Adoolessa 6/2018 (ENA)- Ministirri muummee Dr. Abiyyi Ahimad pirezidaantii Beeniin Romuwald Wadagnii waliin har’a mari’ataniiru. Ministirri muummee Dr. Abiyyi Ahimad pirezidaantii Baaniin waliin dhimmoota waloorratti mari’achuusaanii ergaa fuula miidiyaa hawaasummaa isaaniirratti dabarsaniin ibsaniiru. ‎Hariiroo gam-lamee cimsuu fi faayidaalee waloorratti tumsa olaanaa gochuuf carraalee jiranirratti marii bu’a qabeessa taasisuusaanii ibsaniiru. Kutannoo waloo tumsa gadi fagoo fi michooma fulla’aaf qabnu caalaatti guddisuuf fedhii cimaa qabna jedhan ministirri muummee ergaa dabarsaniin.

Adoolessa 6/2018 (ENA) : Naannoo Oromiyaatti waggoota shanan darban keessatti hojiiwwan misoomaa gaaffiiwwan bu’uuraa uummataa furuu dandeessisan raawwatamuu isaanii Pireezidantiin Naannichaa Obbo Shimallis Abdiisaa ibsan. Gamaggamni raawwii karoora hojii mootummaa fi paartii kan bara baajataa 2018 Naannoo Oromiyaa Magaalaa Adaamaa Galma Abbaa Gadaatti gaggeeffamaa jira.   Wayita sana Pireezidantiin Naannichaa Obbo Shimallis Abdiisaa, waggoottan shanan darbanitti gaaffiiwwan misoomaa uummata naannichaan ka'aa turan qabatamaan deebii argataniiru jedhan. Keessattuu bara baajataa xumurame keessa dameewwan hundaan bu'aawwan milkaa'oon galmeeffamuu isaanii ibsuun; adeemsa kanaan hoggansi nageenya naannichaa mirkaneessuu dhaan, misoomni hawaasummaa fi dinagdee akka ariifatu taasiseera jedhaniiru. Baajata mootummaa fi hirmaannaa uummataa qindeessuudhaan gaaffii misoomaa uummataa deebisuuf carraaqqiin taasifame bu'a qabeessa akka turees kaasaniiru. Kanaanis, hoggansi naannichaa injifannoowwan argaman cimsanii itti fuufsiisuuf tooftaawwan dandeessisan sakatta'uu fi hanqinoota mul'atan adda baasuun hojiiwwan itti aananiif qophaa'uu akka qaban ibsaniiru. Bara baajataa itti aanuttis poteenshaala jiruu fi fedhii misoomaa naannicha jiruun kan walsimu karoora hiixataa qopheessuun,filannoowwan jiran hundatti guutummaatti fayyadamuun akka barbaachisu ibsaniiru. Keessattuu badhaadhina maatii mirkaneessuuf qusannaa irratti xiyyeeffannoon hojjechuun kan qaban yoo ta'u; yaa'insa investimantii ariifachiisuuf godinaalee ,Aanaalee fi magaalota keessa haalawwan mijatoo jiran sakatta'uu fi hojii irra oolchuun akka qaban hubachiisaniiru. Dabalataanis, dandeettii fi gahumsa hoggansa ganda irraa kaasee hanga naannootti jiru gamaggamaan sakatta'uun, bu'aawwan murtaa'a argamaniin osoo hin dagatiin ammas dandeettii guutuun socho'uun akka barbaachisu dubataniiru. Itti gaafatamaan Waajjira Paartii Badhaadhinaa damee Naannoo Oromiyaa Obbo Kafyaalawu Tafarraa gama isaaniitiin, bara baajataa kanatti riifoormii siyaasaa, hawaasummaa fi dinagdee gara qabatamaatti jijjiiruu keessatti injifannoowwan abdii namatti horan galmeeffamuu ibsaniiru. Bara baajataa xumurame qofa keessatti pirojeektonni gara kuma 21 ta'an ijaaramanii tajaajila uummataaf akka oolan taasifamuu kaasanii; kunis raawwii karoora waggichaa bu'a qabeessa kan taasise yoo ta'u, raawwiinsaa guutuu Godinaalee fi magaalotaatti wal-fakkaataa ta'uu dhabuu isaa eeraniiru. Filannoo biyyaalessaa torbaffaa irratti uummatni ba’ee hirmaachuun fedhii jabaa dimokiraasiif qabu kan agarsiise fi injifannoon siyaasaa guddaan kan galmeeffame ta’uu kan eeran hoggantoonni kun; bara baajataa haaraa qabame kanatti hoggansi guutummaa dandeettii fi kutannoon socho'uu akka qabu dhaamaniiru.    

