Sadaasa 4/2019 (TOI) – Guyyaan Saboota, Sablammootaa fi ummattoota Itiyoophiyaa qabeenya garaagarummaa fayyadamuun, mariin biyya cimsuu fi biyya qaroomtuu ijaaruuf gahee murteessaa akka qabu af-yaa’iin Mana Maree Federeeshinii Mufarihaat Kaamil ibsan. Guyyaan saboota, sablammootaafi ummattoota Itiyoophiyaa 21ffaan mata duree “Itiyoophiyaa sabdaneessummaan miidhagde, mariidhaan dhaabbattee fi qaroomte” jedhuun Naannoo Oromiyaa, Magaalaa Jimmaatti ni kabajama. Ayyaanni kun guyyoota shaniif kan turu yoo ta’u, Sadaasa 21 Guyyaa Obbolummaa, Sadaasa 26 Guyyaa Waloomaa, Sadaasa 27 Guyyaa Oromiyaa, Sadaasa 28 Guyyaa Marii fi Sadaasa 29 Guyyaa Itiyoophiyaa jedhamee moggaafameera. Af-yaa’ittiin akka ibsanitti, mata dureen bara kanaa waadaa waloo, karooraa fi hubannoo uumuun garaagarummaa akka qabeenyaatti, marii immoo akka qaroominaatti kan ilaaludha. Dabalataanis, Itiyoophiyaa birmadummaa guutuu ishee kan mirkaneessite, oomishtuu, dursituu fi qaroomtuu taate ijaaruuf karoorri dhalootaa waggaa 25 qophaa’uu ibsaniiru. Garaagarummaan yoo sirnaan hogganame kalaqa, gahumsaa fi jijjiirama biyyaaf qabeenya murteessaa ta’uu akka danda’us hubachiisaniiru. Saboonni, sablammootaa fi ummattoonni Itiyoophiyaa ijaarsa sirna federaalaa keessatti gahee murteessaa akka qaban kan ibsan Mufarihaat, garaagarummaa kunuunsuu fi misoomaaf oolchuun madda guddinaa taasisuun akka barbaachisu dubbataniiru. Guyyaan Sabootaa fi Sablammootaa ummattoonni kan ittiin wal baran, garaagarummaa isaanii hubatanii fi mariidhaan waliigaltee waliinii irratti itti uuman ta’uu isaas ibsaniiru. Dhumarrattis, guyyaan kun ayyaana kabajuu qofa osoo hin taane, tokkummaa mariidhaan cime, misooma hirmaachisaa fi hammataa mirkaneessuun badhaadhina waaraa fi ijaarsa biyya qaroomtuuf bu’uura kan kaa’u ta’uu isaa hubachiisaniiru.

Sadaasa 3/ 2019 (ENA) – Paartiin Badhaadhinaa fi Paartiin Koministii Chaayinaa hariiroo fi tumsa tarsiimoo qaban caalmaatti cimsuuf mari’ataniiru. Ittaanaan Pireezidaantii fi Itti Gaafatamaam Waajjira Muummee Paartii Badhaadhinaa obbo Adam Faaraah Itoophiyaatti Ambaasaaddara Chaayinaa Cheen Haayin waliin dhimmoota waloorratti mari’ataniiru. Ambaasaaddar Cheen Haay kallattii fi imaammata Chaayinaan dursa kennituuf ilaalchisee obbo Adam Faaraah ibsa taasisaniiru. Mariin kunis mul’ata badhaadhina waloo, jijjiirama biyyaalessaa fi misooma biyyoota lamaanii cimsuuf carraa kan uumu ta’uu eerame. Obbo Adam Faaraah gama isaaniin Yaa’ii 5ffaan Paartii Koministi Chaayinaa milkaa’inaan xumuramuu isaatti baga gammaddan jedhanii, Chaayinaan misooma qulqullina olaanaa qabu, ammayyummaa fi badhaadhina biyyaalessaa fiduuf tattaaffii taasiftu dinqisiifataniiru. Dabalataanis, hariiroo michummaa yeroo dheeraa Itoophiyaa fi Chaayinaa gidduu jiru, akkasumas “Tumsa Tarsiimoo Hunda ce’aa” tumsa siyaasaa, dinagdee fi dameewwan misoomaa babal'isuuf bu'uura cimaa kan kaa'u ta'uu isaa ibsaniiru. Hoggantoonni paartilee siyaasaa lamaan, wayita Ministirri Muummee Doktar Abiyyi Ahimad Onkololeessa bara 2023 gara Chaayinaa daawwannaa taasisanitti, waliigalteewwan tumsa Itoophiyaa fi Chaayinaa gidduutti mallattaa'an barbaachisummaa isaanii cimsanii kaasuun mari’ataniiru.

