ኣዲስ ኣበባ/ሕዳር 18/2018(ኢዜኣ) ኢትዮጵያ ከም ኣቆፃፅራ ኣውሮፓ ኣብ 2028 ዝካየድ መበል 96 ዓመታዊ ሓፈሻዊ ጉባኤ ዓለም ለኸ ኢንተርፖል ትካል ፖሊስ ንክተተኣናግድ ብሙሉእ ድምፂ ተመሪፃ። ኣብ ሞሮኮ ከተማ ማራካሻ ክካየድ ኣብ ዝፀንሐ መበል 93 ዓመታዊ ሓፈሻዊ ጉባኤ ኢንትርፖል ኢትዮጵያ እቲ ጉባኤ ንክተተኣናግድ ምምራፃ ፖሊስ ፌዴራል ኢትዮጵያ ንኢዜኣ ኣብ ዝለኣኾ ሓበሬታ ኣፍሊጡ። ቅድሚ 3 ወርሒ ከም ኣቆፃፅራ ኣውሮፓ ኣብ ወርሒ ነሓሰ 2025 ኣብ ደቡብ ኣፍሪካ ከተማ ኬፕታውን ኣብ ዝተኻየደ መበል 26 ሪጅናል ኮንፈረንስ ኢንተርፖል ኣፍሪካ ኢትዮጵያ ኣብ 2027 ዝካየድ መበል 27 ሪጅናል ኮንፈረንስ ኢንተርፖል ኣፍሪካ ንክተተኣናግድ ምምራፃ ዝዝከር እዩ።

ኣዲስ ኣበባ/ሕዳር 17/2018(ኢዜኣ) ቫይረስ ማርበርግ ኣብ ውሽጢ ሓፂር እዋን ምክልኻልን ምቁፅፃርን ዘኽእሉ ስራሕቲ እናተሳለጡ ከምዝኾኑ ሚኒስትር ጥዕና ዶክተር መቅደስ ዳባ ገሊፀን። እዋናዊ ኩነታት ቫይረስ ማርበርግን ዝሳለጡ ዘለዉ ስራሕቲ ምክልኻልን ብዝምልከት ሚኒስትር ጥዕና ዶክተር መቅደስ ዳባን ዋና ዳይሬክተር ኢንስቲትዩት ጥዕና ሕብረተሰብ ኢትዮጵያ ዶክተር መሳይ ሃይሉን መግለፂ ሂቦም። ሚኒስትር ጥዕና ዶክተር መቅደስ ዳባ ኣብዚ እዋን ከምዝበልኦ፤ ቫይረስ ማርበርግ ካብ ዘጋጥም ጀሚሩ ስራሕቲ ክትትል ተጠናኺሮም እናቐፀሉ እዮም። እቲ ቫይረስ ኣብ ሓፂር እዋን ምቁፅፃር ዘኽእሉ ስራሕቲ ምፍላይን ኣተሓላልዋ ጥዕና ሕብረተሰብን እናተሳለጡ ከምዝኾኑ እውን ተዛሪበን። ብሰብ ሞያ ዝተወደበ ጉጅለ ወሃቢ ምላሽ ግንዛበ እቲ ሕብረተሰብ ዘዕብዩ ስራሕቲ እናሳለጠ ከምዝኾነ ሓቢረን። ክሳብ ሎሚ ንጉሆ ኣብ ዘሎ ን73 ሰባት ምርመራ ብምግባር 11 ሰባት በቲ ቫይረስ ከምዝተትሓዙ ምርግጋፁን ሂወት 6 ሰባት ምሕላፉን ገሊፀን። ምስ በቲ ቫይረስ ዝተትሓዙ ሰባት ንኽክእ ዝነበሮም 349 ሰባት ተፈልዮም ክትትል እናተገበረሎም ከምዝኾነ ብምግላፅ፤ 119 ሰባት እዋን ክትትሎም ወዲኦም ካብቲ መፅንሒ ምውፅኦም ኣረዲአን። ዋና ዳይሬክተር ኢንስቲትዩት ጥዕና ሕብረተሰብ ኢትዮጵያ ዶክተር መሳይ ሃይሉ ብግደኦም፤ ስራሕቲ ምክልኻል፣ትዕዝብቲ፣ምላሽን ምዕባይ ግንዛበ ሕብረተሰብን ተጠናኺሮም ከምዝቐፀሉ ተዛሪቦም። ኣብ ክልል ደቡብ ኢትዮጵያ ዑደት ገዛ ንገዛ እናተኻየደ ከምዝኾነን ምስ ዝምልከቶም ኣካላት ብምትሕብባር እናተሰርሐ ምዃኑን ገሊፆም።  

ምምሕዳር ከተማ ኣዲስ ኣበባ ፀገም ቀረብ ኣባይቲ ንምፍታሕ ብመንግስቲ፣ ወለንታውያንን ውልቀ ሃነፅትን ብዙሓት ኣባይቲ ብምህናፅ ንዜጋታት ብፍትሓዊነት ተረባሕቲ ከምዝገበረ ኣብሪሁ። ብመሰረት እዚ ብዝተፈላለዩ ኣማራፅታት ኣባይቲ ብምህናፅ፣ቀረብ መንበሪ ኣባይቲ ብምምሕያሽ ዝነኣድ ውፅኢት ከምዝተረኸቡ ሓቢሩ። እቲ ምምሕዳር ምስ ውልቀ ሰብ ሃፍቲ ተዋዲዱ ብምስራሕ ካብ እዋን ናብ እዋን እናወሰኸ ዝመፅአ ባህጊ ኣባይቲ ንምምላእን ተበፃሒ ንምግባርን ኩለ መዳያዊ ስራሕቲ ይስራሕ ኣሎ ኢሉ። ክሳብ ሐዚ ብመርሃ ግብሪ ዝተሳለጡ፤ ብፕሮግራም ኮንደሚኒየም-139008 ኣባይቲ ንዓቕሚ ዘይብሎምን ሰብ ውዕለታ ሃገርን- 40576 ኣባይቲ፣ ብምምሕዳር እታ ከተማ ዝተሃነፁ ናይ ክራይ ኣባይቲ- 24819 ብሪል ስቴት፣ ማሕበርን ውልቀ ሃነፅትን 175605 ኣባይቲ ብድምሩ 380 ሽሕ ኣባይቲ ንተረባሕቲ ከምዝተውሃቡ ዝገለፀ ቤት ፅሕፈት ምምሕዳር ኣዲስ ኣበባ፤ ኣብ ቀፃሊ እውን ዝተፈላለዩ ኣማራፅታት ብምጥቃም ሕቶ መንበሪ ኣባይቲ ዜጋታት ንምምላስ ጠመተ ተገይሩ ከምዝስራሕ ኣመልኪቱ።  

