Caamsaa 14/2018 (ENA): Milkaa’ina marii biyyaalessaa kana keessatti waldaaleen siivikii fi dhaabbileen amantaa ga’ee isaanii bahaa akka jiran Komishinarri Olaanaan Komishinii Marii Biyyaalessaa Itiyoophiyaa Piroofeesar Masfin Ara’ayaa ibsaniiru. Komishiniin marii biyyaalessaa Itiyoophiyaa dhaabbilee amantaa fi waldaalee siivikii waliin waltajjii galtee walitti qabuu ajandaa walitti qabuu gaggeessaa jira.   Piroofeesar Masfin Ara’ayaa akka jedhanitti, waldaalee siivikii fi dhaabbileen amantaa sadarkaa aanaatti deeggarsaa komishinichaaf taasisaniin abbaa adeemsa kanaa ta’uu mirkaneessaniiru. Keessattuu, komishinichi erga hundeeffamee waggoota darban keessatti hooggantoonni dhaabbilee amantaa fi bakka bu’oonni waldaalee siivikii gahee olaanaa taphachuu isaanii yaadachiisaniiru. Dhaabbileen amantaa fi waldaaleen siivikii karaa hooggantoota isaaniitiin hojii aanaalee dhaqqabsiifamuuf gaggeeffamu keessatti adda duree ta’uu eeraniiru. Adeemsi marii biyyaalessaa eegalame marii fi wal-hubannoon garaagarummaa biyyattii keessatti mul’atu hiikuuf waltajjii faayidaa qabu ta’uu Pireezidaantiin Mana Maree Dhaabbilee Waldaalee siivikii Itiyoophiyaa Ahimad Huseen hubachiisaniiru. Qaamoleen hundi carraa kana sirnaan fayyadamuu akka qaban himaniiru. Ajandaa marii biyyaalessaa hunda hammatee fi amansiisaa taasisuuf hojiiwwan gaggeeffaman irratti waldaaleen siivikii fi dhaabbileen amantaa hirmaachuu akka qaban ibsaniiru. #ENA_Afaan_Oromoo #ENA

Caamsaa 14/2018(ENA): Naannoo Oromiyaa Godina Shawaa Kaabaa magaalaa Fiicheetti sagantaan duula na filadhaa Paartii Badhaadhinaa gaggeeffamaa jira. Sagantaa duula na filadhaa kanaratti Itti Aanaan Pirezidaantii Mootummaa Naannoo Oromiyaa obbo Awwaluu Abdii, Hoggantuu Biiroo Bishaanii fi Inarjii Oromiyaa Injinar Miliyoon Baqqalaa dabalatee hoggantoonni hojii mootummaa Naannichaa,Godinaa, Anaalee fi kutaaleen hawaasaa aanaalee Godinichaarraa walitti babba’an argamaniiru. Sanaticharrattis paartiin Padhaadhinaa jijiiramaa booda hojii fayyadamummaa hawaasaa mirkaneessan hojjechuu isaa ibsuun manufestoo filannoosaa beeksifachaa duula na filadhaa gaggeessuun isaa ibsameera. koomunikeeshinii Godina Shawaa kaabaarraa

Caamsaa 14/2018(ENA):Filannoon waliigalaa 7ffaan nagaa, dimokiraatawaa fi milkaa’aa ta’ee akka xumuramuuf gahee isaanii bahaa akka jiran dhaabbileen hawaasa siivilii godina Baalee keessa jiran beeksisan. Dhaabbileen kunneen adeemsa filannichaa taajjabuu fi hawaasa keessatti hubannoo gahaa uumuuf sochiiwwan qabatamaa taasisaa akka jiran ibsaniiru. Pirezdaantiin Federeeshinii Dargaggoota Godinichaa obbo Iissaa Xaahir, miseensonni dhaabbata isaanii loogummaa kamiyyuu irraa walaba ta’een nageenya kabachiisuuf hojjachaa jiru jedhaniiru. Filannichi nagaa fi dimokiraatawaa ta’ee akka xumuramuuf hawaasa biratti hubannoo uumuu fi odeeffannoo sirrii biraan gahuu keessatti gahee isaanii bahaa akka jiran ibsaniiru. Gama biraatiin, Itti Aanaan