Ebla 12/2018 (ENA)-Ejensiin Geejiba Oromiyaa Gamaggama Raawwii hojii batii sagalii gaggeesseen Al-Seerummaa sektaricha irratti mul’atu furuu fi nageenya Tirafikaa Mirkaneessuuf xiyyeeffannoon akka hojjetu beeksiseera. Ejensichi gamaaggama hojii Ebla 10 irraa eegalee guyyaa lamaaf geggeesseen tajaajilli Geejjibaa rakkoo akka qabu adda baasuun haala kenna tajaajilaa fooyyessuun danda'amu irratti marii’achuun kallattii kaa’eera.   Gamaaggama gaggeeffameen rakkoo kenna tajaajilaa Geejibaan buufata konkoklaataa keessatti mul’atu sirreessuuf xiyyeeffannoon kan hojjetamu ta’uu Hogganaan Ejensii Geejjiba Oromiyaa Obbo Kamaal Maammee ibsaniiru. Gamaggamichaan kenna tajaajila Geejibaan wal qabatee buufata konkolaataa keessatti Al-seerummaan kana akka Taarifaan ol kaffalchiisuu, darbaa fe'uu, konkolaataa sarara bobbii irratti hin argamne, baashaarii ykn Jokkaa buufataa fi naannoo buufataa jiran, motorota seera maleeyyii fi kanneen biroon akka mul’atu ibsaniiru. Rakkoo fi komii tajaajila Geejjibaa keessa jiru furuun itti quufiinsa ummataa dabaluun Amantaa ummanni Mootummaa irratti qabu guddisuuf ni hojjetama jedhaniiru. Rakkoolee Tajaajila Geejjibaan adda baafaman hanbisuuf guutummaatti teekinooloojiin deggeruunii fi Al-naamuusummaa sektaricha keessaa dhabamsiisuuf xiyyeeffannoon kan hojjetamu ta’uu himaniiru. Ejensii Geejjiba Oromiyaarraa( EGO) irraa

Ebla 11/2018 (ENA)- Ayyaanni Shuwaalid hambaa kiliyyaa addunyaatti galmaa’uunsaa tuuristiin akka dabalu qooda olaanaa qaba jechuun ibsan bulchaan naannoo Hararii Ordiin Badrii ibsan. Sablammiin Hararii wagga waggaan kan kabaju ayyaanni aadaa Shuwaalid magaalaa Finfinneetti kabajameera. Bulchaan naannichaa Ordiin Badrii wayita kana akka jedhanitti, ayyaanni Shuwaalid duudhaa hawaasummaa keenya gabbisuudhaan tokkummaan caalaatti akka gabbatu gochuun gamatti qabeenyota turizimii naannoo Harariitti argaman beeksisuudhaan fayyadama dinagdee damee garagaraa mirkaneessuuf ni gargaara. Shuwaalid keessumaa dameen turizimii naannichaa akkasumas biyyattii akka guddatu gama gochuutiin faayidaa olaanaa akka qabu eeraniiru. Naannichi humna gama tuurizimiin jirutti fayyadamuun fayyadama ummataa mirkaneessuuf xiyyeeffannoon hojjechaa akka jiru beeksisaniiru. Walgahii baatii Sadaasaa bara 2016 Botswaanaatti gaggeeffameen Yuneskoo’n kabaja ayyaana Shuwaalid hambaa kiliyyaatti galmeessuunsaa niyaadatama.

