ኢትዮጵያ ለሌሎች ሀገራት ምሳሌ የሆኑ የአየር ንብረት ለውጥ መከላከል ተግባራትን እያከናወነች ነው

አዲስ አበባ፤ ሕዳር 20/2018 (ኢዜአ)፦ ኢትዮጵያ በአየር ንብረት ለውጥ ተፅዕኖ ምላሽና መከላከል ለሌሎች ሀገራት ምሳሌ የሆኑ ተግባራትን እያከናወነች እንደምትገኝ በኢትዮጵያ የኢጋድ ተጠሪ አበባው ቢሆነኝ ገለፁ።

ሦስተኛው የምስራቅ አፍሪካ የልማት በይነ መንግሥታት (ኢጋድ) የሚዲያ ሽልማት መርኃ ግብር በአዲስ አበባ መካሄድ ጀምሯል፡፡

በኢትዮጵያ የኢጋድ ተጠሪ አበባው ቢሆነኝ በዚሁ ወቅት፤ የ2025 የኢጋድ የሚዲያ ሽልማት በተለያዩ መርሐ ግብሮች ይካሄዳል ብለዋል፡፡

በዛሬው ዕለት የቀጣናው ሀገራት በአየር ንብረት ለውጥ ዙሪያ የሚያከናውኗቸውን ተግባራት በሚመለከት የባለድርሻ አካላት ፓናል ውይይቶች፣ የልምድ ልውውጥና የጉብኝት መረሃ ግብሮች እየተካሄዱ መሆናቸውን ተናግረዋል፡፡

ኢትዮጵያ በአየር ንብረት ለውጥ ተፅዕኖ ቅነሳና መከላከል ዙሪያ እያከናወነች ያለው ተግባር በእጅጉ የሚበረታታና ለሌሎች ሀገራትም ሁነኛ ምሳሌ መሆኑን ገልጸዋል፡፡

የኢትዮጵያ ውጤታማ ተግባራት የቀጣናውና የአፍሪካ ሀገራት ለአየር ንብረት ለውጥ ምላሽ ለመስጠት በቁርጠኝነት እንዲሰሩ መነሳሳትን እንደሚፈጥርም ጠቁመዋል፡፡

የኢጋድ አባል ሀገራት የአየር ንብረት ለውጥ የሚያስከትለውን ተፅእኖ ቀድሞ መከላከል የሚያስችል አቅም መገንባት ላይ ትብብራቸውን ማጠናከር እንደሚገባቸው አመላክተዋል።

የሚዲያ ሽልማት መርሃ ግብሩ ከውድድር ባለፈ በኢጋድ ቀጣና እና በአህጉሪቱ በአየር ንብረት ለውጥ ዙሪያ የሚያጋጥሙ ውስብስብ ችግሮችንና ተግባራዊ መፍትሔዎችን ለማመላከት የሚረዳ ስለመሆኑ ተናግረዋል።

እነዚህና መሠል የጋራ ትብብርን የሚያጠናክሩ ተግባራትን በማስቀጠል በአፍሪካ የአየር ንብረት ለውጥ ተፅዕኖ ቅነሳና የመከላከል ሥራዎችን በትኩረት ማጠናከር ይገባል ብለዋል።