Adoolessa 20/2018 (ENA)- Itoophiyaan tumsa naannawaa cimsuun nageenyaa fi tasgabbii Afrikaaf gahee ishee bahachaa jirti jechuun ibsan qondaaltonni mootummaa Ruwaandaa. Akkaadamii Waraanaa Itiyoophiyaa kaadhimamtoota koorsii Matammaa marsaa 71ffaa leenjise eebbisiiseera. Akkaadamiin kun miseensota Raayyaa Ittisa Biyyaa Itiyoophiyaa qofa osoo hin taane, biyyoota Afrikaa garaagaraa irraa dhufanis leenjisee eebbisiiseera. Eebbifamtoota keessaa lammii Ruwaandaa kan ta’e itti aanaan ajajaa dhibbaa Negeenaa Luusii akkaadamiicha keessatti barnoota qalamaa fi gocha irratti hundaa'e argachuu isaanii ENA’tti himaniiru. Itiyoophiyaan yeroo waraana Kooriyaa, Riwaandaa fi hojii nageenya kabachiisuu biyyoota Afrikaa garaagaraa keessatti hirmaatte keessatti seenaa boonsaa galmeessiteetti jechuun ibsaniiru. Lammiin biyya Ruwaandaa Itti Aanaan ajajaa Dhibbaa Fireemootwaa Hiirwaa, akkaadamiicha keessatti barnootaa fi leenjii gochaa fi qalamaa hojii isaanii gahumsaan raawwachuuf isaan dandeessisu argachuu isaanii ibsaniiru. Itiyoophiyaan shororkeessummaa ittisuun nageenyaa fi tasgabbii addunyaatiif hojjechaa turteetti; akkasumas nageenyaa fi tasgabbii Afrikaaf adda duree ta'uun tajaajilaa jirti jechuun ibsaniiru. . Nageenya waaraa mirkaneessuuf tumsi biyyootaa murteessaa ta'uu isaa ibsanii, akkaadamii waraanaa Itiyoophiyaa keessatti leenjii argachuun isaanii Itiyoophiyaan nageenyaa fi tasgabbii naannawaaf tumsa taasistu kan agarsiisu ta'uu dubbataniiru.

Adoolessa 20/2018 (ENA)- Itiyoophiyaan riijinicha keessatti shororkeessummaa dura dhaabbachuunii fi nagaa buusuudhaan qooda adda durummaa bahachaa jiraachuushee hogganaan qajeelcha olaanaa lojistiksii ittisaa Letenaal Jeneraal Abdurahimaan Ismaa’el ibsan. Simpooziyeemiin lojistiksii fi komunikeeshinii Itiyoophiyaan Izzii Ameerikaa Afriikaa (AFRICOM) waliin ta’uun qopheessitu Finfinneetti eegalameera. Ministirri maallaqaa Injinar Ayishaa Mahaammad, ajajaan Izzii Ameerikaa Afriikaa Jeneraal Dagviin Andarsan, hogganaan qajeelcha olaanaa lojistiksii ittisaa Letenaal Jeneraal Abdurahimaan Ismaa’el, hoggantoonni raayyaa ittisaa biyyattii fi hoggantoonni waraanaa biyyoota Afriikaa garagaraa sagantaa kanarratti hirmaachaa jiru. Itiyoophiyaan riijinichaaf akkasumas nagaa fi tasgabbii Afriikaaf kutannoo qabdu yeroo dheeraa ta’uusaa hogganaan qajeelcha olaanaa lojistiksii ittisaa Letenaal Jeneraal Abdurahimaan Ismaa’el dubbataniiru. Itiyoophiyaan riijinicha keessatti shororkeessummaa dura dhaabbachuunii fi nagaa buusuudhaan qooda adda durummaa bahachaa jiraachuushee ibsaniiru. Sirna lojistiiksii fi komunikeeshinii guutuu ta’e mirkaneessuudhaan shororkeessummaa qolachuu fi nagaa buusuudhaan ergama milkaa’aa raawwatteetti jedhan. Sirni komunikeeshinii qindaa’aan yoo hin gurmoofne rakkisaadha kan jedhan hogganaan kun, xiyyeeffannoo damee kanaaf kennamu karaa yeroo waliin deemuun cimsuun akka barbaachisu ibsaniiru. Waltajjiin kun rakkoolee yeroo duulaa fi bobbii quunnaman furuuf tooftaa ammayyaa baasuuf carraa uumuuf ni gargaara jedhaniiru.

