አዲስ አበባ/ ሰነ/ 26/2017(ኢዜአ)፦ስምምዕነት ፕሪቶርያ ንህዝቢ ትግራይ እፎይታ ዘምፀአ እዩ ክብሉ ቀዳማይ ሚኒስትር ዐቢይ ኣሕመድ(ዶ/ር) ገሊፆም ። ቀዳማይ ሚኒስትር ኣቢይ ኣሕመድ(ዶ/ር) ኣብ ትግራይ ዘሎ ኩነታት ጠሚቱ ካብ ኣባላት ባይቶ ወከልቲ ህዝቢ ንዝተልዓለ ሕቶ ምላሽ ህቦም። ንክልል ትግራይ ኣመልኪቶም ኣብ ዝሃብዎ መብርሂስምምዕነት ፕሪቶርያ ህዝቢ ትግራይ ንደቁ በብማዓልቱ ካብ ምስአን ኣትሪፍዎ እዩ ። ንኢትዮጵያ ድማ ኲናት ብሰዓራይን ተስዓራይን ዘይኮነስ ብዘተ ምፍታሕ ከምዝከኣል ዘርእይ ሓዱሽ ባህሊ ከምዘምፀአ ተዛሪቦም። ኣብ ትግራይ ኣብ እዋን ኲናት ትምህርቲ፣ ጥዕና፣ ስልኪ፣ መንግስቲ ወዘተ ኣይነበረን ድሕሪ ውዕል ፕሪቶሪያ ግን እዚ ተመሓይሹ ኢዩ ዝበሉ እቶም ቀዳማይ ሚኒስትር፥ ካብ ራያን ፀለምትን ዝተመዛበሉ ወገናት እውን ሙሉእ ብሙሉእ ናብ መረበቶም ከምዝተመለሱ ገሊፆም። ይኹን እንበር ዲዲኣር ዘይምትግባርን ካብ ወልቃይት ዝተመዛበሉ ወገናት ዘይምምላስን ዝብሉ ዘይተተግበሩ ምዃኖምን ክትግበሩ ከምዝግባእን ኣፅንኦት ሂቦም። እዚ ንምትግባር ግን ኩሎም ሓይሊታት ክተሓባበሩ ከምዝግባእ ገሊፆም። ምክኒያቱ እዞም ክልተ ጉዳያት ናይ ፌዴራል መንግስቲ ፀገም ኣይኮኑን፤ ትግራይ ከይተቐየረት ኢትዮጵያ ትቕየር ኢያ ዝብል እምነት እውን ኣይብልናን። “ንኣንጭዋ ፃዕረ ሞታ ንድሙ መፃወቲታ” ከምዝበሃል ንዝተወሰኑ ሰባት ኲናት መፃወቲኦም ክኸውን ይኽእል ኢዩ ንመናእሰይ ትግራይ ግን መኸሰቡ ሞት ጥራሕ ኢዩ ኢሎም። ህዝቢ ትግራይ 100 ሚኢታዊ ኲናት ኣይደሊን፤ ሐዚ ኲናት እንተዝፍጠር ዓለም ናባና ጠመተ ዝህበሉ ኩነታት እውን የለን ክብሉ ገሊፆም። ትግራይ ሐዚ ዘድሊ ሰላምን ብዘተ ፀገምካ ምፍታሕን ኢዩ ክብሉ ገሊፆም። ሙሁራን፣ ሰብ ሃፍቲ፣ ዓበይቲ ዓዲን ካልኦትን ኲናት ኣብ ትግራይ ቅድሚ ምጅማሩ ሐዚ ሰላም ኣብ ምምፃእ ፃዕሪ ግበሩ ብምባል፥ ኲናት እንተተጀሚሩ ሎሚ ከም ትማሊ ስለ ዘይኮነ ነገራት ክበላሸዩ ይኽእሉ ኢዮም ኢሎም። ኣፈላላይ እንተሃሊዩ ጉዳይካ ብዘተ ምፍታሕ ኢዩ ዘድሊየና ክብሉ እውን ኣተሓሳሲቦም። ኣቦታት ሃይማኖት ሽማግለታት ዓዲ ኣብ ክልል ትግራይ ዘሎ ኩነታት ናብ ኲናት ከይእቶ ሓዚ ሰላም ንክኸውን ታራኹም ተዋፅኡ ክብሉ ፃውዒት ኣቐሪቦም። ህዝቢ ትግራይ ዘተ ይፈልጥ ኢዩ፤ ብዘተ ክፈትሖም ዝግባእ ጉዳያት እውን ስለ ዘለውዎ ቀልጢፍካ ናብ ምዝታይ ምእታው ከምዘድሊ ተዛሪቦም። መንግስቲ ሓደ ጥይት ናይ ምትኹስ ድልየት ከምዝይብሉ ብምፅራሕ፤ ድልያትና ሃገር ምልማዕ እዩ፤ ኩሉ ህዝቢ ክፈልጥ ዘለዎ ኲናት አየድልን ኢሎም። ቀዳማይ ሚኒስትር ዐቢይ ክልል ትግራይ ሓዊሱ ንዕውትነት ሃገራዊ ምኸክር ኩሉ ናይ ወገኑ ከበርክት ኣድላይ እዩ ክብሉ ገሊፆም።

  ስርዑ ኣኼባ ቤት ምኸሪ ወከልቲ ህዝብታት ቀዳማይ ሚኒስትር ዐቢይ ኣሕመድ (ዶ/ር) ኣብ ዝተረኸብሉ ኣብ ምክያድ ይርከብ ካብ ኣባላት ቤት ምኸሪ ንቀዳማይ ሚኒስትር ዐቢይ ኣሕመድ (ዶ/ር) ዝቐረቡ ሕቶታትን ሪኢቶታትን :- *ኢትዮጵያ ብመርሃ ግብሪ ሓምለዋይ ኣሰር ንዓለም ኣብነት ዝኾነ ዘደንቐ ተግባር ፈፂማ እያ *ብመንግስቲ ለውጢ ሕቶ ኣፍደገ ባሕሪ ናብ መድረኸ ክመፅእ ኪኢሉ ።መንግስቲ እናካየዶ ዝርከብ ስራሕ ምንቅስቓስ ዲፕሎማሲ ኣዝዩ ዘተባብዕ እዩ ።ኣብ ጉዳይ ሕቶ ኣፍደገ ባሕሪ መብሪሂ እንተዝዋሃብ *ኣብ ኢትዮጵያ ካብ ከተማ እስጋብ ገጠር ይካየድ ዘሎ ልምዓት ኮሪዶር መልክዕ ኢትዮጵያ ኣዝዩ ዝቐይር እዩ ፥ እዚ ፕሮጀክት ኣብ እዚ ሓዚ እዋን ኣብ ምንታይ ብርኪ ይርከብ ኣብ ዝርያ እዚ መብርሂ እንተዝህቡ *ግዕዝይና ጠንቂ ምዕባለናን ሰላምናን ኮይኑ ንከይቐፅል ብወገን መንግስቲ እንታይ ዝተትሓዘ ቅዋምን ዝተቐመጠ ኣንፈትን ኣሎ *ቑጠባ ሃገርና ልዑል ምዕባለ ኣብ ምምዝጋብ ዝርከብ እንትኾነ እውን ኣብ ትሑት ብርኪ መነባብሮ ዝርከብ ማሕበረሰብ ብምኸባር ናብራ እናተጎድአ እዩ እንታይ ፍታሕ ኣሎ *ንመንኣሰይ ዕድል ስራሕ ኣብ ምፍጣር ብወገን መንግስቲ ዝተወገኑ ሰናይ ተግባራት አለዉ ኮይኑ ግና ሓዚ እውን ፈጠራ ዕድል ስራሕ ጎልቢቱ እንተዝቐፅል *ኣብ ዝተፈላለዩ ከባቢታት ሃገርና ካብ ማኣዲ ትምህርቲ ሪሒቖም ዝርከቡ ዓበይቲ መናእሰይ አለዉ ነዚኦም ናብ ማኣዲ ትምህርቲ ንምምላስ እንታይ ዝተቐመጠ ኣንፈት ኣሎ መብርሂ እንተዝዋሃብ *ኣብ ዝተፈላለዩ ከባቢታት ሃገርና ንሰላም ማሕበረሰብ ዝህውኹ ሸፋቱን ፅንፈኛታትን ንዜጋታት እንትቐትሉን ክዕፍኑን ይራኣይ ፍታሕ እንተዝቐመጥ *ኣብ ሃገርና ናህሪ ዋጋ እነወሰኸ ንዓቐሚ ሸማታይ ይፈታተን ኣሎ። ብፍላይ ሰራሕተኛ መንግስቲ ቐድሚኹሉ ተጎዳኣይ እዩ ብወገን መንግስቲ እንታይ ዝተሓሰበ ኣሎ *ምስ ጎረባብቲ ሃገራት ዘሎ ኢኮኖሚያዊ ምትእስሳር ንምጉልባት ክልላት ነንሕድ ሕዶም ንምርኻብን ፈጣን መሰረት ልምዓት ንምህናፅን እንታይ ዝተሓስበ አሎ

