ኣዲስ ኣበባ/ ሚያዝያ/17/ 2016 /ኢዜአ/ቀዳማይ ሚኒስትር ሊቢያ ኣብዱልሃሚድ ኣል-ዳባይባ ዕላዊ ዑደት ስራሕ ንምክያድ ኣዲስ ኣበባ ኣቲዮም። እቶም ቀዳማይ ሚኒስትር ኣብ ዓለም ለኸዊ መዕርፎ ነፈርቲ ቦሌ እንትበፅሑ ሚኒስትር ጉዳያት ወፃኢ ፌዴሪኢ ታዬ ኣፅቀ-ስላሴ ኣቀባብላ ገይረሙሎም። ቀዳማይ ሚኒስትር ኣብዱልሃሚድ ኣብ ፃንሒቶም፥ ምስ ላዕለዎት ሓለፍቲ ስራሕ መንግስቲ ኣብ ክሊቲኣዊ፣ ኣህጉራዊን ዓለም ለኻዊን ዛዕባታት ጠመተ ዝገበረ ዘተ ክገብሩ ኢዮም ዝብል ትፅቢት ከምዘሎ ኣብ ሚኒስቴር ጉዳያት ወፃኢ ዝረኸብናዮ ሓበሬታ የረድእ።

ኣዲስ ኣበባ/ሚያዝያ 16/2016 (ኢዜኣ) ኣብ ኣዲስ ኣበባ ነባሪ ዘሳተፈን ንከተማነት ዲፕሎማሲአ ዝምጥኑን ስራሕቲ ሰላምን ፀጥታን እናተሰርሑ ምዃኖም ቢሮ ምምሕዳር ሰላምን ፀጥታን ምምሕዳር ከተማ ኣዲስ ኣበባ ኣፍሊጡ። ምክትል ሓላፊ እቲ ቢሮ ኣይተ ጌታሁን አበራ፤ ከተማ ኣዲስ ኣበባ ዝተፈላለዩ ኣህጉራውን ዓለም ለኻውን ትካላት ዝርከቡላ ማእኸል ዲፕሎማሲ ስለዝኾነት ካብ ልምዓት ብተወሳኺ ሰላማን ፀጥታኣን ዘተኣማምን ናይ ምግባር ስራሕቲ ትኹረት ተዋሂብዎም እናተሰርሐ እዩ ኢሎም። ብተወሳኺ እውን ንከተማነት ዲፕሎማሲኣ ዝምጥኑ ዝተፈላለዩ ስራሕቲ መሰረተ ልምዓት እናተሳለጡ ምዃኖም ሓቢሮም።

  ቦንጋ/ሚያዝያ 16/2016 (ኢዜኣ) ህዝቢ ክልል ህዝብታት ደቡብ ምዕራብ ኢትዮጵያ ንህንፀት ዓብይ ግድብ ሕዳሰ ዝገብሮ ደገፍ ኣጠናኺሩ ክቕፅለሉ ከምዝግባእ ምክትል ርእሰ ምምሕዳር እቲ ክልል ዶክተር ኢንጂነር ነጋሽ ዋጌሾ ገሊፆም። ክልላዊ ህዝባዊ መድረኽ ወፍሪ ሕዳሰ ግድብ ሎሚ መዓልቲ ኣብ ከተማ ቦንጋ ይካየድ ኣሎ። ምክትል ርእሰ ምምሕዳር ክልል ህዝብታት ደቡብ ምዕራብ ኢትዮጵያ ዶክተር ኢንጂነር ነጋሽ ዋጌሾ ኣብዚ መድረኽ ተረኺቦም ከምዝበልዎ፤ ሓባራዊ ሃፍቲ ኢትዮጵያውያን ዝኾነ ህንፀት ዓብይ ግድብ ሕዳሰ ንምዝዛም ዝተጀመረ ደገፍ ተጠናኺሩ ክቕፅል ኣለዎ።

