Sadaasa 23/2016 (TOI) - Guyyaaboota sabalamootaa fi uummatoota Itoophiyaa 18ffaa sababeeffachuun Finfinneetti feestivaalli aadaa geggeeffama jira Feestivaalichi magaalaa Finfinnee addabaabayii michummaatti mata duree "Sabdaneesummaa fi walqixummaa tokkummaa biyyaaf'' jedhuun geggeeffama jira. Feestivaalicharratti hirmaatoonni aadaalee ,nyaata aadaa, uuffata aadaa fi sirboota aadaa saboota sabaloomtootaa fi uummatoota dhiheessaniiru. Feestivaala aadaa kanarratti kantiibaa magaalaa Finfinnee aadde Adaanech Abeebee dabalatee af-yaa'iin manneen maree naannoolee fi bulchiisoota magaalootaa, jiraatoonni magaalichaa fi keessummoon waamichi taasifameef argamaniiru.

Sadaasa 22/2016 (TOI) – Barreessaa Olaanaan Dhaabbata Misoomaa Mootummootaa Baha Afrikaa doktar Warqinaa Gabayyoon bakka agarsiisa Ashaaraa Magariisaa Itoophiyaa daawwataniiru. Itoophiyaan Yaa'ii Jijjiirama qabeenya qilleensaa COP 28 Dubaayitti gaggeeffama jiruurratti hojiilee Ashaaraa magariisaa beeksisaa jirti. Doktar Warqinaan yaa'ichaan cinaatti bakka agarsiisaa kana daawwachuu isaanii ragaan Emiroota Araba Gamtoomanitti Embaasii Itoophiyaarraa argame ni mul'isa.

Sadaasa 21/2016(TOI)- Itiyoophiyaa fi Israa’eel hariiroo biyyoota lamaanii cimsuuf waliigaluusaanii ibsame. De’eetaan ministira dhimma alaa ambaasaaddar Misgaanuu Argaa Itiyoophiyaatti ambaasaaddara Israa’eel Alleliny Admaasuu waajjirasaaniitti simatanii haasofsiisaniiru. Marii kanaanis hariiroo biyyoota lamaanii yeroo dheeraaf ture caalaatti cimsuuf waliiti fufuun yaada waljijjiiruun akka barbaachisu ambaasaaddar Misgaanuun ibsuusaanii odeeffannoon ministeera dhimma alaarraa argame nimul’isa. Fuuldura hariiroo kana cimsuuf hojmaatota biyyoota lamaanii sakatta’uu fi marii siyaasaa taasisuun akka barbaachisu ambaasaaddar Misgaanuun dubbataniiru.

Sadaasa 21/2016 (TOI) - Naannoo Affaaritti bor irraa eegalee filannoon namoota ajandaa marii biyyaaleessaaf walitti qabanii ni geggeeffamu ta'u komishinarri Komishiinii maree biyyaalessaa doktar Ayroot Mahaammad beeksisan. Komishiinarittiin guyyaa har'aa ibsa magaalaa Samalaatti miidiyaaf kennaniin naannichatti filannoon namoota kutaalee hawaasa gara garaa irraa walitti dhufanii kan ajandaa maree biyyaalessaaf walitti qabanii sadaasa 22/2016 irraa eegalee ni taasifama jedhaniiru. Filannoon kun kan geggeeffamu qaamolee deeggartoota komishiinichi leenjii kenneefii fi hirmaatoota aanaalee adda addaarraa filate 4320 keessaa ta'uu ibsaniiru. Kana keessaas hawaasa aanaalee naannichaa 48 kan bakka bu'aan 864 kan filaman ta'uu ibsaniiru. Filannoo kanarratti dubartoonni, dargaggoonnii, hawaasni daldalaa, hoggantoonni gosaa, jaarsoliin biyyaa, horsiise bultoonni, hojjetoonni mootummaa, buqqaatoonni fi barsiisoonni ni hirmaatu jedhaniiru. Komishiinichi filannichi hirmaachisaa, iftoomina fi amanamummaa kan qabu bu'uura akka godhatu deeggarsa ni taasisa jedhaniiru. Hawaasni filannoon bakka buutota hawaasa marii biyyaalessaaf ajandaa adda baasanii kun akka milkaa'uuf si'oominaan akka himaatuu fi milkaa'ina maree biyyaalessaa kanaaf gahee isaanii akka qaban gaafataniiru.

