Bitootessa 14/2018(ENA)- Dhaabbiileen Barnootaa olaanoon qabeenya isaaniif kennamu yeroo fi sirnaan akka bulchanii fi kaayyoo yaadameef akka oolchan danbiiwwanii fi qajeelfamoonni qophaa’uusaanii Deetaan Ministira Barnootaa Koraa Xushnee ibsan. Danbiiwwanii fi qajeelfamoonni kun Muudama hoggantoota dhaabbilee Barnootaa Olaanaa riitiirratti hundaa’ee fi iftoomina hin qabne hanbisuu akka danda’anis ibsameera. Ministeerri Barnootaa Qajeelfama ramaddii hoggansa dhaabbilee Barnootaa olaanaa, qajeelfama ce’umsaa ofiin of bulchuu (autonomy) Dhaabbiilee Barnootaa Olaanaa mootummaa fi danbii baajata walatti qabaa (block grant) dhaabbiilee Barnootaa olaanaa fi qooda fudhattoota waliin waltajjii marii qopheesseera. Deetaan Minsitira Barnootaa Koraa Xushnee walitajjii sanarratti, akka jedhanitti, mootummaan qulqullinaa fi dhaqqabamummaa barnootaa mirkaneessuuf riifoormii sirna hoj-maata barnootaa fulla’aa hojiirra oolchuuf dandeessisan taasiseera. Kunis Ministeerri Barnootaa Aangoo labsii Barnootaa Olaanoo lakkoofsa 1151/2011n kennameef bu’uura godhachuun, hoggantoota barnnootaa ogummaasaaniin leenji’an, dandeettii fi gahumsa qaban, gara hojiitti fiduu kan dandeessisu ta’uusaa ibsaniiru. Danbii fi qalfamoonni kunneen dhaabbiileen barnootaa olaanoon qabeenya isaaniif kennamu sirnaan bulchuu fi kaayyoo yaadameef oolchuuf ni dandeessisu jedhaniiru. Dhaabbiileen Barnoota olaanaa mootummaa gara ofiin of-bulchuutti akka ce’aniif hojmaata ifaa ta’uu ibsuun, birmadummaa akkaadamii kan mirkaneessu ta’uusaa himaniiru. Qajeelfamni Pirezidaantonnii fi Itti -Aantonni Pirezidaantota dhaabbilee Barnootaa olaanoo ittiif filataman, beekumsaa fi muuxannoorratti kan hundaa’ee fi hojii yeroo dheeraa fudhateen sanada qophaa’e ta’uusaa dubbataniiru. Muudamni hoggantoota dhaabbilee barnootaa olaanaa Danbii fi qajeelfamoonni ariitiin kan guutamee fi hanqina iftoominaa kan qabu akka ta’e ibsaniiru. Danbiin baajata walii galaa dhaabbilee barnoota olaanaa Mootummaa of-bulchanii, dhaabbiileen baajata ramadameef sirnaan akka fayyadamanii fi madda faayinaansiisaanii akka bal’ifatan carraa kenna jedhaniiru.  

Bitootessa 13/2018 (ENA): Milkaa’ina imala badhaadhina biyyattiif dhaloota beekumsaa fi qorannoon guddate horachuu hojiin cimee itti fufa jedhan Bulchaan Bulchiinsa Mootummaa Naannoo Hararii obbo Ordiin Badiriin. Kolleejjiin Saayinsii Fayyaa fi Meedikaalaa Yuunivarsiitii Haramayaa barattoota damee barnoota fayyaatiin digrii tokkoffaa, lammaffaa fi sadaffaa leenjisaa ture 616 eebbiseera. Ergaa yeroo sana dabarsan keessatti Bulchaan Bulchiinsa Naannoo Hararii fi keessummaan kabajaa guyyichaa Ordin Badirii; Hojiin humna namaa gahumsaa fi barate oomishuuf imala biyyattii gara badhaadhinaatti taasiftu milkeessuuf murteessaa dha jedhani. Dhaloota beekumsaa fi qorannoodhaan guddate oomishuuf hojiin hojjetamaa ture cimee itti fufa jedhaniiru.   Eebbifamtoonnis yeroo yunivarsiiticha keessa turtan beekumsa ti'ooriidhaan argattan hojiitti jijjiiruun hawaasa tajaajiluu qabdu jedhan.   Pireezdaantiin Yuunivarsiitii Haramayaa Dr. Jamaal Yuusuf akka himanitti ; Yuunivarsitichi humna namaa qulqullina qabu kan baratee fi biyyattiin barbaaddu oomishuuf adda durummaan hojjechaa jira jedhani. Yuunivarsiitichi yeroodhaa gara yerootti dandeettii isaa babal’isuun barsiisa, qorannoo fi tajaajila hawaasaa bal’aa kennaa jiraachuu ibsaniiru. Eebbifamtoonni gumaacha dhalootaaf bu’aa buusu gochuun egeree biyyattii ifa taasisuuf itti gaafatamummaa ogummaa isaanii bahachuu akka qabanis dhaamaniiru.

