Waxabajjii 27/2017(TOI)- Bara bajatichaa bulchiinsa Dirree Dawaa magaalaa fi baadiyyaatti namoota kuma 19 caalaniif carraan hojii uumamuusaa biiroon hojii fi ogummaa bulchiinsichaa beeksise. Manni maree hojii fi dandeettii biirichaa raawwii hojii bara bajataa 2017 irratti har’a mari’ateera. Hooganaan biirioo hojii fi ogummaa bulchiinsa Dirree Dawaa Roobeel Geetaachoo akka jedhanitti, bara bajatichaa carraan hojii uumuun dijitaalaa ogummaarratti hundeeffame kan itti eegalameedha. Bu’aan onnachiisaan kanarraa argame fuulduras kan cimu ta’uu ibsaniiru. Bara bajatichaa bulchiinsichatti magaalaa fi baadiyyaatti namoota kuma 20 fi 950’f carraa hojii uumuuf karoorfamee namoota kuma 19 fi 70’f carraan hojii uumamuusaa beeksisaniiru. Carraan hojii kun kan uumame dameelee qonna magaalaa, Industirii fi tajaajilaan akka ta’e beekameera. Dabalataanis intarpiraayizoota 627’f walitti hidhamiinigabaa birriin miiliyoona 146 caalu uumamuusaa fi birriin miiliyoona 327 caalu ammoo liqiin kennamuun himameera. Waltajjii maree kana kan gaggeessan sadarkaa itti aanaa Kantiibaatti itti waamamaan mootummaa mana maree bulchiinsichaa Ibraahim Yuusuuf, hojiin bara bajatichaa hojii dhabdummaa fi hiyyummaa hir’isuuf hojjetaman onnachiisaa ta’uu dubbataniiru.

Waxabajjii 27/2017(TOI)-Sirni Hojii Odeeffannoo Gabaa Itiyoophiyaa carraa hojii uumuuf qooda olaanaa bahaa jiraachuu Ministirri Hojii fi Ogummaa Mufarihaat Kaamil ibsan. Bara baajataa 2017 Lammiilee Miiliyoona 4 tuqaa 5 oliif carran hojii akka uumame ibsaniiru. Ministirri Muummee Dr.Abiyyi Ahimad ibsa kaleessa Miseensota Mana Mareef kennaaniin, bobbii biyya alaa fi hojiin fageenyaa eegalaman, haala ammayyaa’een raawwatamuunsaa kan jajjabeeffamu ta’uu ibsuun isaanii ni yaadatama. Ministirri Hojii fi Ogummaa Mufarihaat Kaamil raawwii hojii bara bajataa 2017 ilaalchisuun ibsa kennaniiru. Ibsa isaaniin Riifoormii Dinagdee Mandhaalee Itiyoophiyaatti hojiirra ooluun carraa hedduu qabatee dhufuu dubbataniiru. Carraan hojii uumuu qophii irraa jalqabee hojiin bal’aan hojjetamaa jirachuu fi kallattii misoomaa waliin wal simsiisuun raawwatamaa jiraachuu ibsuun, hojiirra oolmaa carraa hojii uumuu ogummaa irratti bu’uureffate raawwii damichaa keessatti qooda olaana bahuu dubbataniiru. Raawwiin Damichaa Waggaa Waggaan giddugaleessaan Lammiilee Miiliyoona 3f carraa hojii uumaa akka dhufe yaadachiisaniiru. Keessumaa bara baajataa 2017tti Lammiilee Miiliyoona4 oliif carraan hojii uumamuu isaa ibsuun, Lammiileen Walakkaa Miiliyoonaa olii carraa hojii bobbii biyya alaa taassifamuufii himaniiru. Kanaafis haala mijataa uumuuf Sirni Barnootaa Haaraan 180 ol bocamuu isaanii dubbataniiru. Dameen dhuunfaa carraa hojii uumuu irratti qooda olaanaa bahaa jiraachuu fi kufaatiin Interpiraayizootaa hir’achuu ibsaniiru. Carraawwan hojii waqtaawaa uumaman gabaasa keessatti akka hin hammatamne eeruun, sirni Odeeffaannoon Gabaa Itiyoophiyaa carraa hojii uumuuf qooda olaanaa bahuu ibsaniiru. Yeroo ammaa hojii barbaaddonni sirna kanatti akka galmaa’aniif Ministirittiin waamicha dhiheessaniiru. Damichi Mul’istuuwwan Bu’aa Bayyanachuu Itiyoophiyaa ta’an kan itti galmaa’an ta’uu hubachiisuun, bakkeewwan carraa hojii haaraa gara Awurooppaatti babal’isuuf hojjetamaa jiraachuu dubbataniiru. Lammiileen karaa seera qabeessa ta’een bobbii biyya alaa akka taassisaniif jajjabeessuun rakkoowwan isaan mudatu furuu danda’amuu dubbataniiru. Yeroo hafanittiis bu’aawwan argaman itti fufsiisuuf ciminaan akka hojjetamu ibsaniiru. Ministirri Muummee Dr.Abiyyi Ahimad Miseensota Mana Mareef Raawii karoora Mootummaa bara bajataa 2017 yeroo dhiheessan lammiilee Miiliyoona 4 tuqaa 5f carraa hojii uumuu danda’amuu fi damichi guddinni guddaan kan irraa argame ta’uu ibsuun isaanii ni yaadatama.