Sadaasa 21/2016 (TOI) - Guyyaan saba sablammootaa fi ummattootaa kabajamuunsaa sablammoonni caalaatti akka walbeekanii fi walitti hidhamiinsasaanii cimsan carraa uumuusaa ittigaafatamaan biiroo komunikeeshinii Oromiyaa obbo Hayiluu Addunyaa dubbatan. Waltajjiin marii Gumii Balan 35ffaa mata duree “Sabdaneessummaa fi walqixxummaan tokkummaa biyyaaf” jedhuun har’a waajjira pirezidaantii naannoo Oromiyaatti taa’ameera. Mariin qindeessummaa waajjira pirezidaantii fi biiroo komunikeeshinii naannichaan qophaa’u guyyaa saba, sablammootaa fi ummattootaa 18ffaa barana naannoo Somaalee magaalaa Jigjigaatti kabajamu sababeeffachuuni Waltajjicharratti kan argaman ittigaafatamaan biiroo komunikeeshinii naannoo Oromiyaa obbo Hayiluu Addunyaa akka jedhanitti, sirni federaalaa bu’aa qabsoo ummattootaa waloo ta’e tokkummaa ummataa cimsaa akka jiru yaadachiisaniiru. Heerri mootummaa sanada waadaa waloo ummattootaa ta’e kan itti ragga’e Sadaasa 29 bu’uureffachuun kan kabajamu guyyaan saboota, sablammootaa fi ummattootaa waggaa waggaan kabajamuunsaa waliti hidhamiinsa ummataa cimsaa jira jedhaniiru. Guyyaan kun kabajamuunsaa sablammoonni akka walbeekan taasisuun olitti tokko kan biraa akka beekuu fi walitti hidhamiinsa isaanii akka cimsatan carraa uumuusaa ibsaniiru. “Ayyaanicha kabajuun olitti waliif yaaduun, walkabajuu fi walooma cimsuun misoomatti cimnee dhaloota dhufuuf biyya badhaate ceesisuurratti xiyyeeffachuu qabna” jedhan. Barreeffama mariif ka’umsaa ta’u kan dhiheessan barsiisaa federaalizimii univarsiitii Finfinnee doktar Tasfaayee Jimaa gamasaaniin, biyyootaakka Itiyoophiyaa afaan, aadaa, amandaa addaddaa qabaniif federaalizimii sabdaneessummaarratti hundaa’e akka wayyuuf kaasaniiru. Ittidabaluunis hanqinoonni sirna federaalizimiirratti mul’atan guutuu taasisuun fi biyyoota guddatanirraa muuxannoo fudhachuun hojeessuun biyya cimtuu fi badhaate ijaaruu akka dandeessisu himaniiru. Hirmaattonni yaada kaasaniin federaalizimii sabdaneessummaa keessummeesse ijaaruun hojii yeroo tokkoo osoo hinta’iin walirraa baruu fi waliif yaaduun yoo deemnedha jedhan. Hooggantoonni federaalaa fi naannolee, hayyuuleen federaalizimii fi seeraa fi qorattoonni damee kanaa waltajjii kanarratti argamaniiru.

