Amajjii 20/2016(TOI) - Atileetonni Itoophiyaa dorgommii biyyoota adda addaatti Sambataa fi Dilbata geggeeffame injifataniiru. Kaleessaa dorgommii maraatoonii Osaakaa fi Siviyaatti geggeeffameen atileelt Warqinesh Iddeessaa fi Alamtsahaay Zarihuun sadarkaa 1ffaan injifataniiru. Ispeen Siviiyaatti dorgomii walakaa maraatoonii geggeeffameen atileet Alamtsahaay Zarihuunii fi Abarraash Lammaa sadarkaa 1ffaa fi 2ffaan xumuruun injifataniiru. Akkasuma dorgommii Jaappaan Osaakaatti geggeeffame atileet Warqineesh Iddeessaa yeroo saatii 2 fi daqiiqaa 18 fi sakoondii 15 xumuuruun injifateetti. Dorgommii walakkaa maraatoonii Osaakaatti geggeeffameen Dastaa Burqaa sadarkaa lammaaffaan xumuruun injifateetti.

Shaampiyoonaan Atileetikisii Itoophiyaa 53ffaan Amajjii 21 hanga 26/2016tti Finfinneetti ni geggeeffama. Amajjii 15/2016(TOI) - Shaampiyoonaan Atileetikisii Itoophiyaa 53ffaan Amajjii 21 hanga 26/2016tti Finfinnee Akkadaamii Ispoortii Itoophiyaatti ni geggeeffama jedhame. Shaampiyoonichi dorgomiiwwaan waggaatti Federeeshinichi geggeesuu keessaa tokko ta'uu ragaan Federeeshinicharra argame ni mul'isa.

Amajjii 04/2016(TOI)- Waancaan 34ffaa Afriikaa tapha qopheessituun taphichaa Kotidivuwaar Giinii Bisaawu waliin taasiftuun har’a nijalqabama. Tapha waancaa Afriikaatiinbarana yeroo jalqabaaf biyyoonni 24 kan hirmaatan yoo ta’u, biyyi waancaa kana mo’ate yeroo jalqabaaf badhaasa olaanaa ta’e doolaara miiliyoona 7 nibadhaafama. Biyyi taphicha qopheessitu Kotidivuwaarr ramaddii tokko keessatti kan argamtu yoo ta’u, har’a galgala sa’aatii 5tti Giinii Bisaawu waliin istaadiyeemii Alaasaan Otaaraatti nikeessummeessiti.

Mudde 30/2016(TOI)- Oolmaa guyyaa jalqabaa Sagantaa dorgommii torbee 10ffaa piriimerliigii Itiyoophiyaatiin taphoonni lama nitaasifamu. Guyyaa keessaa sa’aatii 9tti Bunni Itiyoophiyaa magaalaa Shaashamannee waliin Istaadiyeemii Yuunivarsiitii Saayinsii fi Teeknooloojii Adaamaatti nidorgomu. በBunni Itiyoophiyaa qabxii 14’n sadarkaa 6ffaarraa yoo jiraatu taphoota piriimerliigii walitti aansuun taphate shan keessaa lama mo’atee lama mo’atameera, altokko walqixa baheera. Morkataansaa magaalaan Shaashamannee taphoota shan darban taphateen lama mo’amee sadii ammoo qabxii qooddateera. Taha amma ammaatiin kan hin mo’anne magaalaan Shaashamannee qabxii 3’n sadarkaa 15 bahuun sadarkaa gadi bu’ii keessatti argama. Galgala sa’aatii 12tti Bunni Sidaamaa magaalaa Adaamaa waliin nitaphata. Bunni Sidaamaa taphoota liigichaa shan walitti aansuun taphateen lamaan mo’atee lama mo’ameera, tokkoon ammoo qabxii qooddateera. Qabxii 11’n sadarkaa 9ffaarratti argama. Magaalaan Adaamaa qabxii 13’n sadarkaa 8ffaarratti yemmuu argamu taphoota liigichaa walitti aansuun taphate shan keessaa lama mo’atee lamaan mo’amee tokko ammoo walqixa baheera. Sagantaan piriimerliigii Itiyoophiyaa torbee 10ffaa borus kan itti fufu yoo ta’u, guyyaa keessaa sa’aatii 9tti Machaal magaalaa Hawaasaa, galgala sa’aatii 12tti Hadiyyaa Hoosaa’inaa Qiddus Goorgis waliin nitaphatu. Taphoonni torbee 10ffaa liigichaa amma Amajjii 3 bra 2016tti itti fufu. Baankiin daldalaa Itiyoophiyaa qabxii 23’n liigicha dursaa jira

