ኣዲስ ኣበባ/ ሚያዝያ/16/ 2016 /ኢዜአ/መበል 14 ቐነ ክታበት ኣፍሪካ ኣብ ክልል ትግራይ ከተማ መቐለ ይኽበር ኣሎ፡፡ ሚኒስቴር ጥዕና ሞትን ሕማማትን ኣዴታትን ዕሸላትን ንምንካይ ምስ ክልላትን ዝምልከቶም ኣካላትን ብምትሕብባር ብርክት ዝበሉ ስራሕቲ እናሰርሐ ከምዝርከብ ኣብቲ መድረኽ ተገሊፁ፡፡ ካብ መንጎ እዚኣቶም ድማ ኣወሃህባ ኣገልግሎት ክታበት ሓደ እንትኸውን÷ በቢዓመቱ ኣብ ወርሒ ሚያዝያ ዝኽበር ቐነ ክታበት ኣፍሪካ ኣብዚ ዓመት እውን “ትኹረት ዝኾነ ዓይነት ክታበት ንዝጀመሩን ጀሚሮም ንዘቛረፁን ህፃናት” ብዝብል መሪሕ ሓሳብ ኣብ ክልል ትግራይ ከተማ መቐለ እናተኸበረ ይርከብ፡፡ ላዕለዎት ኣመራርሓ ሚኒስቴር ጥዕና፣ ሓለፍቲ ስራሕ ኤጀንስታት፣ ሆስፒታላትን ተፀዋዕቲ ትካላትን፤ ኣብቲ መድረኽ ተረኺቦም፡፡ ኣብቲ መድረኽ ተረኺቦም መደረ ናይ እኻዕ ዳሕን መፃእኹም ዘስምዑ ሓላፊ ቤሮ ጥዕና ግዚያዊ ምምሕዳር ክልል ትግራይ ዶ/ር ኣማኑኤል ሃይለ÷ ንህፃናት ይኹን ንዓበይቲ ዝወሃቡ ዓይነታት ክታበት ከምዘለው ብምሕባር፤ ኣብ ሰሜናዊ ክፋል ኢትዮጵያ ተፈጢሩ ብዝነበረ ፀገም ስዒቡ ግን ተዘሓሒሉ ከምዝፀንሐ ገሊፆም፡፡ ሕዚ ብዝተፈጠረ ሰላም ድማ ምስ መንግስቲ ፌደራልን ካልኦት ዝምልከቶም ኣካላትን ብምዃን እኹል ዝኾነ ኣወሃህባ ክታበት ንመሃብ ዝተፈላለዩ ፃዕሪታት እናተገበሩ ከምዝኾኑ ገሊፆም፡፡ ሚስትር ዴኤታ ሚኒስቴር ጥዕና ዶ/ር ደረጀ ድጉማ ብግድኦም÷ ኣብ ዝሓለፉ እዋናት ብተፈጥሮኣዊን ሰብ ስራሕን ፀገማት ልዕሊ 1 ሚሊዮን ዝኾኑ ህፃናት ክታበት ከምዘይረኸቡ ገሊፆም፡፡ እቶም ክታበት ዘይረኸቡ ህፃናት ብበዝሒ ኣብ ክልል ትግራይ ስለዝርከቡ እዚ መድረኽ ኣብ ትግራይ ክዳሎ ከምዝተገበረ እውን ገሊፆም፡፡ ንኩሎም ክታበት ዘይረኹቡ ህፃናት ተበፃሒ ንምግባር ኣብ ስራሕ ከምዝርከብ እውን ሓቢሮም፡፡

  ኣዲስ ኣበባ/ ሚያዝያ/15/ 2016 /ኢዜአ/ብብርኪ ክልል ኣብ ትግራይ ዝወሃብ ወፍሪ ክታበት መከላኸሊ ሕማም ኣልምሲ(ፖልዮ) ኣብ ከተማ መቐለ ክፍለ ከተማ ሓወልቲ ሎሚ መዓልቲ ተጀሚሩ። እቲ ወፍሪ፥ ኣብ ከባቢ ዞባ ደቡብ ኣብ ሓደ ህፃን ዝተርኣየ ሕማም ኣልምሲ መበገሲ ብምግባር ኢዩ ዝካየድ ዘሎ ተባሂሉ። ሎሚ መዓልቲ ኣብ ምጅማር እቲ ክታበት፥ መንግስታዊ፣ ዘይመንግስታውን ካብ ዝተፈላለዩ ክፋላት ሕብረተሰብ ዝተውፃእፅኡ ኣካላትን ተረኺቦም። ሓላፊ ካብኔ ሰክሪታርያት ስግግር ማሕበራዊ ልምዓት ግዚያዊ ምምሕዳር ክልል ትግራይ ፕሮፌሰር ክንደያ ገ/ህይወት፥ ንዕውትነት እቲ ወፍሪ ኩሉ ግቡኡ ክፍፅም ይግባእ ኢሎም። ሓላፊ ቢሮ ጥዕና ግዚያዊ ምምሕዳር ክልል ትግራይ ዶክተር ኣማኒኤል ሃይለ ብግድኦም፥ ብብርኪ ክልል 2 ሚሊየን ቆልዑት ንምክታብ ትልሚ ከምዝተትሓዘ ተዛሪቦም። እዚ ንምፍፃም ድማ ቢሮ ሓለዋ ጥዕና ምስ ዝተፈላለዩ መዳርግቲ ኣካላት ብምዃን ከምዝሰርሕ ገሊፆም። ኣብ ኩለን ከባቢታት ትግራይ ኩሎም ትሕቲ 10 ዓመት ዝኾኑ ቆልዑ ክታበት መከላኸሊ ሕማም ኣልምሲ ከምዝወሃቦም ብምግላፅ፥ እዚ ንክዕወት ኩሉ ክፋል ሕብረተሰብ ክረባረብ ፃውዒት ኣቕሪቦም። በቲ ካብ 15 ክሳብ 20 ሚያዚያ ዝካየድ ወፍሪ ልዕሊ 2 ሚልየን ህፃናት ተጠቀምቲ ከምዝኾኑ ተገሊፁ።