ኣዲስ ኣበባ/ሕዳር 13/2018 (ኢዜኣ) ምምሕዳር ከተማ ኣዲስ ኣበባ ብመሰረት ዝኣተዎ ቃል ነበርቲ እታ ከተማ ተረባሕቲ ዝገብሩ ስራሕቲ እናሳለጠ ከምዝኾነ ከንቲባ እቲ ምምሕዳር ከተማ ኣዳነች ኣቤቤ ገሊፀን። ከንቲባ ኣዳነች ኣቤቤ ኣብ ክፍለ ከተማ ንፋስ ስልክ ላፍቶ ሳይት ጀርመን ኣደባባይ ከምኡ እውን ኣብ ክፍለ ከተማ ኮልፌ ቀራንዮ ሳይታት ግራርን ኣየር ጤናን ዝተሃነፁ ሓባራዊ መንበሪ ኣባይቲ መሪቐን። እዞም ኣብ ውሽጢ 9 ኣዋርሕ ብቕልጡፍን ብፅሬትን ኣብ 24 ህንፃታት ዝተሃነፁ ኣባይቲ፤ 1 ሽሕን 287 ዘበናዊ መንበሪ ኣባይቲ ከምዝኾኑ ገሊፀን። እቲ ምምሕዳር ከተማ ብሰብ ተኮር ስራሕቲ ንብርክት ዝበሉ ዜጋታት ወነንቲ መንበሪ ከምዝገበረ ብምግላፅ፤ እታ ከተማ ንነበርታ ምችውትን ሰሓቢትን ብምግባር ተመራፂ ስፍራ መንበሪ እናተፈጠረ እዩ ኢለን። እቲ ምምሕዳር ከተማ ብመሰረት ዝኣተዎ ቃል ነበርቲ እታ ከተማ ተረባሕቲ ዝገብሩ ስራሕቲ እናሳለጠ ከምዝርከብ እውን ኣረዲአን። ድሕሪ እቲ ሃገራዊ ለውጢ ልዕሊ 380 ሽሕ መንበሪ ኣባይቲ ከምዝተሃነፁ ብምሕባር፤ ድሌት መንበሪ ዜጋታት ንምምላእ ሕዚ እውን ምስ ውልቀ ሰብ ሃፍቲ ብዝበለፀ ንምስራሕ ፃውዒት ኣቕሪበን።  

ኣዲስ ኣበባ/ሕዳር 13/2018 (ኢዜኣ) ‘ዓብዪ ጉያ ኣብ ኢትዮጵያ’ኣዲስ ኣበባ መባፅሒ ቱሪዝምነታ ብዝበለፀ ኣብ ምዕባይ ልዑል ኣስተዋፅኦ ከምዘለዎ ቢሮ ኮሙኒኬሽን ምምዳር ከተማ ኣዲስ ኣበባ ገሊፁ። ውድድር 10 ኪሎ ሜትር’ዓብዪ ጉያ ኣብ ኢትዮጵያ'ፅባሕ ኣብ ኣዲስ ኣበባ ክካየድ እዩ። ሓላፊ ቢሮ ኮሙኒኬሽን ምምዳር ከተማ ኣዲስ ኣበባ ኣይተ ሃፍታይ ገብረእግዚአብሔር እቲ ውድድር ኣመልኪቶም ኣብ ዝሃብዎ መግለፂ፤ ‘ዓብዪ ጉያ ኣብ ኢትዮጵያ’ድምቀት እታ ከተማ እዩ ኢሎም። ብተወሳኺ እውን ንማሕበራዊ መስተጋብርን ሕብረትን ርኡይ ኣስተዋፅኦ ከምዘለዎ ተዛሪቦም። እቲ ውድድር ኣዲስ ኣበባ ንመላእ ዓለም ከላሊ ምፅንሑ ብምሕባር፤ ኣብ ቀፃሊ እውን እታ ከተማ መባፅሒ ቱሪዝምነታ ኣብ ምዕባይ ልዑል ኣስተዋፅኦ ከምዘለዎ ኣረዲኦም። ኣብታ ከተማ ንዓይኒ ሰሓብቲ ዝኾኑ ሰፋሕቲ መሰረተ ልምዓት ከምዝተሃነፁ ብምግላፅ፤ ተሳተፍቲ እቲ ውድድር እቶም መሰረተ ልምዓታት ንመላእ ዓለም ንከፋልጡ ፃውዒት ኣቕሪቦም።

ኣዲስ ኣበባ/ሕዳር 13/2018 (ኢዜኣ) ፖሊስ ኣዲስ ኣበባ ኣገልግሎቱ ምስ ዕቤት እታ ከተማ ኣጠዓዒሙ ንምዕባይ ብዘበናዊ ቴክኖሎጂን ብብቑዕ ሓይሊ ሰብን ናይ ምውዳብ ስርሑ ኣጠናኺሩ እናቐፀለሉ ከምዝኾነ ከንቲባ ምምሕዳር ከተማ ኣዲስ ኣበባ ኣዳነች ኣቤቤ ገሊፀን። ኮሌጅ ፖሊስ ላዕለዋይ መምርሒ ፖሊስ ኣዲስ ኣበባ ንፈለማ እዋን ብናይ ባዕሉ ዓቕሚ ዘሰልጠኖም ሕፁያት መኮንናት ኣመሪቑ። ኣብቲ ስነ ስርዓት ምረቓ፤ ከንቲባ ምምሕዳር ከተማ ኣዲስ ኣበባ ኣዳነች ኣቤቤ፣ምክትል ኮሚሽነር ጀነራል ፖሊስ ፌዴራል ኢትዮጵያ መላኩ ፈንታ፣ኣዛዚ ላዕለዋይ መምርሒ ፖሊስ ኣዲስ ኣበባ ኮሚሽነር ጌቱ ኣርጋውን ፃውዒት ዝተገበረሎም ኣጋይሽን ተረኺቦም። ከንቲባ ኣዳነች ኣቤቤ ኣብዚ እዋን ከምዝበልኦ፤ ቀንዲ ትኹረት እቲ ምምሕዳር ኢኮኖሚያዊ ዓቕሚ ነበርቲ እታ ከተማ ምህናፅን ማሕበራዊ ሂወት ብምምሕያሽ ዘላቒ ልምዓትን ሕቶታት ሰናይ ምምሕዳርን ብምምላስ ኩለ መዳያዊ ብልፅግና ምርግጋፅን እዩ። ላዕለዋይ መምርሒ ፖሊስ ኣዲስ ኣበባ ሰላምን ድሕንነት እታ ከተማ ንምርግጋፅ ዘሳልጦ ዘሎ ስራሕ ዝተባባዕ ከምዝኾነ ብምሕባር፤ እቲ ላዕለዋይ መምርሒ ኣብታ ከተማ ዘሎ ዕቤት ኣብ ግምት ብዘእተወ መልክዑ ኣገልግሎቱ ንምዕባይ ዓርሱ ብዘበናዊ ቴክኖሎጂን ብብቑዕ ሓይሊ ሰብን ናይ ምውዳብን ምጥንኻርን ስራሕቲ ከምዘሳለጠ ኣረዲአን። እዚ ስራሕ ድማ ተጠናኺሩ ከምዝቕፅል ኣረጋጊፀን።  

