Adoolessa 5 / 2018 (ENA): Magaalaan Finfinnee ijaarsa seenessa waloo fi tokkummaa cimsuudhaan gidduu-gala nageenyaa fi misoomaa ta'aa dhufuushee Kantiibaan Magaalaa Finfinnee Adaanech Abeebee ibsan. Manni Maree Magaalaa Finfinnee yaa'ii idilee 4ffaa bara hojii 5ffaa isaa galma yaa'ii mana marichaa Giddu-gala Yaadannoo Injifannoo Adwaatti gaggeessaa jira. Kantiibaan Magaalaa Finfinnee Adaanech Abeebee yaa'ii idilee mana marichaa kana irratti gabaasa raawwii hojii waggaa kan bara baajataa 2018 Bulchiinsa Magaalichaa dhiyeessaa jiru. Kantiibaa Adaanech Abeebee gabaasa isaaniitiin; Finfinnee akka maqaa ishiitti miidhagsuuf waadaa gallerratti hundaa'uun, waggoottan shanan darban keessatti jijjiiramoota bu'uuraa fi hundee-qabeessa ta'an hedduu raawwachuu dandeenyee jirra jedhaniiru. Dabalataanis, ilaalchota boodatti hafoo fi rakkoolee hundee gadi fageeffatanirratti, jabeenyaan qabsaa’uun, Finfinnee siyaasa faayidaa hin qabne wal-dhiibuu fi wal-harkisuurraa walaba kan taate, gidduu-gala nageenyaa fi misoomaa gochuun akka danda'ame dubbataniiru. Akka fakkeenyaattis, Gidduu-gala Yaadannoo Injifannoo Adwaa ijaaruudhaan, bu'uura seenessa waloo fi walitti qabaa ta'e ijaaruu dandeessisu ta’uusaa akka ragaatti hubachiisaniiru. Finfinneetti nageenyi fulla'aan akka mirkanaa'u, miidhagduu, magariisaa fi qulqulluu gochuun, fakkeenya badhaadhina Itiyoophiyaa akka taatuuf bu'uuraaleen dandeessisan lafa qabachaa jiraachuu ibsaniiru. Magaalattii jijjiiruudhaan, magaalittiin Afriikaa keessaa magaalota qulqulluu kudhan keessaa tokko ta'uun beekamtii idil-addunyaa argachuu ishee kaasaniiru. Uwwisni Magariisummaa Magaalattii dhibbeentaa 2tuqaa8 irra ture gara dhibbeentaa 24tti ol guddachuun isaas ragaa jijjiirama bu'uuraa kan biroo ta'uusaa eeraniiru. Daandileen Finfinnee bal'aa, dukkana magaalittii dura ture ifaatti jijjiiramuu kan ibsan kantiiba Adaanech; kunis dandeettii Magaalittiin yaa'iiwwanii fi daawwattootaa hedduu keessumsiisuuf qabdu akka dabale ibsaniiru. Giddu-gala dippilomaasii ta'uunshees caalaatti cimee, Itiyoophiyaanota qofa osoo hin taane, Afriikaanotni hundi 'Magaalaa guddoo keenya' jedhanii kan waamanii fi hunda keenyaa kan boonsu ta'uu ishee ibsaniiru.

