Caamsaa 13 /2017(TOI)-Naannoo Kibba Itiyoophiyaatti sagantaa Ashaaraa Magariisaan bara Kana lafa hektaara kuma 83 ol biqiltuu dhaabuuf qophiin taassifamuu Biiroon Bosonaa, Kunuunsaa fi misooma Naannoo beeksise. Hogganaan Biirichaa Obbo Gizaatee Gijee TOI’f akka isanitti, naannichatti sagantaa ashaaraa magariisaan biqiltuuwwan lafa hektaarakuma 83 fi 395 irra dhaabuuf qophiin taassifamu himaniiru. Biqiltuuwwankun Naannichatti Godinaalee12tti Mootummaan, Namoota dhuunfaan, waldaalee fi dhaabbilee Mit-Mootummaan buufata biqiltuu kuma 1 fi 495 qophaa’uu isaanii dubbataniiru. Biqiltuuwwan qophaa’an eegumsa naannoo dabalatee faayidaa hedduu qabaachuu isaanii ibsaniiru. Amma irratti dhaabbii isaa milkeessuuf kan deeggaran qophii boollaa fi haaldureewwan hojii biroon cimanii itti fufuu ibsaniiru. Obbo Gizaateen Sagantaan Ashaaraa magariisaa faayidaa hedduu kan qabu ta’uu ibsuun, madaala Qilleensaa sirreessuu irra darbee, gabbina biyyee fi hamma bishaanii dabaluun omishaa fi omishtummaan mirkanaa’u akka dandeessisuu dubbataniiru. Dabalataanis tattaaffii hirkattummaa iraatii gara omishitummaatti ce’uuf taassifamu deeggaruu irra darbee dadammaqinsa Ikkoo Turiizimiitiif bu’aa buusaa jiraachuu ibsaniiru. Naannoo kibba Itiyoophiyaatti bara 2011 uwwisni bosonaa dhibbentaa 17 kan ture yoo ta’u, sochii Ashaaraa magariisaa itti fufinsaan taassifameen uwwisni bosonaa gara dhibbentaa 23 tuqaa 17tti guddachuu ibsaniiru.

Caamsaa 04/2017(TOI)- Sagantaa biqiltuu dhaabuu ashaaraa magariisaa naannoo Oromiyaa baranaaf qophiin taasifamu cinmee itti fufuu biiroon qonnaa naannichaa beeksise. Itti aanaan hoogganaa biiroo qonnaa naannichaa Eliyaas Kadir TOI’f akka ibsanitti, sagantaa kana milkaa’inaan raawwachuuf biqiltuun addaddaa qopheeffamaa jira. Biqiltuun Mukkeen Mandhalee, muduraa fi nyaata looniif xiyyeeffannoo taasifameera jedhan. Biqiltuu naannichatti barana qopheeffaman keessaa harki 11 nyaataaf kan oolan Avokaadoo, Muuzii, Paappaayyaa, Zayituunaa, Temirii, maangoo akka akka ta’an dubbataniiru. Kan hafan misooma bosonaa fi tajaajila biroof kan oolan ta’uu himaniiru. Biqiltuu barana dhaabamuuf lafti heektaara miiliyoona 1 caalu qophaa’ee boolla biqiltuu qopheessuun itti fufuu ibsaniiru. Daarektarri olaanaa abbaa taayitaa eegumsa naannoo Oromiyaa Sayifaddiin Mahaadii gamasaaniin, biqiltuun buufataalee biqiltuutti qopheeffaman yeroo yerootti dhaabbiif qaqqabuunsaa hordofamaa akka jiru ibsaniiru. Xiyyeeffannoon bara kanaa mukeen mandhaleerratti ta’uu dubbataniiru. Biqiltuun Muduraa baddaa keessumaammoo Appiliin bal’inaan qophaa’uu himaniiru.

Caamsaa 02/2017(TOI)-Godina Boorana Bahaatti hongee fi mancaati naanaannoo ittisuuf sululawwan 99 irratti hojiin qabeenya uumamaa kunuunsuu Qajeelchi Qonnaa Godinichaa Beeksise. Hojii misooma sululaa kanarratti uummanni Godinicha kuma 188 ol hirmaachun yoo ibsame, lafa margaa hektaara kuma 12 ol tutuqqaa irraa daanga’uu ibsaniiru. Waajjirichatti Dursaan Garee Qabeenya Uumamaa Obbo Aliyyi Arebaa hojii misooma sululaa qindaa’aan irra caalaan naannichatti mancaatii mudatuu fi hongee ittisuuf yaadamee hojjetamaa kan jiru ta’uu ibsaniiru. Kanaanis baatiiwwan Bonaa Godinichatti Aanaa hundatti lafa hektaara kuma 63 irratti Eegumsi Misooma Biyyee fi bishaanii gaggeeffameera. Hojiin misooma sululaa, Oyiruu, gaarreen irratti daagaa ijaaruu , burqaa bishaanii kunuunsuu fi biqiltuu qopheessuun hojjetamuu ibsaniiru. Hojii sululawwan 99 irratti hojjetamee irratti uummanni kuma 188 ol hirmaachuu ibsuun, boolla biqiltuu keessa dhaabamu kuma 500 qophaa’uu ibsaniiru. Akkasumas gosa bishaanii Baatii Bonaatti tajaajila kennan12 qophaa’uu ibsaniiru. Misooma Sululaatiin Lafa hektaara kuma 10tti dhihaatu loon akka hin dheedne daangessuuf karoorfamee heltaarri kuma 12 ol daanga’uu ibsaniiru. Jiraattonni Godinichaa harki caalaan horsiisa looniin jireenya isaanii kan gaggeeffatan yoo ta’u, lafti margaa Daangeffame beelladoota Kuma 60 Ol Fayyadamoo nitaasisa jedhaniiru.