Mudde 18/2016(TOI)- Leenjiftuu Raawudaa Alii leenjiftuu muummee garee byyaalessaa dubartootaa waggaa 17 gadii ta’uun muudamteetti Calallii waancaa addunyaa dubartootaa waggaa 17 gadiin Itiyoophiyaan Guraandhala dhufu Afriikaa Kibbaa waliin kan morkattu yoo ta’u, dorgommii calallii Kanaan leenjiftuu Raawudaa Alii leenjiftuu muummee garichaa ta’uun muudamteeti. Taphattuu garee biyyaalessaa dubartootaa Itiyoophiyaa(Luusiiwwanii) duraanii kan taate Raawudaan sadarkaa kilabaatti gareewwan Yekkaa Mikaa’el,Kolleejii Kuwiins, Buna Itiyoophiyaa, gabaa oomishaa fi Qiddus Goorgisiif taphatteetti. Akkaadaamiiwwan addaddaa keessatti leenjisummaan kan tajaajilte yoo ta’u Qiddus goorgisii fi garee biyyaalessaa dubartootaa waggaa 17 gadii Itiyoophiyaatti ammoo itti aantuu leenjiftuu ta’uun hojjettetti. Yeroo ammaa Qiddus Goorgisitti leenjistuu muummee ta’uun hojjechaa akka jirtu odeeffannoon federeeshinii kubbaa miilaa Itiyoophiyaarraa argame nimul’isa.

Mudde 15/2016(TOI) - Dorgommiin liigii olaanaa kubbaa miillaa Oromiyaa magaalaa Naqamtee Istaadeemii Wallaggaatti geggeeffama jira. Dorgommii kanarratti kilaboonni 16 hirmaachaa kan jiran yoo ta'u; jalbii dorgommichaarratti kilabni magaalaa Dambidoolloo fi Magaalaa Mattuu waliin taphachuun tokkoo qixaan xumuraniiru. Kantiibaan magaalaa Naqamtee obbo Misgaanuu Tulluu sirna banissaa isaarratti argamuun haasaa taasisaniin Dorgommiin kun ji'a tokkoof kan turu yoo ta'uu himanii dorgommichi karaa nagaa fi naamusa Ispoortii eeggatee akka geggeeffamee xumuramuuf hunduu gahee isaa akka bahu waamicha taasisaniiru. Miseensoonni garee dorgommii kanarratti hirmaachuuf godinaalee fi magaaloota Oromiyaarra dhufanis simannaa bulchiinsi magaalaa Naqamtee taasiseefitti gammaduu himaniiru. Dorgommiin kun kaleessa saatii booda kan jalqabe yoo ta'u Itti aanaan Biiroo Ispoortii fi dargaggoota naannoo Oromiyaa Dasaaleny Xilahuun, Pirezidaantii federeshinii kubbaa miillaa Oromiyaa doktar Waqjiraa Simee fi keessummoonni biroon irratti argamaniiru.

Mudde 13/2016 (TOI)-Waancaa kilaboota addunyaa Saa’udii Arabiyaatti taasifameen Maanchister Siitiin kilaba Biraaziil kan ta’e Filuumiinzoo goolii 4 fi 0’n mo’achuun yeroo jalqabaaf waancaa mo’ateera. Maanchister siitiin gooli lama Alvaareev galchee fi Fiil Fodan akkasumas Niinoon goolii garee ofiirratti galcheen taphicha goolii 4 fi mo’ateera. Gama biraatiin tapha sadarkaa dursee taphatameen gareen Gibxi Al Ahiliin garee Jaappaan Urwaa Reedsi goolii 4 fi 2’n mo’achuun sadarkaa sadaffaa qabatee xumureera.

