Sadaasa 22/2018(TOI)-Ayyaanni sabaa, Sab-lammootaa fi uummattootaa kabajamuun tokkummaa sab-danessummaa cimsuun ijaarsa biyyaaf qooda olaanaa gumaacheera jechuun Af-yaa’iin Mana maree Federeeshinii Aganyoo Tashaagar dubbatan.   Guyyaan Ayyaana sabaa, sab-lammootaa fi uummattootaa Itiyoophiyaa 20ffaan sadarkaa Naannoo Oromiyaatti Godina Gujii Lixaa Magaalaa Bulee Horaatti dammaqinaan kabajameera. Sirna kabaja ayyaanichaarratti kan argaman Af-yaa’iin Mana maree Federeeshinii Aganyoo Tashaagar akka dubbatanitti ayyaanichi Itiyoophiyaanonni waloon jiraachuuf kan waliif galanii fi waggaa waggaan duudhaa Aadaasaanii adda baabaayiitti kan ibsanidha. Kunis Sirni Federaalaa cimaan akka jiraatu gochuun tokkummaa sab-daneessummaa cimsaa ijaarsa biyyaaf qoda olaanaa gumaachuu dubbataniiru. Ayyaanichi waltti hidhaminsa waloo haala cimsuun sadarkaa sadarkaan kabajamee Sadaasa 29 bara 2018 sadarkaa biyyoolessaatti naannoo giddugala Itiyoophiyaa Magaalaa Hosaa’inaatti akka kabajamu kaasaniiru.   Af-yaa’iin Caffee Oromiyaa Sa’aadaa Abdurahimaan gamasaaniin, Ayyaanichi naannichatti tokkummaa sab-daneessummaa fi walitti hidhaminsa haala cimsuun kabajamaa turee har’a xumurmuu ibsaniiru. Ayyaanichi saboonni, sab-lammoonnii fi ummattoonni Aadaa fi duudhaasaanii beeksisuurra darbee tokkummaa sab-daneessummaa caalaatti cimsuuf waadaasanii kan itti haaromsan ta’uu dubbataniiru.   Keessumaa Ayyaanichi Hidhi Haaromsaa Guddichi Itiyoophiyaa xumuramee pirojektoonni gurguddoo hedduun yeroo eegalamanitti kabajamuun misooma biyyaaf waloon dhaabbachuun irra deebuun gamtooma keenya kan itti cimsinudha jedhaniiru.   Bulchaa Godina Gujii Obbo Abdullaahii Hirbaayyee, Godinichatti Jijjiiramaa boodaa eegalee qabeenya jiran gara misoomaatti jijjiiruun fayyadamummaa hawaasaa guddisaa jira jedhaniiru. Keessumaa buna dabalatee midhaan zayitaa biroo akkasumas misooma horii gaafaan, hojiiwwan bu’aa qabeessa ta’an Godinichatti raawwatamuusaanii kaasaniiru.   Ayyaanichi sadarkaa Naannootti Godinichatti kabajamuun qabeenya Naannichaa beeksisuurra darbee misooma eegalaman cimsuuf qooda olaanaa qaba jedhaniiru.

Sadaasa 22/2018(TOI)-Ministirri muummee Dr. Abiyyi Ahimad Sadaasa 23 bara 2018 irraakaasee ambaasaaddar Batiree Mangistuu de'eetaa ministiraa hogganaa waajjira addaa ministira muummee gochuun muudaniiru.

Sadaasa 22/2018 (TOI)- Guyyaan sabootaa, sablammootaa fi ummattootaa 20ffaan sadarkaa naannoo Oromiyaatti bakka af-yaa’iin mana maree federeeshinii Aganyoo Tashaagar argamanitti magaalaa Bulee Horaatti kabajamaa jira. Af-yaa’iin mana maree federeeshinii Aganyoo Tashaagar, Af-yaa’iin Caffee Oromiyaa Sa’aadaa Abduraahimaan dabalatee hoggantoonni mootummaa olaanoo akkasumas bakka bu’oonni sabootaa, sablammootaa fi ummattootaa ayyaanicharratti argamaniiru. Ayyaanichi mata duree “waliigalteen demokiraatawaa tokkummaa sabdaneessummaaf” jedhuun naannichatti qophiilee garagaraan sadarkaa sadarkaan kabajamaa turee har’a sagantaa goolabaa ta’uun beekameera.

