ሓፋሽ ክኸውን ከም ዝግባእ እውን ተዛሪቦም።

ኣዲስ ኣበባ/መጋቢት 12/2018 (ኢዜኣ) ብስነ ምግባር ሞያን ልህቀትን ዝተሃነፀ ጋዜጠኛ ኣብ ህንፀት ሃገር ልዑል ኣስተዋፅኦ ከም ዘለዎ ዋና ዳይሬክተር በዓል መዚ መራኸብቲ ሓፋሽ ሃይማኖት ዘለቀ ገሊፀን። መዛዘሚ መርሃ ግብሪ ብማእኸል ልህቀት እቲ በዓል መዚ ዝተዳለወ ስልጠና ዘፈር ፍሉይ ትኹረት ጋዜጠኝነት ይካየድ ኣሎ። እቲ ስልጠና፤ "ብቕዓት ሞያ ንልህቀት መራኸብቲ ሓፋሽ" ኣብ ትሕቲ ዝብል መሪሕ ሓሳብ እዩ ክካየድ ፀኒሑ። ዋና ዳይሬክተር በዓል መዚ መራኸብቲ ሓፋሽ ሃይማኖት ዘለቀ ኣብዚ እዋን ከም ዝበልኦ፤ እቲ ስልጠና ኣብ ታሪኽ መራኸብቲ ሓፋሽ ኢትዮጵየ ሓዱሽ ምዕራፍ ዝኸፈተን ንዕቤት እቲ ዓውዲ ዓብይ ኣስተዋፅኦ ዘለዎን እዩ። ብልህቀት ሞያ ዝተሃነፀ ጋዜጠኛ ንዕቤት ሃገር ወሳኒ ከም ዝኾነ እውን ሓቢረን። እቲ ስልጠና ን21 መዓልትታት ብዝተጠናኸረ መልክዑ እናተውሃበ ከም ዝፀንሐ ብምግላፅ፤ እዋኑ ዝሓለወን ነቲ ዓውዲ ዘማዕብልን ከም ዝኾነ ኣረዲአን። እዚ ስልጠና ዝወሰዱ ሰብ ሞያ ኣብ ቀፃሊ ኣብ ትካላቶም ለውጢ ንከምፅኡ እውን ፃውዒት ኣቕሪበን። እዞም ካብ መራኸብቲ ሓፋሽ ህዝብን መንግስትን ዝተውፃእፅኡ 36 ሰብ ሞያ ኣብቲ ዓውዲ ፍሉይ ክእለት ንክህልዎም ዘኽእል ስልጠና ከም ዝወሰዱ እውን ኣረጋጊፆም።

ኣዲስ ኣበባ/መጋቢት 3/2018(ኢዜኣ) መለለዪ መንነት ፋይዳ ንውፅኢታውነት ስራሕቲ ምክልኻልን ምርመራን ገበን ኣስተዋፅኦ እናበርከተ ከም ዝኾነ ኮሚሽነር ጀነራል ኮሚሽን ፖሊስ ፌዴራል ኢትዮጵያ ደመላሽ ገብረሚካኤል ገሊፆም። ኣብ ዙርያ መለለዪ መንነት ፋይዳ ንኣመራርሓን ኣባላትን ፖሊስ ፌዴራልን ክልላትን መድረኽ መጨበጢ ግንዛበ ይካየድ ኣሎ። ኮሚሽነር ጀነራል ደመላሽ ገብረሚካኤል ኣብዚ እን ከም ዝበልዎ፤ መለለዪ መንነት ፋይዳ ፀጥታን ድሕንነትን ንምርግጋፅ ዝስርሑ ስራሕቲ ውፅኢታዊ ንምግባር ዝለዓለ እጃም ኣለዎ። ብፍላይ ድማ ዝተፈላለዩ መለለዪ መንነት ብምጥቃም ዝፍፀሙ ገበናት ኣብ ምክልኻል ዝለዓለ ረብሓ ከም ዘለዎ ብምግላፅ፤ ዝተሓላለኹን ዶብ ተሳገርትን ገበናት ኣብ ምቁፅፃር እውን ርኡይ እጃም ከም ዘለዎ ኣብራህሪሆም። ስማርት ፖሊስ ስቴሽን ሓዊሱ ዘበናዊ ስርዓት ምክልኻል ገበን እናተዘርገሐ ከም ዝኾነ ብምሕባር፤ ተዛመድቲ ስርዓታት ምስ ፋይዳ ብምትእስሳር ንዝለዓለ ውፅኢት ከም ዝስራሕ እውን ተዛሪቦም።

ኣዲስ ኣበባ/መጋቢት 3/2018(ኢዜኣ) መራኸብቲ ሓፋሽ ብሄራዊ ረብሓ ኢትዮጵያ ንምርግጋፅ ትኹረት ሂቦም ክሰርሑ ከም ዝግባእ ኣማኻሪ ቀዳማይ ሚኒስትር ጉዳያት ማሕበራዊ ሚኒስትር ሙዓዘ ጥበባት ዲያቆን ዳንኤል ክብረት ገሊፆም። በዓል መዚ መራኸብቲ ሓፋሽ ኢትዮጵያ “መራኸብቲ ሓፋሽ ንብሄራዊ ረብሓ” ኣብ ትሕቲ ዝብል መሪሕ ሓሳብ ዘዳለዎ ሃገር ለኸ ኮንፈረንስ ኣብ ኣዲስ ኣበባ ይካየድ ኣሎ። ኣማኻሪ ቀዳማይ ሚኒስትር ጉዳያት ማሕበራዊ ሚኒስትር ሙዓዘ ጥበባት ዲያቆን ዳንኤል ክብረት ኣብዚ እዋን ከም ዝበልዎ፤ መራኸብቲ ሓፋሽ ብሄራዊ ረብሓ ኢትዮጵያ ንምርግጋፅ ትኹረት ሂቦም ክሰርሑ ይግባእ። መንግሥቲ መደመር ድሕሪ እቲ ሃገራዊ ለውጢ ሕብረ ብሄራዊ ሓድነትን ብሄራዊ ረብሓን ንምርግጋፅ ዝተፈላለዩ ስራሕቲ እናሰርሐ እዩ ዝርከብ። ሓባራዊ ተረኻት ብምህናፅን ሓባራዊ ፀጋታት ብምጥንኻርን ሃገራዊ ብልፅግና ንምርግጋፅን ብትኹረት እናተሰርሐ ከም ዝኾነ እውን ሓቢሮም። መራኸብቲ ሓፋሽ ንህንፀት ሃገር ዓብይ ኣስተዋፅኦ ከም ዘለዎም ብምግላፅ፤ ብመሰረት እዚ ድማ ረብሓ ህዝብን ሃገርን ንምርግጋጽ ብትኹረት ክሰርሑ ከም ዝግባእ ተዛሪቦም። ዋና ዳይሬክተር በዓል መዚ መራኸብቲ ሓፋሽ ኢትዮጵያ ሃይማኖት ዘለቀ ብግደአን፤ መራኸብቲ ሓፋሽ እዋናውን ትኽክለኛን ሓበሬታ ብምቕራብ ንህንፀት ሃገር ዓብይ ኣስተዋፅኦ ከም ዘለዎም ኣረዲአን። ብሄራዊ ረብሓ ኣብ ምሕላውን ሕብረ ብሄራዊ ሓድነት ኣብ ምህናፅን መራኸብቲ ሓፋሽ ዝለዓለ እጃም ከም ዘለዎም ብምሕባር፤ ድሕሪ እቲ ሃገራዊ ለውጢ መንግሥቲ ብዝገበሮ ሪፎርም ምህዳር መራኸብቲ ሓፋሽ ከም ዝሰፍሐ ገሊፀን።

