Amajjii 14/2018(ENA)- Tumsi siyaasaa, dinagdee fi misoomaa Itiyoophiyaa fi Jarman caalaattu cimee akka itti fufu ministirri dhimma alaa doktar Geediyoon Xiimootiwoos ibsan. Ministirri dhimma alaa doktar Geediyoon Xiimootiwoos ministira dhimma alaa rippaabiliikii Jarman Jo’an Wadfulni waliin har’a mari’ataniiru. Ministirri dhimma alaa doktar Geediyoon Xiimootiwoos marii kana ilaalchisuun ibsa kennaniin, Itiyoophiyaa fi Jarman biyyoota tumsa gam-lamee turee fi cimaa qabanidha jedhaniiru. Barri 2018 bara addaa waggaa 120ffaa hariiroo dippilomaasii itti eegalan kan kabajan ta’uu eeranii, michooma bara dheera biyyoota lamaan jidduu jiru caalaatti guddisuuf walii galteerra gahamuu dubbataniiru. Walgahiin ministirri muummee doktar Abiyyi Ahimadii fi Chaansilariin rippaabiliikii Jarman Olaaf Sholzi yaa’ii hoggantoota garee 20 (G-20) cinaatti gaggeessan tumsaa olaanaa fi kaka’umsa uumeera jedhan. Daawwannaan ministira dhimma alaa Jarman kun agarsiiftuu fedhii kanaa ta’uu eeraniiru. Hoggantoonni lamaan marii gaggeessaniin mariin siyaasaa gam-lamee fi komishinii ministirootaa waloo hojmaattota gam-lamee turan irra deebiin eegalchiisuuf walii galteerra gahamuu eeraniiru. Tumsa siyaasaa, dinagdee fi misoomaa biyyoota lamaan jidduu jiru caalaatti cimsuuf marii gaggeessaniin walii galteerra gahamuu yaadachiisaniiru. Ministirri dhimma alaa rippaabiliikii Jarman Jo’an Wadfuln gamasaaniin, Itiyoophiyaa fi Jarman hariiroo bara dheeraa akka qaban eeranii, Jarman hariiroo Itiyoophiyaa waliin qabdu caalaatti akka cimsitu mirkaneessaniiru. Tattaaffii Itiyoophiyaan riijinichatti nagaa fi tasgabbii buusuuf taasiftu ministirichi dinqisiifatanii, ijaarsi buufata xiyyaaraa idil addunyaa Bishooftuu dinagdee cimaa ijaaruuf murteessaa ta’uu dubbataniiru. Kaampaaniiwwan Jarman ijaarsa kanarratti hirmaachuuf fedhii akka qaban ibsaniiru. Yeroo jijjiiramaa kanatti hariiroo keenya cimsuu fi eeguu qabna kan jedhan ministirichi, seenaan dippilomaasii waggaa 120 bu’ura cimaa ta’uu ibsaniiru.

Amajjii 14/2018(ENA) - Itiyoophiyaa fi Beelaarus damee loltummaan sanada waliigaltee waloon hojjechuuf isaan dandeesisu waliif mallatteessaniiru. Waliigalticha Ministirri Ittisaa Injiinar Ayishaa Mohaammadii fi Ministirri Ittisaa Beelaarus Diimitirii Paantas mallatteessaniiru. Injiinar Ayishaa Mohaammad wayita sana akka jedhanitti, waliigaltichi tattaaffii industirii fi teekinooloojii loltummaa Itiyoophiyaa guddisuu fi meeshaalee loltummaan of danda'uuf taasifamaa jiruuf faayidaa olaanaa qaba.   Itiyoophiyaan wiirtuu Afrikaa ta'uu isheen gabaa fi fayyadamummaa waloo mirkaneessuuf akka gargaarus himaniiru. Waliigaltichi waliigaltee tarsiimoo hoggantoonni biyyoota lamaanii mallatteessan qabatamaan hojiirra oolchuuf kan dandeessisu ta’uu kan akeekan Ministirri kun, michummaa biyyoota lamaanii yeroo dheeraaf ture kan cimsu ta’uu ibsaniiru. Dimiitirii Paantas gama isaaniin, simannaa isaaniif taasifame galateeffachuun, biyyoonni lamaan pirojeektota adda addaa waliin hojjechaa akka jiran eeranii, waliigaltichi dameewwan haaraa adda addaa irratti bobba'uuf carraa kan uumu ta'uu ibsan.   Humni Qileensaa Beelaarus ayyaana hundeeffama waggaa 90ffaa Humna Qilleensaa Itiyoophiyaa Boru irraa eegalee kabajamu irratti agarsiisa akka dhiyeessuu fi jilli isaaniis akka irratti hirmaatu ibsaniiru. Akka odeeffannoon Miidiyaa Onlaayinii Raayyaa Ittisaa ENAf erge ibsutti, saganticha irratti hoggantoonni olaanoo Raayyaa Ittisaa, akkasumas hoggantoonni dhaabbilee waraanaa Beelaaruusii fi ogeeyyiin damee kanaa irratti ni hirmaatu.