ኣዲስ ኣበባ/ሕዳር 13/2018(ኢዜሕ) ንመበል 25 ግዜ ዝተዳለወ ዓብዪ ጉያ ኣብ ኢትዮጵያ ካብ ፅባሕ ጀሚሩ ክሳብ ዝዛዘም ንተሽከርከርቲ ዝዕፀዉ መንገድታት ፖሊስ ከተማ ኣዲስ ኣበባ ኣፍሊጡ። ብርክት ዝበሉ ተሳተፍቲ ውሽጢ ሃገርን ወጻእን፣ኣምባሳደራት፣ዕዱማት ኣትሌታትን ዝርከብሉ መበገሲኡን መብፅሒኡን መሰቀል ኣደባባይ ዝገበረ ‘ዓብዪ ጉያ ኣብ ኢትዮጵያ’ ዘዳለዎ ውድድር ጉያ 14 ሕዳር 2018 ዓ/ም ኣብ ኣዲስ ኣበባ ክካየድ እዩ። እቲ ውድድር ተጀሚሩ ክሳብ ዝዛዘም ዝተወሰኑ መንገድታት ንተሽከርከርቲ ዕፁዋት ከምዝኾኑ ፖሊስ ኣዲስ ኣበባ ዕላዊ ገይሩ። ካብ ዕላማ እቲ ውድድር ወፃኢ ዘይሕጋዊ ስራሕትን መልእኽትታትን ምምሕልላፍ መንፈስ እቲ ውድድር ዝርብሽ ስለዝኾነ እቲ ኣዳላዊ ትካልን ተሳተፍትን ግቡእ ጥንቃቐ ንክገብሩ እውን ኣተሓሳሲቡ። ብመሰረት እዚ እውን እቲ ውድድር ተጀሚሩ ክሳብ ዝዛዘም ፡- ካብ ኦሎምፒያ ኣደባባይ ናብ መስቀል ኣደባባይ (ኦሎምፒያ ኣደባባይ) ካብ ጥላሁን ኣደባባይ ናብ ሳንጆሴፍ መብራት (ጥላሁን ኣደባባይ) ንከበድቲ ተሽከርከርቲ ኣጎና ሲኒማ ካብ ሕብረት ኣፍሪካ መብራት ናብ ሜክሲኮ ኣደባባይ (ጥይት ቤት መስቀለኛ ) ካብ ፓርላማ መብራት ናብ ኮንሰን መታጠፊያ (ፓርላማ መብራት ) ካብ ኮንሰን መታጠፊያ ናብ ገብርኤል (ኮንሰን መታጠፊያ) ካብ ጥይት ቤት ናብ ገብርኤል ብሕሪኡ(ጥይት ቤት መታጠፊያ) ካብ ሴቶች ኣደባባይ ናብ ካዛንቺስ (ሴቶች ኣደባባይ) ካብ ሴቶች ደባባይ ናብ ካዛንቺስ ቶታል (ሴቶች ኣደባባይ) ካብ 22 ኣደባባይ ወይ ድማ ዘሪሁን ህንፃ ናብ ዑራኤል ኣደባባይ (ዘሪሁን ህንፃ መስቀለኛ) ካብ ፒኮክ ሓዱሽ መንገዲ ናብ ዑራኤል ኣደባባይ (ፒኮክ መብራት) ካብ ጋዜቦ ኣደባባይ ናብ ደንበል (ጋዜቦ ኣደባባይ) ካብ ቂርቆስ ቤ/ክርስቲያን መስቀለኛ ናብ ለገሃር መብራት (ቂርቆስ ቤ/ክርሰቲያን ነርክ ተራ) ካብ ላንድ ማርክ ሆስፒታል መዕፀፊ ገነት ሆቴል ወይ ድማ ናብ ገነት መብራት (ላንድ ማርክ ሆስፒታል መስቀለኛ) ካብ ጠማማ ፎቅ ናብ ሜክሲኮ ኣደባባይ (ጠማማ ፎቅ መስቀለኛ) ካብ ኣፍሪካ ህብረት መብራት ናብ ሜክሲኮ ኣደባባይ (ሜክሲኮ ጥይት ፋብሪካ መስቀለኛ) ካብ ፈረሰኛ መብራት ናብ ጨፌ ሜዳ (ፈረሰኛ መብራት) ካብ ሞላ ማሩ መስቀለኛ ናብ ጌጃ ሰፈር (ጌጃ ሰፈር መስቀለኛ) ካብ ፍተኛ ፍ/ቤት ኣደባባይ ናብ ሜክሲኮ ኣደባባይ (ከፍተኛ ፍ/ቤት ኣደባባይ) ካብ ሠንጋ ተራ 40/60 ናብ ሠንጋ ተራ መብራት (ሠንጋ ተራ 40/60 መታጠፊያ) ካብ ጎማ ቁጠባ መብራት ናብ ብ/ቲያትር (ጎማ ቁጠባ መብራት) ካብ ሜትሮሎጂ መዕፀፊ ናብ ፖስታ ቤት መብራት (ሜትሮዎሎጂ መታጠፊያ) ካብ ጥቁር ኣንበሳ ሼል ናብ ኢምግሬሽን (ጥቁር ኣንበሳ ሼል) ካብ ጎላ ሚካኤል መስቀለኛ ናብ ኢምግሬሽን (ጎላ ሚካኤል መስቀለኛ) ካብ ቴዎድሮስ ኣደባባይ ናብ ኣገር አስተዳደር መብራት (ቴዎድሮስ ኣደባባይ) ካብ ንጉሆ ሰዓት 11:30 ጀሚሩ እቲ ውድድር ክሳብ ዝዛዘም እቶም ኣብ ላዕሊ ዝተገለፁ መንገድታት ከምዝዕፀዉን በቶም ዝተገለፁ መስመራት ካብ ቀዳም ምሸት ሰዓት 12፡00 ጀሚሩ መኪና ንሓፂር እዋን ይኹን ንነዊሕ እዋን ጠጠው ምባል ክልኩል ምዃኑ ፖሊስ ኣዲስ ኣበባ ገሊፁ። ኣገልግሎት ፖሊስ ንምርካብ 011 1110111 ወይ ድማ ነፃ መስመር ስልኪ 991 ምጥቃም ከምዝከኣል እውን ኣፍሊጡ።