  ኣዲስ ኣበባ/ ሰነ/26/ 2017 /ኢዜኣ/ባይቶ ወከልቲ ህዝቢ ቀዳማይ ሚኒስትር ኣቢይ (ዶ/ር) ኣብ ዝተረኸብሉ ስሩዑ ኣኼባኡ ጀሚሩ። ቀዳማይ ሚኒስትር ኣብ ዝርያ ኣፈፃፅማ መንግስቲ ትልሚ 2017 ኣመልኪቱ ካብ ኣባላት ባይቶ ወከልቲ ህዝቢ ንዝለዓሉ ሕቶታት ምላሽን መብርሂን ክህቡ ኢዮም፡፡ ካብዚ ብተወሳኺ ባይቶ ወከልቲ ህዝቢ ረቂቕ በጀት መንግስቲ ፌዴራል በጀት ዓመት 2018 ከፅድቕ ኢዩ ዝብል ትፅቢት ኣሎ።

  ኣዲስ ኣበባ/ሰነ 25/2017(ኢዜኣ) ዓብይ ግድብ ሕዳሰ ኢትዮጵያ ብሓባር ዝተሃነፀ መግለፂ ምንስርራእ ኢትዮጵያን መርኣያ ይከኣልን ከምዝኾነ ምክትል ከንቲባን ሓላፊ ቢሮ ልምዓት ኢንዱስትርን ምምሕዳር ከተማ ኣዲስ ኣበባ ኣይተ ጃንጥራር ኣባይ ገሊፆም። ላዕለዋይ መምርሒ ፖሊስ ኣዲስ ኣበባ ዋንጫ ሰላም ዓብይ ግድብ ሕዳሰ ንኮሚሽን ፖሊስ ክልል ኦሮሚያ ኣረኪቡ። እቲ ዋንጫ፤ ኮሚሽነር ኮሚሽን ፖሊስ ክልል ኦሮሚያ ሌተናል ጄኔራል ድሪባ መኮንን ካብ ኣዛዚ ላዕለዋይ መምርሒ ፖሊስ ኣዲስ ኣበባ ጌቱ ኣርጋው ተረኪቦምዎ። እቲ ስነ ስርዓት ርኽክብ፤ “ፕሮጀክት ዓብይ ግድብ ሕዳሰ መርኣያ ጀሚርና ናይ ምፍጻምናን ምኽኣልናን፣ ፕሮጀክት ዓብይ ግድብ ሕዳሰ ምልክት ሓድነትና”ኣብ ትሕቲ ዝብል መሪሕ ሓሳብ እዩ ተኻይዱ። ምክትል ከንቲባን ሓላፊ ቢሮ ልምዓት ኢንዱስትርን ምምሕዳር ከተማ ኣዲስ ኣበባ ከምኡ እውን ኣካቢ ቤት ምኽሪ ምትሕብባር ህዝባዊ ተሳትፎ ዓብይ ግድብ ሕዳሰ ኣዲስ ኣበባ ኣይተ ጃንጥራር ኣባይ ኣብዚ እዋን ከምዝበልዎ፤ ኢትዮጵያ ኣያታትና ከምዘፅንዕዋ ኹሉ ዓብይ ግድብ ሕዳሰ እውን እዚ ናይ ሕዚ ወለዶ ሃገሩ ብረሃፁ ዘልምዐሉ ሓባራዊ ፕሮጀክት እዩ። ፕሮጀክት ዓብይ ግድብ ሕዳሰ ብደገፍን ምትሕብባርን ፋይናንስ ኩሎም ዜጋታት ዝተሃነፀ መግለፂ ምንስርራእ ኢትዮጵያን መርኣያ ይከኣልን እዩ ኢሎም። ምምሕዳር ከተማ ኣዲስ ኣበባ እውን ንህንፀት እቲ ፕሮጀክት ክሳብ ሕዚ ልዕሊ 6 ነጥቢ 1 ቢልዮን ብር ዕድጊት ቦንድን ደገፍ ገንዘብን ከምዝገበረ ኣፍሊጦም። ዋና ፈጻሚ ስራሕ ቤት ፅሕፈት ፕሮጀክት ምትሕብባር ህዝባዊ ተሳትፎ ዓብይ ግድብ ሕዳሰ ኢትዮጵያ ኣረጋዊ በርሀ(ዶ/ር) ብግደኦም፤ ኣብ ከይዲ ህንፀት ዓብይ ግድብ ሕዳሰ ኩሎም ኢትዮጵያውያን ኣብ ኩሎም ዘፈራት ዝገበርዎ ደገፍ ኣብ ወለዶታት እናተዘከረ ዝነብር ታሪኻዊ ኣርማ ዓወት ከምዝኾነ ተዛሪቦም። ኢትዮጵያውያን ክሳብ ሕዚ ኣብ ከይዲ ህንፀት ዓብይ ግድብ ሕዳሰ ልዕሊ 23 ቢልዮን ብር ደገፍ ገንዘብ ከምዝገበሩ እውን ሓቢሮም። ኣዛዚ ላዕለዋይ መምርሒ ፖሊስ ኣዲስ ኣበባ ጌቱ ኣርጋው፤ ዋንጫ ሰላም ሕዳሰ ግድብ ካብ ፖሊስ ፌዴራል ኢትዮጵያ ብምርካብ ኣብ ኩሎም ክፍለ ከተማታት መርሃ ግብሪ ምትእኽኻብ እቶት እናተገበረ ከምዝፀንሐ ኣዘኻኺሮም። እቲ ፕሮጀክት እውን ሽርሒ ዘበነ ምንስርራእ ኢትዮጵያ ዕርፍቲ ዝኸልኦም ውሽጣውን ደጋውን ፀላእቲ ብምሽጋር ኣብ ጉዕዞ ኣሸናፊነት ንክትርከብ እናኽኣላ ከምዝርከብ ገሊጾም። ኮሚሽነር ኮሚሽን ፖሊስ ክልል ኦሮሚያ ሌተናል ጄኔራል ድሪባ መኮንን ብወገኖም፤ ኣባላት ሰራዊት ፖሊስ እቲ ክልል ምስ ትካላት ፀጥታ ፌዴራል ብምትሕብባር ሰላምን ድሕንነትን እቲ ክልል ካብ ምሕላው ብተወሳኺ ኣብ ዓውዲ ልምዓት እውን ንቑሓት ተሳተፍቲ ከምዝኾኑ ኣረዲኦም። ፖሊስ ኣዲስ ኣበባ ዋንጫ ሰላም ዓብይ ግድብ ሕዳሰ ኣብ 2016 ኣ/ም ካብ ፖሊስ ፌዴራል ኢትዮጵያ ብምርካብ ንህንፀት እቲ ግድብ ደገፍ ገንዘብ ከተኣኻኽብ ፀኒሑ እዩ።