Adoolessa 6/2018 (ENA): Itti aanaan Ministira Muumee obbo Tamasgeen Xurunaa Pirezidaantii Rippabiliika Beeniin, Roomuwaldi Wadagni simatan. Itti aanaan Ministira Muummee ergaa fuula miidiyaa hawaasaa isaanii irratti dabarsaniin, Pirezedaantii Rippabiliika Beeniin, Roomuwaldi Wadagni, baga gara biyya argama dhala namaa nagaan dhuftan jedhaniiru. “Imala Jijjiirama olaanaa keessa kan jirtu Itiyoophiyaan, turtiin keessan milkaa’aa akka isiniif ta’u nan hawwa jedhani.” #Ena Afaan Oromoo #TOI #Ena#

Adoolessa 6/2018 (ENA): Mootummaan Naannoo Oromiyaa gamaggama raawwii hojiiwwan mootummaa fi paartii kan bara baajataa 2018 gaggeessuu eegaleera. Waltajjii gamaggamaa kana irratti Pireezidaantii Naannoo Oromiyaa Obbo Shimallis Abdiisaa dabalatee hoggantoonni hojii ol'aanoon mootummaa naannichaa argamaniiru. Gamaggama raawwii hojii kanaan milkaa’inawwan gurguddoo dameewwan hedduun galmeeffamanii fi hanqinoota turan sakatta'uudhaan, kallattii karoora hojii bara 2019 ni kaa’ama jedhamee akka eegamu ibsameera.    

Adoolessa 5 / 2018 (ENA): Magaalaan Finfinnee ijaarsa seenessa waloo fi tokkummaa cimsuudhaan gidduu-gala nageenyaa fi misoomaa ta'aa dhufuushee Kantiibaan Magaalaa Finfinnee Adaanech Abeebee ibsan. Manni Maree Magaalaa Finfinnee yaa'ii idilee 4ffaa bara hojii 5ffaa isaa galma yaa'ii mana marichaa Giddu-gala Yaadannoo Injifannoo Adwaatti gaggeessaa jira. Kantiibaan Magaalaa Finfinnee Adaanech Abeebee yaa'ii idilee mana marichaa kana irratti gabaasa raawwii hojii waggaa kan bara baajataa 2018 Bulchiinsa Magaalichaa dhiyeessaa jiru. Kantiibaa Adaanech Abeebee gabaasa isaaniitiin; Finfinnee akka maqaa ishiitti miidhagsuuf waadaa gallerratti hundaa'uun, waggoottan shanan darban keessatti jijjiiramoota bu'uuraa fi hundee-qabeessa ta'an hedduu raawwachuu dandeenyee jirra jedhaniiru. Dabalataanis, ilaalchota boodatti hafoo fi rakkoolee hundee gadi fageeffatanirratti, jabeenyaan qabsaa’uun, Finfinnee siyaasa faayidaa hin qabne wal-dhiibuu fi wal-harkisuurraa walaba kan taate, gidduu-gala nageenyaa fi misoomaa gochuun akka danda'ame dubbataniiru. Akka fakkeenyaattis, Gidduu-gala Yaadannoo Injifannoo Adwaa ijaaruudhaan, bu'uura seenessa waloo fi walitti qabaa ta'e ijaaruu dandeessisu ta’uusaa akka ragaatti hubachiisaniiru. Finfinneetti nageenyi fulla'aan akka mirkanaa'u, miidhagduu, magariisaa fi qulqulluu gochuun, fakkeenya badhaadhina Itiyoophiyaa akka taatuuf bu'uuraaleen dandeessisan lafa qabachaa jiraachuu ibsaniiru. Magaalattii jijjiiruudhaan, magaalittiin Afriikaa keessaa magaalota qulqulluu kudhan keessaa tokko ta'uun beekamtii idil-addunyaa argachuu ishee kaasaniiru. Uwwisni Magariisummaa Magaalattii dhibbeentaa 2tuqaa8 irra ture gara dhibbeentaa 24tti ol guddachuun isaas ragaa jijjiirama bu'uuraa kan biroo ta'uusaa eeraniiru. Daandileen Finfinnee bal'aa, dukkana magaalittii dura ture ifaatti jijjiiramuu kan ibsan kantiiba Adaanech; kunis dandeettii Magaalittiin yaa'iiwwanii fi daawwattootaa hedduu keessumsiisuuf qabdu akka dabale ibsaniiru. Giddu-gala dippilomaasii ta'uunshees caalaatti cimee, Itiyoophiyaanota qofa osoo hin taane, Afriikaanotni hundi 'Magaalaa guddoo keenya' jedhanii kan waamanii fi hunda keenyaa kan boonsu ta'uu ishee ibsaniiru.