Adoolessa 4/2018(ENA)- Mariin biyyaalessaa rakkoolee hidda gad-fageeffatan karaa qaroomeen furuun ijaarsa biyyaa cimaa fi waliigaltee biyyaalessaaf boqonnaa guddaa kan banu ta’uusaa hayyoonni ibsan. Yaa’iin seena qabeessi adeemsa marii biyyaalessaa Itiyoophiyaa waggootaaf gaggeeffamaa ture eegalamuuf guyyoota muraasatu hafe. Yaa’ii murteessaa Adoolessa 8 bara 2018 wiirtuu konveenshinii idil addunyaa Addisitti eegalamurratti mari’achuuf mari’attoonni guutuu biyyaarraa walitti dhufan kuma 4 Finfinnee dhufaniiru. Komishinichi adeemsa marichaa ilaalchisuun yaadannoo injifannoo Adwaatti mari’attootaaf ibsa mariin duraa gochaa jira. Barsiiftonnii fi barattoonni dhaabbilee barnootaa olaanoo ENA’f yaada kennan akka jedhanitti, mariin biyyaalessaa kun rakkoo jiran mariin furuun nagaa fi tokkummaa biyyaa ni cimsa. Kanneen keessaa piroofeesar Alamaayyoo Gabramaaram akka ibsanitti, Itiyoophiyaan komishinii marii hundeessitee marii qabatamaatti seenuuf murteessuunshee tarkaanfii guddaadha. Adeemsi kun nageenya waaraa Itiyoophiyaa mirkaneessuuf shoora olaanaa akka qabaatu beeksisaniiru. Komishinichi aanaarraa eegalee kutaalee hawaasaa garagaraa mari’achiisuudhaan ajandaawwan ijoo saddet adda baasuunsaa bu’a qabeessummaa marichaaf gumaacha olaanaa akka qabaatu piroofeesar Alamaayyoon eeraniiru. Ajandaawwan filataman kunneen Itiyoophiyaanonni ijaarsaa fi misooma biyyaalessaa waloo irratti xiyyeeffatanii akka hojjetan haala akka mijeessuuf dabalanii eeraniiru. Adeemsi marichaa komishinii seeraa fi labsiidhaan hundeeffameen kan durfamuu fi walii galtee biyyaalessaa fulla’aa uumuuf kan kaayyeffate waan ta’eef, Afriikaa fi Addunyaan muuxannoo irraa fudhachuu kan danda’u hojii fakkeenyummaa qabu ta’uu hayyuun kun ibsaniiru. Adeemsi qaroomaan kun Itiyoophiyaanonni rakkoosaanii ofiisaanii furuu akka danda’an waltajjii addunyaarratti kan itti agarsiisan akka ta’u ibsaniiru. Yunivarsiitii Paabiliik Sarviisii Itiyoophiyaatti barsiisaan kutaa barnootaa bulchiinsaa fi hoggansaa Dr. Ujuluu Ukook gamasaaniin, mariin biyyaalessaa kun garaagarummaa mariidhaan furuun nageenya waaraa buusuuf qooda guddaa akka bahu dubbataniiru. Mariin kun lammiileen dhimmoota biyyaalessaa ijoorratti mari’achuudhaan waldhabdeen akka furamanii fi misooma waloorratti dammaqinaan akka hirmaatan carraa akka uumu amantaa qaban ibsaniiru. Haala wal fakkaatuun Yunivarsiitichatti barsiisaa fi qorataan komunikeeshinii misoomawaa fi qorannoo miidiyaa Dr. Zallaqaa Tashoomaa, mariin biyyaalessaa kun Itiyoophiyaa badhaatuu tokkummaanshee cimaa ta’ee fi nageenyi waaraan keessatti ciime uumuuf kan kaa’amu bu’ura cimaa ta’uusaa ibsaniiru. Milkaa’ina carraa seena qabeessa kanaaf kutaan hawaasaa hundi hirmaannaa fi tattaaffiisaa cimsuu akka qabu hubachiisaniiru.