Adoolessa 19/2018 (ENA):Adeemsi marii biyyaalessaa aadaa waldhaggeeffachuufi waliigaltee waliinii cimsudhaan dhaloota egereef Itiyoophiyaa mijooftuufi cimtuu ijaaruuf bu'uura kan kaa’u ta'uu hirmaattonni mariichaa ibsaniiru. Mariin biyyaalessaa Itiyoophiyaa Ministirri Muummee Dr. Abiyyi Ahimad bakka argamanitti Adoolessa 8 bara 2018 Finfinnee Kokonveenshinii Idi-Addunyaa Addisitti eegalamuunsaa ni yaadtama. Mariin addaan qoodamiinsa tokko malee hunda hirmaachisee kun rakkoo waggoota dheeraaf ture karaa sirna qaroomina qabuun mari'achuun furmaata kennuuf marii seenaa qabeessa ta'eera. Kanaafis nagaa waaraafi misooma biyyaalessaaf bu'uura cimaa kan kaa'u akka ta'uu ni eegama. Hirmaattonni marichaa ENA’f yaada kennan marichi dhimmoota biyyaalessaa gurguddoo irratti waliigaltee waloo uumuun nagaa waaraafi guddina Itiyoophiyaa mirkaneessuf akka dandeessisu ibsaniiru. Hirmaattota keessaa obbo Salamoon Taaffasaa akka jedhanitti, mariin biyyaalessaa kutaa hawaasaa hundaa hirmaachisee waltajjii seenaa qabeessa mari'achuudhaan biyya nagaan itti fufsiisuu akka danda'amu ifatti kan agarsiisedha jedhaniiru. Iddoon sun wal dhabdee irratti ifaa fi bilisaan mari'achuuf carraa bal'aa kan uume ta'uu irraa kan ka'e waliigaltee dhugaa uumuuf kan dandeessisu ta'uu dubbataniiru. Kutaa Itiyoophiyaa hundarraa hirmaattonni kan argaman ta'uu irraa kan ka'e caalaatti wal beekuuf carraa kan uumu ta'uu ibsaniiru. Hirmaataan marichaa biroon obbo Natsaannat Xaasoo gama isaaniitiin, mariin biyyaalessaa sabaafi sab-lammootaafi qooda fudhattoota biroo hunda kan hammatu ta'uu isaa ifatti kan agarsiisudha jedhaniiru. Mariichi dhimmoota hedduu irratti haala tasgabaa'een mari'achuufi wal dhaggeeffachuudhaan hundi isaanii qixxee kan itti hirmaatan carraa gaarii kan uume ta'uusaa ibsaniiru. Marichi rakkooleen keenya durii kan itti furamuufi furmaata waaraa itti argatan iddoo seenaa qabeessa ta'uu kan dubbatan immoo hirmaataa mariichaa obbo Asaffaa Wadaajoo dha. Naannoowwan biyyattii garagaraa irraa kan walitti dhufan Itiyoophiyaanota dhimmoota waloorratti mari'achuufi tokkummaa saba-daneessummaa isaanii cimsuun itti fufsiisuuf carraa dinqisiisaa ta'uu kaasaniiru.  

Adooleessa18/2018(ENA)- Mani maree magaala shaggar yaa'ii idilee 14ffaa kurmaana 4ffaa bara 2018 har’a eegalera. Yaa'iicharratti gabaasni raawwii hojii qaama raawwachiiftuu kan bara 2018 fi kallattiin karooraa bara 2019 akkasuma gabaasni raawwii hojii qaama seera hiiktuu miseensota Mana Marichaaf dhiyaachuun irratti ni mari'atama. Af-yaa'ii Mana Maree Magaalaa Shaggar Obbo Qaabatoo Albee yaa’icha bananiiru.. Manni marichaa yaa'ii isaa kanaan qaboo yaa'ii idilee kurmaana 3ffaa mirkaneessuun ajandaawwan garagaraa irratti ni mari'ata. Afa-yaa'ii mana maree Magaalaa Shaggar kabajamoo Obbo Qaabatoo Albee akka ibsanitti, ajandaaleen yaa'ichaa gabaasa raawwii hojii qaama raawwachiisaa akkasumas raawwii hojii Mana murtii olaanaa Magaalaa Shaggar, Gabaasa raawwii hojii mana maree fi labsii taarifa galii mana qopheessaa Magaalaa Shaggar kan dhiyaatan ta'uu himaniiru. Sadarkaa Itti Aanaa Pirezidaantii Mootummaa Naannoo Oromiyaatti Kantiibaa Magaalaa Shaggar Dr. Tashoomaa Addunyaa, Itti gaafatamaa Waajjira Paartii Badhaadhinaa Damee Magaalaa Shaggarii fi Mana Maree Magaalaa Shaggaritti Bakka Bu'aa Mootummaa kan ta'an Obbo Alamaayyoo Tulluu dabalatee miseensonni Mana Marechaa fi Itti gaafatamtootni Waajjiraalee Magaalaa Shaggar yaa'ii kanarratti argamaniiru.

