Bitootessa 30/2018 (ENA): Hanqinni oomishaalee qonnaa ayyaana Faasikaatiif barbaachisan akka hin uumamneef magaalaa Hararitti hojiin hojjetamaa jiraachuu Ejensiin Misooma Daldala Naannichaa beeksise. Shamattoonnii fi daldaltoonni akka jedhanitti dhiyeessiin oomisha qonnaa ayyaana kanaaf barbaachisu gahaa ta’e dhiyaatera. Hogganaan Ejensii Misooma Daldalaa Naannoo Hararii obbo Shariif Muummee ENAtti akka himanitti, hanqinni oomishaalee ayyaana kanaaf barbaachisan akka hin uumamneef hawaasa daldalaa hunda waliin mariin gaggeeffameera jedhani. Dhiyeessii oomishaa haala mijeessuun Oomishaalee godinaalee baadiyyaa naannichaa keessatti oomishaman gara magaalatti fiduudhaan dhiyeessitoota adda addaa waliin walitti dhufeenya uumuun oomisha gara magaalatti fidameera jedhan. Oomishaalee iizii Bahaatiin oomishaman waldaalee shamattootaaf dhiyeessuun hawaasni gatii madaalawaadhaan akka argatu taasisaa akka jiranis himaniiru. Gabaa Sanbataa fi Dilbataa magaalattii cimsuuf hojjetamaa akka jirus akeekaniiru. Daldaltoota seeraan ala gatii dabalan hordofuu fi to’achuuf hojjetamaa jiraachuu fi yeroo ammaa kana omishaaleen ayyaana kanaaf barbaachisan gatii madaalawaadhaan gurguramaa akka jiran hubachiisaniiru.   Gabaa aadaa Dilbataa fi Sanbataa magaalattii “Mobil” jedhamutti gurgurtaa kuduraalee irratti kan bobba’an Aadde Baqqalech Nigusee, kuduraalee naannoo sanaa fi iddoowwan biroo irraa fayyadamtootaaf dhiyeessaa akka jiran eeraniiru.   Daldala oomisha qonnaa irratti kan bobba’an obbo Isaayyaas Alamaayyoo gama isaaniin, gabaa ayyaanaa irratti dhiyeessiin oomishaa fooyya’aa ta’uu ibsuun, gatii Waajjirri Daldala Naannichaa kaa’e irratti hundaa’uun gatii madaalawaadhaan fayyadamtootaaf gurguraa akka jiran himaniiru.   Bakka sanatti kuduraalee bitachaa kan turan aadde Haymaanot Yashiixilaan, ayyaana Faasikaa kanaaf kuduraalee, hanqaaquu fi oomishaalee biroo dhiyeessiin akka jiru himaniiru. Daldaltoota gatii hin malle dabalanirratti tarkaanfiin cimee akka itti fufu eeraniiru. #Ena Afaan Oromoo #TOI #Ena

Bitootessa 30/2018(ENA) : Gaaffiin seena qabeessi Abbummaa Ulaa Galaanaa Itiyoophiyaa gaaffii seeraa fi dippilomaasii kan barbaadu dhimma dhalootaa ta'uu hayyoonni damee bishaanii beeksisan. Hayyoonni damee bishaanii Yuunivarsiitii Finfinnee ENA waliin turtii taasisaniin akka himanitti, gaaffiin abbummaa seena qabeessi Ulaa Galaanaa Itiyoophiyaa dhimma qananii osoo hin taane dhimma dhalootaa fi dhimma jiraachuuti jedhani. Barsiisaan Kutaa Barnoota Siivilii fi Injiinariingii Naannoo Yuunivarsiitichaa Doktar Ballaxaa Birhaanuu, Qaroominni Itiyoophiyaa bu'aa ida’ama bishaanota Abbayyaa fi Galaana Diimaati jedhaniiru. Qaamonni Bishaanota lamaan kanaa (Abbayyaa fi Galaanni Diimaan) utubaa ijaarsa biyyaa fi guddina Dinagdee naannawaa ,Ardii fi Addunyaa ta'uusaanii ibsaniiru. Gaaffiin