Ebla 10/2018 (ENA)- Miidiyaaleen dhaabbile amantaa seera Itiyoophiyaa ittiin hundeeffaman kabajuu akka qaban ministirri gorsaa dhimmoota hawaasummaa ministira muummee Mu’aaze Xibabaat Daaqon Daani’eel Kibrat ibsan. Abbaan taayitaa miidiyaalee Itiyoophiyaa bu’aa tamsaasa qabiyyee hordoffii fi qorannoo miidiyaalee dhaabbilee amantaa irratti gochaa ture ilaalchisuun sagantaa qopheesseera. Sagantaa Mata duree “miidiyaaleen dhaabbilee amantaa nageenyaa fi waloomaaf” jedhuun qophaa’erratti bakka bu’oota miidiyaalee dhaabbilee amantaa garagaraa waliin marii gaggeeffameera. Abbaan taayitaa miidiyaalee Itiyoophiyaa ittigaafatama lakk. Labsii miidiyaalee 1238/2013, kennameefiin qabiyyee hojiilee miidiyaalee dhaabbilee amantaa hordofuu fi qorachuun tsrkaanfii sirreeffamaa ni fudhata. Ministirri gorsaa dhimmoota hawaasummaa ministira muummee Mu’aaze Xibabaat Daaqon Daani’eel Kibrat wayita kana akka jedhanitti, miidiyaaleen dhaabbilee amantaa irra caalaan qabiyyee amantaa qajeelfamarratti hundaa’e ni hojjetu. Garuummoo miidiyaalee amantaa hojii gaarii hojjetan keessaa kaayyoo faallaa kan qaban xiqqaan hojii gaarii kanneen biroo ni balleessa jedhaniiru. Miidiyaaleen amantaa seera Itiyoophyaan kan hundaa’an ta’uu ibsanii, seera Itiyoophiyaa kabajuuf dirqama qabu jedhaniiru. Dhaabbileen amantaa daangaa kan cehan ta’uu eeruun, haa ta’u malee biyyi daangaa fi birmadummaa akka qabdu ibsaniiru. Namoonni amantaa wal fakkaataa hordofan Itiyoophiyaa keessaa fi ala jiran kan gaafataman seera biyyasaaniin qofa ta’uu dubbataniiru. Miidiyaaleen dhaabbilee amantaa akka hundeeffamu kan gaafatame amantaa barsiisuuf nuuf haa eyyamamu jechuun akka ta’e ibsanii, kaayyoo hundeeffamaniif ala hojjechuun seera cabsuudha jedhaniiru. Kanaaf ammas seerri nuuf haa fooyya’u jedhanii gaafachuudha malee seeraan ala hojjechuun sirrii akka hin taane ibsaniiru. Miidiyaaleen amantaa ummata waloo fi duudhaan akka gabbatu qoodasaanii yemmuu bahatan rakkoolee biroollee akka furan dubbataniiru.   Miidiyaaleen dhaabbilee amantaa gamtaa waloo uumuun gaaffii qindaa’e gaafachuu akka danda’an ibsanii, gamtaan kun akka hundeeffamu moorummaan deeggarsa barbaachisu ni taasisa jedhaniiru. Ministirri nageenyaa Mahaammad Idriis gamasaaniin, Itiyoophiyaa biyya taatee akka itti fuftu qoodni dhaabbilee amantaa olaanaa ta’uu kaasaniiru.   Akkaataa heera mootummaa irratti tumameen amantaan dhimma mootummaa keessa mootummaan dhimma amantaa keessa akka hingalle ibsanii, birmadummaa kana cimsuuf itti gaafatamummaa fudhatanii hojjechuu qabu jedhaniiru. Miidiyaaleen amantaa Itiyoophiyaa jiraachuunsaanii eebba guddaada kan jedhan ministirichi, walooma ummataa fi ijaarsa nageenyaaf qooda olaanaa akka qabu ibsaniiru. Mmiidiyaaleen amantaa eebba waloomaa ta’anii osoo jiranii dogoggorri uuman funyoo waloomaa bara baraan jiraate addaan kuta jedhaniiru. Kanaaf mootummaan nageenyaa fi tasgabbii lammiilee eegsisuuf itti gaafatama waan qabuuf daandiirraa yoo maqan seera akka kabachiisu ibsaniiru.   De’eetaan ministiraa tajaajila komunikeeshinii mootummaa Tasfaahun Goobazaayi akka ibsanitti, miidiyaaleen amantaa, amantaan gamatti duuhaalee hawaasummaa hawaasichaa calaqqisiisuu qabu. Dhaabbileen amantaa hundi nageenya, tasgabbii fi eenyummaa Itiyoophiyaarratti garaagarummaa qabaachuu akka hin qabne ibsaniiru. Amantaaleen hundi wal danda’uu akka lallaban ibsanii, dhimmoota ijaarsa duudhaa hawaasaa waliin wal qabatan irratti hojjechuu qabu jedhaniiru.

Ebla 10/2018 (ENA): Namoota godina Gaamootti balaa uumamaatiin buqqa’aniif gargaarsi namoomaa Birrii miiliyoona 2tti tilmaamamu taasifameera. Gargaarsi namoomaa kun har’a Tajaajila Inshuraansii Fayyaa Itiyoophiyaa fi Kutaan Gurmaa’ina Mana Barumsa Sanbataa Waldaa Ortodoksii Tawaahidoo Itiyoophiyaa, akkasumas qindoomina Waajjira Qindeessaa Waldaa Misooma Waloo fi barsiisa wangeelaa Afaan Gaamoo waliin ta’uun kan kennamedha. Daarektarri Olaanaan Tajaajila Inshuraansii Fayyaa Itiyoophiyaa obbo Tasfaayee Warquu walharkaa fuudhinsa deeggarsa kanarratti akka himanitti, Itiyoophiyaanonni aadaa walgargaaruu guddifate qabu jedhani. Dhaabbatichi dameelee 24 qindeessuun Bulchiinsa godina Gaamootiif deeggarsa nyaataa fi meeshaa Birrii miiliyoona 1 olitti tilmaamamu geesseera.   Namoota balaa kanaan buqqa’an deebisanii dhaabuun lammiilee Itiyoophiyaa hundarraa eegama waan ta’eef deeggarsi har’a eegale cimee itti fufa jedhan. Haaluma walfakkaatuun Waldaa Ortodoksii Tawaahidoo Itiyoophiyaa Kutaan Gurmaa'ina Mana Barumsa Dilbataa, Misooma Waloo Waldoota Gaamoo fi Waajjirri Qindeessaa barsiisa macaafa qulqulluu Afaan Gaamoo waliin ta'uun deeggarsa namoomaa Birrii miiliyoona 1tti tilmaamamu taasisaniiru.   Gargaarsi kun uffata qorraa, uffata ga’eessotaa fi daa’immanii, kophee fi meeshaalee biroo akka ta’e ibsameera. Bakka bu’aan qindeessaa gargaarsaa obbo Xugaamoo Yaalsoo dhimmiin lammiifi waan ta’eef nutis buqqaatota gargaaruuf gahee keenya ni baana jedhan. #Ena Afaan Oromoo #ENA