Ebla 30/2017(ToI)-Sagantaa Ashaaraa Magariisaatiin uwwisa Bosona Itiyoophiyaa irratti jijjiiramni guddaan dhufaa jiraachuu Daarektarri Olaanaan Misooma Bosonaa Obbo Kabbadaa Yimaam Ibsan. TOI Sagantaa Misooma Magariisaan Uwwisa Bosonaan faayidaa argisiisu irratti, Misooma Bosona Itiyoophiyaa fi Koree Olaanoo Ashaaraa Magariisaa waliin turtii taassisaniiru. Daarektarri Olaanaan Misooma Bosona Itiyoophiyaa Obbo Kabbadaa Yimaam akka jedhanitti, Itiyoophiyaan Dinagdee jijiirama qilleensaan hin miidhamne ijaaruuf karoora qabatte keessaa sagantaan Ashaaraa Magariisaa isa olaanaa ta’uu ibsaniiru. Sagantichi ammaan dura miidhaa qabeenya uumamaa irra gahaa ture ittisuu irra darbee uwwisa bosonaa guddisaa dhufuu ibsaniiru. Ammaan dura miidhaan Qabeenya Uumamaa irra gahaa turuu ibsuun, sagantaan Ashaaraa Magariisaa hojiirra ooluu erga jalqabee fedhii qoraanii fi Ijaarsaa Guutuu irra darbee Miidhaan Misooma Bosonaa irra gahu akka hir’atuuf gumaacha guddaa gumaachuu ibsaniiru. Sagantichi dhiqama biyyee ittisuun hidhi haaromsaa dubbishiin akka hin guutamne gochuu irra darbee lageen waggaa guutuu yaa’insa madaalawaa akka qabaatan gochuuf faayidaa olaanaa argamsiisuu himaniiru. Waggaa waggaan bosona hektaara kuma 29 irratti Mancaatiin gahaa kan ture Qorannoo Waggaa darbe gaggeeffameen gara hektaara kuma 27tti gad hir’achuun milkaa’ina guddaa ta’uu obbo Kabbadeen beeksisaniiru. Biqiltuuwwan dhaabaman xaawulaa fi omisha mukaa biroo sharafa Alaan argamu bakka bu’uuf abdiin kan ta’udha jedhaniiru. Walitti qabaan Koree Teeknikaa Ashaaraa MagariisaaDr.Adafris Warquu Biqiltuuwwan Sagantichaan Dhaabbaman uwwisa bosona biyyittii guddisuu kan danda’an gosa bosonaa dhibbentaa 40 hanga 48 ta’uu ibsaniiru. Kunis qabeenyi uumamaa akka hin badne uwwisa bosonaa guddisuun gosa sanyii Biqiltootaa eeguun dhalootaaf dabarsuuf fayidaa qabaachuu ibsaniiru. Bara kana Biqiltuuwwan dhaabbachuuf qophaa’an keessaa Biliyeena 2 tuqaa 3 kan ta’an gosa mandhaalee mukeen akka ta’an xiyyeeffannoon kennamuu ibsaniiru. Kunis milkaa’ina guddaa ta’uu himuun, gosni mukeenii mandhaaleen baduuf turan oolchuun faayidaa nannoof, hawaasummaa fi Dinagdeef qabaachuu Dr. Adafris Ibsaniiru.

Ebla 27/2017(TOI)-Pirojektoonni misoomaa fi Invastimantii haala oomishaa faalama naannoo hubannoo keessa galcheen ta’uu akka qabu to’annoo fi hordoffii taasisaa akka jiran hooggantoonni damee kanaa naannoo Amaaraa fi bulchhiinsa Dirree Dawaa TOI’n haasofsiise dubbatan. Abbaa taayitaa naannawaa fi eegumsa bosonaatti daarektarrai jijjiirama naannawaa fi jijjiirama haala qilleensa obbo Awwaqee Yittaay akka jedhanitti, faalamni geejjibni, hafteen industirii, sagalee fi kanneen biroo faalama naannawaaf sababa ta’uu dubbataniiru. Industiriiwwan hedduun naannicha keessatti akka argaman eeranii, Pirojektoonni Invastimantii fi misoomaa faalama naannoo hubannoo keessa galchuun oomishuu akka qaban to’annoo fi hordoffiin akka taasifamu himaniiru. Haala walfakkaatuun daarektarri abbaa taayitaa naannawaa, bosonaa fi eegumsa bineensa bosonaa naannawa bulchiinsa Dirree DawaaObbo Darajjee Abbittii, naannichatti faalama naannawaa, sagalee fi bishaaniif xiyyeeffannoon taasifamuu ibsaniiru. Industiriiwwan dabalatee pirojektoonni misoomaa fi dhaabbileen tajaajila kennan akkaataa seeraa fi danbiin akka hojjetan to’annaan taasifamaa akka jiru eeraniiru. Mariin dhiibbaa jijjiiramni haala qilleensaa geessisu bifa walsimee fi qindoominaan damdamachuun akka danda’amu tibbana mariin magaalaa Adaamaatti taa’amuun niyadatama.