  ኣዲስ ኣበባ/ ሚያዝያ/15/ 2016 /ኢዜአ/መበል 15 ሱልጣን ዓፋር ኣሕመድ ኣሊሚራህ ኣዲስ ኣበባ ኣቲዮም። መራሕቲ ሱልጣን ዓፋር ብህዝቢ ዓፋር ማሕበራዊን ፖለቲካዊን ፀገማት ብባህላዊ ሜላ ብዘላቕነት ኣብ ምፍታሕ ዓብዪ ግደ ከምዘለዎም ይንገር። ሱልጣን ዓፋር ኣሕመድ ኣሊሚራህ ኣብ ወፃኢ ሃገር ድሕሪ ምፅናሕ ሎሚ መዓልቲ ናብ ኣዲስ ኣበባ እንትኣትዉ÷ ምክትል ኣፈ-ጉባኤ ቤት ምኽሪ ፌዴሬሽን ዘሃራ ሁመድ፣ ብመዓርግ ሚኒስትር መተሓባበሪ ማእኸል ህንፀት ስርዓት ዲሞክራሲ ኣምባሳደር ሃሰን ኣብዱልቃድር፣ ነበር ርእሰ ምምሕዳር ክልል ዓፋር እስማኤል ኣሊሰሮን ካልኦት ላዕለዎት ሓለፍቲ ስራሕ መንግስቲን ኣቀባብላ ገይሮምሎም። ወዲ ሱልጣን ኣሊሚራህ ዝኾኑ መበል 15 ሱልጣን ዓፋር ኣሕመድ ናይ መላእ ዓፋር ሱልጣን ዝነበሩ ሓዎም ሱልጣን ሃንፍሬ ኣሊሚራህ ካብዛ ዓለም ብሞት ምፍላዮም ስዒቡ ኣብ ዝሓለፈ ዓመት ወርሒ መጋቢት ከምዝተሸሙ ይዝከር፡፡

  ኣዲስ ኣበባ/ ሚያዝያ/15/ 2016 /ኢዜአ/መናእሰይ ኣብ ምብልፃግን ምስፋሕን ሰላም መተካእታ ዘይብሉ ግደኦም ክፃወቱ ይግባእ ክብሉ ምክትል ረእሰ ምምሕዳር ግዝያዊ ምምሕዳር ክልል ትግራይ ጀነራል ታደሰ ወረደ ገሊፆም። ዩኒቨርሲቲ መቐለ ምስ ቢሮ ጉዳይ መናእሰይን ማእከል ኪነጥበብ ጩራ ኣቦጊዳን ብምትሕብባር ንሰለስተ መዓልቲ ዝፀንሕ ዋዕላ መናእሰይን ህንፀት ሰላምን የሳልጥ ኣሎ። ኣብቲ ዝሳለጥ ዘሎ ዋዕላ ካብ መብዛሕተአን ወረዳታት ትግራይ ዝተወከሉ ልዕሊ 500 መናእሰይ ዝሳተፉ ዘለዉ እንትኾኑ፥ መናእሰይ ኣብ ህንፀት ሰላም ክህልዎም ዝኽእል ግደ፣ ተሳትፎ፣ ተወካልነትን ተዛመድቲ ዛዕባታትን ዝጠመቱ መፅናዕትታት ይቐርቡ ኣለዉ። ኣብቲ ዋዕላ መኽፈቲ መደረ ዘስምዑ ጀነራል ታደሰ ወረደ፥ ዘላቒ ሰላምን ልምዓትን ንምርግጋፅ ብሰንኪ ስእነት ሰላም ኩለ መዳያዊ ሃሰያ ዝበፅሖ መንእሰይ ክልል ትግራይ ኩለመዳያዊ ህንፀት ንምክያድ ዉሕሉል ስራሕ ከምዘድሊ ተዛሪቦም። ሓላፊ ቢሮ ጉዳይ መናእሰይ ትግራይ ኣይተ ሓይሽ ስባጋድስ ብግደኦም ብሰንኪ ዘጋጠመ ፀገም መናእሰይ ትግራይ ግዳያት ስእነት ስራሕ፣ ዘይሕጋዊ ስደት፣ መዐወንቲ ወልፍታትን ክኾኑ ከምዝተገደዱ ገሊፆም። ስለዝኾነ ነቶም ፀገማት ንምፍታሕ ኣብ መናእሰይ ዝስርሑ ስራሕቲ ወሰንቲ ምዃኖም ምሕባሮም ዩንቨርስቲ መቐለ ኣብ ማሕበራዊ ሚዲይኡ ኣብ ዘውፅኦ ሓበሬታ ገሊፁ።

