Onkoloolessa 26/2019 (ENA)- Hirmaattonni yaa’ii Paartilee Siyaasaa Afrikaa 2ffaa, yaa’iisaa akka ardiitti Finfinneetti gaggeessaa jiran cinaatti, Waajjira Muummee Paartii Badhaadhinaa daawwataniiru. Daawwannichaa irratti Daayirektarri Olaanaa Dhimmoota Hariiroo Idil-addunyaa Paartii Badhaadhinaa Obbo Nabiyyuu Sihuul garee jila daawwannaa kanaaf ibsa kennaniiru. Daayirektarri Olaanaa kun ibsa isaaniin caasaa gurmaa'inaa, hojiiwwan siyaasaa fi riifoormii Paartii Badhaadhinaa, akkasumas yaadama Ida'amuu bu'uura godhachuun Itoophiyaan dameewwan hawaasummaa fi dinagdee keessatti milkaa'inoota itti fufiinsa qaban galmeessaa jirtu ibsaniiru.   Hirmaattonni yaa’ichaa waajjira muummee paartichaatti turtii taasisan keessatti sochii hojii waliigalaa paartichaa, sirna hojii ammayyaa fi caasaa dijitaalaa isaa daawwataniiru. Kana waliin walqabatee, paartilee siyaasaa gidduutti tumsa ardii fi hariiroo gama hundaan jiru cimsuun kan danda'amu irratti dhimmoota ijoo waliinii ilaalchisee mariin bu'aa qabeessa ta'e gaggeeffameera. Hirmaattonni yaa’ichaa gama isaaniitiin ibsa waliigalaa waajjira muummee paartichaa keessatti isaaniif kennameen gammachuu itti dhaga'ame ibsaniiru. wal-Jijjiirraan muuxannoo akkanaa biyyoota Afrikaa gidduutti walitti dhufeenya siyaasaa fi misoomaa sadarkaa olaanaatti ceesisuuf gahee guddaa akka qabu hubachiisaniiru. yaa’iin Paartilee Siyaasaa Afrikaa, dhaabbilee siyaasaa fi hoggantoota siyaasaa garaagaraa ardichaa keessatti argaman gidduutti tumsa cimsuu, ijaarsa sirna dimokiraasii saffisiisuu fi misooma waliinii Afrikaa gara fuulduraa bocuuf waltajjii ijoo ta'uun isaa ni beekama.

Onkololessa 26/2019 (ENA)- Itiyoophiyaa fi Chaayinaan hojii dabalataa toora baaburaa Itiyoo-Jibutii hojjechuuf kan oolu walii galtee deeggarsa maallaqaa mallatteessaniiru. Haala walii galtee mallatteeffameetiin toorri baaburaa kun fulla’insa, amansiisummaa fi saffisa hojii guddisuuf kan oolu doolaarri miil. 15 deeggarsa ni taasifama. De’eetaan ministira maallaqaa Tigisti Fissahaa fi Itiyoophiyaatti dippilomaatiin olaanaa embaasii Chaayinaa Liiyuu Ziiya’oguwaangi walii galtee kana mallatteessaniiru. Deeggarsi maallaqaa kun baabura elektiriikii guutummaatti hojiitti galchuuf kan gargaaran meshaawwan jijjiiramaa, nageenya toora muummee kan deeggaran meeshaalee hadiidaa fi buufataalee of keessatti qabata. Kana malees maashinaroonni sakatta’insaa fi suphaa hadiidaa idileef ajaajilan ni dhiheessu. Walii galteen kun tumsa misoomaaa fi dinagdee Itiyoophiyaa fi Chaayinaa kan agarsiisu ta’uu odeeffannoon ministeera maallaqaa ni mul’isa.

