Raayyaan Ittisa biyyaa Itoophiyaa seenaasaa baroota dheeraa keessatti qormaatilee fi bu’aa bahii hedduu, akkasuamas wareegama qaalii kaffaluun har’aan ga’eera.Raayyaan ittisa biyyaa dhaabbata qormaatilee hedduu injifannoon keessa qaxxaa muree hara’a ga’edha. Raayyaan qormaatilee ammayyaa, dhiibbaawwan alaa fi keessaa jiran obsaan dandamachuudhaan wabii biyyaa fi ummataa ta'ee kan dhaabbate utubaa bilisummaati. Raayaan ittisa biyyaa dirree waraanaatti gootummaa fi dandeettii loltummaa gita hin qabne agarsiisuu isaatiin qofa osoo hin taane; naamusawwan waraanaa ol'aanaa ittiin beekamuun, aantummaa uummataa kan qabuu fi ofirra biyyaaf aarsaa kaffaluun uumata biratti baay’ee kan jaallatamuu fi kabajamudha. Qajeeltoon kun icciitii cichoominasaa yoo ta'u, tokkoon tokkoo miseensa raayyaa Ittisa biyyaa fedhii isaa, nageenya fi lubbuu isaa birmadummaa biyyaa fi ummataatiif dabarsees kennuuf kan isa qopheessu duudhaa jiraataadha. Har'as naamusaa fi duudhaasaa biyyaalessaa jabaa kana bu’uura godhachuun birmadummaa biyyaa kabachiisuuf fi diinota nageenya biyyaa booressuuf socho'an faccisuudhaan injifannoo irrati injifannoo dabaluun seenaa Itoophiyaa cimsuun itti gaafatamummaa isaa dandeettii ol'aanaadhaan bahachaa jira. Raayyaan Ittisa biyyaa bakka kamittuu iddoo itti seeraa kabachiisee fi nagaa mirkaneesse maratti hojiin isaa dirqama waraanaan qofa kan daangeffame miti. Isaan olitti uummata tasgabbeesuu, xiinsammuusaa haaressuu, bu’uuraalee misoomaa barbaada’an deebisanii ijaaruu adda durummaan ni raawwata. Amalli hojii fi kutannoon raayyaa ittisa biyyaa yeroo nagaa fi boqonnaa isaaniittis qophii olaanaa taasisuu leenjii jabaa, beekumsaa fi teeknooloojiidhaan dandeettii isaanii gabbisuun waamicha biyyaalessaa fi dirqama fuulduraatiif qophiitti jiraachuu isaanii mirkaneessa. Raayyaan Ittisa biyyaa qormaatilee baay'ee keessa darbe, jaalala fi deeggarsa ummataatiin kan cime wabii biyyaa fi gaachana hin cabne, gaachanaa fi dahoo jabaadha. Injifannoo wareegamaan argame Itoophiyaan seenaa ishee keessatti biyya bilisummaa fi birmadummaa isheetiif wareegama kaffaluun eenyummaa ishee kabachiifattedha. Birmadummaa fi kabajni biyya seena-qabeettii kanaa osoo hin sarbamiin hanga har'aatti turuu kan danda'e ammoo goota Raayyaa Ittisa Biyyaa baroota keessatti dhiigaa fi lafee isaatiin biyya dhaaban waan qabduufi. Raayyaan Ittisa Biyyaa Itoophiyaa bu'uura jiraachuu biyyaa, wabii nageenya uummataa fi humna cimaa agarsiistuu jaalala biyyaati. Hundeen seenaa raayyaa ittisa biyyaa imala birmadummaa biyyaa waliin kan walqabatedha. Injifannoo Adwaa irraa eegalee hanga ijaarsa ittisa biyyaa ammayyaatti, raayyaan kun ergama daangaa biyyaa eeguu dandeettii fi gahumsa olaanaadhaan ba’achaa tureera. Weerartoonni alaa birmadummaa biyyaa sarbuuf yeroo yaalanitti, raayyaan kun bifa adda addaatiin gurmaa’ee fi hiriiree wareegama kaffaluun biyya kabachiiseera. Imaanaan seenaa kun har'as itti fufee, tooftaa waraanaa ammayyaa, teeknoolojii fi hoj-maata saayinsaawaa qindeessuudhaan ergama daangaa samii fi daangaa lafa biyya ciminaan eeguu ba'achaa jira. Raayyaan ittisa biyyaa diina daangaa biyya isaa sarbe mogolee diinaa cabsee deebisuu fi olaantummaa seeraa kabachiisuudhaan hojii ol aanaa hojjetaa jira.Kanaanis mootummaanis ta’e uummataan Raayyaa ittisa biyyaa amanamaa ta’ee seenaa isaan yaadatamaa asiin ga’eera. Uummanni Raayyaa wareegama cimaan birmadummaa biyyaa kabachiise cinaa dhaabbatee deeggarsa barbaachisaa taasisaa jira. Ergama Nagaa Kabachiisuu Seenaan gootummaa Raayyaan Ittisa Biyyaa Itoophiyaa barreesse biyya keessatti qofa kan daangeffame miti. Nageenya biyya keessaa kabachiisuu fi sirna heera mootummaa eegsiisuuf qabsoo taasise cinaatti, ergama nageenya eegsisuu Idil-Addunyaa keessattis maqaa gaarii fi surraa qaba. Raayyaan kun daangaa eeguu bira darbee, ergamawwan nagaa