ኢትዮጵያ በቀጣናው የንጹህ ኢነርጂ ማዕከል የሚያደርጋትን የአረንጓዴ ልማት እንቅስቃሴ እያደረገች ነው

አዲስ አበባ፤ ህዳር 20/2018(ኢዜአ)፦ ኢትዮጵያ በቀጣናው የንጹህ ኢነርጂ ማዕከል የሚያደርጋትን የአረንጓዴ ልማት እንቅስቃሴ እያደረገች መሆኑን የፕላንና ልማት ሚኒስትር ዴኤታ ስዩም መኮንን ገለጹ፡፡

ሶስተኛው የምስራቅ አፍሪካ የልማት በይነ መንግሥታት(ኢጋድ) ሚዲያ አዋርድ መርሃ ግብር በአዲስ አበባ መካሄድ የጀመረ ሲሆን፤ በዚህ መርሃ ግብር ፐልስ ኦፍ አፍሪካ(pulse of Africa) የሚዲያ አጋር ነው፡፡

የፕላንና ልማት ሚኒስትር ዴኤታ ስዩም መኮንን በዚህ ወቅት እንደገለጹት፤ ኢጋድ የአየር ንብረት ለውጥ ተጽዕኖን በመቋቋም ዙሪያ ግንዛቤ መፍጠር የሚያስችል የሚዲያ አዋርድ በማዘጋጀቱ የላቀ ምስጋና ይገባዋል፡፡

የኢጋድ ሚዲያ አዋርድ ቀጣናዊ ትብብርን በማጠናከር የአየር ንብረት ለውጥ ተጽዕኖን ለመቋቋም መሳኝ መሆኑንም አንስተዋል፡፡

የአየር ንብረት ለውጥ የአፍሪካን ነባራዊ ሁኔታ እየቀየረ መሆኑን በማንሳት፤ ድርቅ፣ ያልተጠበቀ ዝናብ፣ ጎርፍና ከፍተኛ ሙቀት በአህጉሪቱ ገሀድ መሆኑን አንስተዋል፡፡

በተለይም በአርብቶና ከፊል አርብቶ አደር አካቢዎች፣ በዝቅተኛ ስፍራዎች የዜጎችን ህይወት እየፈተነ መሆኑን ገልጸዋል፡፡

አፍሪካ ለአየር ንብረት ለውጥ ተጽዕኖ ዝቅተኛ አስተዋጽኦ ቢኖራትም ከፍተኛ ተጎጂ መሆኗን አንስተው፤ ችግሩን ለመፍታት የጋራ ጥረት ይጠይቃል ብለዋል፡፡

ለዚህ ደግሞ ለአየር ንብረት ለውጥ የማይበገር የግብርና ስርዓት፣ ፈጠራን መሰረተ ያደረገ የታዳሽ ኃይል ልማት፣ ማህበረሰብ ተኮር የማገገሚያ ስልቶችን መጠቀም እንደሚገባ አስገንዝበዋል፡፡

ከዚህ አኳያ ኢትዮጵያ በአረንጓዴ ዐሻራ መርሃ ግብር በሰባት ዓመታት ውስጥ ከ48 ቢሊየን በላይ ችግኞችን መትከሏን አስታውሰዋል፡፡

ታላቁ የኢትዮጵያ ህዳሴ ግድብን ጨምሮ ከእንፋሎት፣ ከፀሀይና ከንፋስ የታዳሽ ኃይል ልማት ተጨባጭ ውጤት እየተመዘገበ መሆኑን ገልጸዋል፡፡

በመሆኑም ኢትዮጵያ በቀጣናው የንጹህ ኃይል ማዕከል የሚያደርጋትን የአረንጓዴ ልማት እንቅስቃሴ እያደረገች መሆኑን ጠቁመው ይህም ለጎረቤት ሀገራት ኃይል በማቅረብ ቀጣናዊ ትብብርና ትስስርን ለማጠናከር የጎላ አበርክቶ አለው ነው ያሉት፡፡

ኢጋድ የአየር ንብረት ለውጥ ተፅዕኖን መቋቋም የሚያስችል የቅድመ ማስጠንቀቂያ ስትራቴጂ በመንደፍ ለዜጎች የበለጸገ ነገን ለማስተላለፍ በሚደረገው ጥረት ሚናውን እየተወጣ መሆኑን አንስተዋል፡፡

የኢጋድ ሚዲየ አዋርድ ለጋዜጠኞች እውቅና በመስጠት የሚዲያን አቅም እንደሚያሳደግ ገልጸው፤ የዘመኑን አንገብጋቢ የአየር ንብረት ለውጥ ለመቋቋም በጋራ መስራት እንደሚገባም አስገንዝበዋል፡፡