Fulbaana 11/2019 (ENA)- Abbaan taayitaa miidiyaalee Itiyoophiyaa televizhinii Tigraayi (Tigray TV) yeroo hin murtoofneef dhorkuusaa beeksise. Akkaataa walii galtee nageenyaa Piriitooriyaa mootummaa FDRI fi ABUT jidduutti raawwatameen, abbaan taayitaa miidiyaalee Itiyoophiyaa bulchiinsa yeroo naannoo Tigraayi waliin marii taasisee walii galteerra gahamuusaatiin dhorkaan Kanaan dura Televizhinii Tigraayi irratti taasifame irraa ka’ee hojiitti deebi’uusaa ibsa Kanaan yaadachiiseera. Kana malees abbaan taayitichaa gaazexessitootaa fi ogeessota Televizhinii Tigraayiif leenjiiwwan ijaarsa nageenyaa fi ga’umsa dandeettii kennuun miidiyaan kun gara toora heera mootummaa fi ogummaatti akka deebi’u carraaqqii guddaa taasisaa turuusaa ibseera. Haa ta’u malee Televizhiniin Tigraayi carraa kennameefitti fayyadamee naamusa ogummaa eegee tajaajila kennuun kan irraa eegamu ta’us yeroo dhihoo asitti ergaawwan nageenya biyyaa fi ummataa akkasumas faayidaa biyyaalessaa balaarra buusan, waliti bu’insatti oofanii fi finxaalessummaa jajjabeessan walitti aansuun dabarsuurra akka jiru qorannoon hordoffii qabiyyee miidiyaa abbaa taayitichaa akka agarsiisu eerameera. Haala Kanaan abbaan taayitaa miidiyaalee Itiyoophiyaa akkaataa itti gaafatama seeraan kennameefiin har’aa eegalee Televizhinii Tigraayirratti yeroo hin murtoofneef dhorkaa taasisuusaa ibseera. Miidiyaan dijitaalaa, biroodkaastii fi maxxansaa kamiyyuu Televizhinii Tigraayi madda godhatee itti fayyadamuu ykn qabiyyeewwan seeraan alaa buufanni Televizhinii kun tamsaasu tamsaasuun ykn dhageessisuun kan dhorkame ta’uu hubachiiseera. Miidiyaa qajeelfama kana darbee argame kamiyyuu abbaan taayitichaa tarkaanfii seeraa fi bulchiinsaa akka irratti fudhatu cimsee hubachiiseera.

Fulbaana 10/2019(ENA): Ijipti qabeenya bishaanii bal’aa qabaattus, bulchiinsaafi itti fayyadama bishaanii keessatti hanqina guddaa akka qabdu Ministirri Gorsaa Dhimmoota Baha Afrikaa Ministira Muummee Obbo Geetaachoo Raddaa himani.   Obbo Geetaachoon turtii POA “Pulse of Africa” waliin taasisaniin, ilaalcha duubatti hafaa Abbayyaan kiyya qofa jedhu hordofaa akka jirtu dubbatan. Ilaalchi kunis haqa irratti kan hin hundaa’in ta’uu himuun, ejjennoon akkasii fudhatama akka hin qabnes kaasaniiru. Ijipti addunyaarratti biyyoota bulchiinsa bishaanii keessatti rakkoo qaban keessaa tokko ta’uu kan kaasan Obbo Geetaachoon, qabeenya bishaanii karaa bu’a qabeessa ta’een fayyadamuurra, qisaasama bishaanii guddaa akka raawwattus himaniiru.   Ijipti bishaanitti sirnaan fayyadamuu caalaa Itoophiyaa madda Laga Abbayyaa taateefi Sudaan dandeettii jallisii olaanaa qabdu gidduutti hokkora kaasuun nagaafi tumsi biyyoota lamaanii akka hin cimne dhiibbaa uumaa akka turteefi itti jirtus hubachiisaniiru. Keessattu rakkoo nageenyaa Sudaan keessatti yeroo ammaa mul’achaa jiruuf Ijipti harka keessa qabaachuun waan nama dhibu akka ta’es dubbataniiru. Ijipti ilaalcha duriifi adeemsa yeroon isaa darbe dhiisuun dhugaafi haala qabatamaa naannawichaa waliin walsimsiisuun akkaataa waloon bishaan laga Abbayyaa itti fayyadamuun danda’amurratti xiyyeeffachuu akka qabduus Obbo Geetaachoon hubachiisaniiru.