ጂንካ/ሕዳር 12/2018(ኢዜኣ) ቫይረስ ማርበርግ ንምክልኻልን ንምቁፅፃርን ዝሳለጡ ዘለዉ ስራሕቲ ተጠናኺሮም ከምዝቕፅሉ ሚኒስትር ጥዕና ዶክተር መቅደስ ዳባ ገሊፀን። ሚኒስትር ጥዕና ዶክተር መቅደስ ዳባ ኣብ ሓፈሻዊ ሆስፒታል ጂንካ እቲ ቫይረስ ንዝተረኸበሎም ወገናት ዝተፈለዩ ማእኸላት ተዓዚበን። እተን ሚኒስትር ኣብዚ እዋን ከምዝበልኦ፤ እቲ ቫይረስ ንምክልኻልን ንምቁፅፃርን ዝሳለጡ ዘለዉ ስራሕቲ ተጠናኺሮም ክቕፅሉ እዮም። ኣብዚ ሕዚ እዋን ብቫይረስ ማርበርግ ዝተትሓዙ ሰለስተ ሰባት ጥራሕ ከምዝኾኑን ሕክምና እናተገበረሎም ከምዝርከብን ተዛሪበን። እቲ ቫይረስ ንከይስፋሕፋሕ እቲ ሕብረተሰብ መንገድታት መከላኸሊ ተግባራዊ ንክገብር እውን ኣተሓሳሲበን። ርእሰ ምምሕዳር ክልል ደቡብ ኢትዮጵያ ኣይተ ጥላሁን ከበደ ብግደኦም፤ ቫይረስ ማርበርግ ዝኸፍአ ሰብኣዊ ቅልውላው ንከየስዕብ ኩሎም ትካላት ዘሳተፈ ርብርብ እናተገበረ እዩ ኢሎም። እቲ ሕብረተሰብ ብሰብ ሞያ ጥዕና ዝወሃብ ምኽሪ ብኣግባቡ ተግባራዊ ብምግባር ዝርገሐ እቲ ቫይረስ ንምግታእ ኣብ ዝግበር ስራሕ ንክሕግዝ እውን ፃውዒት ኣቕሪቦም። ሓላፊ ቢሮ ጥዕና እቲ ክልል ኣይተ እንዳሻው ሽብሩ፤ ቫይረስ ማርበርግ ንምክልኻል መዳርግቲ ኣካላት ዘሳተፈ ዝተዋደደ ርብርብ እናተገበረን ነቲ ሕብረተሰብ እውን ስራሕ ምጭባጥ ግንዛበ ብሰፊሑ እናተሳለጠን ከምዝኾነ ተዛሪቦም። ሚኒስቴር ጥዕና እቲ ቫይረስ ንምክልኻል ዝሕግዙ ልዕሊ 18 ሚልዮን ብር ግምታዊ ዋጋ ዘለዎም ናውቲ ጥዕና ነቲ ሆስፒታል ደገፍ ከምዝገበረ ተገሊፁ።

ኣዲስ ኣበባ/ሕዳር 12/2018(ኢዜኣ) መዓልቲ ብሄር፣ብሄረ ሰባትን ህዝብታትን ኢትዮጵያ ሕብረ ብሄራዊ ሓድነት ብምጥንኻር ብልፅግና ሃገር ኣብ ምርግጋፅ ወሳኒ እጃም እናበርከተ ከምዝኾነ ኣፈ ጉባኤ ቤት ምኽሪ ምምሕዳር ከተማ ኣዲስ ኣበባ ቡዜና ኣልከድር ገሊፀን። ኣካል ኣከባብራ በዓል መበል 20 መዓልቲ ብሄር፣ብሄረ ሰባትን ህዝብታትን ኢትዮጵያ ዝኾነ ካብ ከተማ ኣዲስ ኣበባን ክልላትን ዝተውፃእፅኡ ተወከልቲ ኣብ ዝተረኸብሉ መድረኽ ህዝቢ ንህዝቢ ኣብ ከተማ ኣዲስ ኣበባ ይካየድ ኣሎ። ኣፈ ጉባኤ ቤት ምኽሪ ምምሕዳር ከተማ ኣዲስ ኣበባ ቡዜና ኣልከድር ኣብዚ እዋን ከምዝበልኦ፤ እዚ መዓልቲ ሕድ ሕዳዊ ርክብ ንምዕባይን ንምፍላጥን፣ብብርኪ ሃገር ዝሳለጡ ዘለዉ ውፅኢታት ልምዓት ንምዕዛብ ልዑል ኣስተዋፅኦ ኣለዎ። ጭቡጥ ውፅኢት ራኢ ብልፅግና ንምዕዛብን ልምድታት ንምልውዋጥን እቲ መድረኽ ከምዝተዳለወ እውን ሓቢረን። ኣብ ዝሓለፉ ዓማታት ለውጢ ኣብ ማሕበራዊ፣ኢኮኖሚያውን ፖለቲካውን ዓውድታት እታ ሃገር ዘፀብለልታ ከምዝተመዝገቡ ኣረዲአን። ልምዓት ሓባራዊ ፃዕሪ ከምዝደሊ ብምሕባር፤ ብፃዕሪ መንግስቲ ጥራሕ ዘይኮነስ ብተሳትፎ ህዝብታት እውን ከምዝረጋገፅ ተዛሪበን። መዓልቲ ብሄር፣ብሄረ ሰባትን ህዝብታትን ኢትዮጵያ ሕብረ ብሄራዊ ሓድነት ብምጥንኻር ንብልፅግና ሃገር ወሳኒ እጃም እናበርከተ ከምዝኾነ እውን ገሊፀን።

