Hagayya 14/2018 (ENA)- Yaa’iin marichaa aadaa marii biyyaalessaa gabbisuudhaan Itiyoophiyaa fooyyofte ijaaruuf boqonnaa haaraa kan banedha jechuun ibsan Mari’attoonni. Yaa’iin marii biyyaalessaa olaanaan Adoolessa 18 bara 2018 irraa eegalee wiirtuu konvenshinii idil addunyaa Addisitti gaggeeffamaa turee gara boqonnaa xumuraatti dhihaachaa jira. Mariin kun nageenya, tokkummaa fi badhaadhina biyyattii mirkaneessuuf bu’ura guddaa kan kaa’u ta’uu mari’attoonni ENA’f ibsaniiru. Marichi garaa garummaa keessatti walii galtee waloo uumuu fi Itiyoophiyaa egeree ijaaruuf boqonnaa haaraa banuusaa beeksisaniiru. Maricharratti kan hirmaatan Kaappiteen Salamoon Gizawu akka ibsanitti, mariin kun nageenyaa fi guddina egeree biyyattii bu’ura cimaarra dhaabuuf kan gargaaru ta’uu kaasaniiru. Kun ammo Itiyoophiyaa fooyyofte dhaloota boruuf dabarsuuf carraa guddaa ta’uu beeksisaniiru. Adde Salaam Waaqoo gama isaaniin, waltajjiin marii biyyaalessaa kun rakkoo jiru mariidhaan furuun akka danda’amu qabatamaan kan mirkaneesse ta’uu ibsaniiru. Yaanni hirmaattotaa garaagarummaa tokko malee marichaarratti walqixxummaan kan itti dhagahame, wal kabajaa fi waliigalteen kan keessatti mul’ate akka ta’e ibsaniiru. Mariin kun Itiyoophiyaanonni kallattii biyyattii hundaa fi biyya alaarraa walitti dhufan gaaddisa tokko jalatti walitti qabamanii biyyasaanii sadarkaa caalutti ceesisuuf kan mari’atan waltajjii seena qabeessa ta’uu kan ibsan ammoo Shaalaqaa Baashaa Tarrafaa Walaaniiti. Muuxannoon gaariin wal dhaggeeffachuu fi mari’achuu maricharratti argame dhalootarraa dhalootatti cehaa aadaa siyaasaa fihawaasummaa biyyaalessaa ta’ee itti fufuu akka qabu eeraniiru.

Hagayya 13/2018 (ENA): Poolisiin Federaalaa Itoophiyaa yaaddoo nageenyaa gahumsaa ol’aanaadhaan fashaleessuun nageenya biyyaa mirkaneessuuf qophii ta’uu isaa Ajajaa Olaanaan Poolisii Federaalaa Komishinar Jeneraal Dammallaash Gabramikaa’el ibsan. Hoggantoonni tarsiimawaa Poolisii Federaalaa fi qondaaltonni poolisii olaanoon karoora nageenyaa yeroo ammaa Itiyoophiyaa irratti mari’ataniiru. Komishinar Jeneraal Damallaash Gabramikaa’el yeroo kanatti akka jedhanitti, dhaabbanni isaanii xiinsammuu miseensootaa ijaaruun,qophii yeroo hundaa cimsachuu fi dandeettii raawwachiisummaa daran guddisuun itti gaafatamummaa sirna heera mootummaa eeguu sadarkaa olaanaadhaan bahachaa jira. Itoophiyaan dameewwan hundaan yeroo guddina galmeessaa jirtuutti, nageenyaa fi guddina ishee kan hin feene qaamolee yaaddoo nageenyaa uuman aarsaa kamiyyuu kafaluun fashaleessuuf qophiidha jedhaniiru. Waltajicha irratti ijaarsa xiinsammuu fi ilaalchaa miseensoota poolisii fi qophii yeroo hundaa ilaalchisee waraqaan marii dhiyaatee irratti mari’atamuun isaa odeeffannoo Poolisii Federaalaa irraa argame ni agarsiisa.    