Sadaasa 20/2018(TOI)-Nannoo Oromiyaa Godinaalee wallagaa sadiitti nageenya bu’een hawaasni fuulasaa gara misoomaatti deebisee hojii bu’aa qabeessa akka hojjetu taa’uusaa Hoggantoonni Godinaalee ibsan . Hoggantoonni Godina wallagga Lixaa, Bahaa fi Horroo guduruu wallaggaa Turtii TOI waliin taassisaniin akka ibsanitti, nageenyi naannichatti bu’een hojii misoomaaf haala mijataa uumeera. Itti Aanaan Bulchaa Godina Wallagga Lixaa Obbo Gammadaa Tafarraa, Godinichatti hawaasni qaamolee nageenyaa waliin qindoomee hojjechuun nageenyi bu’uu ibsaniiru. Waggoottan darban rakkoo nageenyaa godinichatti mudachaa tureen hojii misoomaa hojechuun rakkoo akka ture eeruun, nageenya bu’een xiyyeeffannoon hawwasaa misoomara ta’eera jedhaniiru. Haalli mijataan uumame hojii misooma qonnaa Idilee xiyyeeffannoon hojjechuun olitti hojii bu’uuraalee misooma addaan citanii turan irra deebi’anii akka eegalaman ta’uu dubbataniiru. Dabalataanis Godinicha haala mijataa Invastimentiif qabu fayyadamuun dureeyyiin misooma Albuudaa dabalatee hojiiwwan misoomaa adda addaarratti hirmaachaa jiraachuu ibsaniiru. Godinichatti Hojiiwwan misoomaa Abdachiisoon Magaalaa fi Baadhiyaatti eegalaman cimanii akka itti fufaniif nageenya argame fulla’aa taassisuun ittifufa jedhaniiru. Itti Aanaan Bulchaa Godina wallagga bahaa Obbo Dassuu Lammii gamasaaniin, rakkoon Godincha ture dhabamsiifamee nagaan bu’eera jedhaniiru.   Godinichatti hawaasa hirmaachisuun hojiin misooma qonnaa bal’inaan hojjetamaa jiraachuu eeruun, hojiin Albuudaa,misooma Bakkeewwan gahumsa Turiizimii fi hojiiwwan biroon hojjetamaa jiru jedhaniiru. Godina Horroo Guduru Wallaggaa Bulchaan Aanaa Amuruu Obbo Darajjee Warquu, Aanichatti nageenyi bu’uun hawaasni hojii misoomaa humnasaa guutuun raawwachaa jira jedhaniiru. Hojiiwwan misooma Aanichatti raawwatamaa jiru abdachiisaa ta’uu ibsuun, hojiin bu’uuralee misoomaa hojjetamaa jira jedhaniiru. Hidhattoonni duraanii waamicha nageenya fudhatan leenjii haaromsa fudhatanii hojii misoomaa adda addaarratti hirmaachaa jiraachuusani ibsaniiru.

Sadaasa 20/2018(TOI)- Milkaa’ina Marii Biyyaalessaaf hirmaannan qooda fudhattootaa cimee itti fufaa jiraachuu komishinarri komishinii marii biyyaalessaa Malaakuu W/Maariyaam ibsaniiru. Waltajjiin hubannoo uumuu har'a magaalaa Gaambeellaatti mata duree "Gahee Dubartootaa, Dargaggootaa fi Qaama Miidhamtootaa Milkaa’ina Marii Biyyaalessaaf " jedhuun gaggeeffamaa jira. Komishinarichi waltajjii hubannoo uumuu kana irratti akka jedhanitti furmaata waaraaf hirmaannaan qooda fudhattoota hundaa cimee itti fufuu isaa eeraniiru. Dubartoonnii fi qaama miidhamtoonni milkaa’ina marii biyyaalessaa kanaaf qooda olaanaa qabaachuu himaniiru. Mariin biyyoolessaa eegalame dandeettii dubartoota, dargaggootaa fi qaama miidhamtootaa fayyadamuun nageenyaa fi misooma itti fufiinsa qabu biyyattiif mirkaneessuun galma ga’uu akka qabus ibsaniiru. Mariin hawaasa keessatti aadaa ta’ee itti fufuu akka qabu taasisuun, ijaarsa nageenyaa kaayyeffame milkeessuun xiyyeeffannoon hojjetamu akka qabus hubachiisaniiru. Waltajjiin har'aa kun marii biyyoolessaa keessatti hirmaannaa dargaggootaa, dubartootaa, qaama miidhamtootaa fi kutaalee hawaasaa biroo cimsuuf kan kaayyeffate ta'uus eeraniiru. Hirmaattonni waltajjii marii kanaas yaada bilisaa fi dhugaa irratti hundaa’e gumaachuun itti gaafatamummaa lammummaa isaanii akka bahatan Komishinarichi dhaamaniiru. Dubartoonni, dargaggoonni, qaama miidhamtoonnii fi qooda fudhattoonni biroo waltajjii marii hubannoo uumuu guyyoota lamaaf magaalaa Gaambeellaatti qophaa’e irratti hirmaachaa jiru.