ኣዲስ ኣበባ/መጋቢት 1/2018 (ኢዜኣ) ማእኸላት መውሃቢ ዝተዋደደ ኣገልግሎት ቁልፊ መመላኸቲ ስሉጥ ኣፈፃፅማ ኣገልግሎት መንግሥትን መጠናኸሪ ሓፈሻዊ ተረባሕነት ዜጋታትን ኮይኖም እዮም ክብሉ ቀዳማይ ሚኒስትር ዐቢይ ኣሕመድ (ዶ/ር) ገሊፆም። ቀዳማይ ሚኒስትር ዐቢይ ኣሕመድ(ዶ/ር) ኣብ ከተማ ሃረር ዝተሰርሐ ኣገልግሎት ሓደ ማእኸል መሶብ ተዓዚቦም። ድሕሪ እቲ ዑደት እውን እቶም ቀዳማይ ሚኒስትር ኣብ ማሕበራዊ ምትእስሳር ገፆም ኣብ ዘመሓላለፍዎ መልእኽቲ፤ ኣብ ከተማ ሃረር ዝተሰርሐ ኣገልግሎት ሓደ ማእኸል መሶብ ኣካል ኣገልግሎታት መንግሥቲ ኣብ ሓደ ማእኸል ኣዋዲድካ ናይ ምቕራብ ሃገራዊ መርሃ ግብሪ እዩ ኢሎም። ኣገልግሎት ሓደ ማእኸል መሶብ ሃረር 8 ትካላት ብ24 መስኮታት ኣገልግሎት 67 ዝተፈላለዩ ኣገልግሎታት ህዝቢ ኣብ ሓደ ስፍራ ንተገልገልቲ ዘቕርብ ከም ዝኾነ ሓቢሮም። እዚ ሃገራዊ ኣፈፃፅማ ብቕዓት፣ ተበፃሕነትን ዕግበት ዜጋታትን ኣገልግሎት መንግሥቲ ብምምሕያሻን ኣብ መንጎ ትካላት ዝተበታተነ ኣገልግሎት ብምቕናስን እቲ ሕብረተሰብ ኣገልግሎት ንምርካብ ዘጥፍኦ ግዜን ጉልበትን ምቕናስ ከም ዘኽኣለ ኣረዲኦም። ኣብ መላእ ሃገርና ስነ ሜላ መሶብ፤ መንግሥቲ ንዲጂታል ትራንስፎርሜሽንን ዝተዋደደ ኣወሃህባ ኣገልግሎትን ዘለዎ ፅኑዕ ቅዋም ብዘመላኽት መንገዲ እናተስፋሕፈሐ እዩ ዝርከብ እውን ኢሎም። ማእኸላት መውሃቢ ዝተዋደደ ኣገልግሎት ቁልፊ መመላኸቲ ስሉጥ ኣፈፃፅማ ኣገልግሎት መንግሥትን መጠናኸሪ ሓፈሻዊ ተረባሕነት ዜጋታትን ኮይኖም እዮም ክብሉ እውን ገሊፆም።

