Bitootessa 24/2018(ENA)- Bitootessi 24 guyyaa dimokiraasiin fuulleetti ba’ee fi yaadni ida’amuu itti mo’ate ta’uu paartii badhaadhinaatti Hogganaan Damee Siyaasaa Waajjira Damee Naannoo Oromiyaa Namarraa Bulii ibsan. Hiriira deeggarsaa Jijjiirama biyyaalessaa ilaalchisuun magaalaa Jimmaatti gaggeeffamerratti ergaa kan dabarsan Obbo Namarraan, guyyichi Itiyoophiyaan biyya meeshaan osoo hin ta’iin yaada caalmaan injifateen bultu ta’uushee guyyaa itti Addunyaatti mul’istedha jedhaniiru.   Waggoota jijjiiramaa darbanitti naannichatti birmadummaa nyaataa mirkaneessuuf hojiiwwan hojjetamanii fi oomisha qamadii gara alaatti erguun danda'amuunsaa milkaa'ina galmaa'an keessaa isaan ijoo ta’uusaa eeraniiru. Qormaatilee Jijjiiramaan booda nu mudatan gara carraatti jijjiiruun milkaa'ina hedduun galmaa'aniiru kan jedhan Obbo Namarran, dhibbaawwan adda addaa dandamachuun hojiiwwan ciccimoon hojjetamuu ibsaniiru. Xiyyeeffannaan itti aanus dinagdee qaala'iinsa jireenyaa dandamachuu danda'u ijaaruu fi hojiiwwan misooma hawaasummaa cimsuun itti fufsiisuu akka ta'u eeraniiru.   Bulchaan Godina Jimmaa Obbo Tijjaanii Naasir gama isaaniin, Bitootessa 24 guyyaa Saboonni fi Sab-lammoonni itti injifatan fi boqonnaan jijjiiramaa haaraa itti eegale waan ta'eef, yeroo hunda Seenaa keessatti yaadatamaa akka jiraatu dubbataniiru. Haaluma walfakkaatuun, Godina Wallagga Dhihaatti jijjiirama biyyaalessaa waggaa 8ffaa ilaalchisuun hiriira deeggarsaa gaggeeffame irratti Bulchaan Godinichaa Obbo Taliilaa Tarrafaa akka dubbatanitti, Bitootessa 24 guyyaa godinichatti injifannoon misoomaa akka galmaa'u taasisedha. Naannichi qormaatilee adda addaa keessa osoo jiruu, jiraattonni Godinichaa nagaa fi misooma kan barbaadu ta'uusaa hojiin agarsiiseera jedhaniiru. Bulchaan kun dabaluunis, hojiiwwan misoomaa gama hundaan galmaa'an akka hin gufanneef, kutaaleen hawaasaa hundi naannoosaa eeggachuun qoodasaa akka bahu waamicha dhiyeessaniiru. Jiraattonni hiriira deeggarsaa Magaalaa Gimbiitti gaggeeffame irratti argamanis, waggoota jijjiiramaa keessatti milkaa'ina argame itti fufsiisuuf qooda keenya ni baana jedhaniiru. Imala Milkaa'ina Bitootessa 24 Sababeeffachuun Jiraattonni hiriira deeggarsaa Magaalaa Gimbiitti gaggeeffamerratti hirmaatan, waggoota jijjiiramaa Saddeettan darban keessatti hojiiwwan misoomaa ummata fayyadamoo taasisan hedduun hojjetamuusaanii ragaa bahaniiru. Obbo Buusaa Garmaamaa fi Obbo Wasanuu Tarfaasaa waggoota darban keessatti hojiiwwan bu'ura misoomaa adda addaa fayyadamummaa ummataa mirkaneessan bal'inaa fi qulqullinaan hojjetamaniiru jedhaniiru. Fuuldurattis hojiiwwan misoomaa karoorfaman galma akka ga'aniif qooda keenya ni baana jedhaniiru. Godinichatti dameewwan hundaan hojiiwwan qabatamaan hojjetamuu ibsuun, bu'aa argame cimsuuf yeroo kamiyyuu caalaa akka hojjetan mirkaneessaniiru.