Itti Gaafatamaa Waldaa Dargaggoota Godinichaa obbo Caalaa Geetaachoo, waldichi taajjabdoota filannoof leenjii kennuu isaa dubbataniiru. Miseensonni waldichaa filannoon waliigalaa 7ffaan milkiin akka xumuramuuf kutannoodhaan hojjachaa akka jiran himanii, miseensota taajjabdummaaf adda bahan kanaan adeemsa filannichaa taajjabuuf leenjiin gahaan kennamuu isaa ibsaniiru. Dargaggoonni beekumsaa fi muuxannoo leenjii irraa argatanitti fayyadamanii itti gaafatamummaa isaanii akka bahan deeggarsaa fi hordoffiin walitti fufiinsa qabu taasifamaafi akka jirus ibsaniiru. Filannicha keessatti hirmaannaa ho’aa dubartootaa mirkaneessuuf hojjachaa akka jiran kan ibsan immoo Pirezidaantii Federeeshinii Dubartoota Godina Baalee aadde Gannat Kaasahuun dha. Filannoo waliigalaa kanaan dubartoonni hirmaannaa ho’aa gochuudhaan dirqama lammummaa isaanii akka bahan miseensonni waldichaa sadarkaa sadarkaan jiran itti gaafatamummaa isaanirraa eegamu bahaa jiru jedhaniiru. Godina Baaleetti buufataalee filannoo 395 filannoo waliigalaa 7ffaatiif gurmaa’an irratti, miseensonni dhaabbilee hawaasa siivilii kuma 1tti siqan walaba ta’anii gahee taajjabummaa isaanii akka bahan adda baafamuun isaanii barameera.

Caamsaa 14/2018 (ENA): Lammiileen filannoo waliigalaa torbaffaaf kaardii filannoo argatan mirga filachuu isaanii akka fayyadaman gargaaruuf duulli hubannoo uumuu gaggeeffamaa jiraachuu dhaabbileen hawaasa siivikii ibsaniiru. Akka sagantaa Boordii Filannoo Biyyaalessaa Itiyoophiyaatti, guyyaan filannoon gaggeefamu Caamsaa 24, 2018tti waan gaggeeffamuuf guyyoota muraasatu hafe. Filannoo waliigalaa 7ffaa baranaa kana irratti lammiileen karaalee adda addaa galmaa’an miiliyoona 50 fi kuma 514 kaardii filannoo isaanii argachuu danda’aniiru. Filannoo waliigalaa kanaan paartileen siyaasaa morkattoonni 47 walumaa galatti kaadhimamaa 10,934 galmeessuun filannoo imaammataa isaanii karaa miidiyaalee bal’inaan ummataaf beeksisaa jiru. Dhaabbileen biyya keessaa 55 Boordii Filannoo Biyyaalessaatiin beekamtii argatan filannoo kana taajjabuuf eeyyama kan argatan yoo ta’u, bakka buutonni 60,277 ol immoo naannoo adda addaatti bobbaasamaniiru. Dhaabbileen waldaalee siivikii 169 barnoota filattotaa irratti beekamtii argatanis barnootaafi leenjii hubannoo uumuu adda addaa filattotaaf kennaa jiru. Akka dhaabbileen waldaalee siivikii yaada isaanii ENA’f kennan jedhanitti; lammiileen kaardii sagalee isaanii fudhatan mirga filachuu isaanii sirnaan akka itti fayyadamaniif barnoota hubannoo cimsu kennaa jiru. Pireezidaantiin Waldaa Dubartoota Finfinnee Innaataalam Indaalee jedhanitti filannoon biyyaalessaa mul’ata ijaarsa sirna dimokraatawaa ta’uu ibsaniiru. Miseensonni waldichaa kutaa magaalota hunda keessa jiran walakkaa miliyoonaa ol ta’an kaardii akka fudhatan kakaasuu eeruun, akkasumas adeemsa kana keessatti dammaqinaan akka hirmaatan hubachiisuu fi beeksisuuf hojjechaa jiraachuu ibsaniiru. Akkasumas