Adoolessa 15/2016(TOI)- Yaa’iin idilee 6ffaa Mana maree naannoo ummattoota Itiyoophiyaa kibba lixaa jalqabame. Yaa’iin kun guyyoota sadiif kan taa’amu yoo ta’u, ajandaalee addaddaarratti mari’atee murtee akka adabarsu eegama. Yaa’iin kun raawwii hojii bara bajataa 2016 fi karoora bara 2017 irratti mari’atee akka raggaasisu eerameera. Kana malees raawwii bara bajataa 2016 mana murtee waliigalaa fi odiitii muummee naannichaa fi karoora bara 2017 irratti mari’atee akka raggaasisu ibsameera. Akkasumas yaa’iin kun bajata naannichaa bara 2017 fi wixinee labsiiwwanii addaddaarratti mari’atee akka raggaasisu beekameera.

Adoolessa 14/2016(TOI)-Gumiin biyyaalessaa Hararii walgahii idilee lammaffaa marsaa jahaffaa waggaa sadaffaa adeemsisaa jalqabe. Yaa’iin guyyaa tokkoof taa’amu kun ajandaawwan addaddaarratti nimari’ata. Kanneen keessaa qaboo yaa’ii idilee tokkoffaa marsaa jahaffaa waggaa sadaffaa adeemsise dhihaatee mariin taasifamee niraggaasifama. Kana malees gabaasni raawwii karoora bara bajataa 2016 gumii Hararii fi karoorri bara 2017 dhihaatee mari’atamee niraggaasifama jedhameetu eegama. Akkasumas karoora raawwii aadaa fi hambaa bara bajataa 2016 akkasumas afaan Hararii damee barnootaa gumichaa fi karoorri bara 2017 gumii Kanaan akka dhihaatu sagantaa baherraa baruun danda’ameera. Gumiin biyyaalessaa Hararii afaanii fi aadaa sablammii Hararii ilaalchisuun imaammataa fi seera kan baasu, eegumsa hambaa ilaalchisee qajeelfama kan baasu ta’ee gumii teessoo 14 qabudha.

