Komishiniin Marii Biyyaalessaa Itoophiyaa adeemsa walabummaa, hammattummaafi hirmaachiisummaa marii biyyaalessaa ilaalchisee ibsa kenneera. Komishinichi Labsii Lakkoofsa 1265/2014’n kan hundeeffame, mariin biyyaalessaa Itoophiyaa keessatti nagaa waaraa, waliigaltee fi sirni dimokraatawaa akka dagaaguuf faayidaa biyyaalessaa olaanaa qabu hubachuun, hojiiwwan hedduu raawwachaa tureera. Waltajjiin Marii Biyyaalessaa Itoophiyaa, Adoolessa 08/2018 ifatti sirna guddaan kan jalqabame, Komishinichi sirna hojii fi karoora ofii isaa bilisaa fi walaba ta’een qopheesse irratti hundaa’uun haala gaariin gaggeeffamaa jira. Adeemsi marii biyyaalessaa kun garaagarummaa siyaasaa fi hawaasummaa gadi fagoo fi walxaxaa Itoophiyaa mudachaa ture marii fi karaa nagaa ta’een furuuf carraa seenaa qabeessa banamedha. Adeemsi kun nagaa waaraa fi tokkummaa biyya keenyaa keessatti faayidaa guddaa waan qabuuf, qaamoleen hundi akka kan isaanii ta’etti kunuunsuu qabu. Komishinichi aangoo fi itti gaafatamummaa seeraan kennameef irratti hundaa’uun adeems marichaa walabummaa, hammattummaa fi hirmaachisummaa qaburratti hundaa’uun gaggeessuuf xiyyeeffannoo guddaa kennuun hojjechaa jira. Adeemsi marii kun paartii siyaasaa kamiyyuu, qaama mootummaa ykn garee addaa tokkoof ajandaa siyaasaa isaa raawwachiisuuf kan oolu miti. Kanarra fooyyeefi fudhatamummaa kan qabu fedhiifi ilaalchootni garaagaraa walqixa kan itti dhiyaatan, mariidhaan waliigaltee waliinii uumuuf kan itti hojjetamu waltajjii biyyaalessaadha. Adeemsa kana keessatti rakkoolee fi qormaatileen mudatanis jiru. Yeroodha gara yerootti hanqinoota Komishinicha ykn hirmaattota marii biratti mul’atan, akkasumas komiiwwan uumaman sirnaan furuufi deebii kennuuf carraaqqiin taasifameera. Bu’aan argame kunis tattaaffiiwwan akkasii dabalatee kan argamedha. Kana ilaalchisee, Komishinichi ibsa Paartiin Sochii Biyyaalessaa Amaaraa (ABN) dhiheenya kana hojii fi adeemsa Komishinichaa ilaalchisee baase hordofee ibsa armaan gadii kennuun barbaachisaa ta’ee argameera. Haaluma kanaan, ilaalcha ABN adeemsi kun hammataa fi hirmaachisaa miti jedhu ilaalchisee, Komishinichi qorannoo fi mirkaneessa barbaachisaa erga taasisee booda, xumura paartii siyaasichaa kana akka hin qooddanne ibsuu barbaada. Waltajjii marii biyyaalessaa keessatti, bakka bu’oonni kutaalee hawaasaa garaagaraa, paartileen siyaasaa, dhaabbilee fi waldaalee, qaamolee mootummaa federaalaa, naannolee fi bulchiinsa magaalotaa, Itoophiyaanotni dhibba uumtootniifi beekamoon, humnoota duraanii hidhatan duraanii socho’aa turaniifi waamicha karaa nagaa fudhachuun galan, hawaasa diyaasporaa fi qaamoleen dhimmi ilaallatu biroo bakka bu’uummaan, sagaleewwan garaagaraa adeemsa kana keessatti hirmaachaa fi dhaggeeffatamaa jiru. ABN’nis paartilee siyaasaa hanga ammaatti adeemsa marii kana keessatti dammaqinaan hirmaannaa taasisan keessaa isa tokkodha. Komishinichi komiifi iyyata hirmaataa marichaa kamiyyuu salphaatti kan bira darbu miti. Komiiwwan qaamolee garaagaraa, ABN dabalatee, dhiyeessaniifis sirna furmaata komii irratti hundaa’uun deebii kennaa jira. Yaadota ijaarsaa fi komiiwwan adeemsa marii fooyyessuuf dhiyaatanis sirnaan