Waxabajjii 27/2017(TOI)- Itiyoophiyaan Waxabajjii 30 amma Adoolessa 2 bara 2017tti foramii carraa hojii uumuu Afriikaa sadaffaa akka keessummeessitu Ministirri hojii fi dandeettii Mufariyaat Kaamil ibsan. Dhimmoonni qonnaa ammayyessuun carraa hojii uumuu, hammattummaa dijitaal faayinaansii xiyyeeffannoo foramii carraa hojii uumuu Afriikaa sadaffaa ta’uu Ministirittiin ibsa kennaniin dubbataniiru. Foramiin kun Afriikaan humna namaa dargaggoo qabdutti fayyadamuun misoomaa fi haaromfama Afriikaa saffisiisuun haala danda’amurratti akka mari’atu kaasaniiru. Hojiin biyyoonni Afriikaa carraa hojii uumuuf qofa qofaatti hojjetan akka jirutti ta’ee carraalee jiranitti tumsaan fayyadamuun fi rakkoolee furuuf akka gargaaru ibsaniiru. Qaxanaa daldala bilisaa Afriikaa dabalatee haala mijataa biroo fayyadamuun gabaa fi carraa hojii tumsaan uumuuf akka mari’atamu beeksisaniiru. Itiyoophiyaan qonna ammayyeessuu fi dameelee biroon carraa hojii uumuurratti hojii hojjette ilaalchisuun muuxannoo akka qooddu dubbataniiru. Invastaroonni, ministiroonni, Intarpiraayizoonnii fi kanneen damee kanarratti hojjetan biroon yaa’ii kanarratti kan hirmaatan yoo ta’u Itiyoophiyaan keessummoota simachuuf qophii xumuruu ibsaniiru. Itiyoophiyaan foramii kana komishinii gamtaa Afriikaa fi dhaabbata garee tireedii elektiroonikii Afriikaa (African Electronic Trade Group ) waliin ta’uun qopheessuushee ibsa Kanaan beeksiseera.

Waxabajjii 27/2017(TOI)- Godina Gujiitti lafa heektaara kuma 258 baatii Arfaasaa facaafamerraa oomishni kuntaala miiliyoona 4 tuqaa 2 akka abdatamu waajjirri qonnaa godinichaa ibse. Gareen hooggantoota olaanoo naannichaa pirezidaantii naannoo Oromiyaan Shimallis Abdiisaan durfamu hojiilee misoomaa godina Gujiitti hojjetamaa jiran daawwachaa jiru. Haala Kanaan Qamadii fi Boloqqeen godina Gujii aanaa Sabbaa Boruutti kilaastaraan misoome daawwatameera. Hoogganaan waajjira qonnaa godina Gujii Dastaa Gabrayyas hooggantoota olaanoo naannichaaf ibsa kennaniin,baatii Arfaasaa kanatti lafti heektaara kuma 258 sanyiin akaakuu garagaraa facaafamuu ibsaniiru. Isaanis Qamadii, Boloqqee, Boqqolloo fi kanneen biraa ta’uu eeranii, kanarraas oomishni kuntaala miiliyoona 4 tuqaa 2 akka abdatamu dubbataniiru. Pirezidaantii naannoo Oromiyaa obbo Shimallis Abdiisaa dbalatee paartii badhaadhinaatti hoogganaan waajjira damee naannoo Oromiyaa Kaffaaloo Tafarraa, akkasumas hooggantoonni olaanoo naannichaa daawwannaa kanarratti hirmaachaa jiru.