ኣዲስ ኣበባ/ለካቲት 21/2018(ኢዜኣ) ኢትዮጵያን ኣዘርባጃንን ኣብ ሰብ ስራሕ ብልሒ (ኣርቲፊሻል ኢንተለጀንስ) ዘለወን ምትሕብባር ንምጥንኻርን ልውውጥ ልምዲ ንምግባርን ጠንካራ ድሌት ከም ዘለወን ዋና ዳይሬክተር ኢንስቲትዩት ኣርቲፊሻል ኢንተለጀንስ ኢትዮጵያ ወርቁ ጋቸና(ዶ/ር) ገሊፆም። ዋና ዳይሬክተር ኢንስቲትዩት ኣርቲፊሻል ኢንተለጀንስ ኢትዮጵያ ወርቁ ጋቸና(ዶ/ር) ብቀዳማይ ሚኒስትር ዐቢይ ኣሕመድ (ዶ/ር) ዝተመርሐ ጉጅለ ልኡኽ ኢትዮጵያ ኣብ ኣዘርባጃን ዝገበሮ ዕላዊ ዑደት ስራሕ ኣመልኪቶም መብራህርሂ ሂቦም። ኣብ መብራህሪህኦም እውን ቀዳማይ ሚኒስትር ዐቢይ ኣሕመድ (ዶ/ር)ን ጉጅለ ልኡኾምን ንኢንስቲትዩት ኣርቲፊሻል ኢንተለጀንስ ኣዘርባጃን ከም ዝተዓዘቡ ሓቢሮም። እቲ ኣካዳሚ ኣብ ውሽጢ 1 ዓመትን 6 ኣዋርሕን ዓውዲ ትምህርቲ ሓዊሱ ኣብ ዝተፈላለዩ ዓውድታት ተበፃሕነት ሰብ ስራሕ ብልሒ ኣብ ምስፋሕ ውፅኢታዊ ስራሕ ከም ዘሳለጠ ካብቲ ዑደር ምርዳእ ከም ዝተኽኣለ ተዛሪቦም። ኢንስቲትዩት ኣርቲፊሻል ኢንተለጀንስ ኢትዮጵያ ቅድሚ 6 ዓመታት ከም ዝተጣየሸን ውፅኢታዊ ስራሕቲ እናሳለጠ ከም ዝርከብን ኣረዲኦም። ኣብ እዋን እቲ ዑደት ኣብ ምርምርን ልውውጥ ዳታን ብምትሕብባር ንምስራሕ ኣብ መንጎ እተን ሃገራት ኣብ ምርድዳእ ከምዝተበፅሐ እውን ኣብሪሆም። ቀዳማይ ሚኒስትር ዐቢይ ኣሕመድ(ዶ/ር)ን ጉጅለ ልኡኾምን ንማእኸል ፈጠራ ኤጀንሲ መንግስቲ ኣገልግሎት ህዝብን ማሕበራዊ ፈጠራን ኣዘርባጃን(ASAN) ጎብንዮም። ኣሳን ዝህቦ ኣገልግሎት ምስ ኣገልግሎት ሓደ ማእኸል መሶብ ተመሳሳልነት ዘለዎ ከም ዝኾነ ብምግላፅ፤ ብፍላይ ድማ ኣወሃህባ ኣገልግሎቱ ብሰብ ስራሕ ብልሒ ዝተደገፈ ምዃኑ ተሞኩሮ ዝውሰደሉ እዩ ኢሎም። ኣብ ኢትዮጵያ ዘሎ ኣገልግሎት ሓደ ማእኸል ብሰብ ስራሕ ብልሒ ንክድገፍን ፅሬቱ ንክዓብን ኣብ ቀፃሊ ብትኹረት ከም ዝስራሕ እውን ገሊፆም። መራሕቲ ክልቲአን ሃገራት ኣብ ዘተኦም ኣብ ሰብ ስራሕ ብልሕን ዲጂታል ቴክኖሎጂን ብምትሕብባር ንምስራሕ ኣብ ስምምዕ ከም ዝበፅሑ ፀሪሖም። ብሓፈሻ እቲ ዑደት ኣብ ቀረባ እዋን ናብ ትግበራ ንዝኣተወ ስትራቴጂ ዲጂታል ኢትዮጵያ 2030ን ንስራሕቲ እቲ ዓውድን ሓጋዚ ዓቕሚ ከም ዝኸውን ተዛሪቦም።

ኣዲስ ኣበባ/ለካቲት 19/2018(ኢዜኣ) ኢትዮጵያ ኣብ ኣፍሪካ ፈላማይ ሰብ ኣልቦ(smart) ኣገልግሎት ፖሊስ ብምጅማር ዓለም ለኻውን ኣህጉራውን ፍጻመታት ብዓወት ናይ ምትእንጋድ ዓቕሚ ከምዝፈጠረት ኣዘዚ ፖሊስ ፌዴራል ኮሚሽነር ጄኔራል ደመላሽ ገብረሚካኤል ገሊፆም። ቀዳማይ ሚኒስትር ዐቢይ ኣሕመድ(ዶ/ር) ኣብ ፈላማይ ሰሙን እዚ ወርሒ ዜጋታት ኣገልግሎት ፖሊስ ብቴክኖሎጂ ብዝሓሸ ቅልጣፈ ዝረኽብሉ ሰብ ኣልቦ ኣገልግሎት ፖሊስ ከምዘጀመሩ ዝፍለጥ እዩ። ኣዘዚ ፖሊስ ፌዴራል ኮሚሽነር ጄኔራል ደመላሽ ገብረሚካኤል ንኢዜኣ ከምዝበልዎ፤ ፖሊስ ፌዴራል ኢትዮጵያ ብዘበናዊ መልክዑ ካብ ዝጣየሽ 117 ዓመታት ዘቑፀረ ኣብ ኣፍሪካ ነዊሕ ዕድመ ዘቑፀረ ትካል እዩ። ድሕሪ እቲ ለውጢ ዝተገበረ ሪፎርም ብዝሰልጠነን ብቑዕን ሓይሊ ሰብ ዝተማልአ፣እቲ ዘበን ዘፍረዮም ቴክኖሎጂታት ዝተዓጠቐን ብናይ ሎጂስቲክስ ዓቕሙ እውን ዝጠንከረን ትካል ምፍጣር ተኻኢሉ እዩ ኢሎም። ኣብ ዓለም ዝሓሸ ኣፈፃፅማ ኣገልግሎት ፖሊስ ካብ ዘለወን ሃገራት ኣብ ቅድሚት ንምስላፍ ሪፎርም ከምዝተገበረ ብምግላፅ፤ ብዝተፈላለዩ ዓውድታት ክሳብ ሳልሳይ ዲግሪ/ፒ ኤች ዲ/ ዘምህሩ ላዕለዎት ትካላት ትምህርቲ ከምዝሃነፀ ተዛሪቦም። ስለዝኾነ ድማ ክሳብ ሕዚ ብዝነበሩ ዓበይቲ ልኡኽቶታት ፖሊስ ጭቡጥ ውፅኢታት ብምምዝጋብ ዕቤቱ ኣርእዩ እዩ ኢሎም። ኢትዮጵያ ኣብ ዝተፈላለያ ሃገራት ኣፍሪካ ኣብ ልኡኽቶ ምኽባር ሰላም ብምውፋር ተፈላጥነት ዘትረፈ ዓወት ብምምዝጋብ ንሰላምን ድሕንነትን ዓለም እጃማ እናተዋፅአት ከምዝኾነት እውን ኣረዲኦም። እቲ ዝተጀመረ ሰብ ኣልቦ ኣገልግሎት ፖሊስ ዜጋታት ወፃእን ውሽጢ ሃገርን ብቴክኖሎጂ ዝተደገፈ ኣገልግሎት ፖሊስ ንክረኽቡ ከምዘኽእልን ድሕንነትን ምስጢራውነትን ሓበሬታ ተጠቀምቲ ንምሕላው ዝለዓለ ቴክኖሎጂ ከምዝጥቀምን ገሊፆም። ፖሊስ ፌዴራል ኢትዮጵያ ዝፈጠሮ ብቑዕ ሓይሊ ሰብ፣ዝተዓጠቖ ዘበናዊ ቴክኖሎጅን ዝተማልአ ሎጂስቲክስን ዓለም ለኸን ኣህጉራውን ፍፃመታት ብዓወት ንምዝዛም ዕድል ፈጢሩ እዩ ኢሎም።