kabachiisa Dhaabbata Biyyoota Gamtoomanii fi Gamtaa Afrikaa keessatti gahumsa saayinsawaa fi amanamummaa hawaasaatiin maqaa gaarii biyyaa ol kaaseera. Kana malees balaa uumamaa ittisuu fi misooma biyyaa keessatti gahee qabuun hariiroo uummata waliin qabu caalmaatti cimseera. Itiyoophiyaan naannawaa Afrikaa Bahaatti olaantummaa tarsiimo'aa fi wabii nageenyaa ta'uushee ifatti labsuun diinaaf yaaddoo lammiileef immoo abdii, biyyaafis gaachana birmadummaa ta'eera. Riifoormii Raayyaa Ittisa biyyaa gahumsa Raayyaa guddise Raayyaa Ittisa Biyyaa Itoophiyaa gaachana birmadummaa biyyaa ta’uusaan seenaadhaan beekamu qabatamaan sadarkaa isa gitu akka argatuuf riifoormiin gaggeeffameera. Dhaabbileen barnootaa fi leenjii ittisaa saayinsii waraanaa, hoggansa tarsiimowaa fi teeknooloojiin kan badhaadhan waan ta’aniif, raayyichi balaawwan biyya keessaa fi naannoo dursee xiinxaluu fi ittisuu danda’eera. Bu’uuruma Kanaan riifoormii gaggeeffameen bu’aawwan aragamaniiru: Ajaja Paartii jalaa ba'uu: Raayyaan ittisaa meeshaa dhimma paartii siyaasa tokkoo raawwachiisu ta'uun hafee, raayyaa biyyaalessaa fi uummataa ta'ee akka gurmaa'u taasifameera. Ilaalcha tokko qabaachuu: Raayyaan ittisa biyyaa Sabummaa, amantaa fi faayidaa garee kamirraayyuu bilisa ta'uun, ilaalcha biyyaalessaa fi birmadummaa kabachiisu irratti akka xiyyeeffatu taasifameera. Tokkummaa biyyaalessaa fi birmadummaa biyyaa kabachiisuu irratti ejjennoo waltawaa tokko qabaachuu danda’ameera. Hidhannoo Ammayyaa fi Saayinsii Waraanaa: Raayyaan kun meeshaalee waraanaa ammayyaa, teeknooloojii fi saayinsii waraanaa addunyaa irra gahuun akka ijaaramu taasifamee jira Ergama isaa gahumsaan bahachuu danda’uu : Lafoo fi samii jalatti hojii hojjetuun teessuma lafaa kamirraattiyyuu rakkoo tokko malee ergama isaa baahachuun gahumsaa cimaa gonfateera. Raayyaan Ittisa Biyyaa Itoophiyaa seenaa gootummaa fi jaalala biyyaa bu’uura godhachuun, saayinsii waraanaa ammayyaa fi teeknooloojii ol’aanaa haammateen riifoormii fi dandeettii ijaarrachuu raawwateera. Wabii Nageenya Naannoo: Daangaa biyyaa eeguun cinaatti, nageenyaa fi tasgabbii Gaanfa Afrikaarratti qooda olaanaa taphachuu danda'uun gahumsa agarsiiseera. Diinni keessaa fi alaan qindoomuun imala badhaadhina Itoophiyaan eegalte gufachiisuun waraana labsuu hanga jeequmsa babal'isuutti yeroo gahan raayyaan ittisa biyyaa aarsaa lubbuu fi wareegama, akkasumas halkanii guyyaa roobaa, qorraa fi gammoojjii osoo hin jedhiin cichoominaan birmadummaa biyyaa kabachiisuu danda'eera. Rifoormiin dhaabbilee nageenyaa kun gama hundaan tokkummaan lammilee Itiyoophiyaa akka cimuufis gumaacha guddaa taphateera. Duudhaalee Raayyaa ittisa biyyaa 1.Naamusa fi Ummatummaa: Dirree waraanaatti gootummaa agarsiisuu qofa osoo hin taane, ummata gargaaruu, bu'uuraalee misoomaa deebisanii ijaaruu fi deeggarsa xiinsammuu deebisuu irratti dhiyeenyaan hojjetu. 2.Qophiitti Jiraachuu: Yeroo nagaattis leenjii jabaa, teeknoolojii fi beekumsa waraanaa ammayyeessuun waamicha biyyaalessaa kamiiyyuu simachuuf qophaa'oo ta'anii jiraatu 3.Biyyaaf dursa kennuu : Fedhii fi jireenya dhuunfaan olitti birmadummaa biyyaa, nagaa fi tas-gabbii biyyaatiif dursa kennanii tajaajiluun duudhaa isaanii isa guddaadha. #BiyyaGuddoo #UmmataGuddaa #MulataGuddaa Miseensa Maatii ENA ta’aa : https://www.ena.et/web/links