Fulbaana 9/2019 (ENA)- Gibxi qabeenya bishaanii guddaa osoo qabduu sirni bishaan ittiin bulchitu dadhabaa ta’uusaa ministirri gorsaa dhimmoota Afriikaa bahaa ministira muummee Obbo Geetaachoo Raddaa ibsan. Obbo Geetaachoo Raddaa turtii POA waliin taasisaniin, Gibxi laga Abbayyaa kan dhuunfaashee gootee ilaaluudhaan adeemsa boodatti hafaa hordofaa akka jirtu dubbataniiru. Ejjennoon Gibxi madda laga Abbayyaa isa dhugaa dabalatee adeemsa tuffii haqa ganu ta’uu eeranii, kun ammoo gonkumaa fudhatama hin qabu jedhaniiru. Gibxi faallaa saayinsii dhaabbachuun itti fayyadama Abbayyaa ilaalchisee adeemsi dogoggoraa deemaa jirtu Gibxoonni miirri abbummaa dogoggoraan “mirgoota seenaa” jedhu akka itti dhaga’amu godheera jedhaniiru. Yaadni “mirga seenaa” jedhu ilaalcha sassattuu qaamni bishaan Abbayyaa dursee fayyadamuu eegale bara baraan to’achuu qaba jedhurraa kan dhufe ta’uu dubbataniiru. Yaad-rimeen “nageenya bishaanii” jedhu kan Gibxi waltajjiiwwan idil addunyaarratti kaaftu fedhii olaantummaa qaama tokkoo kan yeroon itti darbe ta’uu obbo Geetaachoon dubbataniiru. Kun bu’aa siyaasaa argachuuf osoo beekamuu kan uumame seenessa dogoggorsaa akka ta’es dubbataniiru. Gibxi biyyoota addunyaa bulchiinsa bishaanii dadhabaa ta’e qaban keessaa ishee tokkodha kan jedhan obbo Geetaachoon, Pirojektoonni akka Tushkaa bishaan guddaa gaafatan kanneen gammoojjii keessatti argaman fakkeenya itti fayyadama qisaasaati jedhaniiru. Hurki bishaanii Gibxi hidha Aswaanitti waggaatti mudatu, baay’ina bishaanii kuusaalee bishaanii Itiyoophiyaa keessatti argamu baay’ee akka caalu dubbataniiru. Gibxi madda bishaan Abbayyaa kan taate Itiyoophiyaa fi lafa jallisiif oolu bal’aa kan qabdu Sudaan jidduutti nagana akka hin jiraanne hojjechaa turuunshee rakkoon Sudaan keessa jiru bishaan Abbayyaa akka hin fayyadamne gochuuf tarsiimoo gaggeessitudha jedhaniiru. Karaan tokkichi Gibxi qabdu adeemsa yeroon itti darbe dhiisuudhaan haqa mul’ataa waliin araaramuu akka ta’e dubbataniiru.