Adoolessa 4/2018(ENA)- Mariin biyyaalessaa rakkoolee hidda gad-fageeffatan karaa qaroomeen furuun ijaarsa biyyaa cimaa fi waliigaltee biyyaalessaaf boqonnaa guddaa kan banu ta’uusaa hayyoonni ibsan. Yaa’iin seena qabeessi adeemsa marii biyyaalessaa Itiyoophiyaa waggootaaf gaggeeffamaa ture eegalamuuf guyyoota muraasatu hafe. Yaa’ii murteessaa Adoolessa 8 bara 2018 wiirtuu konveenshinii idil addunyaa Addisitti eegalamurratti mari’achuuf mari’attoonni guutuu biyyaarraa walitti dhufan kuma 4 Finfinnee dhufaniiru. Komishinichi adeemsa marichaa ilaalchisuun yaadannoo injifannoo Adwaatti mari’attootaaf ibsa mariin duraa gochaa jira. Barsiiftonnii fi barattoonni dhaabbilee barnootaa olaanoo ENA’f yaada kennan akka jedhanitti, mariin biyyaalessaa kun rakkoo jiran mariin furuun nagaa fi tokkummaa biyyaa ni cimsa. Kanneen keessaa piroofeesar Alamaayyoo Gabramaaram akka ibsanitti, Itiyoophiyaan komishinii marii hundeessitee marii qabatamaatti seenuuf murteessuunshee tarkaanfii guddaadha. Adeemsi kun nageenya waaraa Itiyoophiyaa mirkaneessuuf shoora olaanaa akka qabaatu beeksisaniiru. Komishinichi aanaarraa eegalee kutaalee hawaasaa garagaraa mari’achiisuudhaan ajandaawwan ijoo saddet adda baasuunsaa bu’a qabeessummaa marichaaf gumaacha olaanaa akka qabaatu piroofeesar Alamaayyoon eeraniiru. Ajandaawwan filataman kunneen Itiyoophiyaanonni ijaarsaa fi misooma biyyaalessaa waloo irratti xiyyeeffatanii akka hojjetan haala akka mijeessuuf dabalanii eeraniiru. Adeemsi marichaa komishinii seeraa fi labsiidhaan hundeeffameen kan durfamuu fi walii galtee biyyaalessaa fulla’aa uumuuf kan kaayyeffate waan ta’eef, Afriikaa fi Addunyaan muuxannoo irraa fudhachuu kan danda’u hojii fakkeenyummaa qabu ta’uu hayyuun kun ibsaniiru. Adeemsi qaroomaan kun Itiyoophiyaanonni rakkoosaanii ofiisaanii furuu akka danda’an waltajjii addunyaarratti kan itti agarsiisan akka ta’u ibsaniiru. Yunivarsiitii Paabiliik Sarviisii Itiyoophiyaatti barsiisaan kutaa barnootaa bulchiinsaa fi hoggansaa Dr. Ujuluu Ukook gamasaaniin, mariin biyyaalessaa kun garaagarummaa mariidhaan furuun nageenya waaraa buusuuf qooda guddaa akka bahu dubbataniiru. Mariin kun lammiileen dhimmoota biyyaalessaa ijoorratti mari’achuudhaan waldhabdeen akka furamanii fi misooma waloorratti dammaqinaan akka hirmaatan carraa akka uumu amantaa qaban ibsaniiru. Haala wal fakkaatuun Yunivarsiitichatti barsiisaa fi qorataan komunikeeshinii misoomawaa fi qorannoo miidiyaa Dr. Zallaqaa Tashoomaa, mariin biyyaalessaa kun Itiyoophiyaa badhaatuu tokkummaanshee cimaa ta’ee fi nageenyi waaraan keessatti ciime uumuuf kan kaa’amu bu’ura cimaa ta’uusaa ibsaniiru. Milkaa’ina carraa seena qabeessa kanaaf kutaan hawaasaa hundi hirmaannaa fi tattaaffiisaa cimsuu akka qabu hubachiisaniiru.

