Onkoloolessa 5/2019 (ENA) Manni Maree bakka bu’oota uummataa walga’ii idilee 3ffaa bara hojii 1ffaa har’a gaggeesseen ramaddii Hoggantootaa fi Miseensota Koreewwan Dhaabbii ilaalchisee yaada murtoo dhihaate irratti marii’atee raggaaseera. Haaluma kanaan hoggantonni Koreewwan Dhaabbii moggaafaman:   1. Qana'aa Yaadataa (PhD): Walittiqabaa Koree Dhaabbii Dhimmoota Seeraa fi Haqaa 2. Obbo Taarjaat Dabol: Itti aanaa Walittiqabaa Koree Dhaabbii Dhimmoota Seeraa fi Haqaa 3. Obbo Mallasaa Mannaa: Walittiqabaa Koree Dhaabbii Dhimmoota Qonnaa 4. Dr.Issubaalaw Mabraatuu: Walittiqabaa Itti aanaa Koree Dhaabbii Dhimmoota Qonnaa 5. Aadde Itsagannat Mangistuu: Walittiqabaa Koree Dhaabbii Dhimmoota Dimokiraasii 6. Obbo Caalaa Lammii: Walittiqabaa Itti aanaa Koree Dhaabbii Dhimmoota Dimokiraasii 7. Obbo Salamoon Laalee: Walittiqabaa Koree Dhaabbii Dhimmoota Daldalaa, Aadaa fi Tuuriizimii 8. Obbo Xaahir Mahammad: Walittiqabaa Itti aanaa Koree Dhaabbii Dhimmoota Daldalaa, Aadaa fi Tuuriizimii 9. Obbo Dassaalenyi Wadaajee: Walittiqabaa Koree Dhaabbii Dhimmoota Indaastrii fi Albuudaa 10. Aadde Walaayitee Iittoo: Walittiqabduu Itti aantuu Koree Dhaabbii Dhimmoota Indaastrii fi Albuudaa 11. Aadde Wasannech Toomaas: Walittiqabaa Koree Dhaabbii Dhimmoota Tarsiimoo Biyyaaleessaa, Bajataa fi Faayinaansii 12. Aadde Zinnaash Tsagaayee: Walittiqabduu Itti aantuu Koree Dhaabbii Dhimmoota Tarsiimoo Biyyaaleessaa, Bajataa fi Faayinaansii 13. Diimaa Nooggoo (PhD): Walittiqabaa Koree Dhaabbii Dhimmoota Hariiroo Alaa fi Nagaa 14. Fatihii Maahaadii (PhD): Walittiqabaa Itti aanaa Koree Dhaabbii Dhimmoota Hariiroo Alaa fi Nagaa 15. Aadde Yeshiihassaab Tsaggaaw: Walittiqabduu Koree Dhaabbii Dhimmoota Dhaabbilee Misooma Mootummaa   16. Isheetuu Tamasgan (PhD): Walittiqabaa Itti aanaa Koree Dhaabbii Dhimmoota Dhaabbilee Misooma Mootummaa 17. Obbo Alamaayyoo Ijjiguu: Walittiqabaa Koree Dhaabbii Dhimmoota Misooma Bu'uuraalee Magaalaa fi Loojistiksii 18. AwaqeeAmzaayee (PhD): Walittiqabaa Itti aanaa Koree Dhaabbii Dhimmoota Misooma Bu'uuraalee Magaalaa fi Loojistiksii 19. Abrahaam Alamaayyoo (PhD): Walittiqabaa Koree Dhaabbii Dhimmoota Baasii Mootummaa, Bulchiinsaa fi Too'annoo 20. Aadde Araaree Moosiisaa: Walittiqabduu Itti aantuu Koree Dhaabbii Dhimmoota Baasii Mootummaa, Bulchiinsaa fi Too'annoo 21. Obbo Nigaatuu Woldee: Walittiqabaa Koree Dhaabbii Dhimmoota Bishaanii, Jallisiilee, Naannoo Gammoojjii fi Misooma Naannoo 22. Aadde Nafiisaa Al-Maahidii: Walittiqabduu Itti aantuu Koree Dhaabbii Dhimmoota Bishaanii, Jallisiilee, Naannoo Gammoojjii fi Misooma Naannoo 23. Aadde Masarat Haayilee: Walittiqabduu Koree Dhaabbii Dhimmoota Fayyaa, Misooma Hawaasummaa fi Ispoortii 24. Aadde Jamiilaa Simbiruu: Walittiqabduu Itti aantuu Koree Dhaabbii Dhimmoota Fayyaa, Misooma Hawaasummaa fi Ispoortii 25. Nagarii Leencoo (PhD): Walittiqabaa Koree Dhaabbii Dhimmoota Misooma Humna Namaa, Bobbii Hojii fi Teeknooloojii 26. Aadde Zahaaraa Samree: Walittiqabduu Itti aantuu Koree Dhaabbii Dhimmoota Misooma Humna Namaa, Bobbii Hojii fi Teeknooloojii

Onkoloolessa 5/2019 (ENA): Manni Maree Bakka Bu'oota Uummataa murtoowwan adda addaa qorachuun sagalee guutuudhaan raggaasiseera. Manni Maree Bakka Bu'oota Uummataa 7ffaan bara hojii 1ffaa walga'ii idilee 3ffaa isaa gaggeesseera. Manni marichaa walga'ii idilee isaanii har'aatiin miseensota Koree gorsa dhimmoota Mana Maree moggaasuuf yaada murtoo dhihaate qoratee raggaasiseera. Akkasumas yaada murtoo sirna hojii fi caasaa, hojii fi itti gaafatama koomittee dhaabbii miseensota mana marichaa murteessuuf dhihaate qoratee raggaasiseera. Dabalataanis gaggeessitoota kaadhimamtoota Koreen dhaabbattoo fi ramaddii miseensotaa ilaalchisuun dhihaate raggaaseera.