Mudde 08/2016 (TOI)- Ramaddiin taphoota mo’atanii darbuu Shaampiyoonsi Liigii Awurooppaa ifoomeera. Poortoon Arsenaal Naappoolii Baarseloonaa Pii Esi Jii Riyaal Sooseedaad Intarmiilaan Atileetiikoo Maadriid Pii Essi Vii Boorsiyaa Doortimuundi Laaziyoo Baayer Muuniik Koppen Hagen Maanchastar Siitii akkasumas Arbii Lebziig Riyaal Maadriid waliin ramadamaniiru.

Mudde 02/2016(TOI)- Atileet Tigist Asaffaa dorgommii fiigicha Istaadiyeemiin ala taasifameen dubartii atileetii cimtuu bara 2023 taatee filatamuuunshee ifoomeera. Atileet Tigist Asaffaa dorgommii maaraatoonii dubartootaa Barliin baranaa sa’aatii 11:53’n xumuruun mo’achuunshee niyaadatama. Dorgommii kana kan mo’atte riikoordii Kanaan dura lammii Keeniyaa Biriijid Kooseegiin waggoota hedduuf qabame daqiiqaa 2’n fooyyessitteti. Atileetiin Itiyoophiyaa Lettesanbat Gidayi guyyoota muraasa dura naamusaan atileetiin filatamtuu ta’uun mo’achuunshee niyaadatama.

Sadaasa 30/2016 (TOI) - Finfinneen magaalaa daa’imman utaalanii, sammuu fi qaamaan gabbatanii keessatti guddatan taasisuuf hojiin jalqabame cimee ittifufa jedhan kantiibaan magaalattii Adaanech Abeebee. Kantiibaa Adaanech Abeebee ergaa fuula marsariitiisaaniirratti dabarsaniin, dirree Ispoortii naannawa Beellaatti ijaarame Itiyoophiyaatti ambaasaaddara Xaaliyaanii Agustiinoo Paalees waliin ta’uun eebisanii tajaajilaaf banaa taasisuusaanii ibsaniiru. Embaasiin Xaaliyaanii qaama ijaarsa dhalootaa keenya kan ta’e babal’isa dirree Ispoortii dargaggootaa fi daa’immanii deeggaruun dirree Ispoortii har’a eebbifne ijaaruusaatiin magaa ijoollee Beellaatiin nangalateeffadha jedhaniiru. Haala Kanaan “magaalaan Finfinnee magaalaa daa’imman utaalanii, gammadanii,sammuu fi qaamaan gabbatanii keessatti guddatan taasisuuf hojii jalqabne cimsinee itti fufna” jechuun ibsaniiru.

Sadaasa 27/2016 (TOI) - Shaampiyoonaan atileetiksii sochii dirree gabaabaa fi jiddugaleessaa Itiyoophiyaa Mudde 3 amma 7/2016tti ni’adeemsifama. Dorgommichi dorgommiiwwan waggaa federeeshiniin atileetiksii Itiyoophiyaa adeemsisu keessaa tokko yemmuu ta’u akkaadaamii Ispoortii Itiyoophiyaatti nitaasifama. Shaampiyoonaa baranaatiinis kilaboonnii fi dhaabbileen 19 ofilaaluuf dorgomicharratti nihirmaatu. Federeeshinii Atileetiksii Itiyoophiyaatti bakka bu’aan adeemsa hojii hirmaannaa fi dorgommii Bisiraat Laxxibaluu TOI’f akka ibsanitti, dorgommii kanaaf atileetonni 770 galmaa’aniiru. Kanneen keessaa 451 dhiira, 319 ammoo dubartoota akka ta’an dubbataniiru. Atileetonni dorgommicha mo’atan maallaqa, meedaaliyaa fi waancaa nibadhaafamu. Saala lamaanuu 1ffaa kan bahan birrii kuma 3, 2ffaa kan bahan birrii kuma 2, 3ffaa kan bahan ammoo birrii kuma 1 fi 500 nibadhaafamu. Atileetota riilee walmakaa dorgomaniif ammoo saala lamaanuu 1ffaa kan bahaniif birrii kuma 6, 2ffaa kan bahan birriikuma 4, 3ffaa kan bahan birrii birrii kuma 2 nibadhaafamu. Atileetonni beekamoon 18 dorgommicharratti kan hirmaatan yemmuu ta’u, dhiiraan Ermiyaas Girmaa Buna Sidaamaarraa, dubrtootarraa ammoo Birqee Hayyaloom baankii daldala Itiyoophiyaarraa keessatti argamu.