  ኣዲስ ኣበባ/ ሚያዝያ/16/ 2016 /ኢዜአ/ናይዚ ወለዶ ዛዕባ ሓምሳ ዓመት ዘላቂ ሰላምን ኩለመዳይ ምዕባለን ከምዝኾነ ብሄራዊ ቤት ምኽሪ ድሕንነት ኣፍሊጡ። ብሄራዊ ቤት ምኽሪ ድሕንነት ኣብ እዋናዊ ሃገራዊ ጉዳያት ድሕንነትን ፀጥታን ብምዝታይ ኣብ ዘውፀኦ መግለፂ ከምዝሓበሮ÷ ኢትዮጵያ ኣብ ነዊሕ ታሪኻ ከም ሃገር ንፖለቲካዊ ፍልልያት፣ ዘይምስምማዕን ጎንፂታትን ብሰላማዊ መገዲ፣ ብዘተን ብሕጋዊ ኣገባብን ናይ ምፍታሕ ልምዲ ከምዘይነበራ ገሊፁ። ኣብዚ ሕዚ እዋን ዘሎ ናይ ለውጢ መንግስቲ ብሓይሊ ናብ ስልጣን ዝመፅአ ከምዘይኮነ ዝሓበረ እቲ መግለፂ÷ እዚ ድማ ሓዱሽ ፖለቲካዊ ባህሊን ፖለቲካዊ ምዕራፍን ከምዝኾነ ኣብሪሁ፡፡ ብዲሞክራስያዊ መረፃ ህዝቢ ዝፀደቐ መንግስቲ ብምጥያሽ፤ ካብኡ ሓሊፉ ድማ መራሕትን ኣባላትን ዝተፈላለዩ ፖለቲካዊ ውድባት ኣብ መንግስታዊ ሓላፍነት ብምሻም ኢትዮጵያ ናይ ሓባር ገዛ ምዃና ዘመስከረ ለውጢ ከምዝኾነ እውን ገሊፁ። ብሄራዊ ቤት ምኽሪ ድሕንነት ኣብ ዘውፀኦ ዝርዝር መግለፂ ሕገ-መንግስቲ ኢትዮጵያ ካብ መንግስቲ ወፃእ ዕጡቕ ሓይሊ ክህሉ ከምዘይፈቅድ ዝሓበረ እነትኸውን÷ ብሰንኪ ዝተወረሰ ፖለቲካዊ ምብትታን ግን ዕጡቓት ሓይሊ ከምዝተፈጠሩ ኣብሪሁ። “እዞም ዕጡቓት ሰላምና ዘላቒ ንምግባር ዕጥቆም ፈቲሖም ናብ መስርሕ ተሃድሶ ክኣትዉ ኣለዎም” ዝበለ እቲ መግለፂ÷ ኣብ ሃገራዊ ምኽክር ብምስታፍ እውን ፖለቲካዊ ጉዳያቶም ክፈትሑ ከምዝኽእሉ ገሊፁ። እዚ ንምትግባር ኮሚሽን ተሃድሶ ከምዝተጣይሸ፤ ጉጅለ ዕጡቓት ዕጥቆም ብምፍታሕን ተሃድሶ ብምውሳድን ናብ ሕብረተሰብ ንምፅምባር ተሓሲቡ ዝተጣየሸ ከምዝኾነ ኣብሪሁ። ብሃገራዊ ምኽክርን ናይ ስግግር ፍትሒን ዝፀንሑ ሃገራዊ ፀገማት ክፍትሑ ብምግባር፤ ከም ጎንፂን ኲናትን ዝበሉ ዕንቅፋታት ሰላማዊ ፖለቲካዊ ኣካይዳ ክንመርጽ ይግባእ። ነዚ ዕላማ እዚ እዩ ድማ ነቲ ኣብ ሰሜን ንኽልተ ዓመት ዝጸንሐ ኲናት ብናይ ሰላም ስምምዕ ክፍታሕ ዝድለ። ኣብ ታሪኽ ኢትዮጵያ ብዙሓት ተደጋገምቲ ሕድሕዳዊ ጎንፂታትን ኲናትን ከምዝተፈጠሩ ዝሓበረ እቲ መግለፂ÷ ኣብቶም ውግኣት ድማ ከም ሃገር ከቢድ ክሳራን ዕንወትን ከምዘስዐቡ ኣፍሊጡ። “ስምምዕ ሰላም ፕሪቶርያ ነዚ ኣሰራርሓ ቀይርዎ ኢዩ፤ ብፖለቲካዊ ፍታሕ ኲናት ናይ ምውዳእ ባህሊ ኣምፂኡ ኢዩ፤ እዚ ናይ ሰላም ስምምዕ ተረኽ ሰዓራይን ተሳዓሪን ንዝመፅእ ወለዶ ንዘይ ምውራስ ብሱልን ቆራፅ ውሳነን ዝሓትት ኢዩ” ብምባል እዚ ኣማራፂ ብምኽታል ደም መፋሰሲ ኲናት ደው ክብል ከምተገበረ ኣብሪሁ። ነዚ ስዒቡ ድማ ኣብ ክልላት ትግራይ፣ ኣምሓራን ዓፋርን ስራሕቲ ዳግመ ህንፀትን ምሕዋይን ከምዝተጀመረ ገሊፁ። ሰብኣዊ ሓገዝ ብዘይ ዕንቅፋት ናብ ትግራይ ክበፅሐሉ ዝኽእል ባይታ ከምዝፈጠረ፣ ድሕሪ ምፍራም ስምምዕ ሰላም መንግስቲ ካብቲ ኣብቲ ስምምዕነት ሰላም ዝነበሮ ግቡእ ንላዕሊ ብምኻድ ምትእምማን ንምፍጣርን ሰላም ንምዕቃብ ኣድላዪ ዘበሎም ተኸታተልቲ ስጉምቲታት ከምዝተወሰደ እውን ኣፍሊጡ። ብምሰረት ስምምዕነት ሰላም ዛጊድዝተረኸቡ ውፂኢታትን እፎይታን ከምዘለዉ ኮይኖም ዝተረፉ ስርሓትውን አለዉ ።ብፍላይ ብምስረት እቲ ስምምዐነት ሕዋሐት ዕጥቁ ክፈትሕ አለዎ ። ሕቶ ወሰን መንነትን ምምሕዳርን ዘለዎም ከባቢታት ምእንቲ ዕልባት ክግበሮ ዘተቐመጠ አንፈት ተግባራዊ ክኸውን አለዎ ። ብሰንኪ እቲ ኩናት ዝተመዛበሉ ወገናት ናብ ቦቶኦም ንምምላስን ንምጥያሽን ዝተጀመረ ስራሕ ዕልባት ክረክብ አለዎ ።