Sadaasa 20/2018(TOI)-Manni maree ministirootaa walgahii idilee 50ffaa har’a gaggeesseen dhimmoota garagaraa irratti mari’atee murtoo dabarseera. Murtoo walgahii idilee mana maree ministirootaa 50ffaa Manni maree ministirootaa walgahii idilee 50ffaa har’a gaggeesseen dhimmoota garagaraarratti mari’atee murtoo dabarseera.   1. Manni Marichaa jalqaba Tarsiimoo Dijitaalaa Itiyoophiyaa 2030 irratti mari’ateera. Tarsiimoon kun lammiileef carraalee haaraa uumuu, dandeettii teeknooloojii guddisuu fi bu’uuraalee misoomaa babal’isuu, bulchiinsa gaarii dagaagsuu, guddina diinagdee saffisiisuuf hojiileen eegalaman irra caalaa fooyyessuun milkeessuuf kan akeekedha. Manni Marichaa Tarsiimoo kana irratti marii bal’aa erga taasisee booda guyyaa raggaasifame irraa eegalee hojiirra oolchuuf sagalee guutuun murteesseeera. 2. Itti aansuunis Manni Marichaa waliigalteewwan gargaarsa maallaqaa lama Waldaa Misooma Idil-addunyaa waliin mallattaa’an irratti mari’ateera. Inni jalqabaa waliigaltee liqii SDR 294,900,000 Sagantaa Ce’umsa Annisaa Itti Fufiinsa Qabuu fi Qulqulluu hojiirra oolchuuf kan oolu yoo ta’u, yeroo eeggannaa waggaa 6 dabalatee waggoota 38 keessatti xumurama. Inni lammataa immoo waliigaltee liqii SDR dabalataa 20,000,000 kan hojiirra oolmaa Pirojektoota tiraanisfoormeeshinii ogummaa baha Afrikaa fi hojiirra oolmaa piroojektoota walitti makaminsa riijinii Baha Afrikaa yoo ta’u, yeroo eeggannaa waggaa 6 dabalatee waggoota 31 keessatti xumurama. Liqiin lamaanuu dhala irraa bilisa kan ta’an yoo ta’u, kaffaltii tajaajilaa %0.75 qabu. Manni Marichaas waliigalteewwan liqii gara Mana Maree Bakka Bu’oota Uummataatti akka darban murteessee, tarsiimoo bulchiinsa liqaa biyya keenyaa wajjin kan walsimu ta’uu isaas ibseera. 3. Itti aansuunis Manni Marichaa wixinee dambiiwwan lama irratti kaffaltiin tajaajilaa Abbaa Taayitaa Eegumsa Naannoo fi Tiyaatira Biyyoolessaa Itiyoophiyaan tajaajila adda addaa kennaniif kaffaltii kaffalamuu qabu murteessuuf qophaa’e irratti mari’ateera. Dhaabbileen baasii isaanii uwwisuu fi galii isaanii guddisuun tajaajila qulqullina qabu kennuu fi itti quufinsa maamilaa dabaluu waan qabaniif, safartuun kaffaltii tajaajilaa haala dandeettii maamilaa tilmaama keessa galchuun qophaa’ee dhiyaateera. Manni marichaa wixinee dambiiwwan irratti bal’inaan erga mari’atee booda guyyaa Gaazexaa Nagaarii Federaalaa irratti maxxanfamee kaasee hojiirra oolchuuf sagalee guutuun murteesseera. 4. Itti fufuun manni marichi kan mari’ate Walii galtee gam-lamee Afur irrattidha. Inni jalqabaa Mootummaa Rippaabilikii ummata Chaayinaa waliin dhimmoota yakkaarratti tumsu seera waloo gochuuf kan ta’edha. Walii galteewwan biroon mootummaa Rippaabilika uummata Chaayinaa fi Mootummaa Federaala Rippaabilikaa Biraazil waliin kanneen murtiin itti murtaa’e dabarsanii kennuuf kan taassifamedha. Inni biroon walii galtee dabarsanii kennuu Mootummaa Rippaabilikii Afriikaa Kibbaa waliin taassifamedha. Manni marichi walii galtichi yoo ragga’e Itiyoophiyaan biyyoota kanneen waliin hammattoo seeraa hojii yakka ittisuu bu’aa qabeessa tumsa gamlamee uumuuf kan ishee dandeessisu ta’uu hubachuun wixineen labsii kun bakka bu’oota uummataatti akka gaggeeffamu sagalee guutuun murteesseera. Inni biroon manni marichi Ajandaawwan marii’ate wixinee labsi mallattoo melektiroonikiiti. 