Bitootessa 24/2018 (ENA): Bitootessi 24 guyyaa jijjiiramni bu’uuraa damee hundaan lafa qabate ta’uu Hoggantuun Biiroo Lafaa Naannoo Oromiyaa aadde Masarat Asaffaa himani. Jijjiirama biyyaalessaa waggaa 8ffaa sababeeffachuun hiriirri ummataa naannoo Oromiyaa magaalaa Maayaatti geggeeffameera. Hiriira ummataa kanarratti hoggantoonni bulchiinsa godinaa fi magaalaa sadarkaa sadarkaan jiran, abbootiin amantaa, qonnaan bultoonni, dargaggootaafi dubartoonni, akkasumas kutaaleen hawaasaa adda addaa hirmaataniiru.   Hirmaattonni hiriira deeggarsaa kanaas jijjiirama argame itti fufsiifna, Bitootessi 24 guyyaa bu’uura jijjiiramaa fi badhaadhina Itiyoophiyaaf kaa’e, Bitootessi 24 bu’uura imala ifaa ta’uu ibsuun, ergaawwan biroos dabarfamaniiru. Hoggantuun Biiroo Lafaa Naannoo Oromiyaa aadde Masarat Asaffaa ergaa guyyaa kana dabarsaniin, Bitootessi 24 guyyaa itti Ministirri Muummee Dr. Abiyyi Ahimad Itiyoophiyaa jijjiiruuf aangoo itti fudhatan ta’uu ibsaniiru. Mootummaan jijjiiramaa qormaata mudate irra aanee imala badhaadhina biyyaalessaa itti fufsiiseera jedhani. Mootummaan jijjiiramaa naannichaa keessatti nageenyaa fi misooma guddisee, hawaasni hojii misoomaa irratti akka bobba’uu fi fayyadamummaa isaa akka mirkaneessu kan taasise ta’uus ibsaniiru. Hojiileen Itiyoophiyaan damee diinagdee, hawaasummaa fi siyaasaan olka’iinsa akka qabaattu mirkaneessan hojjetamuu isaaniis eeraniiru.   Bulchituun godina Harargee Bahaa aadde Miskii Mohaammad akka himanitti, Bitootessi 24 guyyaa ifni abdii biyyattii keessatti ife dha jedhani. Ummanni bahee jijjiirama kana deeggaruu galateeffachuun, imala jijjiiramaa Itiyoophiyaan eegalte itti fufsiisuun akka barbaachisu waamicha dhiyeessaniiru. #Ena Afaan Oromoo #TOI#Ena

Bitootessa 24/2018 (ENA): Jiraattonni magaalaa Jimmaa hojiiwwan misoomaa fi milkaa’inoota mootummaan jijjiiramaa eegale cimsinee itti fufsiifna jedhani. Hundeeffama mootummaa jijjiiramaa waggaa 8ffaa kabajuuf hiriirri ummataa magaalaa Jimmaatti geggeeffameera. Yaada jiraataan magaalaa Jimmaa obbo Nigaatuu Damissee ENA’f kennaniin, mootummaan jijjiiramaa hidha haaromsa guddicha Itiyoophiyaa waggoota muraasa darban keessatti tumsa cimaa ummata Itiyoophiyaatiin eegalame xumuruu danda’eera jedhani. Kunis milkaa’ina dhiibbaa dippilomaasii ulfaataa irra aanuu irraa argame ta’uu eeruun, pirojektoota hafan itti fufsiisuuf waliin dhaabbachuun barbaachisaa ta’uu ibsaniiru. Aadde Roozaa Takkaa gama isaaniitiin, mootummaan jijjiiramaa waggoota darban keessatti hariiroo dippilomaasii Itiyoophiyaa guddiseera jedhan. Dhimmi abbummaa buufata Galaanaa argachuu gaaffii bira darbee ajandaa waltajjiiwwan gurguddoo addunyaa ta’uu eeruun, milkaa’ina isaaf jijjiirama biyyaalessaa kana deeggaruun itti fufsiisuu akka qaban himani. Erga jijjiiramaa as dubartoonni sadarkaa hojii mootummaa olaanootti hirmaachuu jalqabaniiru kan jette immoo shamarree Eden Maarqosi dha. Jijjiiramni biyyaalessaa fayyadamummaa dubartootaaf dursa kan kenne ta’uu eeruun, deeggarsa kanaaf cimsinee itti fufna jetteetti. Dargaggeessi biraa Haayidar Huseen Itiyoophiyaa keessatti haala kanaan dura hin argamne keessatti paartileen siyaasaa waldorgoman iddoowwan mootummaa ijoo qabatanii biyya isaanii akka tajaajilan eeyyamameera jedhe. Aadaa walta’iinsa walitti dhiyeenyaa kana eegsisuuf jijjiirama biyyaalessaa deeggaruun itti fufsiisna jedheera. #Ena Afaan Oromoo #TOI#Ena

