Guraandhala 17/2018 (ENA): Nageenya naannoo Hararii haala itti fufinsa qabuun furuuf humnoonni nageenyaa hawaasa waliin qindoominaan hojjechaa jiraachuu himame. Manni Maree Nageenyaa naannichaa dhimmoota nageenya naannichaa yeroo ammaa irratti mari'ateera.   Hojii naannichatti yakka ittisuuf hojjetamaa tureen namoota dhuunfaa gocha yakkaa adda addaa keessatti hirmaatan to'annoo jala oolchuun mana murtiitti murtiin akka itti murtaa'u taasisuu ibsameera. Manni marichaa sochii tiraafikaa waliin walqabatee tarkaanfiiwwan fudhatamaniin gama seera kabachiisuutiin jijjiiramni jajjabeessaan galmaa’uu isaa madaaleera. Daldala namaa seeraan alaa ittisuu, qoricha balaafamaa to’achuu, daddabarsaa fi daldala seeraan alaa ittisuu(kontiroobaandii), daldala meeshaa waraanaa seeraan alaa to’achuu irratti hojiiwwan bu’a qabeessa ta’an hojjetamuu isaaniis ibsameera. Kana malees daldaltoota seeraan alaa naannichatti jeequmsa diinagdee uumaa jiranii fi kanneen rakkoo bulchiinsa gaarii naannichaa ta’anii fi hawaasa mufachiisan irratti tarkaanfiin seeraa cimee itti fufaa jiraachuu himameera. Ol’aantummaa seeraa mirkaneessuu, nageenya amansiisaa mirkaneessuu fi nageenya hawaasaa mirkaneessuun hojii dursaa waan ta’eef, Manni Maree Nageenyaa, nageenyi naannichaa itti fufiinsa akka qabaatu cimsee hojjechaa jiraachuu eerameera. Filannoon waliigalaa 7ffaa nagaa fi dimokiraatawaa akka ta’uuf seerri fi sirni filannoo akka kabajamuuf kutannoon akka hojjetanis ibsameera. Nageenyaa fi tasgabbii naannichaa mirkaneessuun hojii olaantummaa seeraa kabachiisuuf hojjetamaa jiru cimsuun akka itti fufus beeksifameera. Ummanni naannichaa akkuma kaleessaa humnoota nageenyaa waliin qindoomuun naannoo ofii dammaqinaan eeggachuun har’as nageenyaaf waardiyyaa akka dhaabbatu Manni Marichaa waamicha dhiyeesseera.

Guraandhala 17/2018(ENA):- Ayyaanni Injifannoo Adwaa kabajamuun, bu’uurri cichoomaa fi jabinaa Itiyoophiyaa irra deebi’uun kan itti haaromfamu, tokkummaa fi Birmadummaa biyya keenyaaf waadaa galle kan itti cimsinudha jechuun Ministirri Raayyaa Ittisa Biyyaa Injiinar Ayishaa Mahaammad ibsan. Ministirri Raayyaa Ittisa Biyyaa Injiinar Ayishaa Mahaammad kabaja Ayyaana Injifannoon Adwaa waggaa130ffaa ilaalchisuun ibsa miidiyaaf kennaniiru. Ibsasaaniin, Ayyaanni Injifannoo kun mata duree “Seenaa boonsaarraa gara Ifa boruutti” jedhuun sadarkaa biyyaalessaatti kabajuuf qophiin barbaachisaan xumurameera jedhaniiru. Injifannoon Adwaa mallatoo eenyummaa Itiyoophiyaanotaa kan hin mo’amne faana birmadummaa ummata gurraachaa fi injifannoo Addunyaa hundatti walqixxumaan ilmaan namootaa itti mirkanaa’e jedhaniiru.   Ayyaana Injifannoo Adwaa 130ffaa yeroo kabajnu, ciminaa fi Cichooma Itiyoophiyaa irra deebinee yerootti yaadannu, tokkummaa fi birmadummaa biyya keenyaaf waadaa galle kan itti cimsinu mudannoo seenaa ta’uu ibsaniiru. Itiyoophiyaanonni bara 1888 gaara Adwaarratti Qomoon, bifaan, Amantaan, osoo hin qoodamiin birmadummaa biyya tokkoof gamtaan kan dhaabbatanii fi qabsoo kan gaggeessan injifannoo waloo ta’uu dubbataniiru. Mata dureen bara kanaa biyya kaleessa dhiigaa fi lafee goototaan eegamte har’a gara misoomaa fi nageenya fulla’aatti, gara birmadummaa hunda galeessaa fi olka’insaatti ceesisuuf ejjennoo cimaa qabnu akka ibsu dubbataniiru. Gootichi raayyaa ittisa biyyaa dhaala gootummaa injifannoo Adwaa gonfachuun nagaa fi tasgabbii biyyaa mirkaneessuu fi imala gara ifa egereetti taasisnu eeguuf qophii ta’uu mirkaneessaniiru. Ayyaanicha sababeeffachuun taateewwan biyyaalessaa fi Ardii adda addaa qophaa’uusaanii eeruun, taateewwan kanneen akka Sagaleewwan Adwaa, Waltajjiiwwan Dargaggootaa, dorgommiiwan Ispoortii, Argarsiisa loltuu fi seenaawwanii, hojiiwwan Aartii adda addaa fi Dokimantarii waa’ee injifannoo Adwaa ibsan akka dhihaatan dubbataniiru. Ayyaanichi lammiileen Itiyoophiyaa hundi ifa boruu waliin kan itti abjatan( hawwatan) akka ta’u dubbataniiru.