Fulbaana 9/2019 (ENA) Komoroos walta’insa Itoophiyaa waliin qabdu haala fayyadamummaa waliinii mirkaneessuu danda'uun cimsuuf kutannoo qabaachuushee Ambaasaaddar Yusuuf Mondohaa Asumaanii ibsan. Hariiroon biyyoota lamaan gidduu jiru yeroo gara yerootti cimaa dhufuusaa Itoophiyaatti Ambaasaaddarri Komoroos fi Ergamaa dhaabbataa Gamtaa Afrikaa Yusuuf Mondohaa Asumaanii turtii ENA waliin taasisaniin dubbataniiru. Biyyoonni lamaan komishinii waliinii hundessuuf waliigalteerra ga’uu isaanii eeranii, komishiniin kunis wal-ta'insa kana caalaatti cimsuuf kan gargaaru ta'uu ibsaniiru. Wal-ta'insa dinagdee cimsuun xiyyeeffannoo jalqabaa biyyoota lamaanii ta'uu isaas kaasaniiru. Daandiin Qilleensaa Itoophiyaa babal’ina daldalaa fi hariiroo ummataa biyyoota lamaan gidduu jiru cimsuuf taasisaa jiru ol'aanaa ta'uu isaa dubbataniiru. Daandiin Qilleensaa Itoophiyaa balallii gara komoroositti taasisuu erga eegalee waggaa 10ffaa isaa waliin kabajuuf qophii ta'aasiisaa jiraachuu eeraniiru. Damee sivil Aviyeeshiniin to'attoota imala qilleensaaf leenjiin yeroo dheeraa kennamaa jiru dandeettii biyyaalessaa Komoroos guddisaa akka jiru dubbataniiru. Hawaasni daldalaa Komoroos dhaabbata daldalaa Itoophiyaa waliin hariiroo daldala biyyoota lamaaniin caalaatti cimsuuf gama mana maree daldalaan carraawwan akka jiranis Ambaasaadarichi ibsaniiru. Tumsa nageenyaa cimsuuf Jilli hoggantoota ol'aanoo poolisii Komoroos Itoophiyaa daawwachuusaanii yaadachiisanii, jilichi yakka qindaa’aa fi daddabarsa qoricha sammuu hadoochu ittisuu irratti muuxannoo Itoophiyaan qabdu fudhachuu isaa eeraniiru. Misooni Annisaa Itoophiyaa misooma Afrikaa fi dhiheesii elekitrikaa Riijinichaaf qooda murteessaa bahaa akka jiru dubbataniiru. Adeemsa marii biyyaalessaa Itoophiyaa kan dinqisiifatan Ambaasaadarichi, nagaa fi tasgabbiin guddina Afrikaatiif qooda olaanaa akka qabu ibsaniiru. Komoroos tapha Garba Hindiiratti taphattu dabalatee damee tajaajilaan Turizimii fi taateewwan Ispoortii irratti muuxannoo Itoophiyaa irraa fudhachuuf fedha akka qabdu dubbataniiru. Walumaagalatti Komoroos tumsa Itoophiyaa waliin qabdu fayyadamummaa waliinii irratti hundaa'uun cimsuuf fedha akka qabdu Ambaasaadarichi ibsaniiru. Komoroos bara 2011 A.L.A Imbaasiishee Finfinneetti erga bantee hariirooshee guddachaa, tumsa damee garagaraa caalaatti cimsuuf haala mijataa uumee jira.

Fulbaana 8/2019 (ENA)- Gareen badii ABUT badii fi gidiraa malee ummata Tigaayiif waan buusu tokkollee akka hin qabaannee pirezidaantii bulchiinsa yeroo Tigraayi duraanii fi ministirri gorsaa ministira muummee dhimmoota Afriikaa bahaa Geetaachoo Raddaa ibsan. Ummannii fi dargaggoonni Tigraayi garee badii ABUT irratti qabsaa’uudhaan gara nageenyaa fi misoomaatti deebi’uu akka qaban dhaamaniiru. Pirezidaantii bulchiinsa yeroo Tigraayi duraanii fi ministirri