Abbummaa Ulaa Galaanaa Itiyoophiyaas dhimma dhalootaa, seeraa, seenaa, dinagdee fi haala teessuma lafaatiin ilaalamaa jiru ta'uu eeraniiru. Kanaan walqabatee, gaaffichi Seenaa, Qaroomina, Hawaasummaa fi dinagdee waliin hidhata cimaa kan qabu dhimma jiraachuu fi dhalootaa ta'uusaas ibsaniiru. Qorataan Haayidiroo-politiksii fi dhimma Bishaanii Idil-Addunyaa Yuunivarsiitichaa kan ta’an Doktar Yaa’iqoob Arsanoo, Abbummaan Ulaa Galaanaa Seenaa Itiyoophiyaa keessatti bakka guddaa kan qabu dhimma ijoodha jedhaniiru. Diinonni Itiyoophiyaa jeequmsa shiftootaa fayyadamuun Eertiraa kutanii gargar baasuun, biyyattiin ulaa galaanaa isa madda qaroomina ishee ta'e irraa akka fagaattu taasifamuushee yaadachiisaniiru. Hayyoonni kun dabalataan, dhimmi qaama bishaanota lamaan Itiyoophiyaa dhimma kabaja uummataa fi birmadummaa biyyaa mirkaneessuudha jedhaniiru. Dhaloonni Abbayya irratti Hidha Haaromsaa dhugoomse kun, ijaarsa seeraa fi dippilomaasii hordofuun gaaffii abbummaa Ulaa Galaanaa Itiyoophiyaatiif deebii argamsiisuu akka qabu hubachiisaniiru.

Bitootessa 30/2018 (ENA): Tajaajilli Geejjibaa Veloosiitii yaa’insa geejjiba ummataa magaalaa haala mijeessuu fi dhaqqabamummaa isaa babal’isuu keessatti gahee olaanaa taphachaa jiraachuu Hogganaan Biiroo Geejjibaa Bulchiinsa Magaalaa Finfinnee obbo Yaabbibaal Addis ibsaniiru. Dhaabbanni Tajaajila Geejjibaa Veeloosiitii walta’iinsa mootummaa fi deeggars dhaabbata dhuunfaan bu’uura godhachuun tajaajila kennaa jiru har’a waggaa 1ffaa isaa kabajeera.   Hogganaan Biiroo Geejjibaa Bulchiinsa Magaalaa Finfinnee Yaabbibaal Addis dhaabbatichi waggaa tokko dura otoobisoota elektirikii 100’n hojii eegaluu isaa yaadachiisaniiru. Waggaa darbe keessa guyyaatti lammiilee hanga kuma 120, waggaatti ammoo hanga miiliyoona 40 geejjibsiisuun gumaacha taasisuu himan.   Sochii guyyaa guyyaa jiraattotaa saffisaa fi bu’a qabeessa taasisuu fi dhaqqabummaa geejjibaa ummataa babal’isuufis gumaacha olaanaa taasisaa jiraachuu hubachiisaniiru. Kunis qooda geejjibaa ummataa magaalattii dhibbantaa 36 irraa gara dhibbeentaa 42tti ol guddiseera jedhan. Bulchiinsi magaalichaa geejjibni magariisaa faalama irraa bilisa ta’e babal’isuuf hojjechaa jiraachuu eeruun, gama kanaan geejjibni Veeloositii konkolaattota elektirikiitiin tajaajila kennuudhaan gahee olaanaa taphachaa jiraachuu eeraniiru. Bulchiinsi magaalattii lakkoofsa otoobisoota Veeloositii Geejjibaa filannoo jalqabaa geejjibaa magariisaa ta’e gara 500tti guddisuuf karoorfachuu isaa ibsaniiru. Agarsiisa geejjibaa magariisaa kan ta’e Veeloosiitii lammiilee hedduuf carraa hojii akka uumees eeraniiru.   Dhaabbata Balaayinee Kindee Giruuppiitti Gorsaan Daldala Geejjibaa fi Hojii Gaggeessaan Waliigalaa Geejjibaa Gireet Gizaawuu Alamuu gama isaaniin akka himanitti, Giruuppiin Blaaynee Kindee qindeessa hojii fi tajaajila otobusii ni bulcha jedhani. Haaluma kanaan, sirna dijitaalaa bobbii waliigalaa fi kenniinsa tajaajila otoobisoota hordofuu fi to’achuu dandeessisu hojiirra ooluun hojiitti galuu ibsani.   Sirna tikkeettii fi kaffaltii guutummaatti teeknooloojiin hojiirra ooluu eeraniiru. #Ena Afaan Oromoo #TOI #Ena

