Turkiye waxay doorbidaysaa inay xoojiso saaxiibtinimada muddada-dheer ee ay la leedahay Itoobiya – Madaxweyne Rajab Dayib Erdogan

Addis Ababa, Cirir 10/2018 (ENA): Madaxweynaha Turkiye Rajab Dayib Erdogan ayaa sheegay in Turkey ay rabto in ay sii xoojiso iskaashiga muddada-dheer ee ay la leedahay Itoobiya.

 

Ra’iisul Wasaare Dr. Abiy Ahmed ayaa la kulmay Madaxweyne Rajab Dayib Erdogan, waxaana ay ka wada hadleen arrimo muhiim ah.

 

Kadib kulanka, labada hoggaamiye waxay wada bixiyeen war- saxaafadeed.

 

Madaxweyne Rajab Dayib Erdogan ayaa tilmaamay in Turkiye ay qiime weyn siiso iskaashiga ay la leedahay Itoobiya iyo in ay doonayso in ay xoojiso saaxiibtinimada labada dal.

 

Waxay carabka ku adkeeyeen in iskaashigooda uu muhiim u yahay dhinacyada dhaqaalaha, ganacsiga, horumarka aasaasiga ah, dhaqanka, waxbarashada iyo meelo kale, si loo xoojiyo wadajirka labada dhinac.

 

Madaxweynaha Turkiye ayaa sheegay in xiriirka labada dal uu ku saleysan yahay iskaashi siman oo wadajir ah, isla markaana uu sii xoojin doono.

Dhanka kale, Madaxweynaha Turkiye ayaa amaanay Ra’iisul Wasaare Abiy Axmed dadaalka uu ku sameeyay isbeddelada siyaasadeed, bulsho iyo dhaqaale ee Itoobiya.

 

Waxaa intaa dheer, wuxuu xusay in Itoobiya ay muddo dheer haysatay hoggaan adag iyo maamul tusaale u ah, taas oo muhiim u ah xoojinta xiriirka labada dal iyo gobolka.

 

Madaxweynaha Turkiye ayaa sheegay in xalinta dhibaatooyinka ka jira qaaradda Afrika aysan ku xirnayn faragelin dibadeed, balse ay u baahan tahay iskaashi dhexmara dalalka gobolka.

 

Waxa uu kaloo tilmaamay in fursadaha dhaqaale ee qaaradda Afrika ay yihiin kuwo muhiim ah, loona baahan yahay in si wadajir ah loo horumariyo.

 

Madaxweyne Rajab Dayib Erdogan ayaa muujiyay kalsoonida uu ku qabo in booqashadan ay keeni doonto natiijooyin wanaagsan, isla markaana ay gacan ka geysan doonto xoojinta nabadda iyo xasilloonida mustaqbalka.

 

Ra’iisul Wasaare Dr. Abiy Axmed ayaa u mahadceliyay Madaxweynaha Turkiue dadaalkiisa iyo taageeradiisa joogtada ah.