Bitootessa 23/2018(ENA)-Filannoorratti ddammaqinaan hirmaachuun yaadota filaamtaa paartiisaanii qaqqabsiisuuf miidiyaaleen garagaraa akka isaaniif mijate paartiin bilisa baasaa Affaar(PABA) ibse. Paartileen siyaasaa morkattootaa filannoo walii galaa 7ffaaf karaa sabdaneessummaa keessummeessuun danda’amuun karaa miidiyaalee garagaraa waltajjiiwwan falmii gaggeeffamaa jiru. Miseensi hojii raawwachiisaa paartii bilisa baasaa Affaar obbo Hanferee Mahaammad ENA’f akka ibsanitti, filannoon waliigalaa baranaa karaa nagaa, demokiraatawaa fi bilisa ta’een dirree siyaasaa mijataa ta’een adeemsifamaa jiraachuu ibsaniiru. Haala mijataa uumametti fayyadamuun paartileen siyaasaa filannoo walii galaa kanaaf bilisaan falmuun karaa nagaa fi demokiraatawaa gaggeessaa jiraachuu dubbataniiru. Haala nageenyaa naannoosaanii jirurraa ka’uun dhimmoot filannoon wal qabatanirratti gufuun kamiyyuu akka isaan hin mudanne beeksisaniiru. Filannoon baranaa sirni demokiraatawaa akka jiraatuu fi ummanni sagaleesaatiin murteessuu akka danda’u adeemsi jiru gaarii ta’uusaa yaadachiisanii, filannichi demokiraatawaa fi haqa qabeessa ta’ee akka xumuramu qooda keenya bahaa jirra jedhaniiru. Seera filannoo hordofuun dadammaqsaa akka jiranis dubbataniiru.

Bitootessa 23/2018 (ENA): Yaad-rimeen mootummaa jijjiiramaa kana keessa bocame aadaan dhimma biyyaalessaa irratti walitti dhiyeenyaan hojjechuu cimee itti fufuu qaba jedhan hayyoonni Yunivarsiitii Wallaggaa. Mul’anni siyaasaa mootummaa jijjiiramaa, paartileen mul’ata adda addaa qabaatanis, dantaa biyyaalessaa irratti waliin hojjechuun barbaachisaa ta’uu kan deeggaruu fi kana malees hanga aangoo qooduutti illee kan qabatamaan agarsiisedha. Waggoota jijjiiramaa darban keessatti yaad-rimeen waliin hojjechuu fi dantaa biyyaalessaa irratti waldeeggaruu kun gara dhugaatti jijjiiramuu isaa qabatamaan argineerra jedhani. Kanumaan walqabatee hayyoonni Yuunivarsiitii Wallaggaa ENA waliin turtii taasisan akka himanitti, Yaad-rimeen mootummaa jijjiiramaa kana keessa bocame aadaan dhimma biyyaalessaa irratti walitti dhiyeenyaan hojjechuu cimee itti fufuu qaba jedhan. Hayyoonni kun ibsa isaanii keessatti mootummaan ce’umsaa hirmaannaa paartilee siyaasaa morkattootaa dhimma biyyaalessaa keessatti guddisuu fi iddoo siyaasaa babal’isuuf hojii eegale itti fufuu akka qabu ibsaniiru. Yunivarsiitii Wallagaatti barsiisaan Saayinsii Siyaasaa fi Hariiroo Idil Addunyaa kan ta’an Darajjee Galaasaa akka himanitti, adeemsa ijaarsa biyyaa keessatti mootummaan paartilee siyaasaa dorgoman waliin tumsi taasisuun siyaasa qaroomeef bu’uura kaa’eera jedhani. Itti dabaluunis, paartileen ilaalcha siyaasaatiin garaagarummaa qabaatanis aadaa dhimma biyyaalessaa irratti walitti dhiyeenyaan hojjechuu akka horatan gargaaruu keessatti gahee mataa isaa qaba jedhan.   Yunivarsiitichatti barsiisaan Saayinsii Siyaasaa fi Hariiroo Idil-addunyaa Mahaammad Arbaayi gama isaaniitiin hojiiwwan iddoo siyaasaa babal’isuu waggoota jijjiiramaa keessatti mul’atan dhimmoota biyyaalessaa irratti walitti dhiyeenyaan hojjechuuf bu’uura kaa’aniiru jedhan. Mootummaan jijjiiramaa Paartiilee siyaasaa waliin walitti dhiyeenyaan hojjechuun dimokiraasii kan babal’isu ta’uu himaniiru. Hojii dimokiraasii kana itti fufsiisuu fi sirna mootummaa hirmaachisaa ta’e eeguun guddina biyyaa keessatti gahee olaanaa akka qabus hubachiisaniiru. Filannoon waliigalaa 7ffaan haala haqa qabeessaa fi dimokiraatawaa ta’een akka xumuramuuf paartileen siyaasaas ejjennoo dantaa Itiyoophiyaaf dursa kennu qabaachuu akka qaban ibsaniiru. #Ena Afaan Oromoo #TOI#Ena