Bitootessa 30/2018 (ENA): Daandiin Qilleensaa Itiyoophiyaa waggoota 80 darbaniif mallattoo guddinaa, bu’aa fi fakkeenya boonsaa biyyaalessaa ta’uu hoji gaggeessaan olaanaa garee Daandii Qilleensaa Itiyoophiyaa obbo Masfin Xaasoo ibsaniiru. Daandiin xiyyaaraa kun qormaata bara baraan Afrikaa addunyaa waliin walqunnamsiisu dhaabbata aviyeeshinii adda duree ta’uu isaa mirkaneessee akka jirus hubachiisaniiru.   Hojii gaggeessaan olaanaa Garee Daandii Qilleensaa Itiyoophiyaa obbo Masfin Xaasoo waggaa 80ffaa Daandii Qilleensaa Itiyoophiyaa ilaalchisee miidiyaaleef ibsa kennaniiru. Hojii gaggeessaan kun daandiin xiyyaaraa kun balallii jalqabaa isaa Bitootessa 30, 1938 Ergasii as guddinni isaa wal irraa hin cinne ta’ee amma daandii xiyyaaraa guddaa ta’ee addunyaa guutuutti bakkeewwan 145tti balallii isa guddisuu ibasaniiru. Daandiin xiyyaaraa kun xiyyaarota yeroo isaa ammayyaa ta’an fayyadamuun maamiltoota isaaf tajaajila olaanaa kennaa akka jiru, keessumaa gama ijaarsa dhaabbileetiin bu’aa jajjabeessaa galmeessuu isaa hubachiisaniiru. Amma xiyyaara mataa isaa irratti suphaa raawwachuuf dandeettii guutuu uumuun isaa guddina itti fufiinsa qabu dhaabbatichaaf bu’uurri guddaan akka kaa’ame kan agarsiisu ta’uu ibsaniiru. Daandiin xiyyaaraa kun ogeessota aviyeeshinii oomishuuf Akkaadaamii Aviyeeshinii mataa isaa kan qabu yoo ta’u, Yuunivarsiitii Aviyeeshinii guddicha Afrikaa ijaaruun seenaa isaa keessatti milkaa’ina guddaa galmeessee jira jedhan. Daandiin xiyyaaraa kun humna namaa gahumsa qabu kan mul’ata isaa raawwachuu danda’u oomishuuf akkasumas hojjettoota ciccimoo naamusa hojii qaban uumuu keessatti bu’a qabeessa ta’uu ibsaniiru. Dandeettii tajaajila fe’umsaa guddisuu bira darbee bu’uuraalee misoomaa deeggarsaa hedduu ijaareera jedhan. Misoomni bu’uuraalee misoomaa qindaahee fi hojmaatni maamila giddu galeessa godhate kunneen daandiin xiyyaaraa kun gabaa addunyaa keessatti dorgomaa ta’ee akka turuu fi guddina itti fufiinsa qabu akka argatu taasiseera jedhan. Daandiin xiyyaaraa kun xiyyaarota 150 kan qabu yoo ta’u, dhaqqabummaa fi qulqullina balallii isaa daran guddisuuf xiyyaarota haaraa 117 bitachuuf adeemsa irra jiraachuu himaniiru. Waggoonni saddeettaman darban daandiin xiyyaaraa kanaaf yeroo of kennuu, hojii cimaa fi milkaa’ina itti argatan ta’uu ibsaniiru. Daandiin Qilleensaa Itiyoophiyaa qormaata mudate dandamachuun Afrikaa addunyaa waliin walqunnamsiisu dhaabbata aviyeeshinii adda duree ta’uu isaa mirkaneessee akka jiru hubachiisaniiru. #Ena Afaan Oromoo #TOI #Ena