  አዲስ አበባ/ሚያዚያ/14/2016/ኢዜአ/ ኣብ ዝተትሓዘ በጀት ዓመት ን50 ሽሕ ዜጋታት ዕድል ስራሕ ንምፍጣር ተሊሙ 93 ነጥቢ ሸሞንተ ሚኢታዊ ምዕዋት ከምዝተኽኣለ ሓላፊ ቤት ፅሕፈት ፈጠራ ዕድል ስራሕን ክእለትን ከተማ ቢሾፍቱ ኣይተ ታደሰ ኣሰፋ ተዛሪቦም። ኣብ ከተማ ቢሾፍቱ ብሓሙሽተ ኣባላት ዝተመስረተ ማሕበር ሽርክና ስራሕ ፋይበር ግርማ፣ ቆንጅትን መሓዙትን 70 ሽሕ ብር ካፒታል ናብ ስራሕ ምእታዎም ኣባላት እቲ ማሕበር ይዛረቡ። ብዝተፈላለየ ዘፈር ትምህርቲ ካብ ዩኒቨርስቲ ብዝተመረቑ ሰለስተ ደቂ ተባዕትዮን ክልተ ደቂ ኣንስትዮን ዝተመስረተ ሜጋ ቶን ፋይበር ግላስ፣ ኣብዚ ሕዚ ሰዓት ን60 ዝኣኽሉ ሰራሕተኛታት ዕድል ስራሕ ከምዝፈጠረ ግልጋሎት ኮሙዩኒኬሽን መንግስቲ ምስ ካልኦት ትካላት ኣብ ዘዳለዎ ምልከታ ጋዜጠኛታት ኣቦ መንበር ተዛሪቦም። ሓላፊ ቤት ፅሕፈት ፈጠራ ዕድል ስራሕን ክእለትን ኣይተ ታደሰ ኣሰፋ ከምዝገለፅዎ፤ እቲ ፈጠራ ዕድል ስራሕ ዕብየት ኢኮኖሚ እታ ከተማ ንቐፃሊ ብዝወስዱ ኣብ ዘፈር ግብርናን ማኑፋክቸሪንግን ጠመተ ዝገበረ 'ዩ ኢሎም። ኣብ ልምዓት ሃፍቲ እንሰሳት እናተሰርሐ ከምዝኾነ 'ውን ኣመላኺቶም። ስራሕ ንዝሰኣኑ ዜጋታት እቲ ምምሕዳር ከተማ ሼዳት ብምሃብን መሬት ብምቕራብን ድጋፍ እናገበረ ምዃኑ ገሊፆም።

  አዲስ አበባ/ሚያዚያ/14/2016/ኢዜአ/ ዓለም ለኻዊ ኤክስፖ ጥዕና ኣፍሮ ኤዥያ “ድልድላት ንህነፅ ህይወት ነድሕን” ብዝብል ካብ 9 ክሳብ 11 ጉንበት 2016 ዓ.ም ኣብ ማእኸል ኤግዚቢሽን ከምዝካየድ ተገሊፁ። ኣሰናዳኢ ኮሚቴ እቲ ኤክስፖ ምስ መዳርግቲ ኣካላት ብምዃን ኣብቲ ጉዳይ መግለፂ ሂቡ። ኣብቲ ኤክስፖ ካብ ኢትዮጵያን ካብ ዝተፈላለያ ሃገራት ዓለምን ዝተውፃእፅኡ ልዕሊ 400 ትካላት ጥዕና፣ ሰብ ሞያ ኢንዱስትሪን መዳርግቲ ኣካላት ክሳተፉ 'ዮም። ስግግር ፍልጠት፣ ምትሕብባር ምጥንኻርን ዝለዓለ ፍታሕ ኣተሓላልዋ ጥዕና ንምርኣይ ንማሕበረሰብ ብርክት ዝበሉ ናፃ ምርመራታት ንምሃብ ዝዓለመ 'ዩ። በዚ 'ውን ልዕሊ 30 ሽሕ ንዝኾኑ ዑደተኛታት ናፃ ምርመራ ጥዕናን ግልጋሎት ምኽርን ክህብ 'ዩ ተባሂሉ። ነቲ ኤክስፖ ኤፍ ዚ ማርኬቲንግን ኮሙዩኒኬሽንን ሓላፍነቱ ዝተወሰነ ውልቃዊ ማሕበር ምስ ሰላም ሄልዝ ኮንሰልታንሲ ብምትሕብባር ከምዘዳለዉዎ ዝተገለፀ እንትኸውን፣ ሚኒስቴር ጥዕና፣ ቢሮ ጥዕና ኣዲስ ኣበባ፣ በዓል መዚ ምግብን መድሓኒትን ከተማ ኣዲስ ኣበባ፣ በዓል መዚ ትካላት ሲቪል ማሕበረሰብ፣ በዓል መዚ ምግብን መድሓኒትን ኢትዮጵያ፣ ላልማር ኮንሰልታንሲን ንግድን ዘፈር ማሕበራትን ኣዲስ ኣበባን ብመዳርግትነት ከምዝሳተፉ ተሓቢሩ።