Adoolessa 3/2018 (ENA): Mariin biyyaalessaa kun ijaarsa biyyaa cimaa fi tokkummaa waaraaf bu’uura kaa’aa akka jiru pirezidaantonnii fi hoggantoonni dhaabbilee barnoota olaanoo ibsaniiru. Komishiniin marii biyyaalessaa Itiyoophiyaa hundeeffamee waggoota darbaniif ajandaa walitti qabuu fi hirmaattota adda baasuu irratti hojii bal’aa hojjechaa tureera. Komishinichi konfiraansii biyyaalessaa guddicha Adoolessa 8, 2018 irraa eegalee gaggeeffamuuf ajandaawwan gurguddoo saddeet ifoomseera. Ijaarsa biyyaa, gurmaa’ina mootummaa fi caasaa, sirna siyaasaa, bakka bu’ummaa siyaasaa fi sirna filannoo, dhimmi magaalota federaalaa Finfinnee fi Dirree Dhawaa fi dhimmoonni amantaa ajandaalee keessaa kanneen eeramanidha. Ijaarsa dhaabbilee, olaantummaa seeraa fi mirga namoomaa, dhimma hawaasummaa, diinagdee, fi qonnaan bultootaa fi horsiisee bultootaa, malaammaltummaa fi bulchiinsa gaarii, akkasumas dhimmoonni ijaarsa nageenyaa konfiraansii guddicha irratti mariidhaaf ajandaa ta’aniiru. Itti aanaan Daarektarri Olaanaa Inistiitiyuutii Leenjii Tuurizimii Federaalaa Yittaassab Siyyum Itiyoophiyaan biyya ijaarsa mootummaa bara dheeraa qabdu ta’uu hubachiisaniiru. Haa ta’u malee, adeemsa seenaa keessatti wal faallessuun siyaasaa, hawaasummaa, diinagdee mudate sababa walitti bu’iinsaa fi waliigaltee dhabuu adda addaa ta’eera jedhan. Walitti dhufeenya waliinii cimaa fi duudhaalee aadaa guddatan fayyadamuun rakkoon kamiyyuu minjaala irratti mari’achuun furmaata argachuu akka danda’u ibsaniiru. Adeemsi marii kanaaf eegalame waliigaltee biyyaalessaa fi nageenyi waaraa mirkaneessuuf gumaacha guddaa akka qabus hubachiisaniiru. Pireezidaantiin Yuunivarsiitii Samaraa Dr. Mahaammad Usmaan Itiyoophiyaa keessatti rakkoon jaarraa hedduuf deemaa turee fi marii barbaadu hedduun akka jiran hubachiisaniiru. Tokkummaa fi birmadummaa biyyattiif dandeettiin garaagarummaa jiru waliigalteedhaan furuu danda’uun iddoo guddaa qaba jedhaniiru. Adeemsi marii biyyaalessaa kun itti fufiinsa adeemsa ijaarsa biyyaa fi ce’umsa dhalootaa fayya qabeessa ta’eef murteessaa ta’uus dubbataniiru. Kanaaf, mariin amma taasifamaa jiru ce’umsa dhalootaa milkaa’aa ta’eef akkasumas aadaa marii fi nageenya dhaloota egeree dagaagsuuf gumaacha kan taasisu ta’uu ibsaniiru. Mariin biyyoolessaa kun tokkummaa biyyaa fi ijaarsa biyyaa cimaaf bu’uura kaa’aa akka jiru Pireezidaantiin Yuunivarsiitii Dabaarqi Doktar Asmamaawu Zagayyee himaniiru. Mariin kun rakkoo yeroo ammaa furuu qofa osoo hin taane biyya tasgabbaa'aa fi badhaate dhaloota dhufuuf dabarsee kennuuf kan gargaaru ta'uu ibsaniiru. Adeemsa marii kanarratti dhaabbileen barnootaa dammaqinaan hirmaachaa turuu isaanii ibsuun, kun cimee itti fufuu qaba jedhan. #Ena Afaan Oromoo #TOI

‎Adooleessa 1/2018(ENA): ‎Gochoonni ukkaamsuu fi humnaan daa'immanii fi dargaggoota butuu garee seeraan alaa TPLF’n raawwatamaa jiru murnichi guutummaan guutuutti fudhatama dhabuu isaa agarsiisa jechuun Rogeeyyii fi Ogeeyyiin miidiyaa ibsan. ‎ ‎Naannoo Tigraay keessatti faayidaa dhuunfaa isaanii milkeessuuf uummata irratti gochoonni ukkaamsuu fi humnaan butuu bal'inaan itti fufaniiru jedhan Rogeeyyiin kunneen. ‎ ‎Gochoonni kunneen uummata biratti mormii cimaa akka kaasan eeruun, hawaasni naannichaas gareewwan kanneeniif deeggarsa duraan kennaa ture guutummaatti dhaabuusaa ibsaniiru. ‎ ‎Gaazexeessaan Awuraambaa Taayims Daawwit Kabbadaa, qaamoleen gocha kana raawwataa jiran daldala warqee fi albuudaa waliin walqabatee faayidaa dhuunfaa hedduu akka qaban dubbateera. ‎ ‎Faayidaa isaanii eegsisuuf jecha buqqaatota deebisuuf hojjechaa jirra jedhanii akka haguuggiitti fayyadamaa jiru jedheera. ‎ ‎"Isaan yaroo tokkoof waa'ee uummataa yaadu jedhee hin amanu" kan jedhe Daawwit Kabbadaan, sochiin yeroo ammaa taasisaa jiran hawaasa biratti fudhatama dhabuu ibseera. ‎ ‎Sababa kanaanis dargaggoota humnaan butuun gara leenjii waraanaatti galchuu jalqabuu isaanii eeruun, konkolaattota geejjibaa uummataa illee dhaabsisuun dargaggoota ittiin deemsisaa jiraachuu ibseera. ‎ ‎Gaazexeessituun Heermoon Fiqaaduu gamasheetiin, hoggantoota TPLF fi humnoota gocha badii kana raawwataa jiran cimsitee balaaleffatteetti. ‎ ‎Bara ammaa keessatti fedhii isaaniifi pirooppaagaandaa sobaa milkeessuuf jecha, gochoota ukkaamsuu fi humnaan dargaggoota butuun fudhatama kan hin qabneefi baay'ee gaddisiisaa ta'uu ibsiteetti. ‎ ‎Itti gaafatamaa Hariiroo Hawaasaa Paartii Tinsa'ee kan ta’an Indartaa Abrahaam Tsiggee, gareen kun dogoggora yeroo darbe irraa barachuu dadhabuu isaa ibsaniiru. ‎ ‎Uummanni "kan darbe nu gaheera, dogoggora keessa deebinee hin seennu" jechuun garichaaf fudhatama guutummaatti dhaabuu isaa agarsiiseera jadhaniru. #Ena Afaan Oromoo #TOI #Ena

Adoolessa 1/2018 (ENA): Konfiraansii Marii Biyyaalessaa Adoolessa 8 irraa eegalee gaggeeffamuuf bakka bu’oonni Finfinnee seenuu jalqabaniiru. Adeemsi Yaa’ii Marii Biyyaalessaa Itiyoophiyaan waggoota darbaniif geggeessaa turte amma marsaa xumuraa fi murteessaa irra ga’eera. Yaa’ii Marii Biyyaalessaa kanarratti ajandaaleen gurguddoon saddeet mariidhaaf kan adda baafaman yoo ta’u, bakka bu’oonni 4,000 ta’an golee biyyattii hundarraa gara Finfinnee galuun kanneen irratti bal’inaan mari’achuun furmaata waaraa kaa’uuf qophiitti jiru. Komishinii marii biyyaalessaatti Qindeessaan Naannoo, Bulchiinsa Magaalaa fi Diyaaspooraa Rattaa Geeraa ibsa miidiyaaleef kennaniin akka jedhanitti, miseensonni hawaasa diyaaspooraa naannoolee fi kutaalee addunyaa adda addaa irraa gara konfiraansii marii guddichaaf gara magaalaa Finfinnee seenaa jiru. Hirmaattota kana Yuunivarsiitii Pabliik Sarvisii Itiyoophiyaa fi iddoowwan mijatoo birootti akka keessummeessuu komishinichi beeksiseera. Konfiraansiin seena qabeessa kun Adoolessa 8, 2018 irraa eegalee Giddugala Walgahii Addis Konveenshinii keessatti ni gaggeeffama. Hirmaattonni ENA waliin turtii taasisan waltajjii seena qabeessa kana irratti mari’achuun waldhabdee yeroo dheeraaf ture haala qaroominaan hiikuuf carraa argachuu isaaniitti gammaduu isaanii ibsaniiru. Mariin seena qabeessa kun biyya badhaatuu fi tasgabbii qabdu ijaaruuf bu’uura cimaa akka ta’es hubachiisaniiru. Yeroo murteessaa kanatti mari’achuu, walii galuu fi walitti dhufnee biyya cimtuu dhaloota dhufuuf dabarsuuf abdii guddaa qabna jedhan. #Ena Afaan Oromoo #TOI #Ena