Guraandhala 17/2018 (ENA): Kantiibaan Magaalaa Shaggar doktar Tashoomaa Addunyaa Paartiin Badhaadhinaa paartii waggoota muraasa keessatti damee hundaan milkaa’ina guddaa kan galmeessise,guddina Itiyoophiyaa itti fufsiisu dha jedhan. Paartiin Badhaadhinaa manifestoo filannoo waliigalaa 7ffaa fi mallattoo filannoo bissiii qamadii isaa guutuu biyyattiitti Guraandhala 3, 2018 akka ifoomse ni yaadatama. Waajjirri damee Paartii Badhaadhinaa Magaalaa Shaggar keessattis sagantaa manifestoo fi mallattoo filannoo beeksisuu sadarkaa magaalatti gaggeesseera.   Kantiibaan Magaalaa Shaggar doktar Tashoomaa Addunyaa wayita sana akka ibsanitti, Badhaadhinni paartii waggoota muraasa darban damee hundaan milkaa’ina olaanaa kan galmeesse yoo ta’u, guddina Itiyoophiyaa kan itti fufsiisu dha jedhan. Akkasumas, paartichi haaromsa diinagdee biyya keessaa gama hawaasummaa fi diinagdeetiin hojiirra oolchuun bu’aa cimaa galmeessuun Itiyoophiyaa mallattoo badhaadhina Afrikaa taasisuu isaa ibsaniiru. Tokkummaa biyyaalessaa cimsuuf xiyyeeffannoon kennames marii qindaa’e lammiilee gidduutti ijaaruun gamtaa cimsuuf gahee olaanaa taphateera jedhan.   Hoggansi paartichaa magaalaa Shaggar keessatti magaalaa dorgomaa fi ammayyaa ijaaruu keessatti bu’aa olaanaa galmeessisuun jiraattota gama misoomaa hundaan fayyadamummaa hunda galeessa taasisuu danda’eera jedhani. Gara fuula duraattis Pirojektoota namoota irratti xiyyeeffatanii fi fayyadamummaa hunda galeessa jiraattota magaalichaa mirkaneessan ijaaruuf ciminaan hojjechuu akka itti fufus mirkaneessaniiru. Itti Gaafatamaan Waajjira Paartii Badhaadhinaa Damee Magaalaa Shaggar Alamaayyoo Tulluu gama isaanin, yaadama ida’amuu irraa kan dhalate Paartiin Badhaadhinaa Itiyoophiyaa keessatti mallattoo badhaadhina Afrikaa ijaaruun milkaa’ina argateera jedhani. Paartichi magaalaa Shaggarii fi kutaalee Itiyoophiyaa hunda keessatti pirojektoota misoomaa ummataaf waadaa galame haala bu’a qabeessa ta’een hojiirra oolchuu isaa eeraniiru.

