Guraandhala 19/2018 (ENA): Damee turizimiin fayyadamummaa dinagdee fi dorgomtummaa mirkaneessuuf hojiilee hojjetameen bu’aan galmaa’eera jedhan Ministirri Ministeera Turizimii aadde Salaamaawit Kaasaa. Ministeerri Tuurizimii gamaaggama karoora walakkaa waggaa damichaa bara baajata 2018 magaalaa Arbaa Minchitti gaggeessaa jira.   Ministirri Salaamaawit Kaasaa waltajjicharratti haasawaa taasisaniin, milkaa’ina karoora misoomaa waggaa 10 biyyattii keessatti dameen turizimii gahee murteessaa akka qabu eeruun, Ministeerichi karoora yeroo giddu galeessaa baasee irratti hojjechaa jiraachuu ibsaniiru. Qabeenya turizimii uumamaa fi nam-tolchee biyyattii keessatti argaman eeguu fi misoomsuu bakkeewwan turizimii babal’isuun fayyadamummaa diinagdee damichaa guddisuuf tattaaffiin taasifamaa jiraachuu ibsaniiru. Pirojektoonni kaka’umsa Ministira Muummee Dooktar Abiyyi Ahimadiin eegalaman, Maaddii Biyyaa ilaalcha haaraatiin damicharratti boqonnaa haaraa bananiiru jedhan. Faayidaa diinagdee fi dorgomtummaa damee turizimii akka biyyaatti guddisuuf iddoowwan turizimii haaraan qophaa’anii kanneen jiran cimsuun daawwattootaaf banamuu isaanii eeranii, kunis bu’aa argamsiiseera. Qabeenya aadaa fi uumamaa hedduu Dhaabbata Mootummoota Gamtoomaniitti Dhaabbata Barnootaa, Saayinsii fi Aadaa(UNESCO)tti galmeessisuuf tattaaffii taasifamaa jiru keessatti bu’aan qabatamaan galmaa’aa jiraachuu eeruun, kana cimsuu fi itti fufsiisuuf ni hojjanna jedhaniiru. Bara 2025 damee turizimii keessatti guddinni dhibbeentaa 15 galmaa’uu eeruun, kana keessattis miidiyaaleen, dameen dhuunfaa, michoota misoomaa fi kanneen biroo gahee olaanaa taphachuu isaanii ibsaniiru. Ji’oota hafan keessattis dhaabbilee sadarkaa sadarkaan jiran teeknooloojii dijitaalaatiin cimsuu, hoggantootaa fi ogeessota gahumsa qaban uumuu, tajaajila gahumsa qabu kennuuf ciminaan ni hojjata jedhaniiru. Bulchaan Bulchiinsa Naannoo Kibba Itiyoophiyaa Xilahuun Kabbadaa gamasaaniitiin imala badhaadhina dameelee diinagdee adda addaa biratti milkaa’uuf turizimiin gahee jedhan. Naannichatti dandeettiin turizimii bal’aan akka jirus eeraniiru; keessumattuu, seenaa dheeraa naannichaa, aadaa ajaa’ibaa, qabeenyi uumamaa, fi adda addummaa guddina damichaaf carraa guddaa akka ta’e dubbataniiru. Iddoowwan hambaa naannichaa UNESCOn galmaa’an, paarkiiwwan biyyoolessaa, qabeenyi turizimii aadaa, uumamaa fi amantaa guddina biyyattiif gumaacha olaanaa akka taasisaa jirus eeraniiru. Mootummaan naannichaa hawwata turizimii misoomsuun, dhaabbilee tajaajila kennan babal’isuun, lammiileef carraa hojii uumuun fayyadamummaa diinagdee damichaa guddisuuf xiyyeeffannoo addaatiin hojjechaa jiraachuu ibsaniiru. Magaalaan Arbaa Minchi magaalaa hawwata turizimiin beekamtuun dabalatatti nageenyi ishees kan mirkanaa’e dha kan jedhai immoo kantiibaa magaalichaa Dr. Masfin Manzaa dha. Waltajjicha guyyoota lamaaf kan turu yoo ta'u, miseensota koree dhaabbii daldalaa fi turizimii mana maree bakka bu'oota ummataa dabalatee bakka bu'oonni damichaa naannolee fi bulchiinsa magaalota hundarraa hirmaataa jiru.