Sadaasa 27/2016 (TOI) – Sagantaan Piriimer Liigii Itiyoophiyaa torbee torbaffaa taphoota lama Istaadiyeemii Yuunivarsiitii saayinsii fi teeknooloojii Adaamaatti har’a taphatamaniin jalqabama. Magaalaan Walqixxee Hambarichoo Duraamee waliin guyyaa keessaa sa’aatii 9tti nitaphatu. Qabxii 5’n sadarkaa 13ffaarratti kan argamu magaalaan Walqixxee taphoota liigichaa walitti aansuun taphate shan keessaa tokko qofaa mo’ateera. Taphoota lamaan mo’atamee lamaan ammoo walqixa baheera. Hambarichoo Duraameen qabxii lamaan sadarkaa 155ffaa qabatee sadarkaa gadi bu’aarra yemmuu jiraatu, taphoota liigichaa shan Kanaan dura taphate keessaa sadiin mo’amee lama ammoo walqixa baheera. Hambarichoo Duraameen amma ammaatti tapha tokkooniyyuu hinmo’anne. Galgala sa’aatii 12tti Faasiil Kanamaa Walaayittaa Diichaa waliin nitaphata. Faasiil Kanamaan qabxii 12’n sadarkaa 4ffaarratti yemmuu argamu taphoota liigichaa Kanaan dura taphate shan keessaa sadii mo’atee lama ammoo qabxii qooddateera. Morkataansaa Walaayittaa Dichaan taphoota Liigichaa shan Kanaan dura taphateen al tokko qofa mo’ate. Lama mo’atamee lama ammoo walqixa baheera. Walaayittaa Diichaan qabxii 8’n sadarkaa 8ffaarra jira. Boru Machaal magaalaa Adaamaa waliin guyyaa sa’aatii 9tti, magaalaan Bahaar daar magaalaa Hawaasaa waliin sa’aatii 12tti nitaphatu. Taphi torbee torbaffaa Liigichaa amma Sadaasa 30/2016tti nitura.

Sadaasa 25/2016 (TOI)- Ayyaana guyyaa saba, sablammootaa fi ummattootaa 18ffaa ilaalchisuun magaalaa Jigjigaatti dorgommiin fiigichaa kiiloomeetira 5 adeemsifame. Dorgmmiin kun barii sa’aatii 12 fi walakkaarraa kaasee addababayii Mahaammad Abdallaa Hasanitti kan adeemsifame yemmuu ta’u, dargaggoonni magaalaa Jigjigaa hirmaataniiru. Ayyaana guyyaa saba, sablammootaa fi ummattootaa 18ffaa har’a Sadaasa 25 irraa kaasee amma Sadaasa 29/2016tti qindeessummaamana maree federeeshiniitiin mata duree “sabdaneessummaa fi walqixxummaan tokkummaa biyyaaf” jedhuun magaalaa Jigjigaatti qophiilee addaddaan nikabajama. Haala Kanaan Sadaasa 25 guyyaa obbolummaa, Sadaasa 26 guyyaa sabdaneessummaa, Sadaasa 27 guyyaa waloomaa, Sadaasa 28 guyyaa ida’amuu, Sadaasa 29 guyyaa Itiyoophiyaa jechuun moggaafamuun qophiilee addaddaatiin kabajamuu jalqabeera.