ኣዲስ ኣበባ/ሕዳር 11/2018(ኢዜኣ) ኣትሌቲክስ ዓለም ንዓወት ኦሎምፒክ ሻምበል ኣትሌት ኣበበ ቢቂላ 1960 ኣብ ሮምን 1964 ኣብ ቶኪዮን ከምኡ እውን ንዓብዪ ጉያ ኣብ ኢትዮጵያ ኣፍልጦን ኣርማ ክብርን ኣበርኪቱ። ክልቲኦም ኣፍልጦን ኣርማ ክብርን ኣብ ብሄራዊ ሙዜም ብኽብሪ ተቐሚጦም። እቲ ኣፍልጦን ኣርማ ክብርን እውን ዳይሬክተር ሓድጊ ኣትሌቲክስ ዓለም ክሪስ ተርነር ዘረከቡ እንትኸውን፤ ከንቲባ ምምሕዳር ከተማ ኣዲስ ኣበባ ኣዳነች ኣቤቤ፣ ሚኒስትር ቱሪዝም ሰላማዊት ካሳን ሻለቃ ኣትሌት ሃይሌ ገብረስላሴን ተረኪበምዎ። ኣትሌቲክስ ዓለም ንሻምበል ኣበበ ቢቂላን ዓብዪ ጉያ ኣብ ኢትዮጵያን ዝሃቦ ኣፍልጦን ኣርማ ክብርን ኣብ ታሪኽ ኣትሌቲክስ ዘይርሳዕ ኣሰር ንዘዕረፉ ዓበይቲ ውልቀ ሰባትን ስፍራታትን ዝህብ 'ሰሌዳ ሓድጊ ኣትሌቲክስ ዓለም' (World Athletics Heritage Plaque) እዩ። ኣትሌት ኣበበ ቢቂላ ንዓወት ስፖርት ኦሎምፒክ ጥራሕ ዘይኮነስ ንመላእ ኣፍሪካ ዓብይ ምልክት ኩርዓትን ነፃነትን እውን እዩ። ከንቲባ ምምሕዳር ከተማ ኣዲስ ኣበባ ኣብዚ እዋን ከምዝበልኦ፤ ኣትሌቲክስ ኢትዮጵያ ኣብ ኣደባባይ ዓለም ሓፍ ኢላ ክትረአ ገይሩ እዩ። ሻምበል ኣትሌት ኣበበ ቢቂላ ኣብ 1960 ኦሎምፒክ ሮም ብባዶ እግሩ ብምሽናፍ ንኣፍሪካን ፀለምቲ ህዝብታትን ዘኹርዐ ከምዝኾነ ብምሕባር፤ ኣብ 1964 ኦሎምፒክ ቶኪዮ እውን እቲ ዓወት ብምድጋም ዘመዝገቦ ዘደንቕ ዓወት እዩ ኢለን። ናቱ ፈለግ ብምኽታል እውን ብርክት ዝበሉ ኣትሌታት ሰንደቕ ዓላማ ኢትዮጵያ ብክብሪ ሓፍ ከምዘበልዎ ተዛሪበን። ‘ዓብዪ ጉያ ኣብ ኢትዮጵያ’ ካሊእ ድምቀት ከተማ ኣዲስ ኣበባን ንብርክት ዝበሉ ዘሳትፍን ከምዝኾነ ዝገለፃ እተን ከንቲባ፤ ንናይ ክልቲኦም ኣፍልጦን ክብርን ዝተሰመዐን ሓጎስ እውን ገሊፀን። ሚኒስትር ቱሪዝም ሰላማዊት ካሳ ብግደአን፤ ዓብዪ ጉያ ኣብ ኢትዮጵያ ሓደሽቲ ኣትሌታት ካብ ምፍራይ ብተወሳኺ ንዕቤት ዓውዲ ቱሪዝም ዓብይ ኣስተዋፅኦ ከምዘበርከተ ሓቢረን። እቲ ኣፍልጦ ንዝበለፀ ዓወት ዘለዓዕል ከምዝኾነ እውን ተዛሪበን። ን’ዓብዪ ጉያ ኣብ ኢትዮጵያ’ ዝተውሃበ ኣፍልጦን ክብርን ኣብ ኣፍሪካ ፈላማይ ከምዝኾነ እውን ኣረዲአን።  

ኣዲስ ኣበባ/ሕዳር 10/2018 (ኢዜኣ) ቀዳማይ ሚኒስትር ማሌዢያ ዳቶ ሴሪ ኣንዋር ኢብራሂም መዘከርታ ዓወት ዓድዋ ጎብንዮም። ከንቲባ ምምሕባር ከተማ ኣዲስ ኣበባ ኣዳነች ኣቤቤ፤ ቀዳማይ ሚኒስትር ማሌዢያ ዳቶ ሴሪ ኣንዋር ኢብራሂም ኩርዓት መላእ ፀለምቲ ህዝብታት ንዝኾነ መዘከርታ ዓወት ዓድዋ ምጉብናዮም ገሊፀን። እተን ከንቲባ፤ ቀዳማይ ሚኒስትር ማሌዢያ ኣብ ምድረ ቀዳሞት ኢትዮጵያ ከምኡ እውን ኣብ ኣዲስ ኣበባ ዝገብርዎ ፃንሒት ውፅኢታዊ ንክኸውን ብሽመይን ብሽም እቲ ምምሕዳር ከተማን ይምነ ኢለን።  

ኣክሱም/ሕዳር 9/2018(ኢዜኣ) ተምሃሮን ማሕበረሰብ ትምህርትን ዩኒቨርሲቲ ኣኽሱም ዝባፅሑ ዝራእቲ ሓረስቶት ኣኪቦም። ኣብ ዩኒቨርሲቲ ኣክሱም ዳይሬክተር ኣገልግሎት ማሕበረሰብ በርሀ ታፈረ (ዶ/ር)፤ እቲ ዩኒቨርሲቲ ካብ ምምሃርን ምስትምሃርን ብተወሳኺ ኣብ ኣገልግሎት ማሕበረሰብ ንቑሕ ተሳትፎ እናገበረ ከምዝርከብ ሓቢሮም። ብመሰረት እዚ እውን ኣብ እዋን ክረምቲ ዝለምዐ ኣዝመራ ሓረስቶት እቲ ከባቢ እዋኑ ብዘይሓለወ ዝናብ ንከይበላሾ ተምሃሮን ሓፈሻዊ ማሕበረሰብ ተምህርትን እቲ ዩኒቨርሳቲ ብወፍሪ ስራሕ ምእካብ ዝባፅሑ ዝራእቲ ኣሳሊጦም ኢሎም። ኣብቲ ወፍሪ እውን ካብ 7 ክሳብ 9 ሕዳር 2018 ዓ/ም ኣብ ወረዳታት ላዕላይን ታሕታይን ማይጨው ዝባፅሑ ዝራእቲ ምእካብ ከምዝተኽኣለ ተዛሪቦም። ኣብቲ ወፍሪ ናይ ጉዱኣት ኣካልን ዓቕሚ ዘይብሎምን ወገናት ዝራእቲ ከምዝተኣከበ ብምሕባር፤ እቲ ዩኒቨርሲቲ ኣብቲ ወፍሪ ንዝተሳተፉ ነበርቲ እቲ ከተማ እውን ነፃ ኣገልግሎት መጓዓዝያ ምሃቡ ኣብራህሪሆም።  

እቲ ሕማም ምስ ደም፣ ሽንቲ፣ ንብዓትን ካልኦት ፈሰስቲን ዝፍጠር ቀጥታ ምንኽኻእ፣ ብዝሓመመ ወይ እውን ብዝሞተ ሰብ ሰውነት ፈሳሲ ዝተበከሉ ናውቲ (ከም ክዳን፣ ኮቦርታ፣ መርፍእን ካልኦት መገልገሊታትን) ብዝግበር ምንኽኻእ፣ ብኸመይ ከ ምክልኻል ይከኣል ዝተዘርዘሩ ምልክታት እንተጋጥሙ ብህፁፅ ናብ ትካላት ሕክምና ምኻድ፣ ምስ ዝሓመመ ሰብ ምንኽኻእ እንተነይሩናን ትኩሳት እንተሃሊዩን ብቕልጡፍ ናብ ትካላት ጥዕና ምኻድ፣ ሞት ኣብ ዘጋጥመሉ እዋን እቲ ኣስከሬን ብሰብ ሞያ ምስንዳእን ምቕባርብ፤ ዘየድሊ ስነ ስርዓት ቀብሪ ክተርፍ ምግባርን ምንኽኻእ ዘለዎም ናውቲ ምውጋድን፣ ካብ ዝሓመመ ሰብ ምንኽኻእ ደምን ፈሳሲን ምርሓቕ፣ ንዝሓመመ ሰብ ክንክን ኣብ ንገብረሉ እዋን ሜላታት መከላኸሊ ማለት እውን ናይ ኣፍን ኣፍንጫን መሸፈኒ ማስክን ናይ ኢድ ጓንትን ምጥቃም፣ ኢድ ብሳኒታይዘር ወይ እውን ብሳሙናን ማይን ብግቡእ ምሕፃብ ከምዝግባእ ሓበሬታ ሚኒስቴር ጥዕና የመላኽት።

