Naannoo Oromiyaatti Tajaajilli tola ooltummaa Gannaa dameelee 14’n raawwatamaa jira

Adoolessa 30/2017(TOI)-Naannoo Oromiyaatti Tajaajilli tola ooltummaa Gannaa damee 14’n  raawwatama jiraachuu Biiroon Dargaggoo fi Ispoortii Naannichaa beeksise.

 Biirichatti Daarektarri Qindeessaa DargaggootaTola ooltotaa Obbo Amiinoo Amaan TOI’f akka ibsanitti, Tajaajilli tola ooltummaa bara kanaa naannichatti bakeewwan hundatti   raawwatamaa jira.

Sagantichi damee 14 fi tarreeffama hojii 35 irratti xiyyeeffachuun raawwatamaa kan jiru yoo ta’u, damichi jireenya hawaasaa kan fooyyessanii fi misooma fulla’aa mirkaneessuuf kan gargaarudha jedhaniiru.

Biqiltuuwwan ammaan dura sagantaa Ashaaraa Magariisaan dhaabbaman kunuunsuun, Dhiiga Arjoomuu, mana harka qal’eeyyii haaressuu fi marii ijaarsa nageenyaa fi godaansa seeraan Alaa ittisuurratti xiyyeeffatan, haala fayyaa dahumsaa irraatti hubannaa uumuun  tajaajila tola ooltummaan hojiiwwan raawwataman  keessaa ta’uu ibsaniiru. 

Sochii baatii tokko keessatti hanga ammaan naannoolee hundatti  biqiltuuwwan dhaabbachaa kan jiran yoo ta’an, Ijaarsi mana  harka qal’eeyyii  kuma 4 fi  500  ol  raawwatamaa jira. 

Kana keessaa manneen kuma 2 xumuramuusaanii ibsuun, haaromsi manneen kuma 3 olii immoo hojjetamaa jiraachuu ibsaniiru.

Kana cinaatti dabtara kuma 370 fi qalama kuma 20 barattootaa maatii harka qal’eeyyiif   deeggarsaan kennamuu ibsaniiru.

Akka obbo Amiinoon jedhanitti, sagantaan tola ooltummaa dargaggoota walitti fiduun, gama nageenyaan qooda olaanaa bahuun dargaggoonni Aadaa wal gargaarsaa fi  muuxannoo hojii akka argatan gochaa jiraachuu ibsaniiru.

Tajaajjila tola ooltummaa gannaa Adoolessa 1 bara 2017 hanga Fulbaana  30 bara 2018     turu  irratti  baatiiwwan  lama hafan  dargaggonnii fi kutaan hawaasaa biroon  dammaqinaan hirmaachuun Ashaaraa isaanii akka kaa’an waamicha dhiheessaniiru.