ilaaluun, hanga adeemsa marii fudhatama qabuufi bu’a qabeessa taasisuuf gumaachanitti, akka galteetti fayyadamuuf Komishinichi qophiidha. Kanaaf, Komishiniin Marii Biyyaalessaa Itoophiyaa carraa kanaan ABN fi qaamolee dhimmi ilaallatu biroo adeemsa marii isa hafe keessatti dammaqinaan akka hirmaataniifi waliigaltee waliinii uumuuf akka waliin hojjetan kabajaan waamicha dhiyeessa. Marii biyyaalessaa jechuun injifannoo gama tokkoo ykn mo’icha gama biraa miti. Marichi adeemsa Itoophiyaan rakkoolee ishee mudataniif furmaata waliinii ittiin barbaaddu, kan hundumaaf bu’aa fi injifannoo fiduuf gargaarudha. Komishinichis sagalee lammiilee fi hirmaattota marii hunda walqixa dhaggeeffachuufi adeemsa kana bilisummaafi walabummaan gaggeessuuf kutannoo qabu irra deebiin mirkaneessa. Dhumarratti, Komishinichi uummattoota Itoophiyaa, paartilee siyaasaa, waldaalee siiviikiifi dhaabbilee garaagaraa, milkaa’ina marii kanaaf gumaacha gaariifi itti fufiinsa qabu taasisan hundi ammas akkaataa jalqabaniin cimsanii akka itti fufan cimsee kabajaan gaafateera. Itiyoophiyaan Mari’achaa jirti! Komishinii Marii Biyyaalessaa Itoophiyaa! Hagayya 11/2018 Finfinnee

Hagayya 11/2018 (ENA): Itiyoophiyaan dhiibbaa gaarii naannichatti uumaa jirtu irraa kan ka’e maqaan ishee guddachaa jira jedhan Daarektoreetii Waliigala Ittisaa Hariiroo Alaa fi Tumsa Waraanaatti Daayreektarri Leenjii Letenaal Koloneel Minaasee Haayiluu. Itiyoophiyaan Nagaaf tasgabbii Gaanfa Afrikaaf gahee olaanaa bahachaa jirti jedhe Jilli Raayyaa Ameerikaa. Ka’umsa isaa Kaarood Ayilaand kan taasise Jilli Raayyaa Ameerikaa giddugala kabachiisa nageenyaa Raayyaa Ittisa biyyaatti leenjii kennuu eegaleera.   Leenjichi biyyoonni lameen damee loltummaan waloon hojjechuuf waliigaltee taasisan ka’umsa godhachuun kan qophaa’e yoo ta’u, wayita ergama loltummaa bahatan mirga namoomaa fi seeroota loltummaa idil addunyaa irratti kan xiyyeeffatedha. Raayyaa Ittisa Biyyaatti Daayrektarri Olaanaa Hariiroo alaa fi tumsa loltummaa Leetenaal Koloneel Minaasee Hayiluu akka jedhanitti, dhiibbaa gaarii Itiyoophiyaan naannawichatti uumaa jirtuun dhaggeeffatamummaan ishee guddachaa dhufeera. Biyyoonni tasgabbii dhaban Gaanfa Afrikaa keessa jiran Itiyoophiyaa malee furuun akka hin danda’amne hubachuun, faayidaa waliinii mirkaneessuuf Itiyoophiyaa waliin hojjechaa jiru jedhan.   Leenjichi Itiyoophiyaan ergama nageenya eegsisuuf keessattuu dirqama, sochiiwwan waraanaa yeroo gaggeessitu, mirga namoomaa fi seerota idil addunyaa eeguu keessattii beekuumsa haaraa kan uumuu ta’uu dubbataniiru. Leenjicha kennuu qofa osoo hin taane, muuxannoo bal’aa raayyaan Ittisaa qaburraayyis kan qooddatan ta’uu kaasaniiru.   Qindeessan leenjichaa Letenaal Koloneel Zaakarii Maakaartar gamasaaniin, Itiyoophiyaan Gaanfa Afrikaatti keessattuu nageenyaa fi tasgabbii Somaaliyaa mirkaneessuu keessatti gahee olaanaa taphachaa jiraachuu ibsaniiru. Ameerikaan Itiyoophiyaa waliin walitti dhiheenyaan hojjechaa jiraachuu eeranii, leenjichi hojiiwwan loltummaan biyyoonni lameen caalmaatti bu’aa qabeessa akka ta’an isaan gargaara jechuu miidiyaa onlaayinii Raayyaa Ittisa Biyyaa ENA’f ergee ni mul’isa #Ena Afaan Oromoo #TOI #Ena #