  ኣዲስ ኣበባ/ ሰነ/26/ 2017 /ኢዜኣ/ቀዳማይ ሚኒስትር ኣቢይ (ዶ/ር) ፅባሕ 26/ሰነ /2017/ዓ ም ኣብ ቤት ምኸሪ ወከልቲ ህዝብታት ተረኺበም መብርሂ ክህቡ እዮም። ቤት ምኸሪ ወከልቲ ህዝብታት መበል 42 ስርዑ ኣኼባኡ ፅባሕ ከካይድ እዩ። ቀዳማይ ሚኒስትር ኣፈፃፅማ መንግስቲ ትልሚ በጀት ዓመት 2017 ኣመልኪቱ ካብ ኣባላት ባይቶ ወከልቲ ህዝቢ ንዝለዓሉ ሕቶታት ምላሽን መብርሂን ክህቡ ኢዮም፡፡ ካብዚ ብተወሳኺ ባይቶ ወከልቲ ህዝቢ ረቂቕ በጀት መንግስቲ ፌዴራል በጀት ዓመት 2018 ከፅድቕ ኢዩ ዝብል ትፅቢት ከምዘሎ ባይቶ ንኢዜኣ ብዝላኣኾ መረዳእታ ኣመላኺቱ፡፡ ኣብ እቲ ኣኼባ ፃውዒት ዝተገበረሎም ኣጋይሽ ኣምባሳደራት ዝተፈላልዩ ሃገራት ፤ተፀዋዕቲ ትካላት ዓለም፤ ኣቦታት ሃይማኖት፤ ፍሉጣት ውልቀሰባትን ኣመራርሓታት ተናሓናሕቲ ፓርቲ ፖለቲካን ክርከቡ እዮም ።

  ኣብ ልምዓት ኢኮኖሚ ፣ ምዕባለ ዓውዲ ቴክኖሎጂ፣ ሰትራቴጂካዊ ዲፕሎማሲን መንግስቶም ንዘላቒ ሃገራዊ ለምዓት ዝገብሮ ዘሎ ኩለ መዳያዊ ምንቅስቓስን ብዘርእይ መልክዑ ቐፀልቲ ብዝኾኑ ንጥፈታት ኣመላኺቶም። ኣብ እንዛዝሞ ዘላና ወርሒ ሰነ ቀዳማይ ሚኒስትር ኣቢይ ኣሕመድ(ዶ/ር) ኣብ ቀንዲ ቀንዲ ውራያት ሰፋሕቲ ተግባራት ዘካየድሉ፣ ብብርኪ ሃገር ኣብ ፖለቲካ፣ ኢኮኖሚ፣ ማሕበራዊ፣ ሓለዋ ከባቢ ከምኡውን ኣብ ዲጂታልን ፈጠራን ዓውዲታት ተግባራዊ ስጉምቲ ንክህሉ ውሳነ ዘዕረፍሉ ወርሒ ነይሩ። ኩሎም ተግባራት ምዕባለ ኢትዮጵያ ዕላዊ ንምግባርን ብብርኪ ዓለም ዘለዋ ኣድላይነት ንምጉላህን ዝዓለሙ ዕዉታት ተግባራት ነይሮም።