  ኣዲስ ኣበባ/ሚያዝያ 16/2016 (ኢዜኣ) ናይ ኢትዮጵያ ዜና ኣገልግሎት (ኢዜኣ) ዓለም ለኸ ተበፃሕነቱ ንምስፋሕ ኣብ ዘሳልጦም ስራሕቲ ሚኒስቴር ጉዳይ ወፃኢ ደገፍን ምትሕብባርን ከምዝገብር ሚኒስትር ዲኤታ ሚኒስቴር ጉዳይ ወፃኢ ኣምባሳደር ምስጋኑ ኣርጋ ገሊፆም። ኣምባሳደር ምስጋኑ ኣርጋ፤ ሓዱሽ ሚድያ ኮምፕሌክስን ምንቅስቓስ ስራሕን ኢዜኣ ተዓዚቦም። ኢዜኣ ንመራኸብቲ ሓፋሽ ውሽጢ ዓድን ወፃእን ፍልፍል ሓበሬታ ብምዃን ንህንፀት ምስሊ ሃገር በዓል ውዕለታ ትካል ከምዝኾነ ብምሕባር፤ ኢዜኣ ብዘበናዊ ቴክኖሎጂ ዝተሓገዘ ኣወዳድባ ከምዝፈጠረ ምዕዛቦም ገሊፆም። ኢዜኣ ተበፃሕነቱ ንምስፍሕፋሕ ንመራኸብቲ ሓፋሽ መንግስቲ፣ውልቀን ዲጂታልን ፍልፍል ሓበሬታ ብምዃን ፀገም ሓበሬታ ኣብ ምፍታሕ ዓቕሙን ደረጅኡን እናዕበየ ከምዝመፀ ከምዝተረድኡ እውን ተዛሪቦም። ኢትዮጵያ ብብዙሕ መልክዕ መፈልፈሊት ሓበሬታ ከምዝኾነት ብምሕባር፤ እዚ ሓበሬታ ኣዋዲዱን ኣጠናኺሩን ንዓለም ለኸ ማሕበረሰብ ምብፃሕ ንህንፀት ምስሊ ሃገር ዘለዎ እጃም ልዑል ከምዝኾነ ፀሪሖም። ኢዜኣ ዓለም ለኸ ፍልፍል ሓበሬትኡ ንምስፍሕፋሕ ምስ ዞባውን ዓለም ለኻውን መራኸብቲ ሓፋሽ ምትሕብባርን ምሕዝነትን ንምስፋሕ ዝጀመሮ ፃዕሪ ብምንኣድ ተበፃሕነትን ምሕዝነትን ንምስፍሕፋሕ ንዝገብሮም ፃዕርታት ሚኒስቴር ጉዳይ ወፃኢ ኣድላይ ደገፍን ምትሕብባርን ከምዝገብር ኣረጋጊፆም። ኢዜኣ ብሄራዊ ምርድዳእ ናይ ምፍጣርን ምስሊ ሃገር ናይ ምህናፅን ልኡኽትኡ ንምዕዋት ዜናን ዜና ተንከፍን ሓበሬታታት ንመራኸብቲ ሓፋሽ ብምፍናው ብሕታዊ ወኪል ዜና ኢትዮጵያ እዩ። እዚ ዘበን ብዝወነኖም ቴክኖሎጂታት ዓርሱ እናወደበ ዝርከብ ኢዜኣ፤ ኣብ ውሽጢ ሃገር 38 ጨንፈራት፣ብ 8 ቋንቋታትን ዝተፈላለዩ ኣማራፅታትን ሓበሬታ ናብ ህዝቢ እናብፀሐ ይርከብ።

  አዲስ አበባ/ሚያዚያ/16/2016/ኢዜአ/ መበል 16 ኣኼባ ገምጋም መንፈቕ ዓመት ሓባራዊ ኮሚቴ ሚኒስትራት ኢትዮ-ጅቡቲ ኣብ ጅቡቲ እናተሳለጠ ይርከብ። መበል 16 ኣኼባ ገምጋም ኣፈፃፅማ መንፈቕ ዓመት ሓባራዊ ኮሚቴ ሚኒስትራት ኢትዮ ጅቡቲ ሚኒስትር ሎጂስቲክስን ትራንስፖርትን ኣለሙ ስሜ (ዶ/ር)፤ ኣብቲ መበል 16 ኣኼባ ሓባራዊ ኮሚቴ ስምምዕነት ዝተበፅሐሎምን ድሕሪ እቲ ስምምዕነት ኣብ ዝተፈጠሩ ጉዳያትን ዘትዩ መፍትሕታት ንምቕማጥ ኣድላዪ 'ዩ ኢሎም። እቲ ኣኼባ ኣብ ኽልቲአን ሃገራት ማዕቀፋት ምትሕብባር ፣ ዘይሕጋዊ ዝውውር ሰባት፣ ንግዲ ዶብ፣ ምጉታት ህንፀት መንገዲ ዙርያን ኣብ ዝኣመሰሉ ግዜ ዘይህቡ ነጥብታት ዘትዩ ውሳነ ከሕልፍ 'ዩ ተባሂሉ ትፅቢት ከምዝግበር መረዳእታ ኤምባሲ ኢትዮጵያ ኣብ ጅቡቲ ይሕብር።