ኣዲስ ኣበባ/ጥሪ 27/2018 (ኢዜኣ) ቁፅሪ ተጠቀምቲ ኣገልግሎት ሞባይል 97 ሚልዮን ከምዝበፅሐ ቀዳማይ ሚኒስትር ዐቢይ ኣሕመድ(ዶ/ር) ገሊፆም። ቀዳማይ ሚኒስትር ዐቢይ ኣሕመድ (ዶ/ር) ትማሊ ኣብ ዝተኻየደ ኣብ መበል 10ይ ስሩዕ ኣኼባ ቤት ምኽሪ ወከልቲ ህዝቢ ተረኺቦም ኣብ ፀብፃብ ኣፈፃፅማ ስራሕ ትልሚ 6 ኣዋርሕ መንግሥቲ ካብ ኣባላት እቲ ቤት ምኽሪ ንዝቐረቡሎም ሕቶታት መብራህርን መልስን ምሃቦም ዝዝከር እዩ። ኣብ መብራህሪህኦም እውን፤ ዓውዲ ዲጂታል ብፍላይ ድማ ተጠቃምነት ኣገልግሎት ሞባይል እናዓበየ ከምዝመፀ ሓቢሮም። እቲ ለውጢ እንትመፅእ ቁፅሪ ተጠቀምቲ ኣገልግሎት ሞባይል 37 ሚልዮን ከምዝነበረ ብምዝኽኻር፤ ኣብዚ ሕዚ እዋን ግና ኣብ ኢትዮ ቴሌኮም 87 ሚልዮን ኣብ ሳፋሪኮም ድማ ልዕሊ 10 ሚልዮን ብሓፈሻ 97 ሚልዮን ተጠቀምቲ ኣገልግሎት ሞባይል ከምዘለዉ ኣረዲኦም። እዚ ድማ ድሕሪ እቲ ለውጢ ብ60 ሚልዮን ከምዝዓበየ እዩ ዘርኢ ዝበሉ እቶም ቀዳማይ ሚኒስትር፤ ይኹን እምበር እዚ እኹል ከምዘይኮነን ሕድ ሕድ ኢትዮጵያዊ ተጠቃሚ ሞባይል ንክኸውን ምስራሕ ከምዝግባእን ተዛሪቦም። ኣብ ዓውዲ ፋይናንስ ኣብ ዝሓለፉ 3 ዓመታት ብሞባይል ዝውውር ገንዘብ ዝፍፅሙ ዜጋታት 58 ሚልዮን ከምዝበፅሑ እውን ኣብራህሪሆም። ኣብ ዲጂታል ክፍሊት ኣብ ዝሓለፉ 6 ኣዋርሕ ዝተመዝገበ ውፅኢት ምስ ናይ ዝሓለፈ ተመሳሳሊ ወቕቲ እንትነፃፀር 60 ሚኢታዊ ከምዝወሰኸ ገሊጾም።

ኣዲስ ኣበባ/ጥሪ 26/2018(ኢዜኣ) ኢትዮጵያ ኣብ ሰብ ስራሕ ብልሒ ወይ ድማ ኣርቲፊሻል ኢንተለጀንስ ሓዱሽ ምዕራፍ ታሪኽ እናኸፈተት ከምትርከብ ቀዳማይ ሚኒስትር አቢይ ኣሕመድ(ዶ/ር) ተዛሪቦም። መበል 6ይ ቤት ምኽሪ ወከልቲ ህዝቢ መበል 10ይ ስሩዕ ኣኼባ ዘበነ ስራሕ 5ይ ዓመት ቀዳማይ ሚኒስትር ዐቢይ ኣሕመድ(ዶ/ር) ኣብ ዝተረኸብሉ የሳልጥ ኣሎ። ቀዳማይ ሚኒስትር ዐቢይ ኣሕመድ(ዶ/ር) ፀብፃብ ኣፈፃፅማ ስራሕ ፈላማይ ፍርቂ ዓመት በጀት ዓመት 2018 መንግስቲ ፌዴራል ብዝምልከት ካብ ኣባላት እቲ ቤት ምኽሪ ንዝቐርቡሎም ሕቶታት ምላሽን መብራህርህን እናሃቡ እዮም ዝርከቡ። እቶም ቀዳማይ ሚኒስትር ኣብ ዝሃብዎ መብራህርህን መልስን ከምዝበልዎ፤ ናይ ፅባሕ ዓለም ለኻዊ ውድድር ንምስዓር ናይ ሎሚ ድልዉነት ወሳኒ እዩ። መንግሥቲ መናእሰይ ንዝለዓለ ዓወት ንምብቃዕ ብትኹረት እናሰርሐ እዩ ዝርከብ ኢሎም። ካብ ሓሙሽተ ዓምድታት ዕቤት ቴክኖሎጂ እቲ ሓደ ምዃኑ ንወለዶ ዝተሰርሐ ዓብይ ኢንቨስትመንት ከምዝኾነ ብምግላፅ፤ ብፍላይ ድማ ኣብ ኣርቲፊሻል ኢንተለጀንስ (AI) ኢትዮጵያ ሓዱሽ ምዕራፍ ታሪኽ እናኸፈተት ከምዝኾነት ኣብራህሪሆም። ብመሰረት እዚ ድማ ኢትዮጵያ ኣብ ዓለም ካልኣይ ዝኾነ ዓብይ ዩኒቨርሲቲ ሰብ ስራሕ ብልሒ(ኣርቲፊሻል ኢንተለጀንስ) ንምህናፅ እናሰርሐት ከምዝኾነ ብምሕባር፤ እዚ ዓብይ ላዕለዋይ ትካል ትምህርቲ ኣብ ውሽጢ ሓደ ዓመት ከምዝጅመር ኣረዲኦም።