hanga adeemsi filannoo milkaa’inaan xumuramutti miseensonni waldichaa ga’ee ijaarsaa isaanii akka ba’ataniif waldichi ciminaan hojjechaa jiraachuu ibsaniiru. Pireezidaantiin Waldaa Dargaggoota Finfinnee obbo Barakat Birbirsaa akka jedhanitti dargaggoonni kaardii sagalee itti kennan akka fudhataniif hojiin bal’aan hojjetamaa turuu hubachiisaniiru. Ammas dargaggoonni kaardii sagalee isaanii paartii biyyaaf fayyadu akka filataniif hubannoo uumaa jiraachuu himani. Kanaafis waldichi taajjabdoota kuma 2 fi 228 ol bobbaasuun dabalatatti hawaasa hubachiisuu fi odeennoo kennuun hojjetamaa jiraachuu ibsaniiru. Waldaaleen kunneen filannoo waliigalaa torbaffaa milkiin akka xumuramuuf lammiin kamiyyuu itti gaafatamummaa isaa bahuu akka qabu ergaa dabarsaniiru. #ENA_Afaan_Oromoo #ENA

Caamsaa 13/2018 (ENA): Hariiroo seena qabeessa Itiyoophiyaa fi Ameerikaa gara sadarkaa olaanaatti kan guddise hojiin dippiloomaasii milkaa’aa hojjetameera jedhan Dubbi himaan Ministeera Dhimma Alaa Ambaasaaddar Nabiyaat Geetaachoo. Hariiroon biyyoota lamaanii fi biyyoota hedduu Itiyoophiyaa gara marsaa olaanaatti akka tarkaanfatu kan dandeessise hojiin dippilomaasii milkaa’aan hojjetamuusaas ibsaniiru.   Dubbi himaan Ministeera Dhimma Alaa Ambaasaaddar Nabiyaat Geetaachoo taateewwan gurguddoo waltajjiiwwan dippilomaasii biyyoota lamaanii fi biyyoota hedduu irratti raawwataman irratti ibsa Miidiyaaleef kennaniiru. Ibsa kennaniin, torbee darbe waltajjiiwwan dippilomaasii biyyoota lamaanii fi biyyoota hedduu irratti hojjetamee tumsa, walta’iinsaa fi carraa invastimantii Itiyoophiyaa mirkaneesse ta’uu ibsaniiru. Waltajjiiwwan qunnamtii biyyoota lamaanii fi biyyoota hedduunis hirmaannaa dippilomaasii cimaa fi dammaqina qabeessa ta’e akka dandeessisan yaadachiisaniiru. Fakkeenyaaf, walii galteen biyyoota lamaanii Itiyoophiyaa fi Ameerikaa gidduutti taasifameen michummaa seena qabeessaa fi cimaan biyyoota lamaanii waggoota 120 oliif kan turee fi dhaabbataa taasisuu isaa dubbataniiru. Waltajjiin marii caasaa biyyoota lamaanii fi waliigalteen biyyoota gidduutti taasifames hariiroo dippilomaasii cimsuu fi hariiroo naannoo fi idil-addunyaa cimsuu isaa ibsaniiru. Waliigalteen biyyoota lamaanii kun tumsa daldalaa fi invastimantii, nageenyaa fi ittisa biyyootaa sadarkaa haaraatti ceesisuun badhaadhina diinagdee waliinii mirkaneessuu irratti kan xiyyeeffate ta’uus hubachiisaniiru. Mariin dippilomaasii hoggantoota olaanoo mootummaa Itiyoophiyaa fi Ameerikaatiin gaggeeffame michummaa seenaa gara walta’iinsa guddaatti jijjiiruu keessatti hiika guddaa akka qabu ibsaniiru. Waltajjiiwwan biyyoota lamaanii irrattis fakkeenya guddina diinagdee fi badhaadhina Itiyoophiyaa fi haala ji’oo-siyaasaa Gaanfa Afrikaa irrattis mari’achuu ibsaniiru. Pireezidaantiin Faransaay Imaanu’eel Maakiroon daawwannaa hojiif Itiyoophiyaatti taasisanis waliigalteewwan tumsaa michummaa seena qabeessa biyyoota lamaanii daran cimsan