Itoophiyaan biyya seenaa dheeraa, aadaa boonsaa, duudhaa gootummaa fi birmadummaa ishee eeguu keessatti qabsoo cimaa taasisuun dhalootaa dhalootatti darbaa dhufteedha. Biyya seenaa ishee keessatti qormaatilee hedduu keessa darbitee, weerartoota ofirraa qolachuun bilisummaa ishee tikfachuu dandeesse ta’uun, biyyoota Afrikaa fi Addunyaa biroof fakkeenya taateetti.Seenaa Itoophiyaa keessatti injifannoowwan galmaa’an gootummaa uummataa, jaalala biyyaa, tokkummaa fi kutannoo birmadummaa biyyaa eegsisuuf taasifame calaqqisiisu. Seenaa biyyattii keessatti yeroo adda addaatti qormaatileen siyaasaa, dinagdee fi hawaasummaa mudatan hedduun turan. Haata’u malee, qormaatileen kunneen biyyattii abdii kutachiisuu hin dandeenye. Kanaa mannaa, uummanni Itoophiyaa rakkoolee isa mudatan qolachuuf, birmadummaa isaa tikfachuuf, akkasumas eenyummaa fi kabaja biyya isaa eegsisuuf tokkummaa fi kutannoodhaan dhaabbachaa tureera. Kunis Itoophiyaan biyya qormaatilee keessatti jabaattee, injifannoo irraa barattee gara fuulduraatti tarkaanfachuu dandeessu ta’uu ishee mirkaneessa. Injifannoon Adawaa seenaa gootummaa fi birmadummaa Itoophiyaa keessatti bakka olaanaa qaba. Injifannoon kun qofa seenaa waraanaa osoo hin taane, mallattoo bilisummaa, ofitti amanamummaa fi dandeettii uummanni Itoophiyaa tokkummaa isaatiin humnoota isa weeraruuf dhufan qolachuu danda’u ta’uu isaati. Injifannoon Adawaa uummattoota Afrikaa fi saboota kolonii jala turaniifis abdii fi kaka’umsa ta’uun, bilisummaa fi kabaja ofii argachuuf qabsoon godhamu bu’aa qabaachuu akka danda’u agarsiiseera. Gootummaan abbootii keenyaa Itoophiyaa har’as seenaa keessatti yaadatamee kan hafuu qofa miti.Duudhaaleen abbootarraa dhaalle, kanneen akka jaalala biyyaa, tokkummaa, obsa, kutannoo fi birmadummaa biyyaa tiksuu, dhaloota har’aatiif bu’uura cimaa ta’anii jiru. Biyya ijaaruu fi cimsuun dirqama dhaloota tokko qofaan xumuramu osoo hin taane, dhaloota irraa dhalootatti darbuudha. Dhaloonni har’aa seenaa gootummaa abbootii isaa irraa barachuun, nageenya, tasgabbii, misooma fi badhaadhina waaraa mirkaneessuuf gahee isaa bahachuuf hojiilee eegalamee cimsee itti fufsiisa jira. Itoophiyaan biyya saboota, sablammootaa fi uummattoota garaagaraa, afaanota, aadaa fi duudhaa hedduu qabduudha. Garaagarummaan kun yoo sirnaan kabajamee, walqixxummaan yoo mirkanaa’ee fi dantaa waliinii irratti waliigalteen yoo cime, humna biyya guddisu ta’a. Tokkummaan Itoophiyaa jechuun garaagarummaa dhabamsiisuu osoo hin taane, garaagarummaa jiru kabajaa fi walitti dhufeenya cimsaa dantaa biyyaalessaa irratti waliin hojjechuudha. Tokkummaan akkasii birmadummaa biyyaa eeguuf, nageenya waaraa ijaaruuf, akkasumas misooma itti fufiinsa qabu milkeessuuf murteessaa dha. Har’a Itoophiyaan seenaa ishee boonsaa irraa humna argachuun gara guddina dinagdee, jijjiirama hawaasummaa fi ijaarsa biyya ammayyaatti ce’aa jirti. Hojiileen misoomaa dameewwan qonnaa, industirii, bu’uuraalee misoomaa, tuurizimii, teeknooloojii fi humna namaa irratti hojjetamaa jiran carraa dinagdee bal’isuuf, oomishtummaa guddisuuf, akkasumas jireenya uummataa fooyyessuuf bu’uura ta’u. Milkaa’inni dameewwan kanaa garuu qabeenya uumamaa qofa irratti kan hundaa’u osoo hin taane, humna namaa, hojii cimaa, itti gaafatamummaa fi hirmaannaa uummataa irratti hundaa’a. Misoomni jaalala biyyaa irraa maddu biyya ofii cimsuu fi qabeenya ishee sirnaan itti fayyadamuun mul’ata. Lammiin biyya isaa jaallatu qabeenya biyyaa kunuunsa, hojii isaa amanamummaadhaan hojjeta, seera kabaja, nageenya eeguu keessatti hirmaata, akkasumas rakkoolee hawaasaa furuuf qooda fudhata. Kanaafuu, jaalalli biyyaa jecha qofaan osoo hin taane, hojii guyyaa guyyaa, itti gaafatamummaa fudhachuu fi bu’aa uummataaf buusuun mirkanaa’a. Guddina dinagdee ariifachiisuuf qabeenya biyyattii jiran gara oomisha, hojii uumuu fi galii uummataa dabaluutti jijjiiruun barbaachisaa dha. Qonnaan bultoonni oomishtummaa isaanii guddisuun, dargaggoonni kalaqaa fi teeknooloojiitti fayyadamuun, abbootiin qabeenyaa invastimantii babal’isuun, akkasumas dhaabbileen mootummaa tajaajila qulqullina qabu kennuun guddina biyyaaf gumaacha olaanaa taasisuu danda’u. Hojiiwwan akkanaa keessatti tokkummaan, amanamummaan fi kaayyoo waliinii qabaachuun bu’aa argamu saffisiisa. Gama kanaan, Itoophiyaan seenaa birmadummaa ishee irraa barachuun, injifannoowwan darban