ሰመራ/ጥሪ 23/2018(ኢዜኣ) ዲጂታል መለለዪ መንነት ፋይዳ ሓቛፊ ስለዝኾነ ማሕበራውን ኢኮኖሚያውን ተረባሕነት ደቂ ኣንስትዮ ንምርግጋፅ ወሳኒ እጃም ከምዘለዎ ሚኒስቴር ጉዳይ ደቂ ኣንስትዮን ማሕበራውን ገሊፁ። መርሃ ግብሪ ጎስጓስ ምዝገባ ዲጂታል መለለዪ መንነት ፋይዳ ኣብ ከተማ ሰመራ ተኻይዱ። ሚኒስትር ዲኤታ ሚኒስቴር ጉዳይ ደቂ ኣንስትዮን ማሕበራውን ሂክማ ከይረዲን ኣብዚ መድረኽ ተረኺበን ከምዝበልኦ፤ ዲጂታል መለለዪ መንነት ፋይዳ ሓቛፊ ስለዝኾነ ማሕበራውን ኢኮኖሚያውን ተረባሕነት ደቂ ኣንስትዮ ንምርግጋፅ ወሳኒ እጃም ኣለዎ። ኣብዚ ዓመት 30 ሚልዮን ደቂ ኣንስትዮን 10 ሚልዮን ህፃናትን ወነንቲ እቲ መለለዪ መንነት ንምግባር ተተሊሙ እናተሰርሐ ከምዝኾነ ብምሕባር፤ እቲ ትልሚ ንምዕዋት ብቆራፅነት ክስራሕ እዩ ኢለን። ዲጂታል መለለዪ መንነት ፋይዳ ደቂ ኣንስትዮ ተረባሕቲ ዝኾናሉ፣መሰለን ምርግጋፅ ዝኽእላሉን ክብርን ረብሓን ደቂ ኣንስትዮን ህፃናትን ምዕባይ ዘኽእልን ከምዝኾነ እውን ኣረዲአን።

ኣዲስ ኣበባ/ጥሪ 20/2018 (ኢዜኣ) ዜጋታት ብዋትሳፕ፣ቴሌግራምን ካልኦት ኣማራፅታት መልኣኺ መልእኽትን ንዝፍፀሙ መጥቃዕትታት ሳይበርን ተግባራት ምጭብርባርን ተቓላዕቲ ንከይኾኑ ግቡእ ጥንቃቐ ንክገብሩ ምምሕዳር ድሕንነት መርበብ ሓበሬታ ኣተሓሳሲቡ። እቲ ማሕበረሰብ ድሕንነት ሳይበር ናይ ምሕላው ሓላፍነቱ ንክዋፃእ እውን ፃውዒት ኣቕሪቡ። ምምሕዳር ድሕንነት መርበብ ሓበሬታ ኣብ ኢትዮጵያ ምስፍሕፋሕ ዲጂታል ምትእስሳር ስዒቡ ብዋትሳፕ፣ቴሌግራምን ካልኦት ኣማራፅታት መልኣኺ መልእኽትን ዝፍፀሙ መጥቃዕትታት ሳይበርን ምጭብርባርን ብዘተሓሳስብ ኩነታት እናወሰኹ ምምፅኦም ብዝተፈላለዩ መንገድታት ምርግጋፅ ከምዝተኽኣለ ኣብ ዘውፅኦ መግለፂ ኣፍሊጡ። ኣብዚ ሕዚ እዋን ኣብታ ሃገር ዝሳለጡ ዝተፈላለዩ ሲምፖዜማት፣ዓለም ለኸ መድረኻትን ኦንላይን ኣኼባታትን ከም ሰናይ ኣጋጣሚ ብምጥቃም ገበናኛታት ሳይበር ናይዞም ፍፃመታት ሽም ንናይ ሓሶት ስርሖም እናተጠቐምሎም ከምዝርከቡ ኣረዲኡ። እዞም ኣካላት ውልቀ ሓበሬታ እቲ ማሕበረሰብ ንምስራቕ፣ሒሳባት ባንኪ ንምስራቕን ዲጂታል ድሕንነት ንምርባሽን ብዝተዋደደ መልክዑ እናሰርሑ ከምዝኾኑ እቲ ምምሕዳር ብኽትትልን ምርመራን ከምዘረጋገፀ ሓቢሩ። እቶም መጥቃዕትታት ሳይበር እቲ ማሕበረሰብ ትኹረት ዝህቦም ተደላይን እዋናውን ዝኾኑ ጉዳያት መበገሲ ብምግባር ብዝተዘርገሐ ስልታዊ መታለሊ ሜላ ከምዝፍፁሙ እውን ፀሪሑ። እቶም መጭበርበርቲ “ንተሳተፍቲ እቶም ሲምፖዜማት ዝተዳለወ ነፃ ፓኬጅ ኢንተርኔት”፣”ፍሉይ ቁፃር ስራሕ” ወይ ድማ “እዚ መሳተፊ ኣኼባ ሊንክ እዩ፤ ከፊቶም ይእተዉ”ዝብሉ ዘሰሓሓቱን ሰሓብትን መልእኽትታት ብምዝርጋሕ ተጠቀምቲ ኣብቲ መልእኽቲ ዝተገለፀ ሊንክ ንክጥውቑ ከምዝብሩ ብምግላፅ፤ እዚ ተግባር እቲ ተጠቃሚ ከይፈለጦ ናብ ጎዳኢ ልኡኽቶ ዘለዎም ድሕረ ገፃት ንከምርሕን ንጥቕዓት ተቓላዒ ንክኸውንን ዝገብር ቀዳማይ ስጉምቲ እቶም ገበነኛታት እዩ ኢሉ። እቶም ጥቕዓት ዘብፅሑ ሕፅረት ግንዛበን ትኹረትን ሓደ ሓደ ሰባት ተጠቒሞም ዝለኣኹሎም ሊንክታትን መልእኽትታትን ብጥንቃቐ ናይ ምምርማር ዕድሎም ትሑት ምዃኑ ስዒቡ እቶም ገበነኛታት እዚ ኩነታት ከም ምችው ኣጋጣሚ እናተጠቐምሉ ከምዝርከቡ ኣብራህሪሁ። ከምዚ ዓይነት ጥቕዓት ካብ ስርቂ ሓበሬታ ውልቀ ሰባት ብዝዘለለ ኣብ ኢዶም ዝርከቡ ሚስጥራዊ ሓበሬታታት ኣብ ትሕቲ ጠለፍቲ/መጭበርበርቲ ንክወድቁ ብምግባር ኣብ ልዕሊ ልኣላዊነትን ድሕንነትን ሃገር ልዑል ሓደጋ ከምዘጋጥም እቲ ምምሕዳር ኣተሓሳሲቡ። ስለዝኾነ ድማ ተጠቀምቲ ዝተልኣኸሎም ሊንክታት እንትጥውቑ ወይ ድማ ዝተሓተትዎ ሓበሬታ እንትመልኡ ናይ ዋትሳፕ ወይ ድማ ቴሌግራም ኣካውንቶም ኣብ ትሕቲ ቁፅፅር ጠለፍቲ/ኣጭበርበርቲ ንክውዕል ከምዝገብር እውን ኣብቲ መግለፂ ተገሊፁ። እቶም ገበነኛታት ናይ ሓደ ሰብ ኣካውንት ሓደ ግዜ ድሕሪ ምቁፅፃሮም እቲ ዝተጠለፈ ኣካውንት ብምጥቃም ብሽም እቲ ተጎዳኢ ንናይ ቀረባ ፈተውቱ፣ቤተሰቡን መሳርሕቱን “ሃንደበታዊ ፀገም ኣጋጢሙኒ” ዝብሉ ናይ ሓሶት ሕቶታት ደገፍ ገንዘብ ይልእኹ። እዚ ተግባር ድማ ኣብ መንጎ እቲ ማሕበረሰብ ዘሎ ምትእምማን ካብ ምሽርሻር ብተወሳኺ ልዑል መጠን ዘለዎ ገንዘብ ብምጭብርባር ንክስረቕ ብምግባር ሰፊሕ ኢኮኖሚያውን ስነ ልቦናውን ጉድኣት እናብፀሐ ከምዝርከብ እቲ ምምሕዳር ኣፍሊጡ። ኣብ ላዕሊ ዝተገለፁን ተዛመድቲ ስግኣታት ሓደጋ ሳይበርን ንምቕናስ ትካላት መንግስትን ውልቀን ከምኡ እውን እቲ ማሕበረሰብ ካብ ዝኾነ እዋን ንላዕሊ ጥንቃቐ ክገብሩ ከምዝግባእ ኣተሓሳሲቡ። ካብ ዘይፍለጡ ወይ ድማ ዘይተረጋገፁ ኣድራሻታት ብዋትሳፕ፣ቴሌግራምን ካልኦት መድረኻትን ዝለኣኹ ሊንክታት ብዘይምኽፋትን ኣጠራጠርቲ መልእኽትታት እንትበፅሑ ሽዑ ንሽዑ "Report"ን "Block"ን ብምግባር ዝርገሐ እቲ መጥቃዕቲ ምግታእ ከምዝግባእ ኣገንዚቡ። ብተወሳኺ እውን ዝኾነ ዓይነት ሚስጥራዊ መሕለፊ ቃል ወይ ድማ ብስልኪ ዝለኣኽ መረጋገፂ ኮድ (Verification Code) ንዝኾነ ኣካል ዘይምሃብ ንዲጂታል ድሕንነት ወሳኒ ከምዝኾነ ኣመላኺቱ። እቲ ምምሕዳር ሕድ ሕድ ተጠቃሚ ብፍላይ ድማ እቲ ማሕበረሰብ ኣብቶም መተግበሪታት ክልተኣዊ መረጋገፂ (Two-Step Verification) ብህፁፅ ተግባራዊ ንክገብር እውን ኣረዲኡ። እዚ ቴክኖሎጂ ጠለፍቲ ሓበሬታ ኣካውንት ውልቀ ሰባት ብቐሊሉ ንከይቆፃፀሩ ዝገብርን ተወሳኺ ቁልፊ ድሕንነት ዝፈጥርን ዘተኣማምን መከላኸሊ ሜላ ከምዝኾነ ብምሕባር፤ ዜጋታት እዚ ቀሊልን ውፅኢታውን ዝኾነ ጥንቃቐ ድሕንነትተግባራዊ ብምግባር ዓርሶም ካብ ብቴክኖሎጂ ዝተደገፉ ተግባራት ምጭብርባር ከድሕኑን ሽርሒ ገበነኛታት ሳይበር ከፍሽሉን ከምዝግባእ ምምሕዳር ድሕንነት መርበብ ሓበሬታ ኣተሓሳሲቡ። ምምሕዳር ድሕንነት መርበብ ሓበሬታ እዞም ገበነኛታት ሳይበር ብሕጊ ተሓተትቲ ንምግባር ምስ ዝምልከቶም ኣካላት ፀጥታን ፍትሕን ተዋዲዱ እናሰርሐ ከምዝርከብ እውን ኣፍሊጡ። እቲ ማሕበረሰብ ዝኾነ ዓይነት ፈተነ መጥቃዕቲ ሳይበር እንተጋጥሞ ወይ ድማ ዘጠራጥር ምንቅስቓስ እንትዕዘብ ብነፃ መስመር ስልኪ 933 ብምድዋል ንምምሕዳር ድሕንነት መርበብ ሓበሬታ ጥቆማ ወይ ድማ ሓበሬታ ንክህብ ፃውዒት ቀሪቡ። ድሕንነት ሳይበር ምርግጋፅ ሓላፍነት ሓደ ትካል ጥራሕ ዘይኮነስ ሓባራዊ ሓላፍነት ኩላትና ስለዝኾነ ኣጠቓቕማ ቴክኖሎጂና ብንቕሓትን ብጥንቃቐን ብምምራሕ ሰላምን ድሕንነትን ሃገርና ብሓባር ምሕላው ከምዝግባእ እቲ መግለፂ ኣገንዚቡ።

