Caamsaa 7/2018(ENA)- Jiraattonni Magaalaa Amboo yaada isaanii ENA’f kennan akka ibsanitti, kaardii filannoo waliigalaa 7ffaaf fudhatan fayyadamuun paartii biyyaa fi ummataaf hojjetu filachuuf qophaa'uu isaanii beeksisaniiru. Kanneen Yaada kennan keessaa Obbo Dajanee Bakkashaa akka dubbatanitti, Mirga dimokiraasii Heera Mootummaatiin nuuf kenname fayyadamee, paartii naaf ta’u filachuuf guyyaa filannichaa hawwiin eeggachaan jira jedhaniiru. Paartii biyyaaf fayyadu adda baafachuuf qophiiwwan falmii paartilee siyaasaa miidiyaalee adda addaarra darbaa jiran hordofaa akka jiranis ibsaniiru. Jiraataan magaalattii kan biraan dargaggoo Tasfaa Taaddasaa gama isaatiin, imaammataa fi dambiiwwan paartilee siyaasaa miidiyaalee hawaasummaas dabalatee hordofaa akka jiru dubbateera. Dargaggoonni nageenya, guddinaa fi badhaadhina biyyaatiif qooda guddaa waan qabaniif, paartii dargaggootaaf carraa gaarii fiduuf sagalee koo kennuuf qophaa'eera jedheera. Aadde Baatiree Humnaa gamasaanitiin, nagaa fi tasgabbii filannichaatiif hirmaannaan dubartootaa murteessaa waan ta'eef, dubartoota biroo waliin ta'uun qooda isaanirraa eegamu bahaa akka jiran dubbataniiru. Filannicharratti mirga heera mootummaa koo fayyadamee paartii biyyaaf ni fayyada jedhee amanu filachuuf, sagantaalee falmii paartilee siyaasaa hordofaan jira jedhaniiru.

Caamsaa 7/2018 (ENA): Komishiniin Marii Biyyaalessaa gabaasa raawwii isaa ganama har’aa bakka MM Dr. Abiyyi Ahimad, qondaaltonni olaanoo federaalaa fi naannoo, akkasumas miseensonni koree dhaabbii mana maree bakka bu’oota ummatootaa argamanitti dhiheesseera.   Komishinichi hojiiwwan gurguddoo hanga ammaatti raawwate, qormaata isa mudatee fi furmaata inni kenne dhiyeessuun, akkasumas adeemsichi haala gaariin akka adeemsifamuuf gahee qooda fudhattoota irraa eegamus ibseera. Bu’aawwan ijoo hanga ammaatti galmaa’an keessaa adeemsi marii hunda hammatee fi hirmaachisaa ta’e akka raawwatame gabaasichi ibseera. Kana malees, adeemsi ajandaa walitti qabuu fi marii biyyattii dhibbeentaa 93 kan uwwifamee fi aanaalee kuma 1 fi 234 keessatti raawwatame milkaa’inaan xumuramuu isaa hubatameera. Gama biraatiin, komishinichi marii marsaa 22 qooda fudhattoota adda addaa waliin taasisus, haala mijataa hin taane irraa kan ka’e aanaalee naannoo Tigraay keessatti marii gaggeessuu akka hin dandeenye komishinichi ibseera. Qormaata kanaaf deebii kennuudhaan qooda fudhattoonni naannoo Tigraay hunda irraa dhufanii fi dhalattoonni naannichaa godinaalee adda addaa irraa Finfinneetti waamuun ajandaa irratti mari’achuu beeksiseera. Komishinichi marii kana marsaa itti aanutti hojiiwwan hojjatus bal’inaan ibseera. Kanneen ijoon hirmaannaa qooda fudhattoota siyaasaa cimsuu, ajandaa marii biyyaalessaa bocuu fi konfiraansii marii biyyaalessaa gaggeessuudha. Kana malees, hojiiwwan bu’aa fi yaadonni sadarkaa biyyaatti irra ga’an hojiirra oolchuuf haala mijeessuun hojii isaa gara fuula duraa keessatti hammatamuu Waajjirri Ministira Muummee beeksiseera. #Ena Afaan Oromoo #TOI #ENA