  ኣዲስ ኣበባ/ሚያዝያ 16/2016 (ኢዜኣ) ኢትዮጵያ ምስ ኡጋንዳ ዘለዋ ታሪኻዊ ምሕዝነት ኣብ ንግድን ርክብ ህዝቢ ንህዝብን ንምጥንኻር እናተሰርሐ ምዃኑ በዓል ሙሉእ ኣምባሳደር ኢትጵያ ኣብ ኡጋንዳ ኣምባሳደር እፀገነት በዛብህ ተዛሪበን። በዓል ሙሉእ ኣምባሳደር ኢትዮጵያ ኣብ ኡጋንዳ፣ቡርንዲ፣ ሲሸልስ፣ ኮሞሮስን ሪፐብሊክ ማእኸላይ ኣፍሪካን ኣምባሳደር እፀገነት በዛብህ፤ ኣብ መንጎ ክልቲአን ሃገራት ጠንካራ ርክብ ምህላው ንኢዜኣ ገሊፀን። ኣብ ቀረባ እዋን ልኡኽ ጉዳያት ትምህርቲ ኡጋንዳ ኢትዮጵያ ኣብቲ ዓውዲ ተሳልጦ ካብ ዘላ ስራሕ ተሞኩሮ ንምውሳድ ምምፅኡ ብምዝኽኻር፤ እዚ ድማ ርክብ እተን ሃገራት እናተጠናኸረ ከምዝመፀ ዘርኢ እዩ ኢለን። ብርክት ዝበሉ ኢትዮጵያውያን ኣብ ኡጋንዳ ከምዝነብሩን ህዝብታት ክልቲአን ሃገራት ናይ ሓባር ፀጋታት ከምዘለውዎምን ብምግላፅ እዚ ታሪኻዊ ርክብ ኣብ ዝተፈላለዩ ዘፈራት ንምጥንኻር እናተሰርሐ ምዃኑ ኣረዲአን። ኣብ ንግዲ ዘለወን ምትእስሳር እውን ንምጥንኻር ከምዝስራሕ ብምግለፅ፤ መንገዲ ኣየር ኢትዮጵያ በዚ መዳይ ዓብይ ዓቕሚ ከምዝኾነ ፀሪሐን።

  ኣዲስ ኣበባ/ሚያዝያ 16/2016 (ኢዜኣ) ምምሕዳር መርበብ ድሕንነት ሓበሬታ ተለዋዋጥቲ ካብ ዝኾኑ መጥቃዕትታት ሳይበር ብብቕዓት ብምክልኻል ረብሓ ሃገር ከኽብር ዝኽእል ዝተማልአ ዓቕሚ ከምዝፈጠረ ጉጅለ ሱፐርቪዥን ትካላት ፌዴራል ገሊፁ። ቀዳማይ ሚኒስትር ኣብይ ኣሕመድ (ዶ/ር) ኣፈፃፅማ ስራሕ 6 ኣዋርሕ መንግስቲ በጀት ዓመት 2016 ኣብ ዝተገምገመሉ እዋን ጉጅለ ሱፐርቪዥን ትካላት ፌዴራል ተጣይሹ ትኹረት ኣብ ዝተውሃበሎም ዓውድታት ዑደት ንክገብር ኣንፈት ከምዘቕመጡ ዝዝከር እዩ። ብመተሓባባሪነት ሚኒስቴር ፕላንን ልምዓትን ዝምራሕ ጉጅለ ሱፐርቪዥን ትካላት ፌዴራል ኣብ ዋና ቤት ዕዮ ምምሕዳር መርበብ ድሕንነት ሓበሬታ ተረኺቡ ትዕዝብቲ ኣካይዱ። መተሓባበሪ እቲ ጉጅለ ሱፐርቪዥን ዘሪሁን ከበደ ኣብዚ እዋን፤ ኢትዮጵያ ተለዋወጥቲ ካብ ዝኾኑ መጥቃዕትታት ሳይበር ምክልኻል ዘኽእላ ኩለ መዳያዊ ዓቕሚ እናሀነፀት ምዃና ካብቲ ዝገበርዎ ትዕዝብቲ ከምዝተረድኡ ገሊፆም። እቲ ምምሕዳር ኣብ ቀፃሊ እውን ዘለውዎ ጥንካረታት ብምቕፃል ክፍተታት እናስተኻከለ ሃገራዊ ልኡኽትኡ ብኣግባቡ ንክዋፃእ ኣተሓሳሲቦም። ዋና ዳይሬክተር ምምሕዳር መርበብ ድሕንነት ሓበሬታ ትግስት ሃሚድ ብግደአን፤ ቅድሚ መጥቃዕቲ ሳይበር ምፍፃሙ ምክልኻልን ቅልጡፍ ምላሽ ምሃብን ዘኽእል ዓቕሚ ከምዝተሃነፀ ሓቢረን። ድሕንነት ቁልፊ ትካላት ምሕላው፣ቴክኖሎጂ ኣብ ውሽጢ ሃገር ምምዕባል፣ዳህሳስ ስግኣት ምስራሕን ካልኦት ድሕንነት ሳይበር ምሕላው ዘኽእሉ ስራሕትን ትኹረት ከምዝተውሃቦም እውን ኣረዲአን። ብተወሳኺ እውን ስራሕ ምክልኻል መጥቃዕቲ ሳይበር ፃዕሪ ኩሎም ትካላትን ግንዛበ ሳይበር ሕብረተሰብ ምዕባይን ስለዘድሊ ዝምልከቶም ኣካላት ሓቢሮም ንክሰርሑ ገሊፀን። ምክትል ዋና ዳይሬክተር ምምሕዳር መርበብ ድሕንነት ሓበሬታ ዳንኤል ጉታ ከምዝበልዎ፤ ምህዳር ሳይበር ዘተኣናግዶ ዓይነትን መጠንን ጥቕዓት እናወሰኸ መፂኡ እዩ። ኢትዮጵያ እዚ ኣብ ግምት ብምእታው መጥቃዕቲ ሳይበር ብኣግባቡ ንምክልኻልን ንምምካትን ብሓይሊ ሰብ ኣድላይ ኣወዳድባ ብምህናፅ ድሉውነት ከምዝፈጠረት ገሊፆም። ጉጅለ ሱፐርቪዥን ትካላት ፌዴራል ኣብ ዝተመረፁን ትኹረት ዝተገበረሎምን ዓውድታት ዝገብሮ ትዕዝብቲ ክሳብ 24 ሚያዝያ 2016 ዓ/ም ክቕፅል እዩ።