Adoolessa 14/2016 (TOI)- Naannoo Oromiyaatti bara bajataa kanatti nageenya mirkaneessuuf hojii seera kabachiiisuuf qindoominaan raawwatameen bu’aan argamuusaa pirezedanrtiin naannoo Oromiyaa Obbo Shimallis Abdiisaa ibsan. Obbo Shimallis kana kan ibsan yaa’ii Idilee caffee Oromiyaa irratti raawwii hojii mootummaa naannichaa bara bajataa 2016 wayita dhiyeessanitti. Pirezidaantichi gabaasasaanii keessatti akka ibsanitti, bara bajataa 2016 hojiin nagaa fi misoomaa fayyadamummaa ummata naannichaa hunda galeessa mirkaneesse hojjetameera. Qaamni raawwachiiftuu mootummaa naannichaa karoora bara bajataa 2016 qulqullinaa fi saffisaan hojiirra oolchuu waan danda’eef bu’aa jajjabeessaan argameera jedhan. Keessattuu naannichatti nageenya waaraa mirkaneessuuf humnoonni nageenyaa naannichaa fi mootummaan federaalaa ummata waliin ta’uun hojii seera kabachiisuu jabaa rawwachuu isaanii ibsaniiru. Shororkeessaa shanee fi humni finxaaleyyii rakkoo uumuuf socho’aa turuu eeranii, hojii seera kabachiisuu qindoominaan fudhatameen bu’aan argamuu ibsan. Hojii seera kabachiisuu cinaatti miseensonni Shanee harka kennatanii fi booji'aman marsaa sadiin leenjii haaromsaa fudhatanii hawaasaatti makamuu himniiru. Obbo Shimallis "Balballi nagaaf baname ammallee banaadha" jedhanii; mootummaan naannichaa ammallee qaamoleen rakkoo uumaa jiran gara nagaatti akka dhufan waamicha dhiyeessaniiru. Ummanni naannichaa gurmaa’ee naannoo isaa eeggachaa akka jiru eeranii; fuuldurattis hojiin nageenya mirkaneessuu ummata waliin itti fufa jedhaniiru. Mootummaan naannichaa bara bajataa kana misooma qonnaan keessattuu qonna gannaa, qonna jallisii fi arfaasaatiin hojii bu’a qabeessa hojjechuu Pirezedaant Shimallis dubbataniiru. Bara Oomishaa 2015/16tiin lafti heektaara miiliyoona 9 tuqaa 6 qotamee oomishni kuntaala miiliyoona 283 argameera jedhan. Jallisii bonaa fi qonna arfaasaatiinis hojiin jajjabeessaan hojjetameera jedhan. Damee barnootaa fi fayyaatiinis hojiileen jajjabeessaan hojjetamuu eeraniiru. Bara baajataa kana keessatti manneen barnootaa idileen duraa kumni afurii ol ijaaramuus fakkeenyaaf kaasaniiru. Bara baajataa xumurame lammiilee miiliyoona 2 tuqaa 3f carraan hojii dhaabbataa uumameera, Carraa hojii uumuuf liqiin birrii biiliyoona 4 tuqaa 5 akka kennames himaniiru. Pireezidaanti Shimallis itti dabaluudhaan hojiin kenniinsa tajaajila mootummaa fooyyessuu, seera qabeessummaa sirna daldalaa mirkaneessuu fi malaammaltummaa ittisuu xiyyeeffannoodhaan hojjetamaa turuu ibsaniiru. Bara baajataa kana keessatti malaammaltummaa ittisuuf hojii hojjetameen birrii biiliyoona 5 tuqaa 6 gara dabarfamuuf ture dhorkamuu fi birrii biiliyoona 2 tuqaa 5 waliin dhahame mootummaaf deebi’ee galii ta’uu eeraniiru. Walumaagalatti mootummaan naannichaa bara baajatichaa karoora bal’aa qopheessuun raawwii bu’a qabeessa ta’e galmaan gahuu isaa mirkaneesseera jedhan.

Adoolessa 14/2016 (TOI) -Caffeen hirmaannaa fi fayyadamummaa misoomaa ummataa mirkaneessuuf hojiirra oolmaa seerotaa fi hojimaata ba’anirratti xiyyeeffatee hojjechaa akka jiru Af-yaa’iin Caffee Oromiyaa Aadde Sa’aadaa Abdurrahimaan ibsan. Yaa’iin caffee Oromiyaa idilee torbaffaa bara hojii jahaffaa waggaa sadaffaa ta’amaa jira. Af-yaa’iin caffee Aadde Sa’aadaan haasawa baniinsaa taasisaniin Caffeen misooma hundagaleessa naannichaa itti fufsiisuu fi hirmaannaa fi fayyadamummaa ummataa mirkaneessuuf hojjechaa jira jedhan. Kanaanis hammattoolee seeraa baasuu bira darbee raawwii seerotaa fi hojimaata irratti hordoffii fi to’annoo cimaa gochaa akka jiru kaasan. Keessattuu bakka bu’ummaa ummataa sirnaan bahachuuf tajaajilli haqa qabeessaa fi saffisaan naannichatti akka dhugoomu, hojimaanni badaan akka dhabamu ,bulchiinsi gaariin akka mirkanaa’u hojilee hojjetamaa jiran irratti hordoffii fi to’annoo taasisaa jiraachuu himan. Hordoffii fi to’annoo tokkoo tokkoo damee hojii irratti taasifamuun Milkaa’inaa fi hanqina mul’aterratti ni mari’atama jedhan. Kanaanis qabxiilee ciminaa fi hanqinaa adda baasuun Kallattii xiyyeeffannoo fuulduraa ni kaa'a jedhan. Miseensonni Caffee bara bajataa haaraatti hojiilee hordoffii fi to’annoo isaanii cimsuun kan itti fufan ta’uu ibsuun, keessaahuu hojiirra oolmaa fayyadamummaa ummataa mirkaneessuuf labsii fi hojimaata yeroo yeroon ba’anii irratti xiyyeeffachuun hojjechuu akka qaban hubachiisaniiru.