Amajjii 14 /2018(ENA)- Manni maree bakka bu’oota ummataa labsiiwwan biyyoota jidduutti warra murtoo argatan waliif dabarsuu fi dhimma yakkaa dabarsanii kennuu raggaaseera. Manni maree bakka bu’oota ummataa 6ffaan walgahii idilee 9ffaa gaggeesseera. Walgahii idilee Kanaan mootummoota Itiyoophiyaa fi rippaabiliikii ummataa Chaayinaa akkasumas rippaabiliikii federaalawaa Biraazil jidduutti walii galteen warra murtoo argatan walii dabarsuu taasifamuunsaa ibsameera. Walii galteen namoota yakkaan barbaadaman dabarsanii kennuu mootummoota rippaabiliikii federaalawaa demokiraatawaa Itiyoophiyaa fi rippaabiliikii Afriikaa kibbaa jidduutti taasifamuunsaa himameera. Haala Kanaan mootummaan Itiyoophiyaa akkaataa walii galtee taasifameetiin wixinee labsii warra murtoon kennameef waliif dabarsuu fi dhimma yakkaa dabarsanii kennuuf bahe ilaalee sagalee caalmaan raggaaseera. Labsiiwwan kunneen haala kanneen murtoo argatan ittiin sirreeffaman caalaatti bu’a qabeessa gochuun Itiyoophiyaan hariiroo daldalaa, Invastimantii fi dippilomaasii cimsuuf akka gargaaru ibsameera. Dabalataanis Wixinee labsii walii galtee liqii pirojektii dhiheessii meeshaa wal’aansaa boqonnaa-2 mootummaa Itiyoophiyaa fi baankii alergii fi alaa galchuu Kooriyaa jidduutti raawwachiisuuf oolu irratti mari’ateera. Wixineewwan fooyyessa labsii sekuriitii aviyeeshinii Itiyoophiyaa, misoomaa fi bulchiinsa Ispoortii federaalaa akkasumas waldaa hojii gamtaarratti dhihaatan ilaalee koreewwan dhaabbataa dhimmi ilaaluuf qajeelcheera.

Amajjii 14/2018 (ENA)- Ministirri muummee doktar Abiyyi Ahimad ministira dhimma alaa Rippaabiliikii Jarman Jo’aan Wadfuul waliin mari’ataniiru. Ministira dhimma alaa Jarman Jo’aan Wadfuul waliin tumsa Itiyoophiyaa fi Jarman jidduu jiru caalaatti cimsuun haala danda’amurratti marii bu’a qabeessa taasisuusaanii ministirri muummee doktar Abiyyi Ahimad ergaa fuula miidiyaa hawaasummaa isaaniin dabarsaniin ibsaniiru.

Amajjii 13/2018(ENA) – Mnni Maree Bakka Bu’oota Uummataa Labsii Filannoo fooyyessuun, filannoo iftoominaa fi haqa qabeessa teeknooloojiin deeggaramee akka gaggeeffamuuf haala dandeessisu uumuu af-yaa’iin mana marichaa Taaggasaa Caafoo ibsan. Boordiin Filannoo Biyyaalessaa Filannoo waliigalaa biyyaalessaa 7ffaaf galmeen filattotaa Guraandhala 7 hanga Eebila 7/2018tti akka gaggeeffamu, Caamsaa 24, 2018 immoo sagalee kennuun akka gaggeeffamu murteessuun isaa ni yaadatama. Boordichi kana ilaacha keessa galchuun hojiilee galteewwan guutuu fi hubannoo uumuu akkasumas qophiiwwan filannoof barbaachisan hojjechaa jiraachuu ibseera. Af-yaa’iin Mana Maree Bakka Bu’oota Uummataa Taagasaa Caafoo ENAtti akka himanitti,Boordiin Filannoo biyyoolessaa Itiyoophiyaa biyyattiitti filannoo fi murtee sagalee kan adeemsisu qaama bilisaa dhaabbata heera mootummaati jedhani. Boordichi bu’uura heera mootummaatiin filannoo biyyaalessaa 7ffaa gaggeessuuf qophii gahaa taasisuu isaa gabaasa isaa keessatti ibseera. Filannoon Waliigalaa Biyyaalessaa 7ffaan haala haqa qabeessa, nagaa fi amansiisaa ta’een akka gaggeeffamuuf Manni Marichaa fooyya’iinsa seeraa barbaachisaa taasisuu isaa hubachiisaniiru. Keessattuu labsii lakkoofsa 1162/2011 fooyyessuun galmeewwan kaadhimamtootaa fi filattootaa akkasumas hojiiwwan boordichaa kan biroo teeknooloojii dijitaalaan akka deeggaramu hojiiwwan dandeessisan hojjetamaniiru jedhan. Dhaabbileen waldaalee siivilii filannicha taajjabuu fi filattootaaf hubannoo uumuu keessatti gahee murteessaa akka qaban ibsaniiru. Mootummaan iftoominaa fi amanamummaa filannoo kana mirkaneessuuf, gaaffii Boordiin Filannoo Biyyaalessaa Itiyoophiyaa dhiheesseen, qophii taasisaa jira jedhan. Adeemsi Filannoo Walii galaa Biyyaalessaa 7ffaa walii galtee biyyaalessaatiin akka gaggeeffamu tattaaffiin taasifamaa akka jiru eeruun, filannoo kana milkeessuu keessatti paartileen hundi gahee isaanii akka bahatan waamicha dhiyeessaniiru.