ኣዲስ ኣበባ/ ሚያዝያ/14/ 2016 /ኢዜአ/ኣብ ዝመፅእ ክረምቲ ን50 ሺሕ መምህራንን ኣመራርሓ ትምህርቲን ስልጠና ብቕዓት ከምዝወሃብ ሚኒስቴር ትምህርቲ ገሊፁ። እቲ ስልጠና ፀገም ፅሬት ትምህርቲ ንምፍታሕን ብቕዓት መምህራን ንምድንፋዕን ዝዓለመ እንትኸውን÷ ኣብ ዝተመረፃ ዩኒቨርሲታትን ኮሌጃትን ክወሃብ ኢዩ ተባሂሉ። ኣብ ሚኒስቴር ትምህርቲ መሪሕ ፈፃሚ ስራሕ መምህራንን ትምህርቲን ሙሉቀን ንጋቱ (ዶ/ር)÷ እቶም መምህራን ኣብ ዘምህሩዎ ዓይነት ትምህርቲን መምሀሪ ሜላታትን ከምዝስልጥኑ ተዛሪቦም። ን42 ሺሕ መምህራን 120 ሰዓት፤ ን8 ሺሕ ኣመራርሓ ትምህርቲ ድማ 60 ሰዓት ስልጠና ከምዝወሃቦም ዝተገለፀ እንትኸውን÷ ስልጠነኦም እንትዛዝሙ ድማ ፈተና ከምዝወስዱ እቶም ፈፃሚ ስራሕ ተዛሪቦም፡፡ እቲ ስልጠና÷ ኣብ መምህራንን ኣመራርሓ ትምህርቲን ዘሎ አፈላላይ ፍልጠትን ሜላን ምስትምሃር ንምምላእ ከምዝሕግዝ ተሓቢሩ፡፡

  ኣዲስ ኣበባ /ሚያዝያ/14/ 2016 /ኢዜአ/አብ ክልል ትግራይ ካብ ዝተፈላለዪ ከባቢታት ንዝተውፃእፅኡ 500 መናእሰይ ኣብ ህንፀት ሰላምን ስራሕቲ ሰናይ ተበግሶን ዘድሀበ ስልጠና ኣብ ዪንቨርስቲ መቐለ ይወሃቦም ኣሎ። እቲ መድረኽ፥ "መንእሰይ ንህንፀት ሰላምን ዲሞክራሲን" አብ ትሕቲ ዝብል መሪሕ ሓሳብ ዝካየድ ዘሎ ከምዝኾነ ተገሊፁ። ብምትሕብባር ቢሮ ጉዳይ መናእሰይ ትግራይ፣ ዩንቨርስቲ መቐለን ኪነ ጥበባዊ ማሕበር ጮራ ኣቡጊዳን ዝወሃብ ዘሎ ሰልጠና፥ ካብ 14 ሚያዝያ 2016 ዓ.ም ጀሚሩ ንተኸታተልቲ ሰለስተ መዓልታት ዝፀንሕ ኢዩ ተባሂሉ። ኣብቲ መድረኽ፥ ምክትል ፕሬዚዳንት ግዝያዊ ምምሕዳር ክልል ትግራይ ሌ/ ጀነራል ታደሰ ወረደ ሓዊሱ ካልኦት ላዕለዎት ኣመራርሓ ግዝያዊ ምምሕዳር፣ ኣመራርሓ ዩኒቨርስቲ መቐለን መዳርግቲ ኣካላትን ተረኺቦም። ኣብ ትሕቲ ግዝያዊ ምምሕዳር ክልል ትግራይ ካብ ዝርከባ ወረዳታት ዝውክሉ 500 መናእሰይ ይሳተፉ ኣለዉ።

  ኣዲስ ኣበባ/ ሚያዚያ/13/ 2016/ኢዜአ/ቢሮ ሓለዋ ጥዕና ግዚያዊ ምምሕዳር ክልል ትግራይ ወፍሪ ክታበት መከላኸሊ ሕማም ኣልምሲ (ፖልዮ) ከካይድ እዩ። ኣብቲ ተተሊሙ ዘሎ ወፍሪ ክታበት ዝጠመተ መድረኽ ዘተ መዕበዪ ግንዛበ ሕብረተሰብ ኣብ መቐለ ይካየድ ኣሎ። እቲ ወፍሪ፥ ኣብ ከባቢ ዞባ ደቡብ ኣብ ሓደ ህፃን ዝተርኣየ ሕማም ኣልምሲ መበገሲ ብምግባር ኢዩ ዝካየድ ዘሎ ተባሂሉ። ስለዝኾነ በቲ ካብ 15 ክሳብ 20 ሚያዚያ ዝካየድ ወፍሪ ልዕሊ 2 ሚልየን ህፃናት ተረባሕቲ ምዝኾኑ ተገሊፁ።

