Deeggarsi Dhaabbilee Wal’aansaaf taassifamu Milkaa’ina tajaajila Fayyaatiif Gumaacha guddaa qaba-Biiricha - ENA Afaan Oromoo
Deeggarsi Dhaabbilee Wal’aansaaf taassifamu Milkaa’ina tajaajila Fayyaatiif Gumaacha guddaa qaba-Biiricha

Hagayya 01/2017(TOI)-Deeggarsi Dhaabbilee wal’aansaa naannichaaf taassifamu tajaajila fayyaa milkeessuuf gumaacha akka qabu Biiroon Fayyaa Naannoo Oromiyaa beeksise.
Dhalattoonni Naannicha biyya Alaa fi biyya keessaa jiran deeggarsa meeshaalee wal’aansaa adda addaa birrii miiliyoona 90 olitti tilmaamamu Godina Harargee Lixaatti kan argamu Hospitaala Asaboof arjoomaniiru.
Sagantaa wal-harkaa fuudhinsa deeggarsichaa irratti kan argaman Itti Aanaan Itti Gaafatamaa Biiroo Fayyaa Oromiyaa Dr. Bokonaa Guutaa, Deeggarsi dhaabbilee wal’aansaaf taassifamu tajaajila fayyaa Milkeessuuf gumaacha guddaa qaba jedhaniiru.
Mootummaan Naannichaa Dhaabbilee fayyaa babal’isuu, dhiheessii qorichaa fooyyessuu fi hojii ogeeyyii fayyaa waliin gahuu xiyyeeffannoon raawwachaa jiraachuu ibsaniiru.
Mootummaan Naannichaa milkaa’ina hojii walii galaa damee fayyaan taassisu qaamoleen qooda fudhattootaa deeggarsa godhan akka cimsan waamicha dhiheessaniiru.
Itti Gaafatamaan Qajeelcha Fayyaa Godina Harargee Lixaa Ahimaddiin Mahaammad meeshaaleen wal’aansaa kunneen siree wal’aansa baqaqsanii hodhuu, qorannoo dhukkubaa, fi tajaajila wal’aansa dhukkubsattoota ciisaanii waldhaanamanii akka keessatti argamu ibsaniiru.
Keesumaa Dhalattooni Godinichaa Biyya Alaa jiraatan deeggarsa meeshaalee wal’aansaa yeroo yerootti taassisan dhaqqabamummaa tajaajila fayyaa babal’isuuf gumaacha olaanaa taassisaa jiraachuu ibsaniiru.
Hanga ammaatti Godinichatti deeggarsi meeshaalee wal’aansa adda addaa Daaroo Labuu, Hirnaa fi Hospitaala Baddeessaaf birrii miiliyoona 250 olitti tilmaamamu taassisuu dubbataniiru.
Deeggarsi hospitaala Asabootiif taassifame hawaasa naannichaaf tajaajila wal’aansaa guutuu kennuuf kan gargaaru ta’uu ibsuun, qaamolee deeggarsa taassisan galateeffataniiru.