Hagayya 11/ 2018(ENA)- Hojiin yaadota furmaataa gareewwan yaa’ii marii biyyaalessaan gabbifaman walsimsiisuu xumuramaa jira jedhe Komishiniin Marii Biyyaalessaa. Itti aantuun Komishinara Olaanaa Komishinichaa Hiruut Gabrasillaasee haala adeemsa yeroo ammaa marichaa irratti ibsa kennaniiru. Ibsa isaaniin, tokkoon tokkoo garee yaa’ichaa bakka bu’oota 15 filuun yaadota furmaataa gareewwaniin gabbifaman walsimsiisuuf hojjechaa akka turan ibsaniiru. Hojii guddaan bakka bu’oota kanneenii yaadota furmaataa yeroo dheeraa fudhachuun qophaa’an walsisiisuu akka ta’e eeraniiru. Haaluma Kanaan yaadota furmaataa gareewwan 8 gidduutti yaadonni faallaafi irra deddeebii osoo hin uumamiin haala walfakkaataa ta’een akka dhiyaatu gochaa jiru jedhaniiru. Dabalataanis bakka buutonni filataman yaadota furmaataa gareewwan biroorratti hubannoo fudhachuu kaasanii, waliin dubbisaa yaadota kan walsimsiisan ta’uu dubbataniiru. Yeroo ammaa kana hojiin yaadota furmaataa gareewwaniin gabbifaman walsimsiisuu xumuramaa akka jiru ibsaniiru. #Ena Afaan Oromoo #TOI #Ena #

Hagayya 11/ 2018 (ENA): Nageenya Naannoo Gaambeellaa mirkaneessuun misoomaa fi bulchiinsa gaarii ummataa guddisuuf sochiin hojjetamaa jiru cimee itti fufa jedhan Af-yaa’iin Mana Maree Naannichaa Aadde Masarat Maatiyoos. Manni Maree Naannoo Gambeellaa Yaa’ii Idilee 10ffaa Bara hojii 6ffaa waggaa 5ffaa gaggeessuu eegaleera. Manni Marichaa yaa’ii guyyoota lamaaf gaggeessuun, karoora raawwii bara 2018 bulchiinsa gaarii fi misoomaa gamaaggamuun akkasumas gabaasa raawwii mana murtii waliigalaa fi odiitara olaanaa naannichaa dhaggeeffachuun kan raggaasisu ta’uun eerameera. Dabalataanis karoora bara baajataa 2019 fi dhimmoota biroorratti mari’achuun murtoowwan kan dabarsu ta’uun ibsameera. #Ena Afaan Oromoo #TOI #Ena #

Hagayya 10/2018 (ENA): Mariin Biyyaalessaa karaa qaroomina qabuun aadaa siyaasaa furmaata barbaaduu haaraa fi boqonnaa wal-deeggaruu kan bane taatee seenaa qabeessa ta'uu isaa Paartiin Dimokrataawaa Tigiraay (TDP) beeksise. Paartichi dhimma waqtaawaa irratti ibsa kenneen, adeemsi kun madaa seenaa ammaan duraa fayyisuun nagaa fi misooma waaraatiif karaa kan banudha jedheera. Sagaleenii fi fedhii dhugaan uummata Tigraay waltajjii biyyaalessaa irratti akka dhaga'amuuf, ajandaa walitti qabuurraa eegalee Komishinii Marii Biyyaalessaa Itoophiyaa waliin dhiheenyaan hojjetaa turuusaa ibseera. Yeroo ammas hirmaattonni kutaa hawaasaa garagaraa irraa filataman bakka bu'oonni uummata Tigiraay 300 ol adeemsa kana irratti dammaqinaan hirmaachaa akka jiran beeksiseera. Paartichi dabaluudhaan, gareen seeraan ala ABUT ammas waraanaa faarsuun jireenya fi abdii fuula duraa dargaggootaa irratti gufuu uumaa jiraachuu ibseera. Paartichi dargaggoonni Tigiraay waraanaa fi diigumsa irraa bilisa ta'uudhaan karaa sirrii hordofuu akka qaban dhaameera. TDP'n Dargaggoota Tigiraay balaa walitti bu'insaa fi waraanaa irraa of baraaruuf gara Finfinnee fi naannoolee birootti baqachuun rakkoo hawaasummaafi dinagdee olaanaa keessa jiraniif qaamoleen mootummaa, abbootii qabeenyaa fi dhaabbileen arjooman deeggarsa barbaachisu akka taasisan waamicha dhiyeesseera.

