Sadaasa 08/2018(TOI)-Gara qe’ee keenyaatti akka deebinuuf Mootummaan Federaalaa irra deddeebiin yaalii taasisuus Addi Bilisa Baasaa Uummata Tigray duraanii gufuu nutti ta’eera jechuun jiraattonni Shiree Indasillaasee qe’ee isaaniirraa buqqaafaman dubbatan. Dhimma kana irratti kanaan dura ibsa kan kennan pirezdaantiin yeroo mootummaa naannoo Tigraay duraanii obbo Geetaachoo Raddaa, qaamoleen buqqaatonni gara qe’ee isaaniitti akka hin deebineef haala jirutti fayyadamuuf hojjetan naannicha keessa akka jiran ibsuun isaanii ni yaadatama. Galaachaan Tajaajila Oduu Itiyoophiyaa Shiree Indasillasee buqqaatota waliin turtii taasiseen, Buqqaatonni gara qe’ee isaaniitti akka hin deebineef danqaa guddaa kan itti ta’an hoggantoota ABUT duraanii ta’uu ibsaniiru. Mootummaan Federaalaa akka qe’ee keenyatti deebinuuf irra deddeebiin yaalii taasisus akka hin milkoofneef hoggantoonni ABUT duraanii waan kuni akka hin milkoofne gochaa jiruu jedhan buqqaatonni yaada isaanii TOIf kennan. Sababa kanaanis waggoottaniif rakkoo adda addaaf saaxilamneerra jedhan. Waggoottan 5 dura, ijoolle isaanii 5 waliin Walqaayit irraa buqqaafamanii yeroo ammaa Shiree Indaasillaasee magaalaa Adii Kantiibaay mana barumsaa keessa buufatanii kan jiran obbo Anbassaa Barihee gara qe’ee keenyaatti deebina jennee waggootaaf abdii godhannee eegnus furmaata dhabne jechuun dubbataniiru. Dhimma kanarratti mootummaan Federaalaa ejjannoo cimaa qabatee hojjechaa jiraachuu beeknus garuu hoggantoonni ABUT duraanii akka nuti qe’ee keenyatti hin deebine gufuu nutti ta’aniiru jedhan. Haa ta’u malee nuti ammas abdii osoo hin kutiin eeggachaa jirra waan ta’eef mootummaan Fedraalaa gara qe’ee keenyaatti akka deebinuuf deeggarsa akka nuuf taasisu gaafanna jedhaniiru. Buqqaatota biroo yaada isaanii TOIf kennan keessaa aadde Li’iltii fi Obbo Habtoom Gabra Sillaaseen waggaa shaniif qe’ee ofiirraa buqqa’anii buufata tokko keessa jiraachuun hagam ulfaataa ta’uusaa eeruun, kanaan booda gara qe’ee isaaniitti akka deebi’aniif deeggarsi barbaachisu akka taasifamuuf gaafataniiru. Muummeen Ministiraa Doktar Abiy Ahimad ibsa mana maree bakka bu'oota ummataaf kennan keessatti irra deddeebiin ummanni naannoo Tigraay nagaa fi misooma akka barbaadu eeruun, buqqaatonnis gara qe’ee isaaniitti deebi'uu akka qaban dubbachuun isaanii kan yaadatamudha.

