Onkoloolessa 15/2018(TOI)-Kabajaa fi Birmadummaa Itiyoophiyaa sarbuuf Qaama dhufu kamiifiyyuu Raayyaan Obsa hin qabu jechuun ibsan Raayyaa Ittisa Biyyaatti Ajaajaa Olaanaa izzii duulota addaa Leetenaal Jeneraal Shuumaa Abdataa. Mataduree “ biyya hin sarbamne raayyaa hin raafamne” jedhuun guyyaan raayyaa ittisa 118ffaan Magaalaa Dabra Biraanitti miseensonni raayyaa fi qondaaltonni olaanoonii fi keessummoonni waamichi taassifameef bakka argamanitti kabajameera. Saganticharratti kan argaman Raayyaa Ittisa Biyyaatti Ajaajaa Olaanaa izzii duulota addaa Leetenaal Jeneraal Shuumaa Abdataa, Diinonni Itiyoophiyaa fi baandaawwan yeroo ammaa kallattii adda addaan Itiyoophiyaa qoruuf tattaafachaa jiru jedhaniiru. Kabajaa fi birmadummaa Itiyoophiyaa durii hanga har’aatti gootummaa ijoolleesheen kabajamee kan turte ta’uushee kaasuun, yeroo ammaa raayya cimaa kabajaa fi birmadummaasheef dhaabatu ijaaramuu dubbataniiru. Raayyaan ittisa biyyaa kan Itiyophiyaanonni itti boonanii fi dahannoo ta’uu ibsuun, kabaja biyyaa fi Alaabaaf jedhee goota duubatti hin deebine, cimaa fi teekinoolojii ammayyaan kan deeggaramu jiraachuu dubbataniiru. Haata’u malee kabajaa fi birmadunmmaa Itiyoophiyaa sarbuuf qaama dhufu kamifiyyuu obsa hin qabu jedhaniiru. Naannoo Ammaaraatti Bulchaan Godina Shawaa Kaabaa Makaashaa Alamaayyoo akka jedhanitti, gootummaa fi gahumsa raayyaa keenyaa Itiyoophiyaarra darbee biyyoota birootiin kan mirkanaa’eef ta’uu fi gita Kanaan kabaja fi beekmtii kennuufii qabna jedhaniiru. Dursaan Kantiibaa Bulchiinsa Magaalaa Dabra Biraan Baddiluu wubisheet gamasaaniin, raayyaa sab-daneessaa cimaa Itiyoophiyaa fakkaatu ijaaramuunsaa hunda keeny boonseera jedhaniiru.

Onkoloolessa 15/2018(TOI)- Guyyaan raayyaa ittisaa Itiyoophiyaa 118ffaan mata duree “Biyya eenyuyyuu itti hinbuune raayyaa eenyuyyuu hin dandeenye” jedhuun kabajamaa jira. Itaamaajoor shuumiin walii gala humnoota waraanaa Fiildi maarshaal Birhaanuu Juulaa, ministirri ittisaa Injiinar Ayishaa Mahaammad qondaaltonni jeneraalonni, hooggantoonni mootummaa olaanoon, attssheewwan loltuu biyyoota garagaraa, miseensonni raayyaa kabajaa,keessummoonni waamamanii fi miseensonni rayyaa sirna kabajaa kanarratti hirmaachuusaanii EBC’n gabaaseer.