bu’uura godhachuun, gara fuulduraatti tarkaanfachuu qabdi. Seenaa boonsaa qabachuun qofti gahaa miti; seenaa sana irraa barachuun rakkoolee yeroo ammaa furuun, carraawwan jiranitti fayyadamuun, dhaloota dhufuuf biyya caalaatti nageenya qabdu, badhaate fi dandeettii guutuu qabdu dhaalchisuun barbaachisaadha. Kunis mootummaa, uummata, dhaabbilee hawaasaa, damee dhuunfaa fi dhaloota dargaggootaa hunda irraa hojii waloo gaafata. Keessumaa dargaggoonni har’aa itti gaafatamummaa guddaa qabu. Isaan humna hojii, kalaqa, beekumsaa fi jijjiirama biyyattii saffisiisuu danda’anidha. Gootummaa abbootirraa dhaalan gara kalaqa, barnoota, qorannoo, oomisha, hojii uumuu fi tajaajila uummataatti jijjiiruun, biyya utubuu fi cimsuu keessatti qooda olaanaa bahachuu qabu. Dargaggoonni seenaa biyya isaanii beekanii, duudhaa gaarii irraa baratanii, beekumsaa fi ogummaa isaanii guddisuun, rakkoolee biyya isaanii furuuf yoo hojjetan, Itoophiyaan gara badhaadhina waaraatti saffisaan ce’uu dandeessi. Dargaggootaaf hojii uumuu, carraa barnootaa babal’isuu, dandeettii isaanii guddisuu fi hirmaannaa isaanii mirkaneessuunis murteessaa dha. Dargaggoonni abdii kutachuu irraa fagaachuun, nageenya fi tokkummaa isaanii kabajanii, yaada haaraa maddisiisuu fi hojii bu’aa qabu irratti bobba’uun guddina biyyaaf gumaacha olaanaa taasisuu danda’u. Gootummaan yeroo ammaa dirree waraanaa qofa irratti kan mul’atu miti; saayinsii fi teeknooloojii keessatti kalaqa uumuu, oomisha biyya keessaa guddisuu, hojii uumuu, malaammaltummaa mormuu fi tajaajila uummataaf amanamummaadhaan hojjechuunis gootummaa yeroo ammaa ti. Walumaagalatti, Itoophiyaan seenaa birmadummaa ishee eeguu, weerartoota qolachuu fi injifannoo galmeessuu keessatti fakkeenya taateetti. Seenaa kana keessatti humni ishee guddaan tokkummaa uummataa, jaalala biyyaa, kutannoo fi aadaa walta’iinsaa ture. Har’as gatiiwwan kana cimsuun, garaagarummaa kabajuun, misooma itti fufiinsa qabu irratti waliin hojjechuun barbaachisaadha. Injifannoowwan kaleessaa yaadachuun qofti osoo hin taane, isaan irraa humna argachuun hojii har’aa milkeessuun dirqama dhaloota ammaa ti. Itoophiyaan biyya guddoo, uummata guddaa fi mul’ata guddaa qabdu ta’uun ishee seenaa darbe qofa irratti kan hundaa’u miti; humna uummata ishee, qabeenya ishee fi fedhii misoomaa gara fuulduraatti qabdu irrattis hundaa’a. Kanaaf, mootummaa fi uummanni, keessumaa dhaloonni dargaggootaa, tokkummaa fi jaalala biyyaa bu’uura godhachuun biyya cimsuu, misooma ariifachiisuu fi badhaadhina waliinii dhugoomsuuf waliin hojjechuu qabu. Kun karaa seenaa boonsaa Itoophiyaa itti fufsiisanii dhaloota dhufuuf biyya cimtuu, badhaate fi kabajamtuu taate dhaalchisanidha. #BiyyaGuddoo #UmmataGuddaa #MulataGuddaa Miseensa Maatii ENA ta’aa : https://www.ena.et/web/links

  Ministirri Muummee Doktar Abiyyi Ahimad har’a miseensota Kaabinee Mootummaa Ida’amuu muudamaaf dhiyaatan Mana Maree Bakka Bu’oota Ummataatti dhiyeessuun, muudamni isaanii akka ragga’u taasisaniiru. Muudamni miseensota Kaabinee kun dandeettii fi fedhii uummata tajaajiluu, qophii barnootaa, muuxannoo hojii fi bu’aqabeessummaa waliigalaa bu’uura godhatee kan raawwatamedha. Akka waliigalaatti, itti gaafatamummaa fi imaanaa guddaan Itoophiyaa gara sadarkaa guddinaa fi olka’iinsaa fooyya’aatti ceesisuu isaan irra kaa’ameera. Kana malees, raawwii hojii olaanaadhaan guddina biyyattii itti fufsiisuu fi jireenya guyyaa guyyaa lammiilee keessatti jijjiirama mul’atu fiduuf ciminaan hojjechuun isaan irraa eegama. Mootummaan Ida’amuu itti fufiinsa dhaabbilee, ijaarsa sirnaa fi bu’aqabeessummaa tajaajila uummataa irratti hundaa’uun adeemsa ijaarsa biyyaalessaa itti fufsiisuuf xiyyeeffannoo guddaa kennuun akka hojjetu ni eegama. Milkaa’inni dhaabbilee mootummaa kan madaalamu tajaajila uummataaf saffisaa, si’aawaa fi bu’a qabeessa ta’een waan