Waxabajjii 09/2017(TOI)-Ashaaraan Magariisaa Itiyoophiyaan Jijjiirama Haala Qilleensaaf Kutannoo Olaanaa Furmaatilee Qabatamaa Qabdu Kan Agarsiisu Ta’uu Ministirri Muummee Dr. Abiyyi Ahimad Ibsan. Ministirri Muummee Ergaa Fuula Miidiyaa Hawaasummaa Isaniirratti Barreessaniin, Dachee Dur-Durii Kan Taate Itiyoophiyaan Gamtaa Afriikaa Waliin Ta’uun Yaa’ii Jijjiirama Haala Qilleensaa Afriikaa Lammaffaa Akka Keessummeessitu Ibsaniiru. Yaa’iin Qaam’ee 3-5 Bara 2017tti Gaggeeffamu kun Yaadama “Mariileen Dhimma Magariisaa Tarkaanfiiwwan Magariisa Bu’uureffatan” Irratti Xiyyeeffate Kun Tarsiimoo jijjiirama Haala Qilleensaa Afriikaa Deeggaruuf Furmaatileen Ijoo Uumama Irratti Hundeeffaman Akka Dhihaatan Dubbataniiru. Tarsiimichi Afriikaan Deebitee Magariisaan Akka Guutamtuu fi Tumsa Afriikaa Cimsuurratti Akka Xiyyeeffate Ibsaniiru. Qophiin Ashaaraa Magariisaa Baranaaf Taasifamaa Jiru Kutannoo Cimaa Itiyoophiyaan Furmaatilee Qabatamaa Ta’aniif Qabdu Agarsiisa Jedhaniiru. Ergaan Kun Ifa Kan Jedhan Ministirri Muummee Ummamarratti Qabeenya Invast Gochuun, Rakkoolee Furuuf Furmaatilee Bu’a Qabeessa Kalaqa Ofkeessaa Qaban Bal’isuu fi Uumamni Lafaa Dinagdee Kan Warraaqsu Akka Ta’u Gochuun Akka Barbaachisu Hubachiisaniiru. Itiyoophiyaan Hirmaattota Yaa’ii Jijjiirama Haala Qilleensaa Afriikaa Simachuuf Qophoofteetti Jechuun Ibsan Ministirri Muummee Dr. Abiyyi Ahimad.

Waxabajjii 09/2017(TOI)-Dachee Dud-durii Kan Taate Itiyoophiyaan Gamtaa Afriikaa Waliin Ta’uun Yaa’ii Jijjiirama Haala Qilleensaa Afriikaa 2ffaa Akka Keessummeessitu Ministirri Muummee Dr. Abiyyi Ahimad Ibsan. Yaa’iin Kun Fulbaana 8 Amma 10/2017tti Finfinneetti Akka Taa’amu Beeksisaniiru.

Waxabajjii 07/2017 (TOI)-Sagantaa Ashaaraa Magariisaa bara Kanaan biqiltuuwwan faayidaa hedduu qabanii fi haala Ikooloojii bu’uureffateen dhaabuuf qophiin taassifamuun ibsame. Ministeera Qonnaatti Hojii Raawwachiisaa olaanaan Eegumsa Misooma Qabeenya Uumama fi itti fayyadamaa Faanosee Mokonnin TOI waliin Gaaf-deebii taassisaniin, sagantaa Ashaaraa Magariisaa ganna kanaaf qophii taassifameera Jedhan. Qophiin biqiltuu biliyoona 7 tuqaa 5 dhaabuu dandeessisu raawwatamuu ibsuun, biqiltuuwwan Mandhaalee fi faayidaa heduu qabaniif xiyyeeffannoon kennamuu ibsaniiru. Dhaabbiin biqiltuu haala ikooloojii bu’uura godhateen akka ta’e ibsuun, kanaafis hojiiwwan barbaachisoon raawwatamuu kaasaniiru. Sagantaa Ashaaraa magarisaa waggoottan darbaniin bu’aawwan hedduun argamuu kan ibsan gaggeessaan olaanaa, kunis yeroo ammaa wabii nyaataa mirkaneessuuf hirmaannaa taassifamuuf gahee guddaa qabaachuu fi carraa hojii uumuu danda’uu dubbataniiru. Daarekteerri olaanaan jiddugala biqiltuu Gullallee Injiinar Guutamaa Morodaa gama isaaniin akka ibsanitti, Magaalaa Finfinnee jiraattotaaf mijattuu taassisuuf uwwisa naannoo magariisaa guddisuun murteessaa dha jedhaniiru. Kunis faalama Qilleensaa Ittisuuf qooda guddaa qabaachuu kaasuun, biqiltuuwwan Mandhaaleen filatamaa ta’uu dubbataniiru. Biqiltuuwwan Sagantaa Ashaaraa Magariisaa bara Kanaaf giddugalichatti qophaa’an dhibbentaa 50 kan ta’an biqiltuuwwan Mandhaaleedha jedhaniiru.