5.Mallattoo elektiroonikii labsii lakk.1072 /2010 guutummaa gutuutti hojiirra oolchuuf sirnoota barbaachisan labsichaa fi bu’uura labsii mallattoo elektiroonikii foyya’e lak.1358/2017 iftoominaa fi itti gaafatamummaa haala qabaateen hojiirra oolchuuf haala dandeessisuun labsiin qophaa’e dhihateera. Manni marichi labsicharratti gadi fageenyaan erga mrii’atee booda guyyaa Gaazexaa Nagaarita Federaalaan maxxanfamee bahee eegalee hojiirra akka oolu sagalee guutun raggaaseera. 6. Dhumarratti manni marichi kan marii’ate mana maree ministeerotaa Immigireeshinii labsii lakk. 114/1997 fooyyessuuf labsii dhihaate irratti. Dhaabbatichi hojii fi itti gaafatamummaa labsiitiin kennameefii bahuuf akka dandeessisuuf labsiin bahee qophaa’ee dhihaateera. Manni marichi labsicharratti gad-fageenyaan erga marii’atee booda Gaazexaa Nagaarita Federaalaan guyyaa maxxanfamee eegalee hojiirra akka oolu sagalee guutuun mirkaneesseera.

Sadaasa 20/2018(TOI)- Itiyoophiyaan qaama daandii daldala idil-addunyaa ta'uu akka qabdu ajajaan humna lafoo Faransaay Jeneraal Piyeer Shiil ibsaniiru. Dhiyeenya kana dhimma waraanaa biyyoota lamaanii irratti Ajajoota Waliigalaa Raayyaa Ittisa Biyyaa Federaala Dimokiraatawaa Itiyoophiyaa waliin kan mari’atan Jeneraal Piyeer Shiil, dhaabbilee adda addaa daawwachuun, dabalataanis ajajaa humnoota waraanaa Waliigalaa Itiyoophiyaa Fiildii Maarshaal Birhaanuu Juulaa waliinis mari’ataniiru. ‘Fedhii Gaaffii Itiyoophiyaan ulaa galaanaa argachuuf karaa nagaa gaafachaa jirtu akkamiin ilaaltu kan jedhu gaazexeessitoota Miidiyaa Raayyaa Ittisa biyyaa irraa gaafatamaniif ajajaan humna lafoo Faransaay Jeneraal Piyeer Shiil “Itiyoophiyaan biyya baay’ee guddoo taatee fi humna dinagdee guddaa qabdu akkasumas biyya uummata hedduu qabdu waan taateef qaama daandii daldala idil-addunyaa ta'uu qabdi” jedhan. Hariiroon tumsa waraanaa Itiyoophiyaa waliin taasisaa jirru inni guddaan, tumsa Faransaay Itiyoophiyaa waliin qabdu fooyyessuu akka ta’e ibsuun, magaalaa Finfinneetti argamuu isaaniittis baay’ee akka boonan dubbataniiru. "Kanaaf tumsi keenya irra caalaa gama deeggarsa meeshaalee waraanaa, hojii nagaa eegsisuu, hojiiwwan dhuka’aa fashaleessuu, leenjii humna namaa fi kanneen biroo irratti kan xiyyeeffate dha” jedhan. Jeneraal Piyeer Shiil Itiyoophiyaan nageenya riijinichaa eegsisuu keessatti qooda guddaa akka qabdu ibsuun, hirmaannaan Itiyoophiyaa baay’ee barbaachisaa akka ta’es eeraniiru. Akkasumas akka bakka bu’aa waraana Faransaayitti waraana Itiyoophiyaa akka deeggaran ibsaniiru. Hirmaannaa Waraana Itiyoophiyaa dinqisiifachuun, "Itiyoophiyaan biyya baay’ee guddaadha, waraana baay’ee cimaa fi guddaa qabdu, waraana kana irraas waan baay'ee barachuu dandeenya" jechuun ibsuu isaanii odeeffannoon Miidiyaa Raayyaan Ittisa Biyyaa TOIf erge ni mul'isa. Dhiheenya kana Waajjirri muummee Raayyaa Ittisa Federaalaa hooggantoota waraanaa biyyoota gurguddoo dabalatee biyyoota adda addaa irraa dhufan magaalaa Finfinneetti keessummeesseera.