Adoolessa 3/2018 (ENA): Mariin biyyaalessaa kun ijaarsa biyyaa cimaa fi tokkummaa waaraaf bu’uura kaa’aa akka jiru pirezidaantonnii fi hoggantoonni dhaabbilee barnoota olaanoo ibsaniiru. Komishiniin marii biyyaalessaa Itiyoophiyaa hundeeffamee waggoota darbaniif ajandaa walitti qabuu fi hirmaattota adda baasuu irratti hojii bal’aa hojjechaa tureera. Komishinichi konfiraansii biyyaalessaa guddicha Adoolessa 8, 2018 irraa eegalee gaggeeffamuuf ajandaawwan gurguddoo saddeet ifoomseera. Ijaarsa biyyaa, gurmaa’ina mootummaa fi caasaa, sirna siyaasaa, bakka bu’ummaa siyaasaa fi sirna filannoo, dhimmi magaalota federaalaa Finfinnee fi Dirree Dhawaa fi dhimmoonni amantaa ajandaalee keessaa kanneen eeramanidha. Ijaarsa dhaabbilee, olaantummaa seeraa fi mirga namoomaa, dhimma hawaasummaa, diinagdee, fi qonnaan bultootaa fi horsiisee bultootaa, malaammaltummaa fi bulchiinsa gaarii, akkasumas dhimmoonni ijaarsa nageenyaa konfiraansii guddicha irratti mariidhaaf ajandaa ta’aniiru. Itti aanaan Daarektarri Olaanaa Inistiitiyuutii Leenjii Tuurizimii Federaalaa Yittaassab Siyyum Itiyoophiyaan biyya ijaarsa mootummaa bara dheeraa qabdu ta’uu hubachiisaniiru. Haa ta’u malee, adeemsa seenaa keessatti wal faallessuun siyaasaa, hawaasummaa, diinagdee mudate sababa walitti bu’iinsaa fi waliigaltee dhabuu adda addaa ta’eera jedhan. Walitti dhufeenya waliinii cimaa fi duudhaalee aadaa guddatan fayyadamuun rakkoon kamiyyuu minjaala irratti mari’achuun furmaata argachuu akka danda’u ibsaniiru. Adeemsi marii kanaaf eegalame waliigaltee biyyaalessaa fi nageenyi waaraa mirkaneessuuf gumaacha guddaa akka qabus hubachiisaniiru. Pireezidaantiin Yuunivarsiitii Samaraa Dr. Mahaammad Usmaan Itiyoophiyaa keessatti rakkoon jaarraa hedduuf deemaa turee fi marii barbaadu hedduun akka jiran hubachiisaniiru. Tokkummaa fi birmadummaa biyyattiif dandeettiin garaagarummaa jiru waliigalteedhaan furuu danda’uun iddoo guddaa qaba jedhaniiru. Adeemsi marii biyyaalessaa kun itti fufiinsa adeemsa ijaarsa biyyaa fi ce’umsa dhalootaa fayya qabeessa ta’eef murteessaa ta’uus dubbataniiru. Kanaaf, mariin amma taasifamaa jiru ce’umsa dhalootaa milkaa’aa ta’eef akkasumas aadaa marii fi nageenya dhaloota egeree dagaagsuuf gumaacha kan taasisu ta’uu ibsaniiru. Mariin biyyoolessaa kun tokkummaa biyyaa fi ijaarsa biyyaa cimaaf bu’uura kaa’aa akka jiru