Tajaajilli tola ooltummaa fayyaa Lammiilee kuma 100 ol qaqqabeera

Hagayya 7/2017(TOI)-Hospitaalli Ekkaa Kotobee Lammiilee kaffalanii wal’aanamuu hin dandeenyeef  tajaajila tola ooltummaa fayyaa  kennaa jiruun hanga ammaatti lammiilee kuma 100 ol ta’an qaqqabuu beeksise.

Tajaajilichi Adoolessa  30 hanga  Hagayya 6 bara 2017tti   guyyaa 7 lammiilee Magaalaa Finfinneetti argamaniif kennuuf  yaadamee eegaalamuu Daarekteerri Olaanaan Hospitaalichaa  Dr.Muluuqan Tasfaayee  dubbataniiru.

Tajaajila tola ooltummaa Kanaan qorannoo walii galaa, qorannoo kaansarii harmaa,  qorannoo kaansarii fiixee gadameessaa,  dhibee keessaa, kan gogaa, kan ilkaanii, kan sammuu, yaalii baqaqsanii hodhuu gidduugaleessaa, raadiyooloojii, (IMEJING)  fi  tajaajila  fiiziyootiraappii dabalatee  gosa wal’aansaa 17n  kennaa jiru jedhaniiru.

Yeroon tola ooltummaa hanga kaleessaatti ta’us fedhii jiru gidduugaleessa godhachuun hanga Jimaata dhufuutti dheeressuun barbaachisaa ta’uu  ibsuun, hanga ammaatti  lammiileen kuma 100 ol  caalan  tajaajila argachuu isaanii ibsaniiru.

Hojiin Idilee Hospitaalichaa osoo addaan hin citiin  gara hawaasaatti seenuun  tajaajila tola ooltummaa milkaa’aa kennaa jirra  jedhaniiru.   

Tajaajilli tola ooltummaa fayyaa  humna hospitaalaa cimsuun namoonni dhukkubsachuun dura  qorannoo fayyaa Aadaasaanii akka godhatan gochuun  akkasumas ogeessota fayyaa hawaasa waliin  caalaatti  walitti dhiheessuun muuxannoon  gaariin kan argame ta’uu  kaasaniiru.

Tola olltummaan  duudhaa gaarii hawaasaa  waan ta’eef  fuulduratti  bal’inaan itti fufuu qabana jedhaniiru.

Qindeessitoota tola ooltummaa fi dhaabbilee tumsaan  hojjechaa jiran, akkasumas  hojjettoota  Ekkaa Kotobeef galata dhiheessaniiru.