Onkoloolessa 14/2018(TOI)- Nageenyi Godina Gujiitti bu’e sochii Hawaasummaa fi Diinagdee akka saffisiise Abbaan Gadaa Gujii fi Jaarsolii biyyaa ibsan. Godinichatti qaamoleen hidhatan filannoo nageenyaa fudhatanii leenjii haaromsaa xumuranii gara hawasaatti makamuun saanii ibsameera. Abbaan Gadaa Gujii Hokkuu Gannaalee Aagaa qabeenya uumamaa naannicha jiran misoomsuun faayidaamuu fi sochii Diinagdee saffisiisuuf wal-dhabdeewwan mariin furuu qabna jedhaniiru. Beekaas ta’e osoo hin beekiin obbolaawwan karaa dogongoraa hordofan waamicha nagaa Mootummaa fudhatanii gara jireenya nagaatti akka dhufaniif motummaan tattaaffii guddaa taassisaa turuu yaadataniiru. Kanaanis hidhattoonni hedduun naannichatti waamicha nagaa mootummaa fudhatanii hojjetanii jijiiramuuf gara hawaasaatti makamuusaanii ibsaniiru. Kunis nageenya naannichaa Cimsuun sochiin Hawaasummaa fi Diinagdee akka saffisuuf gumaacha taasisaa jiraachuu dubbataniiru. Abbaan Gadaa Gujii Uddeessa Aagaa gamasaaniin, haaloo dhiisnee waldanda’uu fi walgargaaruun nageenya fi misooman biyyaaf waliin dhabbannee hojjechuu qabna jedhaniiru. Kanaafis naannoosaaniitti hawaasa gatii nagaa barsiisuu fi qaamoleen hidhatanis daandii nagaa filatanii lammiisaanii misoomaan akka kiisaniif qoodasanii bahaa jiraachuu ibsaniiru. Qaamolee nageenyaa mootummaa fi hirmaannaa hawaasan nagaa fi tas-gabbiin cimaa waan dhufeef sochiin Hawaasummaa fi Diinagdee naannichaa saffisaa dhufuusaa kaasaniiru. Waamicha nagaa mootummaa fi Gorsa Abbootii fudhatanii Hidhattoota gara Hawaasatti makamaniif galanni isaaniif mala jedhaniiru. Kan biroon Abbaa Gadaa fi Jaarsi biyyaa Annoolee Noottoo naannichatti nageenyi waaraan akka bu’uu fi misoomni akka saffisuuf qoodasaanii bahaa jiraachuu dubbataniiru. Hawaasa naannichaa barbaachisummaa nageenyaa fi rakkoowwan mariin furuurratti barsiisuurraa eegalee nageenya fulla’aaf mootummaa waliin walitti dhiheenyaaan hojjechaa jiraachuu dubbataniiru. Itti gaafatamaan Waajjira Bulchiinsaa fi nageenyaa Godinichaa obbo Boggee Taaffasaa gamasaaniin, Mootummaan waldhabbiiwwan mariin akka furamaniif waamicha nagaa deddeebi’ee taassisaa turuusaa fi har’as ittii fufuu yaadachiisaniiru. Kana cinaatti Abbootiin Gadaa, Abbootiin Amantaa, Jaarsoliin biyyaa fi hawaasni Godinichaa kan hirmaachise waamichi nagaa taasifamaa turuu dubbataniiru. Kaanis hidhattoonni 200 olii fi hoggantoonni isaanii sagal waamicha nagaa mootummaan taasise fudhachuun leenjii haaromsaa fudhatanii gara hawaaaatti makamuusaanii ibsaniiru. Yeroo dhihoos hidhattoonni biroon waamicha nagaa fudhatanii hawaasa miidhan kiisuuf leenjii haaromsaa fudhachaa jirachuusaanii dubbataniiru. Yeroo ammaa Godinichatti nagaa fi tasggabbiin waan uumameef misoomni hunda galeessii fi sochiin hawaasummaa saffisaa jiraachuu dubbataniiru.

Onkoloolessa14/2018(TOI)-Fooramiin Xaanaa 11ffaan Magaalaa Baahir Daaritti gaggeeffamuu eegaleera. Har’a Onkoloolessa 14 hanga 16 bara 2018tti kan turu foramiin Xaanaa 11ffaan Magaalaa Baahirdaaritti eegaleera. Fooramicharratti Ministirri dhimma Alaa Dr.Geediyoon Ximootiwoos, Bulchaa Naannoo Amaaraa Araggaa Kabbadaa Dabalatee Qondaaltonni Biyyoota Afriikaa, Addunyaa fi Qondaaltonni hojii ardii argamaniiru. Fooramiin Xaanaa mataduree “Afriikaan sirna addunyaa Jijijjiiramaa keessatti” jedhuun Magaalaa Baahir Daarii fi Finfinneetti dhimma nageenya Afriikaarratti guyyoota sadiif kan mari’atan ta’a. Hoggantoonni Biyyoota Afriikaa fi ogeeyyiin hirmaatan dhimma nageenya Afriikaa fi furmaata Afriikaarratti Muuxannoo fi beekumsa isanii akka qoodan qaama sagantaa fooramichaa eegamaa jiruuti. Fooramicharratti hoggantonnii fi sadarkaa Ministiroota Dhimma Alaatti, sadarkaa Ergamtoota addaa Ardii fi dhaabbilee Idil Addunyaatti mariin ni gaggeeffama.