  ኣዲስ ኣበባ/ ሚያዝያ/16/ 2016 /ኢዜአ/ፀገማት መንገዲ ስራሕቲ መሰረተ ልምዓት ንምፍታሕ ሓበራዊ ግንዛበ ምሓዝ ይግባእ ኣፈ ጉባኤ ባይቶ ወከልቲ ህዝቢ ኣይተ ታገሰ ጫፎ ገሊፆም። ኣባላት እቲ ባይቶ÷ ኣብ ሓፈሻዊ ከይዲ ልምዓት መሰረተ ልምዓት መገዲ ኢትዮጵያ ብምድሃብ ምስ ሚኒስቴር ከተማን መሰረተ ልምዓትን እናተዛተዩ ይርከቡ፡፡ ኣብ እዋን ስራሕቲ ውክልና ህዝቢ ኣባላት እቲ ባይቶ ካብ ክልል መረፀኦም መሰረተ ልምዓት መገዲ ብዝምልከት ዝተልዓሉ ሕቶታት ኢዮም ምስ ላዕለዎት ሓለፍቲ እቲ ሚኒስቴር እናተዛተዩ ዝርከቡ፡፡ ኣፈ ጉባኤ ባይቶ ወከልቲ ህዝቢ ታገሰ ጫፎ÷ ኣብታ ሃገር ሓፈሻዊ ኣብ ዓውዲ መሰረተ ልምዓት መገዲ ዘለዉ ነባራዊ ኩነታት ብምዝታይ ሓበራዊ ግንዛበ ንኽህሉ ዝተሰናደአ መድረኽ ከምዝኾነ ገሊፆም፡፡ ኣብ ዝሓለፉ ዓመታት ኣብቲ ዓውዲ ሰፋሕቲ ስራሕቲ ከምዝተሳለጡ ምግላፆም ካብቲ ባይቶ ዝረኸብናዮ ሓበሬታ የረድእ፡፡

 

  ኣዲስ ኣበባ/ ሚያዝያ/16/ 2016 /ኢዜአ/ቀዳማይ ሚኒስትር ኡጋንዳ ሮቢናህ ናባንጃ ኣብ ኣዲስ ኣበባ ፓርክ ኢንዱስትሪ ቦሌ ለሚ ዑደት ገይረን። ዋና ፈፃሚ ስራሕ ኮርፖሬሽን ልምዓት ፓርክታት ኢንዱስትሪ ኣክሊሉ ታደሰ÷ ነተን ቀዳማይ ሚኒስትር ብምቕባል ሓፈሻዊ ምንቅስቓስን ከይዲ ምፍራይ ኩባኒያታታትን እቲ ፓርክ ከምዘጎብነዩወን ሓበሬታ እቲ ኮርፖሬሽን ኣመልኪቱ።

  ኣዲስ ኣበባ/ሚያዝያ 16/2016 (ኢዜኣ) ጉጅለ ሰብ ሞያታት ትካላት መፅናዕትን ምርምርን ኢትዮጵያን ሩሲያን ኣብ ማዕቐፍ ብሪክስ ምትሕብባር ከጠናኽር ዝኽእል መድረኽ ምኽክር ኣብ ኣዲስ ኣበባ የካይድ ኣሎ። ኣብቲ መድረኽ፤ ዋና ዳይሬክተር ኢንስቲትዩት መፅናዕቲ ፖሊሲ ፕሮፌሰር በየነ ጴጥሮስ፣ዋና ዳይሬክተር ኢንስቲትዩት ጉዳይ ወፃኢ ጃፋር በድሩ፣ካብ ትካላት መፅናዕትን ምርምርን ክልቲአን ሃገራት ዝተወከሉ ሙሁራንን ካብ ዝተፈላለዩ ዘፈራት ዝተውፃእፅኡ ሰብ ሞያታትን ተረኺቦም። ኣብዚ ብኣተሓባባሪነት ኢንስቲትዩት ጉዳይ ወፃኢ ዝተዳለወ ፎረም ሰብ ሞያታት ብሪክስ ኢትዮ-ሩሲያ፤ ምትሕብባር ብሪክስ ከጠናኽሩ ዝኽእሉ ኣብ ሓለዋ ከባብን ለውጢ ከባብያዊ ኣየርን፣ግብርና፣ሳይንስን ቴክኖሎጅን፣ ፋርማሲቲካል ኢንዱስትሪን ካልኦት ዘፈራትን ዝጠመቱ መበገሲ ፅሑፋት ቀሪቦም እናተዘተየሎም ምዃኑ ተገሊፁ። ኣብ ደቡብ አፍሪካ ጆሀንስበርግ ኣብ ዝተኻየደ መበል 15 ጉባኤ ኣባል ሃገራት ብሪክስ ሕቶ ኣባልነት ብሪክስ ኢትዮጵያ ሓዊሱ ግብፂ፣ኢራን፣ሳዑዲ ኣረቢያን ሕቡራት ኣረብ ኢሚሬቲስን ተቐባልነት ከምዝረኸበ ዝዝከር እዩ።