gorsaa ministira muummee dhimmoota Afriikaa bahaa Geetaachoo Raddaa turtii POA waliin taasisaniinABUT’n waggoottan darban ummata Tigraayi gidiraa dhuma hin qabnee fi maraammartoo badii keessa galchuun alatti homaa akka isa hin fayyanne dubbataniiru. Adeemsi badii garichi itti jiru fedhii nagaa fi tasgabbii ummanni Tigraayi qabu waliin faallaa ta’uu dubbataniiru. Yeroo haalli biyyaalessaa fi idil addunyaa jijjiirame kanatti gaggeessitoonni ABUT ilaalcha siyaasaa moofaa fi dhiphaa keessatti kufanii akka jiran ibsaniiru. Badiin waggoottan darban naannicha keessatti qaqqabe murtee ABUT dogoggoraarraa kan maddu ta’uu ibsaniiru. Gaggeessitoonni ABUT yeroo hundaa nuyi sirriidha jechuun yaaduun, gidiraa ummataa ifatti mul’atu akka hin hubanne isaan taasiseera jedhan. Gaggeessitoonni garichaa muraasni tooftaa hidhannoo waraanaa moofaan ala kan itti hin mul’annee fi umuriisaanii fixan carraa ummata Tigraayi addatti to’achuuf ka’uunsaanii gonkumaa dogoggora jedhaniiru. Dhaloonni ammaa yaada haaraa fi fedhii nageenyaa dhugaa akka qaban ibsuun, hoggantoonni garichaa yaada yeroon itti darbeen uummata gara jeequmsaatti galchuuf hojjechaa akka jiran ibsaniiru. Walii galtee Nagaa Piriitooriyaa waraana mudatee ture dhaabuu fi uummata gara jireenya idileetti deebisuuf akka ta’e ibsuun, hoggantoonni garee TPLF adeemsa waliigalticha aangoosaanii itti fufsiisuudhaaf jedhanii akka gufachiisan dubbataniiru. Lammiilee qe'eesaaniirraa buqqa'anii rakkoo keessa jiran gara qe'eesaaniitti akka hin deebine dhorkuun dantaa siyaasaatiif itti fayyadamaa akka jiran ibsaniiru. Hoggantoonni TPLF nagaa hin barbaanne uummata beelaa fi rakkootti dhiisanii jeequmsa irraa bu'aa argachuuf, daddabarsa seeraan alaa fi daldala warqii irratti bobba'aniiru jechuun ibsaniiru. Dargaggoota Tigiraay irratti garee kanaan Cunqursaa fi daba raawwatamuuf jecha barattoonni naannoosaanii dhiisanii godaanaa akka jiranis ibsaniiru. Amma immoo hoggantoonni garichaa nageenyaa fi dantaa uummata Tigiraay duubatti dhiisuun, diinota uummata Tigiraay waliin tumsa siyaasaa haaraa uumuunsaa gocha nama qaanessudha jedhaniiru. Akka Obbo Geetaachoon jedhanitti, hoggantoonni garee TPLF kufaatii akka dandeettii fi injifannootti ilaaluun farra uummataa ta'uusaanii eeranii, garichi badiisaa amane fudhachuurra, akka waan sirrii ta’eetti fakkeessuun uummata dogoggorsiisuu itti fufeera jedhaniiru. Gareen TPLF uummata Tigiraayiif badii, godaansa, dararaa fi rakkina malee waan haaraa kennuu danda'u tokkollee hin qabu jedhaniiru. Nageenyi waaraan kan dhufu garee badii kana murannoodhaan irratti qabsaa'uun qofa ta'uus dubbataniiru. Haala Kanaan uummannii fi dargaggoonni Tigiraay garee badii dantaa muraasaaf dhaabbate kana irratti qabsaa'uun naannicha gara nageenyaa fi misoomaatti deebisuu akka qaban waamicha dhiheessaniiru.  