Ebla 24/2017 (TOI)- Dargaggoonni Iluu Abbaa Booraa waldaan gurmaa’anii sagantaa ashaaraa magariisaaf biqiltuu qopheessaa akka jiran ibsan. Sagantaa ashaaraa magariisaaf biqiltuuwwan garagaraa qophheeffamaa akka jiran waajjirri qonnaa godinichaa ibseera. Dargaggoonni aanaa Yaayyoo TOIn haasofsiise waldaan gurmaa’anii biqiltuu qophheessuun faayidaa argachuuf hojjechaa akka jiran ibsaniiru. Carraan kun kan uumameef keessaa jiraataan aanaa Yayyoo dargaggoo Yohaannis Warquu keessumaa biqiltuu muduraa baay’inaan qopheessaa akka jiru ibseera. Biqiltuu amma ammaatti qopheessanirraa birrii kuma 400 akka abdatan eereera. Dargaggoo Fadluu Shaafii gamasaatiin hiriyyootasaa waliin ta’uun sagantaa ashaaraa magariisaaf biqiltuu qopheessaa akka jiru dubbatee, kanarraas birrii kuma 800 argachuuf karoorfateera. Dargaggoonni galii argataniin ala hojicharraa muuxannoo argachaa akka jiran dubbatee fuulduras caalaatti fayyadamuuf hojjechaa akka jiran eereera. Itti aanaan hoogganaa waajjira qonnaa godinichaa obbo Malkaamuu Caalii, biqiltuun mukaa, nyaata loonii, akkasumas muduraawwan nyaataaf oolanii fi kanneen biroo akka ta’an dubbataniiru. Keessumaa biqiltuuwwan kuduraa nyaataa fi faayidaa dinagdeef oolan qopheeffamaa akka jiran himaniieu. Erga sagantaan ashaaraa magariisaa eegalamee asitti namoota godinichaa hedduuf carraan hojii waan uumameef namoonni hojii kana hojjetan faayyadamoo dinagdee ta’uusaanii dubbataniiru. Biqiltuu ashaaraa magariisaa waggoottan darban dhaabamaniin bosonna naannichaa dhibbantaa 71tti guddisuun akka danda’ame himaniiru.

Ebla 24/2017(TOI)-Sagantaan ashaaraa magariisaa Itiyoophiyaan raawwachaa jirtu faayidaan gurgurtaa Kaarbooniirraa argamu akka dabalu gumaacha guddaa kan qabu ta’uu hayyoonni damee kanarratti hojjetan ibsan. Dhiibbaa jijjiiramni haala qilleensaa geessisu qolachuuf biyyoonni addattis ta’e waloomaan tarkaanfiiwwan garagaraa nifudhatu. Jijjiirama haala qilleensaaf sababadha jedhamuun kan eeraman biyyoota guddatan ta’us rakkoof kan saaxilaman garuu biyyoota guddachaa jiran ta’uu hayyoonni damee kanaa nidubbatu. Addunyaan hoo’ina olaanaa, lolaa fi ongeen qoramaa yoo jiraattu, bosonni manca’uun, lafti qullaatti hafuun, gaaziin Industiriiwwan keessaa bahan kanaaf ka’umsa ta’uu ni’ibsu. Sagantaan ashaaraa magariisaa dhiibbaa kana qolachuuf Itiyoophiyaan itti jirtu bosona dabaluu fi naannawa eeguuf qooda guddaa bahaa akka jiru hayyoonni TOI waliin gaaffii fi deebii taasisan ni’ibsu. Qindeessaan sagantaa ashaaraa magariisaa biyyaalessaa Dr.Adafris Warquu sagantaan ashaaraa magariisaa Itiyoophiyaan itti jirtu bosona haphatee ture akka fooyya’u gumaachuusaa ibsaniiru. Uwwisi bosonaa yeroo ammaa dhibbantaa 23 ol qaqqabuusaa qorannoon bara darbe taasifame ifoomsuusaa eeraniiru. Kuusaan Kaarboonii guddaan Itiyoophiyaa keessa akka jiru fi kana keessaa irra caalaan bosona keessatti kan argamu ta’uu kaasaniiru. Sagantaan ashaaraa magariisaa bosona dabaluun alatti galii gurgurtaarraa Itiyoophiyaan argattu akka dabalu qooda olaanaa akka bahu dubbataniiru. Itiyoophiyaan kuusaa kaarboonii guddaa akka qabdu ibsaniiru. Yuunivarsiitii Finfinneetti hoogganaan kutaa barnoota saayinsii uumamaa fi barsiisaa fi qorataan ikoo siistamaa Dr. Biqilaa Warqinaa gamasaaniin, Itiyoophiyaan dhiibbaa jijjiirama haala qilleensaa hinmalle qolachuuf hojiilee eegumsa qabeenya uumamaa hojjechaa jirti jedhan. Bosona guddisuun faayidaa gurgurtaa kaarbooniirraa argamu guddisuuf nigargaara jedhaniiru. Faayidaa bosona dabaluun Itiyoophiyaan argatte keessaa gurgurtaa faayinaansii kaarboonii raawwachuushee fi kun wayita hojiirra oolu ikoo siistama caalaatti eegsisuuf jireenya qonnaan bulaa fi horsiisee bulaa jijjiiruuf nidandeessisa jedhaniiru. Waliigaltee gama Kanaan Itiyoophiyaan baankii addunyaa fi Noorweey waliin mallatteessite Waabeffataniiru. Dabalataanis Itiyoophiyaan deeggarsa maallaqaa pirojektoota eegumsa qabeenya uumamaa hojiirra oolchaa jirtuuf oolu argachaa akka jirtu ibsaniiru. Ashaaraa magariisaa dabalatee hojiileen Itiyoophiyaan eegumsa naannoo fulla’aa irratti hojjechaa jirtu sirriitti akka beekaman dippilomaasii jijjiirama haala qilleensaa cimsuun nibarbaachisa jedhaniiru.