Sadaasa 7/2018(TOI)- Shoora guddaa Itiyoophiyaan nageenyaa fi misooma riijinicharratti bahaa jirtu Awustiraaliyaan akka deeggartu Dr. ambaasaaddar Piiter Hanter ibsan. Awustiraaliyaan dameelee haaraan Itiyoophiyaa waliin tumsa taasisuuf fedhii qabdi jedhaniiru. Itiyoophiyaatti ambaasaaddarri Awustiraaliyaa Dr. Piiter Hanter Gaanfi Afriikaa riijinii qormaanni wal xaxaan keessatti mul’atudha. Haala Kanaan Itiyoophiyaan gumaacha guddaan Itiyoophiyaan nageenyaa fi misooma riijinichaatti taasisaa jirtu akka deeggartu dubbataniiru. Tumsi gam lame Awustiraaliyaa fi Itiyoophiyaa bal’achaa akka jiru ambaasaaddar Hanter dubbataniiru. Walitti hidhamiinsa ummattoota biyyoota lamaanii, daldalaa, Invastimmantii fi barnoota akka fakkeenyaatti kaasaniiru. Awustiraaliyaan mootummaa fi ummata Itiyoophiyaa waliin hariiroo gam lamee cimsuuf hojjechaa jiraachuu ibsaniiru. Riifoormii dinagdee Itiyoophiyaan hojiirra oolchaa jirtu ambaasaaddarichi jajanii riifoormichi ofitti amanamummaa dureeyyii dabaluusaa fi carraalee haaraa uumuusaa ibsaniiru. Awustiraaliyaan tumsa damee turizimii, albuudaa fi qonnaan Itiyoophiyaa waliin qabdu cimsuuf fedhii akka qabdu ibsaniiru. Jijjiiramuu Finfinnee akka dinqisiifatan kan dubbatan ambaasaaddarichi, kun ammo mallattoo guddina Itiyoophiyaati jedhaniiru. Dimmoota idil addunyaan wal qabatees Awustiraaliyaan waltajjiin hariiroo heddumminaa fooyyessi akka irratti taasifamu deeggarsa barbaachisaa akka taasiftuu fi Afriikaan shoorri addunyaa irratti murtee kennuu dandeessu guddachuu akka qabu dubbataniiru. Awustiraaliyaan nageenyaa fi misooma dabalatee tumsa Afriikaa waliin qabdu cimsuuf akka barbaaddu dabalanii dubbataniiru.

Sadaasa 6/2018(TOI)- Raayyaan keenya garee shororkeessaa hojii baandaa raawwachaa jiru hordofuun tarkaanfii fudhachuun nageenya fulla’aa cimsaa jiraachuu ajajaan olaanaa ajaja bahaa Letenaal Jeneraal Mahaammad Tasammaa ibsan. Letenaal Jeneraal Mahaammad Tasammaa, raawwii koorii goojjam kaabaa fi buchiinsa sab-lammii Awwiii dirqamarra jiruu daawwataniiru. Daawwannaan booda hooggantoota godinaa fi aanaa akkasumas hooggantoota biroo waliin mari’achuun achumaanis xumura leenjii kutaa waraanaa aanaa Achafar kaabaa magaalaa Liibanitti argamuun qajeelfama hojii fi bobbii taasisaniiru. Letenaal jeneraalli kun wayita kana dubbii dubbataniin, raayyaan ittisaa garee finxaalessaa ergamtoota diina Itiyoophiyaa ta’uun baandummaan hiriire hordofuun tarkaanfii fudhachuun nageenya fulla’aa cimsaa jira jedhaniiru. Garee finxaalessaa bakkeewwan garagaraatti asii fi achi lowuun nama ukkaamsuun yakka saamichaa raawwatu raayyaan ummata waliin ta’uun hordofuun tarkaanfiin fudhatamaa akka jiru kaasanii, cimee akka itti fufus mirkaneessaniiru. Hooggansi, ummannii fihumni nageenyaa tumsaa hojii seera kabachiisuuf hojjetamaa jiru cimsanii akka itti fufan hubachiisaniiru. Itiyoophiyaa bakka hundatti nageenya cimsuu fi pirojektoota misoomaa eegalaman milkeessuun guddinaa fi badhaadhina Itiyoophiyaa mirkaneessuun imaanaa fi itti gaafatama hunda keenyaa ta’uu qaba jedhaniiru. Raayyaan ittisa biyyaa fakkeenya nageenyaa fi gootummaa ta’e kabajaa fi birmadummaa Itiyoophiyaaf yoomiyyuu caalaa qophii olaanaadhaan kan argamu ta’uu Letenaal Jeneraal Mahaammad Tasammaa mirkaneessaniiru.