Pireezidaantiin Yuunivarsiitii Dabaarqi Doktar Asmamaawu Zagayyee himaniiru. Mariin kun rakkoo yeroo ammaa furuu qofa osoo hin taane biyya tasgabbaa'aa fi badhaate dhaloota dhufuuf dabarsee kennuuf kan gargaaru ta'uu ibsaniiru. Adeemsa marii kanarratti dhaabbileen barnootaa dammaqinaan hirmaachaa turuu isaanii ibsuun, kun cimee itti fufuu qaba jedhan. #Ena Afaan Oromoo #TOI

‎Adooleessa 1/2018(ENA): ‎Gochoonni ukkaamsuu fi humnaan daa'immanii fi dargaggoota butuu garee seeraan alaa TPLF’n raawwatamaa jiru murnichi guutummaan guutuutti fudhatama dhabuu isaa agarsiisa jechuun Rogeeyyii fi Ogeeyyiin miidiyaa ibsan. ‎ ‎Naannoo Tigraay keessatti faayidaa dhuunfaa isaanii milkeessuuf uummata irratti gochoonni ukkaamsuu fi humnaan butuu bal'inaan itti fufaniiru jedhan Rogeeyyiin kunneen. ‎ ‎Gochoonni kunneen uummata biratti mormii cimaa akka kaasan eeruun, hawaasni naannichaas gareewwan kanneeniif deeggarsa duraan kennaa ture guutummaatti dhaabuusaa ibsaniiru. ‎ ‎Gaazexeessaan Awuraambaa Taayims Daawwit Kabbadaa, qaamoleen gocha kana raawwataa jiran daldala warqee fi albuudaa waliin walqabatee faayidaa dhuunfaa hedduu akka qaban dubbateera. ‎ ‎Faayidaa isaanii eegsisuuf jecha buqqaatota deebisuuf hojjechaa jirra jedhanii akka haguuggiitti fayyadamaa jiru jedheera. ‎ ‎"Isaan yaroo tokkoof waa'ee uummataa yaadu jedhee hin amanu" kan jedhe Daawwit Kabbadaan, sochiin yeroo ammaa taasisaa jiran hawaasa biratti fudhatama dhabuu ibseera. ‎ ‎Sababa kanaanis dargaggoota humnaan butuun gara leenjii waraanaatti galchuu jalqabuu isaanii eeruun, konkolaattota geejjibaa uummataa illee dhaabsisuun dargaggoota ittiin deemsisaa jiraachuu ibseera. ‎ ‎Gaazexeessituun Heermoon Fiqaaduu gamasheetiin, hoggantoota TPLF fi humnoota gocha badii kana raawwataa jiran cimsitee balaaleffatteetti. ‎ ‎Bara ammaa keessatti fedhii isaaniifi pirooppaagaandaa sobaa milkeessuuf jecha, gochoota ukkaamsuu fi humnaan dargaggoota butuun fudhatama kan hin qabneefi baay'ee gaddisiisaa ta'uu ibsiteetti. ‎ ‎Itti gaafatamaa Hariiroo Hawaasaa Paartii Tinsa'ee kan ta’an Indartaa Abrahaam Tsiggee, gareen kun dogoggora yeroo darbe irraa barachuu dadhabuu isaa ibsaniiru. ‎ ‎Uummanni "kan darbe nu gaheera, dogoggora keessa deebinee hin seennu" jechuun garichaaf fudhatama guutummaatti dhaabuu isaa agarsiiseera jadhaniru. #Ena Afaan Oromoo #TOI #Ena