ta’eef, ministiroonni haaluma kanaan qophaa’anii hojjechuu qabu. Lammiileen fayyadamaa akka ta’an mirkaneessuu fi tajaajiltoota dhugaa uummataa ta’uuf ciminaan hojjechuu qabu. Ministirri Muummee Doktar Abiyyi Ahimad, kaadhimamtoonni miseensota Kaabinee Mootummaa Ida’amuu dandeettii fi fedhii hojii raawwachuu, muuxannoo hojii fi qophii barnootaa akka ulaagaalee bu’uuraa ta’anitti fudhatamuun, fayyadamummaa lammiilee mirkaneessuu fi tajaajiltoota dhugaa uummataa ta’uuf qophaa’uu akka qaban hubachiisaniiru. Muudamni mootummaa “kan ittiin bashannanan osoo hin taane, kan ittiin hojjetan” fi imaanaa uummataa olaanaa ta’uu kan eeran Ministirri Muummee Doktar Abiyyi Ahimad, miseensonni Kaabinee biyya isaanii fi uummata isaanii amanamummaa fi qulqullina yaadaatiin tajaajiluuf ciminaan akka hojjetan dhaamaniiru. Mootummaan Ida’amuu carraa biyya bulchu argate kanaan, hojiiwwan misoomaa jalqabaman itti fufsiisuu, ijaarsa dhaabbilee cimsuu, olaantummaa seeraa mirkaneessuu fi fayyadamummaa lammiilee itti fufsiisuuf hojjechuun isaa eegama. Mootummaa Ida'amuu. Biyya Guddoo, Ummata Guddaa fi Mul'ata Guddaa

Onkoloolessa 3/2019 Ministirri Muummee Dr. Abiyyi Ahimad har'a hoogganoota armaan gadii muudanii jiru. Maqaa Hoogganoota Dhaabbilee Mootummaa Ida’amuu RDFI Keessatti Muudamanii  

  Itoophiyaan filannoo biyyaalessaa marsaa 7ffaa booda Mootummaa Ida’amuu haaraa hundeessuun boqonnaa siyaasaa fi bulchiinsaa haaraa keessa seenteetti. Mana Maree Bakka Bu’oota Uummataatti Dr. Abiyyi Ahimad Muummee Ministiraa ta’uun erga muudamanii fi kakuu raawwatanii booda, mootummaa haaraa hundeessuun Imalli badhaadhinaa Itoophiyaa deemsa isaa cimse itti fufeera. Hundeeffamni mootummaa haaraa kun imala siyaasaa, dinagdee fi hawaasummaa Itoophiyaa keessatti hiika guddaa qaba. Mootummaan Ida’amuu yaad-rimee garaagarummaa kabajuu, humnoota adda addaa walitti fiduu, tumsa cimsuu fi kaayyoo waliinii galmaan ga’uuf waliin hojjechuu irratti hundaa’a. Itoophiyaan yaad-rimee kana filachuun guddina dinagdee, tokkummaa biyyaalessaa, qindoomina dameewwan misoomaa fi dandeettii lammiilee fayyadamuun jijjiirama fiduu irratti xiyyeeffachuu ishee ibsa. Mootummaan Ida’amuu Maal Jechuudha? Mootummaan Ida’amuu jechuun garaagarummaa jiru hubachuu fi kabajuun, humnoota, yaadota, beekumsa, dandeettii fi qabeenya adda addaa kaayyoo waliinii galmaan ga’uuf walitti fiduun hojjechuu jechuudha. Yaad-rimeen kun garaagarummaa akka gufuu guddinaatti osoo hin taane, akka madda humnaa, kalaqaa fi carraa misoomaatti ilaala. Akka kitaaba Mootummaa Ida’amuu fuula 7 irratti ibsametti, Mootummaan Ida’amuu mootummaa falaasama Ida’amuu irratti hundaa’uun hojjetu yoo ta’u, mootummaa misoomawaa (Developmental State) ta’ee jijjiirama caasaa irratti xiyyeeffata. Duudhaalee, qabeenya, aadaa, kennaa fi dandeettii hawaasni qabu walitti fiduun humna dhuunfaa caalaa bu’aa guddaa akka argamsiisu amana. Walitti dhufeenya, walhubannaa fi qindoomina cimsuun qabeenyaa fi horata uumuuf murteessaa ta’uu irratti xiyyeeffata. Akkasumas, walitti dhufeenya hawaasaa keessatti madaallii eeguu, fakkoommiiwwan biyyaalessaa garaagaraa walitti fiduun hawaasa siyaasaa fi dinagdee ijaaruu, olaantummaa seeraa kabajuu fi jijjiirama itti fufiinsa qabu mirkaneessuu irratti hundaa’a. Ilaalchi isaa kaleessa, har’aa fi egeree walitti hidhuun jijjiirama waaraa fiduu irratti xiyyeeffata. Kanaaf, Mootummaan Ida’amuu sirna siyaasaa,seera, bulchiinsaa, dinagdee, haqaa, misoomaa fi hawaasummaa qajeeltoowwan kanneen irratti hundaa’e ijaaruuf kan kaayyeffatefi daandii badhaadhinaa damdaneessa horfdofa. Itoophiyaan biyya saboota, sablammootaa fi ummattoota afaan, aadaa, seenaa, amantii fi duudhaa garaagaraa qaban of keessatti qabduudha. Haala kana keessatti, garaagarummaa kabajuu, walhubannaa cimsuu, dandeettii jiru qindeessuu fi kaayyoo waliinii irratti hojjechuun