  አዲስ አበባ/ሚያዚያ/10/2016/ኢዜአ/ ማሕበር ቀይሕ መስቀል ጨንፈር ዞባ ሰሜን ምዕራብ ትግራይ ፀገም ሕብረተሰብ ኣብ ምቕላል ዘይናዓቕ ተራ እናተፃወተ ከምዝርከብ ዋና ፀሓፊ ማሕበር ቀይሕ መስቀል ጨንፈር ዞባ ሰሜን ምዕራብ ትግራይ ኣይተ ቴድሮስ ምላው ሓቢሮም። ከም ምብርሂ ኣይተ ቴድሮስ፣ እቲ ማሕበር ኣብ ዝተፈላለዩ ሰብኣውን ማሕበራውን ስራሕቲ ብምንጣፍ ፀገም ሕረተሰብ እናቃለለ ይርከብ፡፡ ማሕበር ቀይሕ መስቀል ዛጊድ ኣብ ዝሓለፉ 9 ኣዋርሕ ን650 ተመዛበልቲ ንሕድሕድ 9 ሽሕን 2 ሚኢትን ቅርሺ፣ን560 ሓደሽቲ ተመዛበልቲ ኣቑሕት ገዛ ፣ን80 ካብ ስደት ተመለስቲ ንሕድሕድ 26 ሽሕ ገንዘባዊ ሓገዝን ስነ ልቦናዊ ሕውየት ስልጠናን ገይሩ ‘ዩ፡፡ ንኣዴታትን ህፃናትን ከምኡ ‘ውን ሃንደበታዊ ሓደጋ ንዝበፅሖም ወገናት ቅልጡፍ ግልጋሎት ኣምቡላንስን ንሓደ ሚኢቲ ሽሕ ህዝቢ ግልጋሎት ቀረብ መድሓኒት ፋርማሲ እናሃበ ከምዝርከብን ኢሉ ‘ውን ኣብ ስራሕቲ ዳግመ ግረባ፣ ምውጋድ ረሳሕ ፈሳሲ፣ ምርኻብ ዝተጣፍኡ ሕብረተሰብ ዕዙዝ ኣበርክቶ ይገብር ከምዘሎ ኣይተ ቴድሮስ፣ ኣፍሊጦም፡፡

  ኣዲስ ኣበባ/ ሚያዝያ/10/ 2016 /ኢዜአ/ሆስፒታል ሕክምና ዓይኒ ኲሓ ምስ ኦፕሬሽን ኢትዮጵያን ፕሮጀክት ሂማልያ ካትሪክት ዝተብሃለ ትካል ምግባረ ሰናይን ብምትሕብባር ብዓይነቱ ዝተፈለየ ወፍሪ ናፃ ኣገልግሎት ሕክምና ዓይኒ ከምዝጀመረ ኣፍሊጡ። ዳይሬክተር ክፍሊ ዓይኒ ሓፈሻዊ ሆስፒታል ኩሓ ስፔሻሊስይ ዓይኒ ዶ/ር ዮናስ ምትኩ፥ ብሰንኪ ኲናት ተቛሪፁ ዝፀንሐ ኣገልግሎት ንቕለ ተኸላ ብሌን ዓይኒ ዳግም ናብ ስርሕ ምእታዉ ገሊፆም። እዚ ዕድል ንኹሉ ክፉት ከምዝኾነ እውን ሓቢሮም። ሆስፒታል ሕክምና ዓይኒ ኩሓ ሕዚ ብፍሉይ ወፍሪ ዝጀመረሎም ድማ፥ ብመውቃዕቲ ወይክዓ ብዝተፈላለየ ምኽንያታት ምዕፃው ቱቦ ዓይኒ ዘጋጠሞም፣ ፀገማት መሸፈኒ ቆርበት ዓይኒ ምስትኽኻል፣ ኣብ ሓቛፊ ዓይንን ምስ ኦርቢት ዓይኒ ዝተኣሳሰሩ ፀገማት ምስትኽኻልን ዝኣመሰሉን ሕክምናታት ከምዝኾኑ ኣብሪሆም።

  ኣዲስ ኣበባ/ ሚያዝያ/9/ 2016 /ኢዜአ/ርእሰ ምምሕዳር ክልል ሃረሪ ኣይተ ኦርዲን በድሪ በዓል ዒድ ሸዋል ባህላዊ ክብሪታቱ ሕብረትን ፍቕሪን ብዘጉልህ መልክዑን ብሰላም ንኽኽበር ኣስተዋፅኦ ንዘበርከቱን ኣካላት ምስጋና ኣቕሪቦም። ኣብቲ ክልል በቢዓመቱ ብልዑል ድምቀት ዝኽበር በዓል ዒድ ሸዋል ካብ ማንም እዋን ንላዕሊ ብልዑል ድምቀትን ዓወትን ከምዝተዛዘመ እቶም ርእሰ ምምሕዳር ገሊፆም። እቲ በዓል ንኽዕወት ግደ ዝነበሮም ህዝቢ እቲ ክልል፣ ኣካላት ፀጥታን ኣኽበርቲ ሕጊን፣ ልኡኻት ጎረባብቲ ክልላት ከምኡ እውን ካልኦት ኣስተዋፅኦ ንዘበርከቱ ኣካላት ብሽም ህዝብን መንግስትን እቲ ክልል ምስጋና ምቕራቦም ሓበሬታ ኮሙኒኬሽን እቲ ክልል የመላኽት።

