Eebila 8/2018 (ENA) : Magaala Shaggaritti ijaarsi Piroojektiiwwanii fi manufakchariingi industirii cimanii itti kan itti fufan ta’uu ibsame. Magaala Shaggaritti qopheessummaa wajjiraa inveestimentti fi industirii magaalaa Shaggariin daawannaan hojii investimenti geggefamera.   Sagantaa kanaanis ijaarsi piroojeektiiwwan investimentiifi Industirii manufaakcheriingii garagaraa Kutaalee Magaalaa Galaaniifi Eekkaa Xaafootti daawwatamaniiru. Magaalaan Shaggaritti carraawwaniifi humna Investimentii fayyadamuun Magaalaa guddu-gala dinagdee taasisuuf hojjetamaa kan jiru yoo ta'uu kan eeran itti aanaa invastimentii fi industirii magaalaa Shaggar obbo Nabiyyuu Raagaa, kunis guddina dinagdee Magaalichaa utubuun tarkaanfiiwwan imala Badhaadhina dhugoomsuu keessatti gahee olaanaa bahachaa jiraachuu ibsani. Daawwannaa kanaanis Piroojeektii Investimentii “Winfield trading" kaappitaala birrii miliyoona 300 oliin hojjetamaa jiruufi dhaabbatni "Brighten Motors" suphaafi gurgurtaa Konkolaattotaa irratti hojii eegale kutaa Magaalaa Galaanitti daawwatamaniiru.   Kana malees dhaabbatni “Hilina enriched foods” oomisha nyaata daa'immanii irratti bobba'uun hojjechaa jiruufi dhaabbatni “Qualables” kutaa Magaalaa Eekkaa Xaafootti daawwatameera.   Piroojeektiiwwan Investimentii kunneen hojiiwwan suphaafi gurgurtaa konkolaattota ammayyaa irratti kan hojjetan yoo ta'u, kunis hanqina dhiyeessii furuun cinatti carraawwan hojii uumuun guddina dinagdee biyyaafi Magaalichaa saffisiisuu keessatti gahee olaanaa kan qabani ta’uu himaniiru. #Ena Afaan Oromoo #ENA

Eebila 8/2018 (ENA): Baankiin Addunyaa fi Xaaliyaan haaromsa diinagdee biyya keessaa Itiyoophiyaaf deeggarsa qaban cimsanii akka itti fufan beeksisan. Jilli Itiyoophiyaa Ministira Maallaqaa Ahimad Shideen durfamu baankii addunyaa fi jila Xaaliyaanii waliin marii sadarkaa olaanaa gaggeessee walta’iinsa gama sadeen daran cimsuuf marii’ateera.   Xiyyeeffannaan marii kanaa inni guddaan sagantaa riifoormii diinagdee Itiyoophiyaan gaggeessaa jiru deeggaruuf tumsa paartilee sadeen cimsuu irratti kan xiyyeeffatedha. Deeggarsa maallaqaa si’ataa fi amanamaa ta’ee fi aantummaa misoomaa biyyattii waliin walsimuu danda’u irrattis mari’ataniiru. Jilli Itiyoophiyaa bu’aa diinagdee Gooroo tibbana galmeessisuun, tattaaffii haaromsaa mootummaan eegale itti fufsiisuu, naamusa faayinaansii daran cimsuu, guddina dinagdee hunda hammate mirkaneessuuf kutannoo qabaachuu isaa irra deebi’ee mirkaneesseera. Marii kanaan deeggarsi qindoomina qabu michoota misoomaa irraa argamu barbaachisaa ta’uu ibsameera. Kunis deeggarsi kennamu bu’aa barbaadamu akka argamsiisuu fi qabeenya bu’a qabeessa ta’een akka itti fayyadaman mirkaneessuuf kan agarsiifamedha. Riifoormii diinagdee biyya keessaa deeggaruun alattis, bu’uuraalee deeggarsa qindoomina qaban kanneen Itiyoophiyaan haala dinagdee addunyaa jijjiiramaa fi walxaxaa ta’e keessa akka darbitu dandeessisan irratti mariin gaggeeffameera.   Jilli Xaaliyaanii gama isaatiin, tattaaffii misoomaa Itiyoophiyaa waliin tumsa qabaachuu isaa irra deebi’ee kan mirkaneesse yoo ta’u, keessumaa tumsa biyyoota lamaanii fi bu’uura faayinaansii idil-addunyaa waliin walsimuun deeggarsa isaa akka cimsu ibseera. Haaluma walfakkaatuun, Baankiin Addunyaa sagantaa riifoormii diinagdee Itiyoophiyaaf deeggarsa itti fufiinsa qabu ibsuun, tumsa faayinaansii bu’a qabeessa ta’e guddisuuf michoota waliin walitti dhiyeenyaan hojjechuuf qophii ta’uu beeksiseera. Qormaata dinagdee yeroo ammaa fi hanqina maallaqaa itti fufiinsaan furuuf tumsa cimaa fi tattaaffii waloo gochuun barbaachisaa ta’uus dubbataniiru. Kana malees, bu’aa misoomaa qabatamaa ta’e galmaan ga’uuf qindoomina imaammataa itti fufiinsa qabu, qunnamtiin qindoomina qabuu fi itti gaafatamummaa waliinii qabaachuun barbaachisaa ta’uu marii kanaan ibsameera. Marii kanaan tumsa qaamolee sadan gidduu jiru daran cimsuu fi bu’uura tumsaa qindoomina qabu qopheessuuf tattaaffii taasifamu haala mijeessuu irrattis waliigalameera. Ministeerri Maallaqaa ibsa ENA’f ergeen, Itiyoophiyaan cimina dinagdee fi guddina yeroo dheeraa mirkaneessuuf riifoormii caasaa ijoo hojiirra oolchuuf kutannoo qabdu irra deebi’ee ibseera. #Ena Afaan Oromoo #ENA