  ኣዲስ ኣበባ/ ሚያዝያ/16/ 2016 /ኢዜአ/ኣብዚ ሰሙን ኣብ ክልል ኣምሓራ ‘ብዛዕባ ዕጥቂ ኣባላት ሚልሻ ይምልከት’ ብዝብል ናይ ሕሶት ሓበሬታ እናተጋወሐ ከምዝርከብ ተሓቢሩ። ንኩለን ዘባታትን ምምሕዳር ከተማታትን ብርእሰ ምምሕዳር እቲ ክልል ኣረጋ ከበደ ዝተፃሕፈ ደብዳቤ ብምምሳል ዝወፅአ ሓበሬታ ፍፁም ሓሰት ከምዝኾነ እቲ ክልል ኣረጋጊፁ። እቲ ተግባር ዝተፈፀመ ኣብቲ ክልል ኮነ ተባሂሉ ዝተፈጠረ ኣንፃራዊ ሰላም ዘላቒ ንምግባር ዝግበር ፃዕሪ ንምጥዕናቓፍ ዝዓለመ ከምዝኾነ እውን ተገሊፁ። በዚ ድማ ኣብቲ ክልል ዝርከቡ ሓይሊታት ፀጥታ ምስ ሰራዊት ምክልኻል ሃገር ብምውዳድ እናምፅኡዎ ዝርከቡ ውፅኢት ኪሳራ ዘብፀሐሎም ሓይሊታት ኣብ ውሽጢ ሚልሻን ሕብረተሰብን ምድንጋር ንምፍጣር ተሓሲቡ ዝተፈፀመ እኩይ ተግባር ከምዝኾነ ተገሊፁ።

  ኣዲስ ኣበባ/ሚያዝያ 15/2016 (ኢዜኣ) መንግስቲ ሕብረ ብሄራዊ ሓድነት ንምጥንኻርን ዘተኣኻኽብ ትረኻ ንምህናፅን ብቆራፅነት እናሰርሐ ምዃኑ ሚኒስትር ኣገልግሎት ኮሚዩኒኬሽን መንግስቲ ዶክተር ለገሰ ቱሉ ገሊፆም። ዶክተር ለገሰ ቱሉ ምስ ኢዜኣ ኣብ ዝነበሮም ፃንሒት፤ ኣብ ኢትዮጵያ ንዘበናት ሱር ሰዲዶም ንዘይምርድዳእ ምኽንያት ኮይኖም ዝፀንሑ ፀገማት ንምፍታሕ መንግስቲ ብርክት ዝበሉ ስጉምትታት እናወሰደ እዩ ኢሎም። መንግስቲ ፖለቲካዊ ኣፈላላያት ብዘተ ንክፍትሑ ከምዝሰርሕ ብምግላፅ፤ ዝተፈፀሙ በደላት ብዕርቂ፣ይቅርታን ፍትሕን ንምሽጋር እውን ፖሊሲ ሽግግር ፍትሒ ከምዝፀደቐ ኣረዲኦም። ኣብ መሰረታዊ ሃገራዊ ዛዕባታት ብሄራዊ ምርድዳእ ንምፍጣር እውን ኣብቶም ዛዕባታት ህዝቢ ዘትዩ መፍትሒ ዘቕርበሉ ሃገራዊ ምኽክር ንምክያድ ስራሕቲ ምድላው እናተዛዘሙ ምዃኖም ሓቢሮም። መንግስቲ ኢትዮጵያዊ ሕብረ ብሄራዊ ሓድነት ንክጠናኸር ፍሉይ ትኹረት ምሃቡ ብምሕባር፤ ማሕበራዊ፣ ኢኮኖሚያውን ፖለቲካውን ምትእስሳራት ምጥንኻር ከምዝግባእ ተዛሪቦም። ሓድነት ኢትዮጵያ ንምፅናዕን ሓድነት ህዝብታት ኣብ ጠንካራ መሰረት ንምንባርን ዘተኣኻክብ ትረኻ ልዑል እጃም ከምዘለዎ እውን ፀሪሖም። ነዚ እውን መንግስቲ ኣብ ብሄራውነት ዝተመስረተ ሓባራዊ ዘተኣኻክብ ትረኻ ንምህናፅ ብቆራፅነት እናሰርሐ ይርከብ ኢሎም።

