Qalabka caafimaad ee casriga ah ayaa si muuqata u wanaajinaya tayada adeegyada

Addis Ababa, Dharabley 19/2018 (ENA): Wasaaradda Caafimaadka ayaa sheegtay in qalabka iyo agabka caafimaad ee casriga ah ee la gaarsiinayo xarumaha caafimaadka ay si dhab ah u wanaajinayaan tayada adeegyada la bixiyo.

Hay’adda Adeegga Bixinta Daawooyinka dalka ayaa, iyadoo kaashanaysa Wasaaradda Caafimaadka, gaarsiisay mashiinno iyo qalab caafimaad Maamulka Magaalada Addis Ababa, Maamulka Diri Dhaba iyo deegaano kala duwan oo dalka ah.

Munasaabaddaas waxaa lagu wareejiyay 81 mashiin oo shaybaareed oo loo yaqaan “CBC”, qalab caafimaad oo kale iyo walxo shaybaar.

Wasiiru Dowlaha Caafimaadka Frehiwot Abebe ayaa sheegtay in dadaallada lagu xoojinayo nidaamka caafimaadka si uu u noqdo mid adag oo lagu kalsoonaan karo ay horseedeen natiijooyin la taaban karo.

Waxay tilmaantay in mashiinnada iyo agabka caafimaad ee maanta la wareejiyay ay siinayaan nidaamka caafimaadka awood dheeraad ah oo wax ku ool ah.

Sidoo kale, waxay carrabka ku adkeysay in agabkan ay kaalin muhiim ah ka qaadanayaan dhimista dhimashada hooyada iyo dhallaanka, ka hortagga cudurrada faafa iyo kuwa aan faafin, iyo daryeelka bukaanada si loo daweeyo loona badbaadiyo noloshooda.

Waxay intaa ku dartay in qalabka caafimaadkani uu gacan ka geysanayo xaqiijinta tayada adeegyada caafimaadka iyo in la helo adeeg shaybaar oo casri ah oo si fudud loo gaari karo.

Dhanka kale, Agaasimaha Guud ee Hay’adda Adeegga Bixinta Daawooyinka ee dalka, Dr. Cabdiqaadir Galgalo, ayaa sheegay in hay’addu ay si joogto ah ugu hawlan tahay ballaarinta helitaanka adeegyada caafimaadka iyadoo xarumaha caafimaadka siinaysa qalab caafimaad iyo daawooyin.

Wuxuu xusay in hay’addu ay heshiisyo la saxiixatay in ka badan 5,000 xarumood, kuwaas oo ay si joogto ah u siiso agab caafimaad.

Sidoo kale, waxa uu sheegay in hay’addu ay saxiixday heshiisyo cusub oo u oggolaanaya inay mustaqbalka dhow sii ballaariso bixinta qalab iyo agab caafimaad oo dheeraad ah oo la gaarsiinayo xarumaha caafimaadka.

#WWI 
#Wakaaladda_Wararka_Itoobiya