Waxabajjii 30 /2018 (ENA): Filannoon waliigalaa torbaffaan uummanni Itiyoophiyaa guddinaa fi dandeettii qorumsa danda'uuf qabu kan agarsiisedha jedhan Ministirri Muummee Dr. Abiyyi Ahimad Ministirri Muummee Dr. Abiyyi Ahimad gaaffilee miseensota Mana Maree Bakka Bu'oota Uummataa biraa ka'aniif deebii fi ibsa kennaa jiru. Ibsa kennaniinis, filannoon waliigalaa 7ffaan qaama siyaasaa barachuuf fedha qabu kamiyyuuf barumsa guddaa kan kenne, uummanni Itiyoophiyaa immoo ogummaa fi qabeenya kuufamaa jaarraa dheeraa kan qabu ta'uu isaa kan mirkaneessedha jedhaniiru. Ministirri Muummee filannichi kanneen kanaan dura gaggeeffaman mara irraa adda kan isa taasisan keessaa gurguddoo ibsuun; mormitoonni ‘hin galmaa’iinaa, hin deeggarinaa fi hin filatinaa" jedhanii doorsisaa fi dhorkaa itti fe'an osoo hin sodaatin, uummanni gurmaayee bahuun hamma halkanitti kan filatee fi gootummaan guddaan kan keessatti argame ta'u ibsaniiru. Qaamoleen filannoon kun akka hin milkoofne barbaadan, filannicharratti xiyyeeffatee socho'aa akka turan yaadachiisaniiru. Humnoonni Baandotaa fi ergamtoota bobbaasan hundi filannoo waan hin jaallanneef, adeemsichi akka hin gaggeeffamneef waan danda'an mara gochuu isaanii ibsuun; ta'us hin milkoofneef jedhaniiru. Uummanni Itiyoophiyaa rakkina ce'uu fi dhimmoota ogummaan dabarsuu beeku, qorumsa kana hundumaa ce'ee filachuu fi injifachuu isaatiif kabajni guddaan isaaf mala jedhaniiru. Itiyoophiyaanonni sagalee tokkoon finxaalessummaa, gandummaa fi qomoon wal-qooduu hin barbaannu; biyya waliinii misoomsuu fi badhaadhomsuudha kan barbaannu dhaamsa jedhu filannichaan waliin calaqqisiisuu isaanii Ministirri Muummee ibsaniiru. Yeroo filannichaa ijoolleen isaanii biyya fi mootummaa jabaataa fi nagaa qabu argachuu qabu ejjennoo jedhu kan qabatan Itiyoophiyaanonni miiliyoonaan lakkaa'aman, keessumattuu maanguddoonni, dhukkubsattoonni fi haadholiin, osoo rasaasni itti dhuka'uu kanaan osoo hin na’iin gara buufata filannoo deemuun sagalee isaanii kennuu isaanii yaadachiisaniiru. Kutannoon lammiilee kun namoota filatamanii fi mootummaaf imaanaa guddaa kan kenne ta'uus ibsaniiru. Uummanni jalqabbii keessan jaallanneerra; hattoota isin keessa jiran qulqulleessitanii, tajaajila fooyyessitanii, Itiyoophiyaa jabduu fi badhaate ijoollee keessaniif dabarsuu dandeessu carraa jedhu waan nuuf kenneef, uummata keenya sirriitti tajaajiluu itti-gaafatamummaa guddaa qabna jedhaniiru. Seenaa filannoo Itiyoophiyaa fi Afrikaa keessatti, akkasumas qaamolee "filannoon nuun ala hin jiru" jedhanii, Paartiin Badhaadhinaa falmii fi mormii guddaa gaggeessuun murtoo guddaa dabarsuu isaa ifa taasisaniiru. Haaluma kanaan, paartichi filannichaan teessuma parlaamaa dhibbantaa 85 irratti qofa dorgomuun, teessoo hafe dhibbenta 15 immoo paartilee dorgomtootaaf qofatti akka irratti dorgomaniif carraa kennuu isaa dubbataniiru. Filannicharratti sagaleen hedduun akka hirmaatu fedhiin akka turee fi kanaanis paartileen siyaasaa dorgomtoota ta'an hedduun hirmaachuu isaanii ibsuun; waliigala filannichi nagaa, diimokiraatawaa fi Eeyyama uummataa kan argate ta'uun milkiidhaan xumurameera jedhaniiru.

