Itoobiya maanta waxay ganacsi ugu diyaarsan tahay si ka wanaagsan sidii hore

Xafiiska Ra’iisul Wasaaraha ayaa shaaciyay in Itoobiya ay hadda si aad uga wanaagsan sidii hore ugu diyaarsan tahay ganacsiga caalamiga ah.

War lagu baahiyay bogga rasmiga ah ayaa lagu sheegay in dowladda Itoobiya, intii lagu jiray madasha Maalgasho Itoobiya 2026, ay heshiisyo maalgashi oo taariikhi ah oo dhan 13.1 bilyan oo doolar la saxiixatay bahwadaag ka kala yimid Shiinaha, Booland, Hindiya, Singaaboor iyo Kiinya.

Heshiisyadan oo diiradda saaraya tamarta la cusboonaysiin karo, macdanta iyo ammonia cagaaran ayaa muujinaya in ajandaha dib-u-habaynta dhaqaalaha gudaha uu keenayo natiijooyin muuqda.

Waxaa sidoo kale la xusay in tallaabooyin geesinimo leh sida xorreynta sicirka sarrifka lacagaha qalaad iyo furista suuqyada bangiyada iyo isgaarsiinta ay abuureen jawi maalgashi oo hufan oo soo jiidasho leh.

Waxaa la tilmaamay in aagagga dhaqaale ee gaarka ah ee casriga ah iyo ka faa’iidaysiga suuqa xorta ah ee qaaradda Afrika ay Itoobiya u sameeyeen marin ku habboon suuqyada caalamiga ah.

Xafiisku wuxuu sheegay in horumarkan laga dareemayo dhammaan qeybaha istiraatiijiga ah, gaar ahaan ka faa’iidaysiga khayraadka tamarta la cusboonaysiin karo ee ka dhashay mashruuca weyn ee biyo-xireenka, iyo horumarka laga sameeyay mashaariicda qoraxda iyo hydrogen-ka, halka dhinaca kale wax-soo-saarka macdanta si xoog leh loo horumarinayo.

Koboca warshadaha ayaa dardargelin ku socda iyadoo la dhisayo aagag dhaqaale oo cusub, halka waaxda tiknoolajiyadda isgaarsiinta iyo macluumaadkuna ay si hufan ugu socoto isbeddel dijitaal ah.

Iyadoo ay Itoobiya leedahay isku xirka caalamiga ah ee duulimaadyada iyo dhaxal dhaqameed qani ah, waxay noqotay meel soo jiidasho leh oo loogu talagalay ganacsiga iyo dalxiiska caalamiga ah.

Ugu dambayn, Xafiiska Ra’iisul Wasaaraha ayaa ugu baaqay bulshada caalamka inay la yeeshaan Itoobiya iskaashi heer sare ah, isagoo adkeeyay in Itoobiya maanta ganacsi uga diyaarsan tahay si ka wanaagsan sidii hore.

#WWI 
#Wakaaladda_Wararka_Itoobiya