Sadaasa 20/2016 (TOI )- Ispoortiitti fayyadamuun walitti hidhamiinsa hawaasummaa cimsuun nageenya waaraaf fayyadamuun nibarbaachisa jedhan af-yaa’iin naannoo Baaniishaangul Gumuz doktar Tamasgeen Disaasaahubachiisan. Ayyaana saboota sablammootaa fi ummattootaa 18ffaa sababeeffachuun naannoo Beeniishaangul Gumuz godina Matakkal magaalaa Gilgal Balasitti har’a dorgommiin fiigichaa dirreerraa taasifameera. Af-yaa’iin mana maree naannichaa doktar Tamasgeen Disaasaa wayita kana akka jedhanitti faayidaa Ispoortiin qabu nageenya waaraaf oolchuu barbaachisa. "Ispoortiin walitti hidhamiinsa hawaasaa cimsuuf faayidaa olaanaa qaba” kan jedhan af-yaa’ichi, haala Kanaan Ispoortii nageenya waaraa buusuuf fayyadamuun akka barbaachisu hubachiisaniiru. Kaayoon dorgommii kanaa ayyaanicha sababeeffachuun hariiroo waliinii cimsuu ta’uu kan ibsan ammoo komishinarii komishinii Ispoortii naannichaa Yuusuuf Bashiri. Hooggantoota naannichaa olaanoo dabalatee jiraattonni magaalaa Gilgal Balasii fi naannawashee dorgommii dirree kiiloo meetira sadii kanarratti hirmaataniiru.

Sadaasa 20 /2016 (TOI) Taphni Piriimer Liigiin Itiyoophiyaa sababa dorgommiiwwan idil addunyaatiin guyyoota 27’f addaan cite ture taphoota lama taasifamaniin har’a nijalqabama. Har’a guyyaa keessaa sa’aatii 9tti Dirreedawaa Kanamaa Walayittaa Diichaa waliin, galgala sa’aatii 12tti Ambarichoo Duraamee Faasiil Kanamaa waliin nitaphatu Boru guyyaa keessaa sa’aatii sagalitti Itiyoophiyaa Madin Machaal, sa’aatii 12tti magaalaan Shaashamannee magaalaa Walqixxee waliin nitaphatu. Taphoonni kunneen Istaadiyeemii saayinsii fi teeknooloojii Adaamaatti taphatamu. Qiddus Goorgis Liigicha qabxii 13’n yemmuu dursu Shaashamannee kanamaa qabxii tokkoon sadarkaa xumuraarratti argama.

Sadaasa 11/2016 (TOI)-Gareen biyyaalessaa Itiyoophiyaa tapha ramaddii 2ffaa calallii Waancaa Addunyaatiin Burkiinaa Faassoo waliin taphatee goolii 3 fi 0’n mo’ameera. Goolii kanneen Bilaatii Turee daqiiqaa 49ffaa, Bartiraand Tiraa’oree(F) daqiiqaa 78ffaa, Daangoo Otaatiraa daqiiqaa 90ffaarratti Burkiinaa Faassoof galchaniiru. Gareen Waaliyaa tapha calallii ramaddii 3ffaa fi arfaffaa Giinii Bisaa’oo fi Jibutii Waliin akka taphatan beekameera.

Sadaasa 11/2016(TOI)- Gareen biyyaalessaa Itiyiyoophiyaa dhiirotaa calallii Waancaa addunyaa tapha ramaddii 2ffaa gitasaa har’a sa’aatii 10tti Burkiinaa Faassoo waliin nimorkata. Gareen biyyaalessaa Itiyoophiyaa tapha kanaaf Istaadiyeemii Kaazaabilaankaa Molaay Rashiiditti shaakalaa kan ture yemmuu ta’u, tapha har’aatiin dura kaleessa shaakallii xumuraa taasiseera. Gareen biyyaalessaa Itiyoophiyaa har’a sa’aatii 10tti Istaadiyeemii El-Abdiitti Burkiinaa Faassoo waliin akka taphatu odeeffannoon federeeshinii kubbaa miilaa Itiyoophiyaarraa argame nimul’isa. Abbaan murtii Jaameeh Lemiin Gaambiyaarraa tapha kana kan taphachiisu yemmuu ta’u, lammiileen biyyasaa Jaawoo Abdul’aziiz (gargaaraa), Daarboo Omaar (gargaaraa), Saalaah Omaar (afraffaa) akkasumas Awuyyee Yuusuuf Yugaandaarraa komishinarummaan ramadamaniiru.

