Amajjii 20/2018 (ENA)- Gamtaan Afriikaa fi Ameerikaan carraalee dinagdee fi daldalaa bal’isuudhaan Afriikaa badhaate ijaaruuf tumsaan akka hojjetan ibsan. Dura taa’aan komishinii gamtaa Afriikaa Mahaammud Alii Yusuuf dhimmoota nageenyaa fi misoomaa tumsaan hojjechuun danda’amurratti itti aanaa ministira dhimma alaa Ameerikaa Kiriistoofar Tii Landawu walaiin mari’achuun ibsa wlaoo kennaniiru. Dura taa’aan komishinii gamtaa Afriikaa Mahaammud Alii Yusuuf, Afriikaan ardii kennaawwanii fi qabeenya hedduun guutamtedha jedhaniiru. Qab Carraalee dinagdee fi daldalaa bal’isuudhaan Afriikaa badhaate ijaaruuf tumsaan ni hojjenna eenya Afriikaan qabdu fayyadama lammiisheef oolchuuf hojiilee hojjetaman keessatti ardiin Afriikaa tumsa beekumsaa, ogummaa, gabbisa dandeettii fi teeknooloojii Ameerikaa ni barbaaddi jedhaniiru. Biyyoonni miseensa gamtichaa dandeettii keessoo isaanii cimsuudhaan, karaa hawaasa siviilii fi daldalaatiin sagantaalee misoomaa maallaqa ofiisaaniitiin deeggaruudhaan dandeettii abdi qabeessa guddifachaa akka jiran dubbataniiru. Sirni dippilomaasii fi tumsaa gama hedduu cimee itti fufuu haala danda’amurratti mari’achuusaaniis ibsaniiru. Itti aanaa ministira dhimma alaa Ameerikaa Kiriistoofar Tii Landawu gamasaaniin, gamtaan Afriikaa nageenyaa fi misooma dinagdee Afriikaa mirkaneessuuf biyyoota miseensaa waliin ta’uun qooda olaanaa bahaa jira jedhaniiru. ​Gamtaan Afriikaa fi Ameerikaan dhimmoota nageenya waloo, nageenyaa fi badhaadhina ilaalchisee dhimmoota tumsaan hojjechuu danda’anirratti marii gaarii gochuusaanii ibsaniiru. Afriikaan badhaate jiraachuunshee Ameerikaafis faayidaa akka qabu eeranii, carraalee dinagdee fi daldalaa dilbii qabdu waloomaan faayidaarra oolchuuf ni hojjenna jedhaniiru. Ameerikaan qajeelfama fayyadama waloo jedhu akka qabdu kaasuun, carraalee guddina dinagdee guddisuuf kutannoon akka hojjettu mirkaneessaniiru. Daawwannaan ajajaa Izzii Afriikaa Jeneraal Andarsan waliin taasisanis kutannoo Ameerikaan nagaa fi tasgabbii ardii Afriikaa eegsisuuf qabdurraa kan maddu akka ta’e himaniiru. Afriikaanonno rakkoosaanii ofumasaaniin furuu akka danda’an dubbatanii, eenyuyyuu dhimma keessoo Afriikaa keessa galuu akka hin qabaanne ni amanna jedhaniiru.