ኣዲስ ኣበባ/ጥሪ 19/2018(ኢዜኣ) ኣብ ከተማ ኣዲስ ኣበባ ተወሰኽቲ 9 መውሃቢ ኣገልግሎት ሓደ ማእኸል “ኣዲስ መሶብ” ናብ ስራሕ ንምእታው ምድላው እናተገበረ ከምዝኾነ ዋና ዳይሬክተር ሓደ ማእኸል ዲጂታል ኣገልግሎት መንግሥቲ ኣዲስ መሶብ ዮናስ ኣለም ኣየሁ ገሊፆም። እቶም ዋና ዳይሬክተር ንኢዜኣ ከምዝበልዎ፤ እቲ ማእኸል ኣገልግሎት ካብ ዝጀመረሉ እዋን ጀሚሩ ክሳብ ሕዚ ንልዕሊ 55 ሽሕ ዜጋታት ኣገልግሎት ምሃብ ክኢሉ እዩ። ኣብ ኣወሃህባ ኣገልግሎት እቲ ማእኸል ብዝተገበረ መፅናዕቲ ዳህሳስ ዝወሃብ ኣገልግሎት ኣብ ተገልገልቲ ዕግበት ከምዝፈጠረ ብምግላፅ፤ እቲ ማእኸል ስራሕ እንትጅምር 107 ዝነበርዎ ዓይነታት ኣገልግሎት ኣብዚ ሕዚ እዋን ናብ 132 ከምዝዓበዩ ኣፍሊጦም። ኣብ ቀረባ እዋን 4 ትካላት ናብቲ ማእኸል ከምዝኣትዉ ብምሕባር፤ እዚ ድማ ተበፃሕነት ኣገልግሎት ኣብ ምስፋሕ ርኡይ እጃም ኣለዎ ኢሎም። ኣብዚ ሕዚ እዋን እቲ ኣገልግሎት ኣብ ዋና ቤት ዕዮን ሓደ ጨንፈርን ጥራሕ እናተውሃበ ከምዝርከብ ዝገለፁ እቶም ዋና ዳይሬክተር፤ ተበፃሕነት ንምስፋሕ ተወሰኽቲ 9 ጨንፈራት ንምኽፋት ምድላው እናተገበረ ከምዝኾነ ተዛሪቦም። ጎና ጎኒ ምስፍሕፋሕ እቲ ኣገልግሎት እቶም ማእኸላት ንተገልገልቲ ብዝበለፀ ምችዋት ናይ ምግባር ስራሕ እውን ብትኹረት እናተሳለጠ ከምዝርከብ ሓቢሮም።