Ebla 18/2017 (TOI):-Naannoo Oromiyaa godina Wallagaa Bahaa fi Harargee Lixaatti biqiltuuwwan akaakuu garagaraa ganna dhufu Sagantaa ashaaraa Magariisaan dhaabamu qophaa’aa jiraachuu waajjiraalee qonnaa godinootaa beeksisaniiru. Akka itti gaafatamaan Waajjira Qonnaa godina Wallagaa Bahaa Asfaaw Hambisaa ibsanitti, Sagantaa ashaaraa Magariisaa bara kanaatiin biqiltuu miiliyoona 544 ol godinicha keessatti dhaabuuf qophiin taasifamaa jira. Waggoota darbanitti biqiltuu dhaabame irraa hawaasni fayyadamoo ta’uu hubachiisuudhaan, bara kana kana caalaa hojjechuuf qophiin taasifamaa jira jedhan. Waajjirichatti gaggeessaan adeemsa hojii sululaa fi misooma bosonaa Obbo Dassaleny Bal’ataa, godinichatti sagantaa ganna bara kanaatiif biqiltuuwwan bosonaa, nyaata horii, fuduraalee fi biqiltoota biroo qophaa’uu ibsaniiru. Haaluma walfakkaatuun, Itti Gaafatamaan Garee Misooma Qabeenya Uumamaa Waajjira Qonnaa fi Misooma Qabeenya Uumamaa godina Harargee Lixaa obbo Waasee Baqqalaa Sagantaa ashaaraa Magariisaa bara kanaaf baroota darban caalaa haala fooyya’aa ta’een qophiin taasifamaa jira jedhan. Bara kanas biqiltuuwwan gosa adda addaa miiliyoona 413 ol godinicha keessatti dhaabuuf qopheeffamaa kan jiran yoo ta’u, kana keessaa miiliyoona 82 ol biqiltuu firii kan akka giishxaa, avokaadoo; maangoo akka ta’an ibsaniiru. Lakkoofsi gosoota muka firii bara kana dhaabuuf karoorfame kan bara darbee miiliyoona 20 ol ta’uu agarsiisaniiru. Biqiltuun firii waggaa waggaan godinicha keessatti dhaabamaa jiru galii qonnaan bulaa dabaluu fi wabii nyaataa mirkaneessuuf gumaacha taasisaa jiraachuu ibsaniiru.

Ebla 16/2017(TOI)- Naannoo Amaaraatti sagantaa ashaaraa magariisaa ganna dhufu adeemsifamuuf lafa miidhame heektaara kuma 207 irra biqiltuu dhaabuuf qophiin taasifamaa jiraachuu biiroon qonnaa naannichaa beeksise. Lakkoofsa marsaa jalqabaa taasifameen biqiltuu ganna darbe naannichatti dhaabame biiliyoona 1 tuqaa 4 ol keessaa harki 85 qabateera jedhame. Biiroo qonnaa naannichaatti daarektarri eegumsaa fi itti fayyadama misooma qabenya uumamaa obbo Ismala’alam Mihirat ibsa TOI’f kennaniin, naannichatti lafa sababa namtolchee fi uumamaan miidhame bosona gochuuf hojjetamaa jira. Hojii amma ammaatti hojjetameen qophiin biqiltuu karaa mootummaan, dhuunfaa, waldaalee fi dhaabbileedhaan cimee itti fufuu himaniiru. Uwwisi bosonaa naannichaa amma jiru biqiltuu dhaabamuun harka 16 tuqaa 3 irraa gara harka 17 tuqaa 3tti guddisuuf kan yaadame ta’uu ibsaniiru.

Ebla 14/2017 (TOI)- Giddu-galli odeeffannoo haala qilleensaa Baha Afrikaa guyyoota itti aananitti naannawoota daangaa Itiyoophiyaa, Sudaan fi Sudaan Kibbaatti, akkasumas kaaba baha Keeniyaatti ho’i idilee ol akka galmaa’u beeksise. Akka odeeffannoon raaga qilleensaa ‘ICPAC’ ibsutti, guyyoota saddeet dhufan keessatti naannoolee Sudaan fi Itiyoophiyaa hedduu keessattuu naannoo Affaar keessatti ho’i ol’aanaan ni galmaa’a jedhamee eegama. Sudaan Kibbaa fi Eertiraa, akkasumas naannawoota kaaba, dhihaa, fi baha Itiyoophiyaa keessatti ho’i giddu galeessaa hanga ol’aanaa ni mudata. Jibuutii, Somaaliyaa, Yugaandaa, Keeniyaa fi Taanzaaniyaa keessatti ho’i giddu galeessaa hanga ol’aanaa galmaa’uu akka danda’u odeeffannoon raga qilleensaa ni mul’isa. Eertiraa, Jibuutii, Taanzaaniyaa, Itiyoophiyaa, Yugaandaa, dhiha Keeniyaa, akkasumas giddu-galeessa fi kaaba Somaaliyaa keessatti ho'i idilee ol ta'a jedhamee eegama. Roobni xiqqaan kutaalee dhiha Itiyoophiyaa, Ruwaandaa, Burundii, kaabaa fi kibba Taanzaaniyaa, dhiha Yugaandaa, fi naannoo qarqara galaanaa Keeniyaattis ni eegama. Tajaajilli Odeeffannoo Haala Qilleensaa Baha Afrikaa (ICPAC) haala qilleensaa fi taateewwan haala qilleensaa kanaan walqabatan biroo raaguun xiinxaluu, akkasumas ergaa akeekkachiisa dursaa waliif qooduun beekama.