  አዲስ አበባ/ሚያዚያ/15/2016/ኢዜአ/ መድረኽ ዘተ ዓብዪ ኮሚቴ ብሄራዊ መተሓባበሪ ፎረም ከተማታት ኣፍሪካ ከምዝተሳለጠ መክትል ቀዳማይ ሚኒስትር ተመስገን ጥሩነህ ገሊፆም። እቶም ምክትል ቀዳማይ ሚኒስትር ኣብ ማሕበራዊ ሚዲየኦም ኣብ ዘመሓላለፍዎ መልእኽቲ፥ “ዘላቒ ኢኮኖሚያዊ ክታመ ንትራንስፎርሜሽን ኣፍሪካ-ኣጀንዳ 2063” ብዝብል መሪሕ ሓሳብ እቲ ፎረም መስከረም 2017 ዓ.ም ኣብ ኣዲስ ኣበባ ክካየድ ኢዩ ኢሎም። ስለዝኾነ ሎሚ መዓልቲ መኽፈቲን መጨበጢ ግንዛበን እቲ ፎረም ዝጠመተ መድረኽ ዘተ ዓብዪ ኮሚቴ ብሄራዊ መተሓባበሪ ፎረም ከተማታት ኣፍሪካ ከመዝተሳለጠ ገሊፆም። ኢትዮጵያ ከም ሃገር ታሪካዊ፣ መስራቲት ሕቡራት መንግስታትን ትካል ሓድነት ኣፍሪካን(ናይ ሎሚ ሕብረት ኣፍሪካ) ሃገር ምዃና ኣዘኻኺሮም። ስለዝኾነ እቲ ልዕሊ 1 ሺሕን 500 ዝሳተፍሉ መድረኽ ንምድላው ዝተውሃባ ሓላፍነት ንምውፃእ ድልውቲ ከምዝኾነት ኣብቲ መድረኽ ተረዳዲእና ኣለና ኢሎም።

  ኣዲስ ኣበባ/ ሚያዝያ/15/ 2016 /ኢዜአ/ኣብ ኢትዮጵያ ጥንኩር ስርዓት ጥዕና ጋህዲ ንምግባርን ኩለመዳይ ቀረብ ጥዕና ኣብ ምምሕያሽን ኣድላይ ሓገዝ ከምዝገብር ኮሚሽን ሕብረት ኣውሮፓ አፍሊጡ፡፡ ሚኒስትር ጥዕና ዶ/ር መቅደስ ዳባ ምስ ልኡኽ ኮሚሽን ሕብረት ኣውሮፓ ብሓባር ኣብ ዝስርሑ ጉዳያት ኣድሂበን ተዛቲየን፡፡ ኣብ ዘተአን ድማ ኮሚሽን ሕብረት ኣውሮፓ ዓውዲ ጥዕና ኣብ ምጥንኻር እናሰርሖ ዝርከብ ስራሕ ዝተባብዕ ከምዝኾነ ብምሕባር ምስጋና ኣቕሪበን፡፡ ዘይብዳህ ስርዓት ጥዕና ንምህናፅ፣ ፆታዊ መጥቃዕቲ ንምክልኻልን ኣድላዪ ምላሽ ጥዕና ንመሃብ፣ ስርዓተ-ፆታ ኣብ ዓውዲ ጥዕና ንምክትታል፣ ግልጋሎት ጥዕና ኣእምሮ ተበፃሒ ንምግባር፣ ሰብ ሞያ ጥዕና ንምስልጣንን ንምብቃዕን ከምኡ እውን ብጎንፂ ዝዓነዉ ትካላት ጥዕና መሊስካ ንምጥያሽን ኣብ ከይዲ ምህናፅ ዘለዉ ተግባራትን እቲ ሕብረት ኣድላዪ ሓገዝ ንኽገብር እውን ሓቲተን፡፡ ሓላፊ ኮሚሽን ሕብረት ኣውሮፓ ሮበርቶ ሺሊሮ ብግደኦም÷ ትካሎም ንብዙሓት ዓመታት ኣብ ዓውዲ ጥዕና መሓዛ ብምዃን ኩለመዳይ ስራሕቲ እናወገነ ምፅንሑ ብምዝኽኻር፤ ድልዱል ስርዓት ጥዕና ጋህዲ ንምግባርን ተበፃሕነት ጥዕና ኣብ ምምሕያሽን ኣድላይ ሓገዝ ከምዝግር እውን ኣረጋጊፆም፡፡ በቲ ሕብረት ዝድገፉ ፕሮጀክታት ብዝተሳለጠ መልክዑ ንምውጋንን ዘለዎም ለውጢ ብቕርበት እናተኸታተሉ ንምግምጋምን ዘኽእል ሜላ ምሕንፃፅ ከምዝግባእ ምሕባሮም እውን ሓበሬታ እቲ ሚኒስቴር የመላኽት፡፡

  ኣዲስ ኣበባ/ ሚያዝያ/15/ 2016 /ኢዜአ/ርእሰ ምምሕዳር ክልል ኦሮሚያ ኣይተ ሽመልስ ኣብዲሳ ምስ ኣምናሳደር ፈረንሳ ኣብ ኢትዮጵያ ሬሚ ማሪሾን ዘቲዮም። እቲ ዘተ፥ ኣብ ጉዳያት ኢኮኖሚ፣ ኢንቨስትመንት፣ ግብርና፣ ኢነርጂ፣ ባህሊ፣ ቋንቋን ካልኦት ዛዕባታትን ጠመተ ዝገበረ ከምዝኾነ ተገሊፁ። ኣብ ቀፃሊ ኣብ ሓበራዊ ዛዕባታት ሓቢርካ ንምስራሕ ምስምምዖም እሮም ርእሰ ምምሕዳር ኣብ ማሕበራዊ ሚዲየኦም ኣብ ዘመሓላለፍዎ መልእኽቲ ገሊፆም።