Sadaasa 19/2018(TOI)- Nageenya, Tokkummaafi Badhaadhina Afrikaa mirkaneessuuf ijaarsi sirna heera mootummaa fi ijaarsi mootummaa bu’a qabeessa ta’e barbaachisaa ta’uu pireezidaantiin FDRI Taayyee Atsqasillaaseen himaniiru. Simpooziyeemii Idil Addunyaa 4ffaan Manneen Murtii Heera Mootummaa Afrikaa fi dhaabbilee kana fakkaatan irratti xiyyeeffate magaalaa Finfinneetti adeemsifamaa jira. Pireezidaanti Taayyee Asqasillaaseen haasaa baniinsaa taasisaniin sirni heera mootummaa seera baasuu qofa osoo hin taane, olaantummaa seeraa kabachiisuu, itti gaafatamummaa mirkaneessuu, mirgoonni bu’uuraa akka kabajaman taasisuudha jedhan. Heerri mootummaa sirna aangoo siyaasaa itti gaafatamummaan akka hojiirra oolu eeyyamu diriirsuuf kan yaadame ta’uu ibsaniiru. Afriikaan bulchiinsa heera mootummaa diriirsuuf tattaaffii taasiftu keessatti qormaatileen adda addaa akka ishee mudachaa jiranis hubachiisaniiru. Aangoo argachuuf sirna heera mootummaafi filannoo uummataatti amanuurra, karaa fonqolcha mootummaafi hokkaraan qofa jedhanii yaaduun rakkoolee Ardii Afrikaa mudatan keessaa tokko ta’uu eeraniiru. Akkasumas tasgabbii dhabuun siyaasaa, gahumsa dhabuu dhaabbilee fi aangoo heera mootummaa hin hordofne gonfachuun imala heera mootummaa ardii kanaaf qormaata ta’uu ibsaniiru. Itiyoophiyaan gama kanaan biyya muuxannoo addaa qabdu ta’uu hubachiisuun, sirnoonni seera mootii fi bulchiinsaa kan biyya keessaa abbootiin hojiirra oolchaa ittiin walbulchaa turan, kanneen akka sirna Gadaa keessa turan seera sirna guddaa hawaasni ittiin bulaa akka jiran hubachiisaniiru. Itiyoophiyaan biyya jaarraa 20 irraa jalqabdee heera mootummaa mataashee qabdu ta’uu eeraniiru. Afrikaa nuti hawwinu, kan nagaa fi badhaadhinni ishee mirkanaa’e uumuuf dhaabbilee mootummaa haqa qabeessaa fi amanamummaan tajaajilan ijaaruun barbaachisaa ta’uu cimsanii dubbataniiru. Kanaafis ijaarsi sirna heera mootummaa gahee olaanaa akka qabu eeruun, barnoonni lammummaa fi sirni kenniinsa haqaa cimuu akka qabu ibsaniiru. Nagaa, tokkummaa fi badhaadhina ardii kanaa mirkaneessuuf ijaarsi sirna heera mootummaa fi mootummaa bu’a qabeessa ta’e murteessaa waan ta’eef, namni hundi xiyyeeffannoo kennuu akka qabu ibsaniiru.