Caamsaa 6/2018 (ENA): Ministirri Dhimma Alaa Dr. Geediyoon Ximootiyoos Ministira Muummee Hindii Naareendiraa Moodii waliin mari'ataniiru. Ministirri Dhimma Alaa Dr. Geediyoon Ximootiwoos Walgahii Ministiroota Dhimma Alaa ‘BRICS’ har’a Hinditti eegale irratti hirmaachaa jiru. Ministirri Dhimma Alaa kun Walgahii Ministirootaa cinatti MM Hindii Naareendiraa Moodii waliin Niiw Deeliitti mari’ataniiru. Walgahiin Ministiroota Dhimma Alaa BRICS mata duree “Cichoomina,kalaqa,Tumsaa fi Itti Fufiinsa ijaaruu” jedhuun dura taa’ummaa Hindiin kan qophaa’edha. Ministirri Dr. Geediyoon Ximootiwoos haasawa walgahii kanarratti taasisaniin sirna idil-addunyaa biyyoota hunda haqaan tajaajilu ijaaruuf dippilomaasii biyyoota hedduu qindoominaan hojjechuun barbaachisaa ta’uu dubbataniiru. Utubaawwan sirna idil-addunyaa haqaa fi tasgabbaa’aa ta’an, nageenya mirkaneessuu fi tasgabbiifi misooma waloo dagaagsuu keessatti BRICS gahee adda duree taphachuu akka qabu dubbataniiru. Walgahiin Ministiroota Dhimma Alaa hanga guyyaa boruutti akka itti fufu Ministeerri Dhimma Alaa beeksiseera. #Ena Afaan Oromoo #TOI #ENA

Caamsaa 6/2018(ENA): Jiraattonni Magaalaa Finfinnee yaada isaanii ENAf kennan akka jedhanitti, filannoo biyyaalessa 7ffaaf kaardii filannoo fudhatanitti fayyadamanii, paartii siyaasaa misoomaa fi guddina biyyaaf ni fayyada jedhaniif sagalee kennuuf qophii ta'uu isaanii dubbataniiru. Akka sagantaa Boordii Filannoo Biyyaalessaa Itiyoophiyaatiin kaa'ametti, filattoonni Caamsaa 24 bara 2018 sagalee isaanii ni kennu. Galmeen filattoota filannoo biyyaalessa 7ffaa baranaa Guraandhala 28 hanga Bitootessa 28 bara 2018 kan gaggeeffame yoo ta'u, guyyoota ayyaanaa lama osoo hin dabalatiin hanga Ebla 14 bara 2018tti akka dheeratu taasifamee xumurameera. Sagantaa kaa'ameen, namoota biyya keessatti buqqa'anii kaardii filannoo hin fudhatiin, Barattoota Yuunivarsiitii keessatti argamanii fi miseensota Raayyaa Ittisa Biyyaa kaampii keessa jiraniif haala addaatiin hanga Ebla 24 bara 2018tti dheerachuun xumurameera. Filattoonni appilikeeshinii dijiitaalaa "mircaayee" jedhamuu fi buufata filannootti qaamaan dhiyaachuun, filattoonni miiliyoona 50 fi 514 ol sagalee kennuu kan dandeessisu kaardii filannoo fudhachuu danda'aniiru. Filannoo biyyaalessa 7ffaa kanaan paartileen siyaasaa morkattootaa 47 ta’an kaadhimamtoota kuma 10 fi 934 galmeessisuun, miidiyaaleen fayyadamanii yaada filannoo imaammata isaanii uummataaf beeksisaa jiru. Dhaabbileen biyya keessaa 55 Boordii Filannoo Biyyaalessaarraa beekamtii taajjabbii filannoo argatan, kutaalee biyyaa adda addaatti bakka bu'oota kuma 60 fi 277 ol bobbaasaniiru. Dhaabbileen Hawaasa siivilii 169 beekamtii qabanis uummata filataaf barnootaa fi leenjii hubannoo uumuu adda addaa kennaa