  ልምዓት ኢኮኖሚ ፣ ምዕባለ ዓውዲ ቴክኖሎጂ፣ ሰትራቴጂካዊ ዲፕሎማሲን መንግስቶም ንዘላቒ ሃገራዊ ለምዓት ዝገብሮ ዘሎ ኩለ መዳይ ምንቅስቓስን ብዘርእይ መገዲ ተኸታታሊ ተግባራት ፈፂሞም። ቀዳማይ ሚኒስትር ኣቢይ ኣሕመድ(ዶ/ር) ኣብዚ ወርሒ ከም ሃገር ናይ ዘተን ዝሰልጠነ ባህሊ ፖለቲካን እናጎልበተ ንክመፅእ መስ ዝተፈላለዩ መዳርግቲ ኣካላት ሰፊሕ ዘተ ኣካይዶም ኢዮም። ን ምኸትል ፕሬዚዳንት ናይጄሪያ ካሺም ሼቲማ ሓዊሱ ላዕለዎት ሓለፍቲ ስራሕ መንግስቲ ከምኡውን ካልኦት ኣባላት ዶፕሎማቲክ ማሕበረሰብ ኣብ ዝተረኸብሉ ናይ ሎሚ ዘበን መርሃ ግብሪ ምንባር ሓምለዋይ ኣሰር ኣጀሚሮም። ኣጀማምራ እዚ ወርሒ ቀዳማይ ሚኒስትር ኣቢይ ኣሕመድ(ዶ/ር) ኣብ ብሄራዊ ቤተ መንግስቲ ኣብ ዝተገበረ ስነ ስርዓት ንቢል ጌትስ ላዕለዋይ ክብሪ ኒሻን ኢትዮጵያ ብምሽላም ኢዩ። እዚ ዝኸበረ ሽልማት ጌትስ ፋውንዴሽን ኣብ ዝሓለፉ 25 ዓመታት ኣብ ኢትዮጵያ ንዘበርከትዎ ቐፀልቲ ኣሳገርቲ ስራሕቲን ሰናይ ፅዕንቶታትን ዘኽበረ ኢዩ። እቲ ፋውንዴሽን ኣብ ዓውዲ ጥዕና፣ ግብርና ፣ ዲጂታል መለለዪ ማንነት ዝገብሮ ፃዕሪ ኢሉ ‘ውን ጠንካራ ኣብ ምክብባር ዝተመስረተ ምትሕብባር እቶም ቀዳማይ ሚኒስትር ገሊፆም። መንቅስቓስ ልምዓት ብዝምልከት ኣነባብራ ማሕበረሰብ ገፀር ንምምሕያሽ ዝተጀመረ ኮሪደር ገፀር ኣብ ኩሎም ከባቢታት እናሰፍሐ መፂኡ ኢዩ። ብመሰረት እዚ ኣብ ወርሒ ሰነ ቀዳማይ ሚኒስትር ኣቢይ ኣሕመድ(ዶ/ር) ኣብ ክልል ማእከላዊ ኢትዮጵያ ዝተፈላለዩ ጣቢያታት ዞባ ኣካል ኮሪደር ልምዓት ገፀር ናይ ዝኾኑ ህንፀት ሞዴል መንደራት ገፀር ኣጀሚሮም። ሞዴል መንደራት ገፀር ቀሊል ወፃኢ ዝሓቱን ኣብቲ ከባቢ ዝርከቡ እታዎታት ዝህነፁ እንትኾኑ፥ ሓረስቶት እውን ጥዑይን ክብሪ ዘለዎን ህይወት ነክነብር ዘኽአሉ ኢዮም። ኣብቶም ከባቢታት ዝካየድ ዘሎ ስራሕቲ ልምዓት ግብርና እውን ረእዮም። ኣብቲ ዑደት ቅድመ ሐዚ ብሓደጋ ውሑጅን ድርቂን ዝፍለጡ ዝነበሩ ከባቢታት ናብ ለምዓት መርኣያነት ዝገበርዎ ሽግግር ተዓዚቦም። ኣብቲ ከባቢ ብፍላይ ብዕፉን ከምኡወን ብልምዓት ኣትክልትን ፍራምረን ዝካየድ ዘሎ ስራሕቲ ኣዝዮም ዘተባብዑ ኢዮም። ኣብ ወርሒ ሰነ ቀዳማይ ሚኒስትር ኣቢይ ኣሕመድ(ዶ/ር) ካብ መንጎ ዘካየድዎም ዓበይቲ ተግባራት ሓደ ምስ ኢትዮጵያ ቴሌቪዥን ዝገበርዎ ፍሉይ ኣርባዕተ ክፍሊታት ዘለዎ ሰፊሕ ቃለ መሕትት አነትኸወን፥ ኣብ ዝሓለፉ ሸውዓተ ዓማውቲ ኣብ ኩሎም ዓውዲታት ከም ሃገር ዝተመዝገበቡ ዓወታትን ዘጋጠሙ በድሆታትን ከምኡውን ፀገማት ንምስጋር ዝተወሰዱ ስጉምቲታት ብዝምልከት ኣብሪሆም። ኣብቲ ቃለ መሕትት እቶም ቀዳማይ ሚኒሰትር ቀፃሊ መብፅሒ ጉዕዞ ዕብየትን ምዕባለን ኣርእዮም። ካሊእ ናይ ቀዳማይ ሚኒስትር ኣቢይ ኣሕመድ(ዶ/ር) ወሳኒ ናይ ወርሒ ሰነ ዲፕሎማሲያዊ ምንቅስቓስ ኢዩ። ኣብቲ ምንቅስቓስ ቀዳማይ ሚኒስትር ኣቢይ ኣሕመድ(ዶ/ር) ምስ ናይጄሪያዊ በዓል ሃፍቲ ኣብ ዝነበሮም ፃንሒት ንኢትዮጵያ ወሳኒ ዝኾኑ ባህጊታት ንምሙላእ ዘኽእሉ ስልታዊ ናይ ኢንቨስትመንት ዓውዲታት ብዝምልከት ዘተ ገይሮም። ከምኡ ‘ውንጄኔራል ማሪን ኮርፕስ ኣሜሪካን ኣዛዚ ኣፍሪኮም ምስ ዠኮኑ ጄነራል ማይክል ላንግሌይ ሓበራዊ ባህጊታት ኣብ ዝኾኑ ክልቲኣዊን ቀጣናዊን ዛዕባታት ዘቲዮም። ዲፕሎማቲክ ምንቅስቓስ ቀዳማይ ሚኒስትር ኣቢይ ኣሕመድ(ዶ/ር) እንትቕፅል፥ ኣብ ወርሒ ሰነ ምስ ዋና ዳይሬክተር ዓለም ለኸ ኤጀንሲ ሓይሊ ኣቶሚክ ማሪያኖ ግሮሲ ተራኺቦም። ዓለም ለኸ ሓይሊ ኣቶሚክ ኣብ ኢትዮጵያ ዝግበሮ ደገፍ ኣብ ምክንኻን ሕክምና መንሽሮ፣ ጥልና አንስሳት፣ ኒኩለር ኢንጂነሪንግን ማዕቐፋት ቁፅፅርን ዝጠመተ ኢዩ። ብመሰረት እዚ ናይ ክልቲኦም ዘተ ኣብ ከይዲ ኣብ ዘለዉ ደገፋትን ናይ ቀፃሊ ምትሕብባራትን ዕድላት ዝጠመተ ነይሩ። ብኻሊእ መዳይ ቀዳማይ ሚኒስትር ኣቢይ ኣሕመድ(ዶ/ር) ኣብ ወርሒ ሰነ ከም ሃገር ባህሊ ፖለቲካ እናጎልበተ ንክመፅእ ምስ ዝተፈላለዩ ቁልፊ መዳርግቲ ኣካላት ሰፊሕ ዘተታት ኣካይዶም። ብመሰረት እዚ ምስ ተነሓናሕቲ ፓርቲታት ፖለቲካ፣ ተወከልቲ ማሕበረሰብ ጥብብ፣ ተወከልቲ መምህራን፣ ሞያተኛታት ሚዲያ፣ ተወከልቲ ዓውዲ ጥዕናን ካልኦት ኣካላት ማሕበረሰብን ዘቲዮም። ኣብቲ ዘተ በቢዓውዱ ዘለዉ ዕድላትን እወንታዊ ስጉምቲታትን ኢሉ ‘ውን ከፍተታትን ብድሆታትን ዝተዳህሰስሉ ነይሩ። ቀዳማይ ሚኒስትር ኣቢይ ኣሕመድ(ዶ/ር) ኣብ ወርሒ ሰነ ፍሉይ ጠመተ ሂቦም ካብ ዝተንቀሳቐስሉን ዝተፈላለዩ ኣንፈታት ዘቐመጥሉን ዓውዲ፥ ምዕባለ ዓውዲ ቴክኖሎጂ ኢዩ። ብመሰረት እዚ ቀዳማይ ሚኒስትር ኣቢይ ኣሕመድ(ዶ/ር) ኣብ ዝተረኸብሉ ቀዋሚ ኤግዚብሽን ሙዚየም ሳይንስ ብዕሊ ተኸፊቱ። እዚ ዝነኣድ ተግባር ኣብ ኣርቴፊሻል ኢንተሊጀንስ፣ ክሌማዊ ለውጢን ናይ ኢትዮጵያ ምላሽን፣ ግብርና፣ ሓይሊ ማይን ኢነርጂን፣ ኤሮኖቲክስን ኣቪየሽን ዝጠመተ ሓሙሽተ ምድባት ኤግዚብሽን ዝሓዘ ኢዩ። እዚ ድማ ኢትዮጵያ ሳይንስን ቴክኖሎጂን ንምጥቃም ዘለዋ ፅኑዕ ባህጊ ዘርእይ ኢዩ። ብተወሳኺ ኣብ ሃገርና ናይ መጀመሪያ ዝኾነ ናይ ህዋ ቅርፂ ዘለዎ ምርኢት ኣዳራሽ እውን ዕላዊ ኮይኑ። ኣብ 1000 ሜትር ስኩዌር ሜትርን 36 ሜትር ዲያሜትርን ብምሓዝ ዝዓረፈ እቲ አዳራሽ ዘመናዊ መርኣዪ ምስሊ 4k ዲጂታል ቴክኖሎጂ ዝተገጠመሉ ኢዩ። እቲ ምስለ ህዋ ልዑል ፅርየት ዘለዎ ኣዝዩ ዝነኣድ ምስሊታት ብምቕራብ ናይ ህዋ ዓለም ኣዝዩ ኣቕሪቡ ዘርእይ ኢዩ። ብኻሊእ መዳይ ቀዳማይ ሚኒስትር ኣቢይ ኣሕመድ(ዶ/ር) ኣብ ኢትዮጵያ ሓለዋ ከባቢ ልምዓት ቁልፊ ብሄራዊ ፕሮጀክትታት ዝኾነ ናይ ሎሚ ዘበን መርሃ ገብሪ ሓምለዋይ ኣሰር ብምትካል ምብራኽ” ብዝብል መሪሕ ሓሳብ ብዕሊ ኣጀሚሮም። ሓምለዋይ ኣሰር ኣዝዩ ብዙሕ ትሩፋታት ዝተረኸበሉ ስራሕ እንትኸወን፥ ኣብዚ ዓመት ምስ ዝትከል ፈልሲ ናብ 47 ነጥቢ 5 ቢሊየን የብፅሖ ኢዩ ዝብል ትፅቢት ኣሎ። እዚ ድና ኣብ ዝቕፅል ዓመት ምስ እንተኽሎ እንትድመር 54 ቢሊየን ንምብፃሕ ዘኽእል ኢዩ። ብሓፈሻ ኣብዚ ወርሒ ቀዳማይ ሚኒስትር ኣቢይ ኣሕመድ(ዶ/ር) ኣብ ቀንዲ ቀንዲ ዓውዲታት ሰፋሕቲ ተግባራት ዘካየድሉ፣ ብብርኪ ሃገር ኣብ ፖለቲካ፣ ኢኮኖሚ፣ ማሕበራዊ፣ ሓለዋ ከባቢ ከምኡውን ኣብ ዲጂታልን ፈጠራን ዓውዲታት ተግባራዊ ስጉምቲ ንክህሉ ውሳነ ዘዕረፍሉ ወርሒ ነይሩ። ኩሎም ተግባራት ምዕባለ ኢትዮጵያ ዕላዊ ንምግባርን ብብርኪ ዓለም ዘለዋ ኣድላይነት ንምጉላህን ዝተዓለሙ ዕዉታት ተግባራት ነይሮም።