  Yaa’ii COP31 Turkiyyee Magaalaa Antaliyaatti,gaggeeffamu cinaatti, Ministirri Dhimma Alaa Itoophiyaa fi Preezidaantiin Filatamaa COP32 Dr. Geediwon Ximooteewos akkasumas Ministeerri Maallaqaa fi gaggeessaa COP32 Dr. Fitsum Asaffa Ministira Dhimma Alaa Yunaayitid Kingidim Eed Miliibaand waliin marii gam- lamee biyyaalessaa taasisaniiru.   Maricharratti, Pireezidaantiin filatamaa Dr. Geediwon Ximooteewos Itoophiyaan damee jijjiirama qilleensaa keessatti hojiiwwan qabatamaa hojjetaa jirtu ibsuun, jijjiirama haala qilleensaaf sababa kan ta'an gadi lakkifama gaazota miidha geessisanii hir’isuuf barbaachisummaasa irratti xiyyeeffannoo kennaniiru. Ministirri Dhimma Alaa Yunaayitid Kingidim Eed Miliibaand gamasaaniitiin, gadi lakkifama gaazota miidha geessisanii hir'isuun qormaatilee jijjiirama qilleensaa furuuf murteessaa ta'uu ibsuun, damee kana keessatti Yunaayitid Kingidim Itoophiyaa wajjin dhiyeenyaan hojjechuuf fedhii qabaachuu ibsaniiru. Akkasumas qophii COP32 fi dhimmoota dursi kennamuufii qaban Itoophiyaatiif deeggarsa gochuuf biyyisaanii qophii ta'uu mirkaneessaniiru.

Yaa’iin Jijjiirama Qilleensaa Addunyaa COP31 Turkiyyee, magaalaa Antaaliyaatti gaggeeffamaa jira. Mootummaan Ida’amuu furmaata jijjiirama haala qilleensaa waliin walsimu bal’inaan hojiirra oolchaa jira. Waltajjii kanarratti Mootummaan Ida’amuu sagalee Itoophiyaa dhageessisuu bira darbee, hariiroo gamlamee fi tumsa biyyoota garaagaraa waliin qabu cimsuuf sochii dippiloomaasii bal’aa taasisurraatti argama. Itoophiyaan dhiibbaa jijjiirama qilleensaa kana qolachuu fi dandeettii dandamachuu hawaasummaa fi dinagdee cimsuuf hojiiwwan qabatamaa bal’inaan hojjechaa jirti.   Sagantaan Ashaaraa Magariisaa, dinagdee magariisaa ijaaruu, madda humna haaromfamaa babal’isuu fi qonna haala jijjiramaa qilleensaa dandamatu irratti xiyyeeffachuun hojiiwwan ijoo biyyattiin hojjechaa jirtu keessaa isaan gurguddoo dha. Itoophiyaan dhimma jijjiirama qilleensaa COP31rraatti hirmaattuu qofa osoo hin taane, marii fi hojii idil-addunyaa keessatti gahee guddaa bahachaa jiraachuu ishee kan agarsiisudha. Ministirri Muummee Doktar Abiyyi Ahimad hoggantoota biyyoota garaagaraa waliin marii gamlamee taasisuun, fedhii biyyaalessaa Itoophiyaa kabachiisuu, tumsa idil-addunyaa cimsuu fi qophii Itoophiyaan Pirezidaantummaa COP32 fudhachuun taasisaa jirtuurratti xiyyeeffataniiru. Mariileen gamlamee Ministirri Muummee Doktar Abiyyi Ahimad COP31 cinaatti hoggantoota