ኣዲስ ኣበባ/ጥሪ 19/2018 (ኢዜኣ) ገበናት ብዘይ ሕጋዊ መንገዲ ዝተረኸበ ገንዘብ ሕጋዊ ኣምሲልካ ምጥቃምን ራዕድነት ብገንዘብ ምድጋፍን ምክልኻል ዘኽእል ብሰብ ስራሕ ብልሒ ዝተደገፈ ስርዓት ንምልማዕ ስምምዕ ተፈሪሙ። እቲ ስምምዕ፤ ዋና ዳይሬክተር ኢንስቲትዩት ኣርቲፊሻል ኢንተለጀንስ ኢትዮጵያ ወርቁ ጋቸና (ዶ/ር)ን ዋና ዳይሬክተር ኣገልግሎት ድሕንነት ፋይናንስ ሙሉቀን ኣማረን እዮም ፈሪመምዎ። ዋና ዳይሬክተር ኢንስቲትዩት ኣርቲፊሻል ኢንተለጀንስ ኢትዮጵያ ወርቁ ጋቸና (ዶ/ር) ኣብዚ እዋን ከምዝበልዎ፤ እቲ ስምምዕ ኣገልግሎት ድሕንነት ፋይናንስ ገበናት ብዘይ ሕጋዊ መንገዲ ዝተረኸበ ገንዘብ ሕጋዊ ኣምሲልካ ምጥቃምን ራዕድነት ብገንዘብ ምድጋፍን ንምክልኻል ንዝገብሮ ፃዕሪ ዝድግፍ እዩ። እቲ ስርዓት ሰብ ስራሕ ብልሒ መሰረት ብምግባር ረቀቕቲ ገበናት ቅድሚ ምፍፃሞም ምትራፍን እቲ ፀገም እንተጋጥም ድማ ዝኸፍአ ጉድኣት ከይበፅሐ ብቕልጡፍ ምፍታሕን ዘኽእል እዩ ኢሎም። እዚ ስርዓት ንምምዕባል ስራሕቲ ቅድመ ምድላው እናተሳጡ ከምዝፀንሑ ብምዝኽኻር፤ ዓለም ለኸ ደረጅኡ ብዝሓለወ ኣብ ዝተተለመሉ እዋን ሰሪሕኻ ንምርካብ ድሉዋት ኢና ክብሉ እውን ተዛሪቦም። ዋና ዳይሬክተር ኣገልግሎት ድሕንነት ፋይናንስ ሙሉቀን ኣማረ ብግደኦም፤ ኢትዮጵያ ኣባል ሕብረት ትካላት ፋይናንስን ዓለም ለኸ ግብረ ሓይሊ ትግበራ ፋይናንስን ስለዝኾነት ሓበሬታታት ገበን ፋይናንስ ምስ ካልኦት ሃገራት ከምትለዋወጥ ሓቢሮም። ስለዝኾነ ድማ ገበናት ብዘይ ሕጋዊ መንገዲ ዝተረኸበ ገንዘብ ሕጋዊ ኣምሲልካ ምጥቃምን ራዕድነት ብገንዘብ ምድጋፍን ዝተሓላለኹን ዶብ ተሳገርትን ስለዝኾኑ ደገፍ ቴክኖሎጂ ከምዘድልዮም ብምሕባር፤ እቲ ስርዓት እዚ ዝተሓላለኸ ገበን ምስ ሃገራት ብምትሕብባር ከምኡ እውን ምስ ኣኽበርቲ ሕጊ ብምስራሕ ካብ ገበን ምድሓን ከምዘይከኣል ንምርኣይ ከምዝሕግዝ ተዛሪቦም። ኢትዮጵያ ገበናት ብዘይ ሕጋዊ መንገዲ ዝተረኸበ ገንዘብ ሕጋዊ ኣምሲልካ ምጥቃምን ራዕድነት ብገንዘብ ምድጋፍን ንምክልኻልን ድሕንነታ ንምርግጋፅ እዚ ስርዓት ብምፍጣራ ንካልኦት ሃገራት ኣፍሪካ መርኣያ ዝኸውን እዩ ኢሎም።

ኣዲስ ኣበባ/ጥሪ 19/2018(ኢዜኣ) ኣብ ኤክስፖ ሓይሊ ኣየር ዝተርኣዩ ውፅኢታት ወታደራዊ ቴክኖሎጂ ሕልሚ ልዕልና ርሑቕ ዘበን ኢትዮጵያ ብጭቡጥ ኣብ ቀረባ እዋን ከምነዐውቶ ዘረጋግፁ እዮም ክብሉ ምክትል ቀዳማይ ሚኒስትር ተመስገን ጥሩነህ ገሊፆም። እቶም ምክትል ቀዳማይ ሚኒስትር ኣብ ዘመሓላለፍዎ መልእኽቲ፤ ንዓለም ለኸ ኤክስፖ ሓይሊ ኣየር ተዓዚብና ኢሎም። ጉዕዞ 90 ዓመታት ሓይሊ ኣየር ኢትዮጵያ ብዓወትን ብጀግንነትን ጥራሕ ዝተገደበ ከምዘይነበረን ብውፅኢት ፈጠራን ቴክኖሎጂን እውን ከምዝኾነን ብምግላፅ፤ ኣብ ዋና ቤት ዕዮ እቲ ሓይሊ ኣየር ኣብ ዝተኸፈተ ዓለም ለኸ ኤክስፖ ሓይሊ ኣየር ሎሚ ዝተዓዘብናዮ ሓቂ እውን ነዚ ዘረጋግፅ እዩ ኢሎም። ኣብቲ ኤክስፖ ዝተዓዘብናዮም ውፅኢታት ወታደራዊ ቴክኖሎጂ ሕልሚ ልዕልና ርሑቕ ዘበን ኢትዮጵያ ብጭቡጥ ኣብ ቀረባ እዋን ከምነዐውቶ ዘረጋግፁ እዮም ክብሉ እውን ኣረዲኦም።