Bitootessa 13/2018 (ENA): Barattoonni eebbifaman beekumsa argatan hojiitti jijjiiruun hojii ummataa fi misooma biyyaaf bu'aa buusu hojjechuu akka qaban ibsame. Yuunivarsiitiin Bulee Horaa barattoota 1,266 sagantaalee barnootaa adda addaatiin leenjisaa ture digrii tokkoffaa, lammaffaa fi sadaffaan guyyaa har'aa eebbisiiseera.   Itiyoophiyaa keessatti misooma nageenyaa fi itti fufiinsa qabu mirkaneessuuf barattoota beekumsa, ogummaa fi naamusa gaarii qaban oomishuuf dursi kennamaa jira jedhan Ministeera Barnootaatti Hojii Gaggeessaa Olaanaa Qorannoo fi Tajaajila Hawaasaa Doktar Saraawwit Handisoo.   Bu’a qabeessummaan barnootaa irra caalaa barattoonni beekumsa horatan gara hojiitti jijjiiruun guddina hawaasaaf furmaata maddisiisuudhaan kan madaalamu ta’uu ibsaniiru. Kanaaf barattoonni eebbifaman beekumsa horatan gara hojiitti jijjiiruun hojiiwwan ummataa fi biyya fayyadan raawwachuu akka qaban hubachiisaniiru. Keessattuu qabeenya naannoo isaanii dameewwan diinagdee biyyaalessaa adda addaa waliin walqabsiisuudhaan carraa hojii uumuu fi of jijjiiruuf carraaquu akka qaban dubbataniiru. Barattoonni carraaqqii guddaa booda eebbifamuu isaaniitiin baga gammaddan jedhaniiru.   Pireezidaantiin Yuunivarsiitii Bulee Horaa Dr. Tamasgeen Dabaloo yuunivarsitichi qorannoo ergama isaa deeggaru gaggeessuun qabeenya biyya keessaa madda qabeenya hawaasaa taasisuuf hojjechaa akka jiru hubachiisaniiru. Yuunivarsiitichi barattoota kuma 14 ol sagantaalee barnootaa adda addaa damee baruu barsiisuutiin leenjisaa kan jiru yoo ta’u, har’a yeroo 15ffaaf barattoota kuma 1 fi 266 digirii tokkoffaa, lammaffaa fi sadaffaan leenji’an eebbisuun isaa ni yaadatama.   Barattoota eebbifaman keessaa kutaa Baayooteknooloojii irraa meedaaliyaa kan badhaafamte shamarree Musliim Lammaa barnoota qofa irratti xiyyeeffachuun milkaa'uu akka dandeesse dubbattetti. Beekumsa argatte itti fayyadamtee ummataa fi biyya fayyaduu kan itti fuftu ta’uu himteetti.   Kutaa barnoota Faarmaasii irraa meedaaliyaa kan badhaafame Tashoomaa Anaa, beekumsa argate hawaasa isaaf qooduu fi ummata tajaajiluuf akka hojjetu himeera.