biyyoota adda addaa waliin taasisan,hariiroo biyyoota lameenii, nageenya naannawaa, dinagdee fi dhimmoota idil-addunyaa walitti hidhuun kan hojjetu ta’uu mul’isu. Yeroo addunyaan qormaata jijjiirama qilleensaa, walitti bu’iinsaa fi rakkoolee dinagdee adda addaa keessa jirtutti, Itoophiyaan tumsaafi mariin furmaata waaraa argamsiisuu keessatti gahee olaanaa akka qabu waltajjii idil-addunyaa irratti cimsitee ibsaa jirti.   Dabalataanis, COP31 irratti qophii Pirezidaantummaa COP32 keessummeessuuf taasisaa jirtu ibsuun, gahee ishee dippiloomaasii jijjiirama qilleensaa keessatti qabdu caalaatti guddisteetti. Doktar Abiyyi Ahimad, COP32 keessatti tarkaanfii dursaa fudhachuu, deeggarsa maallaqaa iftoomina qabu mirkaneessuu fi hawaasa jijjiirama qilleensaan miidhaa hamaa irra ga’e bira ga’uun barbaachisaa ta’uu ibsaniiru. Mariileen gamlamee COP31 cinaatti gaggeeffaman milkaa’ina dippiloomaasii Itoophiyaa keessaa isa tokko ta’uun isaanii ifaadha. Hariiroo biyyoota garaagaraa waliin qabdu cimsuun, nageenyaa fi tasgabbii naannichaaf hojjechuun, akkasumas waltajjiiwwan idil-addunyaa irratti fedhii biyyaalessaa ishee kabachiisuun, Itoophiyaan dippiloomaasii bu’a qabeessa ta’e milkeessaa jiraachuu ishee mirkaneessa. COP31 kanaanis, Itoophiyaan jijjiirama haala qilleensaa, nageenya, misoomaa fi tumsa idil-addunyaa walitti hidhuun biyyoota garaagaraa waliin hariiroo bu’a qabeessa ta’e ijaaruu keessatti gahee ishee caalaatti mul’isaa jirti. Ministirri Muummee yaa’ii hoggantootaa COP31 cinaatti hoggantoota Turkiyyee, Noorwey, Fiinlaand, Baarbeedoos, Bostwaanaa, Somaaliyaa, Qataar fi Iraaq waliin mari’ataniiru.   Mariileen kunneen hariiroo biyyoota lamaanii cimsuu, jijjiirama qilleensaa dandamachuuf hojiilee waloo hojjechuu, invastimantii anniisaa haaromfamuu, tumsa damee aviyeeshinii, nageenyaa fi tasgabbii naannoo akkasumas deeggarsa Pirezidaantummaa COP32 Itoophiyaan fudhattuuf taasifamu irratti xiyyeeffataniiru. Pirezidaantii Turkiyyee Rajab Xayyib Erdoogaan waliin marii taasisaniin, hariiroo biyyoota lamaanii, keessumaa dameewwan daldalaa, invastimantii fi tumsa biroo keessatti jiru caalaatti cimsuu irratti mariyataniiru. Turkiyyeen gama isheetiin hariiroo Itoophiyaa waliin qabdu daran guddisuu fi nageenyaa fi tasgabbii naannichaaf tumsa kennuu itti fufuuf kutannoo qabdu ibsiteetti.   