Ebla 14/2017(TOI)- Guyyoota 10 dhufan naannawoota qonna Arfaasaa raawwatan hedduutti haalli meetirooloojii itti fufu Inistiitiyuutiin mitiwoorooloojii Itiyoophiyaa beeksise. Inistiitiyuutichi ibsa TOI’f ergeen naannawoonni kibbaa, kibba lixaa, lixaa, bahaa akkasumas riifti vaalii bokkaa ni’argatu. Naannawoonni biyyattii kibbaa fi kibba lixaa rooba jiddugaleessaa akka argatan inistiitiyuutichi raageera. Naannawoota Arfaasaa qotaman dabalatee, kibba lixaa fi lixa akkasumas lixa Kaaba biyyattii rooba xiqqaa amma jiddugaleessaatti akka argatan injistiitiyuutichi ibseera. Rooba darbee darbee cimurraa ka’uun kibba, kibba bahaa fi kibba lixaa biyyattiitti sa’aatii 24 keessatti roobni cimaan miilii meetirii 30 ol akka argatan raagamuu beeksiseera. Humna aduu Epiriil guyyoota sadan kurnaniitti jiruun walqabatee keessumaa Gaambeellaa, Affaar, Somaalee, Beeniishaangul Gumuzii fi lixa amaaraatti hoo’inni olaanaan kn guyyaa digirii seelshiyeesii 35 akkasumas bakkeewwan muraasatti digirii seelshiyeesii 40 ol akka ta’u odeeffannoon raaga inistiitiyuutichaa nimul’isa.

Ebla 09/2017 (TOI)- Itiyoophiyaan yaa’ii P4G shanaffaa akka keessummeessitu minisirri muummee Dr. Abiyyi Ahimad ibsan. Yaa’iin Hanooy xiqqaa ta’anis pirojektoonni P4G haalaan kan qindaa’an bu’aa gaarii akka argamsiisanii fi guddisuufis humna guddaa kan qaban ta’uusaanii agarsiisuu isaa ministirri muummee ergaa fuula marsariitii isaaniirrastti barreessaniin ibsaniiru. Yaa’ii P4G shanaffaa bara 2027 gaggeeffamukeessummeessuuf guca fudhachuunshee naboonseera jedhan. Carraa kana ciminaa fi kutannoon qabachuun dhaala qophii milkaa’aa Veeyitinaam, Kolombiyaa, Deenmaark, fi kooriyaa Rippaabiliikitti mul’ate itti fufsiifna jechuun dubbataniiru. Yaa’ichi qajeeltoowwan P4G tumsa, kalaqa, hammattummaa fi gocha jedhaniin qajeelfamee akka adeemsifamu himaniiru. Yaa’iin Itiyoophiyaan bara 2027 qopheessitu misooma industirii magariisaa, qonna jijjiirama haala qilleensaa damdamatu akkasumas dargaggootaa fi barbaachisummaa dubartoota ga’oomsuun cehumsa magariisaaf raawwachiiftota murteessoo gochuu irratti xiyyeeffatee niqophaa’a jedhan ergaa dabarsaniin.

Ebla 08/2017(TOI)-Foramiin raaga haala qilleensaa gaanfa Afriikaa (GHACOF 70) Caamsaa 11 fi 12 bara 2017 Finfinneetti nitaa’ama. Foramichi Mata duree “tajaajilli haala qilleensaa,dandeettii ofeeggannoo dursaa waloomaan cimsuu” jedhuun adeemsifama. Raagni haala qilleensaa IGAD fi jiddugalli appilikeeshinii (ICPAC) deeggartoota misoomaa waliin ta’uun foramicha akka qopheessan ibsameera. Raawwiin raga haala qilleensaa A.L.A march amma meey 2025tti jiru irratti mariin akka taasifamu IGAD ibsa TOI,f ergeen beeksiseera. Foramichi haala qilleensaa riijinii A.L.A Juun irraa amma Septambaritti jiru akka ifoomsu himeera. Tarsiimoowwan raagaa fi bulchiinsa haala qilleensaa ilaalchisuun mariin nitaasifama. Biyyoonni miseensa IGAD, qorattoonni damee kanaa, imaammata baaftonni, deeggartoonni misoomaa fi kanneen damee kanarratti hojjetan foramicharratti nihirmaatu. Foramii ijoon duratti woorkishooppiin raga haala qilleensaa fi Kanaan walqabatan akka adeemsifamu IGAD beeksiseera. Foramiin raga haala qilleensaa gaanfa Afriikaa Amajjii bara 2017 Finfinneetti taa’amuun niyaadatama.