Sadaasa 21/2016 (TOI)–Kurmaana waggaatti mariiwwan nageenya waaraa buusuuf dandeessisanii fi hayyoonni hedduun itti hirmaatan biyyattii iddoowwan addaddaatti taasifamuusaanii ministeerri nageenyaa beeksise. Ministeerichi rawwii kurmaana waggaa bara 2016 koree dhaabbataa hariiroo alaa fi dhimmoota nageenyaa mana maree bakka bu’oota ummataaf dhiheesseera. Ministeera nageenyaatti hojii raawwachiisaan dhimmoota tarsiimoo obbo Addunyaa Baqqalaa gabaasa wayita dhiheessanitti akka jedhanitti, ministeerichi hojiiwwan addaddaa nageenya waaraa buusuuf dandeessisan hojjechaa jira. Keessumaa dhimmoota ijoo torbrratti xiyyeeffatee hojjechaa akka jiru ibsaniiru. Kanneen keesa qaqqabiinsa odeeffannoo bal’isuu, duudhaalee nageenyaa gabbisuu, dhimmoota nageenya biyyaarratti qorannoo taassuu, mariiwwan nageenya waaraaffurmaata agarsiisan adeemsisuun kanneen ijooti. Haala Kanaan kurmaata waggaatti mariiwwan nageenya waaraa buusuu dandeessisanii fi furmaata agarsiisan biyyattii iddoowwan addaddaatti adeemsifamaniiru. Hayyoonnii fi qooda fudhattoonni 389 damee kanarratti qorannoo addaddaa taasisan waltajjiiwwan kanneenirratti hirmaatanii akka ture kaasaniiru. Kana malees dhimmoota duudhaa nageenyaa ta’an keessaa tajaajila tola ooltummaa biyyaalessaa irrattis kurmaana waggaatti tola ooltota kuma 3 ol marsaa lamaan leenjisuun nannawoota biyyattii addaddaatti bobbaafamuusaanii dabalanii himaniiru. Hojiilee teeknooloojiitti fayyadamuun walitti bu’iinsa dursanii ittisyuuf hojjetamaniin odeeffannoowwan 32 qaqqabanii deebiin ittikennamuu ibsaniiru.

Sadaasa 21/2016 (TOI) - Muuxannoowwan leenjiirraa argaman hojiirra oolchuun dhimma hooggansi dursa kennuuf ta’uu akka qabu itti aanaa pirezidaantii paartii badhaadhinaa fi ittigaafatamaan waajjira muummee obbo Adam Faaraah dubbatan. Obbo Adam Faaraah leenjii qaamolee hoogansa mootummaa godina Iluu Abbaabooritti leenjii marsaa 4ffaa irratti hirmaachaa jiran waliin mari’ataniiru. Kanumaan walqabatee hojiilee misoomaa godinicha iddoowwan addaddaatti misoomaa jiran daawwachuusaanii odeeffannoon fuula marsariitii paartii badhaadhinaarraa argame numul’isa. Fuulduras leenjiiwwan akkasii akka itti fufan ibsanii, muuxannoowwan leenjii Kanaan dura kennamanirraa argamanhojiirra oolchuun dhimma hooggansi dursa kennuufii qabu akka ta’e obbo Adam dubbataniiru.

Sadaasa 20/2016 (TOI) - Naannoo Harariitti guyyaan saboota, sabalamootaa fi uummatoota Itoophiyaa 18ffaa sagantaa adda addaan kabajama jira. Naanichaatti guyyaan kun mata duree '' sabdaneesuummaa fi walqixummaa tokkummaa biyyaalessaaf '' jedhuun marii paanaalii fi sagantaa biroo adda addaan kabajamaa jira jedhameera. Kabaja guyyaa kanarratti Pirezidaantiin naannoo Hararii fi Af-yaa'iin mana maree naannichaa obbo Sulxaan Abdulsalaam argamaniiru. Dabalataan hoggantoonni hojii mootummaa naannichaa biroo fi abbootiin amantaa, jarsoliin biyyaa fi kutaaleen hawaasaa adda addaa kabaja guyyaa kanarratti hirmaataniiru.