Fulbaana 7/2019 (ENA)—Hulaa galaanaa Itoophiyaarraa karaa seeraan alaa fudhatame dhaloonni har’aa deebifachuuf dirqama seenaa fi seeraa akka qabu miseensi duraanii Raayyaa Ittisa Biyyaa, Birgaadeer Jeneraal Hayiluu Gonfaa ibsan. Birgaadeer Jeneraal Hayiluu Gonfaa Raayyaa Ittisaa Biyyaa Itoophiyaa keessatti sadarkaa hoggansaa garaagaraa irratti waggoota dheeraaf biyyasaanii tajaajilaniiru. Gaaffii Itoophiyaan hulaa galaanaa ofii ishee argachuuf dhiheessaa jirtu dhimma seeraa, seenaa, nageenya naannawaa, teessuma lafaa fi dinagdee bu’uura kan godhate ta’uu hayyoonni garaagaraa yeroo adda addaatti ibsaa turaniiru. Birgaadeer Jeneraal Hayiluu Gonfaanis ENA waliin turtii taasisaniin, Itoophiyaan hulaa galaanaa karaa seeraan alaa dhabuu ishee yaadachiisuun, ulaa galaanaa karaa seeraan alaa dhabde kana deebitee argachuuf bu’uura seenaa fi seeraa gahaa ta’e qabdi jedhaniiru. Kaayyoon Itoophiyaa kan nama biraa saamuu ykn mirga nama biraa sarbuu osoo hin taane, mirga seeraan qabdu deebifachuu fi faayidaa biyyaalessaa ishee karaa nagaa, seeraa fi waliigaltee irratti hundaa’een mirkaneessuu akka ta’e ibsaniiru. Addunyaarratti biyyoota ummata miliyoona 130 ol qaban keessaa Itoophiyaan qofatu hulaa galaanaa irraa guutummaatti daangeffamee jiraachuu eeranii, biyyattiin Galaana Diimaa irraa fageenya kiiloo meetira 50 gadiitti kan argamtu ta’us, hulaa galaanaa dhabuun ishee waan fudhatama hin qabne ta’uu himaniiru. Haalli kunis faayidaa biyyaalessaa biyyattii irratti dhiibbaa guddaa geessisaa jiraachuu ibsaniiru. Waggoottan muraasaan dura Itoophiyaan hulaa galaanaa lamaa fi isaa ol kan qabdu ta’uu yaadachiisuun, dogoggora seenaa keessatti raawwatameen hulaa galaanaa irraa adda baafamuu ishee himaniiru. Hulaa galaanaa Itoophiyaarraa seeraan alaa fudhatame kana dhaloonni har’aa deebifachuuf dirqama seenaa fi seeraa qaba jedhaniiru. Guddinni dinagdee Itoophiyaa yeroo gara yerootti ariitiin guddachaa kan jiruufi baay’inni uummata ishees haalaan dabalaa waan jiruuf, biyyattiin hulaa galaanaa ofii ishee kana keessummeessuu argachuun dirqama ta’uu himaniiru. Kanaaf, gaaffiin hulaa galaanaa ofii ishee argachuu Itoophiyaa karaa nagaa fi dippilomaasiin deebii akka argatu hojjechuun filannoo jalqaba ta’uu akka qabu himanii, yoo kun milkaa’uu baates, dhaloonni har’aa seenaa fi seera bu’uureffachuun, miidhaan caalu osoo hin mudatiin, furmaata waaraa argachuu qaba jedhaniiru.

  Itoophiyaan bara haaraatti faayidaa biyyaalessaa isheef dursa kennuun, akkasumas sagalee dhugaa Afrikaanota ta’uu eegalteetti. Haala walxaxaa fi jijjiiramaa ji’oopoolitikaa addunyaa keessatti imaammata hariiroo alaa cimaa fi walaba ta’e hordofuun miseensa BRICS ta’uu kan dandeesse Itoophiyaan, Yaa’ii Hoggantoota BRICS 18ffaa Niiwuu Deelii, Indii keessatti gaggeeffamerratti, fakkeenya ta’uu ishee fi dhageettii tarsiimawaa qabdu qabatamaan mirkaneessiteetti. Yaa’iin mata-duree “Cichoomina, kalaqa, tumsa fi itti fufiinsa ijaaruu” jedhuun gaggeeffame kun, Itoophiyaan biyyoota miseensotaa fi biyyoota michuu waliin hariiroo gama hedduu qabdu gara sadarkaa olaanaatti ceesisuu fi sirna addunyaa haqaa fi hunda galeessa ta’e ijaaruuf kutannoo qabdu ifatti kan mul’ise ture.   