  Amajjii 20/2018(ENA)-Yaa’iin Hoggantoota Gamtaa Afriikaa 39ffaan milkaa’inaan akka gaggeeffamuuf qophii barbaachisaa taasisuu Poolisiin Federaalaa Itiyoophiyaa beeksise. Itti Aanaan Komishinar jeneraalaa Ajajaa qajeelcha waliigalaa Ittisa yakkaa Poolisii Federaalaa Itiyoophiyaa Malaakuu Faantaa ENA waliin turtii taasisaaniin, walga’iiwwan gurguddoo Addunyaa Magaalaan Finfinnee keessummeessitu milkaa’inaan akka xumuramaniif dhaabbatichi kutannoon hojjechaa jiraachuu ibsaniiru. Baatiiwwan ja’an darban walga’iin hoggantoonni biyyoota adda addaa, Hogganttoonni dhaabbilee Idil Addunyaa fi Dippiloomaatonni olaanoon hedduun irratti hirmaatan magaalichati gaggeeffamuusaa ibsaniiru. Waltajjiiwwan kunneen rakkoo tokko malee Milkaa’inan xumuramuun haala qophii poolisii fi dhaabbilee nageenyaa biroo kan agarsiisu ta’uu eeraniiru. Itiyoophiyaan waltajjiiwwan gurguddaa Hoggantootni biyya Alaa hedduu fi Miseensi Hawaasa dippiloomaatikii irratti hirmaatan qopheessuuf muuxannoo guddaa qabaachuushee eeraniiru. Yaa’iin Gamtaa Afriikaa 39ffaan Magaalaa Finfinneetti Milkaa’inaan gaggeessuuf qophiiwwan barbaachisoon yaa’ichaan dura raawwatamuu qaban milkaa’inaan Xumuramuu ibsaniiru. Nageenya Hoggantootaa fi keessummoota biyyoota adda addaarraa yaa’ichaarratti hirmaachuuf gara Finfinneetti dhufan haala Amansiisaa ta’een eeguu, sochii nageenyaa fi tiraafikaa qindeessuun dhimma murteessaa ta’uu dubbataniiru. Qaamolee Nageenyaa biroo waliin qindoomuun haala sadarkaa biyyattii gituun tasgabbii biyyattii mirkaneessuuf hojiin nagaa fi tasgabbii qindominaan akka raawwatamu ibsaniiru. Yeroo keessummoonni gara biyyaatti seenanii eegalee hanga yaa’icha xumuranii gara biyyasaaniitti deebi’anitti eegumsaa fi tajaajiloota barbaachisoo biroo si’ataa fi amansiisaa kennuuf qophiin xumuramuu beeksisaniiru. Yaa’iin Hoggantyoota Gamtaa Afriikaa waltajjii Dippiloomaasii guddaa waggaa waggaan Magaalaa Finfinneetti gaggeeffamu yoo ta’u, qophiin qaamolee nageenyaa milkaa’ina yaa’ichaaf shoora olaanaa bahata jedhaniiru. Yaa’iin Hoggantoota Gamtaa Afriikaa 39ffan Guraandhala 7 fi 8 bara 2018 mata duree“dhiheessii Bishaanii fulla’aa fi sirna eegumsa qulqullinaa nageenyisaa eegame mirkaneessuun, Milkaa’ina galma ajandaa bara 2063f” jedhuun Waajjira Muummee Gamtichaa Magaalaa Finfinneetti gaggeeffama.

Amajji 19/2018(ENA) - Naannoo Harariitti bu’aalee damee hundaan galmaa’an itti fufsiisuuf xiyyeeffannoon hojjetamuu akka qabu Pireesidaantiin bulchiinsa mootummaa naannoo Hararii Ordiin Badirii ibsani. Manni Maree Biyyaalessaa Naannoo Hararii Yaa’ii idilee 1ffaa marsaa 6ffaa, waggaa 5ffaa guyyaa har’aa gaggeesseera. Konfiransiin kun hojiiwwan ji’oota jahan darban gama kunuunsa hambaalee fi hojiiwwan guddina afaan Hararii irratti hojiilee hojjetaman karaa waajjiraalee hambaalee aadaa, turizimii fi biiroolee barnootaa naannootiin hojjetaman gamaaggameera. Obbo Ordiin Badiriin wayita sana akka jedhanitti, dameelee hundaan baatiiwwan jahan darbanitti hojiilee hojjetaman bu’aa qabeessa dha. Naannichatti kunuunsa hambaalee fi afaan Hararii guddisuuf hojiileen hojjetaman kan jajjabeeffamani dha jedhaniiru. Keesattuu hambaa idil addunyaa kan ta’e Jagool eeganii tursiisuun dhalootaaf dabarsuun kuni hojii bu’a qabeessa ta’uu eeraniiru. Naannichatti hojiileen misoomaa hojjetamaa jiran kan fayyadamummaa hawaasummaa fi dinagdee kan mirkaneessanii fi lammiileef abdii kan kennan ta’uu ibsaniiru. Haa ta’u malee hojiilee misoomaa naannichaa gufachiisuuf humnoonni socho’an jiraachuu eeruun, finxaaleyyii kanneen irratti qabsaa’uun hojiilee misoomaa jalqabaman cimsinee itti fufna jedhani. Kanaafuu hojiilee misoomaa jalqabaman irratti tokkummaa yaadaa fi ilaalchaa dagaagsuunii fi hawaasa hojii misoomaa eegalame irratti abbummaan keessatti hirmaachisuun hojiileen hojjetamaa turan cimanii itti fufuu akka qabanis dubbataniiru. Waltajjichi dhimmoota adda addaa irratti mari’achuun murteewwan garagaraa dabarsuun xumurameera.

