Shirkado waaweyn oo Talyaani ah ayaa muujiyay rabitaankooda xooggan ee ah inay si firfircoon uga qayb qaataan mashaariicda horumarineed ee Itoobiya

Addis Ababa, Dharabley 22/2018 (ENA): Shirkado waaweyn oo Talyaani ah ayaa muujiyay rabitaan xooggan oo ay ku doonayaan inay si firfircoon uga qayb qaataan mashaariicda horumarineed ee ka socda Itoobiya, sida uu sheegay Safiirka Talyaaniga u fadhiya Itoobiya, Danjire Sam Fabrisi.

Danjiraha oo wareysi siiyay WWI ayaa xusay in Itoobiya iyo Talyaanigu leeyihiin xiriir taariikhi ah oo soo jireen ah oo adag, isla markaana dowladda Talyaanigu ay si gaar ah diiradda u saarayso taageeridda safarka horumarka ee Itoobiya.

Waxa uu intaas ku daray in dowladda Talyaanigu ay ka shaqaynayso taageeridda dadaallada horumarineed ee Itoobiya iyada oo adeegsanaysa fursado maalgashi oo kala duwan.

Gaar ahaan, Danjiruhu waxa uu tilmaamay in Qorshaha Mattei uu yahay aragti fog oo lagu xoojinayo iskaashiga istiraatiijiyadeed ee u dhexeeya labada dal.

Isagoo xusay in Itoobiya ay haatan ku jirto marxalad sare oo dib-u-habayn iyo horumar ah, Danjiruhu waxa uu sheegay in shirkadaha waaweyn ee Talyaanigu ay doonayaan inay ka qayb qaataan mashaariicda horumarineed ee dalka si ay u muujiyaan kaalintooda.

Sidoo kale, waxa uu sheegay in Talyaanigu xoojin doono dadaallada uu ku taageerayo Itoobiya ee Midowga Yurub iyo fagaarayaasha caalamiga ah ee kala duwan.

Danjiruhu waxa uu tilmaamay in Itoobiya ay leedahay tiro badan oo dhalinyaro ah oo firfircoon, isla markaana awooddan loo adeegsan karo iskaashi ku saabsan waxbarashada, horumarinta xirfadaha, cilmi-baarista sayniska, is-dhaafsiga dhaqanka iyo ilaalinta dhaxalka taariikheed, kuwaas oo noqday tiirarka ugu waaweyn ee iskaashiga labada dal.

Waxa uu carrabka ku adkeeyay in Talyaanigu sii ahaan doono saaxiib taariikhi ah oo lagu kalsoonaan karo oo Itoobiya ay leedahay, isla markaana uu la wadaagi doono khibraddiisa sare si loo taageero rajada horumarineed ee dalka si waara.

Isagoo xusay in xaaladda caalamka ee hadda jirta ay tahay mid adag, Danjiruhu waxa uu sheegay in wada-hadallada diblomaasiyadeed iyo xiriirka laba-geesoodka ah ay door muhiim ah ka ciyaaraan nabadda iyo xasilloonida gobolka.

Shirka Talyaaniga iyo Afrika ayaa la filayaa in uu ka qabsoomo Addis Ababa 6-da bisha Cirir 2018.

Ujeeddooyinka ugu waaweyn ee shirka ayaa ah horumarka waara, kaabeyaasha dhaqaalaha, tamarta, waxbarashada iyo tababarka, caafimaadka iyo beeraha. Sidoo kale, waxa la filayaa in si gaar ah loo xoojiyo Qorshaha Mattei, oo ah qaab-dhismeedka iskaashiga istiraatiijiyadeed ee u dhexeeya Talyaaniga iyo Afrika.

Shirka ayaa sidoo kale lagu qiimeyn doonaa natiijooyinka ilaa hadda la gaadhay, iyadoo la filayo in la dejiyo qaybaha mudnaanta gaarka ah lasiin doono ee ku saabsan hawlaha wadajirka ah ee mustaqbalka.

#WWI 
#Wakaaladda_Wararka_Itoobiya