Eebila 8 /2018 (ENA): Hojiin misoomaa Naannoo Oromiyaa godina Arsii keessatti hojjetamaa jiru cimee itti fufa jedhan pireesidaantiin naannichaa obbo Shimallis Abdiisaa. Pirojektiin Humna Qilleensaa Asallaa bakka Ministirri Muummee Dr. Abiyyi Ahimad argamanitti eebbifamee tajaajilaaf banameera.   Pireesidaantiin naannoo Oromiyaa obbo Shimallis Abdiisaa eebbifamuu piroojektichaa sababeeffachuun ergaa dabarsaniin, Mootummaan jijjiiramaa hojiiwwan misoomaa bu’a qabeessa ta’anii fi jireenya ummataa bu’uuraan fooyyessanii hojjechaa tureera jedhani. Mootummaan naannichaa misooma bu’uuraalee misoomaa naannichaa saffisiisu irratti xiyyeeffatee hojjechaa turuus ibsaniiru. Keessattuu, dhaqqabummaa fi uwwisa daandii guddisuuf ijaarsa daandii amma jiru xumuruu bira darbee daandiiwwan haaraan hojjetamuu ibsaniiru. Damee fayyaatiin hospitaalonni hedduun ijaaramanii hojiitti galuu isaaniis ibsuun, hojiin ijaarsa bishaan dhugaatii qulqulluu fi misooma bu’uuraalee jallisii hojjetamuu eeraniiru. Hojiileen ummanni jireenya isaa akka jijjiiru dandeessisan kunneen cimee akka itti fufan ibsuun, milkaa’ina kanaaf hoggantoonni hundi kutannoodhaan hojjechuu akka qaban dubbataniiru. Buufanni anniisaa humna qilleensaa har’a eebbifames misooma naannichaa saffisiisuuf carraa guddaa kan uumu ta’uus ibsaniiru. Ummanni Godinichaa carraa gaarii argateen hiyyummaa fi duubatti hafummaa dhabamsiisuu akka qabus dubbataniiru. Ummanni qabeenya argate qusachuun gara damee invastimantiitti ce’uun itti fufiinsaan of jijjiiruu akka qabus dubbataniiru. #Ena Afaan Oromoo #ENA

👉 Kan eebbifame : Ministira Muummee Dr. Abiyyi Ahimadiin har’a Eebila 8/2018 👉 Bakka argama piroojaktichaa : Naannoo Oromiyaa Godina Arsii aanaa Heexoosaa   👉 Fageenya Finfinneerraa: 150 km 👉 Ijaarsi isaa kan eegalame: Mudde 2014 👉 Kontiraaktara: Kubbaaniyaa Simansi Gaamesaa kan jedhamu kan Ispeenii fi Deenmaarki waliin ta’uun 👉Dhaabbata Gorsaa : Kubbaaniyaa Daar Al Handasaa Sheer fi kubbaaniyaa Biyyoota Araba Gamtoomanii Paartinar kan jedhamu damee injiinariingii dhaabbatichaa waliin ta’uun 👉 Baasii ijaarsaa fi madda faayinaansii: Ijaarsi waliigalaa Piroojektichaa yuuroo miliyoona 145 yoo ta’u, maddi maallaqichaa motummaa Deenmaarkiin kan uwwifamedha 👉 Saffisa qilleensa naannichaa giddugaleessaan: Sekondiitti Meetira 8.2 👉 Dandeettii Humna maddisiisuu: Meeggaa Waattii 100 👉 Waggaatti hamma anniisaa oomishu: Sa’aatiitti Meeggaa Waattii 354 👉 Baay’ina Tarbaayinii: 29 👉 Dandeettii anniisaa maddisiisuu Tarbaayinii tokkoon tokkoo: Meeggaa Waattii 3.465 👉 Dheerina utubaa ykn Baattoo tarbaayinii: Meetira 84 👉 Koochoo diyaameetira tarbaayinii : Meetira 132 👉 Dheerina koochoo tarbaayinii tokkoo : Meetira 66 👉 Buufata Anniisaa humna elektiriikaa walfakkaatan hanga ammaatti ijaaraman irraa wanti adda isa godhu: dandeettii anniisaa maddisiisuu tarbaayinootaa, dheerina ulubaawwan isaafi olaanaa ta’uudha. #Ena Afaan Oromoo #ENA