Adoolessa 18/2018(ENA)- Akkaadaamiin loltummaa Itiyoophiyaa Hoolotaa etaamaajoor shuumiin walii galaa humnoota waraanaa fiildi maarshaal Biraanuu Juulaa bakka argamanitti mooraa akkaadaamichaa Hoolotatti argamutti kan leenjise qondaaltota kaadhimamoo koorsii Matammaa 71ffaa eebbisiisaa jira. Etaamaajoor shuumiin walii galaa humnoota waraanaa fiildi maarshaal Biraanuu Juulaa, hogganaan qajeelcha olaanaa barnootaa fi leenjii ittisaa Jeneraal Yimar Mokonnon, ajajaan akkaadaamii loltummaa Itiyoophiyaa Birgaadiyeer Jeneraal Geetaachoo Habtaamuu, qondaaltonni jeneraalaa kabajamoo akkasumas ataasheewwan loltummaa biyyoota garagaraa sirna eebbaa kanarratti argamaniiru. Qondaaltonni kaadhimamoon leenjii Kanaan caalmaa argatan etaamaajoor shuumii walii galaa humnoota waraanaa fiildi maarshaal Biraanuu Juulaa sirni maaraga uwwisuu gaggeeffameera. Ajajaan akkaadaamii loltummaa Itiyoophiyaa Birgaadiyeer Jeneraal Geetaachoo Habtaamuu waltajjicharratti dubbiii dubbataniin, leenjiin eebbifamtoonni fudhatan cimina gaggeessummaa walii galaa kan gabbisu ta’uu ibsaniiru. Qondaaltonni kaadhimamoo beekumsaa fi ogummaa leenjicharraa argatan ergama dirqamaa raayyaa kamiyyuu bahachuuf kan isaan dandeessisu beekumsa isaan gonfachiiseera jedhaniiru. Miseensota raayyaa ittisaa Itiyoophiyaatiin alattis qondaaltonni kaadhimammoo biyyoota Afriikaa garagaraarraa dhufan leenjii xumuranii eebbifamuusaanii dubbataniiru.

Adooleessa 16/2018 (ENA): Adeemsi yaa’ii marii biyyaalessaa Itiyoophiyaa milkaa'inaan gaggeeffamaa jiraachuu komishinarri Olaanaan Komishinii Marii Biyyaalessaa Itiyoophiyaa Pirofeesar Masfin Ari'ayaa ibsan. Komishinara Olaanaan marii biyyaalessaa Pirofeesar Masfin Ari'aayaa ibsa miidiyaaleef kennaniin, mariichi ajandaawwan kennaman irratti bal'inaan mari'achuunii fi ibsa hayyootaan deeggaramuun milkaa'inaan gaggeeffamaa jira. Guyyoota darbanitti waltajjiiwwan marii gaggeeffamaniin hirmaattonni gareen qoodamuun ajandaawwan kennamaniif irratti gadi fageenyaan mari'achuu, wal-dhaggeeffachuu fi wal-kabajuun gara adeemsa yaada qindeessutti ce'uu isaanii ibsaniiru. Yaa’iin marii Adoolessa 8 bara 2018 irraa eegalee gaggeeffamuun hirmaattonni miseensota 50 fi 10n qoodamuun adeemsa yaada maddisiisuu fi cimsuu isa jalqabaa raawwachuu isaanii dubbataniiru. Mariin miseensota 10n gurmeessuun gaggeeffamu hirmaattota gidduutti walitti dhiheenya uumuun wal-baruu fi ajandaawwan kennamaniif irratti gadi fageenyaan akka mari'atan kan dandeessisuu ta’uusaa ibsaniiru. Adeemsa kanaanis hirmaattonni walitti akka dhihaatanii fi ajandaawwan qulqullinaan akka irratti marii’atan sirna diriireen hojiin bu'a qabeessi hojjetamuu hubachiisaniiru. Miseensota 10 kanaan gabaasawwan qindaa’an irratti boruu jalqabee gareewwan miseensota 50 qabaniin walitti dhufanii mariin akka jalqabamu beeksisaniiru Guyyaa har’aa ogeeyyonni mata dureewwan garagaraa irratti mari’attoota mata dureewwan garagaraa irratti garee saddetitti qoqqoodamaniif ibsaa fi odeeffannoowwan