Onkoloolessa 26/2019 (ENA) -Finfinneen magaalaa muummee Itiyoophiyaa qofa osoo hin ta’iin, magaalaa muummee Afriikaanotaa, wiirtuu marii, tumsaa, dippilomaasii fi furmaanni waloo Afriikaanotaa keessaa maddan ta’aa dhufteetti. Ilaalama mootummaa Ida’amuu keessatti guddinni misooma magaalotaa Finfinneen yeroo gabaabaa keessatti galmeessite, bifa magaalattii jijjiiruu bira darbee dandeettii idil-addunyaatti bakka filatamaa ta’uu ishee guddisuu danda’eera. Kooridooroonni magaalotaa ammayyaa, misoomni qarqara laggeenii, misoomni magariisaa fi bu’uuraaleen geejjibaa magaalattii bakka taateewwan idil-addunyaa itti gaggeeffamaniif filatamaa taasisaa jiru. Finfinneen hoggantoota Afrikaa, dhaabbilee idil-addunyaa, invastaroota, turistootaa fi michoota misoomaa walitti fiduu qofa osoo hin taane, giddugala marii fi tumsa waliinii ardii Afrikaa taateetti. Kunis turizimii konfiraansii, sochii dinagdee fi carraa hojii guddisuu keessatti gahee olaanaa qaba. Kanaafis, paartileen siyaasaa Afrikaa golambaa Yaadannoo Injifannoo Adwaa seena-qabeessa ta’e keessatti walgahii isaanii gaggeessuun hiika seenaa fi ardii bal’aa qaba. Adawaan mallattoo tokkummaa, bilisummaa, gootummaa fi dandeettii ofiin of murteessuu ummattoota Afrikaati. Bakka seenaa qabeessa kanatti humnoonni siyaasaa Afrikaa walitti dhufuun isaanii injifannoo waliinii darbe yaadachuu qofa osoo hin taane, rakkoolee waliinii ardichaa marii, waliigaltee fi tumsa waliin furuuf kutannoo qabaachuu isaanii agarsiisa. Finfinneen duudhaa seenaa fi aadaa ishee misooma magaalaa ammayyaa wajjin walitti qindeessuun giddugala taateewwan siyaasaa, dipilomaasii, dinagdee, aadaa fi saayinsii ta'uu ishee cimsaa jirti. Finfinneen magaalaa addunyaan keessatti wal argu, irratti mari'atuu fi furmaata waliinii itti maddisiiu; magaalaa Afriikaanotaati!

Onkololessa 26/2019 (ENA): Daarektarri Olaanaa Tajaajila Odeeffannoo fi Nageenya Biyyaalessaa fi Dura Taa’aan Boordii Abbaa Taayitaa Miidiyaalee Itiyoophiyaa Ambaasaaddar Reedwaan Huseen, miidiyaalee fi ogeessonni miidiyaa hojii isaanii keessatti faayidaa biyyaalessaaf dursa kennuu akka qaban ibsaniiru. Sirni eebbaa Giddugala Gahumsa Miidiyaa Itiyoophiyaa Abbaa Taayitaa Miidiyaa Itoophiyaan ijaarame gaggeeffamaa jira. Sirna eebbaa kanarratti Daarektarri Olaanaa Tajaajila Odeeffannoo fi Nageenya Biyyaalessaa fi Dura Taa’aan Boordii Abbaa Taayitaa Miidiyaalee Itiyoophiyaa Ambaasaaddar Reedwaan Huseen, miseensonni Mana Maree Bakka Bu’oota Ummatootaa fi hoggantoonni miidiyaa adda addaa, akkasumas keessummoonni affeeramanii argamaniiru. Giddugalichi dandeettii damee gaazexeessummaa fi miidiyaa cimsuuf kan kaayyeffate yoo ta’u, beekumsa, dandeettii fi naamusa gaazexeessitootaa fi hoggantoota miidiyaa fooyyessuunis kaayyoo isaa keessaa isa tokkodha. Qorannoodhaan damee miidiyaa