Ebla 08/2017(TOI)-Riifoormiin Itiyoophiyaan dinagdee dijitaalaa irratti gochaa jirtu ulaagaa tiraanisfoormeeshinii dijitaalaa idil addunyaatiin sadarkaa gaariirratti akka argamtu gochuusaa ministirri Innoveeshinii fi Teeknoloojii Dr. Ballaxaa Mollaa ibsan. Ministiroonni, hooggantoonnii fi hojjettoonni dhaabbilee itti waasmamaa bakka argamanitti raawwiin karooraa baatii sagalii bara bajataa 2017 ministeera pilaanii fi misoomaa qoratamaa jira. Ministirri Innoveeshinii fi Teeknooloojii Dr. Ballaxaa Mollaa akka jedhanitti, mootummaan jijjiiramaa dinagdee dijitaalaa dabalatee riifoormii hedduu hojeesseera. Haala Kanaan waggoottan toorban darban dinagdeen biyyattii guddachuu kaasaniiru. Imaammanni riifoormii dinagdee gooroo hojiirra ooluunsaa bu’aa argisiisuusaa himanii, dinagdee dijitaalaa ijaaruuf hojiileen hedduun hojjetamuu ibsaniiru. Fakkeenyaaf tarsiimoo riifoormii dinagdee mandhalee fi dijitaal Itiyoophiyaa 2015 hojeessuun jijjiiramni qabatamaa argamuu kaasaniiru. Dinagdee dijitaalaa hammataa ijaaruuf leenjiin koodarsii Itiyoophiyaanota kuma shanii kennamaa akka jiru dubbataniiru. Itiyoophiyaan ulaagaa dijitaal tiraanisfoormeeshinii idil addunyaatiin adarkaa gaariirratti akka argamtu hojiileen kunneen qooda bahaniiru jedhan. De’etaan ministira pilaanii fi misoomaa Siyyum Mokonnon gamasaaniin, waggoottan toorban darban riifoormii garagaraa gochuun bu’aan guddaan galmaa’eera jedhaniiru. Raawwii baatii sagal darbanii waltajjii kanarratti qorachuun hojiilee baatii sadan dhufan hojjetaman irratti kallattiin akka kaa’amu eeraniiru.

Ebla 08/2017(TOI)-Hojiin misooma Sululaa Naannoo Oromiyaatti hojjetamaa jiru qabiyyee lafaa eeguu irra darbee guddina oomishaa fi oomishtummaa qonnaa irratti bu’aa qabatamaa fiduusaa biiroon qonnaa naannichaa beeksise. Itti Aanaan Biiroo Qonna Oromiyaa obbo Eeliyaas Kadir TOIf akka ibsanitti, naannichatti Hojiin misooma sululaa Amajjii15/2017 irraa eegalee hojjetamaa jira. Dambalii uummataan kan eegale hojiin misooma sululaa bifa saayinsaawaan akka hojiirra oolu naannoo irraa hanga aanaatti ogeessotaa fi hoggantootaan deeggarsii fi hordoffiin taassifamaa turera. Naannichatti sululawwan kuma 6 fi 400 irratti, lafti hektaara miiliyona 3 tuqaa 3 ta’u guyyoota 60 tti sosochii hawaasaan hojjetamuu ibsaniiru. Kana irratti uummanni naannichaa hirmaachuu kan ibsan Obbo Eeliyaas, “qabeenya naannichaa eegnee dhalootaaf dabarsuuf hojiiwwan bu’uura hojjetamaa jira” jedhaniiru. Naanichatti hojiin misooma sululaa baroottan darban hojjetameen Godinoota Bahaa fi Lixa Harargeetti Haroon Haroomayyaa fi lageen goganii turan deebi’anii bishaan kuufatanii tajaajila Misooma Jallisiif oola jiru. Akkasumas, Misooma Sululaan Misooma Bunaa, Kuduraa fi fuduraa, eegumsa biiyyeen jijiiramni qabatamaan dhufeera jechuun ibsaniiru. Haaluma wal fakkatuun, dhiibbaa jijiirama qilleensaa dandamachuun fi miidhaa qaqqabu hanbisuuf hojii hojjetameen dhiqamni biyyee hir’achuu dandahuu ibsaniiru. Hojii hojjetameen dargaggootaa fi dubartootaaf carraa hojii kunuunsa eegumsa naannoo, misooma nyaata horii fi misooma kaanniisaa abbummaa fudhatanii hojjechaa kan jiran tahuu ibsaniiru. Hojii misooma sululaa bara kana hojjetameen lafa hektaara kuma 670 ol tuttuqaa irraa bilisa tahee akka Misoomu tahaa jiraachuu ibsaniiru.

Ebla 04/2017(TOI)-Godina Shawaa bahaa Mojoo fi Luumeetti qophii biqiltuu fi hojiilee qonnaa qindaa’aa ilaalchisuun sagantaan adeemsifameera. Miseensonni hooggansa sektara qonnaa naannolee biyyattii garagaraa irraa walitti dhufan godinicha tti buufata biqiltuu fi kilaastara Avokaadoo naannawoota Mojoo fi Luumeetti argamuun daawwataniiru. Itti aanaan biiroo qonnaa Hararii obbo Nasraddiin Ahimad TOI’f yaada kennaniin, buufanni biqiltuu Mojootti argine kan gurmaa’ee fi qinda’edha. Qophii biqiltuu fi hojii qonnaa qindaa’e keessumaa misooma Avokaadoo, kanniisa horsiisuu fi qophii xaa’oo uummamaa jiddugala tokkotti hojjetamaa akka jiru ilaalleerra jedhan. Kanarraas muuxannoo arganneerra jedhaniiru. Biiroo qonnaa fi qabeenya uumamaa naannoo Affaritti daarektarri baayoo daayivarsiitii obbo Alii Ibraahim gamasaaniin, qophii biqiltuu fi hojii qonnaa qindaa’aarraa muuxannoo fi beekumsa arganneerra jedhaniiru. Keessumaa biqiltuuwwan nyaataa garagaraa jallisiidhaan qopheessuun akka danda’amu hubachuusaanii eeraniiru. Biiroo qonnaa fi qabenya uumamaa naannoo ummattoota kibbaa Lixaa Itiyoophiyaarraa kan dhufan obbo Bayyanaa Balaachoo, buufanni biqiltuu Mojoo fi kilaastarri Avokaadoo beekumsaa fi ogummaan kan qophaa’e ta’uu daawwannaarraa hubachuusaanii ibsaniiru. Naannoon isaanii misooma Avokaadoof mijataa waan ta’eef biqiltuu Avokaadoo oomisha olaanaa kennan naannoo Oromiyaarraa binnee nidiqaalomsina jedhaniiru. Itti aanaan bulchaa aanaa Luumee fi hoogganaan biiroo qonnaa obbo Lammii Irkoo sagantaa ashaaraa magariisaa baranaaf Muduraa fi nyaata looniirratti xiyyeeffannee hojjechaa jirra jechuun ibsaniiru. Yeroo ammaa oomishni Avokaadoo yeroo afraffaaf aanicharraa karaa gabaa jiddugalaa alatti ergauu eeranii, Biqiltuuwwan Avokaadoo dabalataa biyya alaatti erguuf inistiitiyuutii tiraanifoormeeshinii qonnaa waliin hojjechaa akka jiran dubbataniiru. Ministeera qonnaatti hojii raawwachiisaan durss misooma qabeenya uumamaa fi eegumsaa obbo Faanosee Mokonnon, daawwannichi qophiin biqiltuu ashaaraa magariisaa ganna dhufu dhaabamuu muuxannoo walii qooduuf kan qophaa’e ta’uu ibsaniiru. Keessumaa qophiin biqiltuu muduraa buufata biqiltuu Mojoo muuxannoon kan irraa fudhatamu ta’uu dubbataniiru. Qophiin biqiltuu ashaaraa magariisaa baranaa harki 60 Muduraa, nyaata loonii fi miidhaginaaf kan oolan yoo ta’u, harki 40 misooma bosonaaf oola jedhaniiru.