Amajjii 19/2019(ENA)- Bu’aaleen teeknooloojii loltummaa eksipoo human qilleensaa Itiyoophiyaa irratti mul’atan abjuu olaantummaa Itiyoophiyaa bara fagoo dhiheenyatti qabatamaan akka akka milkeessinu kan mirkaneessanidha jedhan itti aanaan ministira muummee Tamasgeen Xurunaa. Itti aanaan ministira muummee Tamasgeen Xurunaa eksipoo humna qilleensaa idil addunyaa daawwataniiru. Itti aanaan ministira muummee ergaa dabarsaniin imalli waggoota 90 humna qilleensaa Itiyoophiyaa injifannoo fi gootummaan qofa kan daangeffame hin turre, bu’aa kalaqaa fi olaantummaa teeknooloojii illee of keessaa qaba. Eksipoo human qilleensaa idil addunyaa waajjira muummee human qilleensaatti baname irratti wanti argine kanuma mirkaneessa jedhaniiru. Bu’aaleen teeknooloojii loltummaa eksipoo kanarratti argine abjuu olaantummaa bara dheeraa dhiheenyatti qabatamaatti akka milkeessinu kan mirkaneessanidha jedhaniiru itti aanaan ministira muummee ergaa dabarsaniin.

Amajjii17/2018(ENA)- Humni Qilleensaa Itoophiyaa waggoottan 90f cichoomaan Daangaa qilleensa hin sarbane eeguun seenaa birmadummaa samiirratti barra’e, mallattoo birmadummaa fi tokkummaa baraa baratti ce’e dhajechuun Itti Aanaa Ministira Muummee Tamasgeen Xurunaa ibsan.   Humna qilleensaa Itiyoophiyaaf samiin daangaa isatti ta’ee hin beku, Ashaaraa gootummaasaa kan itti mul’isu, gahumsa isaa kan itti madaaluu fi Dirree taphaa birmadummaa biyyaa kan itti labsudha jedhan Itti Aanaan Ministira Muummee ergaa fuula miidiyaa Hawaasummaasaaniin dabarsaniin.   Qajeelfamsaa “Samiin kan keenyadha” jedhuun waggaa 90ffaa labseera. Sagaltamni lakkoosaan oli kan jennu sababa malee miti.