Waxabajjii 27/2017(TOI)-Daandiin Qilleensa Itiyoophiyaa Balallii Imaltootaa Torbanii gara Naayjeeriyaatti taassisu gara 31tti guddisuu beeksise . Naayjeeriyaan bakka gahumsaa Guddaa Daandii Qilleensichaa ta’uu ibsaniiru. Daandiin Qilleensa Itiyoophiyaa waxabajjii 24 bara 2017 irraa eegaluun balallii guyyaa guyyaa gara Naayjeeriyaa Magaalaa Leegoositti taassisu gara lamaatti ol guddiseera. Ministitti Muummee Dr.Abiyyi Ahimad Miseensota Mana Mareetiif deebii fi ibsa kaleessa kennaniin damee tajaajilaan guddinaa fi bu’aa galmaa’an keessaa argarsiistuun tokko Daandii Qilleensaa ta’uu ibsaniiru. Daandiin Qilleensichaa bara baajataa qabametti xiyyaarota dabalataa 13 bituun baay’ina xiyyaarota walii galaa 180n ga’uu eeruun isaanii ni yaadatama. Bakeewwan gahumsaa haaraa 6 dabaluun walii gala baay’ina bakkeewwan gahumsaa gara 136 guddisuu fi bara Baajatichaatti Balaallii biyya keessaa fi biyya Alaan Imaltoota Miiliyoona 19 ol Geejibsiisuu isaa fi kunis jijjiiramaa dura kan ture waliin yeroo Madaalamu dachaa ol dabaluu dubbataniiru. Sagantaan balallii dabalataa guyyaa guyyaa gara Magaala Daldalaa Leegoositti taassisuuf qophaa’eera. Hojii gaggeessaa Olaanaa Ministeera Aviyeeshinii fi Eeyroospeesii Naayjeeriyaa Dr.Ibraahim Kaanaa, bakka bu’oonni Abbaa Taayitaa Sivil Aviyeeshinii Naayjeeriyaa, Dhaabbileen Daawwachiiftotaa, fi qooda fudhattoonni biroon Saganticha irratti argamaniiru. Daandii Qilleensa Itiyoophiyaatti hojii gaggeessaa Olaanaan Damee Naayjeeriyaa Fireehiywoot Mokonnin TIO’f akka ibsanitti, daandiin Qilleensichaa Balallii Imalttootaa gara Magaalota Abuujaa, Leegoos, kaanoo fi Innuuguutti torban guutuu taassisaa jiraachuu ibsaniiru. Daandiin Qilleensichaa Magaalota Abujaa, Leegos fi Kaanoo torban guutuu akkasumas, Innuuguutti torbanitti yeroo 3 akka balali’u dubbataniiru. Balallii guyyaa guyyaa Leegositti taassisu torbanitti gara 2 ol guddisuun lakkoofsa balallii Magaalittiitti torbanitti taassisu gara 14tti guddisuu ibsaniiru . Kunis Daandiin Qilleensichaa lakkoofsa Balaallii Imaltootaa gara Magaalota Naayjeeriyaatti taassisu gara 31tti ol guddiseera jedhan hojii gaggeessichi. Imaltoonni balallii gara leegositti sa’aatii filatanitti akka balali’an kan taassisu yoo ta’u , Naayjeeriyaan walitti hidhamiinsa geejibaa ishee akka babal’iftu filannoo dabalataa kan uumu taa’uu ibsaniiru. Afriikaa keessaa Naayjeeriyaan bakka gahumsaa guddaa daandii qillensa Itiyoophiyaa ta’uu kan ibsan hojii gaggeessituun kun, baay’ina Imaltootaan, lakkoofsa balalliin humna gabaa guddaa qabdi. Balallii Idilee Imaltootaan alattis Daandiin qiilleensaa Itiyophiyaa torbanitti balallii kaargoo 30 ol akka taassisu eeraniiru. Dameen Aviyeeshinii Itiyophiyaa fi Naayjeeriyaa hariiroo yeroo dheeraa qabaachuu ibsuun, daandiin Qilleensichaa A.L.Atti Sadaasa 1960 balallii eegaluu fi kunis Naayjeeriyaan Kolonii jalaa baatee baatii tokkoo booda ta’uun seenaa qabeessa kan taassisu ta’uu dubbataniiru. Daandiin qilleensichaa Damee Aviyeeshinii Naayjeeriyaaf deeggarsa adda addaa taasisaa jiraachuu ibsaniiru. Daandiin qilleensichaa Biyyoota Afriikaa bakkeewwan gahumsaa hedduutti babal’isuun isaa guddina Aviyeeshinii Ardiitiif qooda guddaa qaba. Daandiin qilleensaa Itiyoophiyaa Naayjeeriyaa irra gara Finfinneetti kan dhufan dabaluu, lakkoofsa balallii guddisuu, bakkeewwan gahumsaa haaraatti balali’uu fi yeroo turtii Imaltootaa Guddisuun galii Tuurizimii guddisuu irratti xiyyeeffannoon hojjetama jechuun ibsaniiru. Daandiin qilleensichaa A.L.A. Sadaasa 2025 Balallii Gara Naayjeeriyaatti Eegale Waggaa 65ffaa Isaa Kabaja. Daandiin Qilleensa Itiyoophiyaa Afriikaa keessaa bakkeewwan gahumsaa 65 ol qabu. Itti Aanaan Pirezidaantii Federaalaa Naayjeeriyaa Kashiim Shetiimaa tibbana daawwanaa Itiyophiyaatti taassisuun dhimmoota ijoo biyyoota lamaanii fi Ardii Irratti Ministira Muummee Dr,Abiyyi Ahimad Waliin Marii’achuun isaanii ni yaadatama.