Ebla 4/2017 (TOI )-Bara Bajataa 2017tti sagantaan qindaa’aan Misooma Qabeenya Uumamaa amma ammaatti sululawwan kuma 21tti kunuunsa naannoo, ittisa biyyee fi bishaanii, hanga ammaatti sululawwan kuma 21 irratti hojjetamuu isaa ministirri Qonnaa beeksiseera. Bara kana guutummaatti lafa hektaara miiliyoona 5 ol misooma sululaan karooraan qabamee hojjetamaa jiraachuu ministeerichatti hojii raawwachiisaan dursaa kuunuunsa misooma qabeenya uumamaa fi ittifayyadamaa obbo Faanosee Mokonnin TOIf ibsaniiru. Misooma qabeenya uumamaa fulla’aa eegsisuun oomishaa fi oomishtummaa guddisuun jijjiirama qabatamaa fidaa jira jedhaniiru. Misooni sululaa dhiqama biyyee ittisuu, saxilamummaa jijjiirama qilleensaa dandamachuu fi misooma magariisaatiif bu’aa gudda buusaa akka jiru ibsaniiru. Akka ibsa Faanoseetti bara baajataa kanatti lafa hektaara miliyoona 5 ol irratti kunuunsi biyyee fi qabeenya uumamaan hojjetama jira. Bakkeewwan misooman tuttuqqaa namaa fi beeyladaa irraa bilisa gochuuf hojii qabaman keessaa tokko tahuu ibsuuniiru. Haala qabatamaa naannooleen guyyoota 30 hanga 60 tti duula qindaa’aa kunuunsa misooma qabeenya uumamaa hojjetamaa jiraachuu ibsuun, hanga ammaatti daagaa, misooma ittisa biyyee fi bishaani hojjetameera jedhaniiru. Misooma sululaa qindaa’aan, kunuunsi qabeenya naannoo kuma 20 fi dhibba 8 misooma sululaa misoomsuuf karoorfamee hanga ammaatti rawwiin jiruun karooraa ol suluulawwan kuma 21 ol hojjetamuu ibsaniiru. Sululawwan Misooman irratti waldaaleen kuma 7 ol furdisa looniin, kuduraalee dhaabuun fi kaanniisa horsiisuu irratti bobba’anii fayyadamaa jiraachuu ibsaniiru. Waggoottan darban hojii daagaa fi boolla bishaanii qotuun eegalame cimee itti fufeeras jedhaniiru. Itiyoophiyaatti hojii misooma sululaan haala milkaa’ina qabuun naannoolee itti hojjetaman keessaa tokko Harargee Bahaati. Godinichatti Qotee Bulaan Aanaa Baddannoo Ahmed Najaashii ammaAn dura lafti duwwaa ture yeroo ammaa kana jiidhaa jiraachuunsa omisha omishuun fayyadamaa tahuu isaanii ibsaniiru. Hojiin misooma sululaa ammaaf qofa otoo hinta’iin dhaloota dhufuuf naannoo kunuunsinee dabarsuutiif gahee guddaa kanqabu tahuu ibsuun, xiyyeffannoon hirmaachaa jiraachuu ibsaniiru. Aanaa Gooroo Guutuutti Qonnaan Bulaan Haayilee Taaddasee akka jedhanitti, misooma sululaa biratti muduraalee adda adda oomishuun fayyadamaa jiraachuu ibsaniiru. Misoomni qabeenya sululaa madda bishaanii jiran kunuunsuun bishaan gahaa kennaa jiraachuu ibsaniiru. Jiraata aanichaa kan tahan Qonaan Bulaan 0bbo Isheetuu Asaffaa gama isaaniin, hojii misooma sululaan lafa misoome irratti biqiltoota adda addaa dhaabuu fayyadamoo tahuu isaanii ibsaniiru.