  ሐረር/ ሚያዚያ 9/2016/ኢዜአ/፡- ባዓል ዒድ ሸዋል ሓበራውነት ብዘጎልብት መልክዑ ይኸበር ከም ዘሎ ተሳተፍቲ እቲ ባዓል ገሊፆም ባዓል ዒድ ሸዋል ብድሙቐ ኩነታት ይኸበር አሎ

  ባህር ዳር/ሚያዝያ 9/2016 (ኢዜኣ) ኣብ ክልል ኣምሓራ ልዕሊ 224 ሽሕ ተምሃሮ ተጠቀምቲ መርሃ ግብሪ ምገባ እናኾኑ ምዃኖም ቢሮ ትምህርቲ እቲ ክልል ኣፍሊጡ። ምክትል ሓላፊ እቲ ቢሮ ወይዘሮ ኢየሩስ መንግስቱ ንኢዜኣ ከምዝገለፅኦ፤ እቶም ተጠቀምቲ እቲ መርሃ ግብሪ ኣብ 454 ኣብያተ ትምህርቲ ትምህርቶም እናተኸታተሉ ዝርከቡ ተምሃሮ እዮም። እቲ መርሃ ግብሪ ምገባ፤ ካብ መንግስቲ እቲ ክልል፣ካብ ዘይመንግስታዊ ትካላትን ህዝብን ዝተረኸበ 151 ሚልዮን ብር በጀት ብምምዳብ እናተሳለጠ ከምዝርከብ እውን ተዛሪበን። እቲ መርሃ ግብሪ ቁፅሪ ትምህርቶም ዘቋርፁ ተምሃሮ ብምቕናስን ትምህርቶም ተረጋጊዖም ብምክትታልን ፅሬትን ተበፃሕነትን ትምህርቲ ንምርግጋፅ ኣስተዋፅኦ ከምዘለዎ ገሊፀን። ርእሰ መምህር ተጠቀሚ እቲ መርሃ ግብሪ ዝኾነት ኣብ ከተማ ደብረ ብርሃን ትርከብብ ቀዳማይ ብርኪ ቤት ትምህርቲ ኣንድነት ባዩ ሃይለጊዮርጊስ ከምዝበልዎ፤ ኣብቲ መርሃ ግብሪ 1 ሽሕን 968 ተምሃሮ ተጠቀምቲ እናኾኑ እዮም። ተምሃሮ ቁርስን ምሳሕን ብምምጋብ ናይ መፅናዕትን ውሽጢ ክላስን ተሳትፎኦም ንክዓቢ ካብ ምግባር ብተወሳኺ ፀገም ትምህርቶም ዝደግሙን ዘቋርፁን ዝነበሩ ተምሃሮ ንምፍታሕ ከምዘኽኣለ ሓቢሮም። እዚ መርሃ ግብሪ ምገባ ድሕሪ ምጅማሩ ኣብ ትምህርቱ ትኹረት ብምግባር ዝሓሸ ውፅኢት ከምዘመዝገበ ዝገለፀ ድማ ተምሃራይ ክፍሊ 8ይ እቲ ቤት ትምህርቲ ዝኾነ ያፌት ኣዲስ እዩ። ተምሃሪት እዚ ቤት ትምህርቲ ቤዛዊት ኣበጋዝ ብግደኣ፤ ኣብቲ ቤት ትምህርቲ ዝካየድ መርሃ ግብሪ ምገባ ተሳትፎ ትምህርታ ካብ ምዕባይ ብተወሳኺ ውፅኢታ እናተመሓየሸ ከምዝመፀ ተዛሪባ።