bu’uura yaad-rimee Ida’amuu keessaa isa tokko ta’a. Ida’amni garuu garaagarummaa balleessuu, eenyummaa namootaa ukkaamsuu ykn namoonni hundi yaada tokko qofa akka qabaatan dirqisiisuu miti. Kanaa mannaa, namoonni yaada, ilaalcha, dandeettii fi muuxannoo garaagaraa qaban garaagarummaa isaanii kabajanii, faayidaa waliinii irratti waliigaltee uumuun rakkoolee waloo furuuf waliin hojjechuu jechuudha. Yaadamni Ida’amuu kun siyaasaa fi bulchiinsa qofarratti kan daangeffamu miti. Dinagdee, hawaasummaa, aadaa, barnoota, saayinsii, teeknooloojii fi hariiroo biyyoota biroo waliin taasifamu keessatti hojii irra ooluu danda’a. Kaayyoon isaa humnoota adda addaa walitti fiduun bu’aa waliinii uumuu, dandeettii jiru guutummaatti fayyadamuu fi guddina itti fufiinsa qabu mirkaneessuuf hojjechuudha. Amaloota Ijoo Mootummaa Ida’amuu 1. Garaagarummaa kabajuu fi tokkummaa cimsuu Amalli ijoo Mootummaa Ida’amuu keessaa tokko garaagarummaa kabajuu fi humnoota garaagaraa kaayyoo waliiniif walitti fiduudha. Itoophiyaan qabeenya aadaa, afaanii, seenaa fi duudhaa bal’aa qabdi. Qabeenyi kun sirnaan yoo qindaa’e, tokkummaa biyyaalessaa cimsuu, walhubannaa guddisuu fi misooma biyyattii saffisiisuu keessatti gahee olaanaa qaba. Ilaalcha kanaan, garaagarummaan akka sababa walitti bu’iinsaatti osoo hin taane, akka carraa walirraa barachuu fi waliin guddachuuf gargaarutti ilaalama. Tokkummaan biyyaalessaa dhugaan garaagarummaa ukkaamsuun osoo hin taane, mirga, kabaja fi faayidaa waliinii kabajuun ijaarama. 2. Tumsa, marii fi waliigaltee irratti hundaa’uu Amalli lammaffaan Mootummaa Ida’amuu tumsa, marii fi waliigaltee irratti xiyyeeffachuudha. Rakkooleen biyya tokko mudatan hedduun qaama tokko qofaan furmaata argachuu hin danda’an. Kanaaf, qaamoleen mootummaa, dhaabbileen dhuunfaa, hawaasni, ogeeyyiin fi uummanni waliigalaan gahee isaanii bahachuun barbaachisaa dha. Marii bu’a qabeessa taasisuun, yaada garaagaraa dhaggeeffachuun, walhubannaa uumuu fi furmaata waliinii irratti hojjechuun rakkoolee furuuf murteessaa dha. Kana malees, hirmaannaa uummataa guddisuun, iftoomina mirkaneessuun fi itti gaafatamummaa cimsuun bulchiinsa gaarii ijaaruuf bu’uura ta’u. 3. Misooma dameewwan walitti hidhatan mirkaneessuu Amalli sadaffaan misooma dameewwan adda addaa walitti hidhuun raawwachuudha. Akka ilaalcha Ida’amuu keessatti, misoomni damee tokkoo damee biraa irraa adda ba’ee ilaalamuu hin qabu. Dameewwan dinagdee walitti hidhata waan qabaniif, damee tokko irratti hojjechuun bu’aa dameewwan biroo irrattis dhiibbaa qaba. Fakkeenyaaf, qonni oomisha dabaluuf teeknooloojii, humna ibsaa, geejjiba, gabaa fi warshaalee waliin walitti hidhata qaba. Oomishni qonnaa yoo dabale, warshaaleen oomisha qonnaa irraa argamu fayyadamuun oomishaalee dabalataa oomishuu danda’u. Geejjibni fi bu’uuraaleen misoomaa yoo fooyya’an, oomisha gara gabaa geessuun salphata. Kanaaf, dameewwan misoomaa qindoominaan guddisuun oomishtummaa dabaluun, carraa hojii uumuu fi dinagdee cimsuu keessatti gahee olaanaa qaba. 4. Dandeettii namaa, kalaqaa fi teeknooloojii fayyadamuu Mootummaan Ida’amuu dandeettii namaa, beekumsa, saayinsii, teeknooloojii fi kalaqa walitti fiduun rakkoolee furuuf xiyyeeffata. Biyyi tokko qabeenya uumamaa qofa irratti hirkachuu osoo hin taane, beekumsa fi dandeettii lammiilee ishee guddisuun guddina waaraa galmaan ga’uu dandeessi. Kanaaf, barnoota qulqullina qabu babal’isuu, dandeettii ogummaa guddisuu, qorannoo saayinsii jajjabeessuu fi teeknooloojii haaraa hojii irra oolchuun barbaachisaa dha. Dargaggootaaf carraa hojii uumuu, kalaqa deeggaruu fi oomishtummaa guddisuunis bu’uura misooma Ida’amuu keessaa isa tokko. 