Hagayya 13/2018 (ENA): Marii biyyaaleessaa kana irraa furmaata waldhabdee Siyaasaatiif ta'an ni arganna amantaa jedhu akka qaban Abbootiin Gadaa fi Amantaa Magaalaa Adaamaa dubbataniiru. Adoolessa 08 bara 2018 irraa jalqabee yaa’iin marii biyyaaleessaa Magaalaa Finfinneetti gaggeeffamaa jira. Jiraattota Magaalaa Adaamaa yaada isaanii ENA’f kennan keessaa Abbootii Gadaa fi Amantaa Magaalaa Adaamaa akka jedhanitti, hirmaachisummaan yaa’ii marii biyyaaleessaa kanaan mul'ate waldhabdee Siyaasaatiif furmaata waaraa fi yaada furmaataa ni fida amantaa jedhu akka qaban ibsaniiru. Magaalaa Adaamaa Kutaa Magaalaa Bokuutti Abbaa Gadaa Tashoomaa Simaa akka ibsanitti, mariin biyyaaleessaa kun injifannoo seenaa qabeessa biyyattiin baroota keessatti argatteedha jedhaniiru. Hirmaattonni mariichaa ummata bakka bu'uun Itoophiyaaf furmaata caalu kaa'uuf mari'achaa akka jiran ibsaniiru. Adeemsi marii kanaa haaloowwanii fi mufannaawwan uummataa darban dhiisuudhaan ijaarsa nagaa waaraatiif bu'uura guddaa akka kaa'u abdii akka qaban dubbataniiru. Mootummaanis ta'e paartileen Siyaasaa yaada furmaataa yaa’ii marii kana irraa dhihaatu kabajuu fi gara hojiitti jijjiiruu irratti tumsuu akka qaban ibsaniiru. Biyyi keenyaa fi ummanni keenya carraa kana argachuu isaaniitti gammadoo ta'uu kan ibsan Abbaa Gadaan kun, yaa’ii marii kana irraa bu'aa guddaa akka eeggatanis dabaluudhaan dubbataniiru. Magaalaa Adaamaatti miseensi Mana Maree Dhimma Islaamummaa Sheek Abdulqaadir Ahimed akka ibsanitti, mariin biyyaaleessaa kun mufannawwan bara dheeraa ture karaa guutuu ta'een ni fura abdii jedhu qabu. Keessattuu waldhabdee siyaasaa biyyattii keessa turan furuuf furmaatni tokkichi marii qofa ta'uu ibsaniiru. Mariichaan furmaata gaariin ni dhufa abdii jedhu akka qaban kan dubbatan Sheek Abdulqaadir, raawwii isaatiifis gahee isaan irraa eeggamu akka bahatan dubbataniiru. Hayyoonni, paartileen siyaasaa , hidhattonni duraanii, bakka bu'oonni amantaa, Hoggantoonni Hawaasaa, Dubaroonni, Qaama Miidhamtoonni, Qaamoleen Nageenyaa dabalataanis Itoophiyaanonni ala jiraatan yaa’ii irratti hirmaatan ta'uu isaatiin gammaduu isaanii ibsaniiru. Adeemsi marii kanaa ajandaa walitti qabuu irraa jalqabee hunda kan hammatee fi hirmaachisaa akka ture kan ibsan Sheek Abdulqaadir, adeemsi kun biyya keenyaaf furmaata waaraa ni fida kan jedhu amantaa guutuu akka qaban dubbataniiru

Hagayya 13/2018 (ENA): Komishiniin Marii Biyyaalessaa Itoophiyaa, yaada furmaataa fi ajandaa gareewwan saddeet keessatti walitti qabaman gara sanada tokkootti walitti qindeessuun xumuramuusaa beeksise. Itti-Aantuun Komishinaara Komishinichaa, Komishinaar Hiruut Gabrasillaasee, ibsa kennaniin, hirmaattonni 120 gareewwan saddeet irraa walitti dhufan, hojichi of-eeggannoofi xiyyeeffannoo guddaa waan gaafatuuf, guyyoota darban keessatti hojjechaa turuu ibsaniiru. Sanadichi erga qophaa’ee booda gareewwan hundaaf dhiyaatee, gareewwanis sanada irratti yaada dabalataa fi galtee kennanii turuu himaniiru. Komishinarittin gareen qindeessaa galteewwan xumuraa kenname hunda sanada keessatti hammachiisuun, har’a guutummaatti akka xumuru ibsaniiru. Sanadichi erga galteewwan dabalataa hammachiisee xumuramee booda, boru hirmaattota marichaa kuma Afuriif akka dhiyaatuus beeksisaniiru. Komishinaar Hiruut Gabrasillaaseen, adeemsi marii biyyaalessaa sadarkaa murteessaa fi boqonnaa gaariirra ga’uusaa ibsaniiru. Dabalataanis uummanni odeeffannoo hin mirkanoofneefi dhugaarraa fagaate dhaggeeffachuu irraa of qusachuun, miidiyaalee dhugaa bu'uureffachuun gabaasaa fi ibsa Komishinii Marii Biyyaalessaan kennamu qofa hordofuu akka qabu waamicha dhiyeessaniiru