Hagayya 9/2018 (ENA): Mariin Biyyaalessaa adeemsifamaa jiru kun waltajjii guddaa seenaa Itiyoophiyaa keessatti boqonnaa haaraa banuun waliigaltee biyyaalessaa kan cimse ta’uu mari’attoonni himan. Mariin Biyyaalessaa Itiyoophiyaa inni guddaan Adoolessa 8, 2018 irraa eegalee Giddugala Walgahii Idil-addunyaa Addis konveenshinii keessatti gaggeeffamaa jira. Mari’attoonni 4000 lammiilee Itiyoophiyaa biyya keessaa fi biyya alaa jiraatan bakka bu’uun marii gadi fageenyaa fi hirmaachisaa ta’e ajandaawwan gurguddoo saddeet irratti gaggeessaa jiru. Hirmaattota ENA’n dubbise keessaa, obbo Tasfaayee Dajaneen, Adeemsi Marii Biyyaalessaa biyyattii keessatti boqonnaa haaraa banuun haala gaariin adeemsifamaa jira jedhani. Itti dabaluunis mariin kun rakkoolee yeroo dheeraaf furmaata dhabuun madda walitti bu’insaa ta’an furuun nageenya waaraa buusa jedhani. Marii kanarraa barumsi hedduun akka argameefi rakkoolee jiraniif furmaata hedduun akka dhiyaate himaniiru. Adeemsi marii biyyaalessaa kun imala Itiyoophiyaa fooyya’aa ijaaruuf taasifamu gara milkaa’ina guddaatti kan ceesiisu ta’uu ibsaniiru.   Mari’ataan biraa obbo Ibsaa Ibraahim gama isaatiin adeemsi marii kanaa seenaa Itiyoophiyaa keessatti isa jalqabaa fi gaarii ta’uu ibsuun, waliigaltee biyyaalessaa cimsa jedhaniiru.   Mari’ataan biraa obbo Boggaalee Sayidaa adeemsi kun qonnaan bultoota, horsiisee bultoota, qaama miidhamtoota, dubartootaa fi dargaggoota dabalatee kutaalee hawaasaa adda addaa bal’inaan kan hirmaachise waan ta’eef hirmaachisaa fi hunda kan hammate ta’uu ibsaniiru. #Ena Afaan Oromoo #TOI #Ena #

Hagayya 9/2018(ENA) : Jilli diyaaspooraa Itiyoophiyaa dhaloota lammaffaa Kaanaadaa irraa maatii isaanii kan hammate daawwannaaf Finfinnee seenaniiru. Jilli miseensoota 120 of keessa qabu kun wayita Buufata Xiyyaaraa Idil Addunyaa Boolee gahan Tajaajila Diyaasapooraa Itiyoophiyaan simatamaniiru.   Jalqabbiin akkasii diyaasporaa seenaa, aadaa fi eenyummaa Itiyoophiyaa waliin walitti fiduuf faayidaa guddaa qaba jedhameera. Gareen kun turtii baatii tokkoo Itiyoophiyaa keessatti taasisuun, waljijjiirraa aadaa fi beekumsa biyyaalessaa irratti muuxannoo kan qooddatan ta’uun himameera. #Ena Afaan Oromoo #TOI #Ena #

Hagayya 8/2018(ENA): Gaazexeessaa fi barreessaa Zaahid Ziidaan akka ibsanitti, gabaasni miidiyaalee Gibxii waa’ee Hidha Haaromsa Guddicha Itoophiyaa dhiyeessan kan wal hin simne yoo ta’u, madaallii saayinsawaa ogeeyyii saayinsii fi bishaanii Gibtsii hedduu waliin kan wal-faallessudha jechuun ibsaniiru.   