Guraandhala19/2018(ENA) -Naannoo Oromiyaatti bara baajatichaa baatiiwwan darbanitti, waliin gahiinsa bishaan dhugaatii babal’isuun, fayyadamummaa hawaasaa guddisuuf hojii hojjetameen pirojektoonni bishaanii 668 xumuramuun hojiitti galuusaanii Biiroon Bishaanii fi Inarjii Naannichaa beeksise. Hoggantuun Biirichaa Injiinar Miiliyoon Baqqalaa ENA’f akka ibsanitti, naannichatti waliin gahiinsa bishaan dhugaatii qulqulluu babal’isuun fayyadamummaa hawaasaa guddisuuf hojiiwwan adda addaa hojjetamaa jiru.   Kananis pirojektoota bishaan dhugaatii qulqulluu haaraa ijaarurra darbee, sababoota adda addaan pirojektoota bishaanii hojii dhaabanii turan hojiin suphuu hojjetamuusaa dubbataniiru. Walakkaa bara baajatichaatti pirojektoonni bishaan dhugaatii qulqulluun ummata kuma 375n fayyadamaa taasisan pirojektoonni bishaan dhugaatii qulqulluu 668 tajajilaaf ga’uusaanii ibsaniiru. Pirojektoota bishaan dhugaatii kuma tokko sababoota adda addaan tajaajila dhaaban suphuun tajaajilootni addaan citan irra deebi’uun hojii jalqabsiisuun danda’ameera jedhaniiru. Pirojektoota bishaan dhugaatii yeroo dheeraaf ijaarsisanii harkifatee fi madda komii hawasaa ta’an xumuruun tajaajilaaf qaqqabsiisuuf hojjetamaa jiraachuu Injiinar Miiliyoon beeksisaniiru. Hanga ammaatti pirojektiin Bishaan dhugaatii qulqulluu Baalee Roobee xumuramuu ibsuun yeroo ammaa pirojekticha sararoota duraanii waliin wal qabsisuuf hojjetamaa jira jedhaniiru.   Haaluma wal-fakkaatuun ijaarsi Pirojektii Bishaanii Magaala Walisoo fi sarara diriirsuun gandoota lamaan alatti xumuramuusaa eeruun, pirojektiin bishaan dhugaatii Mojoo fi Adamaa xumuramuun walakkaan tajaajila kennuu eegaluu ibsaniiru. Fuuldurattis pirojektoota bishaan dhugaatii qulqulluu raawwiinsaanii dhibbantaa 85n ol ga’an, xumuruun tajaajilaaf qaqqabsiisuuf xiyyeeffannoon kennamee hojjetamaa jiraachuu eeraniiru. Fuuldurattiis hojii hordoffii fi to’annaa cimsuun, pirojektoota ijaarsarra jiran guutummaa guutuutti xumuruun tajaajilaaf qaqqabsiisuuf hojiin eegalame cimee itti fufa jedhaniiru.

Guraandhala 19/2018 (ENA): Itiyoophiyaan kaayyoo Ajandaa 2063 Gamtaa Afrikaa galmaan ga’uuf gahee adda duree taphachaa jirti jedhan Yunivarsiitii Dirree Dawaatti barsiisaa fi qorataan barnoota dinagdee doktar Zarihuun Tamsaas.   Turtii ENA waliin taasisaniin Yunivarsiitii Dirree Dawaatti barsiisaa fi qorataan damee kanaa kan ta’an Dr. Zarihuun Tamsaas akka himanitti, hojiiwwan misoomaa kallattii hedduu Itiyoophiyaan hojjechaa jirtu jijjiirama qabatamaa fidaa kan jirudha jedhani. Fakkeenyaaf, waggoota darban keessatti hojiiwwan milkaa’oo damee oomishaa keessatti galmaa’aa jiran, Gamtichi gara dinagdee industiriitiin durfamutti akka ce’u kan dandeessisu ta’uu eeraniiru. Misooma abbootiin qabeenyaa gurguddoon biyya alaa zoonii diinagdee addaa fi paarkiiwwan indaastirii magaalota adda addaa keessatti ijaaraman keessatti raawwatamaa jiran akka fakkeenyaatti kaasaniiru. Itiyoophiyaan ajandaawwan Gamtichaa galmaan ga’uuf bu’uura cimaa kaa’aa akka jirtu kan mirkaneessan keessaa hojiin bu’a qabeessi qonnaa keessattuu misooma qamadii keessatti argame agarsiiftuu gaarii ta’uu ibsaniiru.   Biyyoonni Gamtaa Afriikaa imala wabii nyaataa mirkaneessu galmaan ga’uuf qabeenyaafi beekumsa isaaniitti fayyadamuu akka danda’an kun agarsiistuu guddaa ta’uu ibsaniru. Kana hunda bira darbee waggoota muraasa darban keessatti bu’aan damee bu’uuraalee misoomaa Itiyoophiyaa keessatti galmaa’e biyyoota Afrikaa walitti hidhuun fayyadamummaa dinagdee waliinii mirkaneessee jira jedhaniiru.   Keessattuu, Hidhi Haaromsa Guddicha Itiyoophiyaa, bu’uuraaleen misooma daandii ammayyaa baaburaa fi daandii naannichaa keessatti ijaaramaa jiran walitti hidhamiinsaa biyyoota naannichaa fi faayidaa waloof fakkeenya olaanaa kan ta’u dha jedhani. Hojiiwwan Itiyoophiyaan galma ga’iinsa ajandaawwan Gamtichaatiif hojjechaa jirtu, biyyoota biroof kan fakkeenya ta’anii waan ta’eef, kana daran guddisuuf imaammattoonnii fi tarsiimoon hojiirra oolaa jiru haala mijataa uumaa akka jiran akeekaniiru.

