Amajjii 23/2018(ENA)- Milkaa’inoonni Misooma Itiyoophiyaa guddina dinagdee riijinii kan si’achiisan ta’uu Pirezidaantiin Jibutii Ismaa’el Omaar Giilee ibsan. Ministirri muummee doktar Abiyyi Ahimad pirezidaantiin Jibutii Ismaa’eel Omaar Giilee, pirezidaantiin Somaaliyaa Sheek Hasan Mahaammud bakka argamanitti Riizoortii Shabalee eebbisaniiru. Wayita kana pirezidaantiin Jibutii Ismaa’el Omaar Giilee, Riizoortiin Shabalee walitti hidhaminsa turizimii riijinii kan cimsu bu’aa misoomaati jedhaniiru. Riizoortiin Shabalee pirojektii misoomaa bakka hawataa dinqisiisaa misooma turizimii riijinii kan guddisu ta’uu dubbataniiru. Pirojektichi walitti hidhamiinsa dinagdee caalaatti guddisuun faayidaa guddaa akka qabaatu dubbataniiru. Ummanni naannoo Somaalees nagaasaa eeggatee bu’aaleen misoomaa fayyadama ummataa mirkaneessan akka dhufan gumaachi taasise kan jajamu ta’uu ibsaniiru. Fuulduras dhalattoonni naannichaa biyya keessaa fi biyya alaa jiraatan fayyadama misoomaa Itiyoophiyaa fi biyyoota riijinichaa mirkaneessuuf tattaaffii taasifamu keessatti qoodasaanii bahachuu akka qaban hubachiisaniiru.

Amajjii 23/2018 (ENA)- Maddi anniisaa qilleensaa Ayishaa-2 tarsiimoo keenya wabii anniisaa mirkaneessuuf hojjennu kanneen ijoo ta’an keessaa isa tokko ta’uu ministirri muummee doktar Abiyyi Ahimad ibsan. Ministirri muummee doktar Abiyyi Ahimad ergaa fuula miidiyaa hawaasummaa isaaniin dabarsaniin, pirojektiin madda anniisaa qilleensaa Ayishaa-2 guyyaa har’aa ifatti eebbifamee tajaajila eegaluusaa ibsaniiru. Pirojektiin guddichi naannoo Somaaleetti argamu kun tarsiimoo keenya wabii anniisaa mirkaneessuuf hojjennuuf isa ijoodha jedhaniiru. Pirojektiin kun dandeettiin inni waggaatti oomishuu danda’u sa’aatii tokkotti Giigaa Waattii 467 (GWh) yoo ta’u, teknooloojiiwwan ammayyaa SCADA fi SVG fayyadamuun dhiheessii anniisaa tasgabbaa’aa fi ijaarsa dinagdee teeknooloojiin durfamuuf qooda olaanaa akka bahatu dubbataniiru. Dhiheenyi biyyoota ollaaf qabu milkaa’ina galma Itiyoophiyaa wiirtuu daldalaa Afriikaa bahaa gochuuf qabameef tarkaanfii guddaa qabatamaan mirkanaa’e ta’uu ibsaniiru. Qabeenya uumamaa Itiyoophiyaa qajeelfama ida’amuu gara qabeenya walootti jijjiiruuf gaanfa Afriikaa qaamaa fi dinagdeen caalaatti walitti hidhuuf kutannee kaaneerra jechuun ibsaniiru ministirri muummee ergaa dabarsaniin.