jiru. Jiraattonni Magaalaa Finfinnee filannoo biyyaalessa 7ffaaf galmaa'anii kaardii fudhatan ENA’f akka ibsanitti; paartii biyyaa fi uummataaf ni fayyada jedhan filachuuf qophii ta'uu isaanii dubbataniiru. Jiraattota magaalattii keessaa tokko kan ta’an Obbo Warquu Fiqaaduu, kaardii filannoo fudhachuu irraa eegalee guyyaa filannoo sanas hawwiin eeggachaa akka jiran ibsaniiru. Yaada kennituun biraa Iyyerusaalam Haragawayin gama isaaniitiin, kaardii filannoo isaaniitiin paartii misoomaa fi guddina biyyaa dhugoomsuuf hojjetuuf sagalee isaanii kennuuf qophaa'uu dubbataniiru. Haaluma walfakaatuun, Leellisaa Gaaddisaas kaardii filannoo fudhachuun paartii biyyaaf ni fayyada jedhan filachuuf guyyaa sagalee kennuuf eeggachaa akka jiran mirkaneessaniiru. Adeemsi filannoos haqa-qabeessa, bilisa, deemokiraatawaa fi nagaadhaan akka xumuramuuf gumaacha isaanii akka gumaachan ibsaniiru. Jiraataan magaalattii Obbo Wadaaree Gabratsaadiq akka jedhanitti , filannoon ijaarsa mootummaa cimaadhaaf murteessaa ta’uu eeranii, filannoo biyyaalessa 7ffaa irratti sagalee kennuuf qophii barbaachisaa gochuu isaanii dubbataniiru. Obbo Dirribsaa Xurunaa gama isaaniitiin, filannoon mirga uumamaa fi dimookiraasii filachuu fi filatamuun mirkanaa’uuf waltajjii murteessaa waan ta’eef filachuuf qophaa'uu isaanii dubbataniiru. Filannoo biyyaalessa 7ffaa kanaan paartii nageenya, misoomaa fi guddina biyyaa mirkaneessuuf hojjetuuf sagalee kennuuf dursanii qophaa'uu isaanii kan dubbatan ammoo Obbo Tashoomaa Asfaawu dha.

Caamsaa 5/2018(ENA): Imaammanni qorannoo fi beekumsa irratti hundaa’e badhaadhina Itiyoophiyaa dhugoomsuuf faayidaa ol’aanaa akka qabu Itti Aanaan Ministira Muummee Tamasgeen Xurunaa ibsan. Waltajjiin guyyaa imaammataa biyyaalessaa yeroo jalqabaatiif mata-duree "odeeffannoo gahumsaaf , gahee imaammataa Itiyoophiyaa badhaateef" jedhuun gaggeeffameera. Itti Aanaan Ministira Muummee Tamasgeen Xurunaa waltajjii kanarratti haasawaa taasisaniin, imaammanni ragaa irratti hundaa’ee qophaa’u badhaadhina biyyaatiif gahee murteessaa qabaachuu isaa irratti xiyyeeffannoo kennaniiru. Biyyoonni milkaa’an damee industirii fi bu’uraalee misoomaa qofa irratti osoo hin taane, beekumsa, qorannoo fi yaada tarsiimawaa irratti akka jabaatanii hojjetan ibsaniiru. Imaammanni ibsituu deemsa biyyaalessaa hunda-galeessaa ta’uu isaa eeranii; Inistiitiyuutiin Qo’annoo Imaammataa beekumsaa fi hojii gidduutti akka riqichaatti tajaajiluun "mootora sagalee hin qabne" misooma biyyaalessaa ta’ee tajaajilaa jiraachuu dubbataniiru. Yeroo ammaa Itiyoophiyaan ce’umsa olaanaa keessa akka jirtu ibsuun, qo’annoo fi Qophii Imaammataa keessatti dhimmoota ijoo xiyyeeffannoon irratti kennamuu qaban eeraniiru. Isaanis, dhimmoota jijjiirama qilleensaa fi misooma magariisaa, Bulchiinsa Dinagdee Gooroo fi ce’umsa caasaa, Ce’umsa teeknoolojii fi tiraanisfoormeeshinii dijiitaalaa, Carraa hojii