Onkoloolessa 5/2019 (ENA)- Mootummaan ida’amuu waadaa ummataaf gale raawwachuun fayyadama ummataa mirkaneessaa jiraachuu Pirezidaantiin naannoo Hararii Ordiin Badrii.ibsan Naannoo Harariitti gamaaggamni raawwii hojii mootummaa fi paartii kurmaana jalqabaa bara bajataa 2019 gaggeeffamaa jira. Pirezidaantiin naannichaa obbo Ordiin Badrii waltajjii gamaaggamaarratti akka ibsanitti, waggoottan darban naannichatti gama hundaanuu hojiilee jajjabeessoo raawwachuun danda’ameera. Haala Kanaan fayyadamni ummataa cimuurra darbee dandeettii naannichi misoomuuf qabu guddaa dabaluusaa dubbataniiru. Xiyyeeffannoon waltajjii kanaa raawwii hojii mootummaa fi paartii kurmaana jalqabaa gamaaggamuun hojiiwwan itti aananiif od qopheessuu akka ta’e dabalanii dubbataniiru. Cimina kurmaana jalqabaa bara bajatichaa turan bal’isuun, hanqinoota jiran guutuun bu’aalee argaman gabbisuuf galteen kan itti walitti qabamuu fi kallattii fuulduraa kan kaa’amu ta’uu ibsaniiru. Mootummaan ida’amuu gama hundaanuu guddina dinagdee galmeessisuu fi biyya ceesisuu akkasumas fayyadama misoomaa ummataa guddisuudha kan jedhan pirezidaantichi, hoggansi waadaa ummataaf gale raawwachuun itti gaafatamasaa bahu qaba jedhaniiru. Af-yaa’iin mana maree naannichaa obbo Sulxaan Abdusalaam, paartii badhaadhinaatti hogganaan waajjira damee naannoo Hararii obbo Geetuu Wayyeessaa dabalatee hoggantoonni olaanoo fi jiddu galeessaa moorummaa fi paartii naannichaa waltajjicharratti hirmaachaa jiru.

Onkololeessa 5/2019 (ENA):-Wareegama guddaa ummanni Oromoo bilisummaa, mirga ofiin of bulchuu, afaan, seenaa fi aadaa isaa guddisuuf kaffaleen jijjiiramni argame tikfamee fi cimee itti fufuu akka qabu Abbaa Duulaa Gammadaa ibsan. Abbaa Duulaa Gammadaa turtii ENA waliin taasisaniin, ummanni Oromoo waggoota dheeraaf mirga isaa kabachiisuuf qabsoo hadhaa’aa gaggeessaa turuu fi lubbuu ilmaan isaa hedduu wareeguu yaadachiisaniiru. Keessumaa, waggoota dhihoo darban keessatti dargaggoonni Qeerroo fi Qarreen jijjiiramni biyya keessatti akka dhufuuf wareegama guddaa kaffaluu isaanii ibsaniiru. Akka isaan jedhanitti, kaayyoon guddaan qabsoo ummata Oromoo mirga ofiin of bulchuu, afaan isaatiin dubbachuu, akkasumas seenaa fi aadaa isaa guddisuu fi dagaagsuu danda’u mirkaneessuu ture. Kana malees, Itoophiyaa keessatti gaheen fi qoodni ummanni Oromoo qabu akka kabajamu taasisuun kaayyoo qabsoo kanaa keessaa tokko ta’uu ibsaniiru. Kaayyoon kunis hojii irra oolaa jiraachuu fi jijjiiramni argame qabatamaan mul’achaa dhufuu eeraniiru. Kanaafuu, namoonni ammas hidhatanii bosona keessa socho’an maal argachuuf akka qabsa’aa jiran of gaafachuu qabu jedhaniiru. Gaaffii fi hanqinoonni furmaata barbaadan jiraachuu akka danda’an kan ibsan Abbaa Duulaa Gammadaa, mootummaan qaamolee gaaffii qaban waliin mari’achuun rakkoolee jiran furuuf qophii ta’uu yeroo garaagaraatti ibsaa turuu yaadachiisaniiru. Wareegama guddaa kaffalameen jijjiiramni argame akka hin badneef, namoonni jijjiirama kana deeggaruu, guddina biyyattii fi badhaadhina uummataaf waliin hojjechuu, akkasumas hanqinoota jiran mariidhaan furuuf gahee isaanii bahachuu akka qaban dhaamaniiru. Keessumaa, ergaa alaa fudhachuun hidhatanii qonnaan bultoota rakkisuun gaaffii fi kaayyoo ummata Oromoo bakka bu’uu akka hin dandeenye ibsaniiru. Gocha akkanaa gaaffii Oromoo dhugaa wajjin walqabsiisuun sirrii akka hin taanees dubbataniiru. Namoonni hedduun mootummaa waliin hojjechuuf murteessanii, mootummaa keessatti hirmaachuun ummata isaanii tajaajilaa jiraachuu eeruun, namoonni hidhatanii bosona keessa jiranis gara nagaa dhufanii, gaaffii yoo qabaatan mariidhaan akka furatan waamicha dhiyeessaniiru. Dhuma irratti, namoonni hidhatanii bosona keessa jiran marii fi nagaa filachuu dhabuun isaanii wareegama ummanni Oromoo, keessumaa dargaggoonni Qeerroo fi Qarreen kaffalan gatii dhabsiisuu akka ta’e hubachuu qabu jechuun ergaa isaanii dabarsaniiru.

