Dhiiga Tola Ooltummaan arjoomnu ciminaan ittifufna-Barattoota Yuunivarsiitii Amboo

Hagayya 08/2017(TOI)-Tola ooltummaan dhiiga arjoomuun boqonnaa sammuu guddaa kan kennu waan ta’eef  gocha namoomaa kana cimsinee itti fufsiisna  jedhan   Barattootni Yuunivarsiitii Amboo dhiiga arjooman.  

 Sagantaan dhiiga Arjoomuu har’a Yuunivarsiitii Ambootti gaggeeffameera. 

 Barattoonni Yuunvarsiitii wayita kana TOI’ yaada kennan akka jedhanitti , dhiiga arjoomuun  lubbuu  baraaruun hojii boqonnaa sammuu guddaa  namaaf kennudha jedhaniiru.

Kanneen dhiiga arjooman keessaa  Barattuu Amartii Marabuu,  lammiilee hanqina dhiigaan miidhaaf saaxilaman deeggaruuf  yeroo adda addaatti dhiiga arjoomuu ishee dubbatteetti.

Dhiigni arjoomtu lammiilee dahumsaan, balaa tasaan, akkasumas dhukkuboota adda addaan rakkataniif deeggarsa guddaa waan ta’eef  dhiiga arjoomuu akka itti fuftu dubbatteetti.

Barataa Faasikaa Bashaa, dhiiga arjoomuun boqonnaa sammuu guddaa kan namaaf kennu waan ta’eef hiriyoota isaa waliin ta’uun hirmaachaa akka jiru dubbateera. 

Keessumaa du’a haadholii sababa dahumsaan mudatu hir’isuuf  dhiigni barbaachisaa ta’uu hubachuun dhiigaa tola ooltummaan arjoomamu akka jabeessu ibseera.
 

Dhiiga Arjoomuun kennaa guddaa lubbuu namaa baraaru waan ta’eef dhiigaa arjoomuu irratti hirmaachaa jiraachuu kan ibse immoo barataa Taajuddiin Mahaammadi.

Kanneen biroonis hojii gaarii kana irratti hirmaachuun lubbuu lammiilee baraaruuf  qodasaanii bahu akka qaban dubbateera.

Itti Gaafatamaan Baankii Dhiigaa fi Tiishuu  Amboo  Obbo Alamaayyoo Qajeelaa  gamasaaniin, Godinichatti namoota tola ooltummaan dhiigaa arjooman irraa  bal’inaan walitti qabamaa  jiraachuu ibsaniiru.

Yuunivarsiitii Amboo waliin qindoomuun   tola ooltota dhiiga arjooman  irraa dhiigaa walitti qabaa jiraachuu isaanii ibsuun, barattoonni yuunivarsiitii waggaatti yeroo Afur dhiiga Arjoomu jedhaniiru.

Ganna kanas tola ooltota dhiiga arjoman irraa dhiiga yuunitii kuma sadii walitti qabuuf xiyyeffannoon hojjetamaa jira jedhaniiru.