  ኣዲስ ኣበባ/ ሚያዝያ/15/ 2016 /ኢዜአ/ንኢትዮጵያ ዘቐፅልን ኣብ ወተሃደራዊ ሳይንስ ዝበለፀ ተተካኢ ኣመራርሓ ሰራዊት ናይ ምፍራይን ስራሕ ተጠናኺሩ ክቕፅል ኢዩ ክብሉ ላዕለዋይ ኢታማዦር ሹም ሰራዊት ምክልኻል ፊልድ ማርሻል ብርሃኑ ጁላ ገሊፆም። ፊልድ ማርሻል ብርሃኑ ኣብ ቤት ትምህርቲ ኣመራርሓ እዚ ኮማንዶን ኣየር ወለድን ተረኺቦም ኣብ ስልጠና ንዘለዉ ታሕተዎት ሹመኛታት እቲ እዚ ተመክሮኦም ኣማሓላሊፎም። እቶም ሰልጠንቲ ፅባሕ ተካእቲ ብምዃን ሰራዊት ምክልኻል ዝመርሑ ኢዮም ኢሎም። ስለ ዝኾነ ኣብ ወተሃደራዊ ሳይንስ ዝበለፀ ተተካኢ ኣመራርሓ ሰራዊት ናይ ምፍራይ ስራሕ ተጠናኺሩ ክቕፅል ኢዩ ኢሎም ።

  አዲስ አበባ/ሚያዘያ/14/2016/ኢዜአ/ ኢኒሼቲቭ ናይል ቤዚን (NBI) ናብ ኮሚሽንነት ንኽሳገር ሃገራት ተፋሰስ ናይል ምትሕብባርን ንኸፅድቃ ትፅቢት ከም ዝግበረለን ታሓቢሩ። ኢትዮጵያ ነቲ ማዕቐፋት ምትሕብባር ቐዲማ ዘፅደቐትን እቲ ኮሚሽን ድማ ዕላዊ ንክኸውን ግቡእ ሓገዝ እናገበረትን ትርከብ። ጠመትኡ ኣብ ኢኒሼቲቭ ናይል ቤዚን ዝገበረ ዘተ ኣብ ኣዲስ ኣበባ እናተኻየደ ይርከብ። ኣብቲ ዘተ ዋና ዳይሬክተር ኢኒሼቲቭ ናይል ቤዚን ዶክተር ፍሎረንስ ግሬስ ከምዝገለፅኦ፤ ኢኒሼቲቭ ናይል ቤዚን ናብ ዝተሓሰበሉ ኮሚሽንነት ንኽሰጋገር ቖራፅነት ሃገራት ተፋሰስ ናይል ወሳኒ 'ዩ። ኢትዮጵያ ነቲ ማዕቀፍ ምትሕብባር ቐዲማ ዘፅደቐትን እቲ ኮሚሽን ዕላዊ ንክኸውን ግቡእ ሓገዝ እናገበረት ትርከብ ዝበላ እተን ዳይሬክተር፤ ቑፅሪ ነቲ ማዕቀፍ ምትሕብባር ዘፅደቓ ሃገራት ንምዕባይ እናተሰርሐ 'ዩ። ኣብዚ ሕዚ ኣርባዕተ ሃገራት ኣፅዲቐን፣ ኣብ ቐፃሊ ክልተ ሃገራት ከፅድቓ 'የን ተባሂሉ ትፅቢት ይግበር። ኢኒሼቲቭ ናይል ቤዚን (NBI) ናብ ኮሚሽንነት ንኽሰጋገር ኣባል ሃገራት ነቲ ማዕቀፍ ምትሕብባር (CFA) ከም ብሄራዊ ሕጊ ከፅድቓ አለወን ኢሎም። ኣብ መንጎ ሃገራት ተፋሰስ ናይል ሓድነት፣ ብሓባር ምዕባይ፣ ንኹሉ ዝሓቖፈ ምትሕብባር ምርግጋፅ፣ ሓባራዊ ኢኮኖሚያዊ ፕሮጀክትታት ንኽህልው ኢኒሼቲቭ ናይል ቤዚን እናሰርሐ 'ዩ። ሚኒስትር ዴኤታ ማይን ኢነርጅን ዶክተር ኣብርሃ ኣዱኛ ብወገኖም፤ ኢኒሼቲቭ ናይል ቤዚን ውፅኢታት እናመዝገበ 'ዩ። ኮሚሽን ኢኒሼቲቭ ናይል ቤዚን ንኽጣየሽ ኢትዮጵያ ኣድላይ ድጋፍ ክትገብር 'ያ ኢሎም።

  ኣዲስ ኣበባ/ ሚያዝያ/12/ 2016 /ኢዜአ/ምክትል ቀዳማይ ሚኒስትር ኣይተ ተመስገን ጥሩነህ ሃዋሳ ኣትዮም። ብተወሳኺ ከንቲባ ምምሕዳር ኣዲስ ኣበባ ኣዳነች ኣቤቤን ካልኦት ላዕለዎት ሓለፍቲ ስራሕ መንግስቲን ናብታ ከተማ ከምዝኣተዉ ተገሊፁ። እቶም ሰብ መዚ መንግስቲ ኣብ ዓለም ለኸ መዕርፎ ነፈርቲ ሃዋሳ እንትበፅሑ፥ ርእሰ ምምሕዳር ክልል ሲዳማ ደስታ ሌዳሞን ካልኦት ላዕለዎት ሓለፍቲ ስራሕ እቲ ክልልን ኣቀባብላ ገይረሙሎም። እቶም ሓለፍቲ ስራሕ ኣብ ፃንሒቶም፥ ኣብ ስራሕቲ መርሃ ግብሪ “ሌማት ትሩፋት” ክምልከቱ እዩም ተባሂሉ።