  Bitootessa 22/2018 (ENA): Sirni filannoo Meeshaa ijaarsa aadaa dimookiraasii qabatamaan abbummaa Aangoo uummataa mirkaneessu ta’uu Paartiileen Siyaasaa ibsan. Akka sagantaa yeroo Boordii Filannoo Biyyaalessa Itoophiyaatti, filannoo waliigalaa baranaa kan sagaleen itti kennamu Caamsaa 24 bara 2018 keessatti, galmeen filattootaa Guraandhala 28 bara 2018 irraa eegalee adeemsifamaa jira. Kanaanis appilikeeshinii “Mircaayeenii” fi buufatalee filannootti argamuun hanga Bitootessa 18 bara 2018tti walii gala filattoonni miiliyoona 28 ol galmaa’uusaanii boordichi beeksiseera. Filannoo waliigalaa 7ffaa kanaan Paartilee Siyaasaa Morkattootaa dorgoman 47 ta’an kaadhimamtoota kuma 10 fi 934galmeessisuun,filannoowwan Miidiyaatti fayyadamanii imaammatasaanii uummata beeksisaa jiru. paartileen siyaasaa dorgomtoonni Adeemsa filannoo ilaalchisuun (ENA) waliin turtii taasisaniin,filannoo waliigalaa 7ffaa kana irratti dorgomtoota dammaqoo ta'uuf qophii taasisaa jiraachuu ibsaniiru. Pireezidantiin Paartii Dhaloota Haaraa fi Walitti qabaan Mana Maree Waliinii Paartilee Siyaasaa Naannoo Oromiyaa Obbo SalamoonTafasaa,filannoon adeemsa Dimookiraasii Abbummaan Aangoo Uummataa itti mirkanaa'u dha jedhaniiru. Boordiin Filannoo Biyyaalessa Itiyoophiyaas galmee kaadhimamtootaa fi filattoota filannoo walii galaa 7ffaa Sirna Dijiitaalaa dabalatee gaggeessuun, haala filannoo dandeessisu uumuusaa ibseera. Kanaafis, filannoo waliigalaa Baatii Caamsaatti gaggeeffamu kanaaf dimookiraasummaasaa eegsisuuf qophii dursa barbaachisu xumuruun adeemsichatti hirmaannaa ho’aa taasisaa jiraachuu isaanii dubbataniiru. Itti gaafatamaan waajjira Paartii Dimookiraasii Uummata Qucaa Baandiraa Balachoo gamasaaniitiin,Jijjiiramnibiyyaalessa Itiyoophiyaa sirna hedduumina paartiileef dorgommii mijataa fi hirmaachisaa ta'e uumuusaa kaasaniiru.   Kanaanis, filannoo waliigalaa 7ffaa irratti dorgommii olaantummaa yaadaa irratti hundaa'e taasisuun, ijaarsa Sirna Dimookiraasiitiif gahee ijaaraa gamasaanii akka bahatan mirkaneessaniiru. Barreessaa fi Itti gaafatamaan Quunnamtii Uummataa Paartii Dimokiraatawaa Itiyoophiyaa Tokkoo barsiisaa Salamoon Aniibaal; jijjiiramni biyyaalessa Itiyoophiyaa hundeeffama paartiisaaniitiif dirree siyaasaa bal'aa uumuusaa ibsaniiru.   Filannoon waliigalaa torbaffaan Abbummaa Aangoo Uummataa mirkaneessuun, ce’umsa siyaasaa qaroome taasisuuf waltajjii murteessaa ta’uusaa dubbataniiru. Sirni filannoo meeshaa Ijaarsa Aadaa Dimookiraasii Abbummaa Aangoo uummataa mirkaneessudha kan jedhan itti gaafatamaan kun, adeemsa filannoo keessatti faayidaa biyyaalessaa fi tokkummaa uummataatiif xiyyeeffannoon kennamuu qaba jedhaniiru. Waltajjiiwwan falmii Miidiyaaleen qopheessan filannoowwan Imaammataa paartilee uummata waliin walitti fiduun, shaakala dimookiraasii dhalootaaf darbu gumaachaa jiraachuu ibsaniiru. Paartileen Siyaasaa waltajjiwwan falmii miidiyaalee yaadaa , Imaammataa bilchaataa uummataa fi biyya ceessisu dhiheessuun itti fayyadamuu qabna jedhaniiru.