Amajjii 12/2018(TOI)- Manni maree ministirootaa guyyaa har’aa wal gahii idilee 52ffaa gaggeesseen dhimmoota garagaraarratti mari’atee murtoo dabarseera. Murtoowwan manni mariachi dabarse akka armaan gadiitti dhihaateera- Murtoo walgahii mana maree ministirootaa idilee 52ffaa Amajjii 12 bara 2018 Finfinnee Manni maree ministirootaa walgahii idilee 52ffaa guyyaa har’aa gaggeesseen dhimmoota garagaraarratti mari’atee murtoo dabarse.   Manni Marichaa jalqaba wixinee labsii, labsii Gumurukii fooyyessuuf dhihaaterratti mari’ate. Labsiin Gumurukii hojiirra jiru waggoota hedduuf kan tajaajile waan ta’eef, tumaalee labsichaa sadarkaa guddinaa hojiin daldalaa idil addunyaa irra gahe waliin wal simsiisuuf, misooma industirii oomishaa biyya keenya keessatti guddachaa dhufe deeggaruuf, akkasumas daldalaa fi invastimantii seera qabeessa jajjabeessuun akka danda’amu labsiin fooyyessaa kun qophaa’ee dhihaateera. Manni marichaa labsii fooyya’ee dhihaate kanarratti erga mari’atee booda galtee itti dabaluun mana maree bakka bu’oota ummataaf akka qajeelfamu sagalee guutuun murteesseera. Manni marichaa itti fufuun wixinee danbii onnachiiftuu taaksii fi qaraxaa Invastimantiif kennamu irratti mari’ateera. Dameelee invastimantii guddina dinagdee biyya keenyaaf gumaacha olaanaa qabanii fi dursi kan kennamuuf, akkasumas kaappitaala olaanaa gaafatamaniif kaappitaala hojiirra oolu tilmaama keessa kan galchuu fi sirna onnachiiftuu Invastimantii raawwiirratti hundaa’e diriirsuun waan barbaachiseef wixineen dambii kun qophaa’ee dhihaateera. Manni marichaas dambicharratti bal’inaan mari’atee galtee itti dabaluun dambiin kun gaazexaa magalataa federaalaarratti guyyaa maxxanfamee eegalee hojiirra akka oolu sagalee guutuun murteesseera. Xumurarrattis manni marichaa wixinee imaammataa misooma dhaweessummaa irratti mari’ateera. Imaammatichi hojiileen damee dhaweessummaan hojjetaman fulla’insa qabaatanii milkaa’ina galmoota misooma biyyaalessaaf qoodasaanii akka bahan, aadaa kalaqaa gabbisuu fi sona dabaluuf dirree dhaweessummaa mijataa ijaaruu akka danda’amu qophaa’ee dhihaateera. Manni marichaas imaammaticharratti mari’atee galtee dabaluun imaammatichi guyyaa mana maree ministirootaan ragga’e Amajjii 12 bara 2018 irraa eegalee hojiirra akka oolu sagalee guutuun murteesseera. #WMMItiyoophiyaa