Ministira Muummee Noorwey Joonas Gaar Isteer waliin marii taasisaniin ammoo, tumsa Sagantaa Ashaaraa Magariisaa keessatti jiru caalaatti cimsuu, damee anniisaa haaromfamuu Itoophiyaa keessatti invastimantii jajjabeessuu fi Pirezidaantummaa COP32 Itoophiyaan fudhattuuf deeggarsa Noorwey taasistu itti fufsiisuu irratti xiyyeeffataniiru. Dabalataanis, dhimmoota yeroo ammaa, idil-addunyaa fi naannawaa irratti yaada waljijjiiraniiru. Pirezidaantii Fiinlaand Aleksaandar Siitab waliin marii taasisaniinis, dhimmoota nageenyaa fi tasgabbii addunyaa, jijjiirama haala naannoo fi fedhiiwwan waloo irratti mariyataniiru. Keessumaa, deeggarsa Pirezidaantummaa COP32 Itoophiyaan fudhattuuf taasifamu dabalatee, waliigalteewwan dameewwan adda addaa irratti tumsa itti fufiinsa qabuutti jijjiiruuf xiyyeeffannoo kennaniiru. Ministira Muummee Baarbeedoos Miyaa Mootlii waliin marii taasisaniinis, tumsa damee aviyeeshinii fi deeggarsa Baarbeedoos Itoophiyaan Pirezidaantummaa COP32 milkeessuuf taasiftu irratti xiyyeeffataniiru. Mariin kun hariiroo biyyoota lamaanii caalaatti cimsuu fi dhimmoota fedhii waloo gara bu’aa qabatamaatti jijjiiruuf carraa jiru kan agarsiise ta’uu ibsaniiru. Pirezidaantii Bostwaanaa Duumaa Geediyoon Bookoo waliin marii taasisaniinis, qormaatilee jijjiirama haala qilleensaa dandamachuuf biyyoonni lamaan tarkaanfiiwwan fudhachaa jiran, akkasumas tumsa COP32 irratti qaban cimsuu irratti mariyataniiru. Kana malees, ajandaa tumsa qilleensaa Afrikaa itti fufsiisuu fi dhimmoota hariiroo biyyoota lamaanii biroo irratti yaada waljijjiiraniiru. Akkasumas, Amiira Qataar Sheekh Tamiim Bin Haamad Aal Taanii waliin marii taasisaniiru. Mariin isaanii hariiroo yeroo dheeraa biyyoota lamaanii caalaatti cimsuu fi dameewwan dandeettii misooma waloo qaban irratti tumsa isaanii guddisuuf carraawwan jiran irratti xiyyeeffateera. Pirezidaantii Iraaq Niizaar Amiidii waliin marii gamlamee taasisaniinis, hariiroo biyyoota lamaanii cimsuu, dameewwan tumsa misoomaa keessatti dandeettii waloo qaban gara bu’aatti jijjiiruu fi karoora misoomaa Itoophiyaa irratti yaada waljijjiiraniiru. Akkasumas, dhimmoota naannawaa fedhii waloo ta’an irratti mariyachuun, tumsa hojiirra oolmaa irratti hundaa’e cimsuuf walitti hidhamiinsa jabaa ijaaruun barbaachisaa ta’uu irratti mariyataniira. Pirezidaantii Somaaliyaa Hasan Sheekh Mahamuud waliin marii taasisaniinis, haala nageenyaa Somaaliyaa, jijjiirama naannichaa fi barbaachisummaa marii fi tumsa itti fufiinsa qabuun nageenyaa fi tasgabbii Gaanfa Afrikaa mirkaneessuu irratti yaada waljijjiiraniiru.

