Dadka caanka ah ee sameeya nuxurka baraha bulshada waa in ay helaan xorriyad ay si madax-bannaan ugu shaqeeyaan, si loo helo nidaam sharci oo u oggolaanaya in ay si ammaan ah oo xor ah u shaqeeyaan, si loo gaaro guusha Ajandaha 2063

Addis Ababa, Duugato 30/2018 (ENA): Ka qaybgalayaasha dood cilmiyeed ka dhacay Shirweynaha ugu horreeya ee dadka caanka ka ah Baraha Bulshada Afrika ayaa sheegay in si loo gaaro Ajandaha 2063 ee Midowga Afrika, ay lagama maarmaan tahay in dadka sameeya nuxurka saameyntana leh ay helaan helaan xorriyad shaqo iyo nidaam sharci oo taageera.

Shirkan oo ay si wadajir ah u soo qabanqaabiyeen Pulse of Africa iyo AGA Tech Enterprise, kuna qabsoomay Madxafka xuska Adhwa, ayaa lagu qabtay halku-dhigga “Doorka Dadka saamaynta leh si ay Afrika u noqoto mid wanaagsan”.

Shirkan ayaa diiradda saaraya dhiirrigelinta dadka saameynta ku leh baraha bulshada, xoojinta dhaqaalaha dhijitaalka ah, abuurista iskaashi, iyo gaarista himilooyinka Ajandaha 2063 ee Midowga Afrika.

Ka qaybgalayaashu waxay sidoo kale ka wada hadlayeen sidii Afrika u dhisi lahayd sheekadeeda gaarka ah, kor loogu qaadi lahaa kalsoonida qaaradda, loona abuuri lahaa aqoonsi Afrikaan oo mideysan.

Safiirka ku-xigeenka joogtada ah ee Itoobiya ee Midowga Afrika, Berhaane Dhariba, ayaa sheegay in Ajandaha 2063 uu yahay qorshe 50 sano ah oo lagu hagayo mustaqbalka Afrika, laguna doonayo in qaaraddu noqoto mid isku dhafan, nabad ah oo barwaaqo ah.

Waxa uu xusay in dalalka Afrika ay muhiim tahay in ay siyaasadohooda ku daraan qorshayaasha Midowga Afrika si loo gaaro horumar wadajir ah.

Wuxuu sidoo kale sheegay in Itoobiya ay horumar weyn ka sameyneyso isbeddelka dhijitaalka ah, isla markaana ay noqotay tusaale lagu dayan karo.

Dhinaca kale, khubarada ayaa sheegay in shaqooyinka dhijitaalka ah ee Itoobiya uu u suurtageliyay sameeyayaasha nuxurka baraha bulshada fursado ballaaran oo ay ku shaqeeyaan.

Qareenka caalamiga ah ee xuquuqda aadanaha, Dr. Ashagre Cabdi, ayaa sheegay in muhiim ay tahay in la abuuro sharciyo iyo nidaam shaqo oo u oggolaanaya dadka saameynta leh in ay si xor ah oo aan cadaadis lahayn u shaqeeyaan.

Sidoo kale, waxaa carrabka lagu adkeeyay in dhalinyarada Afrika ay yihiin hoggaamiyeyaasha mustaqbalka ee dhijitaalka, sidaas darteedna loo baahan yahay in la abuuro jawi u oggolaanaya in ay si xor ah u hal-abuuraan iyagoo ilaalinaya madaxbannaanida dalalkooda.

Ugu dambeyntii, ka qaybgalayaashu waxay isku raaceen in si loo gaaro Ajandaha 2063, loo baahan yahay in la xoojiyo ka shaqeynta dhalinyarada iyo in la taageero dadka sameeya nuxurka baraha bulshada si ay u gutaan waajibaadkooda.

#WWI  #Wakaaladda_Wararka_Itoobiya