Gaazexeessaa Zaahid ENA’f yaada kennaniin, marii fi falmiin Hidha Haaromsaa Guddichaarratti taasifamu xiinxala saayinsawaa fi teeknikaa irratti xiyyeeffachuu mannaa, seenaan miidiyaa ifa hin taaneefi wal-faallaa ta’een kan hoogganamu ta’uu ibsaniiru. Ji’oolojistiin Gibtsii Dooktar Abbaas Sharaaqii, hidhi kun uumamaan Gibtsii irratti miidhaa kamiyyuu akka hin geessisne ifatti kan ibsan ogeeyyii biyyattii keessaa tokko ta’uu gaazexeessaan kun eeraniiru. Akkasumas, saayinsistiin Gibtsii kan biraa Dooktar Sameeh Armaaniyoos, Hidhi Haaromsaa Guddichi pirojektii humna ibsaa maddisiisuuf bishaan fayyadamu yoo ta’u, bishaaniin hanqina hin uumin; humna elektirikaa erga maddisiisee booda bishaanichi kallattiin gara lagaatti kan deebi’u ta’uu isaa ibsaniiru. Haaluma walfakkaatuun, saayinsitistiin Hawaa Dooktar Faariq El-Baaz, hidhi kun bulchiinsi bishaanii fooyya’aa akka jiraatu gochuun, faayidaa Itoophiyaa qofa osoo hin taane faayidaa Sudaanii fi Gibtsiis eeguuf akka gargaaru ibsuu isaanii Gaazexeessaa fi barreessaa Zaahid Ziidaan himaniiru. Gaazexeessaan kun ogeeyyii Sudaan, kanneen akka Piroofeesar Saayif Al-Diin Haamaad dabalatee Ministira Bishaaniifi Jallisii Sudaan kan duraanii Usmaan Al-Toom eeruun, marii laga Abbayyaa irratti taasifamu keessatti sagaleefi wacaa siyaasaa osoo hin taane, ragaa saayinsawaa fi mirkanaa’aa irratti hundaa’uun xiinxala taasisuun barbaachisaa ta’uu hubachiisuu isaanii eeraniiru. Miidiyaaleen Gibtsii tokko tokko hidha kana yeroo barbaadan lolaafi barbadaa’uu bu’uuraalee misoomaa waliin walqabsiisu; yeroo biraa ammoo bishaan hir’achuu fi hongee fida jedhanii himatuun kan kaasan Gaazexeessaa Zaahid akka isaan jedhanitti, ilaalchi akkanaa yaada guutummaatti faallaa yaada hayyoota Gibtsii kan deemu tahuu hubachiisaniiru.   Zaahid dabalataan akka ibsanitti, himannaan siyaasaa fi miidiyaaleen hidhi kun biyyoota yaa’a laga Abbayyaa jala jiran irratti balaa fida jedhanii dhiyeessan, fedhii siyaasaa kan of keessaa qabu malee, hundee saayinsawaa walitti fufiinsa qabu akka hin taane dubbataniiru. Akka isaan ibsanitti, seenaan dogoggoraa akkanaa mirga Itoophiyaan qabeenya uumamaa ishee jechuunis laga Abbayyaa gara biyyoota yaa’a gaditti yaa’u keessaa harka 86% kan ta’e, fayyadamuun misoomsuuf qabdu gufachiisuuf waggoota dheeraaf itti fufee kan turedha. Zaahid, baay’inni bishaanii waggaa guutuu laga Abbayyaa keessa darbu yeroo bonaafi roobaa irratti battalumatti adda baafamee beekamuu waan hin dandeenyeef, hanga bishaanii dursan tilmaamuun ykn murtii xumuraa kennuun akka hin danda’amne turtii ENA waliin taasisaniin ibsaniiru. Kanarra, miidiyaaleen Gibtsii “waca siyaasaa” irraa bahuun, qorannoowwan saayinsawaafi ragaa mirkanaa’aa irratti hundaa’uun gabaasa madaalawaa dhiyeessuu akka qaban Gaazexeessaa fi barreessaa Zaahid Ziidaan waamicha dhiyeessaniiru. #Ena Afaan Oromoo #TOI #Ena #