Sadaasa 3/2019 (ENA)-Guyyaan Saboota, Sab-lammootaa fi Ummatootaa Itoophiyaa waliigaltee biyyaalessaa cimsudhaan Itoophiyaa badhaate dhugoomsuuf gahee olaanaa akka qabu, Itti aanaan Afa-yaa’ii Mana Maree Federeeshinii Obbo Dastaa Leedamoo ibsan. Guyyaan Saboota, Sab-lamoota fi Ummatootaa Itoophiyaa 21ffaan mata duree “ Itoophiyaa qaroomte danomaan faayamte , mariin waaromte" jedhuun Sadaasa 29 bara 2019 Naannoo Oromiyaa Magaalaa Jimmaatti ni kabajama. Manni Mareen Federeeshinii mata dureen baranaa waadaa waloo ta’uu isaa hubachiisuun, karoora waloo fi hubannoo waloo uumuu kan dandeessisu xiinxala mata duree fi qopheeffamerratti marii tarsiimoo koomunikeeshinii qopheesseera. Itti aanaan Afa-yaa’ii Mana Maree Federeeshinii Obbo Dastaa Leedamoo wayita sana akka jedhanitti; Guyyaan Saboota, Sab-lamoota fi Ummatootaa Itoophiyaa walitti dhufeenya cimsa. Dabalataanis ijaarsa seenessa waloo biyyaalessaa Itoophiyaatti akka cimuu fi tumsaan biyya badhaate dhugoomsuuf kan dandeessisu ta’uu ibsaniiru. Ijaarsa mootummaa biyyaalessaa Itoophiyaa keessatti ummata bal’aa qooda fudhannaa olaanaarratti kan hirmaachisu ta’uu kaasanii, miidiyaaleen milkaa’ina isaatiif odeeffannoo qaqqabsiisuun gahee olaanaa akka qaban ibsaniiru. Kanaafuu, miidiyaaleen Itoophiyaa badhaateef dhugoomuuf odeeffannoorratti hundaa’uudhaan ummata biraan ga’uun gahee isaanii akka baatan gaafataniiru.

Sadaasa 2/2019 (ENA)- Ida’amuun falaasama badhaadhina walii galaa Afriikaa mirkaneessuuf humna walitti hidhsme ijaaruun kaayyoo waloof kaka’umsa kan uumu ta’uu bakka bu’oonni paartilaa siyaasaa Afriikaa ibsan. Yaa’iin paartilee siyaasaa Afriikaa mata duree “guddina hogganuu paartileen siyaasaa akka maandisoota carraa egeree Afriikaa” jedhuun Onkoloolessa 26 amma 28 bara 2019tti gaggeeffameera. Hirmaattonni bakka bu’oota paartii biyyoota Afriikaa ENA’tti akka himanitti, paartileen siyaasaa filannoof dorgomuurra darbee bu’a qabeessummaa cehumsa biyyaalessaaf gumaacha taasisuu qabu. Miseensi paarlaamaa Ugaandaa fi gaggeessituun paartilee siyaasaa mormitootaa duraanii A’ol Beetii Okaan, Itiyoophiyaan hirmaannaa siyaasaa dargaggootaa fi dubartootaa guddisuun daandii guddinaa dunqisiisaarrata’uushee Finfinneen agarsiiftuudha jedhaniiru. Ida’amuun Afriikaanota kaayyoo waloof kakaasu falaasama faayidaa qabu waan ta’eef falaasama kana sirriitti hubachuun hubannoo waloo guddina Afriikaa si’achiisu qabaachuu barbaachisa jedhaniiru. Paartileen siyaasaa biyyoota miseensa Ardichaa filannoof dorgomuun gamatti misooma biyyaaf hojjechuun qajeeltoo heera mootummaa kabajuun jireenyi namootaa akka fooyya’u hojjechuu akka qaban hubachiisaniiru. Falaasama ida’amuuhumna wal ta’e ijaaruu akka danda’u Itiyoophiyaarraa qooddachuun carraa egeree Ardii keenyaa murteessuuf carraaquu qabna jedhaniiru. Waajjira rejistiraarii paartilee siyaasaa Maalaawiirraa kan dhufan Eden Mizumaaraa gamasaaniin, ida’amuun falaasama kaayyoowwan misoomaa milkeessuuf tumsa dameelee cimsu ta’uu hubadheera jedhan. Falaasamichi tumsa cimsuudhaan qaxalummaa akka fiduu fi biyyoonni Afriikaa misooma dinagdee isaanii akka gaggeessan akka deeggaru ibsaniiru. Bu’urri misoomaa fi misoomni Itiyoophiyaa keessatti gaggeeffamaa jira biroon biyyoota Afriikaaf barnoota guddaa akka ta’u ibsaniiru