Sadaasa 06/2018(TOI)-Gaaffiin mirga abbummaa ulaa galaanaa Itiyoophiyaa dhimma dantaa biyyaalessaa fi dhimma jiraachuu sabaa waan ta’eef milkaa’ina isaaf gahee mataa keenyaa ni bahanna jedhan hoggantoonni paartilee morkattoota siyaasaa. Dhimmi mirga abbummaa gaaffii Galaana Diimaa dhimma seeraa, seenaqabeessaa, teessuma lafaa fi diinagdee ta'uu Ministirri Muummee Doktar Abiy Ahmad ibsuun isaanii ni yaadatama. Hoggantoonni paartilee siyaasaa morkattoota adda addaa dhimma kana irratti turtii Tajaajila Oduu Itiyoophiyaa waliin taasisaniin dhimmi mirga abbummaa ulaa galaanaa dhimma dantaa biyyaalessaa fi ajandaa waloo ummata Itiyoophiyaa ta’uu ibsaniiru.   Adeemsa kana keessatti ejjannoo cimaa mootummaan qabu kan ajaa’isifatanii fi galateeffatan ta’uu hoggantoonni kunneen ibsuun, milkaa’ina isaaf hundi keenya shoora nurraa eegamu bahachuu qabnaa jedhaniiru. Hoggantoota paartilee siyaasaa morkattootaa keessaa dura taa'aan Sochii Bilisummaa ummata Beenishaangul Abdusalaam Shangeel akka jedhanitti, gaaffiin mirga abbummaa ulaa galaanaa Itiyoophiyaan dhiyeessite ulaagaa hundaan sirrii waan ta'eef deebii argachuu qaba jedhan. Kanaafuu paariin isaaniis gaaffiin mootummaan dhiyeesse sirrii ta’uusaa itti amanuun milkaa’ina isaafis kutannoon kan hojjetan ta’uu ibsaniiru. Dantaa biyyaalessaaf paartiin siyaasaa kamiyyuu waliin dhaabbachuu qaba jennee amanna jedhaniiru dura taa’aan kuni. Gaaffiin mirga abbummaa ulaa galaanaa akka deebii argatuuf harka walqabannee onnee tokkoon ni hojjennaa jedhaniiru. Paartichis gama isaatiin gaaffiin mirga abbummaa ulaa galaanaa deebii akka argatuuf hawaasaaf hubannoon uumuun cimee akka hojjetu eeraniiru. Pireezidaantiin Paartii Dimokraatawaa Moochaa Alamaayyoo Shaaroo gama isaaniitiin, dhimmi mirga abbummaa ulaa galaanaa yeroo ammaa ifatti kaasuun sirrii fi waktaawaa waan ta’eef kan deeggaramuu qabudha jedhaniiru.   Itiyoophiyaan misoomuuf, guddachuu fi diinagdee ishee gabaa alaa fi keessaaf dhiyeessuuf ulaan galaanaa ishee barbaachisa waan ta’eef nutis kuni akka milkaa’uuf gahee nurraa eegamu ni bahanna jedhaniiru obbo Alamaayyoon. Gaaffii mirga abbummaa karra galaanaa Itiyoophiyaan karaa nagaa fi dippiloomaasii ta’een gaafachaa jirtu akka milkaa’uuf hundi keenya waloon deeggaruu qabnaa dhaamaniiru. Dhimmi mirga abbummaa karra galaanaa dhimma dantaa biyyaalessaa fi dhaloota itti fufsiisuu waan ta’eef milkaa’ina isaaf waan barbaachisu hunda ni hojjenna kan jedhan immoo Pirezidaantii Paartii Sochii Dimokiraatawaa Ummata Kuush obbo Maan’aayitoot Bayyanaadha.   Paartiin isaanii gaaffiin mirga abbummaa ulaa galaanaa Itiyoophiyaan gaafachaa jirtu sirrii fi haqa qabeessa ta’uu eeruun, dhimma barbaachisaa kana irratti paartileen siyaasaa tokkummaa fi waloon dhaabbachuun hojjechuu akka qaban dhaamaniiru.