Galaanni Diimaan daandiiwwan daldala idil-addunyaa keessaa isa murteessaa ta’ee, dantaa dinagdee, nageenyaa fi ji’oopoolitikaa biyyoota hedduu walitti hidha. Itoophiyaaf immoo dhimma hulaa galaanaa argachuu fi itti fayyadamuu mirkaneessuun gaaffii dinagdee qofa osoo hin taane, dantaa biyyaalessaa, guddina dinagdee fi egeree biyyattii waliin kan walqabatudha. Itoophiyaan Galaana Diimaa waliin seenaa dheeraa walitti hidhaminsaa qabdi. Yeroo Itoophiyaan qarqara galaanaa qabdu keessatti, daldala, geejjibaa fi hariiroo biyyoota biroo waliin qabduuf buufatawwan doonii murteessaa ta’anitti fayyadamaa turte. Akkasumas, Galaana Diimaa fi naannawa isaa keessatti daldala, nageenyaa fi tasgabbii naannichaa mirkaneessuu keessatti gahee olaanaa qabdi turte. Haa ta’u malee, waggoota soddoma dura Ertiraan walabummaa ishee erga argattee booda, Itoophiyaan qarqara galaanaa ishee dhabdee biyya hulaa galaanaa kallattiin hin qabne taate. Haalli kun caasaa daldala alaa biyyattii irratti dhiibbaa geessisuun, geejjibaa fi loojistikii keessatti buufata doonii biyyoota ollaa irratti akka hirkattu taasiseera. Erga qarqara galaanaa dhabdee booda, Itoophiyaan daldala alaa ishee raawwachuuf buufata doonii biyyoota ollaa, keessumaa Jibuutii, irratti hirkachuu jalqabde. Hirkattummaan kun baasii geejjibaa, saffisa sochii daldalaa fi dorgommii gabaa irratti dhiibbaa geessisuu danda’a. Kanaafuu, filannoowwan buufata doonii bal’isuu, tajaajila loojistikii fooyyessuu fi hulaa galaanaa itti fayyadamuuf dandeettii cimsuun dhimma dinagdee biyyaalessaa keessatti iddoo olaanaa qaba. Ministirri Muummee Itoophiyaa, Dr. Abiyyi Ahimad, yeroo garaagaraatti Mana Maree Bakka Bu’oota Uummataa duratti dhimma hulaa galaanaa irratti yaada isaanii dhiyeessaniiru. Ibsa isaanii keessatti, dhimma kana seenaa, seera, teessuma lafaa, dinagdee fi dantaa biyyaalessaa Itoophiyaa waliin walqabsiisuun ibsaniiru. Akka ibsa isaanii keessatti kaasanitti, Itoophiyaan qarqara galaanaa dhabuu ishee irratti murtiin uummataa fi qaamolee mootummaa barbaachisoo hammate hin taasifamne. Ta’us, dhimma kanaaf furmaanni barbaadamu karaa marii, dippilomaasii fi nagaa irratti hundaa’uu akka qabu cimsanii ibsaniiru. Ministirri Muummee,Hulaan galaanaa guddina dinagdee, baay’ina uummataa fi gahee Itoophiyaan naannicha keessatti qabdu ilaalchisee, hula galaanaa argachuu fi itti fayyadamuun barbaachisaa ta’uu ibsaniiru. Akka ibsa isaanii keessatti hubatamutti, fedhiin Itoophiyaa kun walitti bu’insa uumuuf osoo hin taane, dantaa dinagdee ishee guddisuu, dorgommii gabaa cimsuu fi faayidaa uummataa mirkaneessuuf kan ka’eedha. Kanaafuu, kaayyoon Itoophiyaa dantaa biyyaalessaa ishee fi dantaa biyyoota ollaa wal simsiisuun furmaata waaraa argachuudha. Kanaafis, marii dippilomaasii, waliigaltee faayidaa waloo irratti hundaa’e fi kabaja seera idil-addunyaa bu’uura godhachuun murteessaa dha. Galaanni Diimaan karaa daldala idil-addunyaa, geejjiba anniisaa fi sochii dooniiwwan daldalaa keessatti gahee tarsiimawaa qaba. Keessumaa, karaa Baab-el-Mandeb jedhamuun Galaana Diimaa fi Galoo Galaanaa Eden wal qunnamsiisu, daldala addunyaa keessatti iddoo murteessaa qaba. Haalli teessuma lafaa kun Galaana Diimaa naannawa dorgommii dantaa biyyoota naannichaa fi humnoota idil-addunyaa taasiseera. Kanaafuu, dhimma hulaa galaanaa Itoophiyaa biyyattin fageenya kiloo meetira 50 gadi keessatti kan arggamtuu taatus hulaa