Bitootessa 13/2018 (ENA): Yunivarsiitiin Samaraa qorannoowwan dabalatee hojiiwwan hojjeteen horsiisee bultoota fayyadamoo taasisaa jiraachuu ime.   Yuunivarsiitiin Samaraa har’a barattoota 987 damee barnootaa adda addaatiin leenjisaa ture digirii tokkoffaa fi lammaffaan eebbiseera. Yuunivarsitichi har’a barattoota 987 digirii tokkoffaa fi lammaffaan eebbisuu isaa kan beeksise yoo ta’u, isaan keessaa 354 dubartoota dha. Sirna eebbaa kana irratti eebbifamtoonni har'aa beekumsaa fi dandeettii yeroo yunivarsiiticha keessa turan keessatti argataniin biyyaa fi ummata tajaajiluu akka itti fufan ibsameera. Yuunivarsiitichi waggoota darban keessa dijitaalaayizeeshinii hojiirra oolchuu, hojimaata dhaabbilee fooyyessuu fi hojii sirna bu’uura godhate raawwachuu ibsaniiru.   Deetaan Ministeera Tuurizimii fi walitti qabaan Boordii Yuunivarsiitii Samaraa obbo Silashii Girmaa sirna eebbaa kanarratti kan argaman yoo ta’u, yuunivarsiitichi waggoota darban keessa rakkoo hawaasa tikfattoota naannoo sanaa furuuf hojiilee adda addaa raawwachuusaa ibsaniiru. Hawaasni horsiisee bultootaa qorannoo dabalatee hojiiwwan hojjete irraa fayyadamoo ta’uu fi jireenyi isaanii fooyya’uu ibsaniiru. Obbo Silashiin akka himanitti, yuunivarsitichi barnoota qabatamaa hojiirra oolchuuf adeemsa ce’umsaa irra jiraachuu eeruun, bara kana qormaata ba’umsaa qore keessaa dhibbeentaan 82 qormaaticha darbuun eebbaa kana kan qaqqaban hojii dhaabbatichi qulqullina barnootaa fooyyessuuf hojjete irraa kan ka’e ta’uu dha jedhani.   Pireezidaantiin Yuunivarsiitii amaraa Dr. Mahaammad Usmaan gamasaaniitiin, yunivarsiitichi waggoota kurnan lamaaf hayyoota hojii hunda galeessa biyyattii keessatti gumaacha taasisan oomishuu ibsaniiru. Har’a barattoonni digrii tokkoffaa fi lammaffaa xumuran 987 kan eebbifaman yoo ta’u, isaan keessaa 354 dubartoota ta’uu ibsaniiru. Eebbifamtoonni har'aa yeroo yunivarsiiticha keessa turanitti beekumsaa fi dandeettii horataniin hojii bu'a qabeessa ta'e raawwachuudhaan biyyaa fi ummata tajaajiluu itti fufuu akka qaban dubbataniiru. Yuunivarsiitichi waggoota darban keessa dijiitaalaayizeeshinii hojiirra oolchuu, adeemsa dhaabbilee fooyyessaa fi hojii sirna bu’uura godhate raawwachuu ibsaniiru. Sirna odeeffannoo isaa haaromsuu fi haala gaariin qindeessuun bulchiinsa ofiin of bulchuu hojiirra oolchuuf adeemsa irra akka jirus eeraniiru. Yuunivarsitichi dubartoota horsiisee bultootaa 100 ol ta’aniif barnoota bilisaa kennuusaas eeraniiru. Yuunivarsiitichi dhaqqabummaa isaa guddisuuf naannolee adda addaa shanii fi naannoo Amaaraa magaalaa Baatii keessatti damee banuun hojii baruu barsiisuu isaa irratti hojjachaa jira jedhan.   Hojii qorannoosaa cimsuu fi hojiiwwan misoomaa deeggaraa jiraachuus ibsaniiru. Sagantaa eebbaa kanarratti Kantiibaa Bulchiinsa Magaalaa Samaraa Loogiiyaa Abduu Muusaa fi maatiin eebbifamtootaa dabalatee keessummoonni affeeraman hirmaataniiru.