Waxabajjii 05/2017(TOI)-Magaalaan Shaggar bakka jireenya qofa osoo hin ta’iin Magaalaa Omishaa akka taatu hojii hojjetameen bu’aan argamaa jiraachuu kantiibaan bulchiinsa magaalichaa Dr.Tashoomaa Addunyaa dubbatan. Bulchiinsa magaalaa Shaggar Kutaa Magaalaa Mana Abbichuutti sagantaan eegalchiisa dhaabbii biqiltuu Appilii bakka hoggantoonni Bulchinsa Magaalichaa, miseensonni raayyaa Ittisa biyyaa fi jiraattonni naannichaa argamanitti gaggeeffameera. Kantiibaan Bulchiinsa Magaalichaa Doktar Tashoomaa Addunyaa Sirna eegalchiisa irratti Akka Jedhanitti, Magaalaan Shaggar erga Hundeeffamtee eegalee hojiiwwan fayyadamummaa hawaasaa guddisan raawwatamaa jiraachuu ibsaniiru . Magaalittiin bakka jireenyaa qofaa osoo hin ta’iin giddugala Omishaa akka taatuuf hojii hedduun hojjetamuu dubbataniiru. Magaalittii giddugala Qonna ammayyaa gochuuf waggoottan darban sheediiwwan omishaa kuma 10 ol ta’an ijaaramanii namoota hedduuf carraan hojii uumamuu ibsaniiru. Sheedota kana keessaatti hojii Misooma Lukkuu, Misooma Saa’a Aannanii, Furdisa beellada foonii fi misooma kuduraa fi muduraan Hojjetamaa jira jedhaniiru. Ganna dhufu bulchiinsa magaalichaatti lafa hektaara kuma 1 irratti biqiltuun Avookaadoo fi Appilii akka dhaabamu ibsuun, guyyaa hara’aa Kutaa Magaalaa Mana Abbichuutti lafa hektaara 38 irratti biqiltuun appilii dhaabbachuu dubbataniru . Itti Aanaan Kantiiba Bulchiinsa Magaalaa Shaggarii fi Qindeessaan Kilaastera Qonnaa Obbo Girmaa Hayiluu, Bulchiinsa Magaalichaatti Misooma muduraa fi kuduraaf Xiyyeeffannoon addaa kennamuu ibsaniiru . Ganna kana wabii nyaataa mirkaneessuuf kan gargaaranii fi gabaa alaatiif kan oolan biqiltuuwwan faayidaa hedduu qaban nidhaabbamu jedhaniiru. Biqiltuuwwan Dhaabaman Keessaa Kuduraa fi Muduraa Dhaabaman Keessaa Dhibbantaan 50 ol Biqiltuu Appilii Ta’uu Dabalanii Ibsaniiru. Hogganaan paartii badhaadhinaa Waajjira damee kutaa magaalaa Mana Abbichuu obbo Fiqaaduu Hordofaa gamasaaniin, ganna kana biqiltuuwwan faayidaa heduu qaban dhaabuuf qophii barbaachisaa taassisuu dubbataniiru. Kutaa magaalichaatti lafa hektaara kuma 50 irratti dhaabbiin biqiltuu Appilii eegalamuu ibsuun, qonnaan bulaa naannichaa muuxannoo gaarii kana fudhatee biqituu dhaabbate akka kunuunsu hubachiisaniiru. Jiraattota Naannawichaa biqiltuu dhaabuu irratti hirmaatan keessaa obbo Masfin Malaakuu, ganna kana biqiltoota faayidaa hedduu qaban dhaabuuf qophaa’uu ibsaniiru. Faayidaan biqiltuu appilii guddaa ta’uu hubachuun Hirmaannaa Taasisuusaanii Dubbatanii, misoomni muduraa fi kuduraa naannawichatti cimuu qaba jedhaniiru.