galaanaa malee hafuun ishii shirri hamaan biyyatti irratti raawwachuu isaa agarsiisa. Itoophiyaan biyya baay’ina uummataa guddaa qabdu, akkasumas dinagdee ishee babal’isuuf carraaqqii gootu waan taateef, karaa geejjibaa amansiisaa fi filannoowwan buufata doonii hedduu qabaachuun dorgommii dinagdee ishee cimsuu keessatti gahee olaanaa qaba. Haa ta’u malee, fedhii kana galmaan ga’uun tasgabbii naannichaa eeguu, wal amantaa biyyoota ollaa cimsuu fi waliigaltee seera qabeessa ta’e irratti hundaa’uu qaba. Itoophiyaan hulaa galaanaa itti fayyadamuuf filannoowwan garaagaraa dhiyeessuu dandeessi. Itoophiyaan karaa kennani fudhachuun karaa seeraa idil-addunyaa malee hulaa galaanaa itti cufamee abbummaan mirkaaneeffachuu qabdi. Tarkaanfiiwwan akkanaa baasii geejjibaa hir’isuu, daldala alaa saffisiisuu, filannoowwan geejjibaa babal’isuu fi dinagdee biyyattii caalaatti dorgomaa taasisuu keessatti gumaacha qabaachuu danda’u. Kana milkeessuuf garuu marii itti fufiinsa qabu, waliigaltee iftoomina qabu, faayidaa waloo kabajuu fi seera idil-addunyaa hordofuun hojjacha jirti. Walumaagalatti, dhimma hulaa galaanaa Itoophiyaa seenaa, dinagdee, nageenya, teessuma lafaa fi dantaa ji’oopoolitikaa walitti hidhuun barbaachisaadha. Itoophiyaaf hulaa galaanaa argachuu fi itti fayyadamuun dhimma dantaa biyyaalessaa fi guddina dinagdee waliin walqabatu yoo ta’u, furmaanni waaraan karaa nagaa, marii fi waliigaltee faayidaa waloo irratti hundaa’e tasgabbii Gaanfa Afrikaa cimsuu fi hariiroo biyyoota ollaa fooyyessuu keessatti bu’uura murteessaa ta’a. #BiyyaGuddoo #UmmataGuddaa #MulataGuddaa

  Onkololeessa 5/2019 (ENA):- Qabeenyi uumamaafi aadaan Kibba Oromiyaa keessatti argamu qabeenya guddaa naannichaa fi biyya keenyaa ta’uu Sadarkaa Ittaanaa Pirezidaantiitti Bulchaan Godina Kibba Oromiyaa Obbo Ahimad Haajii ibsan. Rakkoolee nageenyaa bakka tokko tokkotti mul’atan furuun guddina akka biyyaatti eegalame itti fufsiisuuf hojjetamaa jiraas jedhan.   Hooggansi Godina Kibba Oromiyaa gurmaa’insa mootummaa haaraa milkeessuu irratti Abbootii Gadaa fi bakka bu’oota kutaalee hawaasaa godinichaa waliin Magaalaa Bulee Horaatti mari’ateera. Hirmaattonni marichaa rakkooleen nageenyaa mul’atan yoo furaman, caasaan bulchiinsaa haaraan hojiirra oole guddina biyyaatiif bu’aa guddaa akka fidu abdii qabaachuu ibsaniiru. Kibbi Oromiyaa gama hundaan jijjiiramee akka mul’atuuf hojjechuun kaayyoo Mootummaa Naannoo Oromiyaa ta’uu kan ibsan Bulchaan Itti Aanaa fi Itti Gaafatamaan Waajjira Nageenyaa Kibba Oromiyaa, Obbo Liiban Areeroo, hooggansi haaraan caasaa mootummaa kanaan ramadames galma kana milkeessuuf cimee akka hojjetu dubbataniiru. #BiyyaGuddoo #UmmataGuddaa #MulataGuddaa

Raayyaan Ittisa biyyaa Itoophiyaa seenaasaa baroota dheeraa keessatti qormaatilee fi bu’aa bahii hedduu, akkasuamas wareegama qaalii kaffaluun har’aan ga’eera.Raayyaan ittisa biyyaa dhaabbata qormaatilee hedduu injifannoon keessa qaxxaa muree hara’a ga’edha. Raayyaan qormaatilee ammayyaa, dhiibbaawwan alaa fi keessaa jiran obsaan dandamachuudhaan wabii biyyaa fi ummataa ta'ee kan dhaabbate utubaa bilisummaati. Raayaan ittisa biyyaa dirree waraanaatti gootummaa fi dandeettii loltummaa gita hin qabne agarsiisuu isaatiin qofa osoo hin taane; naamusawwan waraanaa ol'aanaa ittiin beekamuun, aantummaa uummataa kan qabuu fi ofirra biyyaaf aarsaa kaffaluun uumata biratti baay’ee kan jaallatamuu fi