kennuusaanii ibsaniiru. Ogeeyyonni dhimmoota ijaarsa biyyaa, seenaa, federaalizimii fi eenyummaarratti beekumsaa fi muuxannoo qaban mari’attootaaf ibsa galtee ta’u taasisuudhaan, gaaffilee hirmaattota irraa ka’aniifis deebii kennuusaanii dubbataniiru. Boru irraa eegalee gabaasota marii gareewwan miseensota 10 qabaniin gaggeeffameen qindeessan gareewwan miseensa 50 qabaniif dhiheessuudhaan adeemsi marii itti aanuu akka eegalamu ibsaniiru. Yaa’ii marii Kanaan mari’attoota kuma 4 keessummeessuun qophii guddaa kan barbaadu ta’us, deeggarsa qindaa’aa dhaabbileen fayyaa, nagaa fi tasgabbii akkasumas geejjibaa taasisaa jiran dinqisiifataniiru. Mariilee taasifamaniin gareewwan saddet keessatti hirmaattota 500niin gurmaa’anii gaggeeffamaa tureera jedhaniiru. Boru irraa eegalee gabaasa gareewwan miseensa 50 qabaniin qindeessan gareewwansaaniif dhiheessuudhaan mariin gareewwan miseensota 250 qaban shantamaan taasifamu akka eegali ibsaniiru. Torbee dhufu ammoo hirmaattonni kuma 4 bakkeewwan 16tti qoqqoodamanii marii akka itti fufan eeraniiru. Hirmaattonni wayita mariin kun gaggeeffamu wal’aansa isaan barbaachisu hoospitaalota federaalaa fi naannootti wa’aansa barbaachisu argachaa akka jiran ibsaniiru. Akkasumas dhaabbileen deeggarsa taasisan kan akka nagaa fi tasgabbii, geejjibaa fi kanneen biroo qindaa’anii hirmaattotaaf tajaajila barbaachisu gochaa akka jiran eeraniiru.

Adoolessa 15/2018 (ENA): Mariin biyyaalessaa kun Itiyoophiyaan gara boqonnaa seenaa fi misoomaa haaraatti akka ceetu carraa uuma jedhan mari attoonni lammiileen Itiyoophiyaa biyya alaa jiraataniifi miseensonni hawaasa Itiyoophiyaa konfiraansii marii biyyaalessaa irratti hirmaatan. Komishiniin marii biyyaalessaa Itiyoophiyaa lammiilee Itiyoophiyaa biyya keessaa fi alaa hirmaachisuun ajandaalee marii saddeet adda baasuun isaa ni yaadatama. Ajandaawwan kunneen Giddugala Walgahii Idil-addunyaa Addis keessatti mari’atamaa kan jiran yoo ta’u, mari’attoonni kuma afur kan irratti hirmaataa jiranidha. Mari’attoonni kunneen Adoolessa 13, 2018 irraa eegalanii garee xiqqaatti qoodamanii ajandaa itti ramadaman irratti mari’achuu eegalaniiru. Bakka bu’oonni diyaaspooraa konfiraansii adeemsifamaa jiru kanarratti yaada isaanii kan kennan akka jedhanitti, mariin kun Itiyoophiyaan rakkoo waggoota darban mudate bira darbitee gara marsaa seenaa fi misoomaa fooyya’aa ta’etti ce’uuf carraa seena qabeessa ta’uu ibsaniiru. Adeemsi marii kun boqonnaa haaraa marii fi waliigalteedhaan rakkoolee sadrkaa gadii irraa gara oliitti hiikuuf karaa bane ta’uus hubachiisaniiru. Namoota yaada isaanii kennan keessaa Awustiraaliyaa irraa Paachi Aquweer akka jedhanitti; lammiileen Itiyoophiyaa kanaan dura haala akkanaa irratti marii’atanii akka hin beekne ibsuun, affeerraa kana gammachuu fi miira guutuudhaan kan fudhatan ta’uu eerani. Haalli lammiileen Itiyoophiyaa naannoo hundarraa walitti qabaman baay’ee namatti tolu ta’uu hubachiisuun, marii kanaan biyya dhaloota egereef mijattu