Hagayya 12/2018 (ENA): Mariin biyyaalessaa nageenya waaraa mirkaneessuun Itoophiyaa fooyyee qabdu dhugoomsuuf carraa guddaa uuma jedhanii akka abdatan jiraattonni Godina Harargee Bahaa Aanaa Qumbii ibsan. Yaa'iin walii galaa Marii Biyaalessaa Itoophiyaa Adoolessa 8 bara 2018 A.L.I jalqabee Wiirtuu Konveenshinii Idil-Addunyaa Finfinneetti gaggeeffamaa jira. Yaa'ii kana irratti bakka bu'oonni uummataa kuma afur kanneen biyya keessaa fi biyya alaa jiraatan bakka bu'an, dhimmoota gurguddoo saddeet irratti waliigalteerra gahuuf marii hirmaachisaa ta'e taasisaa jiru. Dhimma kana ilaalchisee jiraattonni Godina Harargee Bahaa Aanaa Qumbii ENA’f yaada kennani, mariin kun nageenya waaraa mirkaneessuun Itoophiyaa fooyyee qabdu dhugoomsuuf carraa guddaa uuma jedhaniiru. Jiraataan Aanichaa Ganda Hariiroo Obbo Ibiraahim Mahaammad akka jedhanitti; odeeffannoo Miidiyaarraa argataniin yaa'ii marii biyyaalessaa irratti adeemsi haala ifaa fi abdachiisaa ta'een gaggeeffamaa jiraachuusaa akka hubatan ibsaniiru. Mariin kun aadaan wal dhaggeeffachuu fi waliigaltee kan irratti mul'ate, Itoophiyaa fooyyee qabdu ijaaruuf carraa fi abdii kan qabu carraa guddina biyyaa cimsuu fi nageenya kan ariifachiisu uuma jedhanii amanuu isaanii ibsaniiru. Obbo Husseens mariin kun Itoophiyaa fooyyee qabdu dhugoomsuuf carraa guddaa kan uume ta'uu eeraanii, biyyaa fi uummataaf waan caalu qabatees akka dhufu abdii qaban ibsaniiru. Jiraataan ganda sanaa kan biraan Obbo Ahmed Mahammad gama isaaniitiin; dhimmoota waliinii irratti waliigaltee uumuu waltajjii marii taasiisuun isaa mataan isaa milkaa'ina guddaadha jedhaniiru. #Ena Afaan Oromoo #TOI #Ena #

Hagayya 12/2018 (ENA) - Hoggantoonni seeraan alaa ABUT filannoon dhumaa qaban osoo yeroon isaanitti hin darbiin harka isaanii Mootummaa Federaalaatti kennuu dha jedhan hundessaan ABUT duraanii Dr.Aregaawwii Barhee. Dr. Aregaawwii Barhee ENAtti akka himanitti, Itoophiyaan biyya cimtuu qormaata ishee mudate hunda injifannoon ce'uuf muuxannoo qabdudha jedhaniiru. Kanaan walqabatee, yaaliin gareen Seeraan Alaa ABUT yeroo adda addaatti ergama humnoota alaa fudhachuun Itoophiyaa jeequuf godhe guutummaatti hin milkoofne jedhaniiru. Ammas taanaan, carraaqqiin inni qaama balleessaa kanaa ta'uun godhu gonkumaa kan hin milkoofnee fi eessayyuu ga'u kan hin dandeenye ta'uu ibsaniiru. Shaabiyaan muka gogedha kan jedhan Dr. Aregaawwiin, dargaggoota Eertiraa fixee ammas dargaggoota Tigiraay kaayyoo isaaf itti fayyadamuuf carraaqaa jira jedhaniiru. Gareen seeraan alaa ABUT garuu garee goge kana waliin maxxanee tattaafachuunsaa dhumni isaa baduu qofa ta'uusaa ibsaniiru. Kanaafuu, hoggantoonni garee seeraan alaa kun filannoon dhumaa qaban karaa badisaa kanaan dura hordofaa turan dhiisuun harka isaanii Mootummaa Federaalaatti kennuu akka ta'e gorsaniiru. Mootummaan Federaalaa deddeebisee harka isaa nageenyaaf diriirsaa turuu isaa fi hidhattoonni baay'eenis waamicha kana fudhachuun gara jireenya nagaatti deebi'aa jiru jedhaniiru. Akka hidhattoota biroo hunda, hoggantoonni garee seeraan alaa ABUT carraa nageenyaa dhiyaateefitti akka fayyadaman cimsani dhaamaniiru. Mootummaan Federaalaa yeroo hoggantoonni garee kanaa filannoo nageenyaa hordofan akka hidhattoota birootti akka isaan simatuuf gahee nurraa eegamu ni bahanna jedhaniiru.