mallatteessuun isaanii ni yaadatama. Dhaabbanni Mootummoota Gamtoomanii waggaa 80ffaa hundeeffama Itiyoophiyaa, ergama nagaa eegsisuu milkaa’aa fi seenaa waliin qabdu yaadachuuf ashaaraa addaa kaa’uu isaa eeraniiru. Itiyoophiyaan tumsa dippilomaasii biyyoota hedduu fi walitti dhufeenya seenaa qabduuf kutannoo qabaachuu isheetiif ragaadha jedhan. Walgahii Ministiroota Dhimma Alaa ‘BRICS’ Hinditti gaggeeffame irrattis Itiyoophiyaan sirni biyyoota hunda tajaajilu haqaan akka diriiru ejjennoo qabdu ibsiteetti. Walgahii ‘BRICS’ kanaan alattis hariiroo biyyoota lamaanii cimsuuf biyyoota miseensa ta’an waliin marii bu’a qabeessa ta’e gaggeessuu isaanii ibsaniiru. Dippilomaasii lammiilee giddu galeessa godhateen nageenya lammiilee Itiyoophiyaa Afrikaa Kibbaa fi Sa’uudii Arabiyaa keessa jiraatan mirkaneessuuf mariin gaggeeffamaa akka tures eeraniiru. Itiyoophiyaan abbummaa haqa qabeessa, seera qabeessa, teessuma lafaa fi seenaa Buufata galaanaa kanarratti qabdu irratti hubannoo uumuuf tattaaffiin dippilomaasii taasifamu cimee itti fufuus mirkaneessaniiru. #ENA_Afaan_Oromoo #ENA

Caamsaa 12/2018(ENA): Paartiin Badhaadhinaa naannoo Oromiyaatti dameewwan Qonnaa, Industirii, Tajaajilaa fi kanneen birootiin hojiiwwan fayyadamummaa uummataa guddisan raawwachuusaa Itti-anaan Pireezidanti Mootummaa Naannoo Oromiyaa obbo Awwaluu Abdii ibsan. Paartiin Badhaadhinaa Godina Shawaa Lixaa fi Bulchiinsa Magaalaa Ambootti duula nafiladhaa gaggeesseera.   Sirna duula nafiladhaa kana irratti kan argaman Itti Aanaan Pireezidantii Mootummaa Naannoo Oromiyaa obbo Awwaluu Abdii akka ibsanitti, Paartiin Badhaadhinaa waggoottan darban keessa hojiiwwan misoomaa jireenya uummataa fooyyessan raawwateera jedhaniiru. Dabalataanis, fayyadamummaa haqa qabeessa lammiilee mirkaneessuuf hojii hojjetameen bu'aan hundagaleessi argamaa jiraachuu dubbataniiru. Keessattuu naannoo Oromiyaatti dameewwan qonnaa, industirii, tajaajilaa fi kanneen birootiin hojiiwwan fayyadamtummaa uummataa guddisuu danda'an hedduun raawwatamuu isaanii eeraniiru. Paartichi misooma hawaas-dinagdee mirkaneessuun, haqni, wal-qixxummaanii fi tokkummaan dimokiraasii akka guddatu akkasumas waliin jireenyi akka cimu hojjechaa jiraachuu ibsaniiru. Bulchaa olaanaan Godina Shawaa Lixaa obbo Diidhaa Guddataa akka ibsanitti; Badhaadhinni paartii jijjiirama hawaas-dinagdee mandhaalee qabatee ka'eedha jedhaniiru. Godinichatti waggoottan jijjiiramaa darban keessa inisheetivoota misoomaa mootummaan naannichaa qopheesseen hojiiwwan bal'aan fayyadamummaa hawaasaa mirkaneessan hojjetamuu isaanii dubbataniiru. Waggoottan jijjiiramaa darban keessa Amboo dabalatee magaalaawwan biroo keessattis sadarkaa jireenya lammiilee fooyyessuuf hojiin bal'aan hojjetamuu kan ibsan immoo Kantiibaa Magaalaa Amboo obbo Haacaaluu Gammachuuti. Paartichi hojiiwwan misoomaa qabatamaa qonna magaalaa fi dameewwan biroo keessatti qulqullinaan hojjechuusaa addeessaniiru.