ኣዲስ ኣበባ/ጥሪ 16/2018 (ኢዜኣ) መበል 90 ዓመት ምስረታ ሓይሊ ኣየር ኢትዮጵያ ብዝምልከት ዝተዳለወ ምርኢት ኣየር ጥቁር ኣንበሳ ኣብ ቢሾፍቱ እናተኻደ እዩ ዝርከብ። ኣብቲ መርሃ ግብሪ ምርኢት ኣየር፤ ቀዳማይ ሚኒስትር ዐቢይ ኣሕመድ(ዶ/ር)፣ኣፈ ጉባኤ ቤት ምኽሪ ወከልቲ ህዝቢ ታገሰ ጫፎ ከምኡ እውን ኣፈ ጉባኤ ቤት ምኽሪ ፌዴሬሽን ኣገኘሁ ተሻገር ተረኺቦም። ብተወሳኺ እውን ላዕለዋይ ኢታማዦር ሹም ሓይልታት ሰራዊት ምክልኻል ፌዴሪኢ ፊልድ ማርሻል ብርሃኑ ጁላ፣ምክትል ላዕለዋይ ኢታማዦር ሹም ሓይልታት ሰራዊት ምክልኻል ፌዴሪኢ ጄኔራል ኣበባው ታደሰ፣ዋና ኣዛዚ ሓይሊ ኣየር ኢትዮጵያ ሌተናል ጄኔራል ይልማ መርዳሳ ሓዊሱ ላዕለዎት ወታደራዊ መኮንናትን ሓለፍቲ ስራሕ መንግሥትን ተረኺቦም። "ሰማይ ኣንበሳታት ኢትዮጵያ" ኣብ ትሕቲ ዝብል መሪሕ ሓሳብ እናተኻየደ ኣብ ዝርከብ ምርኢት ኣየር፤ ካብ ሓይሊ ኣየር ፌዴሪኢ ብተወሳኺ ሓይሊ ኣየራት ዝተፈላለያ ሃገራት እውን እናተሳተፉ እዮም ዝርከቡ።

ኣዲስ ኣበባ/ጥሪ 16/2018 (ኢዜኣ) ምቅልጣፍ ዓምድታት ኢኮኖሚ ኢትዮጵያ ኣብ ግምት ዘእተዉን ዞባዊ ምትእስሳር ዘጠናኽሩን ስልጠናታት ቴክኒክን ሞያን እናተውሃቡ ከምዝኾኑ ዋና ዳይሬክተር ኢንስቲትዩት ስልጠና ቴክኒክን ሞያን ፌዴራል ብሩክ ከድር (ዶ/ር) ገሊፆም። ኢንስቲትዩት ስልጠና ቴክኒክን ሞያን ፌዴራል ምስ ሚኒስቴር ስራሕን ክእለትን ብምትሕብባር መናእሰይ ክእለቶምን ሓሳቦምን ትርጉም ናብ ዘለዎም ፈጠራታት ምቕያር ዝኽእልሉ “ክእለት ኢትዮጵያ” ዝተብሃለ መርሃ ግብሪ ተግባራዊ ገይሩ። ዋና ዳይሬክተር ኢንስቲትዩት ስልጠና ቴክኒክን ሞያን ፌዴራል ብሩክ ከድር (ዶ/ር) ንኢዜኣ ከምዝበልዎ፤ ዓውዲ ስልጠና ቴክኒክን ሞያን ኢትዮጵያ ብስሩዕን ሓፀርትን ስልጠናታት ብዓመት ክሳብ 6 ሚልዮን ዜጋታት ናይ ምትእንጋድ ዓቕሚ ኣለዎ። ኣብ መርሃ ግብሪ "ክህሎት ኢትዮጵያ" ካብ መላእ ኢትዮጵያ ዝተውፃእፅኡ ሰብ ሞያ ፈጠራ እታዎት ተማሊእሎምን መሰል ዋንነት ፈጠርኦም ተሓልይሎምን ሓሳብ ፈጠርኦም ጋህዲ ዝገብርሉ ዓቕሚ እናሃነፁ ከም ዝኾነ ሓቢሮም። ስለዝኾነ ድማ እቶም መናእሰይ ብጉጅለ ብምዃን ልዕሊ 100 ሓደሽቲ ፈታሕቲ ፀገም ስራሕቲ ፈጠራ ከውፅኡ ክኢሎም እዮም ኢሎም። እዞም ስራሕቲ ፈጠራ ኢኮኖሚ ኢትዮጵያ ንምዕባይ ብዓውድታት ትኹረት ዝተፈለዩ ዓውድታት ግብርና፣ ኢንዱስትሪ፣ቱሪዝም፣ መዓድንን ቴክኖሎጂ ኢንፎርሜሽንን ዝተኸተሉ ከምዝኾኑ ኣረዲኦም። እቲ ኢንስቲትዩት ነባራዊ ኩነታት ዓለም ዘበነ ትምህርቲ እዚ ዓመት ኣብ ግምት ዘእተዉን ዞባዊ ምትእስሳር ዘጠናኽሩን ከም ሰብ ስራሕ ብልሒ፣ ድሕንነት ሳይበር፣ ባዮሜዲካል ቴክኖሎጂ፣ሮቦቲክስ ቴክኖሎጂን ተዛመድቲ ሓደሽቲ ዓውድታት ስልጠናን ከምዝጀመረ ተዛሪቦም። ፖሊሲ ጉዳይ ወፃኢ ኢትዮጵያ ቀዳምነት ንጎረቤት ሃገራት ከምዝብል ብምግላፅ፤ ኣብ ዓውዲ ትምህርቲ እውን ንጎረቤት ሃገራት ቀዳምነት ብምሃብ ዜጋታት ወፃኢ ሃገር ስልጠና ክእለት ንክረኽቡ እናተገበረ ከምዝኾነ ሓቢሮም።