Adoolessa 14/2016(TOI)- Yaa’iin caffee idilee torbaffaa bara hojii jahaffaa waggaa sadaffaa magaalaa Adaamaatti jalqabame. Yaa’iin kun hojiilee hordoffii fi to’annoo bara bajataa xumuramee fi kallattii fuulduraa akkasumas raawwii hojii karoora mootummaa naannichaa bara 2016 gabaasa raawwii hojii odiitii walii galaa fi mana murtii waliigalaa naannichaarratti nimari’ata jedhameetu eegama. Kana malees labsiiwwan addaddaa, bajata karoora hawaasummaa fi dinagdee naannichaa bara 2017 raawwachiisuuf oolurrarratti akka mari’atu sagantaan bahe ni’agarsiisa.

Adoolessa 13/2016(TOI)- Komishiniin Inispeekshinii fi naamusaa paartii badhaadhinaa hojii dandeettii dhaabbatummaa cimsuuf hojjetameen bu’aa buusuusaa Ittaanaan pirezidaantii paartii badhaadhinaa fi hoogganaan biiroo muummee paartii badhaadhinaa obbo Adam Faaraah ibsan. Waltajjiin maree waloo 6ffaa qorannoon guduunfaa raawwii karooraa bara bajataa 2016 waajjira muummee paartii badhaadhinaatti guyyoota lamaaf taa’amaa ture xumurameera. Gabaasni komishinii ijaarsaa naannoo, bulchiinsa magaalaa fi dhaabbilee federaalaa fi gabaasni guduunfaa qorannoo komishinichaa bara bajataa 2016 akkasumas karoorri bara bajataa 2017 dhihaatee mariin bal’aan taasifameera. Xumurarratti waliigaltee karoora bara bajataa 2017 walitti qabduun komishinichaa adde Salaamaawiit Daawiit walitti qabdoota naannoo, magaalaa fi dhaabbilee federaalaa waliin mallatteessaniiru. Dabalataanis caasaa komishinii, qooda fudhattoota gumaacha taasisanii fi namoota dhuunfaa bara bajataa 2016 raawwii olaanaa galmeessisaniif beekamtiin kennameera. Raawwii bara bajataa 2016 argame guddisuun bara bajataa 2017 raawwiin caalu akka argamu beekamtiin kenname miira dorgommii fayyaalessa akka uumu walitti qabduun komishinii kun ibsaniiru. Ittaanaan pirezidaantii paartii badhaadhinaa fi hoogganaan waajjira muummee paartichaa obbo Adam Faaraah sagantaa beekamtichaarratti argamuun qajeelfama hojii kan kennan yoo ta’u komishiniin Inispeekshinii fi naamusaa paartichaa bara bajataa 2016 bu’a qabeessa ta’uusaa kaasaniiru. Tokkoffaa caasaa paartii cimaa uumuu akka barbaachisu akkaataa kallattii kaa’ameen hojiitti galamuusaatiin kan dhufedha jedhaniiru. Kan lammaffaa miseensonnii fi hooggantoonni komishinichaa sadarkaan jiran hundi cimee hojjechuusaatiin ta’uu eeranii, kan sadaffaa komishinichi ergamasaa bahachuu akka danda’u qajeelfama amanuu, deeggaruu fi hojeessuu jedhuun hojiitti galuu keenyaani jedhaniiru. Komishinichi bara 2017 sosochii “Inispeekshiniin cimaan paartii cimaa uumuuf” jedhuun jalqabeen qulqullinni siyaasaa paartichaa akka mirkanaa’u, naamusni akka fooyya’u, hojmaatonni akka eegaman, caasaaleen paartii sadarkaan jiran akka ciman akkasumas inispeekshiniin qabeenya paartichaarratti taasifamu cimee ittifufuu akka qabu hubachiisaniiru.