5. Qabeenya jiru qindeessuun bu’aa guddaa argamsiisuu Qabeenyi uumamaa, humni namaa, beekumsi, maallaqni fi bu’uuraaleen misoomaa sirnaan yoo qindaa’an bu’aa guddaa argamsiisuu danda’u. Ida’amni qisaasama qabeenyaa hir’isuun, humna jiru gara hojii bu’a qabeessaatti jijjiiruun fi carraawwan jiran walitti hidhuun bu’aa waliinii guddisuuf yaala. Fakkeenyaaf, qonnaan bulaan oomisha isaa gara gabaa geessuuf geejjiba, odeeffannoo gabaa fi tajaajila faayinaansii yoo argate galii isaa guddisuu danda’a. Akkasumas, dargaggoonni beekumsa teeknooloojii qaban dhaabbilee oomishaa fi tajaajilaa waliin yoo hojjetan, carraa hojii uumuu fi dinagdee cimsuu keessatti gahee guddaa bahachuu danda’u. 6. Haqa, itti gaafatamummaa fi bulchiinsa gaarii cimsuu Yaadamni Ida’amuu hojii irra ooluu kan danda’u dhaabbileen mootummaa itti gaafatamummaa qaban, seera kabajan, haqaan hojjetan fi uummataaf tajaajila kennan yoo jiraatanidha. Kanaaf, haqni, walqixxummaan carraa, iftoomni, olaantummaan seeraa fi malaammaltummaa ittisuun milkaa’ina mootummaa keessatti iddoo olaanaa qabu. Akkasumas, uummanni murtoowwan isa ilaallatan keessatti hirmaachuu, komii isaa dhiyeeffachuu fi tajaajila mootummaa argachuuf carraa walqixa qabaachuu qaba. Kunis amantaa uummataa cimsuun mootummaa fi uummata gidduutti hariiroo gaarii uuma. Itoophiyaan Maaliif Maqaa “Mootummaa Ida’amuu” Filatte? Itoophiyaan maqaa “Mootummaa Ida’amuu” filachuun yaadamaa Mootummaa Ida’amuu fi Paartiin Badhaadhinaa guddina biyyaalessaa, tokkummaa, tumsa fi jijjiirama dinagdee ittiin ibsan waliin walqabata. Ilaalchi kun humnoota biyyattii keessa jiran walitti fiduun, qabeenya jiru qindeessuun fi kaayyoo guddinaa waliinii galmaan ga’uuf hojjechuun barbaachisaa ta’uu ibsa. Itoophiyaan garaagarummaa afaanii, aadaa, seenaa fi muuxannoo bal’aa qabdi. Garaagarummaan kun walhubannaa, walqixxummaa fi hirmaannaa irratti hundaa’uun yoo qindaa’e, carraa guddina biyyaalessaa guddaa uuma. Sababni biraa dameewwan misoomaa walitti hidhuun guddina saffisaa fi itti fufiinsa qabu galmaan ga’uudha. Rakkoolee dinagdee, hojii dhabdummaa, oomishtummaa gadi aanaa fi hanqina tajaajila hawaasummaa furuuf qabeenya jiru qindoominaan fayyadamuun murteessaa dha. Yaadamni Ida’amuu qabeenya, dandeettii fi carraawwan adda addaa walitti fiduun rakkoolee kanaaf furmaata barbaaduu irratti xiyyeeffata. Dabalataanis, maqaan kun garaagarummaa yaadaa fi dandeettii jiru kaayyoo waliinii irratti bobbaasuun jijjiirama fiduuf yaada mootummaa ibsa. Itti Gaafatamummaa fi Milkaa’ina Mootummaa Ida’amuu Mootummaan Ida’amuu kaayyoo isaa galmaan ga’uuf hojii irra oolmaa bu’a qabeessa ta’e barbaada. Garaagarummaan yaadaa karaa nagaa fi seera qabeessa ta’een ibsamuu, komiin uummataa dhaggeeffatamuu fi murtoowwan uummata irratti dhiibbaa qaban keessatti hirmaannaan bal’aan jiraachuu qaba. Haalli akkanaa amantaa uummataa cimsuu fi bulchiinsa itti gaafatamummaa qabu ijaaruu keessatti murteessaa dha. Milkaa’inni Mootummaa Ida’amuu bu’aa qabatamaa jireenya uummataa keessatti fidaa jira. Hojii uumuu, galii maatii guddisuu, qulqullina barnootaa fi tajaajila fayyaa fooyyessuu, bu’uuraalee misoomaa babal’isuu, oomishtummaa guddisuu fi tajaajila mootummaa fooyyessuun mallattoolee milkaa’ina isaa keessaa muraasa. Hojiiwwan kunneen iftoomina, madaallii bu’aa fi itti gaafatamummaa waliin raawwatamuu qabu. Uummannis hojii mootummaa irratti odeeffannoo argachuu, raawwii isaa hordofuu fi yaada kennuu keessatti carraa qabaachuu qaba. Kunis mootummaa fi uummata gidduutti amantaa cimsuun, qabeenya uummataa sirnaan fayyadamuu fi bu’aa misoomaa fooyyessuuf gargaara. Mootummaan Ida’amuu garaagarummaa kabajuun, tumsa cimsuun, qabeenya jiru qindeessuun fi dandeettii lammiilee fayyadamuun guddina Itoophiyaa saffisiisuun kaayyoo qabatee milkeessaa jira. Yaadamni Ida’amuu garaagarummaa madda humnaa taasisuun, hirmaannaa uummataa cimsuun fi misooma walitti hidhame hojiitti hiikuun deeggarame, guddina waaraa fi badhaadhina waliinii ijaaruu keessatti gumaacha guddaa qabaahaachaa jira.