ምልክታት ማርበርግ ቫይረስ እንታይ እዮም ?   ካብ ኣፍ ፣ካብ ኣፍንጫ ወይ ካዓ ካብ ቆርበት ሱር ደም ምፍሳስ ፤ ልዑል ረስኒ፣ቑሩ ቑሪ ምባልን ሕማም ርእስን፤ ሕማም ጭዋዳን ሕቖን፤ ዕውልውል ምባል ፤ሕማም ቆርበትን ውፅኣትን ፤ ኣብ ኣፍ ልቢ፣ድሕሪትን ከብድን ኣዝዩ ጎሊሁ ዝረአ ሽፍታ፤

ኣዲስ ኣበባ/ሕዳር 8/2018(ኢዜኣ) ኣብ ክልል ደቡብ ኢትዮጵያ ዘጋጠመ ቫይረስ መርበርግ ንምቁፅፃር ብምውዳድ እናተሰርሐ ከምዝኾነ ሚኒስቴር ጥዕና ኣፍሊጡ። ሚኒስትር ጥዕና ዶክተር መቅደስ ዳባ ኣብ እዋናዊ ጉዳያት ጥዕና ኣመልኪተን ጋዜጣዊ መግለፂ ሂበን። ኣብ መግለፂአን እውን ኣብ ኢትዮጵያ ካብ 3 ሕዳር 2018 ዓ/ም ጀሚሩ ኣብ ክልል ደቡብ ኢትዮጵያ ከተማ ጂንካ ቫይረስ ማርበርግ ከምዘጋጠመ ተዛሪበን። በዚ ድማ ክሳብ ሕዚ ናይ 17 ሰባት ናሙና ብባዕላዊ ዓቕሚ ላብራቶሪ ከምዝተመርመሩ ብምሕባር፤ ካብዚኣቶም ድማ ኣብቶም 3 ሰባት እቲ ቫይረስ ከምዝተረኸበ ከምዝተረጋገፀ ሓቢረን። ሂወት በቲ ሕማም ምትሓዞም ዝተረጋገፁ ሰባት ምሕላፉ እውን ገሊፀን። ምስ በቲ ሕማም ዝተትሓዙ ሰባት ንኽክእ ዘለዎም ሰባት ብምፍላይ ስራሕቲ ክትትል እናተሰርሑ ከምዝኾነ እውን ኣረዲአን። እዚ ቫይረስ ንምቁፅፃር ስራሕቲ ምድላውን ምውዳድን እናተሳለጡ ከምዝኾኑ ዝገለፃ እተን ሚኒስትር፤ ግብረ ሓይሊ ወሃቢ ኣገልግሎት ብምጥያሽ እቲ ሕማም ናብ ዝተርኣየሉ ከባቢ ተላኢኹ እዩ ኢለን። ኢትዮጵያ ኣብዚ ሕዚ እዋን ናይዚ ሕማም ናሙና ናይ ምምርማርን ምፍላይን ዓቕሚ ከምዘለዋ ብምግላፅ፤ ኣብ ዝተፈላለዩ ትካላት ጥዕና ስራሕቲ ቅድመ ምድላው ብምውዳድ እናተሰርሑ ከምዝኾኑ ተዛሪበን። በዚ ድማ ኣብቲ ከባቢ ኣብ ዘለዉ ትካላት ጥዕና መፅንሕን መሐከምን ማእኸላት ናይ ምጥያሽ ስራሕቲ እናተሳለጡ እዮም ኢለን። በቲ ሕማም ምስ ዝተትሓዘ ሰብ ብዘሎ ንኽክእን ብካልኦት መንገድታትን ዝመሓላለፍ ሕማም ስለዝኾነ ጥንቃቐ ምግባር ከምዝግባእ ኣተሓሳሲበን። እቲ ሕብረተሰብ ኢዱ ብሳሙና ናይ ምሕፃብን ፅሬት ናይ ምሕላውን ስራሕቲ ከጠናኽር ከምዘለዎ እውን ገሊፀን። ኣብዚ ሕዚ እዋን ኣብ ውሽጢ ግዝያዊ መፅንሒ ሰብ ከምዘየለ ብምሕባር፤ ተንቀሳቓሲ ላብራቶሪ ናብ ከባቢ ጂንካ ከምዝተልኣኸ ተዛሪበን።

ኣዲስ ኣበባ/ሕዳር 6/2018(ኢዜኣ) ከንቲባ ምምሕዳር ከተማ ኣዲስ ኣበባ ኣዳነች ኣቤቤ ስራሕ ህንፀት ምስፍሕፋሕ ሆስፒታል መዘከርታ ዘውዲቱ ሎሚ መሪቐን ንኣገልግሎት ክፍቲ ገይረን። እተን ከንቲባ ኣብዚ እዋን፤ ኣብ ሆስፒታል መዘከርታ ዘውዲቱ ንሓዱሽ ሆስፒታል ዝመጣጠን ምስፍሕፋሕ ብምህናፅን ዘበናዊ መሳርሕታት ሕክምና ብምምላእን ስራሕ ምጀማሩ ሓቢረን። እቲ ዝተሃነፀ ሆስፒታል፤ ላዕለዋይ ማእኸል ሕክምና፣ኣብ ልዕሊ 1 ሽሕን 800 ካ/ሜ ዝዓረፈን በዓል 10 ደብሪ ህንፃን እንትኸውን ንደቂሶም ዝሕከሙ ተሓከምቲ ኣገልግሎት ዝህብ 320 ዓራት ዝሓዘ ከምዝኾነ ኣረዲአን። እቲ ሆስፒታል እቲ ምምሕዳር ከተማ ንከተማ ኣዲስ ኣበባ ማእኸል ቱሪዝም ሜዲካል ንምግባር ንዝጀመሮ ስራሕ ተወሳኺ ዓቕሚ ከምዝፈጥር እውን ተዛሪበን።  