Adoolessa 12/2016 (TOI)- Hojii ittisa yakka poolisiin hojjeteen yakkoonni ciccimoo jireenya idilee hawaasarratti dhiibbaa uumaa turan %31 hir’isuu Koomishiniin Poolisii Magaalaa Finfinnee ibse. Komishinarri Poolisii Magaalaa Finfinnee Geetuu Argaawu ibsa miidiyaaleef kennaniin, bara baajataa 2016’tti yakka ittisuu, nageenyaa fi tasgabbii mirkaneessuu fi dandeettii dhaabbatummaa cimsuuf hojiileen bu’aa qabeessi hojjetamuu ibsan. Kana malees hawaasni poolisii walin qindaa’uun shira farreen nageenyaa fashaleessuu fi yakka ittisuun hojii bu’aa qabeessi hojjetameera jedhan. Gama yakka ittisuun Tajaajilaa Poolisii Hawaasaan qaamolee yakka salphaa hanga cimaa raawwatan to’achuun itti gaafatamtoota taasisuu hojjetamuu ibsaniiru. Bara baajatichaattis tarkaanfiilee fudhatamaniin yakka cimaa qaamolee rawwatan kuma 7 fi 405 akkasumaas qaamolee yakka salphaa raawwataan kuma 25 ol harkaa fi harkatti to’atamuu ibsaniiru. Hojii ittisa yakkaa hojjetameen yakkoonni ciccimoo jireenya idilee hawaasaarratti dhiibbaa uumaa turan %31 hir’isuun akka danda’ame ibsaniiru. Dabalataan hoggantootaa fi miseensota poolisii naamusa cabsan hedduurratti tarkaanfiin bulchiinsaa fudhatamuu eeraniiru. Fuuldurattis karaa gurmaa’een yakkootaa fi gochaalee shororkeessummaa raawwataman ittisuu fi fashaleessuuf ergama raawwatu ciminaan kan itti fufu ta’uu himaniiru.

Adoolessa 12/2016(TOI)- Gareen jilaa hooggantoota magaalichaa hoogganaa waajjira paartii badhaadhinaa damee Finfinnee Mogos Baalchaa fi ittaanaan kantiibaa Jaanxiraar Abbaayiin durfamu Siingaapoor daawwachaa jira Daawwannaa Kanaan hojiilee misooma magariisaa fimiidhagina magaalaa, bu’ura misoomaa diriirsuu, cehumsa teeknooloojii akkasumas dameelee birootiin Siingaapooritti muuxannoo qooddachaa akka jiru odeeffannoon waajjira kantiibaa nimul’isa. Ministirri muummee doktar Abiyyi Ahimad fi kantiibaa Adaanech Abeebee Kanaan dura Siingaapoor daawwachuunsaanii niyaadatama.

Adoolessa 11/2016(TOI)-Gareen jilaa ministira dhimma alaa ambaasaaddar Taayyee Atsqasillaaseen durfamu yaa’ii mana maree raawwachiisaa gamtaa Afriikaarraa Gaanaa Akraatti adeemsifamurratti hirmaachaa jira. Walgahiin mana maree raawwachiisaa idilee 45ffaa gamtaa Afriikaa Gaanaa Akraatti guyyoota lamaaf nitaa’ama. Walgahiin kun ministiroonni dhimma alaa biyyoota miseensa gamtichaa, hooggantoonni olaanoo komishinii gamtaa Afriikaa, bakka bu’oonni hawaasa qaxanaa fi keessummoonni biroon bakka argamanitti har’a jalqabama. Walgahiin kun bajata gamtichaa akka lakkoofsa Awurooppaa bara 2025 dabalatee dhimmoota hedduurratti mari’atee murtee nidabarsa jedhamee akka eegamu odeeffannoon ministeera dhimma alaarraa argame nimul’isa.