Caamsaa12/2018(ENA): Dhaabbileen siivikii filannoo waliigalaa torbaffaa keessatti gahee hordoffii fi deeggarsaa qaban cimsaanii itti fufuu akka qaban Itti Aanaan Daarektara Ol’aanaa Abbaa Taayitaa Dhaabbilee Hawaasa Siivikii Itiyoophiyaa Fasiikaaw Mollaa hubachiisan. Waltajjii marii ENA fi Abbaa Taayitaa Dhaabbilee Hawaasa Siivilii Itiyoophiyaa waliin ta'uun mata-duree “Gahee Miidiyaalee Milkaa'ina Filannoo Dimokiraasii Keessatti” jedhuun waliin qopheessan magaalaa Adaamaatti gaggeessaa jiru. Waltajjiin kun filannoo dimokiraasii fi haqa qabeessa ta’e gaggeessuun itti gaafatamummaa qaama dhimmi ilaallatu hundaa ta’uusaa hubachiisuuf kan qophaa’eedha. Marii kanarratti Ministira Tajaajila komunikeeshinii Mootummaa Innaataalam Mallas, De’eetaa Ministira Tajaajila Komunikeeshinii Mootummaa Tasfaahun Gobazaay, hojii raawwachiisaa olaanaa ENA Sayifee Darribee, itti aanaa dariktara Abbaa Taayitaa Dhaabbilee hawaasa siivilii Itiyoophiyaa Faasikaaw Mollaa, gaggeessitoonni Abbaa Taayitaa Miidiyaalee,hoggantoonni miidiyaalee fi gaazexeessitoonni hirmaataniiru. Waltajjicharratti,Itti Aanaan Daarektera Olaanaa Dhaabbilee Hawaasa siivikii Fasiikaaw Mollaa akka jedhanitti hawaasni siivikii filannoo walii galaa 7ffaa keessatti gahee hordoffii fi deeggarsaa qaban cimsuu akka qaban hubachiisaniiru. Filannoo dimokiraasii fi haqa qabeessa ta’e gaggeessuun dirqama waliinii ta’uu eeranii, gaheen dhaabbilee siivikiis baay'ee murteessaa ta'uu kaasaniiru. Gaheen dhaabbilee siivikii yeroo filannoo taajjabdummaa qofa osoo hin ta’iin, lammiileen ijaara sirna dimokiraasiitiif itti gaafatamummaa fi abbummaadhaan akka dhaabbatan gochuu keessatti itti gaafatamummaa guddaa qabu jedhaniiru. Kanaanis, dhaabbileen kun lammiileen waa’ee barbaachisummaa filannoo irratti hubannoo gahaa akka argatan gochuu keessatti gaheen isaanii ol’aanaa ta’uu ibsaniiru. Hawaasni adeemsa filannichaa keessatti hirmaannaa ho’aa akka ta’u dandeessisuurratti xiyyeeffatanii hojjachaa akka turan eeranii, tattaaffii isaanii kana cimsuun itti fufuu akka qabanis dubbataniiru. Gama biraatiin, itti aanaan Daarektera Ol’aanaa Abbaa Taayitaa Miidiyaalee Itiyoophiyaa obbo Gizawuu Tasfaayee, miidiyaaleen gabaasa filannoo ilaalchisee hojjatan seera hordofanii hojjachaa jiraachuu isaanii hordofamaa akka jiru ibsaniiru. Miidiyaaleen kakaasii fi yeroo beeksisa bilisaa paartilee siyaasaatiif ramadame fayyadamuu irratti rakkoon akka hin uumamne dubbataniiru. Miidiyaaleen yeroo filannootti ijaarsa nageenyaa irratti akka xiyyeeffatan abbaan taayitichaa hojjachaa akka turee fi