Hagayya 11 bara 2018 Bakka bu'oonni yaada ajeendaa walitti qaban 15 gareewwan hojii saddeettan irraa walitti babbahan yaada ajeendaa qindeessan garee hojii isaaniitiif dhiyeessanii jiru. Gareewwan hojii miseensota 500 qaban saddeettan irraa tokkoon tokkoo isaanii irraa bakka bu'oonni 15, walumaagalatti miseensota 120 qabu Kamisa darbe Hagayya 7 bara 2018 irraa eegalee gareewwan hojii hundumaa keessatti yaada ajeendaa ka'an caqasuudhaan yaada qindaawaa dhiyeessuu kan dandeessisu hojii hojjechaa turaniiru.   Bakka bu'oonni garee hojii tokkoon tokkoos yaada ajeendaa garee isaanii irra deebii jiru dhabamsiisuun, yaadota hin qindaa'iin gurmeessuun sanada qindaawaa qopheessuudhaan har'a Hagayya 11bara 2018 waaree booda garee hojii miseensota 500 qabuuf dhiyeessaniiru. Gareewwan hojii saddeettan ajeendaawwan gurmaa'an dhiyaatanii qindeessuu fi yaada dabalataa irratti dabaluudhaan sanadni dhumaa akka qophaawuuf gareewwan qindeessaniif deebisaniiru. Gareewwan yaada dabalataa walitti qabuudhaan yaada ajeendaa walsimsiisanis yaadota kennamaniif sagantaa boruu ganamaa keessatti hammatachiisuun gareewwan hojii isaaniitiif sagantaa waaree boodatiin irra deebi’uun dhiyeessuudhaan akka raggaasisan ni eegama.    

Komishiniin Marii Biyyaalessaa Itoophiyaa adeemsa walabummaa, hammattummaafi hirmaachiisummaa marii biyyaalessaa ilaalchisee ibsa kenneera. Komishinichi Labsii Lakkoofsa 1265/2014’n kan hundeeffame, mariin biyyaalessaa Itoophiyaa keessatti nagaa waaraa, waliigaltee fi sirni dimokraatawaa akka dagaaguuf faayidaa biyyaalessaa olaanaa qabu hubachuun, hojiiwwan hedduu raawwachaa tureera. Waltajjiin Marii Biyyaalessaa Itoophiyaa, Adoolessa 08/2018 ifatti sirna guddaan kan jalqabame, Komishinichi sirna hojii fi karoora ofii isaa bilisaa fi walaba ta’een qopheesse irratti hundaa’uun haala gaariin gaggeeffamaa jira. Adeemsi marii biyyaalessaa kun garaagarummaa siyaasaa fi hawaasummaa gadi fagoo fi walxaxaa Itoophiyaa mudachaa ture marii fi karaa nagaa ta’een furuuf carraa seenaa qabeessa banamedha. Adeemsi kun nagaa waaraa fi tokkummaa biyya keenyaa keessatti faayidaa guddaa waan qabuuf, qaamoleen hundi akka kan isaanii ta’etti kunuunsuu qabu. Komishinichi aangoo fi itti gaafatamummaa seeraan kennameef irratti hundaa’uun adeems marichaa walabummaa, hammattummaa fi hirmaachisummaa qaburratti hundaa’uun gaggeessuuf xiyyeeffannoo guddaa kennuun hojjechaa jira. Adeemsi marii kun paartii siyaasaa kamiyyuu, qaama mootummaa ykn garee addaa tokkoof ajandaa siyaasaa isaa raawwachiisuuf kan oolu miti. Kanarra fooyyeefi fudhatamummaa kan qabu fedhiifi ilaalchootni garaagaraa walqixa kan itti dhiyaatan, mariidhaan waliigaltee waliinii uumuuf kan itti hojjetamu waltajjii biyyaalessaadha. Adeemsa kana keessatti rakkoolee fi qormaatileen