ኣዲስ ኣበባ/ሕዳር 5/2018(ኢዜኣ) ብመንግስቲ፣ ህዝብን ሰብ ሃፍትን ንዝሳለጡ ስራሕቲ ልምዓት ምድጋፍን ምክንኻንን እቲ ዝድለ ብልፅግና ንምምፃእ ከምዘኽእል ምክትል ቀዳማይ ሚኒስትር ተመስገን ጥሩነህ ገሊፆም። እቶም ምክትል ቀዳማይ ሚኒስትር ኣብ ማሕበራዊ ምትእስሳር ገፆም ኣብ ዘመሓላለፍዎ መልእኽቲ፤ ብዘይ ፍልጠት ዝስራሕ ሃገር የለን ኢሎም። ጎና ጎኒ ፕሮጀክት’ገበታ ለትውልድ’ሃይቅ ብበዓል ሃፍቲ በላይነህ ክንዴ ዝተሃነፀ “ገበታ ለትውልድ ሃይቅ ቁፅሪ 1 ቀዳማይን ማእኸላይን ብርኪ ቤት ትምህርቲ” ምዕዛቦም ሓቢሮም። ዝፈረሰ ቤት ትምህርቲ ጭቃ ይሰርሐልና ኢሉ ማሕበረሰብ እቲ ከባቢ ንዓመታት ዝሓተቶ ሕቶ ኣይተ በላይነህ ክንዴ ከምዝመለስዎ ብምሕባር፤ ነዚ ድማ ልዑል ምስጋና ከቕርብ ይፈትው ኢሎም። ልምዓት ውፅኢቱ ብዙሕ መልክዕ እዩ ዘለዎ ዝበሉ እቶም ምክትል ቀዳማይ ሚኒስትር፤ ኣብ ሓደ ከባቢ ዝግበር ዝኾነ ዓይነት ልምዓት እንተደጊፍናዮን እንተተኸናኺንናዮን ነቲ ከባቢ ከምዝቕይሮ ገሊፆም። ህዝቢ ከባቢ ሃይቅ ዝስራሕ ፕሮጀክት ‘ገበታ ለትውልድ' ብምድጋፉን ሰላሙ ብምሕላዉን ህንፀት ቤት ትምህርቲ ከምዘወሰኸ እውን ፀሪሖም። ሎሚ መዓልቲ ካብ ቤተ መፅሓፍቲ ኣብርሆት ዝተረኸቡ 4 ሽሕን 250 መፅሓፍቲ ንቤተ መፅሓፍቲ እቲ ቤት ትምህርቲ ከምዘረከቡ ብምግላፅ፤ እዚ ድማ ትሩፋት እቲ ልምዓትን ሰላምን እዩ ኢሎም። በቢከባቢኡ ብመንግስቲ፣ህዝብን ሰብ ሃፍትን ዝሳለጡ ስራሕቲ ልምዓት ብምክንኻን፣ብምድጋፍ፣ዕንቅፋታት ብምልዓልን ንክዕወቱ ኣብ ጎኖም ጠጠው ብምባልን ብዙሕ ኣትረፍቲ ምዃን ንኽእል ኢና ክብሉ እውን ገሊፆም። ከም ኣይተ በላይነህ ክንዴ ዝበሉ ማሕበራዊ ሓላፍነቶም ብምውፃእ ማሕበራዊ ፀገማት ዝፈትሑ ሰብ ሃፍቲ ብዝበዝሑ ቁፅሪ ብልፅግናና ቅልጡፍ ይኸውን ኢሎም። ከም ህዝቢ ከባቢ ሃይቅ ልምዓትን ሰላምን ዝከናኸን ማሕበረሰብ እናበዝሐ ብዝመፀ ቁፅሪ ፀገማት ታሪኽ ከምዝኾኑ እውን እቶም ምክትል ቀዳማይ ሚኒስትር ሓቢሮም።

ኣዲስ ኣበባ/ሕዳር 5/2018(ኢዜኣ) መበል 20 መዓልቲ ብሄር፣ብሄረሰባትን ህዝብታትን ሕብረ ብሄራዊ ሓድነት ኢትዮጵያ ንመላእ ዓለም እነርእየሉ እዩ ክብሉ ኣፈ ጉባኤ ቤት ምኽሪ ፌዴሬሽን ኣገኘሁ ተሻገር ገሊፆም። መበል 20 መዓልቲ ብሄር፣ብሄረሰባትን ህዝብታትን''ዴሞክራሲያዊ ምርድዳእ ንሕብረ ብሄራዊ ሓድነት''ኣብ ትሕቲ ዝብል መሪሕ ሓሳብ ኣብ ክልል ማእኸላይ ኢትዮጵያ ከተማ ሆሳእና ክኽበር እዩ። መድረኽ ግምገማ ምድላውን ኣከባብራን መበል 20 መዓልቲ ብሄር፣ብሄረሰባትን ህዝብታትን ኢትዮጵያ ተሳሊጡ። ኣብቲ መድረኽ ግምገማ፤ ኣፈ ጉባኤ ቤት ምኽሪ ፌዴሬሽን ኣገኘሁ ተሻገር፣ርእሰ ምምሕዳር ክልል ማእኸላይ ኢትዮጵያ እንደሻው ጣሰው (ዶ/ር)፣ላዕለዎት ኣመራርሓ እቲ ክልል፣ዓብይ ኮሚቴ ቤት ምኽሪ ፌዴሬሽንን ትካላት ፌዴራልን ተረኺቦም። ኣፈ ጉባኤ ቤት ምኽሪ ፌዴሬሽን ኣገኘሁ ተሻገር ኣብዚ እዋን፤ ክልል ማእኸላይ ኢትዮጵያ እቲ በዓል ብዋንነት ሒዙ ብድሙቕ ንምኽባር ዝነኣድ ምድላው ከምዝገበረ ሓቢሮም። እቲ በዓል ሕብረ ብሄራዊ ሓድነት ኢትዮጵያ ንመላእ ዓለምን ኢትዮጵያውያንን እነርእየሉ እዩ ዝበሉ እቶም ኣፈ ጉባኤ፤ እቲ በዓል ብዕዉት ኩነታት ንምኽባር ዘኽእሉ ዝተረፉ ስራሕቲ ንክዛዘሙ ኣንፈት ከምዝተቐመጠ እውን ተዛሪቦም። ሓድነት እቲ ህዝቢ ብምጥንኻር ፀጋታት ምክእኣልን ምክብባርን ንክጠናኸሩ እቲ በዓል ልዑል ኣስተዋፅኦ ከምዘበርክት ዝገለፁ ርእሰ ምምሕዳር ክልል ማእኸላይ ኢትዮጵያ እንደሻው ጣሰው (ዶ/ር)፤ ኣጋይሽ ብኣግባቡ ተቐቢሉ እቲ በዓል ሕብረ ብሄራዊ ሓድነት መሰረት ገይሩ ንክኽበር መንግስትን ህዝብን እቲ ክልል እኹል ምድላው ከምዝገበረ ኣረዲኦም። እቶም ዝተረፉ ምድላዋትን ስራሕቲ ልምዓትን ኣብ ውሽጢ 15 መዓልትታት ምዝዛም ከምዝከኣል እውን ኣረጋጊፆም።