  ኣዲስ ኣበባ/ሰነ /24/2017(ኢዜኣ) ኣብ በጀት ዓመት 2018 ሃገራዊ ትልምታት ልምዓት ንምዕዋት ዓቕሚ ምእካብ ኣታዊ ምዕባይን ዝተዋደደ ኣሰራርሓ ምጥንኻርን ወሳኒ ናይ ሞትን ሕየትን ጉዳይ ከምዝኾነ ሚኒስትር ገንዘብ ኣህመድ ሽዴ ገሊፆም። ቤት ምኽሪ ወከልቲ ህዝቢ ኣብ መበል 41 ስሩዕ ኣኼብኡ ኣብ ረቂቕ በጀት ዓመት 2018 መንግስቲ ፌዴራል ኣመልኪቱ ዘትዩ። ኣባላት እቲ ቤት ምኽሪ ናህሪ ዋጋ ንምቁፅፃር፣ካብ ስሩዕን ካፒታልን በጀት፣ንምእካብ ካብ ዝተተለመ ኣታዊ፣ንዝተፈላለዩ ትካላትን ንመሰረተ ልምዓትን ዝተመደበ በጀት ከምኡ እውን ምስ ድጎማ በጀት ክልላት ብዝተኣሳሰረ እቲ ረቂቕ በጀት ዝሃቦ ትኹረት ኣመልኪቶም ሕቶ ኣቕሪቦም። ሚኒስትር ገንዘብ ኣህመድ ሽዴ ኣብ ዝሃብዎ መልስን መብራህርህን፤ ንበጀት ዓመት 2018 ዝቐረበ ረቂቕ በጀት ዕቤት ማክሮ ኢኮኖሚ ኣብ ምምሕያሽ ዓብይ ኣስተዋጽኦ ከምዝህልዎ ተዛሪቦም። ረቂቕ በጀት በጀት ዓመት 2018 ድጎማ መዳበሪያን ነዳድን ኣብ ግምት ዘእተወ ከምዝኾነ ብምግላፅ፤ ማሕበራዊ ድጎማን ክፍሊታት ዕዳን ልዕሊ 50 ሚኢታዊ ዝኸውን ስሩዕ በጀት ከምዝሓዙ ገሊፆም። ሕዚ ብዘሎ ኩነታት እቲ ቤት ምኽሪ ዘፅደቖም ፕሮጀክትታት ንምስራሕን ዝተጀመሩ ንምውዳእን ከባቢ ሓደ ነጥቢ ሓሙሽተ ትሪልዮን ብር ከምዘድሊ ዝገለፁ እቶም ሚኒስትር፤ ንውፅኢታውነት ድማ ኣታዊ ምእካብ ወሳኒ ጉዳይ ከምዝኾነን መዳርግቲ ኣካላት ዝሓቖፈ ግብረ ሓይሊ ሚኒስትራት ተጣይሹ እናተሰርሐ ከምዘሎን ኣረዲኦም። ኣብታ ሃገር ሕቶታት ልምዓት መንገዲ ብዙሓት ስለዝኾኑ ኩሎም ሕቶታት ንምምላስ ዓቕሚ ከምዝሓትት ብምግላፅ፤ ኣብ በጀት ዓመት 2018 ሓደሽቲ ፕሮጀክትታት ካብ ምጅማር ዝተጀመሩ ንምዝዛም ትኹረት ከምዝግበር ተዛሪቦም።

  ኣዲስ ኣበባ/ሰነ/ 24/2017(ኢዜኣ) ኢትዮጵያ ሕክምና ካንሰር ንምስፋሕ ንልምዓት ሃፍቲ ሰብን ቴክኖሎጅን ዝሃበቶ ትኹረት ኣጠናኺራ ክትቕፅለሉ እያ ክብላ ሚኒስትር ጥዕና ዶክተር መቅደስ ዳባ ተዛሪበን። “ጨረራት ተስፋ” ኣብ ትሕቲ ዝብል መሪሕ ሓሳብ ሚኒስቴር ጥዕናን ዓለም ለኸ ኤጀንሲ ኣቶሚክ ኢነርጂን ብምትሕብባር ዘዳለውዎን ኣቶሚክ ኢነርጂ ኣብ ዓውዲ ጥዕና ኣብ ዘለዎ ረብሓ ዝመክርን ዓለም ለኸ ጉባኤ ኣብ መኣከቢ ኣዳራሽ ሕብረት ኣፍሪካ ይካየድ ኣሎ። ጎና ጎኒ እቲ ጉባኤ፤ ሚኒስትር ጥዕና ዶክተር መቅደስ ዳባ፣ሚኒስትር ኢኖቬሽንን ቴክኖሎጂን በለጠ ሞላ (ዶ/ር)፣ጀነራል ዳሬክተር ዓለም ለኸ ኤጀንሲ ኣቶሚክ ኢነርጂ ማሪያኖ ግሮሲን ካልኦት ሓለፍቲ ስራሕ መንግስትን ኣብ ሆስፒታል ጥቁር ኣንበሳ ዝተሃነፀ ማእኸል ሜዲሲን ኑክሌር መሪቖም ከፊተሞ። ሚኒስትር ጥዕና ዶክተር መቅደስ ዳባ ኣብዚ እዋን ከምዝበልኦ፤ ሕማም ካንሰር ንምክልኻል ኢሉ እውን ተበፃሕነት ሕክምና ንምስፋሕ ልዑል ወጻኢ ይሓትት። ስለዝኾነ እውን መንግስቲ ስግኣት ጥዕና ማሕበረሰብ ንዝኾነ ካንሰር ንምክልኻልን ሕክምና ንዘድልዮም ዜጋታት ግቡእ ምርመራን ሕክምና ጨረርን ካንሰር ንምስፋሕን ንልምዓት ሓይሊ ሰብን ቴክኖሎጅን ትኹረት ከምዝሃበ ገሊፀን። እዚ ውፅኢታዊ ንምግባር ድማ ምስ መዳርግቲ ኣካልት ብምዃን ብርክት ዝበሉ ስራሕቲ እናሳለጠ ከምዝርከብ ሓቢረን። ብፍላይ ድማ እቲ ሚኒስቴር ምስ ዓለም ለኸ ኤጀንሲ ኣቶሚክ ኢነርጂ(IAEA) ብሓባር ብምዃን ንሕክምና ጨረር ካንሰር ምችው ዝኾኑ ስራሕቲ ምምችቻው ማእኸላት መውሃቢ ሕክምና እናሳለጠ ይርከብ ኢለን። ዓለም ለኸ ኤጀንሲ ኣቶሚክ ኢነርጂ ብግድኡ፤ ኣብ ኢትዮጵያ ሕክምና ካንሰር ንምክልኻል ኣብ ዝግበር ፃዕሪ ዝገብሮ ደገፍ ከምዘጠናኽር ገሊፁ።