Amajjii 16/2018 (ENA)- Humni qilleensaa Itiyoophiyaa humna biyyaalessaa kan agarsiisuu fi boona biyyaalessaaf agarsiiftuu ta’uu ajajaan olaanaa human qilleensaa Itiyoophiyaa Letenaal Jeneraal Yilmaa Mardaasaa ibsan. Kabajni wagga 90ffaa human qilleensaa Itiyoophiyaa ministira muummee doktar Abiyyi Ahimad dabalatee keessummoonni olaanaa biyyoota garagaraa bakka argamanitti dammaqinaan gaggeeffamaa jira. Ayyaana hundeeffamaa kana ilaalchisuun agarsiifni qilleensarraa dinqisiifatamaan “Xuqur Anbassaa” jedhamuun beekamu gaggeeffamaa jira. Ajajaan olaanaa human qilleensaa Itiyoophiyaa Letemnaal Jeneraal Yilmaa Mardaasaa wayita kana akka dubbatanitti, sagantaan kun kabaja ayyaana wagga 90ffaa qofa osoo hin ta’iin, tajaajila biyyaalessaa cimaa fi agarsiiftuu ga’oomaa wagga sagaltamaati. Waggoottan 90 darbaniif humni qilleensaa Itiyoophiyaa dahannoo birmadummaa Itiyoophiyaa isa cimaa ta’ee turuusaa ibsaniiru. Biyyoota Afriikaarraa Itiyoophiyaan humna qilleensaa hundeessuun adda duree ta’uushee, ergamoota nagaa kabachiisuu deeggaruushee fi humnoota faayidaa biyyaalessaashee dura dhaabbachuu barbaadan mogolee kan buufte ta’uu dubbataniiru. Ayyaanni hundeeffama waggaa 90ffaa fi agarsiifni qilleensarraa Xuqur Anbassaa kun agarsiiftuu boonuu Itiyoophiyaa fi ga’ooma balallii qabatamaan kan mirkaneessu ta’uu ibsaniiru. Ajajoonni human qilleensaa Afriikaa fi biyyoota garagaraa argamuu isaaniitti kan boonan ta’uu Letenaal Jeneraal Yilmaa Mardaasaa ibsanii, qaamolee milkaa’ina kanaaf deeggarsa taasisan hunda galateeffataniiru. Agarsiifni qilleensarraa kun maqaa gaarii Itiyoophiyaa sadarkaa idil addunyaatti kan ijaaru ta’uu eeranii, Kaadhimamtoonni waan abjootan arguuf cimanii akka hojjetan, lammiileenis carraa teeknooloojii egeree biyyasaaniitti akka abdatan kan godhu ta’uu ibsaniiru. Humni qilleensaa Itiyoophiyaa agarsiiftuu dandeettii biyyaalessaa, biyyi kan itti boonuu fi barbaadamummaa idil addunyaa guddisuuf meeshaa tarsiimawaa ta’uusaas hubachiisaniiru. "Kan darbetti ni boonna, kan ammaatiin nigaggeeffamna, kan fuulduraa ni bocna” kan jedhan Letenaal Jeneraal Yilmaa Mardaasaa, sagantichi agarsiiftuu cehumnsa industirii fi tumsa waloo ta’uu ibsaniiru. Dabalataanis ayyaanni kun milkaa’ina bu’ura misoomaa akkasumas agarsiiftuu dandeettii human qilleensaa dhaloota afraffaa fi shanaffaa ta’uu eeraniiru. Miseensonni human qilleensaa halkan hedduu hirriba malee dabarsanii dandeettii Itiyoophiyaa qabatamaan waan agarsiisaniif galata guddaa qabu jedhaniiru. Deeggartoonni idil addunyaa sagantaa kanatti hirmaachuunsaanii hariiroo keenya cimsuun tumsa waloo keenya guddisuu fi dandeettii human qilleensaa amansiisaa ta’e ijaatuuf haalli mijataan akka uumamu ibsaniiru.

