Itoobiya ayaa ka dhigatay maaraynta deymaha ee waarta mid ka mid ah tiirarka istaraatiijiga ah ee dib-u-habaynta dhaqaalaha guud ee dalka— Axmed Shide

Addis Ababa, Duugato 10/2018 (ENA): Kulanka sannadlaha ah ee ay qabtaan Bangiga Aduunka iyo Hay'adda Lacagta Aduunka ayaa ka socda Washington DC, halkaas oo wasiirku ka qayb galay shir dhinac socday oo ku saabsanaa deymaha dowladaha.

Intii lagu jiray kulanka, Itoobiya waxay muujisay qaddarinta ay u hayso doorka madashu ka ciyaarayso abuurista wada-hadal wax ku ool ah oo dhex mara dalalka deymaha lagu leeyahay, deyn bixiyeyaasha dowladaha, kuwa gaarka ah iyo hay’adaha maaliyadeed ee caalamiga ah.

Wasiir Axmed Shide wuxuu sharaxay halka ay marayso hannaanka dib-u-habaynta deymaha ee Itoobiya ay ka waddo qaabka wadajirka ah ee G20.

Wuxuu tilmaamay in hannaanka wada-xaajoodku muujinayo iskaashi xooggan oo lala leeyahay bahwadaagta, isla markaana uu caddeyn u yahay sida ay dowladda uga go’an tahay xaqiijinta waaritaanka deymaha iyo xasilinta dhaqaalaha.

Wasiirku wuxuu carrabka ku adkeeyay in si heshiiska dib-u-habaynta deymaha u gaaro yoolkiisa, ay muhiim tahay in dhammaan daneeyayaashu bixiyaan taageero isku dubbaridan oo degdeg ah.

Itoobiya waxay ku baaqday in la xoojiyo ka qayb-galka iyo taageerada wax ku oolka ah ee laga filayo deyn bixiyeyaasha iyo hay’adaha maaliyadeed ee caalamiga ah si ay u sii waddo hawlaha dib-u-habaynta iyo xaqiijinta xasilloonida dhaqaale.

Dalka ayaa caddeeyay in maaraynta deymaha ee waarta ay qayb ka tahay dib-u-habaynta dhaqaalaha, taas oo diiradda saaraysa anshaxa miisaaniyadda, kordhinta dakhliga gudaha, iyo koboc dhaqaale oo loo dhan yahay.

Dowladdu waxay mar kale adkaysay mowqifkeeda ku aaddan in fursadaha ka dhasha dib-u-habaynta deymaha loo adeegsado koboc dhaqaale oo waara iyo gaarista yoolalka horumarineed.

Ka qayb-galka Itoobiya ee dooddan caalamiga ah wuxuu muujinayaa doorkeeda firfircoon ee xiriirrada maaliyadeed ee caalamka iyo sida ay uga go’an tahay inay la shaqeyso bahwadaagta si si wadajir ah loogu xalliyo nuglaanta deymaha, sida lagu sheegay war ka soo baxay Wasaaradda Maaliyadda.

#WWI  #Wakaaladda_Wararka_Itoobiya