Adoolessa 11/2016(TOI)- Pirezidaant Saahilawarq Zawudee ittaanaa ministira muummee, ministira dhimma alaa fi ministira ittisaa Ayerlaand waliin mari’atan. Jilli ittaanaa ministira muummee, ministira dhimma alaa fi ministira ittisaa Ayerlaand Mikaa’eel Maartiiniin durfamu daawwannaa hojiif kaleessa Finfinnee dhufuunsaa niyaadatama. Pirezidaant Saahilawarq Zawudee har’a jila ittaanaa ministirichaan durfamu wajjirasaaniitti simatanii haasofsiisaniiru. Haala walfakkaatuun ministirri muummee doktar Abiyyi Ahimad waaree har’aa ittaanaa ministira muummee, ministira dhimma alaa fi ministira ittisaa Ayerlaand Mikaa’eel Maartiin waliin mari’achuunsaanii niyaadatama.

Adoolessa 11/2016(TOI)- Bulchiinsi magaalaa Finfinnee muudamoot addaddaa raggaaseera. 1) Obbo Maashoo Olaanaa – itti waamamaa mootummaa olaanaa mana maree Finfinnee 2) Doktar Jamaaluu Jambar- Sadarkaa ittaanaa kantiibaatti hoogganaa biiroo paabiliik Sarvisii fi misooma humna namaa 3) Adde Yimmanyshaal Taaddasaa – Hooggantuu biiroo miidhagina magaalaa fi misooma magariisaa bulchiinsa magaalaa Finfinnee 4) Obbo Yaabbibaal Addis Goobazee- Hoogganaa biiroo geejjibaa bulchiinsa magaalaa Finfinnee 5) Adde Qiddist W/Giyoorgis- Hooggantuu biiroo misooma fi bulchiinsa manneenii bulchiinsa magaalaa Finfinnee 6) Obbo Andinnat Buzuusaw Taammanee – Ittaanaa odiitara muummee waajjira odiitara muummee Finfinnee 7) Obbo Qusee Lataa Waaqjiraa - Ittaanaa odiitara muummee waajjira odiitara muummee Finfinnee ta’uun muudamaniiru. Kantiibaan bulchiinsa magaalaa Finfinnee Adaanech Abeebee sadarkaa barmootaa fi muuxannoo hojii muudamtootaa mana mareef dhiheessaniiru. Muudamtoota ilaalchisuun yaanni addaddaa mana mareerraa erga kennamee boodamuudamni kun sagalee guutuun erga raggaasifamee booda muudamtoonni waadaa galaniiru.

Adoolessa 11/2016(TOI)- Walitti bu’iinsa naannawoota daangaa naannolee Affaar fi Somaaleetti mudatan mariin furuuf waliigaluusaanii bulchitoota naannolee lamaanii ibsan. Bulchaan naannoo Affaar Awwal Arbaa fi bulchaan naannoo Affaar Musxafee Mahaammad walitti bu’iinsa naannawoota daangaa naannolee lamaanitti mudatan mariin furuuf waliigaluusaanii ilaalchisuun ibsa kennaniiru. Walitti bu’iinsota naannawoota daangaa naannolee lamaanitti mudatan karaa nagaan furuuf bakka hooggantoonni mootummaa federaalaa fi naannolee olaanoon argamanitti mariin taasifamuusaa dubbataniiru. Fuulduras wantoota walitti bu’iinsaaf sababa ta’an adda baasuun furmaata waloo barbaaduuf waliigalameera jedhan.