kabajamudha. Qajeeltoon kun icciitii cichoominasaa yoo ta'u, tokkoon tokkoo miseensa raayyaa Ittisa biyyaa fedhii isaa, nageenya fi lubbuu isaa birmadummaa biyyaa fi ummataatiif dabarsees kennuuf kan isa qopheessu duudhaa jiraataadha. Har'as naamusaa fi duudhaasaa biyyaalessaa jabaa kana bu’uura godhachuun birmadummaa biyyaa kabachiisuuf fi diinota nageenya biyyaa booressuuf socho'an faccisuudhaan injifannoo irrati injifannoo dabaluun seenaa Itoophiyaa cimsuun itti gaafatamummaa isaa dandeettii ol'aanaadhaan bahachaa jira. Raayyaan Ittisa biyyaa bakka kamittuu iddoo itti seeraa kabachiisee fi nagaa mirkaneesse maratti hojiin isaa dirqama waraanaan qofa kan daangeffame miti. Isaan olitti uummata tasgabbeesuu, xiinsammuusaa haaressuu, bu’uuraalee misoomaa barbaada’an deebisanii ijaaruu adda durummaan ni raawwata. Amalli hojii fi kutannoon raayyaa ittisa biyyaa yeroo nagaa fi boqonnaa isaaniittis qophii olaanaa taasisuu leenjii jabaa, beekumsaa fi teeknooloojiidhaan dandeettii isaanii gabbisuun waamicha biyyaalessaa fi dirqama fuulduraatiif qophiitti jiraachuu isaanii mirkaneessa. Raayyaan Ittisa biyyaa qormaatilee baay'ee keessa darbe, jaalala fi deeggarsa ummataatiin kan cime wabii biyyaa fi gaachana hin cabne, gaachanaa fi dahoo jabaadha. Injifannoo wareegamaan argame Itoophiyaan seenaa ishee keessatti biyya bilisummaa fi birmadummaa isheetiif wareegama kaffaluun eenyummaa ishee kabachiifattedha. Birmadummaa fi kabajni biyya seena-qabeettii kanaa osoo hin sarbamiin hanga har'aatti turuu kan danda'e ammoo goota Raayyaa Ittisa Biyyaa baroota keessatti dhiigaa fi lafee isaatiin biyya dhaaban waan qabduufi. Raayyaan Ittisa Biyyaa Itoophiyaa bu'uura jiraachuu biyyaa, wabii nageenya uummataa fi humna cimaa agarsiistuu jaalala biyyaati. Hundeen seenaa raayyaa ittisa biyyaa imala birmadummaa biyyaa waliin kan walqabatedha. Injifannoo Adwaa irraa eegalee hanga ijaarsa ittisa biyyaa ammayyaatti, raayyaan kun ergama daangaa biyyaa eeguu dandeettii fi gahumsa olaanaadhaan ba’achaa tureera. Weerartoonni alaa birmadummaa biyyaa sarbuuf yeroo yaalanitti, raayyaan kun bifa adda addaatiin gurmaa’ee fi hiriiree wareegama kaffaluun biyya kabachiiseera. Imaanaan seenaa kun har'as itti fufee, tooftaa waraanaa ammayyaa, teeknoolojii fi hoj-maata saayinsaawaa qindeessuudhaan ergama daangaa samii fi daangaa lafa biyya ciminaan eeguu ba'achaa jira. Raayyaan ittisa biyyaa diina daangaa biyya isaa sarbe mogolee diinaa cabsee deebisuu fi olaantummaa seeraa kabachiisuudhaan hojii ol aanaa hojjetaa jira.Kanaanis mootummaanis ta’e uummataan Raayyaa ittisa biyyaa amanamaa ta’ee seenaa isaan yaadatamaa asiin ga’eera. Uummanni Raayyaa wareegama cimaan birmadummaa biyyaa kabachiise cinaa dhaabbatee deeggarsa barbaachisaa taasisaa jira. Ergama Nagaa Kabachiisuu Seenaan gootummaa Raayyaan Ittisa Biyyaa Itoophiyaa barreesse biyya keessatti qofa kan daangeffame miti. Nageenya biyya keessaa kabachiisuu fi sirna heera mootummaa eegsiisuuf qabsoo taasise cinaatti, ergama nageenya eegsisuu Idil-Addunyaa keessattis maqaa gaarii fi surraa qaba. Raayyaan kun daangaa eeguu bira darbee, ergamawwan nagaa kabachiisa Dhaabbata Biyyoota Gamtoomanii fi Gamtaa Afrikaa keessatti gahumsa saayinsawaa fi amanamummaa hawaasaatiin maqaa gaarii biyyaa ol kaaseera. Kana malees balaa uumamaa ittisuu fi misooma biyyaa keessatti gahee qabuun hariiroo uummata waliin qabu caalmaatti