Amajjii 23/2018(ENA)- Galmoota imaammata qonnaa fi misooma baadiyyaatiin kaa’aman milkeessuuf hirmaannaan taassifame birmadummaan nyaataa akka mirkanaa’uuf bu’uura kaa’uusaa ministirri qonnaa Addisuu Araggaan ibsan. Gamaaggamni raawwii hojii baatii 6 ministeera qonnaa fi dhaabbilee itti waamamtootaa magaalaa Adaamaatti gaggeessaa jira.   Obbo Addisuu Araggaa waltajjicharratti akka ibsanitti, baatiiwwan ja’an darban damee Qonnaa ceesisuuf hojiiwwan hojjetaman bu’aa qabeessa turan. Hojiiwwan dhiheessii galtee Qonnaa, Makaanaayizeeshinii Qonnaa, fooya’insa sanyii, eegumsaa fi kunuunsa qabeenya uumamaan hojjetamaniin bu’aan abdachiisaan galmaa’uu kaasaniiru. Omishaa fi omishtummaa guddisuuf bittaan xa’oo biyyee raawwatamuu fi Qonnaan bulaaf raabsamaa jiraachuu eeruun, misooma Qamadii Boneen lafti hektaarri Miiliyoona 3 tuqaa7 sanyiin facaa’uu dubbataniiru. Makaanayizeeshinii qonnaa babal’isuuf baatiiwwan ja’an darban dureeyyiin 147 lafa hektaaraa kuma 101 fudhatanii misoomsuu eegaluusaanii himaniiru. Sanyii Beelladaa fooyyessuunii fi omishaa fi omishtummaa guddisuuf hojii hojjetameen bu’aan argamuu eeruun, walakkaa waggaatti cuuciin guyyaa tokkoo miiliyoona 70 raabsamuusaanii beeksisaniiru.   Dabalatanis, horiin gaafaa miiloyoona 2 tuqaa 6 diqalomsuu fi hojiin nam-tolcheen sanyii fooyyessuu hojjetamuu ibsaniiru. Hojii misooma suluulaa, qaphii biqiltuu Ashaaraa magariisaa walitti hidhuun hojiin misooma eegumsa naannoon bu’aan boonsaan galmaa’aa jira jedhaniiru. Bara baajatichaa baatiiwwan ja’an darbanitti Al-ergii Omisha qonnaarraa galiin doolarri biiliyoona 2 ol argamuu eeruun, argamsa sharafa Alaaf bunni sadarkaa olaanaa akka qabu dubbataniiru. Imaammani qonnaa Yaadamoota ammaan dura hin turre kan qabate ta’uusaan bu’aan damichaan argamuuf qooda olaanaa bahateera jedhaniiru. Hojiiwwan misooma Qonnaa bara baajatichaatti eegalaman caalaatti babal’isuunii fi omishaa fi omishtummaa guddisuun birmadummaa nyaataa mirkaneessuuf karoora qabame milkeessuuf hirmaannaan taasifamu cimee akka ittifufu ibsaniiru. Ministira Qonnaatti Gorsaa olaanaan Hordoffii fi Gamaggamaa Tsahaayuu Gaarradaachoo gabaasa dhiheessaniin waggoottan shanaan darban omishtummaa damichaa guddisuuf hojii hojjetameen oomisha waggaa kuntaala biiliyoona 1 tuqaa 5 geessisuu danda’amuun hubachiisaniiru. Qonnaan bultoonni fayyadamoo Ekisteenshinii qonnaa duraan turan miiliyoona 9 tuqaa 2 irraa gara miiliyoona 14 tuqaa 2tti guddachuusaa ibsaniiru. Waltajjichaan raawwiin hojii baatii 6 bara bajataa 2018 naannoolee gamaggamaamaa jira. #Ena Afaan Oromoo

Amajjii 23/2018(ENA)- Sagantaa Maadii guutuutiin fayyadamummaan Diinagdeesaanii guddachuusaa hirmaatoonni Sagantichaa Magaalaa Amboo ibsan. Jiraattota Magaalichaa ENA’f yaada kennan keessaa Massalaa Geetaachoo akka ibsanitti, misooma lukkuu lafa xiqqaarratti eegalaniin galiisaanii guddifachaa jiraachuu ibsaniiru. Yeroo gabaabaa keessatti bu’aa qabeessa ta’uusaaniin killee gabaa naannoosaaniif dhiheessuun galii fooyya’aa argachaa kan jiran yoo ta’u, hojii misooma lukkuu cinaatti hojii misoomaa aannanii eegaluusaanii eeraniiru. Yeroo ammaa lukkuuwwan kuma 2 irraa killee hanga kuma 1 fi 600 argachaa waan jiraniif ofirra darbanii namoota ja’aaf carraa hojii uumuusaanii ibsaniiru. Misooma sa’a Aannaniin wabii nyaataasaanii Mirkaneessuurra darbee galiisaanii guddifachuu danda’uu kan ibsan immoo jiraataa magaalichaa Daani’eel Kabbadaati. Kanaanis giddugaleessaan sa’a tokkorraa aannan liitira 22 argachuun Aannan gabaaf dhihessaa jiraachuu ibsaniiru. Jiraataan Magaalichaa Wayyeessaa Luulessaa gamasaaniin, Misoomni Aannanii itti jiran fayyadamummaa Diinagdeesaanii guddisuusaa himaniiru. Hojicha caalaa bu’aa qabeessa gochuuf waajjirri Qonna Magaalaa nageenya beeyladootaa eeguun akkasumas deeggarsawwan biroo taasisaafii akka jiru ibsaniiru. Waajjira Qonnaa Magaalaa Ambootti Ogeessi Fooyya’insa sanyii Beeyladaa Caalaa Kitaabaa akka ibsanitti, Sagantaa Maaddii guutuun Magaalichatti wabii nyaataa mirkaneessuurra darbee lammiilee hedduuf madda galii ta’era. Inisheetivoota Qonnaa Magaalichatti hojiirra oolan keessaa misooma Lukkuu fi sa’a Aannanii, furdisa Loonii fi hojiin horsiisa Booyyee namoota hedduuf carraa hojii uumuu danda’eera jedhaniiru. Hojicha bu’aa qabeessa taasisuuf bakka hojii fi liqaa kennuurra darbee deeggarsa ogummaa taasisuu fi walitti hidhaminsi gabaa isaaniif mijachuu danda’uu ibsaniiru.