Sadaasa 08/2016(TOI)- Garee Olompiikii Itiyoophiyaa Olompiikii Paariis dhufurratti hirmaatuuf waliigalteen eyyama Istaadiyeemii shaakalaa mallatteesse. Waliigaltichi Istaadiyeemii paariis kutaa magaalaa Antoonii waliin mallatteeffame. Dorgommii Olompiikii Paariis Baatii Adoolessaa jalqabuuf dorgommii gareen Atileetiksii taasisuuf waliigaltee dirree kan mallatteessan pirezidaantii federeeshinii Atileetiksii Itiyoophiyaa gargaartuu komishinaraa Daraartuu Tulluu fi kantiibaa kutaa magaalaa Antoonii Jaan-Iiv Soonaaleedha. Itiyoophiyaanonnii fi dhalootaa Itiyoophiyaa kan ta’an kanneen Faransaayii fi biyyoota Awurooppaa biroo keessa jiraatan garee Olompiikii Paaris simachuu fi garee kana deeggaruuf qophii taasisuuf bakka bu’oota deeggartootaa waliin mariin taasifamuusaa odeeffannoon ministeera dhimmi alaa nimul’isa. Lammiileen Itiyoophiyaa fi dhalootaan Itiyoophiyaa ta’an gareen Olompiikii qabxii gaarii akka fidu amma xumura dorgommiitti deeggarsa akka taasisan mirkaneessaniiru.

Sadaasa 03/2016 (TOI) – Maraatoonii dubartootaan riikardii harkatti kan galfatte atileet Tigist Asaffaa filannoo atileetota filatamoo kan waggaatiin kaadhimamtoota xumuraa shanitti makamteetti. Atileet Tigist Asaffaa filannoo atileetota filatamoo kan waggaatiin kaadhimamtoota xumuraa shanitti makamuushee woorlid Atileetiiksi beeksiseera.

Onkoloolessa 27/2016 (TOI) - Shaampiyoonsi Liigii Awurooppaa ramaddii afuriin Esiimiilaan Paariis Seent Jermee Doortmend Niwukaastil waliin har’a galgala nitaphatu. Kilaboonni ramadii afurii amma toorbaa jiran har’a nitaphatu. Taphoota ramaddii kanneen jiddudhaa saansiiroo Xaaliyaaniin taphni ramaddii shaniin Esiimiilaan fi Paariis Jarmee waliin taphatan ni’eegama. Iduun Paark Jarmaniin taphoonni Niwukaastilii fi Boorsiyaa Doortimant taphatan tapha har’a taasifamu kan xiyyeeffannoo guddaa argatedha. Gareen Faransaayi Paariis Seent Jarmee qabxii jahaan yemmuu dursu Niwukaastilii fi Boorsiyaa Doortimant qabxii 4’n itti aanu. Garee Kanaan Esiimiilaan qabxii lamaan sadarkaa xumuraarra jiru. Shaakaataar Dooneesk baarsaloonaa, Atileetiikoon Seeltiik. Laaziyoon Fiyoonaard, Maanchastar siitiin Yaang Booyis, Kiraav Ziiviiziid Leepiiziing fi Poortoon Antiroop waliin taphoota har’a taphataman akka ta’e BBC ispoort gabaaseera. Taphoonni Doortmant Niwukaastil, Shaakaataar Dooneesk baarsaloonaa waliin galgala sa’aatii lamaa fi daqiiqaa 45 yemmuu taphatan taphoonni hafan halkan naannawa sa’aatii 5tti nijalqabu.