cimseera. Itiyoophiyaan naannawaa Afrikaa Bahaatti olaantummaa tarsiimo'aa fi wabii nageenyaa ta'uushee ifatti labsuun diinaaf yaaddoo lammiileef immoo abdii, biyyaafis gaachana birmadummaa ta'eera. Riifoormii Raayyaa Ittisa biyyaa gahumsa Raayyaa guddise Raayyaa Ittisa Biyyaa Itoophiyaa gaachana birmadummaa biyyaa ta’uusaan seenaadhaan beekamu qabatamaan sadarkaa isa gitu akka argatuuf riifoormiin gaggeeffameera. Dhaabbileen barnootaa fi leenjii ittisaa saayinsii waraanaa, hoggansa tarsiimowaa fi teeknooloojiin kan badhaadhan waan ta’aniif, raayyichi balaawwan biyya keessaa fi naannoo dursee xiinxaluu fi ittisuu danda’eera. Bu’uuruma Kanaan riifoormii gaggeeffameen bu’aawwan aragamaniiru: Ajaja Paartii jalaa ba'uu: Raayyaan ittisaa meeshaa dhimma paartii siyaasa tokkoo raawwachiisu ta'uun hafee, raayyaa biyyaalessaa fi uummataa ta'ee akka gurmaa'u taasifameera. Ilaalcha tokko qabaachuu: Raayyaan ittisa biyyaa Sabummaa, amantaa fi faayidaa garee kamirraayyuu bilisa ta'uun, ilaalcha biyyaalessaa fi birmadummaa kabachiisu irratti akka xiyyeeffatu taasifameera. Tokkummaa biyyaalessaa fi birmadummaa biyyaa kabachiisuu irratti ejjennoo waltawaa tokko qabaachuu danda’ameera. Hidhannoo Ammayyaa fi Saayinsii Waraanaa: Raayyaan kun meeshaalee waraanaa ammayyaa, teeknooloojii fi saayinsii waraanaa addunyaa irra gahuun akka ijaaramu taasifamee jira Ergama isaa gahumsaan bahachuu danda’uu : Lafoo fi samii jalatti hojii hojjetuun teessuma lafaa kamirraattiyyuu rakkoo tokko malee ergama isaa baahachuun gahumsaa cimaa gonfateera. Raayyaan Ittisa Biyyaa Itoophiyaa seenaa gootummaa fi jaalala biyyaa bu’uura godhachuun, saayinsii waraanaa ammayyaa fi teeknooloojii ol’aanaa haammateen riifoormii fi dandeettii ijaarrachuu raawwateera. Wabii Nageenya Naannoo: Daangaa biyyaa eeguun cinaatti, nageenyaa fi tasgabbii Gaanfa Afrikaarratti qooda olaanaa taphachuu danda'uun gahumsa agarsiiseera. Diinni keessaa fi alaan qindoomuun imala badhaadhina Itoophiyaan eegalte gufachiisuun waraana labsuu hanga jeequmsa babal'isuutti yeroo gahan raayyaan ittisa biyyaa aarsaa lubbuu fi wareegama, akkasumas halkanii guyyaa roobaa, qorraa fi gammoojjii osoo hin jedhiin cichoominaan birmadummaa biyyaa kabachiisuu danda'eera. Rifoormiin dhaabbilee nageenyaa kun gama hundaan tokkummaan lammilee Itiyoophiyaa akka cimuufis gumaacha guddaa taphateera. Duudhaalee Raayyaa ittisa biyyaa 1.Naamusa fi Ummatummaa: Dirree waraanaatti gootummaa agarsiisuu qofa osoo hin taane, ummata gargaaruu, bu'uuraalee misoomaa deebisanii ijaaruu fi deeggarsa xiinsammuu deebisuu irratti dhiyeenyaan hojjetu. 2.Qophiitti Jiraachuu: Yeroo nagaattis leenjii jabaa, teeknoolojii fi beekumsa waraanaa ammayyeessuun waamicha biyyaalessaa kamiiyyuu simachuuf qophaa'oo ta'anii jiraatu 3.Biyyaaf dursa kennuu : Fedhii fi jireenya dhuunfaan olitti birmadummaa biyyaa, nagaa fi tas-gabbii biyyaatiif dursa kennanii tajaajiluun duudhaa isaanii isa guddaadha. #BiyyaGuddoo #UmmataGuddaa #MulataGuddaa Miseensa Maatii ENA ta’aa : https://www.ena.et/web/links