  ወላይታ ሶዶ/ሰነ /24/2017 (ኢዜኣ) ክልል ደቡብ ኢትዮጵያ እቲ ክልል መርኣያ ሰላም፣ልምዓትን ምክእኣልን ንምግባር ብዝተሳለጡ ስራሕቲ ዝተረኸቡ ውፅኢታት ምጥንኻር ይግባእ ክብሉ ብመዓርግ ምክትል ቀዳማይ ሚኒስትር ሓላፊ ማእኸል ምትሕብባር ህንፀት ስርዓት ዲሞክራሲን ምክትል ፕሬዚዳንት ፓርቲ ብልፅግናን ኣይተ ኣደም ፋራህ ገሊፆም። “ጠንካራ ክልላዊ ሓድነትን ሕብረትን ንዘላቒ ሰላምን ብልፅግናን” ኣብ ትሕቲ ዝብል መሪሕ ሓሳብ ክልላዊ ኮንፈረንስ ሰላም፣ልምዓትን ሓድነትን ኣብ ከተማ ወላይታ ሶዶ ተኻይዱ። ብመዓርግ ምክትል ቀዳማይ ሚኒስትር ሓላፊ ማእኸል ምትሕብባር ህንፀት ስርዓት ዲሞክራሲን ምክትል ፕሬዚዳንት ፓርቲ ብልፅግናን ኣይተ ኣደም ፋራህ ኣብዚ እዋን ከምዝበልዎ፤ ኣብቲ ክልል ኣብ ማሕበራዊ፣ፖለቲካውን ኢኮኖሚያውን ዓውድታት ዝምዝገብ ዘሎ ውፅኢት ተጠናኺሩ ንክቕፅል ተሓጋጊዝካ ምስራሕ ይግባእ። እቲ ኮንፈረንስ፤ ኣብ ሰላም፣ልምዓትን ሓድነትን እቲ ክልል ኣወንታዊ ለውጢ ብምምፃእን ሓድነት እቲ ህዝቢ ብምርግጋፅን ጉዳያት ሰናይ ምምሕዳር ናብ ዝሓሸ ብርኪ ንምብፃሕ ዝሕግዝ እዩ ኢሎም። ኣብ ቀፃሊ ከፋፈልቲ ተረኻት ብምእላይ ብኣተሓሳስባ መደመር ሕውነትን ኣሓትነትን ተጠናኺሩ ንክቕፅል ብምግባር ጉዕዞ ብልፅግና ምቅልጣፍ ከምዘድሊ እውን ሓቢሮም። ሓባራዊ መንነት ዘጠናኽሩ ሕብረ ብሄራዊነት ንምርግጋፅ ዝሓለፈ ፀገም ብይቅርታ ብምሕላፍ ኣብ ቀፃሊ ዝሓሸ ውፅኢት ንምምዝጋብ ምስራሕ ይግባእ ኢሎም። ጠንካራ ክልላዊ ትካላት ብምፍጣር ብብቑዓት ኣመራርሓ ንክምርሑ ብምግባር ግዕዝይና ዝፅየፍ ወለዶ ምፍጣር ከምዝግባእ እውን ኣረዲኦም።

  ኣዲስ ኣበባ/ሰነ/ 24/2017 (ኢዜኣ) መናእሰይ መራሕቲ ልሙድ ብያኔ እቲ ዞባ ብምቕያር መፃኢ ግዜ ናይ ምቕያር ዓቕሚ ኣለዎም ክብሉ ዋና ፀሓፊ በዓል መዚ በይነ መንግስትታት ልምዓት ምብራቕ ኣፍሪካ(ኢጋድ) ወርቅነህ ገበየሁ (ዶ/ር) ገሊፆም። እቶም ዋና ፀሓፊ ኣብ ኬንያ ከተማ ሞምባሳ ልምዓት ኣካዳሚ ኣመራርሓ ኢጋድ ፈላማይ ዙር ስልጠና መናእሰይ ሎሚ ኣጀሚሮም። ወርቅነህ ገበየሁ (ዶ/ር)፤ እቲ ኣካዳሚ ኢጋድ ከም ዋና ራእዩ ዝሰርሐሉ ንዘሎ ዞባዊ ምትሕብባርን ምትእስሳርን ንምጥንኻር ቁልፊ እጃም ኣለዎ ኢሎም። መናእሰይ መራሕቲ ምብቃዕ ወሳኒ ከምዝኾነ ብምሕባር፤ መናእሰይ ኣመራርሓ መፃኢ ግዜ እቲ ዞባ ዝውስኑን ዝቕይሩን ከምዝኾኑ ተዛሪቦም። መናእሰይ ቆራፅ መራሒ ንምዃን ሓሲቦም ፈተናታት ከየሸነፎም ሽቶኦም ንምዕዋት ብትግሃትን ተኣማንነትን ንከግልግሉ እውን ፃውዒት ኣቕሪቦም። እቶም ዋና ፀሓፊ፤ ራኢ ኣካዳሚ ኣመራርሓ ኢጋድ ንምዕዋት ደገፍ ንዝገብራ ዘለዋ ኣባል ሃገራትን መሓዙት ልምዓትን ምስጋና ኣቕሪቦም። ኣካዳሚ ኣመራርሓ ኢጋድ ከም ኣቆፃፅራ ኣውሮፓ ኣብ 2002 ጉባኤ መራሕቲ ኢጋድ ኣብ ዘመሓላለፍዎ ውሳነ ዝተጣየሸ ትካል እዩ።

  ኣዲስ ኣበባ/ ሰነ/23/ 2017 /ኢዜኣ/ቀዳማይ ሚኒስትር ኣቢይ ኣሕመድ(ዶ/ር) ምስ ዋና ዳይሬክተር ዓለም ለኸ ኤጀንሲ ሓይሊ ኣቶሚክ(IAEA) ማሪያኖ ግሮሲ ዘቲዮም። እቶም ቀዳማይ ሚኒስትር ኣብ ማሕበራዊ ሚዲየኦም ኣብ ዘስፈርዎ መልእኽቲ ሎሚ ንጎሆ ኣብ ጉባኤ ሬይስ ኦፍ ሆፕ ንምስታፍ ናብ ኣዲስ ኣበባ ምስ ዝኣተዉ ዋና ዳይሬክተር ዓለም ለኸ ኤጀንሲ ሓይሊ ኣቶሚክ(IAEA) ማሪያኖ ግሮሲ ተራኺብና ኢሎም። ዓለም ለኸ ሓይሊ ኣቶሚክ ኣብ ኢትዮጵያ ዝገብሮ ደገፍ ክንክን ሕክምና መንሽተሮ/ካንሰር፣ ጥዕና እንስሳት፣ ኒኩለር ኢንጂነሪንግን ማዕቐፋት ቁፅፅርን ዝጠመተ ከምዝኾነ ገሊፆም። እቲ ዘተ ኣብ ከይዲ ኣብ ዘለዉ ደገፋትን ምትሕብባርን ጠመተ ዝገበረ ከምዝኾነ ሓቢሮም።