Onkololeessa 3/2019 (ENA) Dhaaltuun Mootummaa Sa'udii Arabiyaa Mohammad bin Salman bin Abdulaziz Al Sa'ud, Ministira Muummee Dr. Abiyyi Ahimadiif ergaa baga gammaddanii dabarsaniiru. Manni Maree Bakka Bu'oota Ummataa 7ffaan bara hojii 1ffaa fulbaana 25/2019 walga'ii idilee 1ffaa hundeeffama mana marichaa irratti Dr. Abiyyi Ahimad ministira muummee moggaaseera. Dhaaltuun mootummaa Sa’udii Arabiyaa Mohammad bin Salman bin Abdulaziz Al Sa'udii ergaa dabarsaniin, Ministira Muummeetiif baga gammaddan jechuun hawwii gaarii qaban ibsaniiru. Dhaaltuun mootummaa Ministira Muummeetiif milkaa'ina, ummata Itoophiyaatiif immoo guddinaa fi badhaadhina ittifufinsa qabu akka tahu hawwaniiru.

Onkololeessa 3/2019 (ENA):- Ministirri Muummee Doktar Abiyyi Ahimad Ministira Muummee Israa’el Beeniyaamiin Neetaniyahuu waliin bilbilaan mariyataniiru. Dookar Abiyyi Ahimad fuula miidiyaa hawaasaa ‘X’ irratti akka ibsanitti, marii kanaan hariiroo biyyoota lamaanii fi dhimmoota ijoo naannawaa irratti marii bu’a qabeessaa taasisaniiru. Dabalataanis, tumsa biyyoota lamaanii caalaatti cimsuuf kutannoo qabuuchuu isaanii mirkaneessaniiru.

Onkololeessa 3/2019 (ENA):- Dargaggoonni humnoota hidhatan keessaa ba’uun gara jireenya nagaatti deebi’uu barbaadan Magaalaa Maqaleetti galmaa’aa jiraachuun ibsame. Naannoo Tigraayitti adeemsi hidhannoo hiikkachiisuu, humnoota hidhatan keessaa ba’uu fi gara jireenya nagaa deebisuu (DDR) addaan citee ture irra deebi’ee eegalamuu isaa hordofee, hidhattoonni gara jireenya nagaa deebi’uu barbaadan galmaa’aa jiraachuun ibsameera. Adeemsa kana itti fufsiisuuf, hidhattoonni waamicha nagaa dhihaateef fudhachuun Magaalaa Maqaleetti wiirtuu galmee Komishinii Poolisii Tigraayitti argamuun galmaa’aa akka jiran ibsameera. Dargaggoota adeemsa galmee kana irratti hirmaachaa jiran keessaa muraasni akka jedhanitti, naannoo isaanii keessatti kutaa Raayyaa Ittisa Biyyaa Itoophiyaatti argamani meeshaalee waraanaa isaanii erga kennanii booda, galmaa’uuf gara Maqalee dhufaniiru. Adeemsi DDR irra deebi’ee eegalamuu isaa, hidhattoonni sababa walitti bu’iinsaatiin jireenya rakkisaa keessa turan jireenya waraanaa keessaa ba’anii gara jireenya hawaasummaa fi dinagdee tasgabbaa’aatti akka ce’an carraa haaraa kan uumu ta’uun ibsameera. Hoggantoonni Komishinii Haaromsa Biyyaalessaa gama isaaniin, keessumaa dargaggoonni Tigraay sababa walitti bu’iinsa duraanii irraa kan ka’e rakkoolee garaagaraaf saaxilaman abdii osoo hin kutatin carraawwan gara jireenya nagaa isaan deebisanitti akka fayyadaman, akkasumas jireenya isaanii gara fuulduraa irra deebi’anii akka ijaarratan waamicha dhiheessuu isaanii ni yaadatama. Kaayyoon ijoo adeemsa DDR hidhattoonni humnoota hidhatan keessaa ba’uun gara jireenya hawaasummaa idileetti akka deebi’an, akkasumas ijaarsa nagaa fi hojiiwwan misoomaa keessatti akka hirmaatan taasisuudha. Kaayyoo kana milkeessuuf mootummaan Itoophiyaa, dhaabbileen biyya keessaa fi michoonni idil-addunyaa qindoominaan hojjechuun deeggarsa taasisuun murteessaa ta’uunis eerameera. Hidhattoonni yeroo galmaa’an dubbisne keessaa muraasni, adeemsi DDR irra deebi’ee eegalamuu isaa jireenya hidhannoo keessaa ba’anii gara jireenya nagaa ce’uuf tarkaanfii barbaachisaa ta’uu ibsaniiru. Dabalataanis, Komishiniin Haaromsa Biyyaalessaa hidhattoonni galmaa’uu barbaadan Magaalaa Maqaleetti wiirtuuwwan Komishinii Poolisii Tigraayii fi Ajaja Kaabaa keessatti argamanitti akka galmaa’an waamicha dhiheessuu isaa ibsameera.