Itoophiyaan biyya seenaa dheeraa, aadaa boonsaa, duudhaa gootummaa fi birmadummaa ishee eeguu keessatti qabsoo cimaa taasisuun dhalootaa dhalootatti darbaa dhufteedha. Biyya seenaa ishee keessatti qormaatilee hedduu keessa darbitee, weerartoota ofirraa qolachuun bilisummaa ishee tikfachuu dandeesse ta’uun, biyyoota Afrikaa fi Addunyaa biroof fakkeenya taateetti.Seenaa Itoophiyaa keessatti injifannoowwan galmaa’an gootummaa uummataa, jaalala biyyaa, tokkummaa fi kutannoo birmadummaa biyyaa eegsisuuf taasifame calaqqisiisu. Seenaa biyyattii keessatti yeroo adda addaatti qormaatileen siyaasaa, dinagdee fi hawaasummaa mudatan hedduun turan. Haata’u malee, qormaatileen kunneen biyyattii abdii kutachiisuu hin dandeenye. Kanaa mannaa, uummanni Itoophiyaa rakkoolee isa mudatan qolachuuf, birmadummaa isaa tikfachuuf, akkasumas eenyummaa fi kabaja biyya isaa eegsisuuf tokkummaa fi kutannoodhaan dhaabbachaa tureera. Kunis Itoophiyaan biyya qormaatilee keessatti jabaattee, injifannoo irraa barattee gara fuulduraatti tarkaanfachuu dandeessu ta’uu ishee mirkaneessa. Injifannoon Adawaa seenaa gootummaa fi birmadummaa Itoophiyaa keessatti bakka olaanaa qaba. Injifannoon kun qofa seenaa waraanaa osoo hin taane, mallattoo bilisummaa, ofitti amanamummaa fi dandeettii uummanni Itoophiyaa tokkummaa isaatiin humnoota isa weeraruuf dhufan qolachuu danda’u ta’uu isaati. Injifannoon Adawaa uummattoota Afrikaa fi saboota kolonii jala turaniifis abdii fi kaka’umsa ta’uun, bilisummaa fi kabaja ofii argachuuf qabsoon godhamu bu’aa qabaachuu akka danda’u agarsiiseera. Gootummaan abbootii keenyaa Itoophiyaa har’as seenaa keessatti yaadatamee kan hafuu qofa miti.Duudhaaleen abbootarraa dhaalle, kanneen akka jaalala biyyaa, tokkummaa, obsa, kutannoo fi birmadummaa biyyaa tiksuu, dhaloota har’aatiif bu’uura cimaa ta’anii jiru. Biyya ijaaruu fi cimsuun dirqama dhaloota tokko qofaan xumuramu osoo hin taane, dhaloota irraa dhalootatti darbuudha. Dhaloonni har’aa seenaa gootummaa abbootii isaa irraa barachuun, nageenya, tasgabbii, misooma fi badhaadhina waaraa mirkaneessuuf gahee isaa bahachuuf hojiilee eegalamee cimsee itti fufsiisa jira. Itoophiyaan biyya saboota, sablammootaa fi uummattoota garaagaraa, afaanota, aadaa fi duudhaa hedduu qabduudha. Garaagarummaan kun yoo sirnaan kabajamee, walqixxummaan yoo mirkanaa’ee fi dantaa waliinii irratti waliigalteen yoo cime, humna biyya guddisu ta’a. Tokkummaan Itoophiyaa jechuun garaagarummaa dhabamsiisuu osoo hin taane, garaagarummaa jiru kabajaa fi walitti dhufeenya cimsaa dantaa biyyaalessaa irratti waliin hojjechuudha. Tokkummaan akkasii birmadummaa biyyaa eeguuf, nageenya waaraa ijaaruuf, akkasumas misooma itti fufiinsa qabu milkeessuuf murteessaa dha. Har’a Itoophiyaan seenaa ishee boonsaa irraa humna argachuun gara guddina dinagdee, jijjiirama hawaasummaa fi ijaarsa biyya ammayyaatti ce’aa jirti. Hojiileen misoomaa dameewwan qonnaa, industirii, bu’uuraalee misoomaa, tuurizimii, teeknooloojii fi humna namaa irratti hojjetamaa jiran carraa dinagdee bal’isuuf, oomishtummaa guddisuuf, akkasumas jireenya uummataa fooyyessuuf bu’uura ta’u. Milkaa’inni dameewwan kanaa garuu qabeenya uumamaa qofa irratti kan hundaa’u osoo hin taane, humna namaa, hojii cimaa, itti gaafatamummaa fi hirmaannaa uummataa irratti hundaa’a. Misoomni jaalala biyyaa irraa maddu biyya ofii cimsuu fi qabeenya ishee sirnaan itti fayyadamuun mul’ata. Lammiin biyya isaa jaallatu qabeenya biyyaa kunuunsa, hojii isaa amanamummaadhaan hojjeta, seera kabaja, nageenya eeguu keessatti hirmaata, akkasumas rakkoolee hawaasaa furuuf qooda fudhata. Kanaafuu, jaalalli biyyaa jecha qofaan osoo hin taane, hojii guyyaa guyyaa, itti gaafatamummaa fudhachuu fi bu’aa uummataaf buusuun