  ኣዲስ ኣበባ/ ሰነ/22/ 2017 /ኢዜኣ/መንግስቲ ሕቶ ህዝቢ ምላሽን ኸረክብ ሎሚ እዉን ከም ትማሊ ብፅንዓት ክሰርሕ ኢዩ ክብል ኣገልግሎት ኮሚኒኬሽን መንግስቲ ገሊፁ። እቲ ኣገልግሎት ኣብ ዘውፅኦ መግለፂ ህዝቢ ክልል ኣምሓራ ኣብ ዝሓለፉ ሒደት ዓመታት ክኸፈል ዘይግብኦ ክባር ዋጋ ብሰንኪ ውሑዳት ሱሱዓት ይኸፍል ከምዘሎ ገሊፁ ኣገልግሎት ኮሚኒኬሽን መንግስቲ ኣብ ዘውፀኦ መግለፂ፥ መንግስቲ ሎሚ እውን በሪታት ሰላም ከፊቱ ይፅበ ኣሎ ኢሉ። ሕቶ ሰላምን ልምዓትን ህዝቢ ንምምላስ ካብ ዝኾነ እዋን ንላዕሊ ብዝለዓለ ኩነታት ድሉው ኢዩ ክብል ኣገልግሎት ኮሚኒኬሽን መንግስቲ ኣመልኪቱ። ታሪኻዊ ኣመፃፅኣን ዕላማን ፋኖ መሰረት ብዘይብሉ ኣገባብ ፅንፈኛ ሓይሊታት ብዝወልዕዎ ጎነፅ ሰላምን ልምዓትን ህዝቢ ኣምሓራ ኣዝዩ ተሃስዩ ኢዩ ኢሉ። ብሚሊዮናት ዝቑፀሩ ሰገናት ካብ መኣዲ ትምህርቲ ምፍላዪ እውን ሓቢሩ።ንህዝቢ ካብ ምንቅስቓስ ልምዓት ከምዘተኣጓጎለ እውን ኣረዲኡ። ህዝቢ ኣምሓራ ነቲ ክልል ካብ ጎነፅን ስርዓት ኣልቦነትን ንምውፃእ በቢከባቢኡ ተኣኪቡ ዘተን ልዝብን ምክያዱ ኣዘኻኺሩ። ሕቶ ህዝቢ እቲ ክልል ኣብ መድረኸ ዘተ ብሄራዊ ኮሚሽን ብኣጀንዳነት ንክተሓዙ ከምዝገበረ ኣብሪሁ። ናይ መንግስቲ ፌደራል ትካላት ፀጥታን መሓውራት ፀጥታ እቲ ክልልን ሰላም እቲ ክልል ንምርግጋፅ ልዑል ፃዕሪ ከምዝገበሩ ገሊፁ።ይኹን እንበር ህዝቢ ብዝደሊዮ ልክዕ ሙሉእ ንሙሉእ ሰላም ኣይተረጋገፀን ኢሉ። ስለ ዝኾነ እቲ ህዝቢ ፀገሙ ንመንግስቲ ንምግላፅ ኣብ ዝተፈላለዩ ከተማታት ሰለማዊ ሰልፊ ምክያዱ ገሊፁ። መንግስቲ ሕቶ ህዝቢ ንምምላስ ሎሚ እዉን ከም ትማሊ ብንቕሓት ክሰርሕ ኢዩ ኢሉ ኣገልግሎት ኮሚኒኬሽን መንግስቲ ኣብ መግለፂኡ። መንግስቲ ሰላም ህዝቢ፣ ሕቶ ሰናይ ምምሕዳርን ልምዓትን ምላሽ ንምሃብ ሎሚ እውን ከምትማሊ ድልዊ እዩ፡፡ መንግስታዊ ግቡኡ እውን እዩ ፡፡ሕቶ ክልል ህዝቢ ክልል ኣምሓራ ንምምላስ ምስ ህዝቢ እቲ ክልል ምምሓዳር ን ኣካላት ፀጥታን ብምውዳድ መንግስቲ ልዑል ፃዕሪ ክገብር እዩ ፡፡ህዝቢ ኣብ ጎኒ መንግስቲ ጠጠው ብምባል ሰላሙ ክሕሉ ዘርኣዮ ቖራፅነት ብምንኣድ ፡፡ ኣፋፈት ሰላም ሎሚ እውን ክፉት ጌይሩ እናሓለወ ንሕቶ ሰላምን ልምዓትን ምላሽ ንምሃብ ካብ ማንም እዋን ንላዕሊ ድልዊ ምኸኑ መንግስቲ የረጋግፅ ፡፡ ንኣማራፅታት ሰላም ዘይቐበሉ ኣካላት ምስ ሓይልታት ፀጥታ እቲ ክልልን ፌደሬኢን ብምኹን ስርዓት ንክሕዙ ሰላም ህዝቢ ንኸረጋገፅ ክሰርሕ እዩ፡፡ ህዝቢ ብቐልዑ ዘቐረቦም ሕቶታት ምስ ህዝቢ ብምኹን ምላሽ ንምሃብ ዘይተቖጠበ ፃዕሪ ክገብር እዩ፡፡ህዝቢ ብዝሰልጠነ ኣገባብ ሓሳቡ ብምግላፁ መንግስቲ ምስጋና የቐርብ ፡፡ ሰነ/ 22 / 2017 ዓ/ም አገልግሎት ኮሚኒኬሽን መንግስቲ

 

 

 

  ባህርዳር /ሰነ/ 22/2017(ኢዜአ)፦ኣብ ክልል ኣምሓራ ኣብ ዝተፈላለዩ ከተማታት ንሰላም ዝድግፍን ንፅንፈኛታት ዝኹንንን ህዝባዊ ሰልፊ ይካየድ ኣሎ። ኣብ እቲ ዝካየድ ዘሎ ሰላማዊ ሰልፊ ንፃዕሪ ሰላምን ልምዓትን መንግስቲ ብመድጋፍ ን ብምንኣድን ዝጎልበተ ደገፍን ሓገዘን ክንገብር ኢና ብምባል ተሳተፍቲ እቲ ሰለማዊ ሰልፊ ኣረጋጊፆም። ኣብክልል ኣምሓራ ሓደ ሓደ ከባበታት ጉጅለ ፅንፈኛ ኣብ ልዕሊ ዜጋታት ዝፍሞ ዘሎ መቐተልቲ ፣ምዕጋትን ዘረፋን ንኩንን ብምባል ኣብ እቲ ሰልፊ ኣቓሊሖም ። ሰላም ንደሊ ኢና፣ መንግስቲ ሕጊ ብምኸባር ገበነኛታት ንፍርዲ የቐርበልና፣ ሃርበኝነት ልምዓት ንደቅና ክነውርስ ኢና፣ ሰላም ሃፍቲ ሃገር እዩ፣ ሰላም ንኹሉ ኹሉ ንሰላም ዝብሉን ካልዖት መልክትታት ኣማሓለሊፎም ።