Adoolessa 11/2016(TOI)- Ministirri muummee doktar Abiyyi Ahimad ittaanaa ministira muummee, ministira dhimma alaa fi ministira ittisaa Ayerlaand Mikaa’eel Maartiin simatanii haasofsiisan. Dhimmoota hedduurratti ministiricha waliin maree gamlamee taasisuusaanii ministirri muummee doktar Abiyyi Ahimad ergaa fuula marsariitiisaaniirratti barreessaniin ibsaniiru. Guyyaa har’aa ittaanaa ministira muummee fi minister dhimma alaa fi ministira ittisaa Ayerlaand Mikaa’eel Maartiin fi garee jilasaanii waliin wal argee dhimmoota hedduurratti maree gamlamee taasisuu kootti gammadeera jechuun dubbataniiru. Ministira muummee doktar Abiyyi Ahimad

Adoolessa 11/2016(TOI)- Itiyoophiyaan dhaabbata mootummoota gamtoomanii waliin ta’uun walgahii qophii yaa’ii misooma faayinaansii idil addunyaa Adoolessa 15-19 bara 2016 qopheessuuf waliigaltee qopheessummaa mallatteessiteetti. Dhaabbata mootummoota gamtoomaniitii ergamaan dhaabbataa Itiyoophiyaa ambaasaaddar Tasfaayee Yilmaa fi ittaanaan barreessaa muummee dhimmoota dinagdee fi hawaasummaa dhaabbata mootummoota gamtoomanii Lii Juunwaa waliigalticha mallatteessaniiru. Ambaasaaddar Tasfaayee Yilmaa Itiyoophiyaan walgahicha keessummeessuunshee hojmaata DH.M.G caalaatti bu’a qabeessa taasisuu fi tumsi biyyoota hedduu akka cimu kutannoo qabdu kan agarsiisudha jakka ta’e ibsan. Ittaanaan barreessaa muummee gamasaaniin kutannoo fi qooda Itiyoophiyaan walgahicha keessummeessuuf qabdu dinqisiifataniiru. Qaamoleen lamaan faayinaansii ajandaa galmoota misoomaa egeree raawwachiisu walitti qabuuf hawaasa idil addunyaa kakaasuuf faayidaa yaa’ichi qabu ibsaniiru. Waggaa sagal dura Itiyoophiyaan yaa’ii misooma faayinaansii sadaffaa Finfinneetti keessummeessiteetti. Yaa’ichi galmoota misooma egereef faayinaansii barbaaduuf sagantaa Finfinnee hammattoon idil addunyaa waliigalaa kaa’e raggaasisuunsaa niyaadatama. Walgahii Wixata dhufuu kaasee Finfinneetti taa’amu kun raawwii sagantaa Finfinnee niqorata. Fuuldura yaa’iin misooma faayinaansii idil addunyaa afraffaa Ispeenitti taa’amuuf kallattii nikaa’a jedhamee akka eegamu odeeffannoon ministeera dhimma alaa nimul’isa.

Adoolessa 10 /2016 (TOI)- Jilli Ittaanaa ministira muummee fi ministirri dhimma alaa Ayerlaand Miisheel Maartiin dursan daawwannaa hojiif Finfinnee dhufeera. De’eetaan ministira dhimma alaa ambaasaaddar Burtukaan Ayyaanoo Ittaanaan ministira muummee fi ministirri dhimma alaa kun buufata Xiyyaaraa idil addunyaa Boolee wayita gahan simataniiru. Finfinnee wayita turanitti hooggantoota mootummaa olaanoo waliin nimari’atu jedhamee akka eegamuodeeffannoon ministira dhimma alaarraa argame nimul’isa. Ittaanaa ministira muummee fi ministirri dhimma alaa Miisheel Maartiin ittigaafatama kna malees ministira ittisaa biyyattii akka ta’anis nibeekama.