dargaggootaa uumuu fi oomishaalee qonnaa gara daldalaatti ceessisuu, Waliitti hidhamiinsa naannawaa fi dhiibbaalee Daldala Idil-Addunyaa fa’i jedhaniiru. Itti Aanaan Ministira Muummee Tamasgeen Xurunaa akka jedhanitti, imaammanni meeshaa qabatamaa jireenya lammiilee bocu yoo ta’u, carraaleen akkamitti akka uumaman kan imaammata murteessudha. Mootummaan dhaabbilee barnoota ol’aanaa, damee dhuunfaa fi dhaabbilee sivikii gidduutti walitti dhufeenyi jabaan akka jiraatu kan gaafatan Itti Aanaan Ministira Muummee; mootummaan "ida’amuu" yaadaa fi ilaalchaaf bakka addaa akka kennu mirkaneessaniiru. Inistiitiyuutiin Qo’annoo Imaammataa riqicha amantaa uummataa fi mootummaa ijaaru ta’ee akka tajaajilus dhaamaniiru. Deemsi badhaadhina Itiyoophiyaa ijaarsa dinagdee beekumsa itti fufiinsa qabu irratti kan hundaa’e ta’uu akka qabu ibsaniiru. Gorsitoota imaammataa, dhaabbilee barnoota ol’aanaa, damee dhuunfaa fi dhaabbilee sivikii gidduutti imaammata qulqullina qabu uumuuf deeggarsi jabaan akka taasifamu waamicha dhiyeessaniiru.

Caamsaa 5/2018 (ENA) - Ministirri muummee Dr. Abiyyi Ahimad pirezidaantii Faransaayi Imaanu’eel Maakroon waliin dhimmoota waloorratti marii gamlamee gaggeessaniiru. Dabalataanis waljijjiirraa walii galteewwan ijoo biyyoota lamaan jidduutti taasifaman waliin taanee Gaggeessineerra jedhan ministirri muummee Dr. Abiyyi Ahimad ergaa fuula miidiyaa hawaasaa isaaniirratti dabarsaniin. Haala Kanaan, anniisaa haaromfamu, qindaa’aa fi egeree akkasumas sagantaa diitaalaayizeeshinii hojiirra oolchuuf kan gargaaru walii gaaltee liqaa Yuuroo miiliyoona 54 tuqaa 6 fi wal jijjiirraan hammattoo haaraa fi rood maappii tumsa mootummaa fi dhuunfaa ji’ootarmaalii meeggaa waattii 150 akka keessatti argaman ibsaniiru.

Caamsaa 5/ 2018 (ENA): Pireezidaantiin Farasaay Imaanu’eel Maakiroon daawwannaa hojiif Finfinnee galaniiru. Pireezidaantichi wayita Buufata xiyyaaraa Idil Addunyaa Boolee gahan Ministirri Muummee FDRI Dr. Abiyyi Ahimad isaan simataniiru. Ministirri Muummee Dr. Abiyyi Ahimad ergaa miidiyaa hawaasummaa isaaniin dabarsaniin, Pirezidaantii Faransaay Imaanu’eel Maakirooniin gara Itiyoophiyaa baga nagaan dhuftan kanan jedhu gammachuu guddaani jedhan. Daawwannaa sadaffaan Itiyoophiyaatti taasisan ‎michummaa jabaa biyyoota lameeniif agarsiistuu ta’uu isaas eeraniiru. Mariiwwan murteessoofi bu’aa qabeesssa ta’an irratti kan xiyyeeffatan ta’uu eeranii, hariiroon Itiyoophiyaafi Faransaay cimee kan itti fufu ta’uu dubbataniiru. #Ena Afaan Oromoo #TOI #ENA