Onkoloolessa 14/2018(TOI)-Hooggantoota Afriikaa fi qooda fudhattoota dhimmoota nagaa fi tasgabbii Ardiirratti mariisisuun furmaattota fulla’aa qiyyaasuuf akeekamee kan gaggeeffamu waltajjiin nagaa fi tasgabbii Xaanaa 11ffaan har’a magaalaa Bahaar Daaritti ni eegalama. Jilli biyyoota garagaraa foramii Xaanaa har’a eegalamurratti hirmaachuuf kaleessa Bahaar Daar galuunsaanii ni beekama. Akkasumas foramichi boruu fi iftaan Finfinneetti akka itti fufu beekameera.

Onkoloolessa 13/2018(TOI)-Jilli biyyoota garagaraa foramii Xaanaa 11ffaa boru jalqabamurratti hirmaachuuf Bahaardaar gala jiru. Waltajjiin nagaa fi tasgabbii i Xaanaa 11ffaa hooggantoota Afriikaa fi qooda fudhattoota irratt mariisisuun furmaatilee fulla’aa qiyyaasuuf akeekamee adeemsifamu Onkoloolessa 14 amma 16 bara 2018 Bahaar Daarii fi Finfinneetti ni gaggeeffama. Bulchaan naannoo Amaaraa Araggaa Kabbadaa, Kantiibaan Bahaar Daarii fi hooggantoonni olaanoo naannichaa biroon garee jilaa kana simataniiru. Ministirri dhimma alaa doktar Geediyoon Ximootiwoos fi de’eetaan ministira dhimma alaa ambaasaaddar Hadaraa Abarraa akkasumas keessummoonni biyyoota garagaraa fooramii Xaanaa 11ffaa nagaa fi tasgabbiirratti mari’atu irratti hirmaachuuf Bahaar Daar galaniiru. Foramiin Xaanaa boru Onkloolessa 14 irraa eegalee magaalaa Bahaar Daaritti gaggeeffamuu eegala. Foramiin kun Onkoloolessa 15 fi 16 Finfinneetti akka gaggeeffamu ministeerri dhimma alaa beeksiseera.

Onkoloolessa 13/2018(TOI)- Miseensonni Raayyaa Nageenyaa qaamolee nageenyaa biroo waliin ta’uun nagaa fi Tasgabbii Naannoosaanii eegsisuun qoodasanii bahaa jiraachuu Itti Gaafatamtuun Biiroo Bulchiinsaa fi nageenyaa Magaalaa Finfinnee Liidiyaa Girmaa ibsan. Biiroon Bulchiinsa fi Nageenyaa Magaalaa Finfinee Ayyaana Damaraa Masqalaa fi Irreecha dabalateetaateewwan adda addaa nagaan akka goolabamaniif miseensota nagenyaa qoodasaanii bahaniif sagantaan beekamtii fi galateeffannaa gaggeesseera. Itti Gaafatamtuun Biiroo Bulchiinsaa fi nageenyaa Magaalaa Finfinnee Liidiyaa Girmaa wayita kana, ayyaanota adda baabaayii bara 2018 kabajaman akkasumas taateewwan adda addaa nagaan akka xumuramaniif raayyaan nageenyaa qooda gumaachaniif galateeffataniiru. Uummanni Abbaa nageenyaa akka ta’uu gochuurratti jiraattonni gurmaa’insa nagaa fi tasagabbii adda addaaratti akka hirmaatan gochuu danda’uu ibsaniiru. Kanaafis ummanni nagaa fi tasgabbii Magaalichaa mirkanaa’uuf qooda mataasaa bahaa jiraachuu hubachiisaniiru. Miseensonni Raayyaa nageenyaa qaamolee nagenyaa biroo waliin ta’uun nagaa fi tasgabbii naannoosaanii eegsisuuf qooda mataasaanii bahaa jiraachuu ibsaniiru. Taateewwan fuulduratti raawwataman nagaan akka xumuramaniif itti gaafatamummaa itti kenname sirnaan bahuu akka qaban hubachiisaniiru. Ajajaan Qajeelcha poolisii waliigalaa Magaalaa Finfinnee Komishinar Geetuu Argaaw gamasaaniin, Raayyaan nageenyaa qaamolee nageenyaa waliin caalaatti qindoomuun hojii nagaa fi tasgabbii magaalichaa eegsisuu cimsuu akka qaban eeraniiru. Miseensonni raayyaa nageenyaas taateewwan fuulduratti ta’an rakkoo nageenyaa tokko malee akka raawwatamaniif qoodasaanii akka bahan mirkaneessaniiru.