  ኣዲስ ኣበባ/ሚያዝያ 8/2016 (ኢዜኣ) መዘከርታ ዓወት ዓድዋ ኣብ ውሽጢ ሓደ ወርሒ ልዕሊ 31 ሽሕ ሰባት ከምዝጎብነይዎ ዋና ዳይሬክተር እቲ መዘከርታ ዓወት ኢንጅነር ውባየሁ ማሞ ገሊፆም። መዘከርታ ዓወት ዓድዋ ብ 3 የካቲት 2016 ዓ/ም ብቀዳማይ ሚኒስትር ኣብይ ኣሕመድ (ዶ/ር) ብዕሊ ዝተመረቐ እንትኸውን ንህዝቢ ክፍቲ ኮይኑ እናተጎብነየ ይርከብ። ዋና ዳይሬክተር መዘከርታ ዓወት ዓድዋ ኢንጅነር ውባየሁ ማሞ፤ እቲ መዘከርታ ዓወት ንህዝቢ ክፍቲ ካብ ዝግበር ጀሚሩ በቢመዓልቱ ብርክት ዝበሉ ጎብነይቲ እናተኣናገደ ይርከብ ኢሎም። ካብ 7 መጋቢት ክሳብ 7 ሚያዝያ 2016 ዓ/ም ኣብ ዘሎ ውሽጢ ሓደ ወርሒ 31 ሽሕን 750 ሰባት ከምዝጎብነይዎ ተዛሪቦም። ኣብ ወርሒ የካቲት 2016 ዓ/ም ኣብ ኣዲስ ኣበባ ኣብ ዝተገበረ መበል 37 ጉባኤ መራሕቲ ሕብረት ኣፍሪካ ዝተሳተፉ መራሕቲ ሃገራት፣ዲፕሎማሲኛታትን ልኡኻትን መዘከርታ ዓወት ዓድዋ ከምዝጎብነይዎ ዝዝከር እዩ። መዘከርታ ዓወት ዓድዋ፤ ልዕሊ 2 ሽሕን 500 ኣጋይሽ ዝሕዝ ኣዳራሽ ፓን ኣፍሪካ፣300 ሰባት ዝሕዝ ኣዳራሽ ዓድዋ፣160 ሰባት ዝሕዝ ማእኸላይ ኣዳራሽ፣300 ሰባት ብሓደ ግዜ ዘተኣናግዱ ቤት ብልዕታት፣ክልተ ካፍቴሪያታት፣ሙዝዬም ህፃናት፣1000 ተሽከርከርቲ ዝሕዝ ፓርኪንግ፣ዘበናዊ ጂምን ካልኦት መሰረተ ልምዓታትን ኣብ ውሽጡ ዝሓዘ ምዃኑ ተገሊፁ። መእተዊ በርታት መዘከርታ ዓወት ዓድዋ እውን በሪ ጀጋኑ ምብራቕ፣በሪ ጀጋኑ ምዕራብ፣በሪ ጀጋኑ ሰሜን፣በሪ ጀጋኑ ደቡብ፣በሪ ፈረሰኛታት፣በሪ ሓርበኛታት፣በሪ ፓን ኣፍሪካኒዝም ተባሂሎም ከምዝተሰየሙ ዝፍለጥ እዩ።

  ኣዲስ ኣበባ/ ሚያዝያ/8/ 2016 /ኢዜአ/ቢሮ ጥዕና ግዚያዊ ምምሕዳር ክልል ትግራይ ኣብ ምጥንኻር መባእታዊ ክንክን ጥዕናን ስነ ተዋልዶን ዝጠመተ መድረኽ ዘተ ኣብ ከተማ መቐለ ኣሳሊጡ። ሓላፊ እቲ ቢሮ ዶክተር ኣማንኤል ሃይለ ኣብቲ መድረኽ ተረኺቦም ኣብ ዘሕለፉዎ መልእኽቲ፥ ክሳብ ሐዚ ኣብ ምክልኻል ተላበድቲ ሕማማት ኢና ተፀሚድና ፀኒሕና ኢሎም። ጠመተና ኣብ ምሕካም ብሕፅረት ምግቢ ዝተጠቕዑ ወገናት፣ ኣብ ምክልኻልን ምሕካምን ሕማም ዓባይ ሰዓል፣ ኤች ኣይቪ ኤድስን ካልኦትን ኮይኑ ፀኒሑ እዩ እውን ኢሎም። ይኹን እንበር ኣብዚ ሐዚ እዋን ኣብ ምጥንኻር መባእታዊ ክንክን ጥዕናን ስነ ተዋልዶን ይስራሕ ከምዘሎ ገሊፆም። ዶክተር ኣማንኤል ሙሉእ ብሙሉእ ዝዓነወ ስርዓት መረዳእታ ጥዕና ምጅማር ከምዝግባእ ኣገንዚቦም። ካብኔ ሴክሬታሪያት ትልሚ ስግግር ማሕበራዊ ልምዓት ፕሮፌሰር ክንደያ ገ/ህይወት (ፕሮፌሰር) ብግደኦም፥ ዓውዲ ጥዕና ዳግም ንምህናፅ ይስራሕ ኣብ ዘሎ ስራሕ ይሕግዙ ንዘለው ኩሎም ኣካላት አመስጊኖም።

  ኣዲስ ኣበባ/ ሚያዝያ/8/ 2016 /ኢዜአ/ተወልድቲ ሰብ ቅያ ሃረሬ ዘበርከቱዎ ሓድጊን ክብሪን ዶብ ተሳጋሪ ሃፍቲ ከምዝኾነ ሚኒስትር ባህሊን ስፖርትን ኣይተ ቀጀላ መርዳሳ ገሊፆም። ብድምቐ ዝኽበር ድሮ በዓል ዒድ ሸዋል ብዝተፈላለዩ ስነ-ስርዓታት ምኽባር ጀሚሩ። ኣብቲ ስነ-ስርዓት ዝተረኸቡ ሚኒስትር ባህሊን ስፖርትን ኣይተ ቀጀላ መርዳሳ፥ ሃረር ወናኒት ዝደንፈዐ ክብሪን ኢያ፤ ብፍላይ በዓል ዒድ ሸዋል መንእሰይ ክፋል ሕብረተሰብ ብናፅነት ዝንቀሳቐሱሉ ኢዩ ኢሎም። ሀረሬታት ፍቕሪን ምትሕብባርን ካብ ቀደሞት ብምቕባል ንዝቕፅል ወለዶ ኣብ ምምሕልላፍ እናበርከትዎ ዝርከቡ ግደ ዝነኣድ ከምዝኾነ ዝገለፁ እቶም ሚኒስትር፤ ዘበርከቱዎ ሓድጊን ክብሪን ዶብ ዝሳገር ከምዝኾነ ገሊፆም። ሚኒስትር ቱሪዝም ናሲሴ ጫሊ ብግደአን፥ ሃረር ትውፊታዊን እምነታዊን ባህሊታት ዝንፀባሩቑላ ከተማ ከምዝኾነት ብምግላፅ፤ ፍቕሪን ሕብረትን ባህሉ ዝኾነ ህዝቢ ሃረር ኣብ ዕለት በዓል ዒድ ሸዋል ደሚቑ ዝረአየሉ ከምዝኾነ ተዛሪበን። ዒድ ሸዋል ኣብ ዘይድህሰስ ሓድጊ ዩኔስኮ ከምዝተመዝገበ ብምዝኽኻር፤ እቲ በዓል ኩሉ ዘኽብሮ ምዃኑ ንኽምዝገብ ቀንዲ ምኽንያት ኢዩ ኢለን። ሕዚ እውን እቲ ክልል ንዝገብሮ ምንቅስቓስ ሚኒስቴር ቱሪዝም ዘይተቖጠበ ሓገዝ ከምዝገበር እውን ኣረጋጊፀን።