Bitootessa 21/2018 (ENA): Itiyoophiyaan Yaa’ii 11ffaa dhaabbilee haggantoota biyyoota Afrikaa, Kaaribiyaanii fi Paasifikii irratti dammaqinaan hirmaachuu ishee biyyoota Beenluuksittii fi dhaabbata mootummoota gamtoomaniitti argamaa addaa FDRI, ambaasaaddar Isheetee Xilahuun ibsani. Yaa'iin 11ffaan dhaabbile hoggantoota biyyoota Afrikaa, Kaaribiyaanii fi Paasifik mata duree "kan jijjiiramee fi haarome Yaa'ii dhaabbilee hoggantoota biyyoota Afrikaa, Kaaribiyaanii fi Paasifik Addunyaa Qormaanni itti hedduummate " mata duree jedhuun Bitootessa 19 fi 20, 2018 Ikuwaatooriyaal Giinii Maalabootti gaggeeffameera. Konfiraansii kana irratti argamuun haasaa kan taasisan pireezdaanti Taayyee Asqasillaaseen, dhaabbatichi dinagdee fi siyaasa addunyaa jijjiiramaa jiru keessatti dantaa biyyoota miseensa isaa eegu jaarmiyaa cimaa ta’ee itti fufuu akka qabu cimsanii dubbataniiru. Ambaassaaddar Isheetuun yaada piresidaanti kennan yaada ijaarsaa fi biyyoota miseensaa sana fayyadu ta’uu himaniiru. Biyyi kamuu qophaa ishee dhaabbachuu hin dandeessu kan jedhan ambaassaaddarri kuni, dantaa biyyaalessaa biyya keenyaa fayyaduu kan danda’urratti biyyoota biroo waliin hojjechuun barbaachisaa dha jedhani.

Bitootessa 21/2018 (ENA): Hojiin dhaabbilee utubaa ijaarsa mootummaa ta’an ijaaruu fi gurmeessuu kutannoo addaatiin raawwatamuusaa Tajaajilli Komunikeeshinii Mootummaa beeksise. Tajaajilli Komunikeeshinii Mootummaa Rippabiliika Dimokiraatawaa Federaalawaa Itiyoophiyaa (FDRE) ibsa mata duree Jijjiirama Siyaasaa hunda hirmaachisaa Bu'uura Biyyoolessaa Cimaaf jedhu baaseera. Barreeffamni guutuun Tajaajila Komunikeeshinii Mootummaa akka armaan gadiitti dhiyaateera: Jijjiirama Siyaasaa hirmaachisaa Bu'uura Biyyaalessaa Cimaaf Mootummaan Rippabiliika Dimookiraatawaa Federaalawaa Itiyoophiyaa biyyi keenya rakkoo siyaasaa hundee gadi fageeffate keessa turte irraa gara sirna dimokiraatawaa guutuutti ceesisuuf galmoota tarsiimoo kaa’e ciminaa fi milkaa’ina guddaadhaan hojiirra oolcheera. Ce’umsi seena qabeessi kuni milkaa’inni inni guddaan seeneffama siyaasaa namoota adda qoodu ture jaarraa hedduuf Itiyoophiyaa rakkisee ture cabsuun tokkummaa biyyaalessaa lammiin kamuu fi naannoon hundi aangoo fi qabeenya wal qixa horachuu danda'u ijaaruudha. Jijjiiramni kun injifannoo bu’uuraa Itiyoophiyaan qe’ee namoota muraasaa osoo hin taane kan hunda keenyaa ta’uu qabatamaan mirkaneesseedha. Injifannoowwan ijaarsa seeneffama waloo kan nagaa waaraa fi birmadummaa sabaa mirkaneessuuf dhaloota gidduutti riqicha ta’ee tajaajilu keessatti galmaa’an bu’aa siyaasaa guddaa mootummaa ce’umsaa ti. Seenaawwan ala ta’an jaarraa hedduuf