deeggaruun leenjii itti fayyadama teeknooloojii guddisu argachuun galma giddugalichaa isa biraati. Oduu sobaa fi haasaa jibbiinsaa adda baasuuf ummataaf hubannoo uumuun hojiiwwan giddugalichi raawwatu keessaa isa tokko. Ambaasaaddar Reedwaan Huseen, akka ibsanitti Bilisummaan dubbii itti gaafatamummaa waliin wal cinaa deemuu qaba jedhan. Ambaasaaddarichi akka jedhanitti, mootummaan haala mijataa uumuuf waan guddaa hojjechuu eeranii; adeemsa kana keessatti warri seera hordofan yoo jiraatanillee muraasni seera bu’uuraa hin hordofne akka jiran hubachiisaniiru. Hojimaata diriirfameen alatti qaamota hojjetan hordoffiin seeraan akka walsimsiisu taasifamaa jira jedhan. Ogeeyyiin miidiyaas ta’e dhaabbileen hojii isaanii tamsaasuun dura fedhii Itiyoophiyaa fi dantaa ummataatiin madaalamuu akka qaban cimsanii dubbataniiru. Adeemsa ijaarsa biyyaa keessatti gaheen ijaarsa miidiyaa murteessaa ta’uu hubachiisuu, kana keessatti dhaabbilee fi ogeessonni miidiyaa gahee olaanaa akka qaban ibsaniiru. Daarektarri Olaanaa Abbaa Taayitaa Miidiyaalee Itiyoophiyaa Haymaanot Zallaqaa gama isaaniitiin giddugalichi leenjii kennuuf qophii xumuruusaa akeekuun, yeroo dhiyootti leenjii kennuu akka eegalu ibsaniiru. Kanaafis moojuulonni leenjii barbaachisoo ta’an qophii ta’uu ibsanii, leenjiin hubannoo namtolcheen gargaaramanis ni kennama jedhaniiru. #Biyya Guddoo, Ummata Guddaa # Mul'ata Guddaa #Mootummaa Ida’amuu

Bunni wiirtuu jireenya guyyaa guyyaa ummata Oromoo qofa osoo hin taane; eebba guddaa hiika hafuuraa, hawaasummaa fi falaasama gadi fagoo qabudha. Ummata Oromoo biratti bunni akka dhugaatii idilee qofaatti kan ilaalamu osoo hin taane, walitti dhufeenya seenaa gadi fagoo kan qabudha. Ummanni Oromoo bunaa fi nagaa adda baasee hin ilaalu;kanaafidha bunaa fi nagaa hin dhabiinaa jedha. Kanaaf Bunni akka nageenyaatti ilaalama. Ummanni Oromoo aadaa, duudhaa fi safuu gabbataa kan qabu yoo ta'u, jireenya isaa keessatti wantootni hafuu hin qabne hedduu ni jiru. Isaan keessaa bunni iddoo olaanaa fi addaa qaba. Bunni Oromoo biratti dhugaatii qofa miti; mallattoo kabajaa, nagaa, jaalalaa, tokkummaa fi araaraati. Oromoon buna waliin hidhata jireenyaa fi safuu cimaa qaba. Fakkeenyaaf, yeroo makmaaku, "Bunaa fi nagaa hin dhabiinaa" jedhee eebbisa. Eebbichi kun bu'uura jireenyaa fi nagaa waan ta'eef, bunaafis dursa kenna. Aadaa hawaasummaa Oromoo keessatti keessummaan yeroo mana namaa dhaqu, kabajni guddaan kennamuufii fi nagaa gaafachuun cinaatti, "Buna siniif dhaabna" ykn "Buna siif danfisna" jedhamee simatama. Kunis keessummaaf qalbii bal'aa, simannaa hoo'aa fi jaalala qaban kan argisiisudha. Jila, ayyaana ykn sirna kamirraattuu bunni iddoo olaanaa qabaata; jilli buna malee guutuu hin ta'u. Aadaa Oromoo keessatti buna qalaa jedhamee kan beekamu iddoo guddaa qaba. Kana malees, bultii