Ebla 03/2017 (TOI)-Naannoo Gambeellaatti guyyoota kurnan dhufanitti roobni salphaa fi cimaan jiraachuu akka dandahu Inistityuutiin Meetiroloojii Itiyoophiyaa Beeksise. Bokkaa roobuun walqabatee rakkoowwan uumamuu dandahan hambisuuf bo’oo lolaa qulqulleessuun barbaachisa ta’uus ibsameera. Inistityuutichatti Hojii Gaggeessaan Giddugala Tajaajila Meetiroloojii Naannoo Gambeellaa Obbo Tasfaahun Alamuu TOI’f akka ibsanitti, Naannichatti baatii Ebla2017 jalqabee roobni cimaan jiraachuu ibsaniiru. Naannichatti bakkeewwan qilleensa Baddadaree Godina Maajangitti , roobni cimaan akka roobu beeksissaniiru. Rooba cimaa naannichatti mudachuu dandahu qophii Qonna Gannaa faayidaa olaanaa akka qabaatu ibsaniiru. Naannichatti sababa Rooba Cimaa Roobuun Magaalichatti balaan lolaa uumamuu waan dandahuuf bo’oo lolaa saaquu fi qulqulleessuun barbaachisaa tahuu hubachiisaniiru. Akkasumas, roobaan walqabatee dhibeen busaa ka’uu waan danda’uuf boolla bishaanii dursanii duuchuun akka qaban obbo Tasfaahun ibsaniiru.

Bitootessa 30/2017(TOI)- Bulchiinsa magaalaa Dirree Dawaatti duula ashaaraa magariisaa dhufuuf biqiltuuwwan garagaraa faayidaa hedduu qaban qophaa’aa akka jiran abbaan taayitaa naannawaa, misooma bosonaa fi haala qilleensaa beeksise. Daarektarri misooma bosonaa abbaa taayitichaa obbo Maasrashaa Yimar TOItti akka himanitti, duula ashaaraa magariisaa ganna dhufuuf biqiltuuwwan garagaraa qophaa’aa jiru. Biqiltuuwwan buufata biqiltuu kilaastara baadiyyaa fi magaalaatti qophaa’aa jiran keessaa walakkaa ol dhaabbiif qophaa’aniiru jedhan. Biqiltuuwwan barana qophaa’an keessaa wabii nyaataa maatii mirkaneessuu Kan danda’an kan akka Loomii, Paappaayyaa, Giishxaa, maangoo Hamboshk, burtukaanaa fi kanneen biroo keessatti argamu jedhaniiru. Biqiltuuwwan waggoottan darban dhabaman harki 72 qabachuu dubbataniiru. Kunis balaa lolaa ittisuun wabii nyaataa hawaasa baadiyyaa mirkaneessuuf shoora bahaa akka jiran eeraniiru. Hoogganaan biiroo qonnaa, bishaan, albuudaa fi Inarjii bulchiinsa magaalaa Dirree Dawaa obbo Nuuraddiin Abdallaa TOItti akkka himanitti, biqiltuuwwan ashaaraa magariiaa baranaaf qophaa’aa jiran faayidaa garagaraa qabu. Biqiltuuwwan kunneen kan armaan olitii ibsamaniin alatti bosona, gaaddisa, fi miidhagina magaalaaf kan fayyadanii fi misooma kooriidarii xumuramaa jiru miidhagsuuf ta’uu ibsaniiru. Kilaastara baadiyyaattis bakka biqiltuun itti dhaabamu adda baasuu fi boola qopheessuunis gamanuma hojjetamaa akka jiru beeksisaniiru. #Tajaajila Oduu Itiyoophiyaa#TOI #Oromiyaa#ashaaraa magariisa

Bitootessa 27/2017(TOI)- Eegumsi qabeenya uumamaa fi misoomni sululaan oomishtummaa guddisuun fayyadamaa isaan taasisaa akka jiru godina Harargee bahaatti qonnaan bultoonni aanaa Baddannoo dubbatan. Misoomni muduraa, kanniisa horsiisuu fioomishni nyaata loonii guddachaa dhufuu ibsaniiru. Qonnaan bulaan Ibsaa Abdallaa, naannawichi qaarri waan itti caaluuf biyyeen dhiqamee waggaa dheeraaf lafti qullaatti hafee tureera. Sababa Kanaan jirattonni oomishuuf rakkachaa turaniiru. Rakkoo kana furuuf waggaa muraasa dura eegumsa qabeenya uumamaa fi misoomaatti galuun dhiqamni biyyee hir’achaa dhufuu eeraniiru. Qonnaan bulaan Asan Shariif gamasaniin bakkeen kun misoomuun maddi cimmisee bishaan akka argatan eeranii, nyaata loonii oomishuu akka isaan dandeessises dubbataniiru. Bulchaan aanaa Baddannoo Ibraahim Yuuyyee waggoota muraasa darban gaarren qullaatti hafaniituran eegumsa qabeenya naannoo fi misooma sululaan bosonan guutamuu ibsan. Jiraattonni naannawaa misooma sululaa irratti waldaan gurmaa’anii misooma muduraa fi kanniisa horsiisuun fayyadamaa ta’uu eeraniiru. Bulchaan godina Harargee Bahaa Miskii Mahaammad gamasaaniin, eegumsa qabeenya uumamaa fi misooma sululaa ummanni hojjeteen dhiqamni biyyoo hir’atee lafti gammachaa dhufeera jedhan. Maddeen bishaan lafarraa fi lafa jalaa gabbachaa akka jiruu fi hojiin eegumsa qabeenya uumamaa aadaa ta’aa dhufuusaa bulchaan kun dubbataniiru.