Amajjii 9/2018 (ENA)- Mariin biyyaalessaa kutaalee hawaasaa hunda hirmaachisuunii fi hojiilee milkaa’oo hojjechuun boqonna xumuraa isa murteessaarra gaheera jechuun ibsan Af-ya’iin mana maree bakka bu’oota ummataa Taaggasaa Caafoo. Komishiniin marii biyyaalessaa Itiyoophiyaa garaagarummaawwan yaadaa fi wal dhabdee bu’ura kan biyyattii keessatti mul’atu furuufbifa hammataa ta’een marii taasisuuf lakkoofsa labsii 1265/2014’n mana maree bakka bu’oota ummataatiin kan hundaa’e dhaabbata of danda’edha. Komishinichi garaagarummaa yaadaa fi wal dhabdee biyyaalessaa bu’uraa mariiwwan hammataa fi ummataa gaggeessuudhaan walii galtee biyyaalessaa uumuuf hojjechaa jira. Haala Kanaan komishinichi dhimmoota biyyaalessaa murteessoo irratti hirmaattota adda baasuu fi ajandaa walitti qabuun hojjechuun gara boqonnaa xumuraa gahuunsaa ni beekama. Af yaa’iin mana maree bakka bu’oota ummataa Taaggasaa Caafoo ENA’f akka ibsanitti, komishiniin marii biyyaalessaa Itiyoophiyaa adeemsa marii Itiyoophiyaanonni hundi irratti hirmaatan raawwachaa jira. Komishinichi naannolee fi bulchiinsa magaalotaatti akkasumas biyya alaattillee ajandaa walitti qabaa fi hirmaattota adeemsa marii isa muummeerratti hirmaatan adda baasuudhaan hojii milkaa’aa hojjechaa jira jedhaniiru. Waldaaleen waldaaleen hawaasaa, waldaaleen siviikii, barsiiftonni dhaabbilee barnoota olaanoo kutaaleen hawaasaa biroon adeemsa marii kanarratti hirmaachuusaanii ibsaniiru. Haala Kanaan Lammiileen Itiyoophiyaa yaada biyyasaaniif ni mala jedhan kan walitti fidan adeemsa marii addaa fi milkaa’aan raawwatamuusaa dubbataniiru. Adeemsa boqonnaa marii guduunfaa hojiirra oolchuu fi gaggeessuuf tooftaan dandeessisu bocamuu ibsanii, hojiin hafu akkaataa milkaa’ina ittiin eegaleen akka xumuramu hundi qoodasaa akka bahu waamicha dabarsaniiru. Itiyoophiyaa keessatti dhimmoota seenaa, seera, hojmaataa fi kkf waliin wal qabatanii ka’an mariidhaan furmaata kan argatan ta’uu ibsuun, kanaaf ammo mariin biyyaalessaa carraa murteessaadha jedhaniiru. Naannoo Tigraayi ilaalchisuun gaaffileen marii biyyaalessaan deebi’uu qaban gurmaa’insoota garagaraatiin dhihaachuusaanii ibsaniiru. Bu’aan marii biyyaalessaarraa argamu murtee ummataa ta’uusaa kan ibsan af-yaa’iin kun, mootummaan bu’aa kana hojiirra oolchuuf qophii ta’uusaa dubbataniiru. Gaaffilee ummanni marii Kanaan kaasu kabajaa fi deebii barbaachisu kennuun hundarraa kan eegamu ta’uu kaasaniiru.

Amajji 9/2018(ENA)- Adeemsi marichaa rakkoolee mudataniif furmaata waaraa kaa’uun, dhuudhaalee nageenyaaf hundee waan ta’eef carraa argame kana haala sirrii ta’een itti fayyadamuun murteessaa ta’uu maanguddoonni biyyaa magaalaa Miizan Amaan himani.   Maanguddoota biyyaa keessaa maanguddoo Musee Ayinataa ENAf yaada kennaniin, rakkoolee walxaxaa furuun biyya dhaloota egereef mijattu ijaaruuf rakkoo keenya mariidhaan hiikuun murteessaa dha jedhani. Rakkoo keenya ofuma keenyaan furachuu qabna jedhani.   Rakkoolee fi adda addummaa yaadaa kamiyyuu, araaraa fi dhiifamaan furuu kan caalu hin jiru kan jedhan maanguddoo biroo Mitikkuu Shooshaadha. Dhimma biyyaa irratti furmaata finna jedhanii mariiyachuun barbaachisaa ta’uu fi bu’aa kan argamsiisu ta’uus ibsaniiru.   Maanguddoon biyyaa Tasfaayee Zakkaariyaas gama isaaniin tokkummaan sabaa, nageenyi waaraa fi misoomni kan argamu garaagaummaa yaadaa mari’achuun hiikaa yoo deeman qofaan akka ta’e eeraniiru. Dhuudhaalee keenya kan itti dhimma hin baanee hedduun waan jiraniif, naqeenya biyyaa fi misoomaaf itti haa fayyadamnu jedhani. Milkaa’ina Marii Biyyaalessaa kanaaf nuti maanguddoonni biyyaa fi abbootiin amantaa itti gaafatamummaa guddaa akka qabnu hubannee kana galmaan ga’uuf ciminaan hojjechuun nurraa eegama jedhan jaarsoliin biyyaa kunneen.