Amajji 16/2018(ENA) - Humni Qilleensaa Itiyoophiyaa humnoota Itiyoophiyaa qaanessuu barbaadaniif dawaa amansiisaa ta’uun biyya kan dhaabe dha jedhani Ministirri Muummee doktar Abiyyi Ahimad. Agarsiisni Qilleensaa Leenca Gurraacha waggaa 90ffaa Humna Qilleensaa Itiyoophiyaa bakka Ministirri Muummee doktar Abiyyi Ahimad argamanitti kabajameera. Wayita sanatti Ministirri Muummee doktar Abiyyi Ahimad, humni qilleensichaa waggoota 90 kana keessatti bu’a bahii hedduu dabarsuu eeraniiru. Humni Qilleensaa Itiyoophiyaa humnoota Itiyoophiyaa qaanessuu fi weeraruu barbaadaniif dawaa amansiisaa ta’uun biyya kan dhaabe dha jedhani. Akkasumas, Itiyoophiyaa bira darbee, bara xumura bulchiinsa koloneeffataa, naannoo qilleensaa Taanzaaniyaa kan eege, kan Afrikaanota boonsu dha jedhaniiru. Humni qilleensichaa meeshaalee ammayyaa kan hidhate,gahumsa olaanaa irratti akka argamus ibsaniiru. Nuti Itiyoophiyaatiin ala haadha hin qabnu kan jedhan ministirri muummee,Itiyoophiyaan haadha keenya bakka bu’insa hin qabne ta’uu hubannee ulfina biyyaaf waliin hojjechuu qabna jedhaniiru. Humni qilleensaa Itiyoophiyaa waggoota 5’n dhufan keessatti humna amma qabu dachaan dabaluuf ammas xiyyeeffannoon hojjetamaa jira jedhan. Itiyoophiyaan bara kana guddina dhibbentaa 10.3 akka galmeessitu raawwiin hojii ji'a ja'aa ni argisiisa jedhan. Guddinni kun kan argamu immoo dhaabbilee waraanaa fi nageenyaa ciccimoo ijaaruudhaan akka ta’es ibsaniiru. Itiyoophiyaan biyya kaleessa irra dhaabbatte miti kan jedhan Ministirri Muummee, Humni Qilleensaa Itiyoophiyaa dandeettii yeroon gaafatu kan gonfate dha jedhani. Nuti kan namaa hin barbaannu;kan keenyas hin kenninu jedhan. Kan nutti kennames yoo jiraate isaaniif deebisuun keenya hin oolu jedhan.

Amajjii 16/2018 (ENA)- Bulchiinsi magaalaa Finfinnee aadaa hojii jijjiiruun halkanii fi guyyaa hojjechuun damee hundaan bu’aa ajaa’ibsiisaa galmeessuu danda’eera jedhani kantiibaan magaalaa Finfinnee Adaanach Abeebee. Bulchiinsi Magaalaa Finfinnee gamaaggama raawwii karoora hojii mootummaa fi paartii walakkaa waggaa jalqabaa bara 2018 har'a eegaleera.   Waltajjicharratti kantiibaa Adaanach Abeebee, Af-yaa'iin Mana Maree Magaalichaa aadde Buzeenaa Alkadir, Itti Gaafatamaa Waajjira Paartii Badhaadhinaa waajjira Damee Finfinnee obbo Mogos Baalchaa fi qondaaltonni olaanoo biroo argamaniiru. Baniinsa waltajjichaarratti kantiibaan magaalattii Adaanach Abeebee ji’oota jahan darbanitti pirojektoota damee hundaan karoorfame keessaa giddu galeessaan dhibbeentaa 95 ol xumuramuu ibsaniiru. Bu’aan kuni argamuu kan danda’eef bulchiinsichi aadaa hojii jijjiiruun halkanii fi guyyaa hojjechuun ta’uu eeraniiru. Bu’aawwan argamaniif inni ijoon hoggansi sadarkaan jiru qindoominaan waliin hojjechuun, jiraattonnii fi michoonni misoomaa si’oominaan hirmaachuun,akkasumas deeggarsa jiraattonni magaalittii hojiilee misoomaaf taasise ta’uu himaniiru.   Bu’aan misoomaa argame qindoomina qaamolee hundaa jiraattota magaalittii fi michoota misoomaa ta’uu eeraniiru. Waltajjiin kun ji’oota jahan itti aananiif dandeettii fi muuxannoo dabalataa kan itti horannuu fi jiraattota magaalaa keenyaa haala fooyya’anii fi amanamummaa guddaadhaan tajaajiluuf kan itti qophoofnudha jechuun ibsaniiru.