Waxabajjii 30/2018 (ENA): Gareen seeraan alaa ABUT dargaggoota Tigraay waraana Sudaan keessatti gaggeeffamaa jirutti gurguraa jiraachuu ministirri muummee Dr. Abiyyi Ahimad himan. Ministirri Muummee Dr. Abiyyi Ahimad gaaffilee miseensonni Mana Maree Bakka Bu’oota Ummataa raawwii hojii mootummaa bara baajataa 2018, yaa’ii idilee 30ffaa bara hojii waggaa 5ffaa ilaalchisee kaasaniif deebii kennaa jiru. Naannoo Tigraay ilaalchisee ibsa kennaniin MM Dr. Abiyyi Ahimad akka dubbatanitti, Waliigaltee Nageenyaa Piriitooriyaa dhimma salphaa osoo hin taane tarkaanfii guddaa nagaa waaraa ijaaruuf fudhatamedha jedhani. Carraan kun kan argame naannoo Tigraay keessatti bulchiinsi yeroo hundeeffamee, bu’uuraaleen misoomaa jeequmsaa fi miidhaman deebisuuf ta’uu ibsaniiru. Piritooriyaan akka mariitti ilaalamuu hin qaba kan jedhan Ministirri Muummee Dr. Abiyyi, mootummaan nageenya buusuuf gatii guddaa akka kaffale ibsaniiru. Haa ta'u malee, warri naannicha keessatti nageenya hin barbaanne ammas jireenya nagaa ummata Tigraay booressaa akka jiran dubbataniiru. Humnoonni nageenya diiguu kunneen maatii ofii Finfinnee, biyya alaa nagaa fi tasgabbiin eegaa kan jiran yoo ta’u, lubbuu namoota qulqulluu naannichaa irratti hookkara geessisaa akka jiran himaniiru. Keessattuu yeroo ammaa kana dargaggoonni Tigraay hedduun garee wayyaanee seeraan ala Sudaan keessatti butamanii waraanaaf gurguramaa akka jiran ibsaniiru. Ministirri Muummee Doktar Abiyyi Ahimad tarkaanfiin kun hatattamaan dhaabbachuu qaba kan jedhan yoo ta’u, harki mootummaan nagaaf diriirfame jabaa ta’uu mirkaneessaniiru. Kana malees, hidhattoonni kuma 60 gadi hin taane kaffaltii (DDR) erga argataniin booda raayyaa ittisa biyyaa irraa gad lakkifamuu, hidhamtoonni fi booji’amtoonni hedduun akka gadi lakkifaman ibsaniiru. #Ena Afaan Oromoo #TOI #Ena

Waxabajjii 30/2018 (ENA): Ministirri Muummee Dr. Abiyyi Ahimad Waliigaltee Nageenyaa Piriitooriyaa gatii guddaa nageenyaaf waaraaf kaffalame ta’uu ibsan. Ministirri Muummee Dr. Abiyyi Ahimad gaaffilee miseensonni Mana Maree Bakka Bu’oota Ummataa raawwii hojii mootummaa bara bajataa 2018 ilaalchisee kaasaniif deebii fi ibsa kennaa kennaa jiru. Kanuma waliin Ministirri Muummee Dr. Abiyyi Ahimad ibsa isaanii keessatti Waliigaltee Nageenyaa Piriitooriyaa ilaachisuun ibsa kennaniin, waliigalteen nageenyaa kun nagaa waaraa fiduu fi walitti bu’iinsa Itiyoophiyaa keessatti dhaabbachuuf gatii guddaa kaffalamedha jedhani. Naannoo Tigraayitti mootummaan yeroo hundeeffamu eeruun, Hidhattoota deebisanii dhaabuu hidhattoota duraanii kuma 60 ol leenjisuu fi deebisanii dhaabuun akka raawwatame ibsaniiru. Bu’uuraalee misoomaa fi dhaabbilee hawaasummaa naannicha keessa jiran deebisanii ijaaruun ummanni fayyadamoo akka ta’uuf tattaaffiin taasifamaa jira jedhan. Naannichatti ammas tattaaffiin nageenya booressuu akka jiru eeruun, ummanni Tigraay karaa nagaa bahee fi bahuu akka hin dandeenyee fi rakkoon kun hammaataa dhufuu dubbatani. Warri jeequmsa kakaasan ijoollee isaanii biyya alaa fi Finfinnee keessa kaa’anii, dargaggoota Tigraay hedduu waraana Sudaan keessatti hirmaachisuun fi kasaaraa guddaa irraan geessisaa akka jiran hubachiisaniiru. Ministirri Muummee ibsa kennaniin, waraana kakaasuuf irra deddeebiin tattaaffiin godhamus, mootummaan obsaan irra darbaa jira jedhan. Madda nageenya booressan mootummaan akka gaariitti akka beeku ibsaniiru, rakkoo kana madda irraa maqsuuf tarkaanfii barbaachisu akka fudhatu himaniiru. Mootummaan birmadummaa Itiyoophiyaa fi nageenya waaraa hundeessuuf dandeettii amanamaa akka qabus ibsaniiru. Ministirri Muummee Dr. Abiyyi Ahimad humnoonni nageenyaa fi seera kabachiisan biyyattii yeroo kamuu caalaa dandeettii lakkoofsa, qulqullinaa fi teeknooloojiin qaban ijaaruun haala kamiinuu ejjennoo nageenya qabu keessa akka jiraatan mirkaneessaniiru. #Ena Afaan Oromoo #TOI #Ena