Adoolessa 10/2016(TOI)- Torbee dhufu Dirreedawaa fi naannolee sadii keessatti boqonnaan mariin ajandaa walitti qabuu akka jalqabamu komishiniin marii biyyaalessaa Ityoophiyaa beeksise. Waltajjiiwwan ajandaa adda baasuuf fuulduratti adeemsifaman ilaalchisuun Komishinariin olaanaa komishinii marii biyyaalessaa Itiyoophiyaa piroofeesar Masfin Ar’ayaa, miidiyaaleef ibsa kennaniiru. Haala Kanaan torbee dhufu bulchiinsa Dirreedawaa akkasumas naannolee Hararii, Beeniishaangul Gumuzii fi Gaambeellaatti waltajjiin maree ajandaa walitti qabuu ni’adeemsifama jedhaniiru. Ogeeyyonni komishinichaa fi komishinaroonni hojii kana qindeessuuf garasitti deemuusaanii ibsaniiru. Bulchiinsi naannoo fi qaamoleen tumsitootaa marii kanaaf qophiisaanii xumuruusaanii dubbataniiru. Amma Hagayya 30tti Dirreedawaa fi naannolee 10 keessatti hojii ajandaa walitti qabuu xumuruuf karoorfamuusaa komishinarichi eeraniiru. Hooggantoonni komishinichaa naannolee Tigraay fi Amaaraatti hooggantoota waliin mari’achuuf marii taasisuusaanii dubbataniiru. Naannoo Amaaraatti qindeessitoota kuma 1 caalaniif leenjii kennuun hirmaattonni adda baafamaa akka jiran eeraniiru. Waltajjiin maree ajandaa walitti qabuu magaalaa Finfinneetti Caamsaa 21 amma 27 bara 2016tti adeemsifamuunsaa niyaadatama. Adeemsi maree biyyaalessaa addaddummaa fi waldhabdee Itiyoophiyaa keessa jiran mareen furuun nageenya waaraa fiduuf jalqabame yeroo ammaa boqonnaa mareerratti argama. Marii kanarratti hirmaannaan ummata hundaa, qaamolee qooda fudhattootaa maricharratti qooda olaanaa qabanii hirmaachuusaanii mirkaneessuu fi hirmaannaan guutuu jiraachuusaanii, fedhiin siyasaa marii biyyaalessaa bu’a qabeessa taasisuuf kanneen barbaachisan keessaayyu.

Adoolessa 10/2016(TOI)- Ministirri muummee doktar Abiyyi Ahimad filannoo Ruwaandaatti taasifame kan mo’atan pirezidaant pool Kaagaameef ergaa gammachuu dabarsaniiru. Ministirri muummee doktar Abiyyi Ahimad ergaa gammachuu fuula marsariitiisaaniirratti pirezidaant pool kaagaameef dabarsaniin bara aangoo haaraatti milkaa’ina hawwaniiruuf. Ittii dabaluunis, barri hojii pool kaagaamee itti aanu nageenyi Ruwaandaa kan itti cimu, misoomnishee caalaa kan guddatu akka ta’u hawwiisaanii ibsaniiru.

Adoolessa 10/2016(TOI) - Bara bajata darbe galiin birriin biliyoonni 146 tuqaa 84 walitti qabamuu Kantiibaan magaalaa Finfinnee aadde Adaanech Abeebee beekisan. Manni Maree magaalaa Finfinnee bara hojii 3ffaa yaa'ii idilee 4ffaa taa'a jira. Kantiibaan magaalaa Finfinnee aadde Adaanech Abeebee yaa'icharratti argamuun gabaasa raawwii karoora bara 2016 dhiheessaniiru. Aadde Adaanech wayita kana akka himanitti magaalichatti bara bajataa darbe galiin birrii biliyoona 151 walitti qabuuf karoorfame birrii biliyoonni 146 tuqaa 84 walitti qabamuu danda'amuu himaniiru. Kuns kan bara bajata achi aanuun yoo madaalamu caalmaa dhibbeentaa 44 tuqaa 16 kan qabu ta'uu himaniiru. Haala galiin itti walitti qabamu fooyyesuuf filannoon sirna dijitaala diriirfame fooyya'insa dhufeef gahee olaanaa qaba jedhaniiru.