Guraandhala 17/2018 (ENA)- IGAD fi Ruusiyaan hariiroo dameelee garagaraa irratti qaban cimsuuf walii galtee mallatteessaniiru. Barreessaan olaanaa IGAD doktar Warqinaa Gabayyoo ministeera dhimma alaa Ruusiyaatti daarektara tumsa Afriikaa Tatyaanaa Dovgalenkoo waliin Teessoo dhaabbatichaa Jibutiitti mari’ataniiru. IGAD fi Ruusiyaan wayita marii gaggeessanitti, dameelee Imaammataa fi nageenya, teeknooloojii fi innoveeshiniin, saayinsii fi barnootaatiin tumsa cimsuuf walii galtee fi sagantaa hojii walii mallatteessaniiru. Mariin kun qaamonni lamaan dhimmoota fedhii waloo ta’anirratti walitti dhufuun hojjechuuf kutannoo qaban akka agarsiisu odeeffannoon ENA’n sekireetaariyaatii IGAD irraa argame ni mul’isa.

Guraandhala 17/2018 (ENA): Kabajaa fi Birmadummaa Itiyoophiyaaf wareegama kamiyyuu kaffaluuf qophii ta’uu Miseensonni Iizii Ajaja Raayyaa Ittisa Biyyaa Bahaa ibsani. Iiziin Ajaja Raayyaa Ittisa Biyyaa Bahaa daangaa Itiyoophiyaa fi Somaalee irratti dirqamaa fi ergama biyyoolessaa fudhatee halkanii guyyaa daangaa biyyattii eegaa jira. Miseensonni Raayyaa Ittisaa ENA’n dubbise kabajaa fi birmadummaa Itiyoophiyaa tiksuuf qophii sadarkaa olaanaarra akka jiran, miseensa Raayyaa Ittisa Biyyaa ta'uu isaaniittis kabajaa fi gammachuun itti dhagahamaa jiraachuu dubbataniiru. Miseensoota keessaa ajajaan dhibbaa Geetaasaw Yeneenehi fi ajajaa kudhanii Faanoosee Fayisaa, Raayyaan Ittisa Biyyaa kan gurmaa’ee fi gama hundaan qophii guutuu ta’uu ibsaniiru. Raayyaan Itiisaa teekinooloojii fi xiinsammuun kan guutame waan ta’eef kabajaa fi birmadummaa daangaa Itiyoophiyaa kabachiisuuf gootummaan qophii ta’uu ibsaniiru. Itiyoophiyaan biyya birmadummaan ishee hin sarbamne ilmaan ishee jajjaboon eegsisaa wareegama qaalii kaffalaa imaanaan nutti kennamte waan ta’eef nutis kabajaan tiksuun biyya keenya dhalootaaf dabarsina jedhani. Kanaaf kabajaa fi birmadummaa Itiyoophiyaaf gootummaan dhaabbachuu fi wareegama kamuu kaffaluuf qophii ta’uu isaanii mirkaneessaniiru. Itti aanaa ajajaa kudhanii Yimadii Baanjaawu fi Ajajaa kudhanii Malkaamuu Shallamaa gama isaaniitiin, hoggantoonnii fi miseensonni Raayyaa Ittisa Biyyaa gahumsa loltummaa ol’aanaa, gootummaa fi kutannoon biyya keenyaa fi ummata keenya tajaajiluuf yeroo kamiiyyuu caalaa qophiidha jedhani. Keessattuu akeeka badaa gareewwan alaa fi bakka bu’oota faallaa nageenyaa fi misooma biyya keenyaaf faallaa ta’an fashaleessuun pirojektoonni biyyoolessaa gurguddaa gama hundaan hojjetamaa jiran milkeessuuf itti gaafatamummaa keenya ni ba’anna jedhaniiru. Hoggantoota olaanoo kana keessaa Letenaal Koloneel Silashii Birruu waraanni cimaan akeeka nageenyaa fi misooma gufachiisuuf yaalu ergama diinaa fudhatee socho’u fashaleessu ijaarameera jedhani. Sirna cufiinsa Ajaja Duula Addaa Raayyaa Ittisa Biyyaa guyyoota muraasa dura gaggeeffame waggaa 65ffaa irratti haasawa taasisaniin, Itaamaajor shuumiin Raayyaa Ittisa Biyyaa waliigalaa Fiildi Maarshaal Birhaanuu Juulaan, Loltuu gootaa, dandeettii, gahumsa cimaa fi daangaa biyyattii eeguuf dirqama kamiifuu qophaa’e ijaarree jirra jechuun isaanii ni yaadatama.