mudatanis jiru. Yeroodha gara yerootti hanqinoota Komishinicha ykn hirmaattota marii biratti mul’atan, akkasumas komiiwwan uumaman sirnaan furuufi deebii kennuuf carraaqqiin taasifameera. Bu’aan argame kunis tattaaffiiwwan akkasii dabalatee kan argamedha. Kana ilaalchisee, Komishinichi ibsa Paartiin Sochii Biyyaalessaa Amaaraa (ABN) dhiheenya kana hojii fi adeemsa Komishinichaa ilaalchisee baase hordofee ibsa armaan gadii kennuun barbaachisaa ta’ee argameera. Haaluma kanaan, ilaalcha ABN adeemsi kun hammataa fi hirmaachisaa miti jedhu ilaalchisee, Komishinichi qorannoo fi mirkaneessa barbaachisaa erga taasisee booda, xumura paartii siyaasichaa kana akka hin qooddanne ibsuu barbaada. Waltajjii marii biyyaalessaa keessatti, bakka bu’oonni kutaalee hawaasaa garaagaraa, paartileen siyaasaa, dhaabbilee fi waldaalee, qaamolee mootummaa federaalaa, naannolee fi bulchiinsa magaalotaa, Itoophiyaanotni dhibba uumtootniifi beekamoon, humnoota duraanii hidhatan duraanii socho’aa turaniifi waamicha karaa nagaa fudhachuun galan, hawaasa diyaasporaa fi qaamoleen dhimmi ilaallatu biroo bakka bu’uummaan, sagaleewwan garaagaraa adeemsa kana keessatti hirmaachaa fi dhaggeeffatamaa jiru. ABN’nis paartilee siyaasaa hanga ammaatti adeemsa marii kana keessatti dammaqinaan hirmaannaa taasisan keessaa isa tokkodha. Komishinichi komiifi iyyata hirmaataa marichaa kamiyyuu salphaatti kan bira darbu miti. Komiiwwan qaamolee garaagaraa, ABN dabalatee, dhiyeessaniifis sirna furmaata komii irratti hundaa’uun deebii kennaa jira. Yaadota ijaarsaa fi komiiwwan adeemsa marii fooyyessuuf dhiyaatanis sirnaan ilaaluun, hanga adeemsa marii fudhatama qabuufi bu’a qabeessa taasisuuf gumaachanitti, akka galteetti fayyadamuuf Komishinichi qophiidha. Kanaaf, Komishiniin Marii Biyyaalessaa Itoophiyaa carraa kanaan ABN fi qaamolee dhimmi ilaallatu biroo adeemsa marii isa hafe keessatti dammaqinaan akka hirmaataniifi waliigaltee waliinii uumuuf akka waliin hojjetan kabajaan waamicha dhiyeessa. Marii biyyaalessaa jechuun injifannoo gama tokkoo ykn mo’icha gama biraa miti. Marichi adeemsa Itoophiyaan rakkoolee ishee mudataniif furmaata waliinii ittiin barbaaddu, kan hundumaaf bu’aa fi injifannoo fiduuf gargaarudha. Komishinichis sagalee lammiilee fi hirmaattota marii hunda walqixa dhaggeeffachuufi adeemsa kana bilisummaafi walabummaan gaggeessuuf kutannoo qabu irra deebiin mirkaneessa. Dhumarratti, Komishinichi uummattoota Itoophiyaa, paartilee siyaasaa, waldaalee siiviikiifi dhaabbilee garaagaraa, milkaa’ina marii kanaaf gumaacha gaariifi itti fufiinsa qabu taasisan hundi ammas akkaataa jalqabaniin cimsanii akka itti fufan cimsee kabajaan gaafateera. Itiyoophiyaan Mari’achaa jirti! Komishinii Marii Biyyaalessaa Itoophiyaa! Hagayya 11/2018 Finfinnee