cimsee kan itti fufu ta'uu mirkaneessaniiru. Yeroo filannootti naamusni eegamuu qabu akka kabajamu; hojiiwwan hojjatamaa jiranii fi qaamolee dhimmi ilaallatuuf hojiin dandeettii raawwachiisummaa cimsuu hojjatameera jedhaniiru. Miidiyaaleen sagantaa Boordiin Filannoo Biyaalessaa baase bu’uura godhachuun gabaasaalee adda addaa filannoo ilaalchisan uummataaf dhaqqabamaa gochaa turuu isaanii eeranii, kanaanis ijaarsa sirna dimokiraasiitiif gahee isaanii ba’achaa turaniiru jedhaniiru. Xumura irratti, hirmaattota paanalichaa irraa gahee miidiyaalee fi dhaabbilee hawaasa siivikii yeroo filannoo ilaalchisee yaadonnii fi gaaffileen kan ka'an yoo ta'u, mariisistootaan deebii fi ibsi irratti kennameera.

Caamsaa 12/2018 (ENA): Paartiin Badhaadhinaa bu’uura fayyadamummaa lammiilee kaa’uuf tattaaffii taasisaa jiru itti fufa jedhan Hogganaan Damee Siyaasaa Waajjira Damee Mootummaa Naannoo Oromiyaa Paartii Badhaadhinaa obbo Namarraa Bulii. Duulli filannoo paartichaa Godina Iluu Abbaa Booraa Aanaa Haluutti bakka hooggantoonni naannoo fi godinaa argamaniiru gaggeeffameera.   Duula filannoo kanarratti hirmaattotaaf haasawa kan taasisan Itti Gaafatamaan Damee Siyaasaa Paartii Badhaadhinaa Oromiyaa obbo Namarraa Bulii, Paartiin Badhaadhinaa waggoota darban keessatti pirojektoota fayyadamummaa lammiilee fi guddina biyyaa mirkaneessu caalaatti cimsuuf kutannoo akka qabu ibsaniiru. Paartichi pirojektoota misooma magaalaa fi baadiyyaa fayyadamummaa ummataa mirkaneessu raawwachuudhaan gama bulchiinsaatiin hawaasa walitti dhiyeenyaa fi haqaan tajaajiluuf ciminaan kan hojjatu ta’uu ibsaniiru. Itti dabaluunis lammiileen hiyyummaa jalaa bilisa ta’anii jireenya fooyya’aa akka jiraataniifi nageenyi waliigalaa isaanii akka mirkanaa’uuf ciminaan kan hojjetamu ta’uu ibsaniiru. Lammiilee aadaa hojii isaanii naannicha keessatti fooyyessanii fi fayyadamummaa ofii fi badhaadhina biyyaa mirkaneessuuf kutannoo qaban oomishuun biyyi keenya mallattoo badhaadhina akka taatu ciminaan hojjachuu itti fufa jechuun ibsaniiru obbo Namarraan.   Bulchaan Olaanaan Godina Iluu Abbaa Booraa obbo Indaalkachoo Tafarii akka ibsanitti, Paartiin Badhaadhinaa waggoota darban keessatti hojiiwwan bal’aa Godinicha keessatti hojjetee fayyadamummaa waliigalaa lammiilee mirkaneessu cimsee itti fufa jedhaniiru. Akkasumas, yaada ida’amuutiin qajeelfamuun guddinaa fi badhaadhina Godinichaa mirkaneessuuf hojii isaa cimsee kan itti fufu ta’uu ibsaniiru. Sagantaan sagalee kennuu filannoo waliigalaa 7ffaa Caamsaa 24, 2018 akka gaggeeffamu beekamaadha. #ENA_Afaan_Oromoo #ENA