Guraandhala 16/2018 (ENA): Boordiin Filannoo Biyyaalessaa murtoo Manni Maree Federeeshinii Naannolee Amaaraa fi Tigraayitti Naannoolee Filannoo walfalmisiisoo ta’an irratti Murtii dabarse ifoomseera. Murtiin Boordii Filannoo akka armaan gadiitti dhiyaateera: Boordiin Filannoo Biyyaalessaa gabatee Filannoo waliigalaa marsaa 7ffaa ilaalchisee Amajjii 22/2018 irraa eegalee galmee filattootaa gaggeessuuf buufataalee filannoo fi naannoolee filannoo ummataaf ifoomsuun ni yaadatama. Naannolee fi Buufataalee filannoo Boordichi ifoomse hordofee Manni Maree Federeeshinii Amajjii 25/ 2018 xalayaa Boordichaaf barreeesseen Naannolee Amaaraa fi Tigraayitti gaaffii anaaf malaan naannoolee filannoo 5 jechuunis Humaraa, Adiramatsi, Kooram Aflaa, Xaallaamtii fi Raayyaa Allamaaxaan irratti ka’aa ture hanga furamutti nannoleen filannoo kunneen Bulchiinsa Naannoo Tigraayin ala ta’anii qofaa isaanii kallattiin Mana Maree Bakka Bu’ootaan filannoo akka taasisan manni marichaa murteessuun boordichaaf beeksiseera. Filannoon Mana Maree Naannoo waldhabdeen naaf malaa naannawaa kanneen irratti ka’e murtoo heera mootummaan furamee gara fuulduraatti kan gaggeeffamu ta’uus ibseera. Kanaafuu, Boordiin filannoo waliigalaa 7ffaa bu’uura seeraa fi hojmaata armaan olitti ibsameen hojiirra akka oolchu beeksisa.

Guraandhala 15/2018 (ENA): Tooftaa lolaa kan beekuu fi gaachana biyyaa kan ta’e Iiziin Ajaja duula Addaa dirqama isatti kenname gahumsaan ba'achuuf qophii ta’uu Ajajaan ajaja duula addaa Letenaal Jeneraal Shumaa Abdataa ibsaniiru. Ayyaanni hundeeffama Ajaja duula addaa waggaa 65ffaan qophiilee adda addaatiin kabajamaa jira. Ajajaan ajaja duula addaa Letenaal Jeneraal Shumaa Abdataa ayyaana kana sababeeffachuun ergaa dabarsaniin, ayyaanni kun guyyoota muraasa darbanitti qophiilee adda addaatiin kabajamaa turuusaa himani.   Fakkeenyaaf, Duulli addaa kunniin, kitaaba, asxaa haaraa, faaruu Iizichaa fi dokumantariin qophahee kan eebbifaman ta’uu himaniiru. Fiigichi kiiloo meetira 10 fi agarsiisni adda addaa dhiyaachuu himaniiru. Kabajni ayyaana hundeeffama waggaa 65ffaa Ajaja duula Addaa sababoota gurguddoo sadiif barbaachisaa ta’uus eeraniiru. Tokko imala haaromsa Raayyaa Ittisa Biyyaa waggaa 65 haala dhaloota itti aanuu fayyaduu danda’uun dabarsuu ta’uu ibsaniiru. Inni lammaffaa immoo haala yeroo ammaa Ajajni duula Addaa bu'aa haaromsa taasifameen gahumsa maalirra akka jiru uummataaf, mootummaa fi diinaaf kan agarsiifnu dha jedhani. Kunis biyyaaf gaachana ta’uu kan danda’u ta’uu akka hubatanii fi diinotaaf immoo ergaa guddaa kan qabu akka of adabatanii taa’aniif jechuu himani. Ta’uu baannan garuu yoo lola jalqaban akka salphachuu danda’aniif ergaa guddaa dabarsuuf ta’u himaniiru.   Ergaan inni sadaffaa, gootummaan kaleessa akka ture, har’as itti fufee akka jiru; garuu tooftaalee kaleessaa waliin deemuu hin dandeenyu, kanaaf muuxannoo kaleessaa fudhachuun, yeroo ammaa waliin walitti qindeessuunii fi muuxannoo taatee sanaa irraa barachuun kan kaayyeffatee fi bara waliin deemuu kan danda’u ta’uu hubachiisuuf kabajamaa jira jedhani. Akkasumas Ajajni Duula Addaa ajajaa tokko irraa gara sadarkaa har’a irra ga’etti bahii hedduu keessa darbee akka guddate eeraniiru. Harka tokkoon osoo waraannuu, harka kaaniin osoo leenjinuu, Ajaja Iizii Duula Addaa gurmeessuu qofa osoo hin taane, humna rukutuu danda’u Rippaabilikaan Gaardii(Eegdota Rippaabilikaanii) olaanaa biyyattii akka hundeffamu taasisuun danda’amuu himaniiru.   Guyyaa har’aas leenjii komaandoo marsaa 44ffaa xumuranii kan eebbifaman akka jiran eeruun,miseensonni hedduun leenjii irra akka jiran himaniiru. Ajajni Duula Addaa tokkummaa keessoo kan kaleessaa caalaa gubbaa hanga jalaatti kan qindaa’ee fi leenji’e horachuu isaa ibsaniiru. Galaanarrattis ta’e lafarratti, haala qilleensaa kam keessattiyyuu fi haala teessuma lafaa iddoo kamittiyyuu Ajajni Duula Addaa ergama Mootummaa, Uummataa fi Dhaabbata isaa eeguuf kutannoon kan hojjetuu fi ergama isaa milkaa’inaan kan galmaan ga’u ta’uu mirkaneessaniiru.