Onkoloolessa 12/2018(TOI)-Ayyaanni sabaa fi sab-lammootaa 20ffaan bara kanaa tokkummaa sab-daneessummaa caalaatti haala cimsuun akka Kabajamu Manni Maree Federeshinii ibse. Guyyaa Ayyaana Sabaa fi Sab-lammoota Itiyoophiyaa 20ffaa ilaalchisuun hoggantoonni dhaabbilee Barnootaa Ayyaanicharratti hubannaa akka argataniif waltajjiin marii Adaamaatti gaggeeffamaa jira. Itti Aanaan waajjira Mana Maree Federeeshinii Obbo Balaayi Wuddishaa wayita kana akka ibsanitti, biyya ijaaruu fi guddisuuf hedduumina sirnaan qabachuu fi keessummeessuun qabna jedhaniiru. Guyyaan Ayyaana sabaa fi sablammootaa fi taatteewwan biroon tokkummaa cimsan keessummeessuun hedduumminaa fi tokkummaa sabdaneessummaa Sirnaan Idileessuuf faayidaa guddaa qabaachuu dubbataniiru. Ayyaanicha waggaa waggaan kabajuu qofa osoo hin ta’iin Lammiileen Barsiisa Heeraarratti hubannaa seera qabeessa akka argataniif hojiiwwan adda addaa raawwatamaa jiraachuu ibsaniiru. Waggoottan darban barsiisa Federaalisimii fi HeeraMootummaarratti xiyyeefatamanii hojiiwwanhojjetamaniin ittifufiinsa misoomaa fi guddina biyyaarratti, tokkummaa sab-daneeessummaa fi tokkummaa biyyaa cimsuurratti hojiin bu’aa qabeessi hojjetamuu eraniiru.Ayyaanni Sabaa fi sablammoota yeroo 20ffaa bara kana kabajamu tokkummaa sab-daneessummaa caalaatti cimsuuf bal’inaan kan hojjetamu ta’uu ibsanaiiru. Akkasumas Barsiifata Federaalizimii fi Heera Mootummaarratti lammiileef hubannaa fooyya’aa uumuuf haala dandeessisuun akka kabajamu dubbataniiru. Ayaanicha haala karoorfameen kabajuun akka danda’amuuf hayyoonni, hoggantoonni sadarkaa sadarkaan jiran fi qoda fudhattoonni qooda isaan irraa eegamu akka bahan hubachiisaniiru. Itti gaafatamaan waajjira Ministeera Barnoota Obbo Geetaachoo Tafarraa gamasaaniin, dhaabbilee olaanoorraa eegalee hoggantoonnii fi ogeeyyiin sadarkaa sadarkaan jiran adeemsa ayyaanicha kabajuuf taassifamu keessatti hubannaan akka guddatu taassifamaa jiraachuu ibsaniiru. Kunis Lammiileen dhaabbilee barnootaa keessatti argaman Federaalizimii fi barsiifata Heera Mootummaarratti hubannaa gahaa qabatanii tokkummaa sabdaneessummaa cimsuuf akka tattaafataniif ni gargaara jedhaniiru. Guyyaan Ayyaana sabaa fi sablammoota Itiyoophiyaa 20ffaan qopheessummaa Naannoo Gidduugaleeessa Itiyoophiyaan akka kabajamu ibsamuun ni yaadatama.