ኣዲስ ኣብአባ/ሕዳር 4/2018(ኢዜኣ) ብልዑል ሃፍቲ ዝህነፁ መሰረተ ልምዓታት መንገዲ ካብ ስልሒት ምህንድስና ንላዕሊ ብስምዒት ዋንነት ሕብረተሰብ ምሕላው ከምዝግባእ ዋና ዳይሬክተር በዓል መዚ ምምሕዳር መንገድታት ኢትዮጵያ ኢንጅነር መሐመድ ኣብዱራህማን ገሊፆም። ሃገር ብጥበብ ዝብል ወርሓዊ መድረኽ ኪነ ጥበብ ናይ ኢትዮጵያ ዜና ኣገልግሎት (ኢዜኣ)"ፍኖት ናብ ብልፅግና" ኣብ ትሕቲ ዝብል መሪሕ ሓሳብ ምስ በዓል መዚ ምምሕዳር መንገድታት ኢትዮጵያ ብምትሕብባር ተኻይዱ። ኣብቲ መድረኽ፤ ኣብ ቤት ፅሕፈት ቀዳማይ ሚኒስትር ሚኒስትር ማእኸል ምትሕብባር ህንፀት ስርዓት ዲሞክራስን ኣካቢ ቦርድ ኢዜኣን ቢቂላ ሁሪሳ (ዶ/ር)፣ ዋና ፈፃሚ ስራሕ ኢዜኣ ሰይፈ ደርቤ፣ሰብ ሞያ ኪነ-ጥበብን ዕዱማት ኣጋይሽን ተረኺቦም። ኣብቲ መድረኽ ዝተረኸቡ ዋና ዳይሬክተር በዓል መዚ ምምሕዳር መንገድታት ኢትዮጵያ ኢንጅነር መሐመድ ኣብዱራህማን ከምዝበልዎ፤ ኪነ ጥበብ ትኽክለኛ ስምዒትን ድሌትን ህዝቢ ዝንፀባረቐሉ ስራሕ እዩ። ፕሮጀክት ልምዓት መንገዲ ንኢኮኖሚያውን ማሕበራውን ምንቅስቓስ ልምዓት ከም ወሳኒ መሳርሒ ኮይኑ ዘገልግል ዓውዲ መሰረተ ልምዓት እዩ ኢሎም። ተሳትፎ ሓለዋ ድሕንነት መንገዲ እቲ ሕብረተሰብ እውን ዘላቕነት መሰረተ ልምዓት ንምርግጋፅ ርኡይ ኣስተዋፅኦ ከምዘለዎ ተዛሪቦም። ኣብ ኢትዮጵያ ብልዑል ወፃኢ ዝህነፁ መሰረተ ልምዓታት መንገዲ ማሕበራውን ኢኮኖሚያውን ተረባሕነት ዜጋታት ብምርግጋፅ ጉዕዞ ብልፅግና ኢትዮጵያ እናሳለጡ ከምዝርከቡ እውን ሓቢሮም። መሰረተ ልምዓታት መንገዲ ብዘላቕነት ንምጥቃም እቲ ሕብረተሰብ ከም ናይ ባዕሉ ንብረት ንክከናኸን ብጥበብ ዝተደገፉ ስራሕቲ ምጭባጥ ግንዛበ ወሰንቲ እዮም ኢሎም።

ኣዲስ ኣበባ/ሕዳር 4/2018 (ኢዜኣ) ጠንቂ ጎንፅታትን ዘይምርድዳእን ብምኽክር ንምፍታሕ ብሓባር ክንሰርሕን ኣብታ ሃገር ንዘላቒ ሰላምን ሃገራዊ ምርድዳእን ብሓባር ምትጋህ ይግባእ ክብል ቤት ምኽሪ ትካላት ሃይማኖት ኢትዮጵያ ገሊፁ። "ሃይማኖታት ንሰላም፣ሓድነትን ሕብረትን"ኣብ ትሕቲ ዝብል መሪሕ ሓሳብ ኣብ ከተማ ኣርባ ምንጭ ንክልተ መዓልታት ዝተኻየደ 5ይ ሃገራዊ ዋዕላ ሰላም ተዛዚሙ። ዋና ፀሓፊ ቤት ምኽሪ ትካላት ሃይማኖት ኢትዮጵያ ሊቀ ትጉሃን ቀሲስ ታጋይ ታደለ ኣብቲ ዋዕላ ኣብ ዝሃብዎ መብርሂ፤ ክብርታት ምትሕብባር፣ምትሕግጋዝን ምክብባርን ዝፀንሑን ሕዚ እውን ዘለዉን ሃፍቲ ኢትዮጵያውያን እዮም ኢሎም። ስለዝኾነ ድማ ክብርታታ ብምዕቃብን ሃገራዊ ሓድነትን ምትሕብባርን ብምጥንኻርን ምልክት ብዙሕነት ዝኾነት ሃገር ናብ ቀፃሊ ወለዶ ንምውራስ ናይ ኩላትና ሓላፍነትን እምነትን እዩ ክብሉ እውን ሓቢሮም። ብፍላይ ድማ ትካላት ሃይማኖት ኣብ ህንፀት ሰላም ብምስራሕ ሰናይነት ብምምሃርን ተሳትፎ ዜጋታት ኣብ ዕቤት ሃገር ንምጥንኻርን ሓላፍነት ከምዘለዎም ኣረዲኦም። ስለዝኾነ እውን ጠንቅታት ጎንፅን ዘይምርድዳእን ብምኽክርን ምርድዳእን ካብ መሰረቱ ብምፍታሕ ንዘላቒ ሰላም ሃገርን ብሄራዊ ምርድዳእን ክንተግህ ይግባእ ኢሎም። ሚኒስትር ዴኤታ ሚኒስቴር ሰላም ዶክተር ኬይረን ተዘራ ብግደኦም፤ ተጠቃምነት ህዝቢ ንምርግጋፅን ዕብየትን ብልፅግናን ሃገርና ንምግሃድን ኣብ ዝተፈላለዩ ዓውድታት ዝተጀመሩ ፕሮጀክትታት ልምዓት ተስፋ ዘለዎም ምዃኖም ገሊፆም። ስለዝኾነ እውን እዞም ፕሮጀክትታት ዕዉታት ንኽኾኑ ኣብ ኩሎም ከባብታት ዘተኣማምን ሰላምን ምርግጋዕን ምፍጣር፣ኣብ መስርሕ ልምዓትን ህንፀት ሃገርን ብንጥፈት ምስታፍን ንተግባራዊነቱ ድማ ፃዕሪ ምግባርን ናይ ኩላትና ሓላፍነት እዩ ክብሉ ገሊፆም። ርእሰ ምምሕዳር ክልል ደቡብ ኢትዮጵያ ጥላሁን ከበደ፤ ጉዳይ ሰላም መሰረት ኩሉ ስለዝኾነ ብምክብባር፣ ምትሕብባር፣ሕድ ሕዳዊ ምትሕግጋዝን ሃገራዊ ሓድነት ብምጥንኻርን ንልምዓትን ብልፅግናን ሃገር ክንሰርሕ ትፅቢት ይግበረልና ኢሎም። ኣብቲ ንተኸታተልቲ ክልተ መዓልታት ኣብ ከተማ ኣርባ ምንጭ ዝተኻየደ ዋዕላ ካብ ኩለን ዞባታትን ክልተ ምምሕዳራት ከተማን ዝተውፃእፅኡ ኣባላት ጉባኤ ሃይማኖት፣ላዕለዎት ሓለፍቲ ስራሕ መንግስቲ፣ዓበይቲ ዓድን ዕዱማት ኣጋይሽን ተረኺቦም።