Adoolessa 10/2016(TOI) - Sudaan Kibbaa waliigaltee hammattuu qindoomina yaa'a Naayil mallateessuun ishee Itoophiyaaf taate seena qabeessadha jedhan Ministirri Muummee FDRI doktar Abiy Ahimad. Doktar Abiy Ahimad ergaa karaa miidiyaa hawaasummaa isaanii dabarsaniin hojiin milkaa'ina dippilomaasii ta'e kun fedha yaa'a Naayil kan hunda keenyaa kan ta'e qindoominni naannawwa akka milkaa'uuf tarkaanfii guddadha jedhaniiru. Waliigalteen kun mallateeffamuun isaa biyyoonni naannawwichaa Komishiinii Yaa'a Naayil hundeessuun fayidaa waloo uummata keenyaaf hojjechuuf nu dandeesisa jedhaniiru.

Adoolessa 10/2016(TOI)- Manni maree magaalaa Finfinnee raawwii bara bajataa 2016 fi karoora barahaaraarratti mari’achaa jira Miseensonni mana maree, qaamoleen raawwachiiftuu fi kanneen biroon yaa’ii guyyoota lamaaf turu kanarratti hirmaachaa jiru. Kantiibaan magaalaa Finfinnee adde Adaanecha Abeebee raawwii karoora bara bajataa 2016 Mana mareef dhiheessaa jiru. Finfinnee fakkeenya badhaadhinaa taasisuuf hojiileen milkaa’oohedduun hojjetamaniiru jedhangabaasa dhiheessaniin. Nageenyaa fi tasgabbii magaalaa Finfinnee eegsisuuf hojiilee hojjetaman bal’inaan dhiheessaniiru. Manneen jireenyaa waloo, lafaa fi qabeenya ummataa kanneen biroo saamicharraa baraaruun akkasumas hannarratti qabsaa’uun hojiin hedduun hojjetameera jedhn. Haala gibirri itti waliti qabamuu fi sirna kaffaltii ammayyeessuu fi hojmaata dijitaalaa sektaroota tokko tokko keessatti babal’isuun hojii hojjetames bal’inaan ibsaniiru. በHojiilee hedduu gama barmootaa, fayyaa, tajaajila hawaasummaa fi dameelee biroon hojjetaman kantiibaa Adaanech bal’inaan dhiheessaniiru. Manni maree magaalaa Finfinnee raawwii bara bajataa 2016 fi karoora barahaaraarratti mari’achaa jira Adoolessa 10/2016(TOI)- Manni maree magaalaa Finfinnee raawwii bara bajataa 2016 fi karoora barahaaraarratti mari’achaa jira Miseensonni mana maree, qaamoleen raawwachiiftuu fi kanneen biroon yaa’ii guyyoota lamaaf turu kanarratti hirmaachaa jiru. Kantiibaan magaalaa Finfinnee adde Adaanecha Abeebee raawwii karoora bara bajataa 2016 Mana mareef dhiheessaa jiru. Finfinnee fakkeenya badhaadhinaa taasisuuf hojiileen milkaa’oohedduun hojjetamaniiru jedhangabaasa dhiheessaniin. Nageenyaa fi tasgabbii magaalaa Finfinnee eegsisuuf hojiilee hojjetaman bal’inaan dhiheessaniiru. Manneen jireenyaa waloo, lafaa fi qabeenya ummataa kanneen biroo saamicharraa baraaruun akkasumas hannarratti qabsaa’uun hojiin hedduun hojjetameera jedhn. Haala gibirri itti waliti qabamuu fi sirna kaffaltii ammayyeessuu fi hojmaata dijitaalaa sektaroota tokko tokko keessatti babal’isuun hojii hojjetames bal’inaan ibsaniiru. በHojiilee hedduu gama barmootaa, fayyaa, tajaajila hawaasummaa fi dameelee biroon hojjetaman kantiibaa Adaanech bal’inaan dhiheessaniiru.