Sadaasa 6/2018(TOI)-Waggoottan jijiiramaa darban milkaa’inoonni Abdachiisoon magaalotatti galmaa’uusaanii Sadarkaa Itti Aanaa Ministira Muummeetti Itti Gaafatamaan gidduugala Qindeessaan Ijaarsa Sirna Dimokiraasii fi Itti Aanaan Pirezidaantii Paartii Badhaadhinaa Adam Faarah ibsan. Fooramiin Magaalota Itiyoophiyaa 10ffaan mataduree “Guddinani Magaalotaa ga’ooma Itiyoophiyaaf” jedhun Naannoo Affaar Magaalaa Samara Loogiyaatti gaggeeffamuu eegaleera. Saganticharrtti Sadarkaa Itti Aanaa Ministira Muummeetti Itti Gaafatamaan giddu gala Qindeessaa Ijaarsa Sirna Dimokiraasii fi Itti Aanaan Pirezidaantii Paartii Badhaadhinaa Adam Faarah, Bulchaa Naannoo Affaar Awwal Arbaa, Itti Aantuu Afa Yaa’ii Mana Maree Federeeshinii Zahiiraa Humadi, Ministira Magaalaa fi bu’uura Misoomaa Caaltuu Saanii fi Qondaaltonni Mootummaa Olaanoon biroon argamaniiru.     Sadarkaa Itti Aanaa Ministira Muummeetti Itti Gaafatamaan giddu gala Qindeessaa Ijaarsa Sirna Dimokiraasii fi Itti Aanaan Pirezidaantii Paartii Badhaadhinaa Adam Faarah wayita kana akka jedhanitti, fooramichi galma misoomaa fi mul’ata akka biyyaatti qabamerratti walii galteen waloo kan itti uumamudha. Itiyoophiyaan biyyoota guddina ariifachiisaarra jiran keessaaa tokko ta’uushee ibsuun, waggoottan jijiiramaa darban milkaa’inoonni gurguddoon magaalotatti abdiin ifaa horan galmaa’aniiru jedhaniiru.   Yaada Ministirri Muummee Dr.Abiyyi Ahimad maddisiisaniin kan eegalame Misoomni Koriidaraa Magaalota Jiraattotaaf Mijattuu gochuu dubbataniiru. Hojiiwwan Misooma Koriidaraan Hojjetaman Afriikaaf fakkeenyummaan kan eeraman ta’uusaanii kaasuun, milkaa’inoonni galmaa’an akkuma eegaman ta’uun hojiiwwan hafan biroon hojjetamuu qabu jedhaniiru. Kallattiiwwan Xiyyeeffannoo fuulduraa mootummaatiin kaa’aman hojiirra oolchuun milkaa’ina caaluuf hojjechuu akka qaban hubachiisaniiru.

Sadaasa 06/2018(TOI)-Boordiin Filannoo Biyyaalessaa Itiyoophiyaa Paartii “Wudib Walado Tigraay (WLD)”f waraqaa ragaa paartii siyaasaa naannoo seera qabeessa ta’e kenneera. Dargaggoonni paartii siyaasaa kana kan hundeessan hawaasni Tigree paartii tokkeen rakkachuu akka hin qabnee fi filannoo biraaf akka carraa banu yaadanii ta’uu ibsameera. Dargaggoonni kunniin paartii hundeessuun, gaaffii mirga seera qabeessumaa argachuuf Boordii Filannoo Biyyaalessaa Itiyoophiyaaf dhiyeessaniin waraqaan ragaa seera qabeessummaa isaaniif kennameera. Haaluma kanaan Boordiin Filannoo Biyyaalessaa Itiyoophiyaa akkaataa aangoo labsiidhaan kennameefiin Sadaasa 05/2018 Paartii Wudib Walado Tigraay(WLD)f waraqaa ragaa paartii siyaasaa naannoo seera qabeessa ta’e kennuu isaa beeksiseera.