Guraandhala 15/2018 (ENA): Kabaja biyya isaa fi daangaa biyyaa kan kabachiisuuuf dirqama kamiifiyyuu qophii kan ta’e goota, gahoomaa fi jabina kan qabu Raayyaa Itisaa ijaarreerra jedhan Itaamaajoor Shuumiin Walii-galaa Humnoota Waraanaa Raayyaa Ittisa Biyyaa Fiildi Maarshaal Biraanuu Juulaa. Sirna cufiinsa kabaja waggaa 65ffaa Ajaja Duula Addaa Raayyaa Ittisa Biyyaa; istaadiyeemii Hawaasaatti bakka Ajajaan Olaanaa Raayyaa Ittisa Biyyaa fi Ministirri Muummee Dr. Abiyyi Ahimad, Giiftii Duree Zinnaash Taayyaachoo, Itaamaajoor Shuumiin Walii-galaa Humnoota Waraanaa Fiildii Maarshaal Biraanuu Juulaa fi qondaaltonni olaanoo Raayyaa Ittisa Biyyaa biroo, miseensonni Loltootaa fi kanneen biroo argamanitti gaggeeffameera.   Raayyaan Raayyaa Ittisa Biyyaa teknooloojii fi meeshaa waraanaa ammayyaa baay’ee akka gaariitti kan hidhate ta’uu ibsuun, Loltuun gootummaa qabu, dandeettii fi gahumsa qabu waan hundaa’eef, kabajaa fi daangaa biyyaa eeguuf dirqama kamiifuu qophii kan ta’e ijaaramuu isaa mirkaneessaniiru. Kanumaan walqabatee Ajajni Duula Addaa gama hundaan ajaja qindaa’ee fi qophaa’e ta’uu ibsuun, gootummaa kanaan dura raawwataman hedduu tarreessaniiru. Adeemsa jijjiiramaa keessatti qaamolee jeequmsa uumuuf carraaqan hordofuu fi seera kabachiisuun injifannoodhaan goolabuun akka danda’ame dubbataniiru.   Ayyaana kana waliin agarsiisni loltummaa qilleensaa, agarsiisa loltumaa bishaan irratti hundaa’ee fi agarsiisa loltummaa lafa irratti kan argamu yoo ta’u, sagantaan xumuraa har’a gaggeeffameera. Sagantaa har’aa kanaan eebbifamtoonni Komaandoo Raayyaa Ittisa Biyyaa 44ffaa kan eebbifaman yoo ta’u, bakka keessummoonni kabajaa argamanitti miseensonni Ajaja Duula Addaa agarsiisa hiriira loltummaa agarsiisaniiru. Miseensonni Raayyaa Ittisa Biyyaa kun yeroo gabaabaa keessatti ergama addaa raawwachuuf kan isaan dandeessisu agarsiisa qilleensarraas qophii ta’uu isaanii helikooptaraan agarsiisaniiru. Barattoonni manneen barnootaa adda addaa magaalaa Hawaasaa irraa dhufan agarsiisa adda addaa waliin dhiheessaniiru.