uumuuf haala kan mijeessu ta’uu dubbatani. Haaluma walfakkaatuun Ameerikaa irraa kan dhufan Piroofeesar Alamaayyoo Gabramaariyaam akka jedhanitti; Itiyoophiyaaf boqonnaa haaraan jalqabamuu himani. Adeemsi marii kun walitti bu’iinsaa fi rakkoolee karaa qaroomina qabuun waliin marii’achuun furuu akka ta’e hubachiisaniiru. Mariin mari’attoonni kuma afur irratti kan hirmaatan kun egeree ifaa Itiyoophiyaaf gumaacha guddaa akka taasisu ibsaniiru. Kanas adeemsa guddaa Ityoophiyaa qofaaf osoo hin taane ummata Afrikaa fi addunyaaf hambaa fi muuxannoo ta’uu danda’u jechuun ibsaniiru. Biyya Ingilizii irraa kan dhufan Allebbaachoo Dassaalenyi Itiyoophiyaanonni sablammoota adda addaa fi jaarmiyaalee lammummaa adda addaa irraa dhufan biyya isaanii sadarkaa gaariitti jijjiiruuf kutannoo agarsiisan dinqisiifataniiru. Itiyoophiyaanota biyya alaa jiraataniifi miseensonni hawaasa Itiyoophiyaa nagaa biyyattiif gumaachuuf qophii ta’uu ibsaniiru. Rakkoon mariidhaan furuun hin danda’amne akka hin jirre eeruun, nagaa, tasgabbii fi misooma waaraa fiduuf ga’een adeemsi marii biyyaalessaa olaanaa ta’uu ibsaniiru. #Ena Afaan Oromoo #TOI #Ena#

Adoolessa 15/2018 (ENA)- Itiyoophiyaan ijaarsa sirna demokiraasii Afriikaa keessatti qooda adda durummaa bahaa akka jirtu miseensi mana maree bakka bu’oota Naayijeeriyaa Agbeedii Firederiik ibsan. Itiyoophiyaan tumsa ardii cimsuunii fi qoodni seena qabeessi dandeettii ofiitiin misooma mirkaneessuuf bahatte guddaa kan raajeffatamu ta’uu ibsaniiru. Itiyoophiyaan biyyoota sirna paarlaamaatiin seenaa ture qaban keessaa tokko ta’uusheetiin qoodni ijaarsa sirna demokiraasiif gumaachaa jirtu kan raajeffatamudha. Keessumaa kallattii tumsa riijinii fi dandeettii ofiitiin dhaabbachuu jabeessuuf qoondi baate olaanaa ta’uu kaasaniiru. Filannoon walii galaa torbaffaan milkaa’inaan xumuruunshees kutannoo adeemsa demokiraasiif qabdu qabatamaan kan itti agarsiifte ta’uusaa dubbataniiru. Ijaarsa sirna demokiraasiif kan barbaachisu inni ijoon fedhii lammiilee kan deebisu, nagaa kan buusuu fi gaggeessaa guddina biyyaalessaa si’achiisu kan itti gaafatamni itti dhagahamu ta’uu hubachiisaniiru. Kanaaf Itiyoophiyaan gama hundaanuu birmadummaashee mirkaneessuuf tattaaffiin qabatamaa itti jirtuu fi milkaa’inni galmeessisaa jirtu Afriikaaf calaqqee ifaa ishee taasiseera jedhaniiru. Hariiroon Itiyoophiyaa fi Naayijeeriyaa guddachaa dhufuusaa kan kaasan miseensi mana maree kun, carraaqqiin dippilomaasii michooma paarlaamaa fi hariiroo paarlaamaa biyyoota lamaan jidduutti cimsuuf taasifame kan raajeffatamu ta’uu eeraniiru. Kun ammoo tumsa hunda galeessa gamlamee dhaabbilee demokiraasii biyyoota lamaanii cimsuuf qaban guddisuuf kan kaayyeffate ta’uu ibsaniiru. Hariiroo gamlameen gamatti Itiyoophiyaan tumsa Ardii fi dandeettii ofiitiin dhaabachuu gama guddisuutiin qooda seena qabeessa bahatte raajeffataniiru. Biyyoonni Afriikaa tumsaa fi walgargaarsa jidduusaanii jiru cimsuuf xiyyeeffatanii hojjechuu akka qaban dubbataniiru.