  ኣዲስ ኣበባ/ ሚያዝያ/8/ 2016 /ኢዜአ/ኣብ ክልል ደቡብ ኢትዮጵያ ሓፈሻዊ ጉባኤ ምስረታ ጨንፈር ቤት ፅሕፈት ማሕበር ቀይሕ መስቀል ኢትዮጵያ ተኻይዱ፡፡ ርእሰ ምምሕዳር እቲ ክልል ጥላሁን ከበደ ኣብቲ ጉባኤ ኣብ ዝገበሩዎ መደረ÷ ቀይሕ መስቀል ሰብ ተኮር ስራሕቲ ኣብ ሰብኣዊነትን ቅንዕናን ሓገዝ ዝገብር ትካል ከምዝኾነ ኣብሪሆም፡፡ ኩለመዳይ ምዕባለ ዜጋታት ንምርግጋፅ ኣብ ዝሳለጡ ስራሕቲ ግደ ማሕበር ቀይሕ መስቀል ዕዙዝ ከምዝኾነ ብምሕባር÷ ብሰብ ስራሕን ተፈጥሮን ሓደጋ ንዝተጎድኡ ወገናት ሰብኣዊ ሓገዝ እናገበረ ከምዝኾነ ገሊፆም፡፡ ፕሬዚዳንት ማሕበር ቀይሕ መስቀል ኢትዮጵያ ኣበራ ቶላ ብግደኦም÷ እቲ ማሕበር ናይ መንግስቲ ደጋፊ ከምዝኾነ ብምሕባር፤ ሕድሕድ ምትሕግጋዝ ከምዝግባእ ኣገንዚቦም፡፡

  ሐረር/ ሚያዚያ/ 8/2016(ኢዜአ)፡- ንባዓል ሸዋል ዒድ ምኸንያት ብምግባር ዝተዳለወ ፌስቲቫልን ዓውደ ራእይ ባህሊን አብ ከተማ ሐረር ሎሚ ተኸፊቱ። ፌስቲቫልን ዓውደ ራእይ ባህሊን ዝተኸፍተ ርዕሰ ምምሕዳር ክልል ሐረሪ አይተ ኦርዲን በድሪ፣ሚኒስትር ባህልን ስፖርትን አይተ ቀጄላ መርዳሳን ሚኒስትር ቱሪዝም አምባሳደር ናሲሴ ጫሊ አብ ዝተረኸብሉ እዩ።

  አዲስ አበባ/ሚያዚያ/8/2016/ኢዜአ/ ከምቕርሲ ዓለም ብዩኔስኮ ዝተመዝገበን ኣብ ሃረሪ በቢዓመቱ ብድምቀት ዝኽበርን በዓል ሹዋሊድ ክኽበር 'ዩ። እዚ በዓል “ሹዋሊድ ንሕብረብሄራዊ ሓድነትናን ንዕብየት ቱሪዝምናን” ብዝብል ቴማ ኣብ ክልል ሃረሪ ሚኒስትራት፣ ርእሰ ምምሕዳር እቲ ክልልን ኻልኦት ኣጋይሽን ኣብ ዝተረኸብሉ ክኽበር 'ዩ። በዓል ሹዋሊድ ሎሚዓመት ብዩኔስኮ ከምቕርሲ ዓለም ኾይኑ ድሕሪ ምምዝጋቡ ዝኽበር ብምዃኑ መንግስቲ እቲ ክልል ዝተፈላለዩ ምድላዋት ከምዝገበረ ተፈሊጡ። ኣብቲ በዓል ምስ ቢሮ ባህልን ቱሪዝምን ኣዲስ ኣበባ ብምትሕብባር መፅናዕቲ ዝተገበረሉ ኖታ ሙዚቃ ብሄረሰብ ሃረሪ ቐሪቡ ዘተ ከምዝግበረሉን ኻልኦት መርሃ ግብርታት ከምዝሳለጡን ተሓቢሩ።