  ኣዲስ ኣበባ/ሰነ 20/2017(ኢዜኣ) ኢትዮጵያ ኣብ ዝነኣድ ጉዕዞ ሕዳሰ እያ ትርከብ ክብሉ ምክትል ፕሬዚዳንት ናይጄሪያ ካሺም ሼቲማ ገሊፆም። ቀዳማይ ሚኒስትር ዐቢይ ኣሕመድ(ዶ/ር) ምስ ምክትል ፕሬዚዳንት ናይጄሪያ ካሺም ሼቲማ ቁልፊ ኣብ ዝኾኑ ክልቲኣውን ኣህጉራውን ጉዳያት ምዝታዮም ዝዝከር እዩ። እቶም ምክትል ፕሬዚዳንት፤ ዘደንቑ ሓድግታትን ታሪኽን ኢትዮጵያ ኣጉሊሁ ብዘርኢ መልክዑ ተሓዲሱ ንምርኢት ክፍቲ ዝኾነ ብሄራዊ ቤተ መንግስቲ ጎብንዮም። ዑደቶም ብዝምልከት እውን ኣብ ዕላዊ መዝገብ ክብሪ ኣብ ዘቐመጥዎ መልእኽቲ መዘከርታ፤ እቲ ብሄራዊ ቤተ መንግስቲ ህያው ታሪኽ እዩ ኢሎም። ኢትዮጵያ ኣብ ኣፍሪካ ብሕታዊት ባዕዳዊ መግዛእቲ ዘይተገዝአት ሃገር ከምዝኾነት ብምዝኽኻር፤ ኣብ ዝነኣድ ጉዕዞ ሕዳሰ እያ ትርከብ ኢሎም። ብድሙቕ ፀጋ ታሪኽን ዓባይ ሃገርነትን ኢትዮጵያ ኩርዓት ከምዝተሰምዖም እውን ኣብ መልእኽቶም ገሊፆም።

ኣዲስ ኣበባ/ሰነ /20/2017(ኢዜኣ) ኣብ ኢትዮጵያ ህንፀት ሰላምን ብሓድነት ምንባርን ንክጠናኸር ሃገር ቦቆል ስርዓታት ኣፈታትሓ ጎንፂ ርኡይ ኣስተዋጽኦ እናበርከቱ ከምዝኾኑ ሚኒስትር ሰላም መሀመድ እድሪስ ኣፍሊጦም። ሚኒስቴር ሰላም”ማሕበራዊ ሃፍትታትና ንሕብረ ብሄራዊ ሓድነትና” ኣብ ትሕቲ ዝብል መሪሕ ሓሳብ ሃገራዊ መድረኽ ምኽክር ኣባላትን ኣመራርሓን ዓበይቲ ዓዲ፣ኣቦታት ሃይማኖት፣መራሕቲ ዓሌታትን ትካላት ሰላምን ኣካይዱ። ሚኒስትር ሰላም መሀመድ እድሪስ ንኢዜኣ ከምዝበልዎ፤ ዘላቒ ሰላምን ድሕንነትን ኢትዮጵያ ንምርግጋፅ ሃገር ቦቆል ስርዓታት ኣፈታትሓ ጎንፂ ዘይትካእ እጃም ኣለዎም። መንግስቲ ኢትዮጵያ ካብ ዝሓለፈቶም ታሪኽ ፖለቲካ ብዝተፈጠሩ ፈተናታት ንዝፍጠሩ ፀገማት ፀጥታ ምላሽ ንምሃብ ስራሕቲ ኣማራፂ ሰላም ምስፍሕፋሕን ምኽባር ሕግን እናሳለጠ ከምዝኾነ ሓቢሮም። ዓበይቲ ዓድን ኣቦታት ሃይማኖትን እውን ብዝተሰሓሓተ ስልሒት ዕጥቂ ዘልዓሉ ኣካላት መንግስቲ ዝፈጠሮ ኣማራፂ ሰላም ንክቕበሉ ኣብ ምግባር ናይ ምርድዳእ እጃሞም እናተዋፅኡ እዮም ዝርከቡ ኢሎም። ሚኒስቴር ሰላም እውን ዓበይቲ ዓድን ኣቦታት ሃይማኖትን ዘማዕበልዎ ስራሕ ኣፈታትሓ ጎንፅን ህንፀት ሰላምን ንምቕፃል ብትኹረት እናሰርሐ ከምዝርከብ ተዛሪቦም። እቲ ኣብ ኣካዳሚ ልህቀት ኣመራርሓ ኣፍሪካ ዝተኻየደ መድረኽ ምኽክር ልውውጥ ልምድን ምልላይ ሕድ ሕድን ዝተፈጠረሉ ከምዝኾነ ኣረዲኦም። ብተወሳኺ እውን ተሳተፍቲ እቲ መድረኽ ኣብ ሃገር ቦቆል ህንፀት ሰላምን ኣፈታትሓ ጎንፅን ፍልጠትን ፀጋኦምን ብምጥቃም ቀፃልነት ዘለዎ ስራሕ ዝሰርሕሉ ስርዓት ከምዝተዘርገሐ ገሊፆም።

  ጅማ/ሰነ /20/2017(ኢዜኣ) ኣመራርሓን ኣወዳድባን ሰራዊት ምክልኻል ሃገር ብዝለዓለ ኩለመዳያዊ ብቕዓት ብወታደራዊ ጥበብን ዘበናዊ ቴክኖሎጅን ዝተደገፈ ከምዝኾነ ዋና ኣዛዚ ማእኸላይ እዚ ዳሎል ሌተናል ጀነራል ዘውዱ በላይ ገሊፆም። ኣብ ትሕቲ ማእኸላይ እዚ ዳሎል ሰራዊት ምክልኻል ሃገር ዝርከቡ ዝተፈላለዩ ኮራት ዝሳተፍሉ ፌስቲቫል ስፖርት ኣብ ከተማ ጅማ ምክያድ ጀሚሩ። ዋና ኣዛዚ ማእኸላይ እዚ ዳሎል ሌተናል ጀነራል ዘውዱ በላይ ኣብዚ እዋን ከምዝበልዎ፤ እቲ እዚ ዶብ ሃገር ካብ ምኽባር ብተወሳኺ ሓድነትን ማሕበራዊ ኣገልግሎታትን ዘጠናኽሩ ስራሕቲ እናሳለጠ እዩ ዝርከብ። እዚ ዳሎል ኣብ ኣገልግሎት ሰናይ ፍቓድ ኣብ ምልጋስ ደም፣ሕድሳት ኣባይቲ ዓቕሚ ዘይብሎም ዜጋታትን ተኸላ ፈልስን ሓዊሱ ኣብ ዝተፈላለዩ ሃገራዊ ስራሕቲ ልምዓት ብምስታፍ ከምዝፍለጥ ሓቢሮም። ሰራዊት ምክልኻል ሃገር ብሕብረ ብሄራዊ ሓድነት ብጅግንነት ንክብርን ልኣላውነትን ሃገሩ ለይትን ቀትርን እናሰርሐ ዘሎ ብቑዕን ጠንካራን ሰራዊት እዩ ኢሎም። እቲ ሰራዊት ብዝለዓለ ኩለመዳያዊ ብቕዓት፣ወታደራዊ ጥበብን ዘበናዊ ቴክኖሎጅን ብዝተወደበ መልክዑ እናተመርሐ ከምዝኾነ ብምሕባር፤ መኸታን ሓላውን ልኣላውነት ሃገር ካብ ምዃን ብተወሳኺ ኣብ ልምዓትን ካልኦት ማሕበራዊ ኣገልግሎትን እውን እጃሙ እናተዋፅአ ከምዝኾነ ተዛሪቦም። ስለዝኾነ እውን ቀንዲ ዕላማ እቲ ፌስቲቫል ስፖርት እቲ እዚ ምስ ሕብረተሰብ እቲ ከባቢ ዘለዎ ምትእስሳርን ሕድ ሕዳዊ ርክብ እቲ ሰራዊትን ብዝበለፀ ንምጥንኻር እዩ ኢሎም። ሓላፊ ቤት ፅሕፈት ማእኸላይ እዚ ዳሎል ኮሎኔል በዛብህ ይመር ብግደኦም፤ ኣብቲ ውድድር ስፖርት ኣብ ትሕቲ እቲ እዚ ዝርከቡ 5 ኮራት ከምዝሳተፉ ብምግላፅ፤ ብዝተፈላለዩ ዓይነታት ስፖርት ን10 መዓልትታት ከምዝወዳደሩ ሓቢሮም።