Guraandhala 18/2018 (ENA): Imaammataa fi tarsiimoo haaraa hojiirra oolchuun misooma beeyladootaa fi qurxummii biyyattii keessatti guddinni olaanaan galmaa’uu Ministeerri Qonnaa beeksise. Bu’aa argame sadarkaa kanaan oliitti ceesisuuf qindoominni qooda fudhattoota gidduutti taasifamu murteessaa ta’uus ibsaniiru. Ministeerri Qonnaa waltajjii marii qooda fudhattoota ekisteenshinii beeyladootaa fi qurxummii biyyoolessaa gaggeessaa jira. Wayita kana Deetaan Ministeera Qonnaa Dr. Fiqiruu Raggaasaa Itiyoophiyaatti waggoota muraasa darban keessatti misoomni beeyladaa guddina olaanaa agarsiiseera jedhan. Imaammataa fi tarsiimoo haaraa hojiirra oolchuun horsiisa beeyladaa fi qurxummii irratti bu’aan guddaan galmaa’uu ibsaniiru. Misoomni beeyladaa kanaan dura sadarkaa tarsiimootti dagatamee kan ture ta’us, amma garuu of danda’ee gurmeeffamee xiyyeeffannaan kennamee jiraachuu hubachiisaniiru. Hojiirra oolmaan sirna ekisteenshinii kun beekumsaa fi teeknooloojii qonnaan bultootaaf galchuu fi itti fayyadamuudhaan fayyaa fi oomishtummaa beeyladaa irratti jijjiirama fiduu isaas ibsaniiru. Qonnaan bultootaa fi horsiisee bultoonni deeggarsa ogeessotaan dhukkuba beeyladaa ittisuun bu’a qabeessa ta’uu eeraniiru. Teeknooloojiiwwan qorannoon argaman, hojiiwwan fooyya’iinsa sanyii fi mala kunuunsa fayyaa beeyladaatiin argaman irratti jalqabame abdachiisaa ta’uu ibsaniiru. Hojiin qindoomina qooda fudhattootaa cimee itti fufuun bu’aa argame cimsuu akka qabus hubachiisaniiru. Mootummaan damee kanarraa galii argatu guddisuuf karaa innisheetivoota boceen, Itiyoophiyaan beeylada irraa galii argachuu qabdu akka argattuufi xiyyeeffannoon hojjetamuu akka qabu eeraniiru.   Hogganaan Biiroo Misooma Qabeenya Beeyladaa Naannoo Sidaamaa obbo Asaffaa Foonaa gama isaaniin, naannichi misooma beeyladaa fi qurxummii irratti xiyyeeffachuun gosa sanyii beeyladootaa fooyyessuu irratti xiyyeeffannoon hojjetamaa jira jedhani.   Itti Aanaa Hogganaa Biiroo Qonnaa Naannoo Ummata Kibba Lixa Itiyoophiyaa fi Itti Gaafatamaa Damee Beeyladaa fi Qurxummii obbo Taammanaa Baqqalaa akka ibsanitti, oomishaa fi oomishtummaa fooyyessuuf nyaata beeyladaa ammayyaa misoomsuun eegalameera jedhani. Hojii gaggeessaan olaanaa Waldaa Fayyaa Beeyladaa Itiyoophiyaa Piroofeesar Indiriyaas Zawuduu akka jedhanitti, guddinni damichaa keessatti ekisteenshiniin fayyaa beeyladaa gahee olaanaa qabaachuu eeruun, waldichi fayyaa beeyladaa irratti ciminaan hojjechaa jiraachuu hubachiisaniiru. Fuula Miidiyaalee Dijitaalaa ENA https://linktr.ee/ENADigital