mirkanaa’a. Guddina dinagdee ariifachiisuuf qabeenya biyyattii jiran gara oomisha, hojii uumuu fi galii uummataa dabaluutti jijjiiruun barbaachisaa dha. Qonnaan bultoonni oomishtummaa isaanii guddisuun, dargaggoonni kalaqaa fi teeknooloojiitti fayyadamuun, abbootiin qabeenyaa invastimantii babal’isuun, akkasumas dhaabbileen mootummaa tajaajila qulqullina qabu kennuun guddina biyyaaf gumaacha olaanaa taasisuu danda’u. Hojiiwwan akkanaa keessatti tokkummaan, amanamummaan fi kaayyoo waliinii qabaachuun bu’aa argamu saffisiisa. Gama kanaan, Itoophiyaan seenaa birmadummaa ishee irraa barachuun, injifannoowwan darban bu’uura godhachuun, gara fuulduraatti tarkaanfachuu qabdi. Seenaa boonsaa qabachuun qofti gahaa miti; seenaa sana irraa barachuun rakkoolee yeroo ammaa furuun, carraawwan jiranitti fayyadamuun, dhaloota dhufuuf biyya caalaatti nageenya qabdu, badhaate fi dandeettii guutuu qabdu dhaalchisuun barbaachisaadha. Kunis mootummaa, uummata, dhaabbilee hawaasaa, damee dhuunfaa fi dhaloota dargaggootaa hunda irraa hojii waloo gaafata. Keessumaa dargaggoonni har’aa itti gaafatamummaa guddaa qabu. Isaan humna hojii, kalaqa, beekumsaa fi jijjiirama biyyattii saffisiisuu danda’anidha. Gootummaa abbootirraa dhaalan gara kalaqa, barnoota, qorannoo, oomisha, hojii uumuu fi tajaajila uummataatti jijjiiruun, biyya utubuu fi cimsuu keessatti qooda olaanaa bahachuu qabu. Dargaggoonni seenaa biyya isaanii beekanii, duudhaa gaarii irraa baratanii, beekumsaa fi ogummaa isaanii guddisuun, rakkoolee biyya isaanii furuuf yoo hojjetan, Itoophiyaan gara badhaadhina waaraatti saffisaan ce’uu dandeessi. Dargaggootaaf hojii uumuu, carraa barnootaa babal’isuu, dandeettii isaanii guddisuu fi hirmaannaa isaanii mirkaneessuunis murteessaa dha. Dargaggoonni abdii kutachuu irraa fagaachuun, nageenya fi tokkummaa isaanii kabajanii, yaada haaraa maddisiisuu fi hojii bu’aa qabu irratti bobba’uun guddina biyyaaf gumaacha olaanaa taasisuu danda’u. Gootummaan yeroo ammaa dirree waraanaa qofa irratti kan mul’atu miti; saayinsii fi teeknooloojii keessatti kalaqa uumuu, oomisha biyya keessaa guddisuu, hojii uumuu, malaammaltummaa mormuu fi tajaajila uummataaf amanamummaadhaan hojjechuunis gootummaa yeroo ammaa ti. Walumaagalatti, Itoophiyaan seenaa birmadummaa ishee eeguu, weerartoota qolachuu fi injifannoo galmeessuu keessatti fakkeenya taateetti. Seenaa kana keessatti humni ishee guddaan tokkummaa uummataa, jaalala biyyaa, kutannoo fi aadaa walta’iinsaa ture. Har’as gatiiwwan kana cimsuun, garaagarummaa kabajuun, misooma itti fufiinsa qabu irratti waliin hojjechuun barbaachisaadha. Injifannoowwan kaleessaa yaadachuun qofti osoo hin taane, isaan irraa humna argachuun hojii har’aa milkeessuun dirqama dhaloota ammaa ti. Itoophiyaan biyya guddoo, uummata guddaa fi mul’ata guddaa qabdu ta’uun ishee seenaa darbe qofa irratti kan hundaa’u miti; humna uummata ishee, qabeenya ishee fi fedhii misoomaa gara fuulduraatti qabdu irrattis hundaa’a. Kanaaf, mootummaa fi uummanni, keessumaa dhaloonni dargaggootaa, tokkummaa fi jaalala biyyaa bu’uura godhachuun biyya cimsuu, misooma ariifachiisuu fi badhaadhina waliinii dhugoomsuuf waliin hojjechuu qabu. Kun karaa seenaa boonsaa Itoophiyaa itti fufsiisanii dhaloota dhufuuf biyya cimtuu, badhaate fi kabajamtuu taate dhaalchisanidha. #BiyyaGuddoo #UmmataGuddaa #MulataGuddaa Miseensa Maatii ENA ta’aa : https://www.ena.et/web/links