Itoophiyaan waltajjicharratti ejjennoo mul’isteen, biyyoonni rakkooleen osoo hin uumamin dura dandeettii isaan dandamachuu cimsachuu akka qaban xiyyeeffannoo kenniteetti. Kana ilaalchisee, Itoophiyaan mirga wabii nyaataa mirkaneessuuf tattaaffii taasisteen, hirkattummaa gargaarsa alaa irraa argamuun qamadii galchuurraa guutumaan guutuutti bilisa ta’uu ishee beeksisteetti. Akkasumas, waljijjiirraa midhaan nyaataa “BRICS Grain Exchange” keessatti oomishtuu fi dhiyeessituu taatee hirmaachuuf qophii ta’uu mirkaneessiteetti. Waltajjicharratti Itoophiyaan damee teeknooloojii fi kalaqaatiin bu’uuraalee misoomaa dijitaalaa, Waraqaa eenyummeessaa dijitaalaa, sirnoota kaffaltii fi marsariitiiwwan odeeffannoo amanamoo bal’inaan ijaaraa jiraachuu ibsiteetti. Afrikaan bara teeknooloojii egeree abbummaan hoogganuu kan dandeessisu Yuunivarsiitii Hubannoo Namtolchee Ida’amuu hundeessaa jiraachuu eeruun, dhaabbilee BRICS wajjiin waliin hojjechuuf qophii ta’uu mirkaneessiteetti. Afrikaan qabeenya albuudaa hedduu kan qabdu ta’uu yaadachiisuunis, qabeenyi albuudaa ce’umsa anniisaa, oomisha sadarkaa olaanaa fi dinagdee dijitaalaatiif murteessaa ta’uu Itoophiyaan ibsiteetti. Biyyoonni miseensa BRICS ta’an kaappitaalaa, teeknooloojii fi filannoowwan gabaa waan qabaniif, qabeenya kana walitti qindeessuun itti fayyadamuuf, akkasumas oomisha dheedhii irratti sona dabalataa uumuuf carraa guddaa akka uumu agarsiifteetti.   Itoophiyaan damee fayyaatiin dandeettii oomishaa ishee babal’isaa jiraachuu fi albuuda, anniisaa haaromfamaa fi dandeettii indaastirii guddachaa jiru irratti hirmaannaa fi tumsa uumuuf qophii ta’uu mirkaneessiteetti. Dabalataanis, Daandiin Qilleensa Itoophiyaa Afrikaa fi addunyaa walitti hidhuuf carraa guddaa ta’uu, biyyoota ollaattif dhiyeessiin anniisaa taasifamuun, akkasumas Finfinneen teessoo Gamtaa Afrikaa ta’uun walitti hidhamiinsa ardii fi addunyaa keessatti gahee Itoophiyaan qabdu ifatti kan agarsiisan ta’uu waltajjicharratti ibsiteetti. Sirna faayinaansii addunyaa ilaalchisee, Itoophiyaan haaromsa dinagdee gaggeessaa fi liqii alaa ishee irra deebiin qindeessuuf hojjechaa jiraachuu ibsiteetti. Dinagdeewwan qormaata keessa jiranif adeemsi qoodinsa liqii saffisaa, ifaa fi kan tilmaamamuu danda’u ta’uu akka qabu yaadachiifteetti. Akkasumas, biyyoonni guddachaa jiran dhaabbilee faayinaansii idil-addunyaa keessatti bakka bu’ummaa haqaa, dhageettii isaanii mirkaneessu fi bu’aa qabatamaa fidu qabaachuu akka qaban waamicha dhiyeessiteetti. Yaa’ii kanarratti hirmaannaa dammaqinaa qabu taasisteen, Itoophiyaan miseensa Dhaabbata Daldalaa Addunyaa (WTO) akka taatu, Mana Maree Dhaabbata Siivil Aviyeeshinii Idil-addunyaa (ICAO) keessatti teessoo dabalataa akka argattu, akkasumas Yaa’iin Idil-addunyaa Jijjiirama Haala Qilleensaa (COP32) Finfinneetti akka gaggeeffattuuf deeggarsa argatteetti. Kana malees, Baankii Misoomaa Haaraa (NDB) Waajjira isaa Finfinneetti akka banamu fi dhimmoota dursa kennamaniif gara waliigalteeatti jijjiiruuf “Qindeessaan BRICS” akka hundeeffamuuf yaada dhiyeessiteef fudhatamni bal’aan argameera. Hojiiwwan dipilomaasii bal’aa waltajjii BRICS cinatti gaggeeffaman keessaatti mariin hoggantoota addunyaa waliin taasifame, faayidaa biyyaalessaa eeguufi tumsa cimsuu irraatti milkaa’ina guddaan kan galmaa’e ture. Pirezidaantii Raashiyaa Vilaadmiir Puutiin waliin, hariiroo tarsiimawaa Itoophiyaa fi Raashiyaa gidduu jiru caalaatti cimsuu irratti mariin bu’a qabeessi gaggeeffameera. Mariin kun dameewwan ittisaa fi nageenyaa, daldalaa fi invastimantii, barnootaa, teeknooloojii, akkasumas aadaa fi hariiroo uummataa fi uummataa irratti tumsa jiru guddisuuf kutannoo waloo mirkaneesseera. Dabalataanis, qophii COP32, jijjiirama haala qilleensaa fi galmoota misoomaa irratti tumsa cimsuuf waliigaltee uumuun danda’ameera. Ministira Muummee Indii Naareendiraa Moodii waliin immoo, tumsa ittisaa cimsuu, dabarsa teeknooloojii, ijaarsa dandeettii fi misooma albuudaa irratti mariin gaggeeffameera. Hariiroo seenaa dheeraa biyyoota lamaanii gara sadarkaa qabatamaa dinagdee fi misoomaatti ceesisuun akka danda’ame ibsameera. Akkasumas, Ministira Muummee Maaleezhiyaa Anwaar Ibraahiim waliin invastimantii, turizimii, tumsa anniisaa haaromfamuu danda’uu fi muuxannoo damee oomishaa irratti mariin gaggeeffamee, misooma biyya keessaa kan deeggaru carraan guddaan akka banamu taasifameera. Dhaalaa Gonfoo Mootummaa Abuu Dhaabii, Sheek Khaalid bin Mahaammad bin Zaayid Al Naahyaan, waliin dhimmoota dursaa BRICS fi tumsa gama hedduu irratti mariin gaggeeffameera. Pirezidaantii Iraan Mas’uud Pezeezhkiyaan waliin immoo haala yeroo naannawa Galaana Diimaa, tasgabbii nageenyaa naannichaa, akkasumas daldala, dinagdee fi misoomaa irratti waljijjiirraa bu’aa waloo irratti hundaa’e caalaatti babal’isuuf waliin hojjechuurratti waliigalteen irra ga’ameera. Walumaagalatti, Itoophiyaan Yaa’ii Hoggantoota BRICS 18ffaa irratti hojii dippilomaasii tarsiimawaa gaggeessitee fi bu’aawwan qabatamaa galmeessite, jijjiirama dippilomaasii fi dinagdee yeroo dheeraa biyyattii dhugoomsuuf utubaawwan murteessoo ta’aniiru. Mootummaan waltajjii seena qabeessa kanarratti Itoophiyaan miseensummaa BRICS fayyadamuun faayidaa tarsiimawaa ishee ija jabinaan akka gaafattu, akkasumas misooma Afrikaa, nageenyaa fi tumsa addunyaa haqa qabeessa ta’eef michuu amanamaa ta’uu ishee qabatamaan mirkaneeteetti.Olka’iinsi Itoophiyaa Haaromsa Afrikaa labsaa jira! Tajaajila Kominikeeshinii Mootummaa