waldhabdee keessatti wal-xaxaa turan diigamanii, bakka isaaniitti seeneffama waloo seenaa fi hambaa hunda keenyaa yaadatu qabatamaan guddateera. Haala kanaan Yaadannoo Injifannoo Adwaa, Hidhi Haaromsaa Guddichii fi bakkeewwan turizimii gurguddoon Sagantaa Maaddii Shaggar,Maaddii Biyyaa fi Maaddiin Dhaloota irratti ijaaraman boonsaa sabaa waliin qabnu guddiseera. Godaannisa darbe yaaluun fayyisuu; adda addummaa miidhaginaan hammachuudhaan Waltajjii Marii Biyyaalessaa itti fufee jir; suuta suutaan Mariin biyyaalessaa shakkii fi qoqqoodinsa jiru gara 'obbolummaa fi badhaadhina waloo' mirkanaa'etti akka ceesisuuf hojiin hojjetamaa jira. Hojiin dhaabbilee utubaa ijaarsa mootummaa ta’an ijaaruu fi gurmeessuu kutannoo addaatiin hojjetamaa tureera. Keessattuu haaromsi dhaabbilee nageenyaa, haqaa fi dimokiraasii ummataa fi seera qofaaf akka bitaman taasifame jijjiirama qabatamaa bu’uuraa fideera. Haaluma kanaan dhaabbileen dimokiraatawaa kanneen akka Boordii Filannoo fi Komishiniin Mirga Namoomaa hoggansa walabaa jalatti hundeeffamuun, dhaabbileen ittisaa fi nageenyaa aangoo biyyaalessaa isaaniitiin ala gidduu seenummaa siyaasaa kamirraayyuu bilisoomsuun, sirna haqaa walaba ta’ee akka hojjetu diriirsuun fakkeenyota haaromsa dhaabbilee keenyaati. Jijjiiramni siyaasaa bu’uurraa jijjiirame kuni, tasgabbii keessoo fi waliigaltee biyyaalessaa irratti hundaa’e Itiyoophiyaan balaa jiraachuu ishee mudate akka mo’attu taasiseera. Bilchina siyaasaa fi cimina hooggansaatiin dandeettii birmadummaa keenya kabachiisuuf qabnu guddifachuun dandeettii imaammata mootummaan raawwachuu agarsiisuu qofa osoo hin taane, biyyattii sadarkaa guddinaa fooyya’aa ta’etti ceesiseera. Injifannoowwan siyaasaa kunniin bu’aa kallattiin nagaa walqabataa keessoo keessatti argame, bal’ina iddoo siyaasaa fi dhaabbilee cimsuu irraa kan ka’e yoo ta’u, imala biyyi keenya gara badhaadhinaatti taasiftuuf bu’uura kaa’aa jiru. Walumaagalatti, guddinni siyaasaa kunniinii fi bu’aan dadhabbii kunniin Itiyoophiyaa gara muuxannoo dimokiraasii haaraa fi fooyya’aa ta’etti ceesiseera. Guddinni hirmaannaa paartilee morkattootaa, fudhatamummaa mootummaan uummata biratti qabu guddachaa dhufuu isaaf agarsiiftuu waan ta’eef, kuni immoo milkaa’ina tattaaffii haaromsaa imala keenya gara badhaadhinaatti taasifnuuf wabii amanamaa dha. Mootummaan daandii dimokiraasii fi badhaadhina kana cimsee itti fufuun itti gaafatamummaa seena qabeessa Itiyoophiyaa badhaatuu fi birmadummaan ishee kabajame kan dhaloota dhufuuf mijatu ijaaruu itti fufa. Bitootessa 21/2018 Tajaajila Kominikeeshinii Mootummaa Rippabiliika Dimookiraatawaa Federaalaa Itiyoophiyaa.