Caamsaa 5/2018 (ENA): Dandeettiin keessoo keenyaa sadarkaa dippilomaasii keenya guddisee, michootaa fi obbolummaa idil-addunyaa gidduutti wal amantaa guddaa uumeera jedhe Tajaajilli Komunikeeshinii Mootummaa. Ibsi tajaajilichi kenne akka armaan gadiitti dhiyaateera: Milkaa’inoonni dippiloomaasii Itiyoophiyaa mirkaneessituu birmadummaa biyyaafi dursummaa naannawaa ta’eera. Keessumaa faayidaa biyyaalessaa ishee kabachiisuun milkaa’inoota seena qabeessa ta’an galmeessaa jirti. Adeemsi tarsiimawaa dandeettii keessoo guddisuunii fi deeggartoota baay’isuu irratti hundaa’e dhagahamummaa biyyattiin waltajjiiwwan idil-addunyaa irratti qabdu guddisuun sosochiiwwan Ji’oo-Polatiksii keessatti qooda olaanaa akka bahattu taasiseera. Itiyoophiyaan miseensa ‘BRICS’ ta’uun ishee madaala biyyoota guddatan gidduutti qabdu eeguun maddeen faayinaansii ishee babal’isuunii fi sadarkaa idil-addunyaatti sagalee murtoo kennuu ishee cimsuun bu’aa argamedha. Keessumaa biyyoonni gurguddoon Itiyoophiyaa akka biyya tarsiima’aa murteessaa taateetti filachuun, sadarkaa olaanaan dabalaa dhufuun bilchina dippiloomaasii mootummaa fi olaantummaa Ji’oopolatiksii biyyattiin qabdu guddachaa dhufuuf agarsiistuu ta’uudha. Cichoominniifi dandeettiin marii mootummaa Hidha Guddicha Haaromsaa irratti agarsiise imala dippiloomaasii Itiyoophiyaa gara boqonnaa olaanuutti ceesisuurra darbee mirga uumamaa biyyattiin laga Abbayyaa irratti qabdu qabatamaan kan mirkaneessudha. Itiyoophiyaan walitti bu’iinsoota Baha Afrikaatti mul’ataniif furmaata barbaaduunii fi walitti hidhamiinsa diinagdee naannawaa hogganuu danda’uun ishee utubaa nageenyaafi tasgabbii naannawichaa ta’uun ishee irra deebiin mirkaneesseera. Gama biraan mootummaan guddina diinagdee Itiyoophiyaa itti fufsiisuuf hulaa galaanaa argachuun murteessaadha. Fedhii kana karaa nagaan fi qajeeltoo “ kennuufi fudhachuun” milkeessuuf sosochiin eegalame tarkaanfii ija jabinaafi tooftaan deeggarame dha. Dhimmi kun ajandaa biyyaalessaa waggootaaf ukkaamfamee ture gara dirreetti baasuun haala tumsa naannawaa cimsuu danda’uun akka hiikamuuf kaka’umsi mootummaan fudhate bilchina imaammataa carraa dhaloota egeree murteessuuti. Kana cinaattis waltajjiiwwan dippiloomaasii diijitaalaa fayyadamuun odeeffannoowwan sobaa qolachuunii fi milkaa’inoota misoomaa biyya keessaa hawaasa idil-addunyaan gahuun hojiin maqaa gaarii Itiyoophiyaa irra deebiin ijaaruu karaa milkaa’ina qabuun hojjetamaa jira. Akka waliigalaatti kallattii mootummaan Itiyoophiyaa hordofaa jiru mul’ata ifaa “ Itiyoophiyaa jabduu badhaadhina naannawaaf” jedhu kan qabudha. Biyyoonni guddatan hariiroo Itiyoophiyaa waliin qaban cimsuuf kan eeyyaman mootummaan qormaatilee keessoofi alaa gahumsaan dandamachuunii fi gahumsi faayidaa biyyaalessaa kabachiisuuf qabu deeggartoota idil-addunyaaf wal’amantaa cimaa waan uumeefi dha. Hojiileen misoomaa riifoormii biyya keessaan hojjetamaa jiran jabina dippiloomaasii ishee waliin walitti ida’amuun Itiyoophiyaa biyya Afrikaa irraa dhageettii qabdu qabdu taasisuu; waltajjii idil-addunyaa irrattis guddummaa ishee mirkaneessuudha. Itiyoophiyaan har’as biyyoota Afrikaa biroof fakkeenya birmadummaafi jabinaa ta’uun imala ishee itti fufti. Tajaajila Komunikeeshinii Mootummaa #Ena Afaan Oromoo #TOI #ENA