  Fulbaana 6/2019 (ENA) — Qormaatawwan naannichatti mudachaa jiran waaraan akka furamaniif tokkummaa fi kutannoon waloo biyyoota miseensotaa murteessaa ta’uu Barreessaan Olaanaa Dhaabbata Walta’iinsa Misooma Biyyoota Baha Afrikaa (IGAD) Dr. Warqinaa Gabayyoo ibsan. Manni Maree Ministirootaa IGAD walga’ii ariifachiisaa isaa 74ffaa har’a Jibuutii keessatti gaggeesseera. Walga’icharratti ministiroonni dhimma alaa fi bakka bu’oonni biyyoota miseensa IGAD hirmaataniiru. Walga’icharratti nageenyaa fi tasgabbii naannichaa akkasumas dhimmoota ijoo biroo irratti mariin taasifameera. Barreessaa Olaanaan IGAD Dr. Warqinaa Gabayyoo yeroo kanatti akka jedhanitti, qormaatawwan naannichatti mudachaa jiran waaraan furuuf tokkummaa fi kutannoon waloo biyyoota miseensotaa murteessaa dha.   Hojiiwwan misoomaa fi nageenyaa Sekireetariyaatiin IGAD raawwataman bu’aa jajjabeessaa argamsiisaa jiraachuu ibsuun, dhaabbanni kun badhaadhina uummata naannichaa mirkaneessuuf kutannoo cimaa qabaachuu beeksisaniiru. Qormaatawwan garaagaraa ji’oo-poolitiksii jiraatanillee, raawwii hojii Sekireetariyaatii IGAD ji’oota jahan darban keessatti galmeesse kan nama jajjabeessu ta’uu dubbataniiru. Hojiilee bu’uuraalee misoomaa fi damee fayyaa naannichaa keessatti galmaa’an kaasuun, sirni odeeffannoo bishaan lafa jalaa naannichaa tajaajila gahumsaa fi qaqqabummaa fooyya’aa galmeessuu ibsaniiru. Akkasumas, indeeksii haguuggii fayyaa addunyaa naannichaa dhibbeentaa 60 irraa gara dhibbeentaa 65tti olka’uu fi kunis karoora bara 2027tti dhibbeentaa 70tti guddisuuf qabame galmaan ga’uuf kan dandeessisu ta’uu kaasaniiru. Gama biraatiin, Sudaan gara miseensummaa guutuu IGADtti deebi’uun tumsa fi tokkummaa naannichaa daran cimsuuf gahee olaanaa qabaachuu ibsaniiru. Barreessaan Olaanaa kun yeroo Adoolessa 2026 Sudaan daawwatanitti, Waajjirri Buufata IGAD Sudaanitti argamu irra deebi’uun ifatti banamuu yaadachiisuun, tarkaanfiin kun walitti dhufeenya kallattii fi waaraa IGAD’n uummata naannichaa waliin qabu daran cimsuun akka itti fufu kan taasisu ta’uu ibsaniiru. IGAD Gamtaa Afrikaa, dhaabbilee Mootummoota Gamtoomanii fi michoota tarsiimawaa biroo waliin hariiroo qabuun misooma waaraa naannichaaf murteessaa ta’uu dubbataniiru.   Tumsi kun dandeettii biyyoota Baha Afrikaa cimsuu keessatti gahee olaanaa akka qabuus kaasaniiru. Balaa jijjiirama qilleensaa gara fuulduraatti uumamuu danda’u sirna akeekkachiisa duraa cimsuun dandamachuuf hojmaatawwan barbaachisoo qophaa’aa jiraachuu ibsaniiru. Biyyoonni balaa jijjiirama qilleensaa El Ninoon fiduu danda’u hir’isuuf hojiiwwan qophii duraa cimsuu akka qaban hubachiisaniiru. Gama biraatiin, naannicha hubannoo namtolchee waliin walitti hidhuu fi bu’uura misoomaa teeknoolojiin deeggaramu diriirsuuf hojiiwwan jalqabaman abdachiisaa ta’uu ibsaniiru. Walga’ichi nageenya, tasgabbii fi guddina diinagdee waliigalaa naannichaa saffisaafi bu’a qabeessa taasisuuf dhimmoota biyyaalessaa fi naannawaa irratti mari’achuun, murteewwan dabarsuun xumuramuu odeeffannoon ENAn Sekireetariyaatii IGAD irraa argate ni mul’isa. Manni Maree Ministirootaa IGAD caasaalee imaammataa ijoo dhaabbatichaa keessaa tokko yoo ta’u, hojiiwwan dhaabbatichaa qindeessuu fi biyyoota miseensotaa gidduutti tumsa jiru cimsuu keessatti gahee olaanaa kan qabuudha