Sadaasa 06/2018(TOI)-Guyyaan Saboota Sablammootaa fi ummattoota Itiyoophiyaa Naannoo Gaambeellaatti haala tokkummaa sabdaneessummaa cimsuun taateewwan garagaraan kabajuuf qophiin xumuramuu Af-yaa’iin Mana Maree Naannichaa Masarat Maatiwoos ibsaniiru. Af-yaa’iin mana maree naannichaa akka ibasanitti guyyaan Saboota, Sablammootaa fi Ummatoota Itiyoophiyaa 20ffaan sadarkaa naannichaatti keessummeessa aanaa Diimaan, godina Anyuwaakitti akka kabajamu ibsaniiru. Ayyanicha haala tokkummaa Sabootaa fi Sablammootaa cimsuun danda’amutti kabajuuf haaldureen xumuramuu eeraniiru. Ayyaanni Saboota, Sablammootaa fi Ummatoota Itiyoophiyaa haala hawaasni aadaa fi duudhaasaa ittiin ibsachuu danda’uu fi akkasumas qabeenya turizimii naannichaa beeksisuu fi guddisuun danda’amurratti akka kabajamu ibsaniiru. Waltajjiiwwan marii hubannoo uumuu sirna Heera Federaalaawaa fi barnoota Heera Mootummaa irratti sadarkaa bulchiinsaa fi jaarmiyaalee naannichaatti mariin hawwasaa gaggeeffamaa akka ture eerameera. Gara fuula duraattis manneen barnootaatti bifa gaaffii fi deebiidhaan akkasumas iddoolee hawwasni itti hedduumatutti immoo bifa dorgommii ispoortiidhaan ayyaanichi ni kabajama jedhan. Kabajni ayyaanichaa akka naannootti hanga Sadaasa 20/2018tti kan kabajamu yoo ta’u, akka biyyaalessaatti naannoo Giddugaleessa Itiyoophiyaa Magaalaa Hosaa’inaatti kabajaurratti argamuufis akka qophaa’aa jiran Tajaajila Oduu Itiyoophiyaatti himaniiru.

Sadaasa 6/2018 (TOI)- Keessummoota guyyaa sabootan sab-lammootaa fi ummattootaa kabajuuf naannoo jiddu galeessa Itiyoophiyaa dhufaniif tajaajila mijataa kennuuf qophiin taasifamuun ibsame. Guyyaan kun naannichatti kabajamuunsaa faayidaa inni qabuu fi baay’ina keessummootaa hubannaa keessa galchuun qophii taasifamuusaa hogganaan biiroo aadaa fi turizimii naannoo giddu galeessa Itiyoophiyaa Saamu’eel Mangashaa dubbataniiru. Kana malees carraa hojii uumuun sochii dinagdee caalaatti akka dadammaqsu TOI’f ibsaniiru. Kanaaf ammoo aadaa naannawichi simannaa keessummaaf qabuun simachuun tajaajila mijataa kennuuf qophiin xumuramuu ibsaniiru. Kabaja guyyaa Kanaan wal qabatee ummata waliin mariin gaggeeffamuus kaasaniiru. Magaalaawwan naannichaa hunda keessatti tajaajila sadarkaasaa eeggate kennuuf qophiin gahaan taasimauu beeksisanii, keessumaa magaalaa Hosaa’inaatti qophiin addaa taasifameera jedhaniiru. Hoteelotaa fi bakka aara galfii keessummootaa duraan tura malees hoteelonni haaraa sadarkaasaanii eeggatan hojii akka eegalan dubbataniiru.