Sadaasa 2/2019 (ENA)- Kantiibaan magaalaa Finfinnee Adaanech Abeebee hojii raawwachiiftuu olaanaa faawundeeshinii fandii invastimantii daa’immanii Keet Hampiten waliin mari’ataniiru. Kantiibaa Adaanechi Abeebee ergaa fuula miidiyaa hawaasaa isaaniirratti dabarsaniin, hojii raawwachiiftuu kana waliin marii bu’a qabeessa gaggeessuusaanii ibsaniiru. Itiyoophiyaa COP32 waan qopheessituuf carraalee tumsaa, akkasumas qabiinsaa fi dhabamsiisa balfaa, sagantaa ashaaraa magariisaa, jijjiirama haala qilleensaa damdamachuu fi tumsa magaalotaa cimsuurratti mariin taasifamuu dubbataniiru. Misooma magaalaa egeree, magariisaa fi hammataa mirkaneessuuf tumsa qabnu gara bu’aa qabatamaatti jijjiiruun dhaloota har’aa fi boeuuf magaalaa fooyyoftee fi egeree ijaaruuf kutannoon ni hojjenna jedhaniiru.  

Sadaasa 2/2019(ENA)-Kallattiin misooma dinagdee damdanuu mootummaan ida’amuu fayyadama dinagdee fi hawaasummaa dubartootaa fi dargaggootaa mirkaneessaa jiraachuu biiroleen dubartootaa fi dhimma hawaasummaa naannoo ibsan. Mootummaan ida’amuu dirree hammataa fi hirmaachisaa fayyadama hawaasummaa fi dinagdee lammiilee uumuudhaan hojiilee misoomaa uumuun hojjechaa jira. Hojiin biyya alaa seera qabeessi mirgii fi kabajni namootaa eegamee sira hojmaataa ammayyaa guduunfaa itti qabatan diriirsuun jijjiiramni guddaan galmaa’eera. Hoggantoonni biiroo dubartootaa fi dhimma hawaasummaa naannoo ENA’tti akka himanitti, kallattiin misooma dinagdee damdanuu mootummaan ida’amuu fayyadama dinagdee fi hawaasummaa dubartootaa fi dargaggootaa mirkaneessaa jira. Bobbiin hojii biyya alaa Itiyoophiyaan uumte godaansa hammaataa fi seeraan alaa hir’isuun bu’aa jajjabeessaa argamsiisaa akka jiru dubbataniiru. Kana cinaattis ejensiiwwanii fi faddaaltota namoota bu’aa bayii olaanaaf saaxilan to’annaa jala oolchuun seeraan akka gaafataman taasifamaa jiraachuu eeraniiru. Hoggantuun biiroo dubartootaa fi dhimma hawaasummaa naannoo jiddu galeessa Itiyoophiyaa Faaxee Surmolluu akka jedhanitti,kallattiin misoomaa mootummaan ida’amuu dandeettii hojii uumuu guddisaa jira. Kunis tumsa qooda fudhattootaa guddisuun namoonni biyyasaaniitti hojjetanii akka jijjiiraman carraa uumuudhaan godaansa seeraan alaa oolchaa akka jiru dubbataniiru. Itti aantuu hogganuun biiroo dubartootaa fi dhimma hawaasummaa naannoo Beeniishaangul Gumuz Meriyem Abdurehimaan gamasaaniin, godaansi seeraan alaa miidhaa dinagdee fi hawaasummaa hamaa geessisa jedhaniiru. Mootummaan ida’amuu bobbii hojii biyya alaaf haala gaarii uumeera kan jedhan ammoo itti aantuu biiroo dubartootaa fi dhimma hawaasummaa naannoo ummattootakibba lixa Itiyoophiyaa adde Raaheel Leewaati. Haala Kanaan namoonni hojiif biyya alaa dhaqan mirgii fi kabajnisaanii eegamee sirni ammayyaa jiraachuu himaniiru.