guyyaa guyyaa keessatti hojiin guyyaa kan jalqabamu buna dhaabbachuunii fi eebbifataniidha. Namni hojiidhaaf deemu ganama barii buna dhugee eebba maatiitiin karaa saaqqata; akkasumas galgala hojiidhaa yeroo deebi’anis dhiphina guyyaa sanaa boqochuuf buna waliin dhuguun baramaadha. Bunni hariiroo hawaasaa cimsa. Bunni qofaa hin dhugamu. Buna Maatiin walitti qabamee qofaa isaa dhuga osoo hin taanee, ollaanii fi firoottanis akkaataa walitti dhiyeenya isaaniitiin waliin taa’anii buna dhugu. Yeroo kana walitti dhufeenyi hawaasummaa, jaalallii fi waliif yaaduun ni cima. Maatiinii fi ollaan buna waliin dhugaa, dhimma hawaasummaa, rakkoo fi waan garaa garaa irratti mari’atu; mariidhaanis furmaata walii kennuun dhimma waloo dhalootaa dhalootatti ceesisu. Dabalataan, bunni aadaa Oromoo keessatti araarsituu cimaa ta'ee tajaajila. Namoota gidduutti wal dhabdeen yeroo uumamu, maanguddoonni biyyaa araara buusuuf buna dhaabsifatu. Buna walii wajjin dhuguun miira jibbaa balleessisee garaa walii laaffisa. Sirna gurguddoo kan akka jaarsummaa ergachuu ykn gaa’elaaf deemuu fi kkf irrattis bunni ni dhaabbata ykn ni danfisama; kunis milkaa’ina dhimmichaa fi eebba maatiitiif mallattoo ta'a. Walumaagalatti, bunni ummata Oromoo biratti dhugaatii idilee qofa osoo hin taane, utubaa duudhaa, eenyummaa, safuu fi tokkummaa hawaasichaa ti. Jireenya guyyaa guyyaa irraa eegalees hanga sirna gurguddoo jilaa fi araaraatti, bunni iddoo olaanaa qaba. Oromoon jireenya isaa keessatti nagaa, jaalalaa fi walqixxummaa ibsuuf buna fayyadama. Kanaafuu, hariiroon bunni Oromoo waliin qabu kan baroota dheeraaf dhalootaa dhalootatti darbe, kabajaa fi jaalala guddaan kan eegamu dha. Itoophiyaan addunyaaf wantoota hedduu gumaachiteetti. isaan keessaa bunni isa tokkodha. Bunni kennaa uumamaa guddaa Itoophiyaan addunyaaf laatte keessaa tokko ta'e, aadaan buna dhuguu ummata Itoophiyaa mara birattillee haala kabaja guddaa qabuun kan beekamudha. Itoophiyaan lafa argama bunaa ta'uun addunyaa irratti maqaa guddaa qabdi. Bunni ishees buna orgaanikaa jedhamuun gabaa aadunyaa irratti jaalatamaa fi kabaja guddaa qaba. Aadaa kana keessatti, sabaa fi sablammoonni Itoophiyaa hundi buna akka aadaa fi duudhaa abootii irraa dhaalaniin walitti dabarsaa ulfina kennaafii waliin dhugu. Naannoolee biyyattii garaagaraa keessatti sirni qophii bunaa garagara ta’us kaayyoon isaa garuu tokkuma. Innis kabajaa keessummaa, araara buusuu, fi jaalala jajjabeessuudha. Bunni hawaasummaa cimsee, walii-galtee fi wajjin-jiraachuu saboota biyyattii jiran kan calaqqisiisu dha. Kanaafuu, bunni lafa kanarraa ka’ee addunyaa maratti urgaa’uun isaa qofa utuu hin ta’iin, biyya keessattis simboo tokkummaa fi aadaa gabbataa sabaa fi sablammoota Itoophiyaa ta’ee tajaajilaa jira. #Biyya Guddoo, Ummata Guddaa # Mul'ata Guddaa #Mootummaa Ida’amuu